كان يوما مليئا بالاحداث

[الباشمهندس ياسر]

كان يومي مليئا بالاحداث

يااااااااااااااااااااااااه

النهارده انا عملت يطلع 140 كم بحالهم جوه البلد

دانا النهارده حرقت يطلع 25 لتر

كلمات كتير بنقولها بعد ما نقضي يوم شاق ف انهاء بعض المعاملات المطلوبة

شاركنا معاك

اجكيلنا يومك

ناقشنا ف حاجة معجبتكش

فرحنا بحاجة عجبتك

ايه رايكم

بالمناسبة : الموضوع سبق صحفي :closedeyes:

[shiko]

هو ممكن يكون اليوم ده عدى عليه اكتر من سنة ...

بس بيتهيألى انه كان امبارح ...

بمعنى اننا نقدر نحكى عن اى يوم ولا لازم يكون يوم فى الوقت الحالى؟؟

[الباشمهندس ياسر]

هو ممكن يكون اليوم ده عدى عليه اكتر من سنة ...

بس بيتهيألى انه كان امبارح ...

بمعنى اننا نقدر نحكى عن اى يوم ولا لازم يكون يوم فى الوقت الحالى؟؟

ينفع طبعا يا شيكو

[HanaaOsama]

موضوع غريب شويه يا باشمهندس ياسر :sad:

و اكيد في يوم زي ده مفيش حاجة هتفرحك فيه wst::

الموعد : الاسبوع الي فات

الهدف : توثيق شهاده

المكان الاول : الخارجية المصرية :-

لأ مينفعش ديه لازم تتختم و تتمضي من امين الجامعة

ليه يا جماعة مهي شهاده حلوه و زي الفل و عليها ختم الحامعة و الكلية و كل حاجة

لأ لازم امضت امين الجامعة

ماشي

المكان الثاني : جامعة عين شمس :-

التوقيت : التاسعة والنصف صباحا

( في حاجة فرحتني بس عشان خاطر الباشمهندس ياسر ميزعلش :) و هي ان الحرس رضيوا يدخلوني بالعربية داخل الجامعة و الا كان هيبقي يوم مش معدي لاستحالة الركنه بالخارج )

و قلت طب كويس اليوم الحلو بيبان من اوله هلحق بقي الخارجية والسفارة و .....

المكتب : توثيق شهادات

عايزه اوثق الشهاده

ماشي 20 جتية و تعالي خديها بكره

بكررررررره ليييه

هو ده النظام

ولا اقولك ماشي الشهادات بتاعة امبارح لسه مطلعنهاش هحطها مع شهادات امبارح استني شوية بره علي ما امين الجامعة يجي

ماشي كتر خيرك

بعد نص ساعة : هو لسه مجاش

لأ

امال بيجي امتي؟

مش عارفين

طيب

بعد ساعة : طب محدش يعرف يكلمة يساله

لأ اصل هو في اجتماع

و يخلص امتي الاجتماع؟

الساعة 12

طب مينفعش حد يقوم بوظيفته

لأ

ماشي

التوقيت : الساعة 12

ها الاجتماع خلص

منعرفش

محدش يشوفه

اصل الاجتماع بره الجامعة

يعني ممكن يخلص الاجتماع و ميجيش

منعرفش !

يا مصبر ال ........

ماشي

التوقيت : الساعة الواخده ظهرا

حصل هرج و مرج علي الباب لان طبعا بقي في تجمع للناس بتاعة امبارح ووقف الموظف ينده الاسماء بره الباب ( و لا بتاع اللبن )

المهم الحمد لله اخيرا

روحي بقي الارشيف اختميها

!!!!!! ليه تاني

ده المكتب الي جنبنا مش مشكله

( نفسي اعرف ايه الداعي لهذا كله .... )

المهم

المكان الثاني : الخارجية المصرية جنب الميريلاند :-

طابور رجالي ولا طابور العيش

( عذرا طبعا لكل الرجال كان لازم اعمل طابور نسائي لوحدي )

مش هو ده العدل يا ولاد

التوقيت : الثانية الا ربع

فين بقي يا جماعة سفاره الامارات ؟

ناس تقول في شارع شهاب و ناس تقول لأ جنب كوبري الجامعة في الجيزه

يعني ديه تتوثق فين فيهم

قالوا الملحق الثقافي بشارع شهاب

ماشي

المكان : امام الموظف

الساعة : الثانية و

نصف الا خمسه

اداني وصل مكتوب فيه الاستلام الساعة : الثانية و النصف !

