الزوجة المغتربة ...كائن منتج أم مستهلك أم ماذا ؟

[pocy]

شوفي يا بوسي الاول اهلا بيكي

ثانيا البطاطين دي حكاية والله كل المسافرين من هنا عمرة حج عادي شايل بطانية

هنا الاسباني والصيني وال...

المهم تشوفي انت الفرق في الخامات والسعر

وبطاطين الاطفال كمان اللي عليها رسومات ميكي ووالت ديزني عموما

الألحفة بقى دي كُبة بجد ..السنة اللي فاتت أخدت مصر لحماتي واحده وكانت آآآآآآآآآآآآآد كده

ولولا ربنا كرمنا وكان مش معانا وزن كنا اتبهدلنا حطيناها مع الشنط بكيسها

عامة في دلوقتي الحفه حلوة ورقيقة الحجم رفيعة يعني دي تحفة عندي منها اتنين بس ايه

لقيت اسعارها في مصر فارقة وتستاهل الصراحة انها تتجاب من هنا

لقيتها في المعرض الصيني ب250 جنيه 3 قطع

وهي عندنا هنا 5 قطع ب 130 ريال

وغيره مفارش سرير وكله

اي خدمة

سبحان الله اسم على مسمى بركه وانتى كلك بركه

وبجد ميرسي جدا على ردك الكريم

انا فعلا لقيت ان في فرق بين الاسعار يعنى اللى هنا ب130 جنيه لقيتها هناك ب300 جنيه

اما الكورى ال5 كيلو وحفرها بارز لقيتها هناك ب 500 وهنا ب260 فتخيلي الفرق الضعف تقريبا

بس انا اللى خايفه منه الشحن لو شحنتها من هنا هتبقي بكام ؟؟؟ لان مأكد مصاريف الشحن هيزيد على تمن البطانيه ولو الواحد بعت لمصر عدد معين وليكن 5 مثلا هل فى الشحن هتفرق وممكن تتجمرك ولو هتتجمرك يا تري جمركها بكام انا عندى اللى ممكن يبعهالى هناك بس الشحن والحاجات دى للاسف مش عندى خبره فياريت اللى عندها خبره تقلنا ويمكن تكون فتحه خير علينا ولا ايه؟؟؟؟؟؟؟؟؟؟؟؟؟؟؟؟؟؟؟؟

وبجد بجد شكرا لفتحك الموضوع ومنتظرين بقيه الافكار

[بركة]

فيه كمان حاجة افتكرتها

حاجات الديكور يابنات زي شغل الفرفورجية هنا رخيص موت

لقيت ناس في مصر بيشتروا الحاجة ب 100 جنية وهي هنا تيجي ب20 جنية مثلا

بعد تحويلها جنية ..فممكن تبقى حاجات زي كده جميلة وتتعرض على النت صور و يتطلب عليها

كمان والحاجات اليدوية اللي من الخوص او القش هنا سعرها مش معقول

والحاجات اللي موضة دلوقتي من الخشب فازات واباجورات وعلب مناديل

وستاير البانيو ..

فينك يادهبية ها يللا اقترحي علينا جيبنالك شوية حاجات حلوة أهو.. :)

تم تعديل 19 يناير 2010 بواسطة بركة

[عفاف سالم]

008000"]إزيك يا بركة فينك من زماااااااان أفتقدناكي جدا أنا لما لاقيت موضوع ليكي قلت ادخل اسلم عليكي وبحيكي على مواضيعك وما عنديش أفكار ، بس ممكن الواحدة تشتغل دوام جزئي يعني 4 ساعات في اليوم وبالطريقة دي تقدر تاخد بالها من بيتها وتستفيد من وقت الفراغ في عمل مفيد . اما الستات اللي ربنا أنعم عليهم بأي موهبة سواء طبخ رسم اعمال يدوية فدول يا بختهم مش حيغلبوا ممكن يبدأوا نشاط من البيت وتشارك في المعارض المنزلية وطبعا ده يطلب انك تكوني صاحبة علاقات اجتماعية واسعة وكمان ممكن تعرض خدماتها دي على اي محل قريب منها مثلا حلواني او محلات لبيع الهدايا والتذكارات . محلات كتير بترحب وخصوصا لما تكون الحاجة متميزة.

[بركة]

ألف شكر يا عفاف على التشريف

وشكرا على النصائح ...ياريت نجدد هوايات زمان فعلا وكل اللي ربنا كرمها بهواية

تحاول ..قولتلكم قبل كده صديقة ليا دلوقتي بقت محترفة كروشية بالطلب وكله على النت

وسمعتها في المملكة زي الألماظ ..ماشاء الله اللهم بارك.. :)

[اغابي]

الزوجة المغتربة ...كائن منتج أم مستهلك أم ماذا ؟

كائن مستهلك!

