تغطية لأخبار الأحوال الجوية السيئة فى مصر

[محمد عبدالعزيز]

أحوال جوية سيئة تسود مصر هذه الأيام, وأخبار عن سيول وغرق وضحايا.

ياريت كل واحد عنده أخبار عن المناطق المتضررة يبلغنا ونطمئن على بعض كلنا.

[حسام يوسف]

سيول فى اسوان قادمة من البحر الأحمر

والعديد من البيوت فى الجبال أصابها التدمير

ولحد النهاردة العصر أغلب أحياء أسوان كان النور قاطع عنها لمدة 3أيام ولسة جاى من شوية

[عاشق الترحال]

سمعت الصبح فى الأخبار أن سيناء فيها سيول شديده وفيه ناس ماتت وناس مفقوده .

ربنا يسترها ويرحمنا برحمته

[محمد عبدالعزيز]

ربنا يحميكم ويخفف عنكم يا دكتور حسام.

الغريبة إن أخبار السيول دى معروفة من أول الأسبوع وأنا سمعت بنفسى تحذيرات هيئة الأرصاد الجوية منها, ليه مفيش عندنا استعدادات كافية لمواجهتها واحنا عارفين بوقوع الكارثة من قبل ما تحصل؟!!!

تم تعديل 19 يناير 2010 بواسطة محمد عبدالعزيز

[رضوي]

السلام عليكم ورحمة الله وبركاته

الغردقة كمان متبهدلة سيول .......... لسة اصدقائي في الغردقة كلموني وبيوصفوا لي اللي بيحصل ....... عربياتهم غرقت من السيول نتيجة الجبال المرتفعة هناك

غير ان طريق القاهرة الغردقة بايظ خالص لان الجبال علي الجانبين وطبعاً الامطار مغرقة الدنيا

واخطر حاجة سمعتها في الموضوع كان احتمال ان القاهرة والدلتا تواجه مثل تلك السيول في غضون الايام القليلة القادمة .......... ودي طبعاً مصيبة ربنا يستر

[محمد عبدالعزيز]

ضرب سيل جديد مدينة العريش صباح يوم الثلاثاء، وأدى إلى امتلاء مجرى سيل وادي العريش تمامًا بالمياه، وخروج المياه خارج المجرى مدمرة بعض المنازل، استمرارًا لموجة الطقس السيئ التي ضربت مناطق متفرقة من محافظات مصر يوم الاثنين.

يذكر أن مجرى سيل وادي العريش يبلغ عرضه حوالي 1000 متر، ويصب في البحر المتوسط.

وقسم السيل مدينة العريش إلى شطرين.. أحدهما شرقي والآخر غربي، وتعذر على المواطنين العبور من وإلى كل شطر.

ومن ناحية أخرى، حاصرت مياه السيل مستشفى العريش العام، وحبست المرضى والأطباء بداخلها حيث عجزوا عن الخروج، ونشطت جهود الإنقاذ بنقل الرمال إلى مداخل ومخارج المستشفى لإعادة الحركة إليها من جديد.

وترددت أنباء عن فقد المزيد من المواطنين، في حين لجأ الكثيرون إلى الاحتماء بالجبال والمناطق المرتفعة خوفًا من تيارات المياه الجارفة.

ومع ازدياد خطورة الأوضاع، حذرت غرفة عمليات محافظة شمال سيناء من قرب وصول سيل جديد لمدينة العريش أشد خطورة في غضون ساعات قليلة.

يذكر أن الطقس السيئ الذي ضرب محافظات شمال وجنوب سيناء وأسوان والبحر الأحمر تسبب حتى الآن في وفاة 12 شخصًا، وفقد وإصابة وتشريد المئات، حسبما ذكرت وكالة رويترز، مع توقعات بزيادة الضحايا مع استمرار الموجة.

