اللي عنده خبرة في معاملة الأطفال يدخل plz

[hosambob]

الوضوع بكل بساطة يا جماعة .. انا الحمد لله زوجتى و ابني وصلم بقالهم اسبوع المملكة زيارة

المهم في الموضوع : ان الولد كنت سايبة عمره 6 شهور - دلوقتي عمره سنة و 8 شهور مش عارفني ( كل حاجة مامته ) حتى لما نيجي ننام بيعيط لو ممته مش معاه و غير كدة و كدة كل دة كوم و ( مرحلة تعليمة : ازاي يعمل حمام من غير البامبرز ) كوم تاني ..

اللي عنده أو عندها خبرة يا ريت لو تفدنا

مع تحياتي

تم تعديل 31 ديسمبر 2009 بواسطة hosambob

[عاشق الترحال]

في البدايه حمدا لله على وصول أهلك المملكه بالسلامه وربنا يحفظهملك .

نفس مشكلتي مع ابني بالظبط بس انا كنت بنزل أجازه لمصر شهر واحد وأرجع وكل اللي عملته أني خليت الواد يرتبط بيا أني ألعب معاه شويه بالكره أو نتفرج عالمصارعه وأقوله يلا تعالى لاعبني مصارعه والكلام اللي انت فاهمه ده أو شويه نستخبى ونجري ورا بعض وطبعا لما تيجي خارج لازم تاخده معاك وتشتريله حلويات ولعب وتفسحه في حدائق وتجروا ورا بعض ومراجيح وزحاليق وكده يعني وفي خلال أسبوع هينسى كل حد بس موضوع النوم وأنه مش بيعرف ينام إلا لما يلاقي أمه جنبه ده بيبقى صعب شويه تغيره بس حاول وعالأقل إن جت على أد النوم تبقى سهله .

أما بالنسبه لموضوع انه يستغنى عن البامبرز فده بيجي تدريجي أنك تشجعه يقول ( إإح ) بالبلدي wst:: وتبدأ تحفزه أنك هتجيب له شيكولاته أو حلويات كل ما يقول انه عاوز يعمل وطبعا تحاول تفهمه أنه شاطر وراجل ومش بيعمل على نفسه ومره فى مره هتلاقي نتيجه افضل ودي طبعا رأي شخصي وأكيد في طرق أفضل من كده بس انا بحكيلك عن اللي أنا بعمله .

وربنا يخليهولك ويباركلك فيه ودي طبعاَ أحد مساوئ الغربه اللي بنجنيها وندفع ثمنها بعدنا عن أولادنا وزوجاتنا .

تحياتي

تم تعديل 31 ديسمبر 2009 بواسطة عاشق الترحال

[رضوي]

السلام عليكم ورحمة الله وبركاتة

أولاً موضوع ان ابن حضرتك مش متعود عليك دة عادي جداً ......... حضرتك قلت انك سيبته وهو عنده 6شهور ورجع وهو عنده سنة و8 شهور ..... يعني حضرتك سيبته من سنة وشهرين .......... فكأنه لسة أول مرة يتعرف عليك ............... ودة علاجة سهل جداً يعني لازم الأول تلعب معاه في وجود مامته حضرتك اللي تنيمه برضه في وجود مامته ...... وتدريجيا مع الوقت تبقي علاقتك بيه مباشرة حتي في غياب مامته .......... ساعتها حيتعود عليك وحيطمنلك ........... العملية دي ممكن تاخد من يومين حتي اسبوع او أكتر شويتين ........ دة حسب الطفل نفسه ودرجة استجابته.................... ومتنساش حضرتك ان الطفل مش حيفتكر حضرتك وهو لسة عنده 6 شهور بس وبعد غيابك المدة دي كلها عنه ................. واستحالة حيقدر دور حضرتك في غيابك ..... يعني لازم يكون معاملتك معاه واضحة ........ نيجي بقي لدور مامته : لازم يكون لها دور في تقبل الطفل ليك يعني دايماً تقوله روح لبابا ....... دة بابا ياحبيبي العب معاه .......... وهكذا ........ لحد لما الطفل يشوف ثقة مامته في حضرتك وبعدين المشكلة كلها حتتحل ......... بس بشوية صبر

وبحب الفت نظر حضرتك لحاجة مهمة ............ بلاش الطفل في فترة التعارف دي يشوف حضرتك عصبي او بتزعق أو حتي مكشر لان دة حيكون سبب في تدمير العلاقة بينكم

ثانياً موضوع الحمام

دايماً الطفل الأول بيواجه مشكلات التكيف ...... زي المشي والنطق بالكلام ودخول الحمام ..............الخ

