نضافة ولاد الناس

[Diab]

-

تم تعيين 3 مهندسين الشهر الماضى . قدموا استقالتهم هذا الشهر , أى بعد شهرين من العمل !! . و انتقلوا للعمل فى شركة اخرى فى وظيفة لا افهم كنهها بالضبط . فلما سئلت عن سبب الأستقالة . اجابنى مديرى بكل بساطة " أصلهم عيال نضيفة و ولاد ناس .. و مش حمل بهدلة الشغل بتاعنا و قرفه و مرمطته !! " . غضبت كثيراً و انفعلت على مديرى عند سماعى اخر جملة . فمعنى عملى فى هذه الشركة منذ سنتين و تحملى بهدلة الشغل و مرمطته هو " انى لست أبن ناس " , لأن لو كنت أبن ناس كنت تركت العمل بعد شهرين كما فعل ال3 مهندسون . صرخت فى وجه مديرى الذى انفجر ضاحكاً من غضبى " يعنى هم ولاد ناس و احنا اللى طالع تيت ابونا و من محافظة لمحافظة و من قرية لقرية , نبقى ولاد البطة السودا يعنى و لا إيه ؟ " .....

عن النضافة

من هم ولاد الناس ؟

2- ابن الناس هو ابن الشريحة العليا للطبقة المتوسطة . متعلم ذو شهادة جامعية . يسعى جاهداً للخروج من كونه ابن الطبقة المتوسطة ليلحق بفئة الطبقة العليا او كما يقال بفئة " العيال المستريحة " . فلا هو يريد أن يكون الشاب المكافح الذى صنع نفسه بنفسه و فى نفس الوقت لم يستطع أن يكون أبن الطبقة العليا من العيال المستريحة .. قد يكون تعلم فى مدارس أجنبية و لكنه لم يتعلم فى مدارس انترناشيونال .. هو بين بين .. هو فقط ابن ناس !! .

يستقيظ أبن الناس مبكراً لياخذ حمامه البارد و يضع البادى سبراى و يرتدى بذلته ال" guy laroche " و يضع عطره ذى الماركة العالمية . يقوم بتجهيز النسكافيه و يضعه فى المج الذى يحفظ سخونته و ينزل ليأخذ سيارته الميتسوبيشى او الالنترا التى مازال يدفع اقساطها حتى الأن . يمر سريعاً على احدى المحلات ليأخذ قطعتين من البراونى كأفطار سريع , فهو لا يفطر كما أبناء الطبقة المتوسطة فول بالبيض او بيض بالبسطرمة و كوب من الشاى . ينهى افطاره الخفيف و يدخن سيجارته الأولى فى تكييف السيارة . هو ليس مدخن شره و لكن علبة الماربورو جزء هام من قبضة يديه مع الموبايل و الولاعة الزيبو و الميدالية الذهب , فهو بالطبع لا يدخن ال" ال أم " الزرقا او "الروثمان " و أكيد لن يستخدم ولاعة سخان !! من ام جنيه و نص .

شبكة علاقاته والده كبيرة كأب حقيقى خدم فى طبقة متوسطة , لذا فهو يعمل لدى احدهم عن طريق أحدهم أخر . لم يتقدم لوظائف و لم يجرى اختبارات , يعمل فى احدى تلك الوظائف الكبيرة التى لا تفهم بالضبط كنهها كال " اتش أر " , او " الكونسالتانت " .. و لا تعرف كيف وصل اليها شاب فى سنه , هو فقط تجده هناك . شبكة علاقاته ممتدة , فدائماً هناك صديق لديه شاليه او فيلا بالعين سخنة و مارينا لزوم قضاء الويك اند , و أخر وكيل نيابة و ثالث ظابط شرطة لزوم تخليص الاوراق , و رابع يعمل فى السياحة لزوم التخفيضات على الكروزات السياحية بين الأقصر و أسوان و الحجز فى فنادق شرم و الجونة . فهو لا يستطيع السفر الى الخارج .. لا يذهب الى مايوركا بأسبانيا او نيس بفرنسا او فلوريدا بأمريكا او احدى جزر الكاريبى كما يفعل العيال المستريحة كل عام , و لكنه يستطيع تدبير المال اللازم كل 3 او 4 سنوات للسفر الى لبنان او المغرب او اليونان او حتى جنوب إيطاليا . و فى نفس الوقت لا يريد ان يكافح فى سبيل 5 ليال بالغردقة او 10 أيام بمرسى مطروح كما الطبقة المتوسطة .. فهو كما قلنا بين بين .. هو فقط ابن ناس .

