طنط سميحة

[لماضة مصرية جدا]

السلام عليكم و رحمة الله و بركاته

امبارح اتصلت باصحابي في مصر اعيد عليهم و كده.....و بعدين و انا بقلب في التليفزيون شفت ع السي ان ان... شوية حاجات معرفشي هي من مصر و لا منين... بس لقيت نفسي بسال سؤال المستيقظ من غيبوبة طويلة..... هو فيه ايه؟؟؟

انا فكرت احط المداخلة دي.... في التوبيك بتاع "مقتل ؟؟؟؟ خارج كنيسة بالصعيد" بس روحت هناك.... و طلعت لاني حسيت فيه حالة من الاستنفار... فيه حالة من لخبطة المشاعر... فيه حالة من الغضب.... من مين و من ايه؟؟؟ اختلاف .... اختلاف... و خلاف

انا هحطه في موضوعات شخصية.....يمكن عشان ده حالة خاصة جدا... و ان كنت متأكدة ان فيه منها كتير جدا جدا

حكايتي مع طنط سميحة

انا ا اللي ربتني طنط سميحة الله يقدس روحها....و دي هتلاقيها طالعة معانا في كل صور العيلة و احنا صغيرين....ع فكرة طالعة اكتر من مامتي في الصور (لاني دايما كنت في حضنها... و ماما هي اللي بتصور)

طنط سميحة دي بقي كانت انيقة جدا.... و راقية جدا...

كانت بتلبس شوية بواريك.... مش ممكن.....

و كان عندها حضن دافي.... مش عايزة اقولك ازاي...

كانت تخش البيت عندنا....تلاقيها ع طول عندنا في الاوضة جوه....تفتح الشبابيك.... تخلي الشمس تخش... و تنفض السرير و تنفضنا معاه... كانت بتستغرب ازاي اطفال ممكن يناموا لغاية الساعة 8 (مع انه يوم الجمعة و 8 دي يعني مش متاخر)... كانت مفعمة بالحياة.... و عندها قدرة انها تبعث الحياة في كل اللي حواليها.... كانت طاقة لا تنضب من التفاؤل و الحيوية و الشقاوة

مرة دخلت الاوضة و كنت صغيرة جدا...و كنت بحب النوم جدا (و لا زلت الحقيقة).....و عشان تشجعني علي النهوض... قالت ايه ده محدش معزوم في الحفة التنكريةو لا ايه.... انا هعمل الحفلة دي لوحدي....

طبعا كلمة حفلة..... و تنكرية..... ووقفتها قدام دولا ب ماما.... اللي كانت منطقة محرمة بالنسبة ليا انا شخصيا.... كانت كفيلة جدا اني....انط زي القرد م السرير

الحفلة بقي ابتدت بلبس الفورير.... مع باروكة علي فردة جزمة لون... و لون تاني..... و طبعا عروستي كانت معايا....و برضه كنت بطقم لها.

حفلات طنط سميحة.... علمتني بعد كده مع ولاد اخويا ان دايما يبقي عندنا في الاسبوع حاجة اسمها حفلة الشاي.....بنلبس فعلا هدوم خروج....و نطلع طقم الفناجين الموفتخر.... و نقعد في الصالة....و منظرنا بيبقي يهلك من الضحك... عشان كل البيت بيستغرب انا ازاي خليت العيال العفاريت تهدي كده.... اصلهم محسوش طنط سميحة آدي...

فاكرة مرة و انا في حضنها مسكت ايدها و قلبتها و بعدين لما لقيت رسمة عندها مش موجودة عندي...

طبعا طبعا سألت و قولتلها... انا ليه مش عندي زيك....

و ردها انا فاكره لغاية دلوقتي....

عارفة يا قطتي (اصلها كانت دايما بتحاول تخليني اتغلب علي خوفي من القطط)...

انتي بتحبي ربنا....قولتلها هو ربنا فين أصلا...

شاورتلي علي شباك اوضتي....لما الشمس بيخش منه.... و يملا الاوضة نور و دفا....

قالتلي... ربنا هو النور اللي بينور حياتك.... و كل ما هتلاقي عتمة و هتلاقي معاها نور.... اعرفي انك لقيتي ربنا...(انا دايما بردد كلمتها دي)

قالتلي... انا عندي الرسمة دي و انتي مش عندك..... عشان انا لقيت ربنا بنوره بطريقتي... و انتي هتلاقي نوره برضه بطريقتك

في وقتها انا كنت حوالي 4 سنين.... و متهيالي مفهمتش كتير م اللي كانت بتقوله... بس شلت معايا كل كلماتها و كل حفلاتها و كل مشاعرها و حضنها الدافي جدا.....طول السنين

لما طنط سميحة ...... مش قادرة اكتبها.....بس مبقاش فيه خلاص حفلات تنكرية... ماما كانت بتحرص دايما ان احنا نعدي جنب بيتها... و كانت تقف و تبص عي البيت و كنت متاكده اني كل مرة بلمح في عينها بريق....يا تري دموع افتقاد حد عزيز... يا تري.... بريق اشتياق لروح بني آدمة راقية....يا تري و يا تري

كنت دايما اسمع ان كل واحد ليه نصيب من اسمه... و النهاردة بفكر....انتي فين يا طنط سميحة؟؟؟

فوتكم بمساحة للدفء..... مع حدينور حياتكم

[bentmasria]

لماضة مصرية بجد

هههههههههههههههه ما طلعتيش لمضة وبس لأ وقلبك مليان حنية واصيلة كمان

انا ياستى اللى امها زى طنط سميحة يعنى امى عندها فى عمارتنا ييجى كده بالصلاتو على النبى 15 طفل رضعت منهم اتنين منى واشرف اولاد طنط وفاء اللى كانت بتسيبهم كل يوم الصبح معانا لانها لازم تروح الشغل ولانى كنت مولودة لطيفة فقررت امى مشاركتهم معايا فى الاكل ولانها مؤمنة باهمية الرضاع الطبيعى اتقاسمنا كل شىء لبن امى والزبادى بالبسكوت والبيضة النص سوى كل حاجة حتى ذكرياتنا وامسياتنا ودلوقتى عندنا فوق الاربعين سنة موش حقولك بكام طبعا

عارفة

طنط وفاء كانت بتساعد امى فى كحك العيد ويقعدوا سوا يفصلوا هدوم البنات مع ان الاعياد موش دايما سوا

وانا بقى لى راجل موش من ظهر ابويا واخ بيشيلنى ويساعدنى ويحمينى وقت ما احتاج له وباخد رأيه فى اهم امور حياتى اخ مثل أعلى فى اخلاقه ووده واحترامه

وطنط وفاء كانت دايما مهربى لما ازعل امى وتقعد تقوللى ولحد دلوقتى امك ما لكيش غيرها يا عبيطة ده انا بعتبرها امى وتحكيلى اد ايه ساعدتها اول ما اتجوزت وحلت لها كل مشاكلها مع اونكل الله يرحمه وازاى كانت حضن وبيت لما اتوفى اونكل وبقت لوحدها بالأولاد وازاى بعنيها بس كانت بتشاور على الصح والغلط

مقدرش احكيلك اد ايه العلاقة دى جميلة اخوات موش من ام واحدة بيعرفوا ربنا قوى وبيراعوا الحدود اوى وبيهتموا ببعض قوى قوى الكلام مايوصفش كل سميحة فى حياتنا ولا يوفيها قدرها

ربنا يرحم طنط سميحة ويبارك فى وفاء وملك واللى زيهم

البنت المصرية

[عنبو]

ايه الحلاوه دى يالماضه بجد احساسك عالى قوى فيها لانها فعلاً طالعه من قلبك

كنا واحنا بنشترى شبكة اختى من الصاغه رحنا عند محلين كده واحد مكتوب عليه مجوهرات ........ وواضح من الاسم انه مسيحى والتانى مكتوب عليه .... الاسلام وكأن

الراجل قاصد انه يكتب كده علشان يكذب المسلمين له طبعاً انا قولت اكيد احن هنروح ... الاسلام وخصوصاً ان العيله عندنا متدينه يعنى مافيش الا انا لاسع لقيت ابويا