ودة عادي لأن الطفل بيميل للتعلم من الأطفال الأخري أكتر من الكبار علشان كدة دايماً نلاقي الطفل الصغير بيقلد أخوه الكبير

ولان الطفل الأول بيبقي لوحده مع باباه ومامته فدة بيخلية يتأخر شوية في تعلم بعض الأشياء ...... ودة برضه علاجه بسيط عن طريق التعلم ....... والصبر

وربنا يارب يباركلك فيه

تحياتي

[om marawan]

ماشاء الله ربنا يبارك لحضرتك فيه

هو مبدئيا المدة طويلة وقصيرة كان برضه هينسى لانه سنه صغير يعنى حتى لو كانوا شهرين مثلا

بس هو حضرتك سيبه بالتدريج خالص وزى ما الافاضل قالوا حضرتك تلاعبه وتخرجه والعاب و مراجيح وكده

فى وجود مامته لحد شوية ماياخد عليك

بس توقع انه هيفضل تعلقه بالام اكتر طبعااااا لحد مايكبر شويتين كده

بالنسبة لتعليم الحمام فاعتقد افضل لو حضرتك تستنوا شوية على ماياخد على البيت

لان نوعين من التغيير فى وقت قصير مش مناسب للاطفال فيعنى تستنوا شهر مثلا لحد الامور ماتستقر وتبدأوا تحاولوا

بس مبدئيا دلوقتى يفهم الفكرة انه لما يكون بيعمل تربطوا الموضوع بكلمة بسيطة

واول مايبتدى يتعلم بيكون فى البيت وطبعا نلغى الحفاضات شوية فى الفترة دى وتطلعوا كل الشورتات والبطلونات اللى فى البيت عشان التغيير

وبالتدريج بدون ضغط وضرتك على فكرة اول علامة انه اتعلم انه يقول بعد مايعمل فعلا

مش لانه بيغيظكم او حاجة :aslam: لكن ده معناه انه فهم الفكرة

هو بياخد وقت شوية واهم حاجة على بالتدريج وعاوزة طولة بال ومن غير ضرب طبعا نهاااااااائى

وبالتشجيع دايما ان شاء الله تكون النتيجة أسرع

[وافدة هنا و عاملة بالخارج]

الحمد لله على لم شمل الأسرة و ربنا لا يفرقكم أبدا

شوف أخي الفاضل موضوع يتعود عليك هقولك من الاخر و بوصف سحرية

حده و خرجه و لعبه و هات له حاجة بيحبها و بعدها هيلزق فيك و مش هتعرف تروح الشغل و تتسحب و هو نايم يعني يالبلدي كدا ي خروجه و لعبه و هيبيع القضية

و بعدين انت زعلان و غيران يعني ؟احنا نتعب و نربي و نولد ومش عايزينا نتميز شوية؟؟؟؟؟؟؟؟

ربنا يخليه لك و تشوفه راجل يارب

بالنسبة بقى لموضوع البامبرز

أولا انسى التعليم في الشتاء اطلاقا هو أمر صعب جدا و ممرض للطفل

كمان سيبك من كلام الناس و يقولك ابني على سنتين اقلعه و يبقى نظيف هتعذبه و البيت مش هيكون طاهر و ريحه و بهدله خليه بعد السنتين و هتلاقي ادراكه اوسع و استجابته أسرع

و هيقلعه هيقلعه لا تستعجلوا على أولادكم الصبر

[المهندسه]

السلام عليكم

انا مشكلتى كانت نفس المشكله بس زياده تعقيدااااا

انا جوزى سافر و انا حامل و سافرتله بعد كده لما بنتنا بقت عندها سنه يعنى ماشفتوش خالص و طبعا كانت بتخاف منه جدااا

اما ابنك فأنت صورتك فى ذاكرته سيبه يسترجعها لوحده من غير ضغط عليه بمعنى انك اقعد بعيد ماتكلموش و ماتحتكش بيه علشان ما يحسش انك مصمم تلعب معاه او تكلمه فتخوفه منك اكتر ..لا خليك بعيد و بصله و اضحك من بعيد بس لغايه ما هيتعود انك فرد فى البيت يوميا معاه و مامته البيحبها بيشوفها بتتعامل معاك كويس فهياخد الامان منه لنفسه لوحده و هيبتدى هو اليقرب منك لوحده و يحاول يشاغلك لوحده ده نتاج تجربه لى شخصيه