أبن الناس مثقف بالطبع و لكن ثقافة ولاد الناس , فهو لا يعرف المدونات و لا يهتم بتهييسات نوارة و لا كراكيب هانى و لا أسرائيليات الطوخى و بالطبع لا يسكن فى حارة . لا يشاهد قناة الجزيرة المستفزة و يفضل عليها قناة العربية بنظافتها و مذيعاتها الجميلات . هو قارىء و متابع جيد , و لكنه لا يقرأ تفاهات تورجينيف و لا سخافات فوكو بل تجده هناك فى ديوان فى قسم الكتب الأجنبية , يقرأ لباولو كويلهو بالأنجليزية او الفرنسية , قرأ اولاد حارتنا لمحفوظ و يعقوبيان للأسوانى و تاكسى الخميسى و هو اول من قرأ secrets قبل ترجمته الى العربية . لا يعرف بأصدارات الكتاب الجدد فهم خارج حساباته , يقرأ المصرى اليوم و احياناً مجلة روزاليوسف !! . لا يشترك بأحزاب و لا حركات معارضة و بالطبع لا ينزل الى مظاهرات فهو - ابن الناس - لا يركب مترو الانفاق او الأوتوبيسات حيث الأزدحام , فمابالك بمظاهرة عن عرق الشعوب !! . لا يستمع الى محمد منير لأنه سخيف و يكره هانى شاكر و أنغام , يفضل فرانك سيناترا و إينجما و إيرا و عمرو دياب و روبى و إليسا . طبعاً لا يذهب الى ساقية الصاوى , يفضل الأوبرا نهاراً و بورا بورا ليلاً . لا يهتم بالسياسة و لا تشغله القضية الفلسطينية و إن كان يعرف تاريخ النكبة جيداً من الأفلام الوثائقية الأنجليزية التى يشاهدها ك" سى ديز " من أنتاج قناة البى بى سى , قناة بريطانيا العظمى صاحبة وعد بلفور !! . تجد فى سيارته كتابين او ثلاث بلغات مختلفة انتهى من قراءة احدهم و بدأ فى اخر .

هو متدين , لديه سجادة الصلاة الخاصة به و يرتدى صليب ذهبى . لا يذهب الى الجوامع المزدحمة و لا يستمع الى الخطب الطويلة , لا يذهب الى كنيسة منطقته بل لديه كنائس مفضلة كالمرعشلى بالزمالك او البازليك بمصر الجديدة . يضع سبحة ك" عليقة " حول مراية السيارة سواء من السعودية برائحة المسك او بصليب خشب برائحة جبال الزيتون من القدس . يستمع الى عمرو خالد و ال" better life " , يصوم و يصلى و لكنه كأبن ناس له خطاياه أيضاً و لكنها مغفورة بأذن الله . فهو يدفع الزكاة و العشور بأنتظام . من وجهة نظره لا يعيش فى الرذيلة كالعيال المستريحة و لا يعانى من تزمت الطبقة المتوسطة , فهو كما قلنا بين بين .. هو فقط ابن ناس .

يحتاج ابن الناس دائماً الى خصوصية . يخرج كل أسبوع مع صديقاته و أصدقائه . بالطبع لا يجلس على قهوة بلدى او قهاوى وسط البلد او حتى كافيهات مصر الجديدة او مدينة نصر . يخرج فى اماكن ليدخن الشيشة مع صديقاته , المدخنات أيضاً و بالطبع يحتاج الى مكان " نضيف " , علشان محدش يعلق عليهم تعليق سخيف , مكان يكون كله " عيال مستريحة " " فرى " فى تصرفاتها او على الأقل كله " ولاد ناس " . بالطبع لا يدخن معسل النخلة او قص البرج او سلوم مزاج عالى , هو يدخن نكهات الفواكه و خاصة العنب الفاخر من ام الحجر ب35 جنيه . لا يستخدم " لَىّ " عام , بل " يستخدم " لَيّه " البلاستيكى الخاص الذى ياخذه معه بعد الأنتهاء . هو لا يذهب الى " بينوس " او " كوستا " , او " سيلنترو " او " ستار باكس " فتلك الاماكن مرتع لأبناء الشريحة العليا من الطبقة المتوسطة و هو لا يريد الأختلاط بها و لكن يذهب الى أماكنه الخاصة المغلقة ك" سيكويا ", " سنجرية ", " هارد روك " او " جراند كافيه " . بالطبع لا يأكل فى " ماك " , " كنتاكى " , او " بيتزا هت " , فهو يذهب الى " لاكازيتا " , " كورتيجيانو " , “alain le notre “ , " Johnny carino’s " , " ابو السيد " , او " ستوديو مصر " و " ابل بيز " كأضعف الأيمان " !! . هوس الخصوصية جزء من تفكيره حتى فى مسكنه . فوالده قد دفع مقدمة تلك الشقة فى القاهرة الجديدة او الرحاب او مدينتى و عليه أن يكمل اقساطها ( بجوار اقساط السيارة ) لأنه كأبن ناس لا يسكن فى مناطق عالية الكثافة , يحتاج الى الراحة و الهدوء و الرحابة . لذا فانه من كثرة الأقساط يتزوج متأخراً فى اواخر عشرينياته . فهو لا يتزوج صغيراً ك" العيال المستريحة " و لا متأخراً بعد كفاح كأبناء الطبقة المتوسطة . فهو كما قلنا بين بين .. هو فقط ابن ناس .

