الإبن الوسط

[اميره]

من خلال ملاحظتى البسيطه لمعاملة الابناء فى مجتمعنا ان كل الحب والاهتمام للإبن الأكبر والأصغر

أما الإبن الوسط بحس انه معاملته بتختلف ولكن للاسف للأسوء ودا أنا شوفته فى بيوت وأسر كتيره

بإعتبارى ابنه وسط أشهد بكدا wst::

بإن معاملة الإبن الكبير والصغير بتختلف بنسبة حوالى 40% ويمكن اكتر للأحسن من معاملة الإبن الوسط

ممكن أعرف من الامهات والأباء ليه التفرقه العنصريه دى هو الإبن الوسط ده لقينو قدام باب جامع ولاجاى غلطه :lol:

وهل كل الناس كدا ولافى أمهات وأباء بيحبوا الإبن الوسط اكتر من الباقيين (يارب حد يكسر القاعده الى جابتلى زهيمر مبكر دى )

ومش عايزه الإجابات الدبلوماسيه الى ترفع الضغط وحد يقولى أنا بحبهم كلهم زى بعض ماشى بس أكيد فى نسب للحب بينهم بتبقا بقا لاى واحد الكبير الوسط الصغير

وأنا من خلال دراستى حاولت أعمل بحث فى الموضوع ده لأنه بجد بيأثر بنسبه كبيره على نفسية الأبناء وبصراحه بيكون فى حقد بسبب التفرقه

وسألت أمهات كتير وكانت إجاباتهم

1_اصل الإبن الكبير ليه فرحه خاصه ... ياسلام والباقين جم ساعة غسيل ماشى ماعلينا

2_أصل الصغير لا دا بقا أخر العنقود حاجه تانيه خالص ياحسره طيب والى فى النص إبن البطه السوده ماعلينا بردو

3_لا أنا بحبهم وبعاملهم كلهم زى بعض غلط أوقات بيقولو كدا وبشوف فى تفرقه بردو

عايزه مبرر لسبب التفرقه دى وياترى فى أسباب مقنعه لكدا ولا هو ظلم وإستبداد وخلاص :lol:

يلا نشوفكم على خير

[miramikhail]

بصى حرد عليكى من واقع تجربتى كأبنة وسطى لكن كأم عندى أثنين فالولد الكبير و البنت الصغيرة يعنى الدلع للأثنين و الأثنين كل واحد يقولى أنتى بتحبى التانى أكتر منى .

المهم هو كل طفل بيبقى له حب خاص لكن الكبير بيبقا كل حاجة بيعملها دية أول مرة يعنى لما ينجح فى الأبتدائية أول واحد يأخد شهادة و حاجات كده أما الأوسط فخلاص خدوا على كده فمافيش مشكلة يعنى بقت خلاص قديمة أما الصغير و بحكم أنه الصغير فالكل بيتعامل معاه على أنة محتاج رعاية و بيفضل الصغير حتى بعد ما يكبر وده على فكرة أحساسى مع أخويا الصغير.

و على فكرة ده بيبقى أحسن يعنى أنا كنت رايقة و مش مركزين معايا لحد ما أختى و أخوى اللى أكبر منى أتجوزوا و كانت المشكلة ماما الله يرحمها بدأت تركز معايا وطبعا أنا مش متعوده على كده

[البهدلي]

بصي

موضوع الحب الاكترده من قديم الازل

واشهر متال حب يعقوب ليوسف اكتر عليهما السلام

بس مانقدرش نقول كان فيه تفرقه في المعامله هو دا المهم

انا معاكي لاني ابن وسط وعمري الان فوق التلاتين ومازال والدي مزودنها حبتين مع الاخ الاكبر و مأفورينه ع الاخر

المشكله بقي ان انا حاسس ان انا كده مع عيالي

مش عارف ليه؟؟؟؟؟؟؟؟؟؟

بس الايام دي لا لقيت الوسطاني بدا يتعقد حاولت اظهر مشاعري اكتر للوسطاني ...........فحصل رد فعت من الاتنين : الكبيره غارت وزعلت والوسطاني تمادي ف الدلع والطلبات والشقاوه الجامده موت

اما الاخير فلسه عبيط مش حاسس بالحرب دي

ربنا يقوينا ونعدل

ولو حد عارف كتب او تخصصات ف التربيه في النقطه دي يدلنا ربنا يجازيه خير

[الباشمهندس ياسر]

فــ لله كبف اختار واسطة العقد

ابن الرومي

[fatfouta]

بما انى ابنة وسط احب اقولك انه فعلا الوسطانى دايما فاقد حاجات كتير

انا كنت وسطانية فيه اتنين قبلى واتنين بعدى اللى قبلى يقولولى لما اجى اتكلم معاهم يقولوا لا مش هتفهمى عشان انتى لسه صغيرة واللى بعدى متفقين مع بعض دايما ومش عاوزين حد يدخل بينهم ولا عرفت اتفق مع دول ولا مع دول