منقول من موقع مصراوى:

مياه السيول تحاصر مستشفى العريش.. وتوقعات بسيل قوي عصر الثلاثاء

يارب ارحمنا برحمتك

[pink rose]

ربنا يستر و تخلص الموجة دي بسرعه

[se_ Elsyed]

قمة العشوائية وقلة أدب المسئولين من أتخن واحد لأتفه واحد فيهم

عمرو أديب في القاهرة اليوم بيسأل عضو مجلس الشعب في جنوب سينا ... مش هيئة الأرصاد حذرت من ايام عن احتمال حدوث عواصف ممطرة تؤدي إلى سيول ؟

قال : حصل

طب ايه التدابير اللي اخدتوها .... ؟

قال : ولا حاجه ...

عمرو : لييييييييييه ؟

لأن كل البيوت اللي غرقت مبنيه في مجاري السيول

يا صلاة النبي ...............

كل البيوت دي أتبنت في غمضة عين وتحت جنح الظلام ؟

بيوت مخفيه عن العين يعني

[حسام يوسف]

قمة العشوائية وقلة أدب المسئولين من أتخن واحد لأتفه واحد فيهم

عمرو أديب في القاهرة اليوم بيسأل عضو مجلس الشعب في جنوب سينا ... مش هيئة الأرصاد حذرت من ايام عن احتمال حدوث عواصف ممطرة تؤدي إلى سيول ؟

قال : حصل

طب ايه التدابير اللي اخدتوها .... ؟

قال : ولا حاجه ...

عمرو : لييييييييييه ؟

لأن كل البيوت اللي غرقت مبنيه في مجاري السيول

يا صلاة النبي ...............

كل البيوت دي أتبنت في غمضة عين وتحت جنح الظلام ؟

بيوت مخفيه عن العين يعني

مش كدة يا عم س س

نفس المشكلة فى اسوان

النجوع أو القري هنا بتتبنى فى حضن الجبل

وبعضها فى طريق مخرات السيول

وطبعا مهما حذرت الأهالى ان بيوتهم مبنية غلط

ولا الهوي

لحد ما الفاس تقع فى الراس

[لولا]

قمة العشوائية وقلة أدب المسئولين من أتخن واحد لأتفه واحد فيهم

عمرو أديب في القاهرة اليوم بيسأل عضو مجلس الشعب في جنوب سينا ... مش هيئة الأرصاد حذرت من ايام عن احتمال حدوث عواصف ممطرة تؤدي إلى سيول ؟

قال : حصل

طب ايه التدابير اللي اخدتوها .... ؟

قال : ولا حاجه ...

عمرو : لييييييييييه ؟

لأن كل البيوت اللي غرقت مبنيه في مجاري السيول

يا صلاة النبي ...............

كل البيوت دي أتبنت في غمضة عين وتحت جنح الظلام ؟

بيوت مخفيه عن العين يعني

تعرف يا سي السيد سؤالك عن هى البيوت دى اتبنت يعنى فى غمضه عين هو فعلا موطن الداء .

ده بالضبط نفس اللى حصل فى سيول جده قبل شهر الأرصاد كانت عارفه ، اطلقت تحذيرات هايفه بدون اى استعدادات مسؤولة

ده فى دوله غنية خلى بالك ، وبعد المصيبه والناس اللى ماتت هناك بأعداد كبيرة والتحقيق اكتشفوا ان الأحياء دى "فقيره على فكره"

مبنيه كلها فى مجارى طبيعيه للسيول ومفروض ان البناء فيها ممنوع اصلا والتصاريح للبناء والأراضى اتم بيعها اصلا من الأول وطلعت عليها

المبانى نتيجة فساد ضمائر لأشخاص مش بتخاف ربنا . ده كله فى السعوديه البلد الغنية .

سؤالك اللى فات ده خلانى بس احاول اتخيل زى ما انت قلت البيوت دى يعنى طلعت واتبنت فى غمضه عين ؟؟؟؟؟؟؟

محدش كان يعرف ان دى مجارى للسيول والبناء هناك خطر خطر خطر وممكن فى يوم ناس تفقد ارواحها هناك ؟؟

ربنا يرحمنا برحمته يارب .