ابن الناس , لا تستطيع ان تكون صديقه , فهو مختلف عن أبناء الطبقة المتوسطة . فهو يصرف كل مرتبه بينما ابن الطبقة المتوسطة مصاب بهوس " التحويش " ( ليه تصرف 500 جنيه فى خروجة لما ممكن تخرج نضيف برضه ب100 جنيه و تحوش 400 ؟ ), ( ليه تاكل بره أصلاً لما ممكن تاكل احلى اكل فى البيت ؟ ) . لا تستطيع ان تتكلم معه , فابناء الطبقة المتوسطة لهم لزمات فى كلامهم ك" جامدة اخر حاجة " , او " عيل سيس " , مع بعض الشتائم المحببة للنفس و الجسد , لكن ابن الناس لا يستعمل تلك اللزمات فكلامه فى اغلبيته انجليزى – عربى او فرانكو – اراب , كلام بستايل , بنضافة و ليس كلام بيئة تتردد به الفاظ طبقات اخرى !!! . لديهم عاداتهم و تقاليدهم التى لا تستطيع مجارتها و اماكنهم الخاصة التى قد تذهب اليها مرة فى العام اذا تيسر لك ما تيسر . لا تستطيع ان تعمل معه فى مكان واحد , فهو لا يتحمل الشقا , لا يعمل فى مواقع , لا يمد يده على العمال و لا يسب لفنى تركيبات حتى ينهى عمله . لا تستطيع ان تأمن له و تكون معه على راحتك أو تتعامل معه برجولة و جدعنة , فهم - كما يراهم أبناء الطبقة المتوسطة - " عيال سيس " . فأبن الناس لا يتورع أن يبيعك فى أى لحظة لمديره . المكانة و المرتب الذى وصل اليهما فى سنه الصغيرة لا يسمحان بأى نوع من الرجولة والجدعنة مع " ابناء الطبقة المتوسطة المستهترين الذين يطلقون على أنفسهم مكافحين " !!! فهو حاد جداً فى عمله , لا يعرف الليونة التى نعرفها . ايذاءك و رفدك او طردك من العمل لا يمثل له أى إشكالية من النوع الذى يؤرقك كإشكالية " قطع العيش حرام " , فرأسه المهووس بالخصوصية و الملىء بالأقساط لا يلقى اليك بالاً . ليس شبعان كالعيال المستريحة و لا مكافح كالطبقة المتوسطة .. هو دائماً فى منطقة الخوف حيث الأقساط و الخروجات و البكاء و صرير الأسنان .

ابن الناس يظل دائماً ابن ناس بشبكة علاقاته الواسعة و الممتدة . فى مسيرة لا تنتهى من البحث عن " النضافة " و الرحابة و الأستقرار و الخصوصية . ينظر الى " العيال المستريحة " على انهم ارباب الأرض الجدد و يتحاشى النظر الى الطبقة المتوسطة كأنهم خطيئة العالم الشرير .

-3-

اذا كنت تقرأ هذه الكلمات على مدونتى فأنت أما من " العيال المستريحة " أو من " طبقة المكافحين " سواء المتوسطة او الفقيرة و لكنك بالتأكيد و سامحنى فى قولى هذا " انت لست أبن ناس " . فكما قلنا , ابن الناس لا يهتم بتلك التفاهات و بالقطع لا يتابع مدونات و لكنه هناك منشغل بالبحث عن النضافة و فى أنتظار سداد اقساطه التى لا تنتهى حتى ينعم بالراحة و السعادة و مزيد من الخصوصية .

-4-

كلنا نحتاج الى الخصوصية , فلم اسمع حتى الأن عن أى شخص سعيد بالعيش فى زنزانة او حتى شقة بها 15 نفر . فالجميع يحتاج الى الخصوصية حتى لو كانت من اجل ممارسة بعض التقاليد و العادات السرية . و جميعنا يحب النضافة فلم اسمع عن أحد سعيد و هو يعوم فى اكوام من الطين والقمامة . و لكن حالة ولاد الناس - او بالأدق - حالة طبقة ما فى البحث عن الخصوصية حالة هوس حقيقى و رغبة غريبة فى البعد عن الطبقات الأخرى و خاصة طبقة العمال . فكل ولاد الناس الأن يعملون أعمال مكتبية و دبلومة ال" H.r. " اصابت البعض بالعته من أجل الحصول عليها و من قبلها كانت ال" M.b.a " . أصبح النظر الى الخصوصية و النضافة و البعد عن الطبقات الأخرى .. ظاهرة حقيقية تستحق التأمل و المراجعة و التفكير و البحث عن أسباب هذا الجنون الرسمى .

http://www.20at.com/masr/egyptian-blogs/14...1-11-33-07.html

عجبني جدا كلامه الا ان تعليقات الناس عن الموضوع ان صاحب المقال مريض نفسي

انت شايف كدة

بصراحة مقالة في الجون بجد

[Damo]