اما موضوع البامبرز فالطب قال ان الطفل بيكون عنده استعداد من سن سنتين انه يستغنى عن البامبرز لو حاولت قبل كده ممكن تطلع بنتائج عكسيه و فعلا عملت كده مع بنتى رغم لوم الناس الكتير لى بس ماسمعتش و فى سن سنتين لقيت بنتى بتفهم الكلام كويس فكلمتها و فهمتها و بدأت استغنى عن البامبرز الفتره الصباحيه فقط و كل ساعه اسألها عاوزه تدخلى الحمام؟؟و طبعا كانت بتعمل على الارض فى الاول و طبعا مش بزعق خالص لغايه ما انا فهمت هى بتعمل كل كام ساعه بالضبط لان الاطفال بيعملوا بأنتظام على فكره و ادخلها الحمام من نفسى او اقعدها على البوتى و دى حسب رغبه الاطفال فى اطفال بتحب البوتى و اطفال بتحب تقلد امها و ابوها و تدخل الحمام زيهم و بعد فتره بدأت انزلها فى الخروج من غير البامبرز فى المشاوير القصيره فقط لان مانضمنش العواقب ههههه و بالتدريج وصلت انها تنام من غير البامبرز و اصحيها باليل ساعات تعمل و استغنت نهائيا عنه و صدقنى لانى سمعت كلام الطب و بدأت عند السن البدأت بنتى تفهم فيه الكلام و الاوامر كويس

انا ماحسيتش خالص بمعاناه تماما اقسملك بالله ان خلال شهرين كانت مستغنيه عنه تماما وكمان بتنام مش بتعمل نهائى على السرير بقالها سنه دلوقت مش بتلبسه و ما افتكرش انها عملت على السرير غير 3 مرات فقط و ده لانى بنسى ساعات و اشربها اى عصائر او سوائل قبل النوم مباشره

ماتستعجلش على ابنك خالص و ماتضغطش عليه فى موضوع البامبرز حتى لو الناس لامتك و قالتلك هو انتوا زمان كان فيه بامبرز ده العيل كان متعود من عمر شهور عجبى !!!! و لا تتأثر

وفقك الله انت و امه الغلبانه

السلام عليكم

[قطرة ندى]

أقولك على حاجة

ابنى عنده 6 سنين مدلعاه على الاخر .. تخيل لما يبصلى يقولى ما بحبكيش بفرح .. معرفش ليه يمكن عشان بيقول اللى على مزاجه

اما بقى لو قال لباباه مبحبكش فباباه بيكشر ويغضب... تفتكر الحب الحقيقى لمين للى مستعد ان ابنه ميحبهوش لكن فى المقام الاول يكون سعيد

ولا للى بيفرض عليه انه يحبه بالاجبار

يعنى انت نفسك تحب حد يصاحبك بالعافية؟ ولا تحب اللى بيحبك ومش عايز منك حاجة

فانا راييى زى ماقالوا الجماعة انك تجيبله العاب كل ما تشوفه وانت داخل فايدك هديه ليه حتى لو كانت هبلة وماتسواش

ولا تنتظر منه شيئ .... احنا بنربى الحب للكبر مش لدلوقتى.. دلوقتى هم محتاجينا اكتر ما احنا محتاجينهم

المهم لما نعجز وهم يبقوا شباب ماذا سيتبقى من رصيدك وذكرياتك عند الابن ؟

وخاصة فى وقتنا هذا الذى اصبح تخلى الابن عن والده سهل وتخلى الوالد عن ابنه اسهل

يعنى باختصار مبقاش فيه علاقة زى زمان..

يا الله ......كم يحمل الابن فى شبابه لوالدته او لابيه من ذكريات مؤلمة تجعل التخلى سهل جدا

[لماضة مصرية جدا]

السلام عليكم و رحمة الله و بركاته

استاذ حسام

في البداية انا مش هدعي انا عندي خبرة في الاطفال....

بس الحقيقة وقفت كتير عند طرح حضرتك لمشكلة قد تبدو بسيطة لكنها حركت عندي احساس عالي جدا بمسئولية حضرتك كأب

الاحساس ده و الرغبة الحقيقة اللي لمستها من حضرتك.... تخليني اؤكد ليك انك هتلاقي الف طريقة و طريقة تغذي احساسك بافتقادك للكائن الصغير ده في حياتك

بس برضه خلينا نفكر مع بعض

طبعا مع كلام كل المحاورين ان يبقي بينكم حاجة مشتركة....