المرأه بوجه عام كائن منتج

تم تعديل 6 أبريل 2010 بواسطة اغابي

[اغابي]

شوفى يا بركة اولا موضوعك جميل وبيناقش امور كتير

المرأة العاملة فى الغربة مسكينة جدا لانها موظفة فى الشغل ومدرسة وام فى البيت مع اولادها فا نفيش مجال للوقت لكن لو هى عندها وقت تحاول تستغله

وكان لينا مناقشة فى الموضوع ده مع بوسي -

لكن انا هنا باقترح فكرة جديدة جدا - لما نزلت مصر اجازة لاقيت ابن خالتى فاتح بوتيك شيك جدا لاكسسوارات الحريمي فقط - ايجاره 3 الاف جنيه فى الشهر وبتشتغل معاه انسة شاطره وزوق مع الزباين - المهم البوتيك زحمة جدا - وشغال تمام- ربنا يزيده - وقت ما انا نزلت كان فاتح له شهرين

وبيبيع الاكسسوار العقد - اللى مصنوع من احجار ملونة او صدف البحر او حاجات توك او حاجات كدا باسعار بالنسبة للى عايشين بالكويت بصراحة غاليه بمعنى العقد سعره اقل واحد ب 30 جنية وفيه اكسسوار العقد بيوصل ل 100 جنية - العقد هو هو هنا فى اسواقالكويت ب 100 فلس يعنى ( 2 جنيه ) انا كنت نزلت بحوالى 15 عقد هدايا لاى حد كدا - فقولت له طيب انا ما جبتش هدية للبوتيك بتاعك حاديهملك هدية وفعلا علقتهمله بنفسي كمان وكانو مميزين جدا شكلا وتصميما - وهو براحته يحطلهم سعر - فقالى الواحد حابيعه على 30 جنية مع انى مشترية الواحدب 100فلس ( 2 جنيه ) يعنى مكسب 28 جنيه فى الحبة ممتاز - والاكسسوار اللى 1.5 دينار يعنى 30 جنيه - بيبيعه ب 100 جنيه واحيانا 120 جنية نفس الاكسسوار اللى 1.5 هنا فى الكويت وانا اختى متدبسة ومشترية منه حاجات كدا كتير بدون ما تستأذن منى :happy:

طبعا اللى يعرف يسوق حاجات كده من سيدات المحاورات او رجالها بشكل اوسع كمشروع يعمله وهو طلب منى طبعا انى ابعتله الحاجات دي من الكويت ونعمل بيزنس مع بعض - انا ما قولتلهوش لاء - بس ثابته لان مش محتاجة للموضوع داه حاليا لا عندى وقت ولا دماغ - لكن ما اعرفش بكره يمكن احتاجه - والحكمة بتقول ( لا تغلق باب خلفك لربما تحتاج العودة منه ) .

انا قولت اطرح الفكرة دي يمكن حد يستفيد منها - او يعمل منها كبداية مشروع بسيط - لا جمارك ولا مشاكل وبتعدي بيها جو مصر عادي جدا ومكسبه 1000 × 100

تحياتى يا بركة للموضوع الرائع

:closedeyes:

تم تعديل 6 أبريل 2010 بواسطة اغابي

[بركة]

الاخت العزيزة أغابي

شكرا جزيلا للاضافة القيمة جدا

وشكرا لان الموضوع ده يستحق المحاولة فعلا

انا السنة اللي فاتت كنت اشتريت اسورة لي بريالين والله

نزلت بيها مصر واديتها هدية لقريبتي وكانت فرحانة ومبهورة جدا بيها

فكده انت ربطي الموضوعين ببعض وفعلا شكرا ليكي

[kwala]

السلام عليكم جميعا...طبعا شكر خاص للأخت بركة على الموضوع المميز...جميلة فكرة المشاريع واللي عاجبني اكتر منها كمان فكرة النشاط الإجتماعي

أنا جوزي بيشتغل في مجموعة صيدليات معروفة في المملكة...وفكرت ان زوجات العاملين في هذه المجموعة يعملوا جمعية (مش جمعية فلوس) لإن أكيد مشاكلنا واحدة وحياتنا شبه بعضها فممكن نفهم بعض ونساعد ونطور بعض.