معنديش كلام كتير اقولو لكن انا اوافقك الرأي. انا شايفة كلامو كلو صح بس معادا جزء اختلف معاه بشدة :lol: :

اذا كنت تقرأ هذه الكلمات على مدونتى فأنت أما من " العيال المستريحة " أو من " طبقة المكافحين

[الباشمهندس ياسر]

ابن الناس...:؟

هل نستطيع ان نتفق علي تعريف محدد المعالم لهذا المصطلح..؟؟؟

ان استطعنا ان نضع التعريف الواضح الذي ينفي كل جهالة بما يعنيه اللفظ فاننا سنصل الي اتفاق تام حوله

خلاف ذلك فان الكاتب يصف طبيعة او منهجية حياة لطيف من اطياف المجتمع و لا استطيع ان انكر عليه ذلك... و هذه هي مشاهداته الشخصية

اخيرا

تفاضل الناس بأخلاقها و معاملاتها و مدي التزامها بالدين عامة

[myusername]

على فكرة كلامه واقعى الى حد كبير... بس فيه حاجة, ان العملية بتختلف من شخص لاخر على حسب اللى هو عايز يعمله.

يعنى مثلا ممكن تلاقى شاب من ابناء الطبقة المتوسطة بيسافر لاوروبا كل سنة... فقط لمجرد ان ليه رغبة فى السفر... و بيتخنق من القعدة فى مصر.. و على فكرة تكاليف رحلة الغردقة او شرم قريبة الى حد كبير لتكاليف رحلة لجزيرة بالما دى ماخوركا فى اسبانيا اللى هو كاتب عنها.. خاصة لو بتروح الغردقة او شرم طيران و مبتحبش البهدلة فى الكمين :blink: ( عن تجربة شخصية الاتنين نفس التكلفة)

بس ارجع و أقولك... ولاد الناس برضه md2: (وش سمير غانم فى المتزوجون)

اللى عايز اقوله... ان فيه خليط.. يعنى مش كل الشباب ماشيين عالريتم اللى فوق ده... يعنى هتلاقى شباب بيعملوا حاجة او حاجتين.. و فيه شباب - زى حالاتى - من ابناء الطبقة المتوسطة العادية اللى وصلوا بمجهودهم الى حد ما الى بداية الطريق الصحيح.. :lol:

بس فى النهاية.. الكلام اللى فوق ده واقعى جدا بالنسبة لابناء اعلى طبقة فى الطبقة المتوسطة.

و مش عارف ليه فيه ناس كاتبين عليه مريض نفسى زى ما بتقول :sad:

تم تعديل 7 يناير 2010 بواسطة myusername

[myusername]

ابن الناس...:؟

هل نستطيع ان نتفق علي تعريف محدد المعالم لهذا المصطلح..؟؟؟

ان استطعنا ان نضع التعريف الواضح الذي ينفي كل جهالة بما يعنيه اللفظ فاننا سنصل الي اتفاق تام حوله

خلاف ذلك فان الكاتب يصف طبيعة او منهجية حياة لطيف من اطياف المجتمع و لا استطيع ان انكر عليه ذلك... و هذه هي مشاهداته الشخصية

اخيرا

تفاضل الناس بأخلاقها و معاملاتها و مدي التزامها بالدين عامة

ربما ان الكاتب ميكونش قاصد الموضوع بالطريقة الحساسة اللى حضرتك فهمتها... بس عموما من السذاجة اننا نقول كلمة ولاد ناس على طبقة معينة, و لكن من الناحية التانية... ممكن يبقى مقصود بيها شىء معين.

فى النهاية.. كلنا ولاد ناس, ده مفيش شك... و لكن ربما الكاتب يقصدها بشكل اجتماعى متمحور. mft:

و عموما... الكاتب نفسه أخطأ فى بعض الامور... فمثلا اذا كان الشخص قادر على انه يشترى شقة تقسيط فى مدينتى.. يبقى اكيد يعنى هيروح اوروبا كل سنة لو عايز. :waf:

[engmido]

ابن الناس ده مع احترامى للجميع هو ليس ابن الناس المرتاحة ماديا ولكن

ابن الناس هو الشخص المتربى المتدين المحترم فى تعاملاته ذو الصوت الهادىء الرزين ذو الملامح الهادئة نوعا ما

ابن الناس هو الى ممكن تتخيل اهله وشكلهم وطبعهم من غير ما تشوفهم

ابن الناس هو اللى تلاقيه معتدل فى ملابسه ومصاريفه وكل متعلقاته وليس بالضرورة يكون راكب عربية او فنجرى فى المصاريف

ابن الناس هو من يجبر جميع الناس على احترامه بجميع فئاتهم ....لانه هو نفسه يجيد التعامل مع كل الفئات والدليل انه نجح فى كسب احترامهم

ابن الناس هو اللى تعرفه من اول تصرف يتصرفه معاك

وهناك اوللاد ناس كتير لا يمتلكون نصف ما يمتلكه اولاد الناس المرتاحة ولكن هم بكل تأكيد افضل منهم بمراحل