وزوج اختى راحوا على الراجل التانى وهات ياسلام وازيك وعامل ايه وشوية كلام كده عرفت انهم عارفين بعض وزوج اختى طلع عارفهم لان اخو الراجل ده بيتاجر مع زوج

اختى وطبعا ابويا نادى عليا قاله ابنى محمد الراجل ازيك ياحماده انا بقى تلقائى ازيك ياعم الحج .... عامل ايه الناس ضحكوا والراجل ضحك

كنت مره ايام لما اشتغلت مندوب لمدة تزيد او تقل عن شهر مش فاكر والمفروض كان من ضمن المنطقه بتعتى عزبه بعيده كده المواصلات ليها مقطوعه وانا مكنش معايا عربيه مهو انا لسه فى الاول على العموم ربنا كرم بمتعرفش ميكروباص ولا ايه بالظبط

وانا كنت اول واحد اركب فطبعاً مختار موقع استراتيجى جم اتنين واحد مسيحى ومعاه مراته وابنهم الصغير يمكن مكملش خمس شهور

وانا طبعاً قاعد فالمفروض على حسب المكان المتاح واحد فيهم هيركب جنبى والتانى هيركب فى وشى منظر مش كويس خالص طبعاً الى هيركب جنبى مش مشكله هيبقى مرتاح والى هيركب فى وشى هيبقى تعبان جداً والعربيه اساساًَ صغيره وقديمه بس هى دى المتاحه

طبعاً انا قولت تعالى انت اركب جنب مراتك وانا هركب فى وشك الراجل يقول لا وانا قول اه قمت حالف بالطلاق علشان ننهى الموضوع الراجل قال خلاص ركب جنب مراته وطبعاً سبحان الله العيل الصغير بدأ يزن

انا طبعاً اكتر حاه تخنقنى عياط العيل الصعير بتعصب قوى الا اذا كنت شايله بحاول اسكته قولت لماماته هاتى العيل

طبعاً حسيت انها خايفه بجد ب لانى لسه عامل حركمة مجدعه فيعنى حسيت انها اتثبتت ادتنى العيل كان بسم الله ما شاء الله عيل جميل قوى

اقعد العب فيه سكت الولد واضحك فيه لحد لما نزلنا الراجل كان مبسوط قوى بدرجه غريبه فقلى انت من هنا قولته لا انا اول واخر مره انزل هنا وتقريباً هبطل الشغلانه دى

قلى انه اساساً مش من هنا ونازل باين علشان عزا او معرفش ايه

على العموم هو موقف عادى جداً بس بجد الى كان مخلينى مبسوط ان الراجل مكنش متوقع كده خالص معرفش ليه

كان حاسس انه هيتعامل معامله جافه معرفش ليه

ويمكن زاد حيرته كمان لما عرف اسمى انا كنت شايف الاستغراب والدهشه فى عينه

قولت له ياعمى احنا اخوات وسبته مشيت

[rewsha]

ايه ده ؟.................

انا كمان زيك يا لماضه .

انا تقريبا اتريبت في بيت طنط ام هاني .جارتنا المسيحيه .

وكنت باقعد عندهم طول اليوم من اول ما افتح عيني الصبح لحد ما اروح على النوم

رغم ان اولادها كمان مكانوش من سني وكانوا كبار يعني بنتها مثلا كانت اكبر مني ب 7 سنوات على الاقل .لكن رغم كده كنت باندمج معاهم وبافرح جدا لما اروح عندهم

ولما ماما تحب تعاقبني .كانت تقول لي طب مش هاتروحي هناك النهارده :blink:

وكمان لما ماما كانت تبعت اخويا يجيبني من عندهم بالليل (انا فاكره كويس) كنت باستخبى منه في الدولاب :blush2: علشان مايشوفنيش لاْني مش عاوزه اروح البيت عندنا

وعلشان بيتهم كان واسع وبجنينه كبيره وكانت ماما وبابا مسافريين السعوديه .فكانت ماما وبابا قبل ما يسافروا (في الاجازه يعني واحنا في مصر)

بيشتروا خروفين ويسيبوهم عند طنط ام هاني هيه بتربيهم وتاْكلهم وتتولاهم فتره طويله قبل العيد بتاعنا

ولما يجي العيد وننزل مصر كانت طنط تبعت تجيب جزار مسلم يدبح الخروفين وهمه ياخدوا واحد واحنا واحد

يعني ماكانش في فرق بينا وبينهم في حاجه

ولما ماما يطب عليها ضيوف فجاْه ماكانش حد بيسعفها غير طنط ام هاني

كانت ماما تبعت تقولها الحقيني عندي ضيوف .تقوم طنط تعمل الاكل لماما وتبعتهولها

يااااااااااااه كانت ايام جميله (فكرتيني بيها)

[justme]

والله انا مش عارف اما تقرأو الموضوع ده هتقولوا ايه

هو كان المفروض احطه تحت باب عايزة اتجوز بس مكنتش قصة طويلة بس انا تقريبا قريت الحوار ده وشفت الجو مناسب للقصة دي

هي كانت برضه في اطار رحلتي للبحث عن زوجة والتي لم تكلل بالنجاح حتى الان

المهم ما علينا من الكلام ده

انا اختي لما يئست كانت بتدرب في احدى الاماكن وكان احد الموظفين هناك مسيحي

المهم تعرفت على والدته لأن اختي اجتماعية بطريقة بشعة الموضوع وصل بقى لحكاية الجواز ويا طنط معندكيش عروسة

قالت وماله ندورله

ومكدبتش خبر

خلال فترة لقيت اختي بتحكيلي القصة وبتقولي جايبالك عروسة وشوف امتى فاضي علشان تروح معاها تشوف البنت

المهم روحت لوحدي مع طنط وبنت خالتها اللي هي بقى تعرف اهل العروسة وزرنا اهل البنت وقعدنا معاهم وشربنا الشاي وبصراحة انا كنت عمال بفكر ازاي الناس دي هتفكر في واحد مسلم جاي عن طريق ست مسيحية

لأ وجاي لوحده

المهم الراجل ابو البنت رحب بينا ترحيب غير عادي

الموضوع ممشيش تقريبا علشان السفر

المهم

نزلنا وقعدنا نتكلم وبصراحة الست كانت بتخدم في الموضوع بضمير كأني ابنها وقالتلي خلاص ولاى يهمك اما ترجع اكون شوفتلك حاجة تانية لأني كان فاضل على سفري ايام

خلاصة القصة دي

اننا بعضنا او كلنا سواء مسلمين او مسيحين عازلين في بعض الاحيان نفسنا عنهم طبعا مش كل الناس بس اتوقع دي القاعدة العامة زي ما حصل مع عنبي

وانا عارف المحل اللي بتتكلم عليه يا عنبي بس انا مُصر اعرف انت منين انت اكدت كده قربك للزقازيق

تحياتي

[جيمي]

الفاضله لماضه .. اسمحيلي اسجل اعجاب مباشر بشخصية حضرتك .. ماشاء الله .. خفة دم مع عمق ثقافي .. افكار كتير واقعيه مع لمحة سخريه .. بلاحظ فى معظم كتاباتك حبك للاطفال ..وبصراحه يا بختهم اللى هيتتلمذو على ايديكي ... اما بعد :ninja: ممكن تسمحيلي ادلي بدلوي بحكاية اول احتكاك مباشر باتنين اصدقاء مسيحين .. الصداقه استمرت فقط 4 شهور مدة الترم الاخير ليه فى الكليه وهعرضها بكل امانه لانها بتعكس الاثر الخطير للدين فى التاثير على العلاقات البشريه واللى الدين اساسا نزل للسمو بتلك العلاقات وليس لاقامة الخلاف والنزاع بينها ... الحكايه