انا قلت اكيد بكره لان ما الداعي لكتابة هذا و فاضل 5 دقايق

المفروض كان قالي " اركني علي حنب شوية " :) "

سألت باستغراب اتنين و نص انهارده

ايوه

:blink:

و انا قاعده ولا علي بالي و فاكره ان كدا خلاص الاقي ناس بتسأل علي مكان السفاره !

ليه يا جماعة

اتضح ان ده فقط ( لتدقيق الشهاده ! )

تدقيق ايه ..... ؟ يعني ايه ؟

المهم

لازم اروح السفاره لكن قبل الساعة 12

:lol:

و انتهي اليوم السعيد :)

[الباشمهندس ياسر]

الدنيا صغيرة يا جماعه و الله

انا برده في اليوم المليء بالاحداث كنت ف مكتب الخارجية اللي جنب الميريلاند عشان اوثق شهادة البكالوريوس

بس انا بقي بالصلاة ع النبي كنت عارف موضوع امين الجامعه و خاتم كذا شهادة قبل كده و جاهزين معايا

و احكيلكم ع اليوم ده بالمرة ... احسن انا نسيت نص الاحداث

استيقظت مبكرا عن العادة بتاعتي ف مصر ... صحيث حوالي التاسعة و نص

و قلت اول حاجة اعملها اروح اوثق الشهادة عشان فيزا الهنا و المني (( ربنا يتوب علينا )) و فعلا وصلت المكتب اللي جنب الميريلاند ووثقتها ف 10 دقائق بالظبط

الحاجة اللي حنقتني ان الموظف طلب 11 جنيه رسوم التوثيق

طلعت 20 جنيه ... قالي هات جنيه ... فعلا مش معايا تنفع ورقة بخمسة

قالي و انا مش معايا ..قلتله لحظة

رحت رايح للعسكري اللي واقف

ازيك يا دفعه ... هات جنيه فكة من معاك

العسكري قلب نفسه جيب جيب و طلع 75 قرش

ضحكت و قلتله ... خلاص مش مشكلة

رحت واخد سيارتي و رحت للكشك اللي الناحية التانية و خبطت كيس مناديل و فكيت و رحعت

و صبحت ع العسكور و دفعت للخزنة و استلمت الورقة و اتكلت علي الله

قلت اشطه جدا ... ده الخارجية بتاعتنا اطورت و الحوار ما اخدش 5 دقايق

و رحت واخد بعضي و طالع ع المرور ... عشان بجدد رخصة عربية

دخلت ع الفحص عدل

يا جماعة الخير عاوز اجدد الرخصة و اعمل فحص

قالولي هات اورنيك فحص من الخزنة و الحقها قبل ما تقفل

فعلا جبت اورنيك الفحص و رجعت

قالولي اول حاجة تاخد البصمة

دورت لقيت واحد ماسك قلم رصاص و شغال يلف ع السيارات

تعالي يا عم الحاج ... تقلان علينا ليه

قالي و انا اقدر يا بيه

قلتله طب تعالي اخبط البصمة ف الانجاز عشان نلحق نجيب جاز

ضحك و قالي يلا بينا

رفعنا البصمة و برده صبحت عليه ... تقريبا بقت دي التمسية

قالي عليك و ع المهندس

رحت لقيت واحد شايف نفسه اوي شويتين و بيعامل الناس م طراطيف رجله مش مناخيره

طب و بعدين .. انا اصلا بقرف م الخلايق دي

رحت داخل عليه بكل تناكة الدنيا

م فضلك عاوز افحص العربية

بصلي من فوق لتحت و سابلي البيت

لا

بصلي من فوق لتحت و نده علي واحد و قاله روح مع البيه

بص ع العربية و قالي من فضلم غير الديفل ده

عشان ده بيعمل تلوث سمعي

قلتله طب اعمل تشيك كامل علشان يبقي مشوار واحد مش اتنين

قالي العربية زي الفل و مفيهاش حاجة

و نكمل بعدين

استنوا ده اليوم لسه طويل بشكل

[shiko]