بل بالعكس هناك ناس لديها قصور فى الشخصية ...قصور فى فنيات التعامل...قصور فى اللياقة....قصور فى التعليم

ويحاول لن يكمل هذا القصور بعربة شيك او موبايل حديث او يمسك سجاير نوعها كذا او ميدالية كذا وكل مانراه من هذا القبيل

هناك ناس كتير دى طبيعتها كده فعادى ولكن اللى مش عادى ان الواحد يتصنع هذه الحركات ليثبت انه ابن ناس

اعتقد ده وصف شاف لابن الناس مفيش بعد كده..........وشكرا لكم :waf: mft:

[doha]

هو بيوصف وصف واضح ومحدد لفئة معينة موجوده في مجتمعنا فعلا وبالظبط دي صفاتها لكن بالتاكيد مش هم دول بس ( ولاد الناس )

اعتقد ان المصطلح ده اكثر اتساعا من مجرد حصره على الفئة دي ..

[الباشمهندس ياسر]

ربما ان الكاتب ميكونش قاصد الموضوع بالطريقة الحساسة اللى حضرتك فهمتها... بس عموما من السذاجة اننا نقول كلمة ولاد ناس على طبقة معينة, و لكن من الناحية التانية... ممكن يبقى مقصود بيها شىء معين.

فى النهاية.. كلنا ولاد ناس, ده مفيش شك... و لكن ربما الكاتب يقصدها بشكل اجتماعى متمحور.

و عموما... الكاتب نفسه أخطأ فى بعض الامور... فمثلا اذا كان الشخص قادر على انه يشترى شقة تقسيط فى مدينتى.. يبقى اكيد يعنى هيروح اوروبا كل سنة لو عايز.

من فضلك فهمني ايه هي الطريقة الحساسة اللي حضرتك تقصدها

[Simba]

انا شايف انه عادي جدا جدا جدا ان اي شاب يحاول يرقي بنفسه او بمضهره حتي لو شال ولاعة دهب وحط اسانس شادية

وكتر خيره ان عنده ميتسوبيشي وبيعرف يدفع اقساطها انا كان نفسي يكون عندي سيات باب واحد من ام منفلة دي

[shiko]

يااخوانا انا كده موش عارفة انا بعمل كام حاجة من اللى فوق دول يعنى كده بتاع5 من 20 يعنى ممكن اعدى ولا اخلينى مكانى احسن

ولاد الطبقة اللى تحت المتوسطة وبلاش نكابر :big_boss:

[myusername]

يااخوانا انا كده موش عارفة انا بعمل كام حاجة من اللى فوق دول يعنى كده بتاع5 من 20 يعنى ممكن اعدى ولا اخلينى مكانى احسن

ولاد الطبقة اللى تحت المتوسطة وبلاش نكابر :big_boss:

ما هو ده اللى انا قلته... ان مفيش حد ماشى على ريتم واحد, لكن فيه خليط... واحدين كام حاجة من هنا... على كام حاجة من هنا, كده يعنى.

اما عن موضوع الطبقة "تحت" المتوسطة... :big_boss: مش عارف؟ بس عموما... اهم حاجة ان الواحد يعمل نفسه بنفسه... احسن من اى حاجة من دى.

[رضوي]

السلام عليكم ورحمة الله وبركاته

المقالة فعلا هايلة ولكن من وجهة نظر معينة

يعني الكاتب هنا يتحدث عن وجهة نظرة الخاصة في فئة معينة او شريحة بعينها من ابناء الطبقة المتوسطة وبتكلم عنها من خلال احتكاكه بالفئة دي . ودي وجهة نظر غير موضوعية

غير ان الكاتب اتخذ الجانب المادي مقياس لولاد الناس

يعني ابن الناس لازم يكون علي مستوي مادي معين

اما ما هو دون هذا المستوي او مايفوق هذا المستوي مايبقاش ابن ناس

واذا كنت اري العكس وأن الاخلاق والمعاملات هي اللي ممكن تخلينا نحكم علي فلان ونقول انه ابن ناس

والمعني الدارج للكلمة دي عندنا في مصر

بنستخدمها لما نقول ان فلان محترم ومش وش بهدلة فنقول عليه ابن ناس ................ وعلي فكرة ولاد الناس بيستحملوا اقصي الظروف والا مايبقوش ولاد ناس .........

