المصرية العالمية للطيران

[ينبع]

بسم الله الرحمن الرحيم

السلام عليكم

عايزه ااخذ رأيكم فى السفر على المصرية العالمية للطيران هى مقرها القاهرة فى ميدان التحرير ولازم الحجز من القاهرة

ولها رحلة واحده كل يوم

والجميل فيها بالنسبه لى ان من رحلاتها القاهرة -ينبع يعنى مش انزل جده وبعدين اكمل بالسيارة لينبع

وسمعت ان فيه ناس كتير من اللى بيسافروا جده والمدينه بيسافروا عليها

والوزن عادى 30 ك والاطفال الاكبرمن سنتين تذكرته بنفس ثمن التذكرة للفرد

ده اللى عرفته عنها فيه اى معلومه عندكم عنها او جربتم السفر معها ياريت تقولولى رأيكم؟؟؟؟؟؟؟؟؟؟؟؟؟

[م وليد]

السلام عليكم ورحمه الله وبركاته

انا سعيده جدا ان انا اخيرا تمكنت من المشاركه في هذاالمنتدي الاكثر من رائع وفعلا مفيد جدا جدا وانا الحمدلله استفدت جدا منه هل ممكن استفسر منكم علي موضوع المصريه ده هل ممكن احجز القاهره جده ولا لازم ينبع بس ؟ارجو الافاده ولكم جزيل الشكر

:happy:

[عماد حمدي]

ان شاء الله الأخوه يفيدوكي بالموضوع دا ..

وعاما ً علي ما يردوا عليكي الله أعلم بظروفهم .. ممكن تبحثي علي جوجل ...

تقبلي مروري ,,

عماد

[HDarwish]

ان شاء الله الأخوه يفيدوكي بالموضوع دا ..

وعاما ً علي ما يردوا عليكي الله أعلم بظروفهم .. ممكن تبحثي علي جوجل ...

تقبلي مروري ,,

عماد

طيران زبالة ...

الجزيرة أرحم منه ..

إضطرتني الظروف إني أحجز عليه مرة وقولت بعدها توبة ولو طيران المصرية أو الكويتية أغلى الضعف أو أكثر من الضعف كمان هاحجز عليه ولا إني أحجز على المصرية العالمية دي ..

طيارة صغيرة جداً ... خدمات أي كلام

أولاً : الكل اتخدع في البداية من حكاية الوزن دي وأنا كنت بحسب إن أنا بس اللي حصل في المقلب ده لكن اتضح بعد ما طلعت الطيارة إن الكل حصل معاه نفس الموقف .. في مكتب الطيران قالولنا مسموحلك ب 30 كيلو ووزن وفي إيدك مسموح إلى سبعة كيلو يعني مجموع 37 كيلو .. أنا وزنت قبل ما اطلع من البيت لقيت الوزن معايا 41 أو 42 كيلو .. قولت مش مشكلة ابئا ادفعهم فلوس وخلاص أو أي حد ابن حلال يكون الوزن معاه خفيف وياخد مني شنطة .. المفاجأة بئا يا معلمين عند الميزان إن المسموح بيه هو 20 كيلو بس و في إيدك خمسة كيلو smk: .. من هنا ل هنا قولت ادفع فلوس لحاجات مهمة كنت عايزها وارجع شنطة .. المفاجأة الثانية بئا إن مفيش إمكانية تدفع فلوس على الوزن الزائد خير يا جدعان ازاي الكلام ده؟؟!!! .. قالك أصل الطيارة صغيرة وما ينفش تشيل وزن زيادة .. .. أعرف ناس من كثر الغيظ ولإن مفيش حد في انتظارهم علشان يخلصوا الوزن قاموا فاتحين الشنط الزيادة ومفرغينها قدام الميزان وسايبينها وماشيين ..

آه بيقدموا سندوتشين لانشون وجبنة قديمة وكوباية مايه أو كوباية عصير ما ينفعش الاثنين .. mfb:

الطيارة علشان صغيرة قوي فأقل مطب هوا بيلعب بيها .. مطب منهم لعب بنا قلنا خلاص الطيارة بتقع والناس بدأت حالة الهلع عندهم .. والحمد لله عدت على خير ..

نصيحتي .. بلاش الطيران ده بالذات .. لو مفيش غيره .. إطلع بري أرحم لك واحسن

تمنياتي بالوصول بالسلامة

[Diab]

ان شاء الله الأخوه يفيدوكي بالموضوع دا ..

وعاما ً علي ما يردوا عليكي الله أعلم بظروفهم .. ممكن تبحثي علي جوجل ...

تقبلي مروري ,,

عماد

طيران زبالة ...

آه بيقدموا سندوتشين لانشون وجبنة قديمة وكوباية مايه أو كوباية عصير ما ينفعش الاثنين ..

