الخلل فى فواتير التليفونات المنزلية فى مصر

[se_ Elsyed]

تذكرت هذه الجُملة من فيلم الزوجة التانية عن العُمدة الظالم اللي بيقلب شعبه .. وواحده ست كبيرة في السن غلبانه طول الفيلم تصرخ لأنهم سحبوا منها رخصة الجاموسة وأستولى عليها واتصادرت في الزريبة يا ناقص ..

تعود مشكلة جاموستي إسم الله على مقامكم أسها السادة إلى أول امس وانا باتصفح جريدة الأهرام الغراء ... ولقيتهم عاملين نيو لوكلوك وفيه تحت في الصفحة كده موقع للمصرية للأتصالات ( إتكلم أرضي يابن بلدي ) وممكن من خلاله تشوف فاتورة تليفون بيتك لو كان لسه عندك بيت ما أتصادرش عشان سعادتك مبلطج وما دفعتش الضريبة العأرية

وانا يا حضرت العُمده كما تعلم مغترب في أرض الله لخلق الله

وبانزل مصر كل صيف معايا الفيديو ومروحة السقف اللي فيها نجفة منها فيها وساعات بانزل بكاسيت من اللي بيجيب صوت العرب

دخلت ألعب أول امبارح وقلت اشوف فاتورتي ...

وإذا بي أصرخ وأجري في الشارع زي المجنون وأنا بأقول

جاموستي يا عمده جاموستي يا عمده

لقيت اخر فاتورة أيها السادة الكرام ولا يحلى الكلام الا بذكر النبي عليه الصلاة والسلام ... لقيتها 127 ج عن شهر أكتوبر ونوفيمبر وديسيمبر

وأنا فين بقى يا سادة ؟

انا هنا هنا يابن الحلال .... لا عاوزه جاه ولا كتر كلام

انا بره مصر انا وعيالي .. وده أساساً بيت العز .. قصدي بيت العيله ... يعني اخواتي مش هايقلبوني ويسرقوا العده في غيابي ... لإن كل واحد عنده بدل التليفون 10 ... وولا ليكوا عليه يمين ... لا أتذكر أخر مره لمست فيها قرص التليفون الأرضي في مصر أو هنا ... لان الموبيل معايا وأنا باكسل اقوم لحد تليفون البيت ... كمان كل أرقامي متسجله عليه ( خايف الشركة تقول لي ما هو التليفون الارضي كان قدامك ما اتكلمتش ليه ؟؟؟؟؟ )

قلت أشوف الديتليز أي التفاصيل بلغه اهل العرب

لقيت رسوم أشتراك ييجي 40 ج ..

قلت وماله حقها ولا مش حقها ؟

وإيشي ضريبة مبييعات على ضريبة رؤوس

و

و

و

57 ج مكالمات زيادة

هع هع هع هع

يعني الشقة مسكونة بالعفاريت وأهلنا اللي تحت الأرض وبيستخدموا التليفون وقولنا ماشي ... لكن حتى العفريت اللي ييجي من حظي يطلع قليل الذوق ولا يفهم في أصول الضيافة ؟

يعني مش لما يتكلم ... يبقى كلمتين ورد غطاهم وبالمختصر المفيد ؟

( والله خايف تكون عفريته مش عفريت ... هما بيعشقوا الرغي في التليفونات ومناقشة كافة القضايا على الساحتين الدولية والعربية )

يعني عفريت بييكلم امه يطمن عليها ويقول لها أنا يا ماما نزلت في شقة واحد اسمه سين سين وراجل ذوق ذوق سايب لنا الشقة بما فيها .. وكمان عنده بلاي ستشين بنلعب به هنا وبنتفرج على قناة دريم تو وطنط منى الشاذلي ..

وبدل سيادته ما يقطم في الكلام ويقصر ويلم المتكسر .... يروح حاكي لها كل يوم قصة حياته من ساعة ما صحي لحد ما اتخمد ..