فيما عدا ذلك فالمقال ممتاز

[myusername]

السلام عليكم ورحمة الله وبركاته

المقالة فعلا هايلة ولكن من وجهة نظر معينة

يعني الكاتب هنا يتحدث عن وجهة نظرة الخاصة في فئة معينة او شريحة بعينها من ابناء الطبقة المتوسطة وبتكلم عنها من خلال احتكاكه بالفئة دي . ودي وجهة نظر غير موضوعية

غير ان الكاتب اتخذ الجانب المادي مقياس لولاد الناس

يعني ابن الناس لازم يكون علي مستوي مادي معين

اما ما هو دون هذا المستوي او مايفوق هذا المستوي مايبقاش ابن ناس

واذا كنت اري العكس وأن الاخلاق والمعاملات هي اللي ممكن تخلينا نحكم علي فلان ونقول انه ابن ناس

والمعني الدارج للكلمة دي عندنا في مصر

بنستخدمها لما نقول ان فلان محترم ومش وش بهدلة فنقول عليه ابن ناس ................ وعلي فكرة ولاد الناس بيستحملوا اقصي الظروف والا مايبقوش ولاد ناس .........

فيما عدا ذلك فالمقال ممتاز

على فكرة... الغلطة اللى وقع فيها الكاتب... حكاية ان "ولاد الناس" مبيحبوش يشتغلوا بايدهم او يتعبوا... و لو ان المعلومة دى غلط و الله أعلم!

اما عن استخدام تعبير ولاد الناس فى مصر, فى الحقيقة... غالبا ما يتم استخدامها بشكل مادى اجتماعى... يعنى لابناء طبقة معينة, و هى فى الغالب الطبقة المتوسطة الارقى... لان الطبقة المتوسطة نفسها متفاوتة.

لكن انا فى رأيى الشخصى, المقياس الحقيقى لولاد الناس... او كلمة "الناس المحترمة".. طبعا هى الاخلاق اولا.. و حسن المعاملة... مع حسن المظهر دون مبالغة. لكن الكاتب قصده يتكلم عن معنى الكلمة من الناحية المادية.. و ربما الاجتماعية.

[justme]

المقال فعلا بيحاول يرصد حاجة ويعرفها من وجهة نظر صاحب المقال

ويبدولي انوا تأثر بفئة معينة حوله

بس رصد الظواهر الاجتماعية دي تم من خلال نظرةة محدودة زي ما الكل قال الا وهي المادة

والتعريف كان من وجهة نظره لمجرد شكل الظاهرة دي

بس للاسف هو ده حال مجتمعنا

نحن نرصد فقط نسخر اه ننتقد وماله

لكن نغير لأ

لألألألأ

مش عارف انا كل ما اقرأ واشوف وبعض الاحيان اشارك الاقي الناس قريت وعديت من غير ما تحاول تسأل

ليه

وايه الصح اللي ممكن نستفيده

وايه الغلط

يعني معظم الناس اللي شوفتها هاجرت او سافرت بره مصر كل همه هو صناعة نموذج مشابه شكلا في بعض الاشياء

يعني مدرسة اجنبية او انترناشونال

اشتراك في نادي

رحلات في الصيف خارج مصر ان امكن

شكل ال life style الغربي

لكن محدش سأل نفسه لما نجح

هو نجح ازاي

انا مكنتش مدرسة اجنبية ولا مدرسة لغات حتى

ومخدتش دورات انجليزي كمان

وابويا مجابليش واسطة علشان اشتغل

اعتقد مش انا لوحدي ممكن يكون ناس كتير كده هنا

بس النقطة المختلفة هي ان اهلي اهتموا بيا مش بنوع حياتي

يعني من الاخر المهم هو قيمنا التي نعيش بيها مش حياتنا اللي احنا عايشنها

يا رب اكون احسنت التعبير

تحياتي

[myusername]

المقال فعلا بيحاول يرصد حاجة ويعرفها من وجهة نظر صاحب المقال

ويبدولي انوا تأثر بفئة معينة حوله

بس رصد الظواهر الاجتماعية دي تم من خلال نظرةة محدودة زي ما الكل قال الا وهي المادة

والتعريف كان من وجهة نظره لمجرد شكل الظاهرة دي

بس للاسف هو ده حال مجتمعنا

نحن نرصد فقط نسخر اه ننتقد وماله

لكن نغير لأ

لألألألأ

مش عارف انا كل ما اقرأ واشوف وبعض الاحيان اشارك الاقي الناس قريت وعديت من غير ما تحاول تسأل

ليه

وايه الصح اللي ممكن نستفيده

وايه الغلط

يعني معظم الناس اللي شوفتها هاجرت او سافرت بره مصر كل همه هو صناعة نموذج مشابه شكلا في بعض الاشياء

يعني مدرسة اجنبية او انترناشونال

اشتراك في نادي

رحلات في الصيف خارج مصر ان امكن

شكل ال life style الغربي

لكن محدش سأل نفسه لما نجح

هو نجح ازاي

انا مكنتش مدرسة اجنبية ولا مدرسة لغات حتى

ومخدتش دورات انجليزي كمان

وابويا مجابليش واسطة علشان اشتغل

اعتقد مش انا لوحدي ممكن يكون ناس كتير كده هنا

بس النقطة المختلفة هي ان اهلي اهتموا بيا مش بنوع حياتي

يعني من الاخر المهم هو قيمنا التي نعيش بيها مش حياتنا اللي احنا عايشنها

يا رب اكون احسنت التعبير

تحياتي

حضرتك... و كل الشباب المكافحين - و اللى اتمنى ان اكون واحد منهم - ظروفنا متشابهة و زى بعض..