فى اخر سنه فى الكليه قدمت فى المدينه الجامعيه ... فى فرع المدينه القريب من كليتي لم يكن هناك الا مكانين فى غرفه مع اتنين مسيحين .. قلت للمشرف المسؤل اوكي انا هسكن فيهم ... استغرب قوي اني هسكن مع اتنين مسيحين ... وقالي انت حر .. قولتله كلنا احرار من ايام الثوره wst:: سال صديقي اللي كنت متعرف عليه يمكن فى نفس اليوم وانت كمان هتسكن معاه ؟؟ قاله ايوه موافق ماهو هيكون معايا واحد مسلم وبصلي ونظرات عنيه بتقول انا عارف انك هتحميني :blush2:

الغرفه فى المدينه الجامعيه كده بها اربعة افراد 2 مسلمين و2 مسيحين .. كنت انا اكبرهم _ فى اخر سنه _ والتلاته كانو فى سنه اولي ... ومن تاني يوم لاحظت ان كل كلامهم كان عباره عن مناظرات او على الاقل مناقشات فى الدين طبعا كنت بحس فيها ان كل واحد بيحاول يفاضل دينه على التاني ... وهنا اصدرت قراري بمنع الكلام فى الدين تماما .. وكان قرار حازم بلهجة التهديد للتلاته .. لان بكل بساطه محدش فيهم مؤهل انه يتكلم فى الدين واللى هيفتي اكيد هيكون سامع من واحد مش مفتي ... والله اني فاكر ان التلاته كانو بيتنافسو فى الجدعنه وانهم يخدمو بعض .. وكنا بنمارس هوايتنا كلها مع بعض ... وقضينا الترم كله محصلش ولا خلاف واحد على اي سبب وكنا فى منتهي التعاون .... واتعرفنا بالطبع على اصدقاءهم وهما كمان اتعرفوا على اصدقاءنا وكانت غرفتنا ملتقي لصداقات اتوطدت كتير بعد كده ... وحتي بعد كده الكلام فى الدين بينهم كان بهدف ان كل واحد يتعرف على دين الاخر و على الاعياد ومواعيدها وطرق الصيام .. حتي لما كنت ادخل الاقيهم بيتكلمو فى الدين ... كنت بقول هاااااااه من بتاعة الشويش عطيه ... يقولو لا احنا بنسال بس علشان نعرف مش اكتر :blink:

ليه مايكنش في دايما مساحه للتعارف والحوار البناء بين البشر ...ليه دايما لازم يكون في غالب وفيه مغلوب .. انا واثق ان اي واحد من اي طرف جواه شحنة كره للاخر مستخبيه جواه .. لو فتش فيها هيلاقيها من غير سبب .. بس تحفظات وموروثات خايبه وكلام فتيته ...

[لماضة مصرية جدا]

السلام عليكم و رحمة الله و بركاته

مش عارفة اشكركم إزاي علي كلماتكم و مساحات الدفء اللي حطتوها في الحتة دي.....

بس انا دايما بقول لنفسي ان كل واحد فينا عنده مشاهد كتيرة اوي في حياته... بيفتكر انها عادية..... لغاية ما يشاركها مع حد و يكتشف انها خاصة جدا... و مساحة متفردة جدا

مش عارفة اشكركم ازاي انكم خلتوني اتونس بمساحات كتير غابت عني في زحمة المشاعر... و في لخبطة مشاهد الحياة.....مش عارفة اشكركم ازاي انكم بتخلوني ارجع لنفسي و اقولها احساسي كان حقيقي... و ايماني بالناس كان في يوم حقيقي....حتي و ان اثبتوا العكس

عشان كده انا هشاركم كمان بمساحة خاصة جدا عن

"بيتر"

هو اسمه الحقيقي بطرس.... و لاني كنت في وقتها عايشة في امركة كل مفردات حياتي.....فكنت بحب اقوله يا بيتر....

بيتر قابلته في سنة تالتة كلية.....هو تخصص مختلف عني تماما....بس فجأة كانوا عاملين ندوة و تقريبا كانوا مش لاقين حد مهتم فكانوا بيجمعوا طلاب من اي حتة (حاجة كده زي لما بيلموا انفار و يكومههم في عربية عمال التراحيل... الفيلم الرائع الحرام)

بس انا و بيتر كنا تقريبا الاتنين الوحيدين اللي رايحين بكامل قوانا العقلية.....و بقليل جدا من حماسنا الانساني للتغيير..

اهتمامنا ده....و تواجدنا في الصف الامامي... مش الحاجة الوحيدة اللي خلتني افتح حوار معاه....

و ابتدت الندوة...... و تقريبا هي كانت ما بيني...و بين بيتر.... و بين المحاضر.... و اللي غالبا انسحب من الحوار...

خلصت الندوة.....و يمكن انا مش فاكرة هي كانت عن ايه و لا انا كنت بتكلم في ايه...بس اللي انا فاكراه كويس اني خرجت من المدرج مع بيتر

اتكلمنا في كل حاجة في الحياة...في الدين.... في السياسة... في المنهج.... في المواصلات....في كارنيه المكتبة.....في السادندوتش اللي غلي و حجمه صغر و المصروف هو هو.....

قررنا نشارك في السابقة الشعرية بتاعت الجامعة.....و بعدين قولنا نقيم بقي شغل كل واحد فينا قبل الفضيحة ما تبقي علي الملا....

انا كنت بقي ايه احب اكتب شعر جدا...... و كان من نوعية "دمرتني لاني يوما كنت حبيبها"..... و بتاع "تحت الروعريعة".....و ايه بقي حاسة نفسي اني هفوز هفوز يعني

المهم قريت مجموعة من القصايد لبيتر.....ولقيته سكت.... و بنفس الضحكة اللي كانت دايما علي وشه....

قالي

إنتي بتحبي ربنا........

روحت قولت.... ايه بقي اللي جاب حب ربنا دلوقتي في الحوتة دي

قالي لو بتحبي ربنا بجد... هتشوفي حبه في حاجات تانية كتير..... غير حب الراجل للمرآة.....

هتشوفي حبه.... في الحلم... في اليوم اللي بيبتدي احيانا بيتهيالنا شبه اللي قبله بس هو مختلف... هتشوفيه في الناس البسيطة... هتشوفيه في حاجات كتير

ساعتها طبقت القصيديتن.... و حطتهم في الشنطة.... و مزعلتش اني مشتركتش في المسابقة السنة دي.

نسيت اقولكم حاجة مهمة جدا.... بيتر كان كفيف....(كنت في الاول عايزة اساعده... في كتابة المحاضرات... بس لقيته بيساعدني اني اشوف الحياة)

كنت بضحك من نفسي لما اقعد اتكلم و اشوح في الهوا و يقولي نزلي ايدك لو سمحت... لا يليق بيكي و انتي بنوتة.... أقوله انا مش بنوتة.....انا مخنوقة.....قالي طب ما انتي برضه كده انثي...يبقي متشوحيش بايدك

مرة كنا ماشيين عند مبني المكتبات

كان فيه سلمة رخمة جدا.... كلها سليمة بس مقورة من النص... و كانها جهاز كشف المستجدين في الكلية

اللي بتكشف كل المستجدين ع المنطقة... طبعا لو وقعت....يبقي انت اكيد جديد في الحتة دي

المهم

مشيت انا و بيتر....و جينا عند مثلث برمودا.... و طبعا لاني كائن رغاي جدا... كنت بكلمه عن مباديء الثورة و التوكتيك... و الانقلاب و ساعة الصفر.... و هووووووووووووب

انا انبطحت ارضا وهو عدي فوق السلمة بهدوء

تخيلوا بقي قالي ايه عشان ميحرجنيش

.... انتي ليه مش قولتيلي ان فيه سلمة هنا.....

قولتله ما انا قولت اقع احسن عشان تعرف بطريقة جديدة...... :lol:

ساعتها بيتر هو اللي كان ماسك ايدي مش انا.....

ساعتها حسيت ان النعمة مش انها تكون موجودة بس... النعمة الحقيقية ان ربنا ينورلك طريقك انك تحسها..... و تحسس الناس بيها....