وإدفع يا معلم سين سين

طب ده يرضي عفركوش زعيم الجان يا جدعان ؟

انا عارف انه راجل حقاني وما بيرضاش بظلم حد من صبييانه

يرضيك يا عم عفركوش عيالك يبهدلوني ويقطموا وسطي في مكالمات زيادة ؟

بس الحمد لله

آه والله

الحمد لله إني ما عنديش خاصية 0900

وإلا كان حبسوني ويقعدوا يتصلوا بمسابقات أين الكنز ... والسنيورة فين

او عندي خاصية زيرو وكل عفريت يقعد يكلم الحته بتاعته عالمحمول ويحب فيها

او زيرو دولي ويقعدوا بقى يكملوا أخواتهم العفاريت اللي شغالين في الخليج وفي ليبيا

بجد ساعتها كنت أتقهر ... ويبقى وجودي هنا بس عشان أسدد فواتيرهم

-----------

لكن وكتاب الله ما هاسكت

وكتبت شكوى مبللة بدمع العين للسيد عقيل بشير رئيس مجلس أدارة المصرية للأتصالات أبو 600 الف مرتب شهري ... منهم 57 ج من جيبي

ولو ماردش في غضون أسبوع من تاريخ

هاكتب إن شالله لرياسة الجمهورية مباشرة لطويل العمر

شايفك يا عصام يا شوقي وإنت بتضحك وتقولي : موت يا .............

ما تشتمش يا عصام عشان ماتغاباش عليك

انا مش هاسكت يا عصام وهاتشوف

ويا ترجعي لي الجاموسة .

يا على الأقل يصرفوا لي لتر حليب بأثر رجعي عن تلك الفواتير اللي بتجيلي كل شويه وانا ماليش ذنب فيها

[عصام]

بلاش نظلم الحمار معانا فى الموضوع دا من فضلك ..

قالوا الجمل يطلع الشجرة ..

شوف يابنى ..

بمناسبة الاتصالات ..

الفاتورة اللى فاتت أن دفعتها - كالعادة - من خلال الإنترنت بالفيسا كارت ..

لحد هنا وعادى ..

كام يوم وقطعوا عننا الاتصال وسابوا الاستقبال عشان كل شوية ترن علينا واحدة متسجلة وتعايرنا اننا ما دفعناش الفاتورة لسا :waving:

كلمت الشكاوى .. الحقيقة الناس كانت فى غاية الــ ... بتنجان

وكل اللى قالوه روح السنترال اشتكى..

رحت السنترال اشتكيت ..

الراجل قاللى خلاص روح ونام واطمن .. إحنا كدا خدنا خبر .. والتليفون هايخف بكتيره بكرا بالليل ..

يوم والتانى والليفون ولا خف ولا حاجة .. حالته اتنيلت زيادة وقطعوا الاتصال .. :lol:

رحت السنترال تانى ..

واحد بقى غير الأولانى .. قالى إحنا متأسفين .. وان شاء الله خير .. قمت انا ما سكتش ..

قوم طلبت انى اقابل الريس بتاعهم .. قوم ماعرفتش .. ولميت الدور بعد ما عملت شوية سياح .. ومشيت عشان ما اتأخرش على شغلى ..

تانى يوم التليفون اشتغل ..

الكلام دا كان يوم 6 ديسمبر ..

وخلاص

إمبارح لقينا الولية المتسجلة بتتصل بينا وتهددنا انها هاتقطع الحرارة لو ما دفعناش الفاتورة اللى فاتت cld:

[engmido]

المشكلة دى للاسف طولت خااااااااااااااالص وبوخت قوى

حتى ان فيه ناس فى مصر كتير مش بيدفعوا الفواتير من كتر غباوتها والاستهبال بتاع الشركة

والشركة سمعت انه بترفع قضية ع اللى عليهم فواتير ومبلطين فى الخط .........( ولا نافع معاهم شيل العدة :blink: )

طبعا هذا فضلا عن الاشتراك الغريب يعنى الواحد لو مبيتكلمش يلاقى اكتر من 4/3 الفاتورة اشتراكات وضريبة ورسوم و ...و..و..و..و...