وكنت بتضايق جدااا عشان مش لاقيه حد معايا ايوه هو شعور طفولى شوية واما بنكبر بيروح لكن بجد بيسيب جوانا مشاعر وسلبية ومش كويسة

كانت دايما امى تدلع الصغيرين وفى نفس الوقت كانت تقعد تتناقش مع الكبار وما بين كده وكده كانت بتنسى انى لا كده ولا كده وعلى هذا الاساس دايما كنت ضايعة فى النص ودايما منسية

وعلى العكس كان ابويا دايما كان عنده احساس انى منسية وماحدش حاسس بيا فكان يدلعنى اوى ويهتم بيا زيادة عشان يعوضنى عن امى اللى دايما مشغولة عنى واوعوا تفتكروا ده شئ كويس لا بالعكس ده دلعه ليا كان بيخلى الكبار يقولوا اشمعنى والصغيرين يغيروا والكل ياخد موقف منى

وكبرت اهو وبقيت ام ومش قادرة انسى لغايت دلوقتى عشان ذى مابقولك يا اميرة ده بيسيب مشاعر سلبية جوانا

وعشان كده لازم الام والاب مع بعض يعطوا لكل طفل على حدى اهتمام وحب ومايقولوش ده الكبير وفرحته مش عارف ايه وده الصغنن واخر العنقود

[doha]

بيقولوا في علم النفس ان الطفل الاوسط بتطلع غالبا شخصيته مستقلة ومعتمد على نفسه على اساس ان ملوش دلع الصغير ولا سطوة ومكانة الكبيرة

هي حظوظ متقسمه .. ناس بتاخذ مكانه داخل العائلة لانها انولدت الاول او الآخر وناس تانيه بتاخذ مكانة براها لانها تعودت من صغرها انها لازم تتعب عشان تحصل على الاهتمام .. هيكبر الاوسط ويمكن ينسى رغبته في الحصول على الاهتمام لكن هيبقى لديه دائما الحافز انه لازم يتعب ويجتهد حتى لو مكانش عارف بيعمل كده ليه ..

تم تعديل 6 يناير 2010 بواسطة doha

[wsadani]

السلام عليكم ورحمة الله وبركاته

انا الابن الاوسط قبلى اتنين وبعدى اتنين وفعلا قريت عن موضوع الابن الاوسط ده بص صراحه محستوش خالص الحمد لله وشايف الوالد والوالدة بيعاملونا كلنا بحب وبدون تفرقة بل بالعكس ساعات احس ان فى شوية دلع انا خدتهم زيادة

هز اكيد الابن الاكبر بيبقى ليه فرحة خاصة والصغير بيبقى حاسين انه مش هياخد اللى خده الىاكبر منه بس الاب والام اللى يحيوا ولادهم ميبقاش بينهم حزازيات تبقى المعامله واحده

والحمد لله على كل حال

[لماضة مصرية جدا]

السلام عليكم و رحمة الله و بركاته

يا قهلا يا قهلا يا قهلا بكل اللي رقصوا ع السلم

انا برضك جيت في النص... بس الحقيقة كان قبلي ولدين.....و بعدي بفترة كبيرة بنوتة تاني....يعني عشتلي يويمن دلع كده اني اول بنوتة... بس كانت ايام سودة الحقيقة لما انضمت للقبيلة اختي الاصغر مني... لاني كان بينطلب مني اني آخد بالي منها...طب آخد بالي منها إزاي اصلا و انا عايزة الي ياخد باله مني... معرفتش اعمل ده و انا صغيرة....بس لما كبرت بقيت استمتع جدا ان الواحد يبقي عنده حد اصغر منه كده يدلعه و يخاف عليه.

الاخ الكبير الحقيقة هو اللي كان واخد كل الاهتمام....و ده كان بيخلي علينا ضغط كبير انا و اخويا ان احنا دايما عايزين نفوق توقعات والدينا....يعني انا و اخويا اللي كنا في منطقة الوسط....تحسوا دايما ان احنا بنسابق الزمن....بنجري...دايما بنحط نفسنا في تحديات...مع ان الدنيا ممكن تمشي أهدي من كده خالص

بناخد حقنا بطريقتنا.....بالدلع...بالحنية...بالشغب....بس مقدرشي اقول ان احنا مختلفين عن اخواتنا في الحوتة دي...و ان سبب الاختلاف ان احنا جينا في النص

هو الحقيقة احنا كل واحد فينا يتفاتله بلاد....و ده دايما اللي بيحيرني....احنا اخوات... نفس التربية.. نفس البيت... نفس طبق الفول قصدي الكرواسون....و كل واحد فينا طالع كتااااااااااااااااااااب لوحده خااااااااااااااااااااالص

انا مقتنعة ان لو طفل مثلا طلع حس ان والديه مش بيحبوه بالشكل الكافي... طبعا هي مشكلة الاب و الام م البداية.....بس لما يكبر الحل لازم يجي منه هو او هي و ميستناش حد يبنيله ثقته بنفسه

لاحظت برضه اني انا و اخويا (اللي اتعلم علينا في النص) لينا شخصيات كرايزمية....يعني حضور اجتماعي...قيادين... متمردين....لاسعين جدا (الحقيقة انا كنت المخ و اخويا العضلات....بس لما بتجي ساعة الحساب هو الله يكرمه كان بيبقي المصدات)...اشقيا جدا... مغامرين جدا جدا جدا.... ممكن برضه عصبيين....