انا و بيتر خلصنا دراسة......و انا سافرت... و لخبطة المشاعر خلتني اقع كتير علي سلمة الحياة....

بس برضه برجع و بفتكره.....في مساحة خاصة جدا للدفء

مسااااااااااااكم.....إيمان تحسوه في كل سلمة للحياة... صعودا أو هبوطا

[shiko]

حقيقى انا حبيت طنط سميحة اوى

وقد أيه حسيت بدفىء حضنها ونقاء روحها.....

عجبتنى لمعة عينيها ...وذكائها وترتيبها حتى فى مشاعرها حتى حبها لله ...

حماسها الانسانى ...ومشاعرها العفوية...

رحمة الله على طنط سميحة ....رحمة الله على الانسانية

[justme]

بس انا ليا حاجة اضيفها ورزقي على الله

اللي يحب انسان يتمناله الخير

ومفيش احسن من نور طريق ربنا

اللهم نور طريقنا وطريق احبائنا وكل اللي حوالينا

(إهدنا الصراط المستقيم)

تحياتي

[لولا]

عارفه يا لماضه ؟؟

من زماااااان مقترش كلام او فضفضه لمستنى قوى كده..

متعرفيش خليتينى احس بأيه واسترجع معاك ذكريات كتير.

تعرفى انا كمان رحت هناك موضوع قتل خمسه اقباط .. حسيت بمشاعر كتير.. قلبى وجعنى ومعرفتش اكتب حاجه !!

احنا ليه بقينا كده فعلا ؟؟

الناس اتغيرت كده ليه ؟؟

الناس دى اللى قررت تسلب نفس بشريه من روحها عشان اختارت تشوف نور ربنا بطريقه غيرهم بتفكر ازاى؟؟ بتحس ازاى ؟؟؟

او ..

دى ناس مش بتحس اكيد.. اكيد مشاعرهم البشريه مشوهه

دول مش بشر فى قلوبهم رحمة وحب واستشعار لمعانى كتير .. وده مش دين اللى يخلى حد يعمل كده..

انا سعيدة انك خليتنا نتشارك معاك فى حب طنط سميحة .

عارفه بقرا حاجات كتير بتكتبيها ..بحب قوى انك بتكتبى من قلبك وببساطة .. عشان كده بحس ديما اللى بتكتبيه وانا بقراه .

سعيدة بانضمامك لمحاورات المصريين :closedeyes:

لولا

[Salwa]

صباح الخير يااحلى بنوتة لمضة ومصرية ..

وعدتك انى اجيلك .

وعدتك اجيلك عند الشجرة ..

..صعب الواحد يلم عزاله بشويش ويتنقل لمكان تانى .

لكنك رجعتينى للشجرة بتاعتنا...

رغم وجود الشجر الكثيف فى كل الامكنة ..

لكن الشجرة عندنا لها طعم تانى ولها روح تانية ...

الناس بتروح وتقعد عند الشجرة عميقة الجذور ...وترتاح..ويمر الوقت .

لاالشجرة بتتعب منهم و لاهم بيزهقوا ...

بيفضلوا مع بعض...بيظلهم ظل واحد..

ظل كبيرررر....يفرد مساحته وتغطيهم كلهم .

بيفضفضوا ...بيرتاحوا ...بيعيشوا ..

الشجرة اللى جمعتنا كلنا يوم...بتجمع كل يوم ناس تانية زينا ..

الشجرة دى اسمها ...

نسيج شعب ..

عشت كتير زى مانتى عارفة يالماضة ....ولا اقصد ب ..كتير....(( يعنى كثرة السنين...فقط))...لكنى اقصد انى ...سرت فى الدنيا ...ورأيت الكثير....وتعلمت مع كل خطوة ..

المصرى بطبعه لايستطيع الحياة فى مجتمع مغلق ..

كان سبق لى وقلت تعبير عن...حياتنا كمصريين...معا.

ربما قلته كما اشعر ...وصدر عنى ببساطة ....قلته فى موقف آخر ...

قلت مامعناه....ان كل دين هو عبارة عن بتلة فى وردة جميلة ....القلب يجمع كل البتلات ...

يجمعنا قلب واحد..

مصر بتجمعنا كلنا على حبها ...وبتسقينا من قلبها كل الحب ..

انا نفسى توقعت ان اكتب لك هنا عن حياتى ....عن طفولتى ...عن شبابى ...عن ارتباطى المستمر طيلة حياتى بهذا الخليط العجيب من البشر ..

عن امتزاج شخصيتى وتأثرها ....عن...ضرورة ان اذهب الى الكنيسة واولع شمعة واطلب من مارجرجس واطلب من سانت تريز ...ان يوفقنى الله وتكون اجابتى كاملة فى الامتحان..

ان اذهب لزيارة ابو العباس ...وان اذهب الى سيدى جابر واصلى ....وان تصنع امى صوانى الفتة باللحم ...وان يذهب اخى مع صديقيه وهيب و وجدى يوم الجمعة بعد الصلاة ..بالصوانى.

توقعت ان اكتب لك عن مدارس الآحاد...وكيف كنت اغنى معهم (( مدارس الآحاد بنات وبنين..ورئيسها رب العالمين ))...

اقول توقعت...

توقعت....ايضا ان احكى لك...كيف كنت احضر القداس ....وابكى معهم واكثر منهم ....ف ليلة الجمعة الحزينة ...(( ويهتموا بى وينسوا الموقف العظيم ))...وهم يمثلون كيف ينزلون السيد المسيح (( عليه السلام )) من على الصليب...وكله مثخن بجراحه....جراحهم...

لا...لم اكن ابكى ....كنت اموت...كنت اموت ...وكنت انهار .

واعود الى منزلى ....وعندما يحين موعد صلاة الفجر كنت اصلى ...واطلب من الله ان يرحم كل عباده .

توقعت ان احكى لك...

ان امى....بكل تمسكها بالاسلام وكل تدينها .....لم تمنعنى ...ابدااااا....ابداااا...

توقعت وتوقعت وتوقعت ...

لم اتوقع ان اقرر....ماسوف اكتبه لك الآن..

كل ما مر بى ...بالطبع شكل شخصيتى ....اصبحت شخصية مستقلة تماماااا.....لاتتأثر بأى عوامل ....معينة ....

اقول...تقاليد.

او عادات..

احمد الله كثيرا وادعوه جل سبحانه ان يثبت قلبى على الايمان .

كما تعلمين اعيش فى بلد يدين اكثر من تسعة وتسعين فى المائة منه بديانات اخرى غير الاسلامية ...والاغلبية تدين بالطبع بالديانة المسيحية ..

هل سيؤثر هذا فى تدينى ويقينى ؟؟ بالطبع لا...

ولنترك هذا جانبااا..

قلت لك...

اخدت عزالى وجيت لك....ازاى بقى ؟؟

افهمك...

اخدت معايا كل الكراكيب اللى فاتت دى ...صور الشمامسة ف ذهنى واجراس الكنائس ...ومقام المرسى والجلوة فى سيدى جابر ...والبخور ..والصوانى ..

والتراتيل ...والتواشيح..والاناشيد...والانشاد...

جيت لك احكيلك ...

انا مشفتش حد ...زينا

مشفتش حد ...تقاليده وعاداته متداخلة كدة ....زينا احنا كشعب مصر..

احنا بنحب كل الناس ..

لو المسلم المصرى ...او...المسيحى المصرى ....بالذات .

اتقابل مع اى انسان من اى بلد تانى وقال له انه...مصرى وبس .

التانى حايفهم يعنى ايه مصرى ؟؟ ومش حايسأله انت مسلم والا مسيحى ....صدقينى ..

اللى انقذ حياة زوجى ((فى يوم من الايام منذ سنوات)) ...بعد الله سبحانه وتعالى ...طبيب كبير مسيحى وشوية اطباء صغار لااعلم على وجه الدقة ...دياناتهم ..المختلفة ؟؟...كانت حالة طوارئ ايام اعياد ...وماحدث كان معجزة بكل المقاييس...

الدين لم يكن عائق ابداااا...