الحل الوحيد كما طرح سابقا انه تخش شركة تانية للاتصالات الارضية.............تعمل منافسة زى شركات المحمول فى مصر

اللى حاليا مربيين بعضيهم وشغالين فى عروض لحد ما سعر الدقسقة الموحدة فى فودافون باشا وصل 20 قرش لاى تليفون محمول او حتى تليفون كشك سجاير

هذا فضلا عن تعريفة موبينيل ( نجيب ساويرس خربها)

واتصالات الاماراتية اللى جت قطعت عيش الشركتين التانيين ( كاشفين دماغهم وبيدعوا عليها)

طبعا على سبيل المثال كان كارت ب 10 جنيه تاخد منه 2 جنيه والدقيقة ب نص جنيه ( فطبعا كده خراب بيوت)

[مغتربة]

هو ممكن يكون حد سارق الخط من عندك

يعنى يكون عارف ان انت مسافر و مفيش حد فى البيت

فراح سارق من عندك الخط

و ممكن كمان يكونوا فى الاتصالات بيستهبلوا

انا حصلت معايا قبل كده

فعملت حاجه ظريفه جدا

هى انى رحت السنترال و قدمت طلب برفع الخدمه

و ريحت نفسى

كده متجلكش غير فواتير بالاشتراك بس

و قبل ما تبقى تنزل مصر فى الاجازة

ابقى خلى حد قريبك يروح يرجعهالك قبليعا بيومين تلاته

ده لو انت بتستخدمه اساسا

[se_ Elsyed]

هو ممكن يكون حد سارق الخط من عندك

يعنى يكون عارف ان انت مسافر و مفيش حد فى البيت

فراح سارق من عندك الخط

و ممكن كمان يكونوا فى الاتصالات بيستهبلوا

انا حصلت معايا قبل كده

فعملت حاجه ظريفه جدا

هى انى رحت السنترال و قدمت طلب برفع الخدمه

و ريحت نفسى

كده متجلكش غير فواتير بالاشتراك بس

و قبل ما تبقى تنزل مصر فى الاجازة

ابقى خلى حد قريبك يروح يرجعهالك قبليعا بيومين تلاته

ده لو انت بتستخدمه اساسا

عارفه مين اللي بيسرق الخط يا مغتربة باشا ؟

هما نفسهم

الخط اللي ما علهوش شغل فترة طويلة ... يقوموا ساحبينه وكل واحد يقعد يكمل ام العيال على قفانا

لكن استبعد تماماً فكرة إن حد في الييت يكون سرقة

أما عن رفع الخط

فحصل

وكتاب الله حصل ولما جيت ارجعه دوخت دوخة الأرمله على معاش جوزها - المعاش بتاع السادات اللي هو 14 ج -

ولقيتهم سعادتك سحبوا الخط وأدوه لحد تاني

اعني هنا الخط اللي جاي من السنترال للكابينة الرئيسية وده بيبقى له رقم كودي خاص به ... وبالتالي رقمي ما بقاش له حاجه يتوصل بيها

ولولاش جبت واسطه ما كانش رجع .. وحياتك في يومين

عارفه يا مغتربة

لما تيجي تشتكي وإنتي ما عندكيش زيرو ..

يقولوا بمنتهى البرود

ما نقدرش نعمل لك حاجه لان السيستم ما بيطبعش تفاصيل المكالمات العادية

!!!!!!!!!!!!

------------

عصام بيه

تعالى نعمل جبهة نسميها " فتوات .. ضد المصرية للأتصالات " باتكلم جد

وناخد ضدهم موقف ونكلم بتوع حماية البيئة قصدي حماية المستهلك ونقلب الدنيا عليهم

----------

المهندس ميدو

والله كنت هاقترح الحل ده وهو إن لازم شركة تانية تدخل وتنافس

بس ياريت ما تكونش شركة حكومية أحسن كده هانبقى شاطر ومشطور وبينهم طازج ... ساندوتش يعني

-------------

السؤال هنا بقى

الضغط اللي بيعملوه عالناس ده .. مش يخلي قليلي الثقافة والإيمان ... يستحلوا المال العام ؟

باتكلم جد والله

وسبق إني كلمتكم زمان إني لما جيت أركب تكييف وجبت الكهربائي .. لقيته بيقول لي : إيه رأي سعادتك أوصلهولك صوت العرب ؟ "

قلت له ميرسي .. أنا بأسمع إذاعة القرآن الكريم ..

