عيون على الشاشة

[Abouhemeed]

بسم الله الرحمن الرحيم

قاعدين مبحلقين و عيونا كلنا ع الشاشة

سيما أو تليفزيون أو ورقة و قماشة

و جـمره مولعة ف قلبنا ممسوكة بالماشة

منتظرة الشجيع يظهر لتحبه ابنة الباشا

***

من صغرنا و من طهارة قلبنا حسبنا كلنا

اللي بنشوفه بعينا حقيقي ممكن يحصل لنا

صدقنا البطل و الشجيع و كل من حكي عننا

و إن الخير لازم ينتصر و ينصفه بطل من عندنا

***

نفسنا نسقف لما الشجيع يظهر نفسنا نشوف نفسنا و نفرح

نشوف كل العيال حولنا تمرح و لا يوم عين عندنا تدمع

لما تبص في الورق أو على الشاشة لا تخاف و لا تجزع

بطلها يكون معاها في كل مكان تروحه أو ترجع

***

أفلام و تسجيلي لأحداث حصلت لي أنا و جيلي

تاه منها الأمل و انهد بيها العزم ما بقي غير حيلي

أخبار كلها تغمنا عن حروب و جيوش و أساطيل_

تهدم كل ما في طريقها من كابول ل جاليلي

***

من كتر ما شوفنا عينينا نست تدمع

و في الشوشرة السمع بطل لنا يسمع

أتحبس الكلام فينا و حبس الكلام يلسع

أيدينا اتكتفت لا عادت تطرح و لا تجمع

***

ران الصمت حوالينا حتى النفس إتكتم فينا

ما نشوف غير سواد الشاشة سواد بيعمينا

صف ورا صف و قفا قدام قفا يبحلقوا فينا

ما حدا جرؤ يندار يبص ع اللي حصل لينا

***

من وسط ظلام الذل جلجلت صرخة جبارة

طفل صغير مسلوع ساكن في آخر الحارة

سيما أونطه كنت أشوفه ماسك ف أيده دوباره

يشدها و تشده و في طرفها مربوطة طياره

***

راح ل قدام يجري قايل دول كلهم أهلي

لا هم فيلم ترسو و لا هم حزن يسري

الشاشة جابها الأرض لأدوسها أنا برجلي

و بأيده وحده علت هامته و فك لي أسري

***

سقطت الشاشة و نورت الدنيا حولنا

من كسوفنا ما قدرناش نبص لبعضنا

إيدنا على عيونا نحجب الضوء عننا

خجل و عار تعودنا نداريه عن نفسنا

***

ساعتها بس عرفنا كلنا إن شجيعنا في وسطنا

لا على شاشة و لا في ورقه و قماشه دا طفلنا

من جيلنا جايز أو جيل بعدنا قلبه أطهر مننا

بس الأكيد أنه من حينا أو من أي حي جنبنا

***

أبو حميد المصري ‏14‏‏/‏10‏‏/‏2003‏