الدنيا صغيرة يا جماعه و الله

انا برده في اليوم المليء بالاحداث كنت ف مكتب الخارجية اللي جنب الميريلاند عشان اوثق شهادة البكالوريوس

بس انا بقي بالصلاة ع النبي كنت عارف موضوع امين الجامعه و خاتم كذا شهادة قبل كده و جاهزين معايا

و احكيلكم ع اليوم ده بالمرة ... احسن انا نسيت نص الاحداث

استيقظت مبكرا عن العادة بتاعتي ف مصر ... صحيث حوالي التاسعة و نص

و قلت اول حاجة اعملها اروح اوثق الشهادة عشان فيزا الهنا و المني (( ربنا يتوب علينا )) و فعلا وصلت المكتب اللي جنب الميريلاند ووثقتها ف 10 دقائق بالظبط

الحاجة اللي حنقتني ان الموظف طلب 11 جنيه رسوم التوثيق

طلعت 20 جنيه ... قالي هات جنيه ... فعلا مش معايا تنفع ورقة بخمسة

قالي و انا مش معايا ..قلتله لحظة

رحت رايح للعسكري اللي واقف

ازيك يا دفعه ... هات جنيه فكة من معاك

العسكري قلب نفسه جيب جيب و طلع 75 قرش

ضحكت و قلتله ... خلاص مش مشكلة

رحت واخد سيارتي و رحت للكشك اللي الناحية التانية و خبطت كيس مناديل و فكيت و رحعت

و صبحت ع العسكور و دفعت للخزنة و استلمت الورقة و اتكلت علي الله

قلت اشطه جدا ... ده الخارجية بتاعتنا اطورت و الحوار ما اخدش 5 دقايق

و رحت واخد بعضي و طالع ع المرور ... عشان بجدد رخصة عربية

دخلت ع الفحص عدل

يا جماعة الخير عاوز اجدد الرخصة و اعمل فحص

قالولي هات اورنيك فحص من الخزنة و الحقها قبل ما تقفل

فعلا جبت اورنيك الفحص و رجعت

قالولي اول حاجة تاخد البصمة

دورت لقيت واحد ماسك قلم رصاص و شغال يلف ع السيارات

تعالي يا عم الحاج ... تقلان علينا ليه

قالي و انا اقدر يا بيه

قلتله طب تعالي اخبط البصمة ف الانجاز عشان نلحق نجيب جاز

ضحك و قالي يلا بينا

رفعنا البصمة و برده صبحت عليه ... تقريبا بقت دي التمسية

قالي عليك و ع المهندس

رحت لقيت واحد شايف نفسه اوي شويتين و بيعامل الناس م طراطيف رجله مش مناخيره

طب و بعدين .. انا اصلا بقرف م الخلايق دي

رحت داخل عليه بكل تناكة الدنيا

م فضلك عاوز افحص العربية

بصلي من فوق لتحت و سابلي البيت

لا

بصلي من فوق لتحت و نده علي واحد و قاله روح مع البيه

بص ع العربية و قالي من فضلم غير الديفل ده

عشان ده بيعمل تلوث سمعي

قلتله طب اعمل تشيك كامل علشان يبقي مشوار واحد مش اتنين

قالي العربية زي الفل و مفيهاش حاجة

و نكمل بعدين

استنوا ده اليوم لسه طويل بشكل

انا مستنية اعرف ...بقيت اليوم الطويل ياريت تكمل ...

وكمان اعرف هو ليه بصلك البصة دى ؟؟مع انك عمال توزع من ساعة مادخلت يعنى انا مثلا مابدفعش علشان مابعرفش ادفع لمين ولا فين ؟؟وعلشان كدة ممكن يعاملونى وحش ده على حد علمى لكن واحد زيك ؟؟ليه ؟؟

[قلب ابيض]

استنوا ده اليوم لسه طويل بشكل

انا مستنيه اهو wst::

هاتطول؟؟؟

عاوزه احكى انا كمان

ياااسر

اهندزه

انت رحت فين ؟؟؟

wst:: wst:: wst::

[الباشمهندس ياسر]

من عيوني

ان شاء الله هكملكم الحوار

wst::

تانت : تقدري تحكي براحتك

[الباشمهندس ياسر]

اظاهر ان الايام كلها بقت مليئة بالاحداث

انا تقريبا هعوز يوم ورا اليوم عشان اكتب الاحداث

يلا ... اللقا نصيب

[لماضة مصرية جدا]