كلنا بيميزنا ان عندنا امل و طموح... و رغبة غير عادية فى النجاح!

فكرتنى بصديقة أمريكية فاضلة تعدت الخمسين من عمرها... لما كلمتنى عن حفيدتها و قالت لى انها بتاخد دروس فى رقص الباليه و الرسم... و بتعمل انشطة ترفيهية كتير... و قالت لى باللفظ: احنا طلعنا كويسين و حققنا طموحاتنا و وصلنا لاهدافنا من غير دروس رقص ولا ترفيه, بل كانت ايامنا صعبة و التعليم كان أقوى من دلوقتى. هى طبعا بتتكلم عن الوضع و التعليم فى أمريكا.

[عصام أبوالفتح]

ايه اللى يخلى الناس تمشى فى جنازة ابن الناس بالتعريف ده ؟

انا بافضل تعريف ابن ال( أى كلام ) لانه انسان فى نظرى ضااااااااايع

اذا نظرنا فى انفسنا .. أفلا تبصرون .. نرى الالكترون اصغر مخلوقات الله يدور فى فلكه الى ان يكتسب طاقه تمكنه من الانتقال لمدار اخر .. البشر كذلك ..والطاقة اما سلبية او ايجابيه ترفعه لاعلى او تخفضه لاسفل .. ادنى درجات العلم وتدرس لابنتى فى الصف الاول الابتدائى ان الموضوع له تصنيفات متعددة .. درجات علمية ومالية واخلاقية ودينية واجتماعية والاخيرة خليط مما سبقها ..والطبقات الاجتماعية ثلاث منذ خلق الله الارض ومن عليها ( سادة - عمال - عبيد ) ( حكام - موظفين - عامة ) ( الحكام وحاشيتهم ( عليا )- طبقة وسطى - باقى الشعب (دنيا ) )فلماذا نخترع تصنيفات ما انزل الله بها م سلطان تفسر وتسمى حالة العبور بين الطبقات .. التى لابد ان تكون فترة مؤقتة وهى فترة اكتساب الطاقة .. لا أحد يعيش هذه الفترة للابد .. لانه اثنائها كما قلت وعلى المستوى النفسى ايضا .. يكون ضائع ومتشوق لاكمال الطاقة اللازمة ( كوانتم بلغة الالكترون ).

ياريت نسمى الاشياء باسمائها ونفخر باننا جميعا من الطبقة الوسطى ( ليس لها تصنيف داخلى ) وتعريفها الوحيد ( أعمل لتأكل واجتهد لترتاح فى اخر ايامك او تريح اولادك )

اعتقد بشدة ان جميع المشاركين بالمنتديات من ابناء الطبقة المتوسطة .. لانه ببساطة الطبقة العليا لا تعرفها ولا تمثل لها اهميه .. والطبقة الدنيا .. لا تمتلك ادوات المشاركة

اذا فانت وانا طبقة وسطى .. اعترف بذلك

لما ربنا يفتحها عليك وتريح ولادك وولاد ولادك .. ده هايكون معناه انك عديت واصبحت فى المدار الاكبر للطبقة العليا وستتقاطع المصالح تلقائيا فتصبح كل عاداتك الاجتماعية مماثلة لهم.

او ان تفعل مثل عز .. تاخد شورت كت .. بصداقة ابن الريس مثلا .. لتصل الى ما وصل اليه .. ان ارتحت لذلك !!

او تحاول محاولات احمد حلمى المثيرة للشفقة فى كل افلامه للتمحك فى الطبقة العليا عن طريق نسائها ( واد نمس !! ) الى ان يصبح جزء منها .. ان ارتحت لذلك !!

لكن احذر من المحاولات الطائشة كالبورصة فربما تنزلك مداراً كاملاً ......

الى اسفل

[drmedo]

موضوع جميل جدا يجماعه

عايز اتكلم واقول حاجات لان انا عاشرت النوعية دي كتيييير كاصحاب

الاول المفروض نطلق عليهم ولاد الناس الناقصة علشان الموضوع يكتمل نزود كلمة الناقصة بعد اذنكم

طبعا ولاد الناس مواصفتهم غير كده خالص ومش مجال نتكلم فيه اللي احب اقوله ان الفئة دي بتبقى شايفه

ان عنده نقص ونفسه يبقى ابن الناس المستريحة بس معرفش وطبعا شايف ان الناس التانية بيئة

بيبقى عامل زي اللي رقصو على السلم مش عارف لايبقى ابن ناس ( من وجهة نظره على اساس ان وجهة نظره ابن الناس اللي الفلوس مش عارف يوديها فين )

ربنا يهديهم يارب لان فعلا في من الفئة دي كتير وكلهم ناس كويسة برده بس ناقصهم شوية دين

