امتى المراْه هاتسوق عربيه في .......السعوديه .

[أحمد سيف]

عزيزي عاشق الترحال

انسحابك من الحوار دليل ضعف حجتك ومنطقك ... عموما الأيام بيننا والمرأة ستقود السيارة في السعودية كما تقودها في جميع أنحاء العالم رغما عن معارضة "شيوخك" وهأبقى افكرك

مش ناس بتتكلم من وراء حجاب

الحمد لله أنا داخل بإسمي الحقيقي وهويتي معروفه لكثير من الأعضاء ولو عاوز كمان أبعث لك عنواني وتليفوني ... انت مين بأه؟؟

[عاشق الترحال]

عزيزي عاشق الترحال

انسحابك من الحوار دليل ضعف حجتك ومنطقك

مين قال أني إنسحبت من الحوار أنا مش عاوز أتحاور معاك بالتحديد ومرحبا بالحوار مع أي الناس اللي بتعرف تتكلم وتتحاور

... عموما الأيام بيننا والمرأة ستقود السيارة في السعودية كما تقودها في جميع أنحاء العالم رغما عن معارضة شيوخك وهأبقى افكرك ...

ياريتني كنت أعرف أبقى تلميذ عند شيخ زي بن باز ولا بن عثيمين الله يرحمهم وإبقى قابلني لو حصل

مش ناس بتتكلم من وراء حجاب

الحمد لله أنا داخل بإسمي الحقيقي وهويتي معروفه لكثير من الأعضاء ولو عاوز كمان أبعث لك عنواني وتليفوني ... انت مين بأه؟؟

أنا كمان هويتي معروفه لأعضاء كتير في المنتدي وبنزور بعض هنا فى السعوديه ونتصل ببعض على طول

أما بالنسبه لعنوانك وتليفونك فلا يعنيني في شئ علشان تبعتهولي

وبكررهالك للمره التانيه والأخيره

ياريت دي تكون أول مره وآخر مره نتحاور فيها مع بعض

سلاما ( تحياتي )

تم تعديل 16 يناير 2010 بواسطة أحمد سيف
حذف ردود على عبارة محذوفة من مداخلة سابقة

[أحمد سيف]

ياريت دي تكون أول مره وآخر مره نتحاور فيها مع بعض

والله مش سعادتك اللي هتحدد لي امتى أرد وأمتى ما أردش

عاوز انت تمتنع عن الرد براحتك ... بس أنا هفضل أكتب اللي أنا عايزه سواء عجبك أم لم يعجبك

سلاما

[msayed]

ياجماعة إستهدوا بالله فنقاشنا هذا لن يغير شيء ولكن نفعه عائد علينا نحن فقط

يا أخ أحمد إنت ثائر علشان المرأة فى السعودية ما بتسوقش

للمرة المليون وإللى هايغضب يغضب، وإللى هايتهم النوايا يتهم النوايا فأنا إتعودت على كده خلاص ومابقتش أقدر أنام إلا لما واحد يطلع يحمل كلامى غير ما يحتمل.

السعوديون أدرى ببلدهم زى ما إحنا أدرى ببلدنا فلا نفرض وصايتنا عليهم كما نرفض وصايتهم علينا؟

هم شايفين إن سواقة المرأة فى بلدهم حرام ("حرام لغيره وليس حرام لذاته") لظروف هم أعلم بها ومن عاش فترة فى المملكة يعرفها كويس.

بخصوص رأيى فى الأدلة يمكن مراجعته فى مداخلتى الماضية.

ونحن لن نقبل منهم أن يفتوا على مجتمعنا فى مثل هذه الأمور بالقياس على مجتمعهم كما ينبغى ألا نحكم على مجتمعهم بالقياس على مجتمعنا أو مجتمع أوروبا للى عايشين فى أوروبا.

وبعدين الموضوع هنا محاورات المصريين وأى واحد بيدخل يقول كلام مايعجبناش عن مصر بنطرقعله، فليه إحنا نقول كلام قد لا يعجب السعوديين؟

والكلام ده مش رأيى لوحدى علشان ما يطلعش واحد يستفرد بيا

هذا الحدث كان فى عام 2005 فى مدينة جدة

كارين هيوز مساعدة وزيرة الخارجية الاميركية (كوندليزا رايس) لشؤون الدبلوماسية العامة

أتت الى المملكة في زيارة دعائية لتلميع وجه أمريكا والبحث عن قاعدة لما تدعو له من الدعوات المشبوهة

في زيارتها الى جدة، التقت ب 500 امرأة اختارتهن جامعة دار الحكمة الخاصة ليمثلن شريحة من نساء جدة ..

اترككم مع التفاصيل كما وردت في جريدة السفير

هاجمت الطالبات السعوديات بجامعة دار الحكمة الخاصة في جدة أثناء لقائهن بمبعوثة الرئيس الأمريكي جورج بوش / كارين هيوز، "الصورة النمطية" التي يعممها الإعلام الأمريكي للمرأة العربية ، ووصفن وسائل الإعلام الأمريكية بعدم النزاهة ".