تمنياتي بالوصول بالسلامة

مفيش عندهم طبيخ

[عماد حمدي]

دا مش أنا اللي كنت بسأل دا (( ينبع )) ....

عاما ً انا سرحت مع قصتك دي وتخيلتها ... أنا جربت المصرية للطيران والخطوط السعودية .. بصراحة الخطوط السعودية دي حاجة روعة بجد حاجة شياكة اخر حاجة ونظام ونظافة ووجبات محترمة فراخ او لحمة وجبن وعيش وسلاطات وعصير ومية وشاي او قهوه والجرايد وووو ..

المصرية للطيران أفتكر انها كانت في حجم علبة الزبادي ... :sofa:

يالا اهو كلة بيطير في الهوا هههههههه ..

رحلة سعيدة للجميع ..

[أحمد سيف]

يا جماعه ما ينفعش نقارن المصرية العالمية للطيران بمصر للطيران أو بالكويتية أو بالخطوط السعودية ... دي شركة طيران اقتصادي زيها زي العربية والجزيرة وسما وناس والوطنية وطيران البحرين وفلاي دبي

المبدأ الذي تعمل وفقه هذه الشركات هو تقديم الحد الأدنى من الخدمات واستخدام المطارات الصغيرة لتستطيع تخفيض سعر تذاكرها الى نصف سعر التذاكر العادية أو أقل ... وهي بذلك تستهدف فية معينة تهتم بالتوفير أكثر من الرفاهية.

كنت فتحت منذ فترة موضوع بعنوان (لماذا لا تكون لدينا شركة طيران اقتصادي مصرية) ... وجاءت إجابة أحد الأعضاء الأفاضل على سؤالي أنه لدينا بالفعل شركة هي المصرية العالمية للطيران

أتمنى أن نمنح الشركة الوليدة فرصة قبل الحكم عليها بأنها فاشلة ... في النهاية هي شركة مصرية تشغل مصريين وتدفع ضرائب للخزانة المصرية ومن مصلحتنا نجاحها واستمرارها

[Diab]

أتمنى أن نمنح الشركة الوليدة فرصة قبل الحكم عليها بأنها فاشلة ... في النهاية هي شركة مصرية تشغل مصريين وتدفع ضرائب للخزانة المصرية ومن مصلحتنا نجاحها واستمرارها

الشركات المحترمة في العالم كله عندها رأس مال تعمل بنية تحتية الأول وبعدين تبدأ تقدم خدماتها للناس مع مغريات مثل عروض للتوفير

وبعد مدة محسوبة تبدأ تغطي رأس المال المدفوع ثم تبدأ في جني الأرباح

في مصر العكس بتتبع مثل ( من دقنه وأفتله) يعني ناخد الفلوس الأول وبعدين نشوف نطور الأداء شوية لا لأ

زي موبينيل ما عملت وزي اغلب الشركات العقارية في مصر

عشان كدة الشركات دي بتفشل لانها ممكن تفاجيء بأرتفاع الأسعار او اي من التغيرات العالمية

تم تعديل 14 يناير 2010 بواسطة Diab

[ينبع]

السلام عليكم

ايه يا جماعه الاحباطات دى دا خلاص زوجى حجزلى انا والاولاد ادعولنا

بالمناسبه الوزن 20 كيلو عند الخروج من مصر و30 عند العودة لها ده اللى زوجى قاله لى وبعتلى التذاكر على الايميل وان شاءالله انزلها

ادعولنا نوصل بالسلامه لا مطبات الهواء دى رعبتنى

[rewsha]

ربنا معاكي وابقي طمنينا عليكي

وماتنسيش .عاوزين بث مباشر من اول ما تطلعي الطياره

بس بجد بجد ...ما تقلقيش ......

طب انا كنت مسافره من 4 شهور على مصر للطيران .وكانت حتت طياره!!!!! ماعتقدش ان في اسوْ من كده

الكراسي ضيقه جدا ......وشوفنالنا كام مطب هواء كده .....انما ايه ....تحسي انه مطب صناعي واللي عامله واحد مش حريف

كمان ساعة الهبوط كنا حاسين ان الطياره بتقع مش بتعمل هبوط

وحصل شوية قلق بين الركاب وبداءنا نبص لبعضينا .وكمان بنتي الصغيره بدئت تعيط وكانت خايفه الطياره تكون بتقع

بس الحمد لله (اديني عمر وارميني في البحر)كان لينا نصيب نوصل بالسلامه

عقبال ما نتطمن عليك لما توصلي انت كمان

وعلشان كده قررنا اننا نسافر النسه دي على الطيران السعودي .