تخيلى لو فيه طبيب متعصب مسيحى...والمريض مسلم؟؟؟

شئ لايصدقه عقل..

مسألة التعصب هى غباء فعلا ...

فى الحقيقة ..

كلنا اخوة فعلا ..

نسيج متداخل ...

ويمكن التكوين الغريب ده لنا كلنا ....خللانا لما اتغربنا ...قدرنا نتعايش مع ناس مختلفة عننا تماماااا..

المصرى الحقيقى لابد تلاقى ف حياته او ف سجل حياته خلفية جميلة لكل الموروثات ...مش مهم تبع اى دين؟؟

رحم الله (( طنط سميحة ))....و...امثالها ..

فقط سوف اكتب لك تعليق اخير...

بعد رؤية الاحداث الاخيرة .....كنت فقط اردد ...يامثبت العقل والدين يارب .

يارب ابعد عننا اى شر..

...ابعد عنا كل اللى بيكره هذا الشعب الطيب .

يارب..

احمى شعب مصر..

مبارك شعب مصر..

[مغتربة]

لماضه اللموضه

تقريبا كده هتلاقى عند كل واحد فينا حكاية زى حكايتك

هتلاقى طنط سميحه كتير قوى

عن نفسى كان اسمها طنط مريم

و كنت برضه بحب اروح عندها و اقعد عندها كتير

للاسف المرحله دى ما استمرتش كتير

لانها توفيت و ان عندى اربع خمس سنين

بس بناتها كانوا دايما يفتكرونى رغم فرق السن بينا ( هما فى الوقت ده كانوا انسات )

احلى هديه عيد ميلاد جاتلى و انا صغيره كانت من واحده من بناتها كانت بتشتغل فى جروبى

جابتلى بابا نويل من الشوكولا

متتصوريش فرحتى بيه كانت اد ايه

اما بيتر بقى فكان موجود برضه

كنا اصحاب من اول فى الكليه

بس للاسف سافر بعد ما خلصنا على طول و انقطعت اخباره

كان بجد نعم الاخ

مره كان فى معرض للكتاب عندنا فى الجامعه و بعدين و احنا جوه المعرض كنت عايزة اشترى مصحف

فوقفت افاضل بين المصاحف فى الحجم و الطباعه و بعدين من غير ما اخد بالى قولتله شوف ملمس الورق ده فاخر و لا لا

لقيته هوه الى بيعتذر لى بادب انه مينفعش يلمسه و اخدت بالى على طول

[مدى]

السلام عليكم و رحمة الله و بركاته

مش عارفة اشكركم إزاي علي كلماتكم و مساحات الدفء اللي حطتوها في الحتة دي.....

بس انا دايما بقول لنفسي ان كل واحد فينا عنده مشاهد كتيرة اوي في حياته... بيفتكر انها عادية..... لغاية ما يشاركها مع حد و يكتشف انها خاصة جدا... و مساحة متفردة جدا

مش عارفة اشكركم ازاي انكم خلتوني اتونس بمساحات كتير غابت عني في زحمة المشاعر... و في لخبطة مشاهد الحياة.....مش عارفة اشكركم ازاي انكم بتخلوني ارجع لنفسي و اقولها احساسي كان حقيقي... و ايماني بالناس كان في يوم حقيقي....حتي و ان اثبتوا العكس

عشان كده انا هشاركم كمان بمساحة خاصة جدا عن

"بيتر"

هو اسمه الحقيقي بطرس.... و لاني كنت في وقتها عايشة في امركة كل مفردات حياتي.....فكنت بحب اقوله يا بيتر....

بيتر قابلته في سنة تالتة كلية.....هو تخصص مختلف عني تماما....بس فجأة كانوا عاملين ندوة و تقريبا كانوا مش لاقين حد مهتم فكانوا بيجمعوا طلاب من اي حتة (حاجة كده زي لما بيلموا انفار و يكومههم في عربية عمال التراحيل... الفيلم الرائع الحرام)

بس انا و بيتر كنا تقريبا الاتنين الوحيدين اللي رايحين بكامل قوانا العقلية.....و بقليل جدا من حماسنا الانساني للتغيير..

اهتمامنا ده....و تواجدنا في الصف الامامي... مش الحاجة الوحيدة اللي خلتني افتح حوار معاه....

و ابتدت الندوة...... و تقريبا هي كانت ما بيني...و بين بيتر.... و بين المحاضر.... و اللي غالبا انسحب من الحوار...

خلصت الندوة.....و يمكن انا مش فاكرة هي كانت عن ايه و لا انا كنت بتكلم في ايه...بس اللي انا فاكراه كويس اني خرجت من المدرج مع بيتر

اتكلمنا في كل حاجة في الحياة...في الدين.... في السياسة... في المنهج.... في المواصلات....في كارنيه المكتبة.....في السادندوتش اللي غلي و حجمه صغر و المصروف هو هو.....

قررنا نشارك في السابقة الشعرية بتاعت الجامعة.....و بعدين قولنا نقيم بقي شغل كل واحد فينا قبل الفضيحة ما تبقي علي الملا....

انا كنت بقي ايه احب اكتب شعر جدا...... و كان من نوعية "دمرتني لاني يوما كنت حبيبها"..... و بتاع "تحت الروعريعة".....و ايه بقي حاسة نفسي اني هفوز هفوز يعني

المهم قريت مجموعة من القصايد لبيتر.....ولقيته سكت.... و بنفس الضحكة اللي كانت دايما علي وشه....

قالي

إنتي بتحبي ربنا........

روحت قولت.... ايه بقي اللي جاب حب ربنا دلوقتي في الحوتة دي

قالي لو بتحبي ربنا بجد... هتشوفي حبه في حاجات تانية كتير..... غير حب الراجل للمرآة.....

هتشوفي حبه.... في الحلم... في اليوم اللي بيبتدي احيانا بيتهيالنا شبه اللي قبله بس هو مختلف... هتشوفيه في الناس البسيطة... هتشوفيه في حاجات كتير

ساعتها طبقت القصيديتن.... و حطتهم في الشنطة.... و مزعلتش اني مشتركتش في المسابقة السنة دي.

نسيت اقولكم حاجة مهمة جدا.... بيتر كان كفيف....(كنت في الاول عايزة اساعده... في كتابة المحاضرات... بس لقيته بيساعدني اني اشوف الحياة)

كنت بضحك من نفسي لما اقعد اتكلم و اشوح في الهوا و يقولي نزلي ايدك لو سمحت... لا يليق بيكي و انتي بنوتة.... أقوله انا مش بنوتة.....انا مخنوقة.....قالي طب ما انتي برضه كده انثي...يبقي متشوحيش بايدك

مرة كنا ماشيين عند مبني المكتبات

كان فيه سلمة رخمة جدا.... كلها سليمة بس مقورة من النص... و كانها جهاز كشف المستجدين في الكلية

اللي بتكشف كل المستجدين ع المنطقة... طبعا لو وقعت....يبقي انت اكيد جديد في الحتة دي

المهم

مشيت انا و بيتر....و جينا عند مثلث برمودا.... و طبعا لاني كائن رغاي جدا... كنت بكلمه عن مباديء الثورة و التوكتيك... و الانقلاب و ساعة الصفر.... و هووووووووووووب

انا انبطحت ارضا وهو عدي فوق السلمة بهدوء

تخيلوا بقي قالي ايه عشان ميحرجنيش

.... انتي ليه مش قولتيلي ان فيه سلمة هنا.....

قولتله ما انا قولت اقع احسن عشان تعرف بطريقة جديدة......

ساعتها بيتر هو اللي كان ماسك ايدي مش انا.....

ساعتها حسيت ان النعمة مش انها تكون موجودة بس... النعمة الحقيقية ان ربنا ينورلك طريقك انك تحسها..... و تحسس الناس بيها....

انا و بيتر خلصنا دراسة......و انا سافرت... و لخبطة المشاعر خلتني اقع كتير علي سلمة الحياة....

