مجددون

[لماضة مصرية جدا]

السلام عليكم و رحمة الله و بركاته

قريت الخبر ده و كنت مبسوطة بيه جدا....و يا رب نتجمع كلنا و احنا بنتفرج عليه.... برنامج عمرو خالد الجديد "مجددون"

دبي: أعلنت قناة دبي عن إطلاق برنامج "مجددون" مع بداية يناير، والذي يسلط من خلاله الداعية عمرو خالد الضوء على أهم التحديات الاجتماعية والاقتصادية والدينية التي تواجه الشباب العربي، من خلال استضافة 16 شاباً وفتاة من سبع دول عربية لتنفيذ مهام صعبة تعالج أهم تحديات النهضة في عالمنا العربي.

يقول عبد اللطيف القرقاوي مدير قناة دبي في تصريحات لجريدة الراية: "مجددون" برنامج تثقيفي جاد ينتمي إلى نوعية برامج تلفزيون الواقع، كما يحمل رسالة أخلاقية وقيمة فكرية عالية ومهام روعي فيها التعامل مع شرائح المجتمع كافة، في الوقت الذي يتميز فيه البرنامج الجديد بتفرد القضايا التي يتعرض لها.

يعالج البرنامج مشاكل البطالة والإحباط والأسرة والأيتام والفقر وضعف الإبداع وغيرها من القضايا المهمة التي يثيرها عمرو خالد مع المشتركين الـ 16 الذين تم اختيارهم من بين عشرات الآلاف من المتقدمين.

سوف يسافر المشتركون إلى لبنان والأردن ومصر والسودان وإنجلترا لتنفيذ المهام المطلوبة منهم، لتحقيق معنى التنمية الشاملة في مختلف المجالات، حيث يلتقي بهم عمرو خالد في أول كل مهمة ويحدثهم عن قضية الحلقة، بعدها يتم تقسيم المتسابقين إلى فريقين، ويطلب من كل فريق تنفيذ مهمة مبتكرة تعالج القضية خلال ثلاثة أيام، وهي المدة المحددة للحصول على نتائج ملموسة تؤكد نجاحهم في هذه المهمة.

يدخل المشتركون في نهاية اليوم الثالث الغرفة المغلقة، ليلتقوا مجدداً بعمرو خالد ومستشاريه الذين رافقوا المتسابقين خلال المهمة، لمناقشة أدائهم ونجاحهم أو إخفاقهم والصراعات التي عاشوها، وذلك ضمن أجواء من التوتر والقلق التي تسفر عن ترجيح كفة فريق للفوز.

يغادر الفريق الخاسر البرنامج في موسمه الأول الذي يتضمن 14 حلقة، تتعرض إلى 13 مهمة مختلفة لأهم القضايا التي تعوق التنمية في البلدان العربية، ليحصل مجدد واحد منهم على مائة ألف يورو لاستثمارها في مشروع له علاقة بالنهضة والتنمية.

يذاع البرنامج الجديد على قناة دبي ابتداء من مساء الجمعة 8 يناير الساعة 9.30 مساء بتوقيت جرينتش .

تحياتي

[SophiaAstrophy]

]السلام عليكم ورحمه الله وبركاته شكرا ليكى يااختى العزيزه لمعرفتنا ببرنامج الاستاذ عمرو خالد فعلا لانى اول مره اسمع عنه وبواعيده وجزاكى الله خير ....................شكرا ......................تحياتى

[ذهبية]

الف شكرا يا لماضة بجد اول مرة اسمعة ان شاء الله هنتابعة

[بركة]

شكرا جزيلا اختنا العزيزة

ربنا يجعل جميع اعمالنا الصالحة في موازين اعمالنا ويكرمك

وبالمناسبة أستاذ عمرو خالد له قناة على اليوتيوب بيعرض عليها صناع الحياة الموسم الجديد

الرابط أهو http://www.youtube.com/user/AmrKhaled

[عنبو]

عمرو خالد ده خطير بجد من الناس الى ربنا جعلها سبب فى تغير حياااااااتى كلياً

[لماضة مصرية جدا]

يذاع البرنامج الجديد على قناة دبي ابتداء من مساء الجمعة 8 يناير الساعة 9.30 مساء بتوقيت جرينتش .