قالت الطالبات السعوديات ذلك أمام كارين هيوز .. مساعدة وزيرة الخارجية الأمريكية للشئون العامة ، والمقربة من الرئيس بوش ، والتي كانت مستشارته في البيت الأبيض ، والتي تتمثل مهمتها - التي تشمل ثلاث دول في (الشرق الأوسط) .. بدأتها بمصر - بالسعي لتحسين صورة الولايات المتحدة في الدول العربية .

وكانت حوالي700 طالبة - وغالبيتهن من السعوديات - قد تجمعن لتبادل الآراء مع هيوز ، والتي جاءت للاستماع إليهن ، وأعلنت الطالبات أمام صحافيين أمريكيين يرافقون هيوز ، أن الكيل طفح لديهن بسبب الحديث عنهن وكأنهن لا يتمتعن بأي حقوق بسبب عدم السماح لهن بقيادة السيارات وبالتصويت .

وقالت إحدى الطالبات السعوديات بلهجة غاضبة أمام الصحافة الأمريكية : " لست بحاجة إلى قيادة السيارة .. فلدي سائق " ، وتساءلت أخرى : " لماذا تعطي وسائل الإعلام الأمريكية الانطباع بأن جميع المسلمين إرهابيون ؟ " ، وانتقدت أخرى - ما أسمته الإثارة التي تعتمدها قناة (سي إن إن) الأمريكية - وقالت : " لا يوجد جدار فاصل بين الرجال والنساء في هذا البلد " .

وأضافت طالبة أخرى: " نحن سعيدات ، على عكس ما تنقله وسائل الإعلام الأمريكية بأن المرأة العربية ليست سعيدة " ، وانتقدت طالبة رابعة وسائل الإعلام الأمريكية "اليمينية المتطرفة" ، والتي قالت : " إنها لم تعد تتمتع بالنزاهة التي كانت عليها في السابق " .

الغريب أن أجوبة هيوز كانت غير مباشرة ، وبعد اللقاء قالت : " إن الطالبات أثرن دهشتها، وأنها تأثرت بصراحتهن وذكائهن ، وبشعورهن بأنهن جزء من المجتمع السعودي .. " ، وأمام الطالبات ، أقرت هيوز بـ : " إنه يجب على الولايات المتحدة ألا تفرض إرادتها على السعودية " .

مع احترامي للجميع فانا شايفه ان قيادة المراة للسيارة في السعودية شأن داخلي لا علاقة لنا به من قريب او بعيد وابسط رد ممكن ينقال ان لو متضررين من عدم قيادتكم السيارة محدش ماسك فيكم والي مش عاجبه وضع يسيبه ويمشي ولا ايه ؟

اعتقد السعوديين بس الي من حقهم يناقشوا الموضوع ده والي حتى هم مش واصلين فيه على بر يعني نص مع آه ونص مع لأه ..

عن نفسي ورايي الشخصي جدا بخصوص قياده المرأة في السعودية ..

من سنة فاتت كان حلمي انهم يسمحوا لنا بقى بالقياده عشان اخلص مشاويري بنفسي خاصه في الفترة الي كان والدي وزوجي فيها مش موجودين وكان اعتمادنا كله على الليموزين وياما تبهدلنا في المواصلات بسبب كده .. كنت فاكره ان لو سمحوا لنا بالقياده هتبقى حاجه كويسه خاصه وانا بسوق في مصر عادي ومعنديش مشكلة يعني لو القرار طلع بليل هنزل اطلع رخصة الصبح ..

بعد فترة اكتشفت اني كنت غلطانه وجدا كمان ..

المسألة مش انك تسوقي وتنرحمي من الركوب مع سائق غريب اوخوفك منه .. المسألة ان سائق الليموزين بيكون ( راجل ) وواقف معاكي وقت الجد فيما لو تعرضتي لاي مضايقات .. اذا كانت الي بتركب ليموزين لوحدها ممكن تتعرض لتحرشات على اساس ان مين قالك تركبي لوحدك .. فمابالك بقى لو سايقة عربية لوحدها وتاهت على الطريق مثلا . هل تضمن ان متلحقهاش سيارة فيها شباب عابث ولو من باب الهزار .. هل تضمن ان محدش ( يكسر ) عليها ويجبرها على ايقاف سيارتها ليحدث مالاتحمد عقباه ؟

السعوديه طرقها واسعه جدا يعني نصها ( حتت مقطوعة ) وصعب جدا ان الستات تسوق فيها خاصه وان العائلات المحافظة هترفض اصلا ان بناتهم يسوقوا وبالتالي اي وحده هتسوق هيبقى مأخوذ عنها فكرة مسبقة انها ( مش محافظة ) وشوفي بقى ايه ممكن يحصل لها لو حد بص لها البصة دي .

عن نفسي لو سمحوا بالقياده مش هسوق وللاسف هفضل اعتمد على الليموزين الى ان يفرجها ربنا او اخذ بعضي وارجع بلدي اسوق هناك براحة راحتي ..