دي كانت مجرد فكرة أنا مش متحمسة ليها بصراحة دلوقتي

لكن الفكرة اللي فعلا نفسي نفعلها اننا نجمع بعض ( يعني اللي عايشين في جدة مثلا) ونتقابل في يوم مكعين في مول نتفق عليه...وكل واحدة تقول هيا تقدر تقدم ايه للمجموعة

(اللي تقدر تدي ندوات في التنمية البشرية, اللي تقدر تدي دروس تجويد ونعمل حلقة قرآن , اللي تقدر تعلم انجليزي أو فرنسي, ممكن نتفق على كتاب معين نقرؤه ونناقشه مع بعض, اللي تقدر تدي ندوات منظمة(مش دردشة عادية) في تربية الأبناء,...وهكذا )

ونتجمع مثلا مرة كل اسبوع أو حتى اسبوعين في مكان نتفق عليه (ويكون مكان مفتوح) منعا لأي مشاكل أو قلق...ونبدأ مع بعض..

ايه رأيكم؟

ون

[صافى]

جزاكم اللة خير على هذة الافكار الرائعة بصراحة كل الافكار جميلة جدا وانا بقالى شهر هنا فى جدة وكنت حاسة بملل كتير لغاية ما لقيت الموضوع دة وشدنى جامد وبفكر فعلا اعمل حاجة من الى سمعتة منكم وخصوصا الاستثمار وان شاء اللة انا هنزل على العيد الصغير وهبدا من اهلى واصدقائى دا طبعا بعد ما اقدم الهدايا

وبنضم للاخت كولا فعلا المغتربات بيبقو محتاجين لبعض قوى بس المشكلة فى الازواج هل يا ترى هيرضو يدونا الفرصة ان نتقابل والا لا

على فكرة انا مدربة تخاطب بس تركت العمل لاجل الاولاد لانى معاهم لوحدى فى مصر وباجى بس فى الاجازة يعنى 4 او 5شهو ر والى لية اى استفسار عن التخاطب او عندة اى مشكلة لابنة او اى حد انا فى الخدمة شفا اللة وعفا امة الاسلام والمسلمين :blink:

[pepoo]

ما شاء الله

موضوع جاااااامد جدا

طيب حد باه فى الرياض عشان نتعرف

[بركة]

شكرا جزيلا على تحفيزكم وارجو ان نتواصل

وفكرة اختنا كوالا حلوة جدا وانا على استعداد لبدأها بإذن الله

[ابو حودة]

الاخت اغابي

تحياتي لو ممكن حضرتك تدينا فكرة اكتر عن الموضوع

يعني مساحة المحل او لو هو في مول ولا لا و

المنطقة راقية ولا عادية وحجم البضائع لاني بفكر افتح حاجة زي كده في مصر

وطبعا مش عارف اجيب المعلومات من اصحابها

[اغابي]

الاخت اغابي

تحياتي لو ممكن حضرتك تدينا فكرة اكتر عن الموضوع

يعني مساحة المحل او لو هو في مول ولا لا و

المنطقة راقية ولا عادية وحجم البضائع لاني بفكر افتح حاجة زي كده في مصر

وطبعا مش عارف اجيب المعلومات من اصحابها

استاذى الفاضل / ابو جودة

هما اولاد خالتى ساكنين فى حدايق القبة ومعاهم عماره لكن المحلات اللى تحت العمارة متقسمة اتنين جوز خالتى ( والدهم ) محل واخوه ( عمهم ) محل لانهم تجار من زمان والمحلات للملابس الحريمى- فاولاد خالتى مفيش محلات ليهم دى تجارة ابوهم وعمهم فاخدو المحلات بره المنطقة .

ابن خالتى ( 25 سنة ) فتح البوتيك فى منطقة اسمها ( عزبة النخل ) لكن اول ما تنزل من المترو مباشرة انا فاكرة حاجة زى كدا

والمحل صغير جدا يمكن عرض متر ونص والطول 4 متر - لكن زحمة جدا جدا كله اكسسوار وتوك وايجاره 3 الاف جنيه شهريا -

هو كل يوم بيجي من حدايق القبة مكان سكنه - لعزبة النخل مكان مشروعه

واخوه الكبير ( 29 سنة ) فانح فى وسط البلد محل نفس الحجم ويمكن اصغر كمان - بس لقطع غيار واكسسوار الموبايلات

وبيروح الصين علطول - يجيب البضاعة للمحلات الاتنين - من هناك بس حكالى ان مكسب

محل وسط البلد لقطع غيار الموبايلات - رهيب - دخلو شهريا فوق ال20 الف جنيه وحلفلى بكدا - ويشتغل عنده 3 شباب

وكمان الزيارة اللى فاتت لى فى مصر - اشتروا شاليه فى الساحل الشمالى تمنه مليون وربع وقالى انه من مكسب المحل

هما بصراحة اولاد خالتى دايما بيقنعونى انا وجوزى اننا نسيب الكويت ونستقر فى مصر وزعلانين جدا علي غربتى علشان كدا كل ما انزل يفضلو - يقنعوا فيا

ويحكولى حبة حاجات كنوع من التحفيز انى استقر فى مصر وما اسافرش الكويت تاني .