السلام عليكم و رحمة الله و بركاته

للتذكير بموعد البرنامج

و ممكن نتقابل بعده و نكتب رؤانا....و نسأل نفسنا هل انا من المجددين؟؟؟؟

نسالكم صالح الدعاء

في امان الله

[myusername]

عمرو خالد فعليا من الشخصيات اللتى فتحت باب التغيير و الاصلاح... دون مبالغة.

يا ريت يا جماعة نتابع الموضوع هنا.. انا سمعت عن البرنامج, و سمعت ان عمرو خالد تم منعه من تصويره فى مصر..

اتمنى ان احنا نتناقش فى امور البرنامج هنا... و نقول حتى افكارنا عشان نغير و نصلح المجتمع بيها..

وفيه برضه موضوع هنا اسمها محاولات للاصلاح.. يا ريت بجد كلنا نقول رأينا ازاى نغير المجتمع.

انا مش عارف ليه النوعية دى من الموضوعات مفيش حد بيتكلم فيها.. و الناس كلها بتتكلم فى موضوعا اما هايفة, لاما جدلية بحتة قتلت بحثا من عشرميت سنة!!

[لماضة مصرية جدا]

السلام عليكم و رحمة الله و بركاته

البرنامج خلص من شوية... و بجد فكرته مبشرة

اكتر حاجة عجبتني... انه هيقدم افكار مجددة للتنمية بالايمان... الله

طب ما تيجوا نخلي الحتة دي زي "بنك الأفكار" نحط فيه أفكارنا اللي عملناها قبل كده....حتي و لو صغيرة... و يا سلام بقي لو نتفق في يوم ان احنا نكون فرق مننا لما ننزل مصر نعملها و نفذها سوا... طب نستني ليه لما ننزل مصر... طب ما كل واحد يقدر يبتدي من دلوقتي

حطوا افكاركم... و انا هسجل الافكار اللي بيطرحها البرنامج... و نسال الله الاخلاص

اللي ملحقش يشوف الحلقة

موجودة ع الرابط ده

http://www.mujaddidun.com/

الحلو بقي ان فيه فرصة كمان الموسم الجاي من البرنامج... ان احنا نكون من ضمن الفريق ده..... و الله كله ممكن

نسالكم صالح الدعاء

في امان الله

[president]

اكتر حاجة عجبتني... انه هيقدم افكار مجددة للتنمية بالايمان...

ممكن يالماضه لو تقولى مثال بسيط للأفكار دى عشان لو حبيت اتكلم اعرف الأفكار اللى عندى تناسب الموضوع ده او لأ .

متعرفيش الأعاده امتى ؟؟ انا عارف انك حاطه رابط للحلقه :happy:

تحياتى

[لماضة مصرية جدا]

السلام عليكم و رحمة الله و بركاته

معلش انا مش عارفة الاعادة امتي؟؟؟؟

بس اللي انا فاهماه ان الفكرة المتجددة المقصودة في البرنامج... هي فكرة صغيرة تقدر تخدم بيها مجتمعك او مجموعة من الناس

يعني مثلا عافرين بنك الطعام اللي في مصر.... علي ما اعتقد انه كان مجرد فكرة صغيرة جت في دماغ صاحبها يوم ما شاف كمية الاكل المهولة اللي بتترمي من الفنادق الكبيرة بعد فرح كان معزوم فيه

فيه فكرة كنت ابتديتها مع مجموعة من الاصدقاء و ربنا يعنيا و نكملها

كان لينا اهتمام بالاطفال و خصوصا اللي بيحتم علاجهم بقاؤهم فترات طويلة جدا في المستشفي و كده