بجد والله ومن غير زعل زي إحنا مبنحبش حد يتدخل في شئونا الداخليه هما أكيد كده

وده شأن داخلي للسعوديه والسعوديين هي بلدهم وهما أحرار

وكل بلد ولها نظام وواجب عالمقيم فيها أنه يحترمه

وعلشان كده أرجوا من الجميع بلاش حد مننا يتهكم أو يلمح تلميحات ملهاش لزمه مراعاة لمشاعر إخواننا السعوديين

وعلى رأي المثل أهل الميت صبروا والمعزين كفروا

ياجماعة الموضوع مش موضوع بتعرف تسوق ولا لأ ..الموضوع هو لو خرجت فى السعودية هتتعاكس ولا لأ

قصتى اللى حصلت معايا فى السعودية كانت ان صديقتى الانتيم اصرت اننا نخرج فى عز الضهر وكنا ناحية الرياض ورغم اننا كنا اتنين

ولكن عينك ماتشوف الا النور والله وصلت لدرجة كنت بجرى فى الشارع عشان اوصل البيت دا وانا وهى ايه مغطيين وشنا ولابسين ساتر ..أمال لو لابسين أحمر واخضر واصفر كان هيحصلنا ايه؟ الحمد لله اللى جت على قد كده....والله كنا عاملين زي الطرائد فى الصحرا...والله كمية السيارات اللى كانت ورانا ...أنا مش عارفة يمكن الشارع كله.... أظن الاحسن للست فى السعودية الوقار فى بيتها ولا سواقة ولا مسخرة

وعلشان كده أرجوا من الجميع بلاش حد مننا يتهكم أو يلمح تلميحات ملهاش لزمه مراعاة لمشاعر إخواننا السعوديين

طبعا المفروض كده ....وياريت اللي لمح اي تلميحات ياخد باله فعلا ......

انا كنت داخله في الاول باحلم بحلم ونفسي يتحقق :knight:

فجاْه كده لقيته قلب بحقيقه و بعض ا لناس داخله تحدف (طووووب)

تم تعديل 16 يناير 2010 بواسطة msayed

[أحمد سيف]

يا أخ أحمد إنت ثائر علشان المرأة فى السعودية ما بتسوقش

يا سيدي الفاضل سبب ثورتي - كما تصفها - ليس أن المرأة في السعودية ما بتسوقش ... فالموضوع لا يعنيني ولا يؤثر في إطلاقا.

ما استفزني هو المحاولة المستمرة لإضفاء القدسية على بعض الآراء واعتبارها جزءا لا يتجزأ من الدين لا تجوز معارضته أو مناقشته بدعوى أن قائليها علماء أفاضل أجلاء هم وحدهم - دون غيرهم من العلماء والباحثين - من ينبغي اعتبار آراءهم ملزمة ونهائية.

تستفزني محاولة البعض تصوير السعودية على أنها النموذج الأمثل الذي يجب أن نقتدي به ومحاولتهم فرض عرف وعادات 20 مليون إنسان على ملياري مسلم باعتبارها جزءا من الدين ... السعوديون أنفسهم يعترفون بوجود مشكلات كبيرة في نظمهم وتقاليدهم ولكن يبدو أن لدينا ملكيين أكثر من الملك.

استفزني التلاعب الذي يقوم به البعض بالدين وفقا لما يلائم أهوائهم ويوافق قناعاتهم ... إذا أرادوا إثبات جواز أمر ما أثبتوه على قاعدة أن كل شئ حلال وطالبوا مخالفيهم بالدليل ... وإذا أرادوا إثبات عدم جوازه طالبوا من يعتبره حلالا بالدليل على جوازه.

استفزني فرض البعض أنفسهم أوصياء علينا ليقرروا لنا ما ينبغي أن يضحكنا وما ينبغي أن يبكينا ... ويفرضوا علينا ابداء الاحترام لمجموعة من الآراء التافهة التي لا تقنع طفلا صغيرا وإلا كنا نستهزأ بآيات الله وبكلام رسوله.

لنتذكر أننا هنا نناقش مشكلة أخت مصرية تعاني من مشكلة في السعودية بسبب هذه الأنظمة ... فلماذا لا يكون لنا الحق في أن نناقشها كما نناقش نظام الكفيل وعقود العمل والاستقدام ... أم لأن مشايخ السلفية هناك قالوا رأيهم فيها فإنها تدخل في نطاق التابوهات المحظورة.

[عنبو]

الاخ المهندس احمد سيف

تحيه طيبه وبعد

يأخ احمد لما اختلف مع واحد فى الرأى مافيش اى مبرر لانى اتهكم عليه واسخر من رأيه

اذا كان مش عاجبك الفتوى اوك انت حر من حقك ان تقبلها او ترفضها ولكن ليس من حق اى واحد ان يسخر من الاخر

وخد بالك كثرة الضحك تميت القلوب ده حديث مش كلمه نلعب بيها يعنى

اما عن كلامك

استفزني فرض البعض أنفسهم أوصياء علينا ليقرروا لنا ما ينبغي أن يضحكنا وما ينبغي أن يبكينا ... ويفرضوا علينا ابداء الاحترام لمجموعة من الآراء التافهة التي لا تقنع طفلا صغيرا وإلا كنا نستهزأ بآيات الله وبكلام رسوله.

