ما طلعناش كاس العالم بمزاجنا ....

[Scorpion]

والله ياجماعه انا دمى محروق عارفين ليه ؟؟

مش قادر أصدق اننا مطلعناش كأس العالم ... ماحنا بنكسب الفرق اللى بتطلع كاس العلم بالتلاتات والأربعات ...

والفرقه اللى طلعتنا بتتغلب بالتلاته من اضعف فرق افريقيا ... هوا فيه ايه بالظبط ..

صبرنا يارب ونسينا كاس العالم ... ويارب نكملها على خير ونكسب البطوله

ده كان سؤال Mr. President اللي يستعجب بيه زي ما كلنا بنستعجب فعلآ ...

و لكن ان عرف السبب بطل العجب ....

و السبب تلاقوه في الحوار اللي جاي و اللي كان من كام سنة و كان الوضع صورة طبق الأصل برضه من حالتنا دلوقتي :

سكوب : والله واحشنا اوي اوي يا متر .. ما ترجع بقي .. انت مازهقتش من الأجازة ...

عصام : انت بتكلم مين يا سكوب ... ما هو مشي ...

سكوب : بكلم نفسي ... بكلم نفسي يا خويا ... ايه حتي ديه ممنوعة كمان ...

عصام : اتكلم يا خويا براحتك .. حد منعك .. قهوة مجانين ... هو انا حلاقيها منك و الا من سي السيد ...

سي السيد : مالكش دعوة بيا يا عصام ... انا عفاريت الدنيا بتتنطط قدام عيني النهارده ... اللهي اشوف فيكم يوم يا غجر ...

أبن مصر : دول بقي مين اللي عايز تشوف فيهم يوم ...

سي السيد : بتوع الزفت ... المنتخب ... 2 صفر يا عالم .. و من ساحل عضم الجمل ...

ابن مصر : ما هي خلاص أتحلت... انا سمعت انهم حيجيبوا مدرب المانيا علشان نوصل لكاس العالم اللي بعد اللي جاي ...

سي السيد : و ده ناوي علي ايه انشاءالله ...

ابن مصر : ناوي يلف الأقاليم و النجوع .. و ينقي ولاد صغيرين يطوعهم و يبنيهم علي أصله .. من تغذية و تدريب .. و كل الحاجات ديه يعني ...

سي السيد : ايه ده .. مجنون ده و الا بيستعبط ... هو مش فاهم انه بكده احتمال نوصل لكاس العالم ....

ابن مصر : أحتمال ؟ ده قالها بعضمة لسانه ... حوصل بمصر لكاس العالم يعني حوصل بيها ...

سي السيد : هو فاكر نفسه مين ... ينط علينا بالبراشوت من اوربا .. و يشيل و يحط .. و انا حعمل و اسوي ... مين اللي طلب منه الكلام د ؟.. يعني لو احنا عايزين نوصل لكاس العالم كنا حنستناه سعادته ييجي ياخد بايدينا .. كأننا يا أخويا ما نعرفش نوصل لوحدينا ... يعني بعد 15 سنة من لعب مشرف في التصفيات و عمرنا ما وصلنا لكاس العالم ... ييجي البيه دلوقتي و عايزنا نعملها .. ليه .. علشان نلعب مع البرازيل ... الأرجنتين ... أيطاليا ؟ لو هما عايزين ييجوا هما عندنا نلاعبهم ...

ابن مصر ( بخجل ) : ما هو انت عارف ان ده شرف يا سي السيد .. و العالم ديه عمرنا ما حنشوفها بتلعب معانا لله في لله يعني ...

سي السيد ( بغضب ) : يعني عايزنا نعمل ايه .. نكسب التصفيات و نروح احنا نلاعبهم ؟

ابن مصر : هي مرة واحدة يا سي السيد .. نطلع مرة في كاس العالم .. نشوف معمولة ازاي .. و بعدين نبقي نرجع تاني ... يعني حاجة كده مشرفة ممكن بعديها نضمها للCV ... اهي ممكن تنفع في المستقبل ..

سي السيد : والله انت طيب يا ابن مصر .. انت يا ابني ما تتخيلش المصايب اللي ممكن تحصل لو طلعنا كاس العالم ...