السلام عليكم و رحمة الله و بركاته

مع احترامنا لصاحب التوبيك...بس انا هغير فيه شوية

"كان يوما مليئا بالمشاعر"

الساعة 6:45

========

متحيلتش اني في لحظة من حياتي تصحيني نسمة حلوة من نسمات الفجر...و ده طبعا لاني نسيت البلكونة مفتوحة امبارح...احساس بالسقعة بس احساس فوق الرائع

الساعة 6:50

========

رغبة غير عادية في البكاء........ما بقاش عندي ليها تفسير.....بقت جزء من مهامي اليومية.....بس الجزء الاهم اني بقيت اتحدي نفسي في التغلب من الدلع و المياصة دول اللي علي غيار الريق بلا مبرر..... حبة حمشنة بقي

الساعة 7:00

=======

انا و البحر.... و حوار طويل.........حزين في معظمه.....بس بيريح كتير......صلاة.....دعاء صمت

الساعة 8:00

========

واحدة رايحة الشغل و كانها نيوتن بعد اما وقعت ع راسه التفاحة........كان عندي احساس النهاردة اني هحرك الجبال الراسخة م التخلف.....هعمل تحدي جديد....و قد كان

الساعة 8:05

========

انا و وقهوتي.....و شباكي...وورقة و قلم عشان برنامج اليوم.....................و فجأة....آن آن أأأأأأأأأأأأأأأان تش

اغلس موظف علي وجه الكرة الارضية........يقف امامي

سيل من الكلام المستفز.......حوار لا يمكن تقدر تفهم منه حاجة غير واحد فاضي و عايز يعكنن عليا

الساعة 8:06

==========

تجاهل تام مني......لوجدوده اصلا في حدود جمهورية مكتبي المستقلة........عدم اكتراثي اغراه بالتطاول اكثر

الساعة 8:10

========

المدير العام يطلبين في التو و اللحظة لاسرع تحقيق اداري فيكي يا جامعة

الساعة 8:11- 10:30

============

حوار....يتأرجح بين الصعلكة.....البلطجة.......و حبة كده عن حقوق الانسان.......بس اللي انا فاكراه اني قولت حاجتين:

"امتي هنبطل نتعامل كلاجئين"........مديري فلسطيني كنداوي......بس هو واضح ان موضوع لاجئين وجعه اوي......مع اني كنت اقصد مزيد من الاستقرار في العمل عشان نحقق الانتماء للمؤسسة....و ده قطعا يعمل ربح اكبر ع المستوي الانساني قبل المادي

"احنا ضيعنا ساعتين بنتناقش ازاي نشتغل كفريق.......مع اننا كان ممكن نعملها بسلوك في لفتة مش هتاخد دقيقة واحدة"

الساعة 11:00

===========

انهماك شديد.......بحب اطلق عليه غيبوبة ارادية....في العمل......عشان احول غضبي لحاجة ايجابية

الساعة 18:05

=============

مكالمة تليفون:

لماضة : ازيك يا مدهولة

زكزوكة....(لانها اكثرنا ذكاءا...و افكرا جهنمية الحقيقة): انا تعبانة اوي يا لماضة

لماضة: يخربيت الفقر......جوزك برضه تعبك تاني........ يا بنتي خلاص مش عايزة اتجوز.....اتعقدت خلاص

زكزوكة: لماضة......انا مريضة للغاية.........بتعالج.......كيماوي

لا صوت

لا ضحك

لا كلمات

فقط خوف يقطع الصمت........بان شيئا ما يجمعني بهذا المرض.......... و كأنه يبحث عني اينما ذهبت

في لحظة شعرت ان بكائي....الان اصبح مبررا للغاية..........بس مقدرتش.............كنت اعلم انني بالمساء سيكون لدي متسع من الوقت لابكي بمفردي.....هي لا تريد ان تري دموع تتراقص في عيني الان

اتكلمنا كتير..........حطينا خوفها.....و خوفي عليها قدامنا ع الترابيزة........اتفقنا علي علاج روحاني موازي......صلينا في صمت.....و فجأة لقيتني بقولها احنا لازم نهرب من خوفنا بالضحك...........قالتلي انا مش هقدر اواجهه لوحدي....اوعديني لما اتصل بيكي هتقوليلي حاجة تضحكني.........وعدتها اني هكون معاها وهنقعد نقزقز لب بعد سنتين من دلوقتي لما يخلص العلاج...و هنضحك.....و هنتشاقي.........و عدتها و كلي يقين