مافيش حد فرض وصيه على حد ولا حد قلك اقتنع او متقتنعش كل واحد حر فى تفكيره ودماغه

ولكن لما تسخر من ناس فده وجب علينا ان نذكرك ونقول لحضرتك خد بالك ان المفروض مافيش حد يسخر من التانى حتى لو اختلفنا فى الرأى وده حق من حقوق المسلم على اخيه

اما بالنسبه للفتوى فهى خاصه بالسعوديه وهم راضين بها ومقتنعين بها

لكن ان تعمم الفتوى فلا والف لا لان اى فتوى فى الدنيا محدده بحدود زمانيه ومكانيه والا تحولت من فتوى الى نص شرعى طيب نص ازاى واذا كان الرسول مات والوحى انقطع

الخلاصه من حق اى فرد ان يقبل اى فتوى او يرفضها ولكن باحترام وبدون سخريه من الاخر

[أحمد سيف]

يأخ احمد لما اختلف مع واحد فى الرأى مافيش اى مبرر لانى اتهكم عليه واسخر من رأيه

اذا كان مش عاجبك الفتوى اوك انت حر من حقك ان تقبلها او ترفضها ولكن ليس من حق اى واحد ان يسخر من الاخر

عزيزي المهندس محمد العنبي

ما دمنا نريد أن نقرّ قاعدة أن السخرية من الآراء والفتاوي أمر مرفوض مهما كانت تلك الآراء شاذه وسخيفة بنظرنا ... فسأعمل على تطبيق هذه القاعدة دون تمييز ... وعليه فإنني إذا وجدت أحدا يسخر من رأي لأي كاتب أو باحث أو مسؤول حتى إنسان عادي مهما كان فحوى هذا الرأي فسيكون لي تعامل صارم مع الموضوع ... لا توجد آراء تتمتع بحصانة خاصة وآراء أخرى تجوز السخرية والاستهزاء بها دون حدود ... متفقين يا ريس ؟؟

وخد بالك كثرة الضحك تميت القلوب ده حديث مش كلمه نلعب بيها يعنى

وانت شفتني اعترضت على الحديث ده امتى وفين ولا ضحكت امتى قبل كده ... أنا يمكن أحد الأعضاء القلائل اللي ما بيعتبوش باب موضوعات خفيفة ... ولو عملوا استفتاء حول صاحب أثقل دم في المنتدى هفوز بيه بجدارة.

تحياتي

[أحمد سيف]

أستاذ msayed

رغم أنني لازلت أرى أن الجملة المذكورة ليس بها ما يسيئ لأحد وأنها كانت ردا منطقيا على ما جاء في مداخلات أخرى فيبدو أنها قد أغضبت الكثيرين ومنهم حضرتك ... وحيث أن المعنى الذي اردت توصيله يستقيم حتى دون وجود هذه الجملة فسأقوم بحذفها وحذف جميع التعقيبات عليها ... وأعتذر إن كانت قد تضمنت معنى مسيئا أو مستفزا لبعض الأعضاء .

تحياتي

[sarmar]

سبحان اللة قى طبعكم نفسك تروحى بندة ولا العثيم بنفسك

طيب مانتى عندك جوزك بيشتغل بنك زوج وسواق وحامل قمامة وفى اى وقت عاوزين تروحا بندة ولا العثيم ولا كارفور ولا جيا ولا اى مكان بتروحوا وانتم مطمئنين على انفسكم

نفسكم انكم تتخلصوا مننا ؟؟؟؟؟؟

جاء الزمن والوقت اللى يتنفسوا فية عن اللى جواكم القضية ماهى قضية سواقة القضية قضية تمرد وعصيان صدقونى انتم الحين فى نعيم ومافى شىء لهثت وراة الاخت السيدة المرأة الا وندمت علية

استاذ sarmar

حضرتك بجد مقتنع بالكلام الي بتقوله ده وبجد شايف ان الستات اجمالا عندهم زوجهم تحت الطلب مجرد ماتطلب منه يوديها بنده ( بيهب ) لنجدتها ويروح ويجي معاها مكان ماهي عاوزه ؟؟ حضرتك بذاتك بتعمل كده ؟ ومتقوليش اصل اهلي عندهم سائق اصل مش الكل متوافر له حكايه السائق ...

السلام عليكم

انا طبعا ليس عندى سائق خاص ولا شىء انا اللى بكون سائق خاص لزوجتى واولادى

بس انا عند الزهاب لبندة او العثيم او اى مكان بيكون بالتنسيق بينى وبين الاهل مع مراعاة ظروف عملى والزهاب لبندة ياخت ضحى ماهو بكارثة حتى اهب وانجدها واوصلها لبندة وفى شىء تانى يااخت ضحى ان طبيعة المجتمع اللى فى الرياض لا تتوافق مع قيادة المرأة للسيارات اذا كانت بتمشى فى الشارع وبتتعاكس وممكن يخطفوها فما بالك اذا كانت بالسيارة لحالها فى طريق دائرى او طريق فاضى

فى النهاية اللى مش عايش هنا بالرياض يقول ان المرأة تقود او تقود براحتة اما اللى عايش وشايف لايمكن اى راجل يوافق ان زوجتة او بنتة تخرج بسيارة لحالها الموضوع مختلف ولاتنسى انك اما بنتى او اختى او شريكة عمرى والمقصود اننا حريصون عليكم اكثر من موضوع قيادة

ياجماعه انا ضد قياده المراة في السعوديه للسيارة ايوه بس الكلام الاحمر الي فوق ده مليش دخل بيه بتاتا ..البته ..