تصدقوا انا لاحظت حاجة دلوقتي...ان منحي حياتي انا و اخويا واخد كيرف غير عادي.... يعني مش زي البني آدمين...في حين ان اخواتنا اللي في الاطراف (الكبير من فوق.... و العنقود من تحت) حياتهم تميل للسيناريو المعتاد للحياة....مش عارفة هلي لده تفسير؟؟؟

أميرة....يا رب اكون ساعدتك في البحث بتاعك...بس و عهد مين ده...و عهد الله... مستنية منك نتيجة التحاليل (يا رب ولد... يا رب ولد.... ;) )

صباحك نطة من ع السلم لفوووووووووووووووووووووووق جدا جدا جدا....بعيد جدا عن قانون الجاذبية

فوتكم بعافية

[doudy]

صباحك ورد يا اميرة ;)

انا الكبيرة مش الوسطى فما حسيتش الاحساس دة

بس اللى اقدر اقوله انى فعلا مفضلة عند ابويا و امى لغاية دلوقتى بعد ما اتجوزت يعنى بحكم انى البنت الوحيدة

بس عمرنا انا و اخواتى هما ولدين بعدى ما حسينا باى تفرقة فى المعاملة بس طبعا معاملة البنت غير معاملة الصبيان

بس انا بقيت ام لتلاتة و الوسطى بنوتة و الحمد لله بعاملها كويس و مفيش اى مشكلة

بالعكس انا دايما قاسية مع ابنى الكبير لانه عندى و عصبى و دايما بيخلينى اتنرفز عليه

بس يا ستى دى الحكاية مش شرط ان الاوسط هوة اللى يضيع فى النص حسب الظروف مش قاعدة :lol:

[اميره]

والله منورين وأستفدت كتير من كلامكو لكن مازالت توجد حلقه مفقوده يعنى كلام

الاستاذ البهدلى ::

انا معاكي لاني ابن وسط وعمري الان فوق التلاتين ومازال والدي مزودنها حبتين مع الاخ الاكبر و مأفورينه ع الاخر

المشكله بقي ان انا حاسس ان انا كده مع عيالي

مش عارف ليه؟؟؟؟؟؟؟؟؟؟

ليه كدا حضرتك بس أرجوك حاول تعدل مابينهم وماتحسسش الوسط انو غير مرغوب فيه

والله بجد بيسبب عقده نفسيه وشوية حقد على الاب والام بسبب التفرقه وعدم الاهتمام

ربنا يلهمك الصواب

[اميره]

بما انى ابنة وسط احب اقولك انه فعلا الوسطانى دايما فاقد حاجات كتير

صح والله يافتفوته gt: حاجات كتير أوى لدرجة إن بنحس إنهم مش محتاجينا خالص

تحياتى ليكى رغم إن بعيط مش فاضيه

[اميره]

ياأهلا بااللماضه كلها منوره الحته والله

طيب أنتى حتعرفى تاخدى حقك كويس أما الغلبان بقا يعمل ايه ينتحر من فوق الكيبورد

لاحظت برضه اني انا و اخويا (اللي اتعلم علينا في النص) لينا شخصيات كارزمية....يعني حضور اجتماعي...قيادين... متمردين....لاسعين جدا (الحقيقة انا كنت المخ و اخويا العضلات....بس لما بتجي ساعة الحساب هو الله يكرمه كان بيبقي المصدات)...اشقيا جدا... مغامرين جدا جدا جدا.... ممكن برضه عصبيين

ايوه الله يرضا عليكى جبتى النقطه المهمه فى البحث

يبقا من الأسباب التى تجعل الإبن الوسط مميز هو أنه يتمتع بسمات فى شخصيته تميزه عن باقى الأخوات

ياسلام عليكى داانتى كدا مش خلتينى أنط من على السلم دا أنا حركب الوزه وأطيييييييير

[اميره]

صباح الياسمين يادودى

(انا الكبيرة مش الوسطى فما حسيتش الاحساس دة )

أيوه ياستى يابختك عقبالنا كدا لم نحس الإحساس ده فى الجنه بقا إن شاء الله

تحياتى ليكى رغم إن فى شوية حقد على إنك انتى الأبنه الكبيره وأنا الابنه الوسط

وألف شكر لكل إلى إهتم أنو يساعدنى فى إكمال البحث الأسرى المهبب ده

دعواتكم والله المستعان