بس برضه برجع و بفتكره.....في مساحة خاصة جدا للدفء

مسااااااااااااكم.....إيمان تحسوه في كل سلمة للحياة... صعودا أو هبوطا

بيتر مش نورلك طريقك لوحدك..

حتى انا أتأثرت جدا بــ يه..

لماظة ..استفزيتيني للرد بأسلوبك الرائع..

واحساسك الصادق..

كملي..

[لماضة مصرية جدا]

السلام عليكم و رحمة الله و بركاته

بنت مصرية....عنبي.....روشة.....جست مي....جيمي......شيكو.....لولا.....ماما سلوي....مغتربة.....مدي

طب اقول ايه.... انا بجد بكيت

شكرا مرة تاني علي مرور دافي جدا.....

علي القلب اللي قرا... مش العين اللي شافت....

ع الاحساس اللي حطتوه في كل كلمة رديتوا عليها بيها

ع اللحظات الحلوة اللي تشاركنا بيها... ع الرغم من بعد المسافة.....و الملامح و التفاصيل اللي بتفصل ما بينا

*************

الحقيقة..... هو انا مفتقدة جدا طنط سميحة...... لاني احيانا بسال نفسي مين اللي مات... انا و لا هي

أنا مفتقدة بيتر جدا...... لاني برضه بعدت كتير...... و بسال نفسي هو اللي سافر و لا انا اللي سافرت جوايا و مش لاقياني

*************

عايزة احيكلكم عن ايريني....و صلاة القلوب اللي كنا بنعيشها مع بعض

عايزة احكيلكم عن زوجة عمي..... اللي اتحدت قوانين الانوثة....و كونت صداقة غير عادية مع زوجة زوجها..... خلي الاخيرة تبقي المراة الوحيدة اللي وقفت جنبها في مرضها الاخير

عايزة احكيلكم عن عم اسماعيل......اللي اداني جردل اقعد عليه (آه و الله) و انا راكبة قطر مش فاكرة منين لفين و مكنشي معايا تذكرة و قررت اني التحم مع الشعب بين العربيات......و بعدين اكتشفت انه بيسافر دايما بالقطار و دايما معهوش تذاكر.....بس معاه جردلين..يطلع الجردل... يقلبه يقعد عليه و الجردل التاني بيخليه احتياطي و ازاي هو شايف الدنياو الحياة و الحكومة و الاحداث

عايزة احكيلكم عن مصطفي...... أبو ضحكة تسافر بيك لاحلي ملاهي في العالم و انت في مكانك..... و دي صورته هتلاقوها كبيرة جدا.... لأنه اول طفل ربنا كرمه بالشفاء من السرطان في المدينة اللي كنت عايشة فيها

عايزة احكيلكم عن أم حسين...........و تسمعوها بقي و هي بتحكي ازاي انها كانت متاكدة أوي أوي ان ليلة 27 رمضان اللي فاتت كانت ليلة القدر......ازاي الملايكة مسكت ايديها وقومتها بالليل تصلي....و ازاي هي دعت بقي ان حسين يا رب يشتغل و يا سلام لو اتجوز......و الله عليها لما تشوفها و هي بتتكلم بثقة و يقين عن ربنا

و انه مش هيردها و ايديها فاضية

بصوا انتو شجعتوني..... و انا رغاية

فهحط حكاياتي......

لناس ممكن نتلمح بيهم كل يوم....... و نقعد جنبهم...... و نفضل ساكتين مسهمين...... مع ان ممكن الناس العاديين جدا جدا جدا

يكونوا قادرين علي انهم

يدوني مساحة دفء خاصة جدا جدا جدا

صباااااااحكم........ محطة...... لرحلة قطر.......مليان وشوش..... منها البلياتشو.......و منها الفيلسوف...... و منها بس بني آدم

[برنس الشرق]

فى البداية احب اقول انى سعيد بانضمامى للمنتدى

بجد الجو العام جميل جدااا اتمنى انى اكون فرد من اسرة المنتدى

موضوعك جميل جدااا يا لماضة واسلوبك فى الكتابة اكتر من رائع ..

الاول احب اوضح معنى كلمة فتنة طائفية الكلمة اللى منتشرة جدااا وبتترد ويمكن يكون اغلب اللى بيرددوها مش فاهمين يعنى اية فتنة طائفية فى وجهة نظرى المتواضعة فتنة طائفية معناها اجبار مسلم او مسيحى على الدخول فى دين الاخر واعتقد ان هذا لايحدث فى مصر ( ربنا يحفظاها من هذة الفتنة )

اومال اية اللى بيحصل يا حضرت الفيلسوف اللى بيحصل اشياء عادية جدا يعنى لما مسلم يسرق مسلم مثلا تبقى حادثة عادية جدا انما لما يسرق مسيحى يبقى فتنة طائفية .

لما مسلم يعاكس مسلمة وبعدين يجى اخوها ويتخانق مع الشخص دة ويقتله يبقى حادثة شرف عادي جدا

انما لو مسيحى هو اللى اتقتل يبقى فتنة طائفية اى خناقة بين مسلم ومسلم او مسيحى ومسيحى عادية انما لو بين مسلم ومسيحى على طووول فتنة طائفية .

بالنسبة للى حصل فى نجع حمادى فهو عمل فردى من شخص بلطجى ميعرفش حاجة عن الاسلام ولا عن التسامح فى الاسلام وكان يكفيه قول الرسول صلى الله عليه وسلم ( من آذى ذميا فأنا خصمه، ومن كنت خصمه خصمته يوم القيامة ) وكان يكفيه ان يعرف ان الرسول صلى الله عليه وسلم قد تزوج ماريه القبطية .

اما عند المواقف مع اصدقائى المصريين هاحكيها فى مداخلة تانية بعد الفاصل واسف لو كنت اطالت عليكم

[لماضة مصرية جدا]

السلام عليكم و رحمة الله و بركاته

النهاردة هحكيلكم عن "جمعة"

لا انا مش غلطانة

انا عارفة ان اسم التوبيك طنط سميحة....و من شوية كنت بتكلم عن بيتر صديقي من ايام الجامعة

بس النهاردة عايزة احكيلكم عن جمعة

لا ده مش اسم حد...

ده يوم الجمعة بتفاصيله الصغيرة اوي....اللي بتملي تفاصيل باقي الاسبوع

يمكن عشان عندي حالة افتقاد لجمعة....و ليوم الجمعة....و ليوم الجمعة بتاعي انا....مممكن احكي

============================

لما يتقال يوم الجمعة.....

لازم قبلها افتكر ليلة الجمعة يعني السهر علي مسرحية عش المجانين و شاااافيق يا راجل ع القناة الاولي....قبل الدش بقي.....بنتجمع و بنصر ان احنا نتفرج عليها كلنا سوا.....و احيانا و احنا بنتفرج بنقعد نفكر نفسنا علي مواضع للضحك الجماعي مع اننا بنقول الحوار و حافظينه

ليلة الجمعة.....يعني انا و اختي في الاوضة الجوانية خالص....بعد ما الكل ينام و جايبين مجلات حجاب و مطلعين رص الطرح من الدولاب و قاعدين نجرب في لفات جديدة.....و غالبا بينتهي بينا الحال ان ما فيش احسن من لفة الطرحة المحتشمة...اللي بس بتبين الوش...بس حبينا نجرب

ليلة الجمعة .....لو الاحفاد عندنا يبقي برضه بعد ما البيت ينام فيه تجمع و برضه في الاوضة الجوانية.....بعد ما تيتة تتأكد ان كله نام....و الحقيقة هو كل واحد بيتسحب علي طراطيف صوابعه...حتي لما تيتة صوتها يقطع عتمة الليل و تقول "رايحين فين".....و نرد بكل غباء...."رايحين نشرب"....و عمرها ما توقفت عند حالة الظمأ الجماعي اللي بتهل عليا انا و اختي و الحفيدين الساعة 2 كل ليلة جمعة