انا كنت باحكي لك علشان تتطمني ان مش شرط تكوني على العالميه المصريه علشان تشوفي مطبات الهواء شكلها ايه؟

تم تعديل 15 يناير 2010 بواسطة rewsha

[عماد حمدي]

ههههههههههههههههه

فكرتوني بفيلم فول الصين العظيم بتاع محمد هنيدي لما كان مسافر الصين وكان في المطار ولقي واحد متشائم أوي من الطيرات وبيقرا عن حوادث الطيران

ربنا يوصلك بالسلامة يارب وياجماعة محدش يقلقها دول كلها 6 او 7 مطبات كدة بعد الكيلو 72 .

لا تقلقي دلوقتي العلم تتطور فية برشوتات وعوامات

[أحمد سيف]

صدق من قال: زمار الحي لا يطرب ... خلاص بقت كل شركات الطيران المصرية "كخه" وبقى الحل هو الشركات السعودية الرهيبة اللي بيأكلوا الناس فيها لحمه وفراخ وجبنه وعيش وسلطات وعصير ... وبعدين الناس بتزعل لما نحكي عن الانبهار بالثقافة الجديدة والانسلاخ عن الهوية المصرية (الله يصبحك بالخير يا ابن سينا).

شركات الطيران السعودية بالذات لا تقارن بالشركات الخليجية الممتازة مثل القطرية الاتحاد والإمارات ... وتصنيف الطيران السعودي هو في مستوى مصر للطيران من حيث جودة الخدمات ... وآدي الدليل

http://www.airlinequality.com/StarRanking/3star.htm

أما لو أردنا تقييم شركات الطيران الاقتصادية السعودية فحدث ولا حرج ... آخر مره حجزت فيها على (ناس) وصلني SMS قبل الرحلة ب 10 ساعات تقريبا لإبلاغي أن الرحلة قد الغيت ... الجماعه ما كلفوش خاطرهم يكلموني في التليفون يعتذروا ... وطبعا علشان أرجع فلوس اضطريت إني اقف في طابور طويل في مطار الرياض مع مسافرين حصل معاهم الشئ نفسه ... أما شركة سما فغلطت مره وحجزت عليها بين الرياض والدمام والرحلة اتأخرت 12 ساعه وطبعا كل ما كنا نسأل كانوا بيقولوا توقعوا النداء على المسافرين في أي لحظه ... رغم إنهم لو أخبروني منذ البداية كنت هاطلب سياره توصلني في 3 ساعات. من يومها حرمت أتعامل مع هتين الشركتين وأصبح كل سفري الاقتصادي على طيران البحرين أو العربية.

مرة ثانيه ... يا ريت ندّي الشركة الجديدة فرصة ولا نرفضها لمجرد أنها شركة مصرية ... في النهاية من مصلحتنا جميعا نجاحها.

[herohero]

بصراحه الخطوط السعودية عادية ماشوفتش فرق بينها وبين المصرية المهم رايحه فين

يعني السعودية اللي رايحه دبي غير السعودية اللي راجعة من دبي وده لاحظتها وكذلك مصر الطيران اللي رايحه نيويورك غير اللي رايحه الرياض ومحدش يزعل مني بس انا سمعتها لان طبيعة الناس الراكبة بتختلف طبعا القطرية والامارات مفيش مقارنة

انا ركبت الكويتيه والسعودية والمصرية بصراحه زي بعض يمكن الاردنية احلى منهم اما القطرية والاماراتيه فلا مجال للمقارنة اصلا

انا ركبت زمان وانا صغير ركبت حاجه اسمها زاس المصرية للطيران بصراحه شركة كارثة هي قفلت طبعا الناس اللي زمان اكيد سمعوا عنها

[عماد حمدي]

يالهوي علي الهجوم الشرس :blink:

أنا أصلا مجربتش غير طيارتين في رحلتين في سفرتين طول عمري مصر للطيران والخطوط السعودية ولن أتطرق الي الشركة الجديدة ابدا ً

دا الواحد يروحها مشي بعد كدة بقا ياهيرو .. وبعدين :lol: الفراخ واللحمة دول هههههههههه :) مش بيتاكلو زي مسرحية المتزوجون بالظبط :wub: wst::

بس اهو فيه حاجة مختلفة عن المصرية للطيران وبالذات المواعيد ... ودي تجربتي الشخصية :lol:

[herohero]

بس اهو فيه حاجة مختلفة عن المصرية للطيران وبالذات المواعيد ... ودي تجربتي الشخصية :blink:

ماقولنا مصر الطيران بتعتمد هي رايحه فين وفي اي موسم يعني مصر الطيران في موسم عودة المدرسين اي كلام وكمان بصراحه خطوط مصر الطيران للخليج مش هي ذات الاولوية لان اللي هيركبوها مصريين من اللي شغالين ف الخليج ودول تصنيفهم في مصر الطيران رقم 2 اما المصريين رقم 1 فهم الخطوط بتاعت امريكا واوربا

فمصر الطيران لها حسابات اخرى

[عماد حمدي]