يجماعة كلنا ولاد ناس ( الحمد لله عمرنا ماسمعنا كلب خلف بني ادم لا سمح الله والحمد لله )

عمر الفلوس معملت ناس بالعكس الناس هيه اللي بتعمل الفلوس

لكن في ولاد ناس كناية عن ولاد الناس الكويسة ودول من وجهة نظري اتربو تربية كويسة من ناحية الاخلاق يعني يعرفو ربنا كويس وبيراعو ربنا في كل حاجه ومعندهمش نقص من حد لانهم فاهمين كويس ان الانسان الكويس مش بالفلوس وطبعا ده يرجع للتربية السليمة ( غني او فقير )

وفي ولاد الناس الناقصة اللي شايفين ان الفلوس هيه اللي بتعمل البني ادمين من وجهة نظري ياريت يرجعو لربنا لو حابين انهم يعيشو كويس ( غني او فقير علشان الامر ميختلطش علينا

طبعا انك تطور نفسك وتحلم انك يبقى عندك عربية او شقه في مكان كويس او او ده عادي اي حد بيحلم بيه يعني متقارنش الفلوس بولاد الناس الكويسة او الوحشه ده مالوش دعوه خالص

في ولاد ناس محترمة وكويسة (ادب واخلاق وتدين ) و

ولاد ناس برده بس ناقصة ( مش شتيمة ناقصهم ادب )

تعليق اخير لو ولاد الناس بالفلوس والغنى كان ربنا خلق سيدنا محمد عليه افضل الصلاة والسلام غني لكنه كان فقير وهو اعظم الخلق بلا جدال

ده من وجهة نظري واسف على الاطالة

تم تعديل 10 يناير 2010 بواسطة drmedo

[الباشمهندس ياسر]

تم تعيين 3 مهندسين الشهر الماضى . قدموا استقالتهم هذا الشهر , أى بعد شهرين من العمل !! . و انتقلوا للعمل فى شركة اخرى فى وظيفة لا افهم كنهها بالضبط . فلما سئلت عن سبب الأستقالة . اجابنى مديرى بكل بساطة " أصلهم عيال نضيفة و ولاد ناس .. و مش حمل بهدلة الشغل بتاعنا و قرفه و مرمطته !! " . غضبت كثيراً و انفعلت على مديرى عند سماعى اخر جملة . فمعنى عملى فى هذه الشركة منذ سنتين و تحملى بهدلة الشغل و مرمطته هو " انى لست أبن ناس " , لأن لو كنت أبن ناس كنت تركت العمل بعد شهرين كما فعل ال3 مهندسون . صرخت فى وجه مديرى الذى انفجر ضاحكاً من غضبى " يعنى هم ولاد ناس و احنا اللى طالع تيت ابونا و من محافظة لمحافظة و من قرية لقرية , نبقى ولاد البطة السودا يعنى و لا إيه ؟ " .....

انا عاوز اعمل تعليق ع الكام جملة دول بس

فيه انواع مختلفة من الشباب

فيه شاب بيحلم بالوظيفة الهادية المستقرة و ان كان راتبها ضعيف ..بل بيحبها من الراتب الضعيف كمان

لانه بيضمن انها اقرب ما تكون للوظيفة الميري و الشركة مش هطيرهم ف اي ظروف

فيه شباب تاني عكس ده تماما

بيحلم بشركة قوية بتكبر و ليها خطط و عايزة رجاله تنفذ الكلام ده و طبعا بتدفع كويس

زمان .. هو مش زمان اوي يعني

اشتغلت ف شركة ننبع القطاع العام

و بصيت ف المديرين بتوعي

لقيت واحد راكب 128 و التاني راكب 131

و واحد ساكن عندنا ف عين شمس و التاني ساكن ف شبرا

ف اقل من شهر .. كنت عرفت شوية كتير عن تفاصيل حياتهم و اوضاعهم المادية الهنا طبعا

ف اقل من اسبوعين كنت واخد القرار و طيرااااااااااان م الشركة دي ..رغم اني تقريبا مكنش ليا دور قوي يعني

مهندس موقع .. كل دوري اني اطمن علي تطبيقات السلامة و توافر احتياجات الشغل و اقعد احكي مع مندوبي العميل بتاعنا

و رحت شركة تانية ... كنت بشوف فيها التعب الوان

كنت ببقي بحلم اني اعرف انام شوية من غير دوشة

لكن شتااااااان بين الشركتين

و برده بالمناسبة

كتر التنقل بين الشركات بيكسبك احساسا عالي اوي بالشغل و اسراره و طبائع الناس كمان

كتر التنقل بيديك كام صفة حلوين اوي منهم الجرأة .. بتلاقي نفسك مش بتخاف من اي حاجة

حاليا الشركة بتاعتنا كانت بتقاوم من فترة طويلة و وقعت بعد جهاد طويل ضد كده

مش هنكر اني زعلان جدا

بس مش زعلان علي اني خسرت شغلي قد ما انا زعلان ع الشركة دي

لاني كنت بحبها من قلبي