يعني إيه صوت العرب

قال لي : يعني زي كل الناس ما بيعملوا ونوصلة من البوكس اللي بره الشقة قبل العداد وتبقى في السليمك الأليم ؟

قلت له : امجاد يا عرب .... لأ يا عم .. وصله إذاعة البرنامج العام .. على الأقل أقدر أسمع أبلة فضيلة وربات البيوت براحتي

شوفتوا وصلونا لإيه ولاد الـــــــــــــــــــ ............... إيه ؟

إحذف يا عصام النقط دي مش عاوزين مشرف يمد إيده علينا يابني ... الواحد سنه كبر وما بقاش يستحمل

[سكر]

حاسس انكم بتكلموا فى الرفاهيات

انا السنه الحاليه 2009 قضتها كلها فى مصر ولما نزلت مصر بلدى حببتى

لقيت فاتورة التلفون 1850 جنيه يا حضرات من غير ميكون فى مكالمه واحدة لان الشقه مفهاش بنى ادم واحدا

انا لا اشتكيت ولا عيت

طلعت على السنترال زطلبت من واحد قريبى بس لسته بالارقام

رجع قالى مفيش ارقام قولت خير كدة الخط مش مسروق يوم ابوهم اسود

قالى خلاص خلاص الراجل الموظف قاله حصل خير يوم ولا اتنين والخط هيرج والفاتورة هتتلغى لان فى غلط فى الحساب

ويجعله عامر

[hanzalah]

فى غلط فى الحساب

الكلمة دي سمعتها فين يابقلظ

سمعتها فين يابقلظ

سمعتها فين يابقلظ

آه .. عند ماما نجوى

أو ماما نونا

اثلي اتلخبطت

ياجماعة انا حاسس الموضوع فيه استهبال كبير يوصل درجة والعياذ بالله مافيا

ايوه مافيا زي مافيا سرقة الاعضاء البشرية

دي بقى مافيا سرقة جيوب المواطن البشرية

لان نفس الكمة بتسمعها في فاتةرو الكهربا

شيء عجيب

ومطبوعة كمبيورت برضة !!!!

وبتسمعها في فاتورة المياه

واكيد راح تسمعها في فاتورة الغاز

امال الحكومة الالكترونية فين !!!!!!

والكمبيوتر بتاع الحكومة عنده عشى ليلي مبكر ليه !!

على رأيك

يجعله عامر

بس برضه ما ضاع حق وراءه عبد المطلب

وسمعني بودعك

:blink:

[عصام]

على سيرة فواتير المية

جاتلى فواتير مية مجمعة للسنتين اللى فاتوا ..

كل الفواتير مكتوب فيها الآتى: (كل شهر)

صيانة 2.60 ج

صرف صحى 6.5 ج

دمغات وتنمية 1.2 ج

يعنى أهوه قربنا نوصل العشرة جنيه ولسا ما دخلناش فى الاستهلاك .. :blink:

الاستهلاك بقى ......

متعذر wst::

والوصل الأخير فى كل سنة مكتوب ان الاستهلاك 96 ج

يعنى الاستهلاك عن السنتين 192 ج

والإتاوات عن السنتين 247.2

:lol:

[doha]

عادي جدا ..

من كام سنة كانت فاتورة الكهرباء بتيجي لنا كل شهر مالايقل عن ميتين تلتميت جنيه .. واحنا ندفع .. وكل مرة نعترض نلاقي المحصل يقول ده انتم اقل شقة في العمارة احمدوا ربنا ..