ههههههههههه والله عسل يا هيرو ياعم بقولك هما رحلتين عميّ اللي ركبتهم طول حياتي ... وبلاش اقولك حصلي اية لما ركبتها أول مرة

ياخي علي الطلاق معنت راكب طيارات هههههههههههههههه

تم تعديل 15 يناير 2010 بواسطة EMAD HAMDY

[ينبع]

السلام عليكم

والله اختى rewsha انا جربت مصر للطيران وكانت اسوأ رحلة اللى كنا راجعين فيها على مطارالنزهة بالاسكندريه الطيارة طلعت بعد ميعادها ب 2 ساعة او ساعه ونصف وكانت طيارة صغيرة ومش عايزة احكى الباقى

ولكن اللى كنت بذهب عليها كانت بتبقى كويسه بس مش زى الطائرات الى بنتفرج عليها

بالنسبه للمطبات والهبوط ده بيعتمد على الطيار نفسه الكابتن

انا خايفه من الوزن لان اخ هنا قال انه مينفعش حتى ادفع وزن زائد

الحمد لله مصرللطيران كانت بتعدى اى حاجه لانى كنت دائما بسافر فى اوقات بتكون الطائره فاضيه

انا مجربتش الخطوط السعودية المهم اننا نوصل بالسلامه

(بس بجد انتم بتبقوا خايفين وانتم فى الطيارة زيى ولا انا اللى عندى رعب)

[rewsha]

خلاص يا ينبع اللي حصل حصل

مش حجزتي خلاص وهاتسافري على المصريه العالميه دي ...يبقى ما تشغليش بالك وتفاْلي خير ان شاء الله

ما تقعديش تفكري كتير

بس امانه عليكي اول ما توصلي بالسلامه تطمنينا :rolleyes:

[doha]

السلام عليكم

انا مجربتش الخطوط السعودية المهم اننا نوصل بالسلامه

(بس بجد انتم بتبقوا خايفين وانتم فى الطيارة زيى ولا انا اللى عندى رعب)

بصي ياستي .. عن نفسي ركبت الطائرة اول مرة في حياتي وعمري ثلاث سنوات ومن وقتها ليومنا هذا تقريبا بركبها مرتين سنويا .. يعني تقدري تقولي اني ( تخضرمت ) في الطائرات لما شبعت ..

آخر مرة سافرت فيها من كام شهر وكنا على الخطوط السعودية ..

للامانة مستوى الخدمه معقول يعني ميختلفش كتير عن زمان .. بس للامانة برضه الطيارة كان وضعها سيء يعني كنت حاسه اننا راكبين اوتوبيس ده غير انها تاخرت كتييييير على مااذكر ثلاث ساعات تاخير !!

للامانة اكتر واكتر انا كنت دافعه في التذكرة 1500 ريال رايح جاي لان كانت فترة ميته من السنة مش موسم فبصراحة ومقارنة بالمبلغ وهو تقريبا نص سعر التذكرة الاصلي فالخدمه كانت ممتازه جدا والطائرة اكثر من رائعه ..

بالنسبة لسؤالك عن الخوف فمكدبش عليكي .. آخر مرة حسيت بشيء من الخوف .. برضه اذكر مرة من يجي عشر سنين كده وكنت مسافرة مع اخويه الصغير كان عمره وقتها يمكن سبع سنين تقريبا .. فاكره اني يومها خفت اوي .. وبقيت مستغربة انا خايفه ليه هل لاني مسؤوله عنه فخوفي عليه خلاني اخاف من الوضع اجمالا ولا فعلا الطيارة كانت تخوف .. مش عارفه.

على كل حال ركوب الطائرات ميخوفش ومش مهم الخدمه السيئة ولا الاكل ولا الشرب هي كلها ساعتين ينقضوا بالطول ولا بالعرض

متنسينيش انتي بس من دعائك وانتي مسافرة اصل بيقولوا دعاء المسافر مستجاب ..

:rolleyes:

[kitkat]

السلام عليكم ورحمة الله وبركاته

انا جربت المصرية يونيفرسال رحلة القصيم-القاهرة وراجع عليها ان شاء الله

دفعت 500 ريال التذكرة والحق يقال ان الخدمة ممتازة بالنسبة للمبلغ وطاقم الضيافة أفضل منه في مصر للطيران

ان شاء الله ارجع عن طريقهم بس الموقع بتاعهم يشتغل علشان احجز عالنت

وشكرا

نقاط شراء التذاكر في أنحاء المملكة

جوال هاتف المدينة

0558756684 6484210 جـــدة

0540785522 6478566

0508967244 5420625 مكة المكرمة

0541591513

0541696741 3225217 ينبع

3904649

0509312718 3825559 أملج

0509634748 4221885 رابغ

076226242 بيشة

2204250 خميس مشيط

5221330 نجران

0505278052 الرياض