فكرنا ساعتها ان احنا نعمل ديكور في مكان الاطفال... بس مكنش كفاية

فكرنا نجيب لعب... بس برضه لقينا ان احنا الالعاب اللي بنجيبها يا عربيات (يعني محتاجة حركة و كده..).... يا عرايس و دي بتاخد متعتها و خلاص

كان عند مجموعة من اصحابنا مشروع تخرج... و كان المفروض يعملوا فيه عرايس زي بتاعت الليلة الكبيرة و كده

ساعتها فكرنا بقي

ليه مناخدش العرايس بتاعت التخرج و نروح بيها للاطفال....و فعلا الدكتورة المشرفة ساعتها شجعتنا جدا

بس روحنا طبعا و مكنش مستعدين.... ارتجلنا مسرحية كده.....كانت مبهجة بس برضه اخدت وقتها

ابتدينا نشتغل ع الفكرة اكتر

واحد صاحبنا كان لسه راجع من المانيا... قالنا انتو متعرفوش عن حاجة اسمها العلاج بالفن......؟؟؟

و ساعتها الفكرة بقيت حاجة تانية خالص

صاحبنا ساعدنا باول مسرحية متخصصة.... يعني بتخاطب الاطفال اللي موجودين في المستشفي.... و بتخيلهم يتفعلوا معانا و الاهم مه مرضهم....كان "اسمها انا بكرة هطير"

و برضه لو حضرتك تابعت البرنامج ان شاء الله ممكن تلاقي افكار كتير... سهلة... بسيطة....و الاهم انها تتعمل

هستناكم....لغاية معاد الحلقة الجاية.... أو يمكن قبلها....لاني حاسة فيه فكرة بتتنطط جواكم اهه

[عنبو]

البرنامج ده انا متابعه مع نفس يعنى بعمل دون لوود للحلقه واتفرج عليها مع نفسى لانى مبحبش التليفزيون

على العموم البرنامج جميل قووى وفيه رسايل كتير قووى

البرانامج بيعتمد على الابداع والتغير فى كل شىء

بتاخد مهمه وتنفذها باسلوب مختلف اسلوب فيه ابداع اسلوب فيه تجديد

بجد حلقة بتعة دار الايتام دى خلة الواحد ينتفض من جواه بجد

والحلقه بتعة رساله فى صورة فيلم قصير

بجد فكره عجبتنى قوى ان انا يمكن قول للناس كلام كتير قوى فى صورة فيلم

زى الفديو اللى كانت ضحا جابته كان جميل قووى

الواحد بيفكر يعمل حاجه زيها

فاكرين الاغنيه بتعة مصطفى كامل بتعة الادمان كانت جميله قوى

اعرف ناس الاغنيه دى اثرت فيهم وقى ويمكن كانت بدايه انهم يسيبوا الطريق اللى كانوا ماشين فيه

تيجوا نفكر مع بعض نعمل افكار فى صور رساله

او نقول ازاى نساعد الناس اللى حوالينا بتعمل ايه علشان تساعد الناس

وياريت الناس كلها تتكلم علشان الخير ينتشر ومتخفوش مش هيبقى من باب الرياء هيبقى من باب نشر الخير

فيه حاجه تانيه تعبتنى بجد هو ان البرانامج رفضت الحكومه تصوره فى مصر

يلا بلاش دوشه

[engmido]

والله انا اول مرة اسمع عنه ...بس اكيد هو كويس

وان شاءالله اتابعه

[لماضة مصرية جدا]

السلام عليكم و رحمة الله و بركاته

البرنامج دلوقتي بقاله حوالي 3 اسابيع... و انا بتابع عشان احاول اوصل لاستفادة حقيقية منه

بغض النظر عن الاختلافات أو الاتفاقات اللي ممكن تنطرح علي عمرو خالد و برامجه تحديدا.... انا هتكلم عن وجهة نظري الشخصية جدا

انا تابعت البرنامج و توقعت اني الاقي افكار جديدة تستفز طاقتي للعمل الاجتماعي بشكل يوصل لفئات أكبر، و لفت نظري التالي:

1- البرنامج بيركز كتير علي العمل الجماعي.... و اللي هو واضح جدا ان مجتمعاتنا العربية معندناش ثقافة العمل في فريق... حتي لو اتكلمنا عليها من هنا لغاية اسوان (انا في قارة تانية خاااااااالص علي فكرة).... برضه كتير من العرب مبيعرفشي يشتغل في فريق و يحقق هدف متميز في وقت محدد.