[أحمد سيف]

سبحان الله عليك يا عاشق الترحال

زعلت وغيرك زعل لما كتبت العبارة الخاصة بمصر وقلتم ما يصحش الكلام ده يتقال.

قمت حذفتها - وحذفت الاعتراضات عليها طبعا - واعتذرت عنها رغم إني مش شايف فيها غلط رجعت تشتكي وتقول ضعف حجه وتعارض آراء ومش عارف ايه.

ايه المطلوب بالظبط ولا هو اعتراض لمجرد الاعتراض.

بالنسبة لبن باز وبن عثيمين - رغم أني لم آت على ذكرهم وأنت افترضت ذلك - طبعا كلامهم مش فارق معايا لأني لا أتبع مذهبهم ومنهجهم وأعتبره خاطئا ... زي ما أنت لا يفرق معك مثلا كلام طنطاوي أو السيستاني أو حتى البابا شنوده.

هل لما تقول أنك لا تعتبر بكلامهم يبقى كده بتهينهم أو يتشتمهم ...أم أنك فقط تعلن أن كلامهم لا يمثل حجة عليك ولا تعتد به لمخالفتك اياهم في الفكر والمنهج.

ولو قرأت المقالات الموجودة في الرابط جيدا لرأت أن ما تحتويه من نصوص دينية قليل جدا والباقي اجتهادات وتأويلات غير مقنعة - لي على الأقل - لذا عندما أقول أن جلّ ما أتوا به هو من عقولهم والفتاوى التي قدموها ليس فيها نصّ صريح بل معظمها تم الوصول اليه عن طريق القياس - الخاطي من وجهة نظري - والاستحسان فأنا لم افتري عليهم على الإطلاق... وباقي المقالات هي كلام مرسل وحكاوي ليست من الدين في شئ.

أنا شبه واثق أن معظم من تصدى للدفاع عن هذا الكلام لم يقرأه أساسا بل اكتفى بمعرفة أن من قاله هو الشخص الفلاني ليصبح عنده حقيقة منزلة لا تجوز مناقشتها ... عدد كبير من اخوانا السلفيين هم كذلك وأنا أتعامل معهم من سنيييييييين وأعرف كيف يفكرون ... لذا كان حكمي الذي أوردته في السطر الثاني الذي وضعته باللون الأحمر... وأعتقد أن من حقي أن أنقد طريقة تفكير بعض الأشخاص بحريّة كما يهاجم الجميع أفكاري ليل نهار ما دمنا في منتدى حواري . إلا إذا كنت تعتبر السلفيين ذواتا مقدسة لا يجوز انتقادهم أو المسّ بهم.

عموما أنا مثلك في انتظار ردّ اخوانا من فريق الإشراف وصاحب الصالون على البلاغ التي تقدمت بها على الهواء ... وإذا كان رأيهم أنني مخطئ فسوف أعتذر للجميع.

[تامر السعدني]

قيادة المرأه للسياره لا تجوز شرعا

و الأدله كثيره

http://www.saaid.net/female/mfased.htm

شر البلية ما يضحك

تذكر أن كثرة الضحك تميت القلب يا باشمهندس / أحمد

علاوه على أنه لا يجوز الضحك على الأدله الشرعيه

كان نفسي اضحك معاكم بس معليش .. تذكرت قوله تعالى (( وَلَئِنْ سَأَلْتَهُمْ لَيَقُولُنَّ إِنَّمَا كُنَّا نَخُوضُ وَنَلْعَبُ قُلْ أَبِاللَّهِ وَآيَاتِهِ وَرَسُولِهِ كُنتُمْ تَسْتَهْزِئُونَ)) خفت اضحك بصراحه ..

اكيد انا و غيري من الي مشاركوش معاك استاذ ايهاب فيمسلم او غير مسلم

الضحك على ( النكته ) بيحسدك على شجاعتك دي .. بس تعرف .. خايفه بكرا انتم الي تحسدونا ..

تحياتي :blush2:

اعتقد بغض النظر هل الكاتب مسلم أو غير مسلم

ليس هذا أسلوب يخرج من أناس في احترام حضراتكم

اشارك الافاضل الذين تأذوا من هذا الأسلوب الذي يمنعني ديني وتمنعني أخلاقي أن أصفه بأي وصف

أرجو مراجعة أنفسكم وإن وجدتم أنكم كنتم مخطأين فالأفضل أن تقدموا اعتذارا لكل الأفاضل في المنتدى

هذا ما تعودناه من الأفاضل المحترمين

سواء في موقع قيادة أم لا

[لولا]

ما استفزني هو المحاولة المستمرة لإضفاء القدسية على بعض الآراء واعتبارها جزءا لا يتجزأ من الدين لا تجوز معارضته أو مناقشته بدعوى أن قائليها علماء أفاضل أجلاء هم وحدهم - دون غيرهم من العلماء والباحثين - من ينبغي اعتبار آراءهم ملزمة ونهائية.