ومرت الشهور الى ان كان يوم بالصدفة نكتشف ان جارتنا بتدفع 15 جنيه فقط لا غير ..

سالنا تاني المحصل .. قال اصل عليكم مبالغ مش متسدده فبتنزل اقساط .. قلنا ماشي .. رحنا قدمنا طلب وشلنا العداد خالص وركبنا واحد جديد ودفعنا كل المبالغ الي على القديم واخذنا ورقة تفيد ذلك ..

شهر والتاني وفجاه الاقي جاي لنا كذا فاتورة مع بعض مطلوب سدادهم منهم فاتورة على العداد القديم .. رحت بنفسي شركه الكهرباء استفسر .. ومعايا الفواتير

ولما طلعت من بين الفواتير فاتورة بـ 90 جنيه مطلوب سدادها واحنا اصلا مسددين .. وبسال المحصل ايه ده ازاي واحنا معانا مخالصة .. قالي اه صحيح .. دي ملهاش لازمه فعلا وراح ساحبها بهدوء ومقطعها !!!!

الخلاصة احد الاعيب شركه الكهرباء انهم بيجيبوا لك احيانا وصل الكهرباء متاخر بعد يوم 25 في الشهر وتسدده وتاخذه عادي بينما الي بيحصل ان قيمه الوصل دي اصلا بتترحل على الشهور التالية على شكل اقساط وبالتالي انت هتدفع الوصل كده مرتين .. وبالغرامه كمان ..

عامه شركه الكهرباء بتتربح من وراء الموضوع ده لان الموظفين لهم نسبه عن التحصيل

اما عن المصرية للاتصالات والي دائما بتجيب لنا الفاتورة بنفس المبلغ سواء كنا في البيت او مسافرين .. كل مرة الفاتورة طبق الاصل العلقة الي فاتت مهما حاولنا نقتصد في الاستهلاك ..

الي سمعته ان بيبقى عندهم مايسمى بالديون المعدومه يعني فواتير خلاص محدش هيسددها لاي سبب سواء اصحابها معذورين او متجاملين .. في كل الاحوال المبالغ الي على الناس دي بتتحمل على فواتير الناس التانية اوتوماتيكيا ..

اقول ايه بس .. ان كنا الي بيسرقوه مننا في الكهرباء ولا التليفون .. يجعلها نار في بطنهم يارب ..

[عادل أبوزيد]

قرأت الموضوع فى الصباح و كان يتكلم عن فواتير التليفونات المنزلية فى مصر و كنت بصدد التعقيب بخبرتى مع "مصلحة التليفونات" ، و قرأت الموضوع الآن ووجدته إمتد ليغطى فواتير التليفونات و إستهلاك المياه و إستهلاك الكهرباء و يربط بين تلك الفواتير أنها تصدر من جهات حكومية أو من شركات أقرب للمصالح الحكومية.

ما سبق كان إستهلالا لابد منه

أبدأ بالنسبة لفواتير التليفونات فى مصر و التفسير الذى أقدمه - و هو تفسير و ليس تبرير - أنه يوجد تداخل فى الفواتير أو over-lap و يرجع فيما يبدو أن التعامل مع قراءات عدادات المكالمات لا تتم لحظيا - كيف ؟ لست أدرى - و عليه قيمة هذه الفاتورة تضم جزءا من فترة سابقة لم تظهر فى فاتورتها وقتها و هذا أمر دارج فى فواتير "مصلحة التليفونات" رغم أنها أصبحت شركة قطاع خاص و شركة غنية جدا و لكنها مازالت تدار بنفس الناس ربما القيادات تغيرت و لكن ما تحت القيادات نفس الأفراد و ليس هذا فقط بل أن التغيير فى أنظمة التشغيل إن كان يحدث تغيير فإنه يجرى بسرعة السلحفاة.