و دايما بيقولك خلي فيه مع طفلك في سنينه الاولانية...روتين ثابت... حتي في اللعب

بس انا خايفة بس من حكاية انك تخش عليه كل مرة بلعبة أو كده.... لني مجرباها جدا.... و بعدين حسيت ان البلية بقي يبص ع اللعبة اكتر مني.... العيال دول اذكيا جدا.... ربنا يحميهم

بص بقي

انا فيه لعبة كده بعملها لغاية دلوقتي... و سهلة جدا

و هي عبارة عن انا و طبعا الست مرجانة بنت اخويا... و انضم للعصابة.... اخوها هريدي مان (النسخة الصعيدي. من سبيدرمان... :rolleyes: )

اللعبة بسيطة جدا.....مش هتطلب غير مخدتين حلوين كده.... ملاية سرير.....

بتقولك ايه بقي اللعبة... انت تنصب خيمة.... آه و الله اعمل خيمة...محندقة كده و خش انت و هو جواها...و اقعدوا بقي... ممكن تتكلموا...ايون كلمه عادي جدا... و اقعد احكيله... أنا العيال ولاد اخويا بكلمهم اصلا من سن 6 شهور (بس هما تقريبا اضطروا ينطقوا بدري عشان يقولولي اسكوتي بقي.... :ninja: )

و في الخيمة دي بقي....بلاش ماما تدخل... دي الحوتة بتاعتك انت و هو.... و ممكن تجيبوا اكل و العبة اللي بيحبها و ممكن تتغطوا و كده....و الله لولا بقي تيتة.... كنا نمنا فيها (اصلها بتقعد تزعق...لاني بغبائي كنت دايما احب انصبها في الصالة)

بالنسبة بقي لموضوع البوتي....رايي الشخصي جدا....يا ريت نرجع لراي تيتة... بجد و الله عندهم افكار و متهيالي عندهم حلول لكل حاجة في الدنيا

يا رب خلي لينا حبايبنا... و اسعدنا دايما في التفكير فيهم و شيل همهم.... اللي هو زاد القلب

فوتكم بعافية

[قطرة ندى]

انا شايفة العكس من تجربتى كثرة شراء الالعاب بتخلى الطفل بعد فترة يزهق ويحب اللعب مع باباه ومامته اكتر من اللعبة

يعنى باختصار بحس ان الطفل بتبقى عينه مليانه ومش محروم...بدون تفريط طبعا

يعنى التوسط كويس فى كل شيئ ..

بالنسبة للبوتى ... فزى ماقالوا للسيادتك ذوى الخبرة ... وضرورى نشيل السجاجيد فى المكان اللى بيقعد فيه الطفل فى العادى

يعنى الطفل لازم يشوف بنفسه هيحصل ايه لو مدخلش الحمام بدون تانيب بس مجرد انه يعرف ان دى مش نضافة ويع وكده

باختصار مش هيبطل الى لما يستوعب الكلام اللى فات.. وطبعا الموضوع محتاج صبر لانه اتعود انه يحس بيها ملامسه لبشرته فمش هيحس بامان لما ينشال البامبرز ودورنا هنا اننا ندعمه ونفهمه ان الموضوع سهل

والباقى هتلاقيه فى كلام اللى اتقال

وشكرا

[miramikhail]

طبعا أزاى أبنك يأخد عليك مش حذود حاجة لأنهم قالوا كل حاجة

لكن حكاية أنة لازم أن مامته اللى تنيمة فدية عادى جدا و أنا أولادى الأثنين البنت و الولد كانو كده و لكتير وطبعا البنت كانت ما تنمش ألا فى حضنى و مش حخضك بس لحد ما بقت 6 سنين وكنت أنيمها و أدخل أوضتى و لو صحيت بليل تجى ليا الولد طبعا من سنتين نام فى أوضتة بس كان لما يصحى ماما مع العلم أن باباهم معانا حتى لما بيسافر 3-4 أيام و يرجع فده كلام طبيعى.

أما الحمام متستعجلش على سنتين حتلاقية أبتدى يفهم الفكرة هو حاجات بسيطة ممكن تعملها عشان تعوده أول ما يصحى من النو تقعدة على البوتى بتاعتة و كمان بعد ما يأكل و لما يعمل توليت مامتة تفهمه أن ده يع و أخى و لو حست كده أن مسهم ويعنى أنة أبتدى يعمل توليت تقول توتو يلا و تأخدها لعب وتقعدة على البوتى يمنل حتى و لو كان عمل شوية بس بليل قبل ما ينام يدخل الحمام و بعدين فى الشتا لبس بمبرز و فى الصيف ممكن يبقى من غير بس حط مفرش بلاستيك تحت الملاية

المهم ما تستعجلش زى ما الزملاء قالوا حيأخد وقته و يقلعة بس برضة لازم تبتدى معاه

[engmido]

مع ان معنديش اولاد بس والله استفدت منكم بجد

شكرا للجميع