نحن عندما نقرأ فى كتاب .. مجرد كتاب عادى

نملك العقل لتفنيد ما نقرأه، وعليه نحن نتحمل المسؤليه فى كل ما نسمح له ان يدخل عقولنا، ويشكلنا، ويصبح جزء من ثقافتنا

وايماننا.

ولكن احيانا اخى احمد لايعرف المحاور من القضيه التى يحاور

فيها سوى نصوص معينه اذا اسقطنا الموضوع على ما يحدث هنا لنعتبرها هنا فتاوى الشيوخ الأفاضل فى حرمانيه قيادة السيارة للمرأة

والتى فى غالبها كلام مرسل كما اسلفت فكلنا يعرف ان نساء الجزيرة العربية كن يركبن الخيول والدواب

ويخرجن فى الغزوات لتمريض المصابين .. وبعد التمدن قدن السيارات فى الباديه وهذا يحدث حتى الوقت الحالى فى السعوديه .. يعنى يفعلن امرا محرما شرعا !!

المشكلة انك عندما تتوقف لستهجن ، ترفض، تفكر فيما يقولون

ستجد نفسك متهما كما قلت .

لن يملك من امامك ان يحترم مساحة فكرك التى تقبل او ترفض تلك العينات من الفتاوى طالما اختلفت عنه

من وجهه نظره تلك منطقة محرم الإقتراب منها ولا مجال فيها للتفكر او التدبر او الدراسة والبحث لتقصى الحق مما سواه

لقد وقر فى نفسه شيء واصبح لسان الحال كهذه القصه:

شوهد مؤذن يؤذن وهو يتلو من ورقة في يده قيل له اما تحفظ الآذان

فقال: اسألوا القاضي

فآتوا القاضي: فقالوا السلام عليكم

فاخرج القاضي دفترا وتصفحه وقال وعليكم السلام!

احيانا يشعرنى البعض ان للدين توكيل حصرى فقط فى يد فلان وفلان وان المنشأ دوله كذا فقط !

لا استطيع حتى الآن نسيان ما قرأته عن فتاوى صدرت من ذات العلماء عن تحريم ارتداء العدسات اللاصقه الملونه وبنطلون الجينز

وتحريم عمل المرأة الخ الخ فى وقت سابق.. وفتاوى تحريم العباءة اذا لم تكن سوداء موضوعه بشكل معين على الرأس وتحريم اشياء كثيرة جدا فى الحياة..

الحياة التى ما كانت هكذا فى عهده صلى الله عليه وسلم مثقلة بكل هذا الكم من حرام حرام حرام فى اصغر امور الحياة وصغائر الأمورمثل ارتداء عدسه لاصقه !.

الهى ..

اهذه فتاوى حقا ؟؟ انضحك ام نبكى نقبل ام نرفض او نقول آمين آمين ؟؟!!

فتاوى حتما لنا حق ان نفكر فيها ونقلب ونتعمق ونفهم على ماذا استندت ونبحث فى اراء علماء وعلماء غيرهم لنقف بأنفسنا على حقيقة

كيف ان الدين حقا يسر وليس عسر ,, كيف ان الفتاوى هى بشريه تقبل الرفض والقبول خصوصا فى هكذا امور دنيويه وليست من اصل العقيدة والإختلاف

فيها لا يتوقف لعلماء فى نفس البلد ونفس البيئه حتى وبنفس الظروف.

كانت المرأة قبل اكثر من الف واربعمائه وثلاثون عاما تصلى خلف الرجال فى مسجد المدينه دون حاجز او فاصل لأن الإسلام دين تهذيب..

هذب النفوس فى المقام الأول ولم يرسخ افكار الحواجز ويحرم ركوب المرأة الدابه لأن فى هيئتها وهى راكبه عليها ما قد يسبب الإغراء !!

دين يُعلى قيمة الفرد واحترامه لنفسه وللآخرين ولا يزرع افكار النعاج التى تستحق ان تلتهمها الذئاب لأنها لم تتعفن موتا فى الوادى الأجدب

وخرجت للحياة !

لك آراء يبدوا انها لا تروق للبعض الإختلاف سنة الحياة على كل حال ,, ولكنك ستجد من بعض من لا يروقه رأيك سعيا حثيثا

للتربص بكلماتك وحروفها وعلامات التشكيل عليها ليقتنص منها غلطة مرة او يأولها ويحرف معناها مرة بدل من افكارك التى تحتاج لجهد

ومنطق وحجج مقنعه لمواجهتها.

تحضرنى مقولة المأمون تلك عندما حكى فى مجلسه رجلاً من بني هاشم اسمه عبد الصمد بصوت عالى فقال له :

«لا ترفعنّ صوتك يا عبد الصمد! إنّ الصواب في الأسَدّ لا الأشدّ!».

قد ترتفع الأصوات من حولك .. ولكن الحق ليس بالصوت العالى .