بس انا وجوزى مش حنقدر نستقر فى مصر لاننا مش تجار - زيهم هما من زمان ليهم فى التجارة - برضوه السوق عاوز ناس شاطرة وخبرة انا وجوزى ما لناش فى التجارة

فلو حضرتك شايف انك تقدر على السوق ودى اهم ميزة- ابتدى خطط لمشروع ولو بسيط واهم نصايح ادوهالى انى اراعى لقمة عيشي

والتعامل مع الزباين يكون بمستوى راقى جدا وازاى اكسب الزبون ومتغفلش عينك عن مشروعك ابدا - دى اهم نصايح قالوهالى

وخلى بالك يا ابو جودة - دايما المشاريع اللى فى الاماكن الشعبية والزحمة بتجيب فلوس وربح اكبر انا لاحظت كدا فعلا

تحياتى استاذى واتمنى اكون افدت حضرتك بالمعلومات دي

اغابي

تم تعديل 24 مايو 2010 بواسطة اغابي

[ابو حودة]

شكرا يا اغابي على سرعة الرد

انا فعلا بافكر في محلات الـ 2.5 جنيه

وربنا يسهل انا معنديش خبرة ببمارسة التجارة لحساب نفسي

لكن لحساب غيري انا ا شتغلت كتير في المسائل دي بس لحساب

شركات كبيرة ربنا يعمل اللي فيه الخير

[الغريب]

للرفع

الزوجة المغتربة ...كائن منتج أم مستهلك أم ماذا ؟

المرأة كائن منتج على الدوام ،

الإنتاج لايعني المادة فقط ،

إنتاج المرأة يعني أولاد متربيين ، أولاد مفيدين لمجتمعهم ، زوج مركز في عمله ويستطيع إفادة مجتمعه ، أسرة طيبة تمثل نواة لمجتمع صحيح..

بل على العكس المرأة أهم كائن منتج في المجتمع لأنها تنتج العنصر البشري..

أما الأخت الفالة ضحى ، فهذه المرة أختلف معكي..

أحنا أتربينا صح مش غلط ، بس تنفيذنا هو اللي غلط

أين المرأة التي تضع خطط لتربية الأبناء.

أين المرأة التي تربي أبنائها على النظام.

أين المرأة التي تركز مع سلوك أبنائها بنسبة 100 % ، وتستثمر في تربيتهم.

سامحوني يا جماعة أنا شايف معظم الآراء هنا بتستهين بدور المرأة في بيتها وبتعتبره سلق بيض ممكن ينتهى سريعا ، وتصير من بعده المرأة شاعرة بالملل..

الأم مدرسة إذا أعددتها .. أعددت شعب طيب الأعراق

مدرسة.. ها ركزوا شوية

:sad: :blink:

تم تعديل 23 يونيو 2010 بواسطة الغريب

[عبير يونس]

الموضوع ده من زمان عايزة أشارك فيه و ماكانش في نصيب

السؤال للزوجة المغتربة و مش لأي زوجة

لأنها اجتماعيا بعيد عن أهلها و أهل زوجها و حتى عن الأصدقاء و المعارف

فهي تعتبر شبه منعزلة

ده لو كانت بتشتغل

اما لو مبتشتغلش بتبقى منعزلة تماما

و بتبتدي تستقي خبراتها الحياتية من وسائل الإعلام و المنتديات و الصديقات المغتربات مثلها أو من مواطنات البلد الذي تعيش فيه

بيئة صناعية قائمة على الانطباعات الشخصية لكل هؤلاء

فتبدأ بالشعور بالضياع بين الآراء و النصائح المختلفة و التي قد تتضارب في كثير من الأحيان

و تبدأ بالمقارنات بين ما تراه و تسمعه مع ما تعيشه فعلا

بدء من البيت و محتوياته مرورا بظروف المعيشة وحتى تربية الأبناء

لذا أرى أن العمل ضروري جدا و خير وقاية من التقوقع و الانعزال

ده يتم ازاي؟

لنا فيه كلام لاحقا بمشيئة الرحمن