2- البرنامج و انا بتفرج عليه فكرني بشكل كبير ببرنامج امريكي لدونالد ترامب اسمه ...the apprentice و اللي برضه بيحاول يكون فرق و بيدلهم مهام مختلفة عشان ينمي مهاراتهم في البيزنس..طبعا برنامج مجددون بيحاول انه يوظف أفكار لتنمية المجتمع... دون النظر للربح.

3- الافكار المطروحة في البرنامج برضه لغاية دلوقتي بتشبه كتير....العديد من ورش العمل.... لو حد هنا شارك في اي نشاط تابع للمعهد السويدي بالاسكندرية.... أو الاتحاد الاوربي... هيلاقي.... معظمها بتصب في توظيف طاقة الشباب بشكل يساعد بيه نفسه و اللي حواليه و بشكل يساعده انه يخدم قضية هو مقتنع بيها

بالنسبة بقي لافكار البرنامج

1- عجبتني فكرة الفيلم الاعلاني....و الرسالة.....و فكرني بحاجة

فيه اعلان ع سي ان ان..... تحفة جدا لمدة دقيقة واحدة.... ف ال30 ثانية الاولانية... بيوريلك شباب كلهم حيوية و الدم بيفط من وشوشهم.... و بعيدن باستخدام مؤثرات بصرية ... بتلاقي الشباب بيطلع ليهم تجاعيد تحت عينيهم..... و ينتهي الاعلان بصورة ابيض و اسود في مقابل صورة ملونة كلها حياة.....(الاعلان بيتكلم عن المخدرات ع فكرة)

سؤالي بقي..... ليه الشباب الي عندهم مشروعات تخرج شبيهة بكده... او افلام وثائقية.... ليه متتظبطش كده في برنامج تثقيفي للشباب و خصوصا في سن 13 لغاية 20....الفترة بتاعت الاجازة و الصيف و النوادي؟؟؟

2- عجبتني فكرة..."ساعد شاب انه يتوظف"...... كان فيه حد من زمايلنا زمان..... كان عامل تطوعيا موقع ع الانترنت عشان يساعدك انك تظبط السي في بتاعتك....و يحاول انه يعملك ماتشينج مع المتاح.....طب ليه لا؟؟؟

3- كان فيه حد من الشباب في البرنامج اظنه من السعودية..... قال انه طول عمره قعد يحلم انه يبقي مهندس... و ده من ثانوي... و انتهي بيه الحال انه مصمم زهور.... و سعيد جدا جدا بوضعه الحالي...الحلو انه كان بيكلم برضه مجموعة من طلاب اظنهم في الثانوي....

طب انا دلوقتي بمخمخ في حاجة كده:

مين يساعد معايا نبتدي نفكر نعمل برنامج صيفي للولاد و البنات...طول فترة الصيف...البرنامج انا بفكر فيه كالتالي:

1- هو يكون في شكل ورشة عمل.... أو معسكر زي بتاع الكشافة زمان.....او ممكن نخليه يوم او يومين في الأسبوع..... بس يكون لفئة محددة بعينها.

2- البرنامج ببساطة بيساعد الولاد انهم يكتشفوا بس هما عايزين ايه.... يحطوا بس رجليهم علي اول الحلم..... حاجة يحلموا بيها افضل مليون مرة.... من انتظار ما لا ياتي به مكتب التنسيق.