تحياتى

لولا

[se_ Elsyed]

شوفوا

لو طلعت الفتوى تقول لأ لأن ده يتعارض مع عادتنا وطبيعة شعبنا

هاقول لك كلامك على راسي من فوق وعندك حق وسمعاً وطاعة لأولي الأمر

لكن تقولي قيادة المرأة حرام شرعاً

يبقى لأ وألف لأ وهاقول لك هات لي الدليل من القرآن والسنة

ولو قلت لي ان ده من باب درء المفاسد

هاقول لك يبقى حرم التليفزيون والسكاكين والأحبال اللي ممكن الناس تشنق نفسها بها بالمرة بقى

ماشي ؟

مثال صغير وقريب

مش نفس العلماء دول هما اللي حرموا الموبيل ابو كاميرا وحرموا البلوتوث ومن قبلها حرموا اليوم الوطني اللي بيبقى اجازة هنا ؟

ما تجاوبوا يا اللي قاعدين في السعودية

وفي ثواني رجعوا في كلامهم وبقى حلال مصفي

ومش هما دول الل كانوا بيبعتوا رجال الهيئة - شوفتهم بعيني - في التسعينات لضرب اطباق الستالايت فوق الاسطح بالرصاص الحي ؟

أسف ايها المثقفون المسلمون اصحاب العقول

لما تخلط العادة بالعبادة ... يبقى انا كصاحب عقل اقول لك أسف

لكن لما تتكلم من منطلق ديني عن عبادة او عقيدة .... مش هاعقب بولا كلمة

اقسم بالله والله على ما اقول شهيد اني حضرت خطبة جمعة من فترة لأحد المشايخ الذين أحبهم .. وحرم فيها قيادة المرأه للسيارة ....... ليه ؟

قال بالحرف الواحد

1- ترضى يتصلوا بيك ويقولوا لك تعالى مراتك محجوزة في شرطة المرور عشان قطعت أشارة حمراء ؟

يا سلام !!!!!!!!! أيوه أرضى ... ما هي نفس الزوجه دي ممكن تتخانق مع جارتها وتدبها بالسكينة .... وأنا لو قطعت أشارة ما هاتسجن برضوا .. .وأقطع ليه الأشارة أساساً ؟

2- ترضى الكاوتش يفرقع من زوجتك وتقف في الطريق العام وينزل شباب يساعدوها في تغيير الكاوتش ؟

لا تعليق بصراحه

الغريبة

نفس العلماء دول .. ونفس الناس اللي بتتحمق دي ... لا ينبسون ببنت شفه - حلو التعبير ده - ويتحدثوا عن حرمانية أو تحليل وجود سائق أجنبي مع الزوجة في الرايحة والجاية وبتقضي معاه وقت أكثر من زوجها نفسه وكل راجل مريح نفسه بإنه جايب سواق وهو شغال خروج وسهرات مع اصحابه ..... اتحدى حد بيتكلم عن ملايين السائقين اللي في المنازل دول

انا مستغرب والله

وبعدين ارفض تماماً اتهام الشباب السعودي كله بالشهوانية والسعار الجنسي ....... هو في إيه ؟

وليه التعميم ده ؟

غلط طبعاً

ولو قادت المرأة السيارة وتم وضع قوانين رادعة للتحرش والمعاكسات .. اقسم بالله الكل هايمشي يبص حوالين نفسه ..

كفانا يا سادة خلطاً للعادة .. مع العبادة

[MZohairy]

شوفوا

لو طلعت الفتوى تقول لأ لأن ده يتعارض مع عادتنا وطبيعة شعبنا

هاقول لك كلامك على راسي من فوق وعندك حق وسمعاً وطاعة لأولي الأمر

لكن تقولي قيادة المرأة حرام شرعاً

يبقى لأ وألف لأ وهاقول لك هات لي الدليل من القرآن والسنة

برافو عليك يا سين سين

في رأيي ان هذه الفتوى مناسبة للمكان

و قد لا تكون خاطئة

لكن لا يجوز تعميمها على المسلمين في كل بقاع العالم

و هناك أدلة كثيره على فتاوى تتغير بتغر المكان و الزمان

[عاشق الترحال]

يبقى لأ وألف لأ وهاقول لك هات لي الدليل من القرآن والسنة

من فضلك وبسعة صدرك المعهوده يا سين سين تقرأ الفتوى دي وفيها دليل من الكتاب والسنه

http://www.saaid.net/female/f13.htm

http://www.saaid.net/female/f14.htm

وعلى فكره أنا عاوز أوضح نقطه لناس كتير ممكن تفكر أني متشدد أو متعصب لا والله أنا يمكن أقل من أقل واحد فيكم إلتزام وشاب عادي جدا بكل ما تحمله معنى كلمة شاب ولكن اللي بيغيظني ويضايقني وأتحمق له أني ألاقي ناس دائما بتهاجم جماعه السنه مع أن كل كلمه بيقولوها بدليل قال الله وقال الرسول في حين أن زعماء الليبراليه والعلمانيه والملحديين وغيرهم لا أحد يتعرض لهم .