ابن مصر : مصايب ... نوصل لكاس العالم و تبقي مصيبة ؟ انت بتخرف يالاه..

سي السيد : يا ابن مصر افهم .. لازم تعرف ان الشعب المصري متبرمج و مستسلم تمامآ ل "وضع الأمل" ...

ابن مصر : مين ديه اللي وضعت بت اسمها أمل ... و المصريين استسلموا ليها ...

سي السيد : يووووووووووه .. انا مش ناقصك يا خويا .. كفاية واحد بس في الشلة .. ما تبقوش اتنين ... افهمني يا ابن مصر .. الأمل .. كلنا عايشين بس في الأمل .. الأمل ان كله حيتغير للأحسن ... العيشة .. الصحة ... العدل .. الشغل ... الضمير ... و نفس الفكرة مع الكورة .. كل مرة نفضل نلعب و الناس يبقي عندها أمل اننا حنكسب و حنوصل لكاس العالم .. و علي الآخر خالص .. نخسر و نبتدي من جديد ... لو كسبنا مرة الناس حتاخد علي طعم المكسب و حتبص عالحاجات التانية ... فهمت ...

سكوب: انا ما فهمتش ....

سي السيد : حد كان سألك يا زفت ... انا بسأل أبن مصر ...

سكوب : طيب .. ابقوا افهموا براحتكم ... انا حروح اشتري المغات علشان أم أمل لما تبقي تقوم بالسلامة بقي ...

عصام : موت يا حمار...

من موضوع "قهوة المحاورات"

http://www.egyptiantalks.org/invb/index.ph...c=14311&hl=

[عصام]

:happy:

[Scorpion]

:lol:

السيد الفاضل عصام ذا جريت

تنص القاعدة السابعة من قواعد الكتابة بمحاورات المصريين علي عدم إضافة مشاركات لا يقصد الإثراء بها أو الأستفادة وانما فقط لزيادة عدد المشاركات وبالأخص إذا كانت في سياق حوارات جادة. و بما ان هذا موضوع في غاية الجدية و المعيزية ...فايقونة حضرتك دي تقع تحت طائلة القانون .. فيا إما تترجمها بكلمات عربية واضحة صريحة لا لبس بها و لا جدال .. و الا سيتم تطبيق القانون حرفيآ ...

و زي ما حضرتك عارف .. القانون مافيهش زينب .. و مافيش حنفي ...

عقلي الباطن :

أما نشوف حيطلع منها ازاي دي :happy:

[عصام]

تنفع دى؟

7. الإلتزام بعدم تغيير مجري الحوار في الموضوعات او محاولة تشتيت الأفكار التي يناقشها كاتب الموضوع أو تحويل الموضوعات إلي مهاترات شخصية أو إضافة مشاركات لا يقصد الإثراء بها أو الأستفادة وانما فقط لزيادة عدد المشاركات وبالأخص إذا كانت في سياق حوارات جادة.

طيب بلاش ..

إيه رأيك فى دى؟

9. حيث أن طاقم الادارة ليسوا سوى أعضاء متطوعون قبلوا المساهمة فى إدارة المنتدى لذا يرجى الإلتزام بعدم توجيه اي إهانة او إتهام للإدارة تصريحا أو تلميحا .. و في حالة الاعتراض على أى موضوع أو مداخلة فخاصية التقرير عن المخالفات مفتوحة للجميع و تصل مباشرة الي جميع المشرفين .. أما في حالة الاعتراض على أى تدخل أو إجراء إدارى من أحد المشرفين فيمكن استخدام الرسائل الشخصية لمشرف آخر أو للأدفايزور مباشرة .

من غير شنب ... من غير شنب ..

وكله بالقانون

:happy:

[Scorpion]

لأ حريف يا كابتن ..... :happy:

بقول لك ايه ...ما تروح تدرب انت الفريق القومي ... أكيد حياخدوا كاس الأمم المتحدة و مش بعيد تاج الجزيرة كمان ...

:lol:

[عصام]

أنا لو دربت المنتخب ..

أضمن لك ..

السلطانية :happy:

[Tafshan]

بما انى ما كنتش موجود ع القهوه ساعتها .. معلش ح ادى كتف كده بلدى و احشر نفسي في الموضوع ..