3- و ممكن برضه نوظف الولاد و البنات في خدمة المكان اللي هما عايشين فيه

طب حد يفكر معايا؟؟؟

انا بفضل الله ممكن اساعد في تصميم البرنامج (يعني الاهداف..... الأنشطة......التدريب نفسه)

و اعرف كتير من منظمات المجتمع المدني جوه مصر و براها

بس برضه محتاجين نفكر و نشتغل مع بعض

مستنية ارائكم

دمتم بود

[لماضة مصرية جدا]

مين يساعد معايا نبتدي نفكر نعمل برنامج صيفي للولاد و البنات...طول فترة الصيف...البرنامج انا بفكر فيه كالتالي:

1- هو يكون في شكل ورشة عمل.... أو معسكر زي بتاع الكشافة زمان.....او ممكن نخليه يوم او يومين في الأسبوع..... بس يكون لفئة محددة بعينها.

2- البرنامج ببساطة بيساعد الولاد انهم يكتشفوا بس هما عايزين ايه.... يحطوا بس رجليهم علي اول الحلم..... حاجة يحلموا بيها افضل مليون مرة.... من انتظار ما لا ياتي به مكتب التنسيق.

3- و ممكن برضه نوظف الولاد و البنات في خدمة المكان اللي هما عايشين فيه

طب حد يفكر معايا؟؟؟

السلام عليكم و رحمة الله و بركاته

استكمالا للفكرة اللي كانت انطرحت قبل كده

النهادرة اتكلمت مع مجموعة من المدربين الشباب في مجال civic education......مش عارفة دي تبقي ايه بالعربي بس اللي انا عارفاه ان من خلالها بنبي شخصية الشباب

الفئة المستهدفة..... من 13...... 18

دلوقتي احنا بنعمل عصف ذهني..... عشان نجمع الافكار..... او بمعني اصح المفاهيم اللي عايزين نركز عليها.... (زي مثلا قيمة الوقت..... ازاي يحدد هدف.... ازاي يكتشف قدراته... مواطن القوة مثلا........ الحرية...... المسئولية.... التفكير الناقد)

المرحلة اللي بعديها ان احنا نصيغها في شكل أهداف.... و بعدين نترجمها لانشطة و اطار زمني

ربنا كرمه جميل جدا........ناس ابتدت تساعد من دلوقتي في الفكرة

و مستنية ارائكم

اللهم ارزقنا صدق الاقبال اليك

دمتم بكل الاحترام

[om marawan]

عزيزتى لماضة الجميلة

شوفى ياستى احنا او انا عن نفسى عندى مشكلتين الا وهما الوقت حتى فى وقت الاجازة باكون مشغولة جدا مع الاطفال ولكن دى ممكن التحايل عليها بتوفير ولو ساعة لمدة اسبوع مثلا

ثانيا وده الاهم ان ورش العمل بالشكل ده وللسن ده عاوزة متخصصين او على الاقل ناس عندها خلفية عن كيفية ادارة الحوار معاهم

يعنى انا بعيد عن مجال عملى عندى خبرة جيدة فى معاملة الاطفال تحت 5 سنوات بحكم اولا اولادى وثانيا قراءاتى الكتير ومتابعتى لدروس وشرح من متخصصين

وبعيد برضه عن مجال عملى عندى قدرة على التدريب على التمثيل والاداء جيدة ممكن نستغلها فى مساعدة السن ده عن التعبير عن نفسه بشكل او باخر

طيب نيجى للمهم ازاى حد زيى يقدر يساهم او يساعد فى ورش العمل لانى طبعا نتيجة عدم المعرفة او الخبرة او الدراسة ( حتى لو فى شكل كورسات ) ماقدرش اقوم بورشة عمل لوحدى

فازاى اقدر اساعد فى التقييم او فى التنظيم او حتى فى طباعة ورق او او او مهما كان الدور صغير او حتى نقدر نساهم فيه عن بعد نظرا للظروف الحالية

معلش انا عارفة شكلى رامية الحمل عليكي