الحل فى نظرى بالنسبة لنا كأفراد نعانى و نشك فى الفواتير هو إستخدام المانع الكودى و هو سلسلة من الأرقام تستخدمها من تليفونك فيتم إغلاق التليفون تماما أو جزئيا و إلى عهد قريب كان الأمر يتطلب منك الذهاب إلى السنترال و تقديم طلب و تأتى فى اليوم التالى أو بعد عدة أيام و تتسلم ورقة فيها المانع الكودى الخاص بك و الذى يمكنك تغيير الرقم السرى له و صيغته مثل

*33*ءءءء*1#

لإغلاق الخط و

#33*ءءءء#

لفتح الخط حيث ءءءء هى الرقم السرى للمانع الكودى.

الآن يمكنك الحصول على مانع كودى بالإتصال من نفس التليفون لرقم 111

المعلومة السابقة بناء على خبرة شخصية حيث أن شغالتنا المحترمة كانت "تحب فى التليفون" ووصلتنى فاتورة بألفين و شوية و بعد الثورة و الإنفعال قمت بإستخدام المانع الكودى و فى الفاتورة التالية وجدت رقم ألفين إلا شوية و السبب إنها مكالمات من الفترة السابقة و لم ترد فى الفاتورة السابقة.

الجديد اليوم بعد قرائتى لهذا الموضوع ظننت أن بيانات الفاتورة الجديدة ظهرت و دخلت موقع فواتير التليفون فوجدت فاتورتين بتاريخ أول نوفمبر و أو ديسمبر و فى كلا منها رقم عن مكالمات زيادة و ضريبة مبيعات !! و لا يوجد إشتراك أو أى شئ آخر !! واضح أن هناك تعديل فى نظام الفواتير بمؤداه تظهر الفواتير شهريا .. سأذهب غدا و أسأل

[عادل أبوزيد]

واضح إن "مصلحة التليفونات" لم يصلها بعد العلم بالخصخصة و هذا تلمسه جليا بزيارة أى مكتب فى أى سنترال وواضح إن الموظفين فى وادى و الوزير و الحكومة الذكية (هل هى ذكية أم زكية) فى واد آخر.

فى حالتنا هذه المطلوب مجرد تعديل تكنولوجى و إذا كانت مرت عدة سنوات على خصخصة "مصلحة التليفونات" فكم مطلوب من الزمن لنضع الأمور فى نصابها ؟

المسألة ليست سياسة و ليست فسادا و لكنها مجرد "خيبة تقيلة" غير مبررة

بالنسبة لإستهلاك الكهرباء و إستهلاك المياه و إستهلاك الغاز - إستهلاك الغاز تم إنشاء شركة مستقلة تابعة لقطاع البترول لتحصيل الفواتير - فالأمر يتطلب هزة من الأعماق تضع الأمور فى نصابها.

[أم مروان]

عادي جدا ..

من كام سنة كانت فاتورة الكهرباء بتيجي لنا كل شهر مالايقل عن ميتين تلتميت جنيه .. واحنا ندفع .. وكل مرة نعترض نلاقي المحصل يقول ده انتم اقل شقة في العمارة احمدوا ربنا ..

ومرت الشهور الى ان كان يوم بالصدفة نكتشف ان جارتنا بتدفع 15 جنيه فقط لا غير ..

سالنا تاني المحصل .. قال اصل عليكم مبالغ مش متسدده فبتنزل اقساط .. قلنا ماشي .. رحنا قدمنا طلب وشلنا العداد خالص وركبنا واحد جديد ودفعنا كل المبالغ الي على القديم واخذنا ورقة تفيد ذلك ..

شهر والتاني وفجاه الاقي جاي لنا كذا فاتورة مع بعض مطلوب سدادهم منهم فاتورة على العداد القديم .. رحت بنفسي شركه الكهرباء استفسر .. ومعايا الفواتير

ولما طلعت من بين الفواتير فاتورة بـ 90 جنيه مطلوب سدادها واحنا اصلا مسددين .. وبسال المحصل ايه ده ازاي واحنا معانا مخالصة .. قالي اه صحيح .. دي ملهاش لازمه فعلا وراح ساحبها بهدوء ومقطعها !!!!