ليلة الجمعة.....الساعة اتنين بالليل...لا كده مش بقيت ليلة الجمعة خلاص كده بقي احنا لجنة استقبال يوم الجمعة...و عايزين نبتديه بدري اوي....الاوضة الجوانية.....ممكن تلاقي فيها عرض ازياء بملاية لسراير....او مخيم لعصابة القناع الاسود....من المخدات....علي شوية كراكيب...و طبعا بناخد معانا شوية شاندوشتات...علي كام علبة عصير فاضية....طب ليه فاضية...مش عارفة بس هي القعدة اتعودنا عليها كده.....و بعد كده نفضل قاعدين في المخيم...و يبقي التحدي الاكبر.....ازاي نعمل زغازيغ من غير صووووووووووووووووت.....لان تيتة نايمة في الاوضة جنب الأوضة الجوانية

الساعة 3 الفجر.....خلاص الكل يتساقط تعبا و نعاسا....بس فجأة تلاقي بنات البيت....برضه في الاوضه الجوانية فيه اجتماع خاص جدا......و هنا بتيجي لحظة الفضفضة....المؤلمة المريحة.....حيث تتوحد جهودنا لمقاتلة عدو واحد....و وهو الراجل في حياتنا اللي بيتحكم في لمبة الحوار...مرة ينورها و مرة يطفيها.....بنتكلم ساعات و ساعات...و احيانا بنعيد كتير من القصص....كل واحدة فينا عارفة انها اتقالت قبل كده.....بس ليه ليلة الجمعة بيبقي فيه مساحة حلوة للاستماع......لما وراء الكلمات....مساحة مصالحة حتي مع قصصنا المعتادة

بنام عادة بعد صلاة الفجر.....و هنا تيتة بتكون صحيت.....و تبدا موعظة الصباح....ع غيار الريق كده....."قلبتوا الليل نهار و النهار ليل...و هتناموا امتي؟"

و كل واحدة فينا تبص للتانية و نقولها...."مين قال ان احنا هننام.....احنا معاكي اهه".....و بعدها ب 5 دقايق...نتساقط كالفراش.....مبقاش فيه مقاومة....و لسه يوم الجمعة مستني مننا كتير

==========================================

مع اننا نايمين من ساعات قليلة....بس الموعد الرسمي هو الساعة العاشرة.......و ده مش اختيار....ده قرار

زمان كانت الساعة عشرة مرتبطة ان احنا نقعد صف واحد قدام برنامج سينما الاطفال....و نقعد نسرح في الاميرة اللي كانت بتحب الامير بس هو كان اصله ضفدع...بس هي كانت بتحب كل حاجة في الدنيا....و مش فرق معاها انه كان ضفدع

دلوقتي...الاميرة صحيت....و برضه الامير تاه في الزحمة.....لا هو اتحول بقي ضفدع و لا هي قدرت تلاقي التعويذة السحرية انها ترجع الامير

الساعة عشرة مرتبطة بحدث جلل....

دخول الانبوبة....[وسط][/وسط]

اللي دايما بتخلص يوم الجمعة الصبح.

و ده دخول غير اعتيادي.....لاننا لسه بنؤمن ان الانبوبة هي فرد من افراد الاسرة لا يمكن التخلي عنه بسهولة.....لسه مركبناش غاز طبيعي

دخول الانبوبة.....بيبقي فيه حالة من الصخب و الاستنفار....

مش عشان اخيرا لقينا انبوبة.....لا عشان حوار البواب و هو شايل الانبوبة....

في البداية....لازم نعزم عليه...ان احنا نشيلها...و بعدين يبصلنا كده بصة كلها اشفاق...

و بعدين يروح لافح الابنوبة علي كتفه....و هو داخل بيها م الصالة لغاية جوه....عنده قدرة هائلة انه يدينا موجز حياة العمارة السعيدة في 3 جمل

"تانت كريمة رجعت م السفر....

تانت سماح جابولها الدكتور الساعة 2 بالليل.....

الحاج حسين بيدور علي عروسة لابنه اللي في الخليج"

عرفته ليه بقي بنبقي صاحيين لاستقبال الانبوبة

الساعة عشرة و نص.....تبدأ موعظة النهار

"محدش يشتري طعمية من بره.....بتجيب إسهال"

طول عمري بحب مبدا الترغيب في الحياة.....بس ليه بيترسخ عندي ان كل ممنوع مرغوب...و مرغوب و بشدة كمان

و دي بتبقي جملة ماما الافتتاحية...علشن نشوف هنفطر ايه

و دايما برضه بتنتهي...."و الله ربنا هيحاسبكم.....خيرات ربنا اهه في التلاجة".....و برضه الرد المتفزلك....."طب و هو ربنا مش هيحاسبنا يا ماما لو منفعناش عم ابراهيم بتاع الطعمية...اصله غلبان اوي"

و تيجي الطعمية السخنة.....اللي ريحتها تخلي كل الجنود اللي لسه نايمين يصحوا

===================================================

الساعة 11.......صخب.....ضجيج......برطمة

يا جماعة دي خناقة جورنان الاهرام

نفسي اكون اول واحدة تقراه......لكن مش ممكن ابدا......ده مجتمع ذكوري جدا.....

لازم اخويا....يفتتحه بايديه الكريمه (اللي هي مزيتة من اكل الطعمية).....و يفضل يقرا فيه لما يطلع روحنا.....و لما يحس ان احنا عايزين الجورنان....تلاقيه بقي مسك ورقة و قلم ....و عايش في دور المحرر.....

يا جماعة اهم حاجة يوم الجمعة.....اوعي يقع منك.....اللي هو ايه (قدرتك علي التحمل...و الصبر)

باعمل ايه بقي.....بقف مع امي في المطبخ......و الحقيقة هي من زمان نفسها تقولي يا بنتي زقي عجلك.....

لكن كمية الحكايات اللي بحكيها...بتبقي كفيلة جدا انها...تسرع من الانتهاء من صينية المكرونة البشاميل...و اللحمة الباردة اللي في الفرن

و لان امي سيدة عاملة ....علاقتنا باكلات الفرن.....هي يوم الجمعة.....فكان لازم ابقي واقفة معاها في اليوم المفترج دوت

حكاياتي معاها......بتبدا من الجامعة....من الشغل.....من معاكسة حاتم زميلي بالشغل.....

و انتباها المفاجيء لوجود اسم رجالي في الاحداث.....

و سؤالها المغرق في الفرحة "يعني هيخطبك؟؟؟"...... "لا يا ماما انا بحكيلك"....و دي اجابتي المغرقة في السذاجة.....

."يبقي خلاص ملكيش دعوة بيه"......"حاضر".....

و ترجع تحط الصينية في الفرن....و ترجع تحطني دايما في خانة....انتي لسه عيلة و مش فاهمة الدنيا

حوالي الساعة 12....مع دخول موعد الصلاة...... اخيرا....الجورنان بقي وحداني.....

و الحمد لله الفريق الحريمي خلص سورة الكهف....

وكمان اطمان ان القبيلة الجائعة العائدة من الصلاة هتلاقي وليمة مفتخرة

الساعة 2....الغدا.......احنا عندنا سفرة.....بس اتعودنا نعيش ملتصقين بالارض.....مش الارض ارحب و تقدر تكفينا كلنا

و غدا يوم الجمعة ده خاااااااااص جدا.......مش عشان صواني الفرن و بس....لا عشان

احنا فاتحين التلفزيون...علي العالم في اسبوع.....بس كل حد فينا فاتح التلفزيون بتاعه هو......