ولا أنت شايف ايه ؟

[doha]

ايه يا جماعه انتو أخذتوا الموضوع قفش ليه ... أنا قلت فين إني بأضحك على "الأدلة الشرعية" ... أنا بس باضحك على شكل العربية اللي مختارينها ... حد لسه بيركب عربيات زي دي :blink:

بس برضه يا أخت ضحى ما قلتيلناش رأيك في "الأدلة الشرعية" الوارده في اللينك ... حضرتك مقتنعه بصحتها ووجاهتها ... يمكن شفتي فيها حاجه ما حدش فينا شافها ... أنا بصراحه لم أجد فيها دليل صريح بيقول قيادة المرأة للسيارة حرام ... أفيدينا أفادكم الله.

ومين قالك اني دخلت اللينك اساسا عشان يبقى لي راي فيه من عدمه !!

معليش يااستاذ احمد لو يمكن يزعلك كلامي بس صدقني وقتي عندي اغلى من اني اضيعه زي ماحضرتك عملت وادخل لينك عارفه مسبقا الي فيه ..

من البدايه ورايي واضح في القضية وهي انها اولا شأن داخلي باصحابها احنا كمصريين ملناش علاقه بيه .. وثانيا اني مؤخرا اصبحت اميل لمنع المراه من القياده على اساس ان المجتمع هنا مش هيتقبل الست الي تعمل كده وهيصنفها تصنيف ( مش هو ) ممكن يخليها تقع في محظور من الي الشيوخ ( الي مش عاجبينك )بيحذروا منه من ساعتها ..

تفتكر حضرتك رايي ده كونته امتى لو مكنتش سبق واطلعت على فتاوى من بتاعت قياده المراة وعرفت انها مبنية على خصوصية المجتمع اكثر من اعتمادها على اساس شرعي من ان القياده اجمالا حرام ؟

الى انا بستغرب له هل حضرتك مكنتش تعرف محتويات الرابط وبناء عليه دخلت ولا كنت داخل فعلا تشوف القياده حلال ولا حرام على اساس انك بتفكر تبطل سواقه ؟ اوعى تقولي انك كنت داخل ( تقيم ) الفتوى والي افتاها .. ازعل اوي .. مظنش حد بعقل وحكمة حضرتك ممكن يعمل شيء زي كده . انت اكيد كنت داخل من باب الفضول ..

[znaty]

في ايه يا اخوانا ..صلوا عالنبي :blink:

هما منعوا سواقة الستات في مصر والا ايه ؟؟

طب واحنا مالنا :blink:

يا اخواني

فيه فتاوي خاصة بالمكان اللي هيا فيه ولا يجوز انها تطبق خارجها ..دة اسمه فقة المكان او الظرف

ومعظم فتاواي الشيخ عبد العزيز بن باز رحمه الله لا يجوز انها تطبق في مصر مثلا او غيرها ..دة بالاضافة ان عبد العزيز بن باز بشر ..يخطئ ويصيب ..يؤخذ منه ويرد عادي يعني ماهوش منزه والا نبي..والامام الشافعي رحمه الله نفسه اقر هذا المبدا ..وقال ان كل ما افتيت به مصر لو ذهبت للعراق لعدلته

فكرتوني بالمظاهرة اللي عملوها الستات في السعودية علشان يسوقوا ايام الملك فهد ..راحوا قبضوا على رجالتهم :sad: :110:

يا اخوانا ماينفعش الستات تسوق في السعودية فعلا لان طباع اهلها وشبابها.. اللي يعرفهم هايتخيل مقدار المفسدة والمصيبة اللي هاتحصل في البلد دي لو خلو الستات تسوق..

اما بصفة عامة ..ومن وجهة نظري ..عايز اعرف ايه الحرام في كدة ؟؟

موش كانت المراة بتركب دابة زمان ايام النبي صلي الله علية وسلم علشان تروح مكان يعني والا ايه ؟؟

قريت فتوة بن باز ..لقيته بيقول خلوة محرمة ..هيا فين الخلوة دي ؟؟دي سايقة لواحدها ..وبعدين كدة احسن والا تجيب سواق وهيا لوحدها في العربية ؟؟ اهي هيا دي الخلوة بجد

ولقيته بيقول سفور ؟؟سفور ليه ؟؟ماهي تلبس حجابها او نقابها وعادي يعني ايه المشكلة ؟؟هيا سايقة اوضة نوم والا عربية ؟؟

معلش يا اخوانا ..كل انسان يؤخذ منه ويرد ..وكل بلد ليها ظروفها ..لكن لما تحرم ..تجيبلي دليل قطعي نصي او على الاقل قياس ..موش راي بشر مهما كان الا نبينا صلي الله عليه وسلم

الا اذا اجمع العلماء ..في الحالة دي ينطبق على المسالة حديث الرسول صلي الله عليه وسلم ..ما اجتمعت امتي على باطل

غير كدة احنا نروح القسم ..وكل واحد ياخد حقه هناك

[أبو محمد]

سيغلق الموضوع ... وسينظر فى إبقائه مغلقا أو تنقيته من المداخلات التى لا علاقة لها بالموضوع ..

وجارى التداول بشأن ما لوحظ من تعمد وإصرار على المخالفات وخصوصا الإصرار على تغيير مسارات المواضيع

فريق الإشراف والتنسيق