الخلاصة احد الاعيب شركه الكهرباء انهم بيجيبوا لك احيانا وصل الكهرباء متاخر بعد يوم 25 في الشهر وتسدده وتاخذه عادي بينما الي بيحصل ان قيمه الوصل دي اصلا بتترحل على الشهور التالية على شكل اقساط وبالتالي انت هتدفع الوصل كده مرتين .. وبالغرامه كمان ..

عامه شركه الكهرباء بتتربح من وراء الموضوع ده لان الموظفين لهم نسبه عن التحصيل

اما عن المصرية للاتصالات والي دائما بتجيب لنا الفاتورة بنفس المبلغ سواء كنا في البيت او مسافرين .. كل مرة الفاتورة طبق الاصل العلقة الي فاتت مهما حاولنا نقتصد في الاستهلاك ..

الي سمعته ان بيبقى عندهم مايسمى بالديون المعدومه يعني فواتير خلاص محدش هيسددها لاي سبب سواء اصحابها معذورين او متجاملين .. في كل الاحوال المبالغ الي على الناس دي بتتحمل على فواتير الناس التانية اوتوماتيكيا ..

اقول ايه بس .. ان كنا الي بيسرقوه مننا في الكهرباء ولا التليفون .. يجعلها نار في بطنهم يارب ..

للتعليق على فواتير الكهرباء

للعلم انا مهندسة فى شركة الكهرباء

اولا المحصليين مش بيخدوا نسبة على او من التحصيل

ثانبا ارتفاع فاتورة الكهربا ناتج عن 1- حدوث خلل فى العداد

2- الكشاف مش بيقرا العداد وبيحط قراءة من عنده

3- الاستهلاك زاد وبالتالى دخلت فى شريحة تانية اعلى بسعر اعلى

4- يكون العداد اللى عندك ديجيتال والمشكلة انه مع عدم انتظام التوافقيات فى الشبكة العداد يخرف بالزيادة او النقصان وانت وحظك

هذا للعلم والاحاطة wst::

[se_ Elsyed]

يا عادل بيه

يا عادل بيه

سعادتك أنا بره مصر ...

مانع كودي إيه ومانع مائي إيه ؟

دي سرقة في وضح النهار يا فندم ...

[MZohairy]

عزلت من شقه لشقه تانيه في كندا يا سيسو

و كان عندي تليفون ارضي في الشقه الاولى فطلبت من شركة التليفونات تيجي تنقله للشقه التانيه

المهم من زمن انتقالي من الشقه الاولى لإستقراري في الشقه التانيه و تركيب الخط مره تانيه الموضوع استغرق 3 ايام تقريبا كان الخط فيهم لم يستعمل بالطبع

المهم لقيتهم خاصمين قيمة ال 3 ايام دي من الفاتوره الشهريه اللي جاتلي بعد النقل

[se_ Elsyed]

عزلت من شقه لشقه تانيه في كندا يا سيسو

و كان عندي تليفون ارضي في الشقه الاولى فطلبت من شركة التليفونات تيجي تنقله للشقه التانيه

المهم من زمن انتقالي من الشقه الاولى لإستقراري في الشقه التانيه و تركيب الخط مره تانيه الموضوع استغرق 3 ايام تقريبا كان الخط فيهم لم يستعمل بالطبع

المهم لقيتهم خاصمين قيمة ال 3 ايام دي من الفاتوره الشهريه اللي جاتلي بعد النقل

من غير يمين يا زهيري

لو قعدت تتريق على كل حاجه وتقول لي ده برتقان ده ؟؟؟؟ ده البرتقانايه في كندا قدددددددددد كدهو .. لأكون معرفك شغلك

أديك في المنفوحه دلوقت يا خفيف .. ورينا هاتعمل إيه

أصلها مش ناقصاك إنت كمان ..