كل واحد فينا بيحكي ايه اللي حصل معاه في الاسبوع.....و برضه دي فرصة ان كتاب موعظة الحياة يتفتح علي آخره....يا جماعة حد يقولي الكوتاب ده كام صفحة....بس تصدقوا دايما بيطلع صح.....سبحان الله

بعد الغدا.....البنات....بنبقي صف واحد شايلين الاطباق.....الممسوحة ع الاخر.....و معانا كام حفيد كده بيتكعبلوا في رجلينا...و هم واهمين نفسم انهم بيساعدوا.....يعني عقلة الاصبع لما يشيل ازازة ميه و يكب نصها ع الارض....م الطريق للاوضة لغاية المطبخ....و يعمل خط تقفي الاثر وراه تقول انه مشي من هنا...دي تبقي مساعدة؟؟؟

عادة بنغسل المواعين لغاية آذان العصر اللي هو الساعة 4.......يعني حوالي ساعة ليه بقي؟؟؟

عشان قصص المساء اللي كانت في الأوضة الجوانية......لسه ليها كمالة.....و لسه ليها بريق و خاصة مع فقاقيع صابون المواعين

و دايما الخلاصة......اللي بتقولها كل واحدة للتانية....."الصبر"...إزاي اقولكم

اللي متجوزة بتقول للي لسه بتحلم...."و الله يا بنتي الصبر....طب ده انا شفتلك حتي رؤية...."

و اللي بتحلم بتقول للمتجوزة...."و الله يا بنتي الصبر......هو كويس و الله بس دماغه بتحدف شمال"

و اللي لا هي متجوزة و لا بتحلم....هي بس كانت معدية في توقيت غلط.....برضه بتقول "يا جماعة الصبر....ماما بتزعق جوه ومبقاش عندها صبر.....انتو بتعملوا ايه في المطبخ كل ده؟"

م العصر بقي للمغرب.......دي قعدة خاصة جدا...ليه؟

زمان كانت ماما بتخلينا نتفرج علي برنامج اسمه "حياتي" بتاع فايزة واصف.....و مكناش بنفهم فيه حاجة....و دلوقتي بقينا في نفس التوقيت نقعد نتكلم...عن بريد الجمعة.....و عبد الوهاب مطاوع و خيري رمضان

مشاكل كتير....بتبقي شبهنا....و مشاكل اكتر بتبقي مش شبهنا بس بتخلينا نتعايش مع مشاكلنا.... بمزيد من الرضا.....بمزيد من اليقين

كل ما عيني تحدف علي قصة رومانسية......الاقي امي قبل ما اعلق عليها....قد نظرت الي لائمة...."يا رب نتعظ"

...و كأنها تخشي عليا من مجرد الحلم.....هي تعلم اني متخصصة صدمات.....و تخشي ان مجرد حروف في جريدة تنكأ جراح نائمة

تعاندني كثيرا.... و اعاندها اكثر....تريدني ان استيقظ من غيبوبة الحلم......و انا اتشبث بها و ازداد غرقا

كثيرا ما تفقد الامل في.....و لكني لا افقد الامل بها و بحبها......و بقدرتها علي مساندتي كلما دخلت عليها بخيبات الامل المتكررة

قبل آذان المغرب

أخيرا لحظة صمت محببة.....علها توافق ساعة إجابة الدعاء

كل منا له ركن خاص.....كل منا له جانب في النافذة .....ينظر للسماء....يدعو في صمت.....

دعوات تقفز من

الصحة...

لراحة البال...

للنجاح....

للعريس....

لزيادة المصروف.....

للسفر.....

لتصليح العربية.....

للجنة

ينطلق الاآذان في السماء......نغمض اعيننا موقنين بالاجابة

نحتضن سجادة الصلاة

نصلي المغرب........في لحظات

نفتح النافذة........

لننتظر يوم الجمعة القادم

اللهم أعد علينا يوم الجمعة........مرات عديدة..........مع من حقا نحبهم و صنعوا اختلافا في حياتنا بكل تفاصيله الدافئة.

دمتم بود

دامت أيامكم كيوم الجمعة

[حنين الوطن]

انا سعيده بيك جداااااااا انا اول مره اقرا لك بس خلتينى اضحك من قلبى ورجعتينى للزمن الجميل !لبيت العيله اما كنا صغيرين بنقرا المغامرون الخمسه "تختخ ولوزه وحكاياتهم مع الشاويش على"وبرامج التليفزيون "بابا ماجد وكارتون السندباد"ماما نجوى وبقلظ ونادى السينما وماما ساميه الاتربى وبرنامج حياتى لفايزه واصف الساعه 5 تقريبا وعالم الحيوان بعد الصلاه.....الله على الايام دى يا ريتها دامت دلوقتى للاسف التليفزيون بقا زحمه زى ما الزحمه للاسف بقت فى كل حاجه فى حياتنا وعملت حاله من الفوضى واللامبالاه

انا بشفق على اولادى فى الغربه اما افتكر ذكرياتى وانا صغيره وهما للاسف ما عندهمش ذكريات ..بحس اننا حاطينهم فى ورق سوليفان زى الشيكولاته مغلفين فى البيت المكيف والعربيه المكيفه والمدرسه برضه المكيفه بس للاسف ما يقدروش يبصوا من الشباك ع الشارع او يفردوا ايديهم ويجروا ويشموا هوا ربنا ............ ولا حتى يطلع لهم صوت ولا يعترضوا !!!!

ربنا يسامحك يا لماضه انتى المسئوله عن حاله الشجن اللى انتابتنى فجاه وانا شايفاكى ما شاء الله منطلقه " وربنا يديم عليكى الانطلاق وحبك للناس وحب الناس لك"امين :blush2: بحبك

[لماضة مصرية جدا]

السلام عليكم و رحمة الله و بركاته

أختي نور...؟؟؟؟(مش عارفة اقرا الاسم)

ميرسي علي الورد......و صبااااحك وردة حلوة تمشي علي ملامحك...و تصحيكي باحلي ريحة في الدنيا

طب ما تحكيلنا عن يوم الجمعة بقي بالطريقة الظبياوية....(ابو ظبي بقي....جاد...و طاجن الفراخ المحشية....مش عارفة هو بيضحك علينا...و بيعمله بدل الحمام و لا ايه؟؟؟)

شكرا لمرورك..... :blush2:

===========================

أستاذتي حنين للوطن

بعتذر عن حالة الشجن الغير متعمدة علي الاطلاق...

هي حالة ضخ دماء في خلايا جهاز المناعة عشان يعرف بس يقاااااااااااااوم

بالمناسبة بقي...."حنين للوطن"...و بتكلميني عن حالة الشجن

عارفة انا لما التفاصيل الصغيرة دي زارتني امبارح...اكتشفت حاجة مهمة جدا...ان ابويا و امي و عيلتي مكنوش متعمدين ان اليوم يمشي بالطريقة الدافية دي....هما كانوا عايشين كده....و اليوم الظاهر ببركة وجودهم منحنا انسانيا ما يكفي جدا و يفيض.

حسيت ان الاشخاص هم اللي بيضيفوا دفء للامكنة و الازمنة...و ليس العكس.

بنعرف ناس كتير....و بتدوب ملامحنا مع البشر....بس بتبقي فيه حميمية التفاصيل الصغيرة....من ناس لها مساحات خاصة جدا

صباااااااااااااااااااحك...حنين...لكل حاجة حلوة.....تخلينا نشمر كمامنا...و تخلي يومنا منين ما كنا شرق و لا غرب....هو يوم مختلف جدا

شكرا لمرورك الملهم جدا

[noureymo]

السلام عليكم و رحمة الله و بركاته

أختي نور...؟؟؟؟(مش عارفة اقرا الاسم)

ميرسي علي الورد......و صبااااحك وردة حلوة تمشي علي ملامحك...و تصحيكي باحلي ريحة في الدنيا

طب ما تحكيلنا عن يوم الجمعة بقي بالطريقة الظبياوية....(ابو ظبي بقي....جاد...و طاجن الفراخ المحشية....مش عارفة هو بيضحك علينا...و بيعمله بدل الحمام و لا ايه؟؟؟)

شكرا لمرورك.....

أخوكي يا لماضة

كده هاخد الوردة تاني :blush2:

نورايمو

[اغابي]

انا قصتى مميزة شوية - بس اضمن الجميع يقروها

وهى قصة مؤثرة -

وليها معانى كتير - وفيها مفاجأه كمان

بس ازاى اضمن انكم حتقروها - وهى مهم ان كل مسيحي ومسلم يقرا القصة بتاعتى دي

مع انى بحاول انساها - بجد - بس فكرتونى بيها - ومش عاوزة حد يعيط