لي صديق عزيز عجبنى قوى تعليقه على عدم قدرة المصريين على دخول كأس العالم .. خالونى انقل لكم قال ايه :

" المصريين عاملين زيي ( هو يعنى ) .. ممكن يقرصوا على نفسهم في بطولة افريقيا لأنها قصيره .. ماتشات و بتعدى و تخلص بدري بدرى .. يعنى شوية التزام بالمعسكر و دوره مش عارف ايه و مدرب لياقه .. هوب بقى منتخب .. هوب اخذنا كأس افريقيا .. اما كأس العالم .. فده ماتش كل شهرين ثلاثه .. يعنى عايز التزام لمدة سنه او اكثر .. طبعاً صعب و مش ح يحصل "

بزمتكم مش هو ده السبب ؟؟

ما علينا .. غير الحجر هنا يابنى ..

[president]

والله الواحد كان ظالم الأخوه المشرفين دول .... دا انتوا بجد طلعتوا جامدين جدا جدا فى الكتابه ... لأ صحيح جامدين ...

والواحد كان فاكركم بس مشرفين عشان تخنقونا :lol: ...

سؤال دراماتيكى بقى ... هوا انتوا ليه مابقتوش تكتبوا زى زمان ... مبقاش عندكوا نفس .....

ولا شكلكم عايزين تفضوا عشان تخنقونا :blush2: ...

تحيه جامده اوى للموهبه العاليه wst:: .... ولكل اللى ابدع فى قهوة المحاورات ...

[doha]

بما انى ما كنتش موجود ع القهوه ساعتها .. معلش ح ادى كتف كده بلدى و احشر نفسي في الموضوع ..

لي صديق عزيز عجبنى قوى تعليقه على عدم قدرة المصريين على دخول كأس العالم .. خالونى انقل لكم قال ايه :

" المصريين عاملين زيي ( هو يعنى ) .. ممكن يقرصوا على نفسهم في بطولة افريقيا لأنها قصيره .. ماتشات و بتعدى و تخلص بدري بدرى .. يعنى شوية التزام بالمعسكر و دوره مش عارف ايه و مدرب لياقه .. هوب بقى منتخب .. هوب اخذنا كأس افريقيا .. اما كأس العالم .. فده ماتش كل شهرين ثلاثه .. يعنى عايز التزام لمدة سنه او اكثر .. طبعاً صعب و مش ح يحصل "

بزمتكم مش هو ده السبب ؟؟

ما علينا .. غير الحجر هنا يابنى ..

ولو ان مليش في الكورة بس بما اني مهتمه بدراسة وتحليل ( سيكلوجيات الفشل عند المصريين ) فبقولك بصدق الراي ده .. في الجوووووووون .. لخص وجاب من الآخر

بصراحه المفروض يتبروز ويتعلق على مدخل القهوة ورا ( الكيس ) جنب صورة ( المعلم ) ..

الحجرين على حسابي بالمناسبة ..

[محمد عبدالعزيز]

والله أنا سمعت تعليق على الموضوع ده بس مش فاكر مين اللى قاله ولا فين, كويس إنى فاكر التعليق نفسه.

التعليق بيقول بقى إن السبب هو محاولة الأسياد -اللهم احفظنا- لاستغلال الإنجاز ده لصالحهم عشان يلاقوا وش يحكموا بيه الشعب, ماهم مش عارفين يعملوا أى إنجاز بنفسهم, قالوا أما نسرق إنجاز مش مشكلة يعنى... ماحنا ياما سرقنا ونهبنا.

قوم بقى إيه... العيال بتوع المنتخب اتكهربوا وحسوا بضغط نفسى رهيب عليهم, ممكن أنا شخصياً أفسره بإنهم خافوا, أو بإن عقلهم الباطن رافض سرقة الأسياد دول للإنجاز وعشان كده حالتهم النفساوية كانت زى الزفت لأنهم مايقدروش يمنعوا السرقة, ولذلك خسروا بجدارة.

عموماً يعنى, ياريت مانستعجلش... لأن منتخبنا مشهور باجتياز الصعاب والكعبلة بعد كده فى أول فرقة ضعيفة.

ياريت نستنى ونشوف النهاية شكلها إيه.