راعي شعوري شويه .. بأقول لك الفاتورة جايه لي 57 ج .. تقولي كندا ومورنتريال ؟

[Diab]

ثم اناااااااااااااااا معنديش تليفون

هههههه مشهد ضاحك في مسرحية شاهد ماشفش حاجة

[sarmar]

اللى انا ملاحظة ياجماعة الخير ان كل شركة او مصلحة تؤدى خدمات للجمهور مبدأها ( قلل من الندر واوفى ) يعنى مثلا شركة الكهرباء بيكفى انها بتركب عداد وانت تستهلك او ماتستهلك مالهم صالح بيك المهم انهم يحصلوا من جيبك وخلاص كل هم هذة الشركات والذى يعنيها هو انهم ياخدوا وبدون وجه حق ولا يعطوك حقك فى الخدمة المطلوبة حتى ان الظلم تحول الى نار تحرق فى اعصاب جميع افراد المجتمع

الكهرباء تزيد علينا فى البيت وعليها ايضا رسوم النظافة :aslam: هههههههههههههههههه نظافة وبدون اى استحاء او خجل من سنين بياخدوها والمصيبة بكل بجاحة انهم بيزودها كلما زاد استهلاك الكهرباء شوفتوا عبقؤيتنا وادارتنا المصرية الجميلة

ونفس الحال فى المياة وغيرة وغيرة بس صراحة هما غافلانين عن شىء ارجوكم اسكتوا عنها هما سايبين لنا الهوا نتنفس منة مجانا الى الان يعنى مشكورين بيحاسبونا على المية والكهرباء والتليفوانت وسابين لنا الهوا مجانا اللهم اغنيهم وافقرنا اللهم خليهم وموتنا عشان ياخدوا راحتهم ويستريحوا مننا وانتو عارفين الباقى

[عادل أبوزيد]

جاء اليوم فى جريدة الدستور أنه تم تعديل مواعيد دفع الفواتير لتصبح 20 يناير و بعدها كل ثلاث شهور و أن الغرض من ذلك أن تكون الفاتورة عن إستهلاك الفترة الحالية و ليس السابقة لأن المستهلك غالبا ينسى حجم إستهلاكه فى الفترة السابقة.

ما سبق كان إستهلالا لابد منه

و أظن هذا يفسر قيمة فاتورة الفاضل سى السيد

رابط الخبر http://dostor.org/economy/news/10/january/1/1542

قررت الشركة المصرية للاتصالات تعديل موعد سداد الفاتورة ربع السنوية، ليصبح يوم 20 من أشهر يناير وأبريل ويوليو وأكتوبر بدلاً من أول الشهر، ويستمر سدادها دون مصاريف إدارية حتي نهاية الشهر التالي في كل فاتورة، أي نهاية فبراير ومايو وأغسطس ونوفمبر.

وقالت الشركة في بيان لها أمس علي لسان المهندس عماد الأزهري- نائب الرئيس التنفيذي للشئون التجارية- إن النظام الجديد يهدف إلي زيادة مصداقية الشركة لدي عملائها، حيث اتضح للشركة أن طول الفترة البينية بين استهلاك العملاء وإصدار الفاتورة والتي كانت تصل في الفترات السابقة إلي شهرين كان يؤدي إلي عدم تذكر العديد من العملاء استهلاكهم فمثلاً كانت فاتورة يناير تعبر عن استهلاك أشهر أغسطس وسبتمبر وأكتوبر، بينما فاتورة أبريل تعبر عن استهلاك نوفمبر وديسمبر ويناير.

وأضاف الأزهري: أن فاتورة يناير 2010 ستشمل المحاسبة عن أشهر سبتمبر وأكتوبر ونوفمبر وديسمبر 2009 وذلك لتسوية حساب العملاء لدي الشركة علي أن يتم بعد ذلك انتظام المحاسبة كل ثلاثة أشهر لتصدر الفواتير.

[qenawy]

الحاج احمد دفعوه 6 جنيه انترنت وهو اساسا ما عندوش كومبيوتر

[qenawy]

التليفون في شقة غير مقيم فيها لغيته وريحت دماغي

عموما هما كشركة ابتدوا يتهزوا بسبب المحمول وقريبا ستدخل شركات ارضية منافسة كما سمعت