قالتلي.......انا خايفة مبقاش ام..........اكتر حاجة بحبها في زوجي......اني نفسي اخلف منه.........علي اد خلافاتهم التي لا تنتهي الا انها لاتزال تراه الرجل الوحيد الذي ايقظ حلم الامومة بداخلها

انا قولتلها.........طب ما انتي ام..........احساسك بيه....حنانك عليه.....احتوائك......كل ده امومة....و بعدين يا بنتي ده ربنا رحمك انك خلفتي راجل قلبه طفل بس مش هيتعبك بقي انه بيسنن و لسه هيمشيو لسه هيوقع شوربة العدس ع سجادة الصالون....بس هو اكيد بيتعبك لان الطفل الكبير عينه زايغة كتير.....ضحكت من كل قلبها

و انا مكنتش عايزة حاجة اكتر من كده

الساعة 20:25

===========

انا و نفسي........و اعتذار و اعتزال من الدنيا بحالها...................الناس بتتخانق كده ليه

الناس زعلانة اوي ككده ليه

الناس بقت متبتة في الدنيا كده ليه

الساعة 21:20

==========

انا و محل الشاورما...و قطة اصرت انها تتقاسم معايا شاورمتي المتواضعة...مش عارفة عجبتها و لا لا...بس كان احساس حلو......

الساعة 21:30

===========

جواد ابن الجيران ساب ايد مربيته الفلبينة و جري عليا و اصر ان نلبع لعبتنا المفضلة.....هي عبيطة اوي بس تعني له الكثير جدا

افتكستله مرة انه لازم ينط لفوق لغاية ما يلمس اعلانقطة في السما

جواد عنده يقين انه بيلمس السما مع اني ميجيش ركبتي

و انا دايما اقوله يا جودي.....عيونك عندي هي حدود السما

في لحظة حسيت اني جسمي بيتثاقل......و مكنش عندي اي رغبة باي مقاومة الجاذبية.... كنت اشعر اني انطلق بسرعة الصاروخ للأسفل

في لحظة عيون جواد......اخدتني معاه للسما...قفزته كانت اعلي بالتأكيد.....يقينه كان صادق ده اكيد.....

لكنه كان امهر معلم عرفته في يومي ده..........

السر بس في قفزة في الهوا

اليوم باقي منه ساعتين و نص..........هيكون تأمل....و صلاة..........وصمت

==============================================

تراودني نفسي بتنفيذ وعدي المؤجل بالبكاء...لكن قفزة جواد....تحول دون ذلك

اراكم في يوم آخر

يبدأ بنسمات...... و ينتهي بقفزات.......و اخشي عليكم ان تمروا من خلاله باي لحظة ألم

دمت قريري العين بمن تحبون

[joo]

الدائرىىىىىىىىىىىىىىىىىىىىىىىىىىىى

كل يوم على الدائرىىىىىىىىىىىىىىىىىىىىىىى

وكل يوم حادث جديد على الدائرىىىىىىىىىىىىىىىىىىىىى

بس النهاردة كان يوم مختلف

3 حوادث على الدائرىىىىىىىىىىىىىىىىىىىىى

وفى النهاية00 روحت البيت والمدام عاملة كابسة بالحمة الضانى والمكسرات

ونسيت كل الحوادث

وبعدين خرجت 00 ووفقت راسين فى الحلال 00 وكانت نهاية سعيدة

[ذهبية]

لماضة احييك على وصفك ليومك بجد انتى كل يوم بتثبتى انك كاتبة بالفطرة بتقدرى توصفى اللحظة بطريقة خاصة بيكى

لها طعم خاص و مشاعر خاصة لو ما قريت اسمك هاعرف ان دة اسلوبك من بين الف مشاركة تانية لان بجد

لك طبعة على القلب مميزة خالصة احساس و صفاء و نقاء طفولة وشقاوة لحظة بتعدى تعلم فى قلوبنا من غير ما نشعر

اكملى لنا يومياتك اللى باعتبرها احلى من اى كتبا بقراة كل يوم

تحياتى الى صديقتك ربنا يقويها على محنتها و يعوضها على صبرها خير باذن الله