لولا

[se_ Elsyed]

بيوت بيوت

أنا فاكر الاسم ده

فعلاً الناس معندهاش حق

طب خدوا التقيلة

وحد يسمعنا زغروطه

أكد مهندسون استشاريون أن الهوس بالبناء في مخرات السيول ومنطقة مصب وادي العريش هو السبب الرئيسي لغرق المدينة وشطرها إلي قسمين‏,‏ وأوضحوا أن القرية الأوليمبية وعشرات من المحال التجارية أقيمت في موقع مسار السيول قبل وصولها إلي البحر‏

حتت تحليه بقى عشان خاطر بابا ... يالا هم يا جمل

لخص الناجون من كارثة السيول في أسوان مشاعرهم لحظة الكارثة في جملة معبرة رأينا كرات من الثلج تسقط من السماء فأصابنا الهلع‏,‏ وخلال عشر دقائق كانت القرية قد غرقت تماما في المياه‏.

لحد هنا كله تمام

وخلال ساعات تبدل إحساس الرعب بالكثير من الطمأنينة‏,‏ مع زيارة الرئيس مبارك لأسوان وقراراته بتعويض المضارين‏.

شوية ميه يا كفنه ... شوية ميه أبلع الكلام ده ياللي ما تعرفوش ربنا .....

الريس هايزورنا .. يا حلولي

الريس عوضنا .... هلا والله

يا فندم زيارة سعادتك لينا بعد ما بيوتنا أتدمرت وجرفتها السيول الي الهاوية .. هي بمثابة فرش وغطا لينا ..

والشوارع اللي جزمة سعادتك الباتا داست عليها .. تحولت بفضل تلك الدوسة الكريمه إلى طرق حريريه معبده ومفروشة بالزهور

ونظرة سعادتك للمشردين اللي بالالاف .. بعثت فيهم الطمأنينة وعرفتهم إن الدنيا بخير وأن السيول دي نزلت غسلت ذنوبهم ونقتهم من خطاياهم بالثلج والبرد

[se_ Elsyed]

أمس في برنامج " الكورة مع شوبير " تقريباً معظم الحلقة كانت مخصصة لتغطية أخبار السيول في العريش خاصةً

شيء لا يُصدق

السيول أقتلعت الأخضر واليابس في طريقها ..

وبالمناسبة .. مجرى السيل معروف ومن الصور أمبارح كان واضح إنه عارف طريقة من منبع المياه إلى مصبه في البحر المتوسط ...

ومنظر السد وهو يفيض ويكاد يتحطم من ضغط مياه السيل كان منظر مفزع

ناهيك عن قوة تيار الماء ..

لدرجة إن سائق فنطاس مياه غامر بحياته عشان يوصل مياه للمحاصرين من السكان حيث إن العريش أنشطرت تماماً إلى نصفين معزولين .. فما كان من السيل إلا أن حمل الفنطاس كعلبة كبريت وجرفه بعيداً والحمد لله الرجل خرج سالماً وعوضه على الله في سيارته لكن يكفيه إنه بطل والله

الغريب بقى .. إن كل يوم بتزيد قناعتي عن فساد هذا النظام المهتريء الذي بلغ من العمر أرذلة .. وأصبح يجلس على رأسه شخص تعدى الثمانين من عمره وغير مسئول عن تصرفاته وأختياراته ...

والدليل

محافظ شمال سيناء لسه يادوب متعين من أسبوع

وزي ما قولنا .. هو إيه ؟؟؟؟

عليكو نور

لواء جيش

ومش أي جيش ده كان مدير المخابرات الحربية الأسبق يعني متعين لهدف واحد وهو " حاضر ونعم وتعليمات سعادتك تتنفذ بالحرف الواحد يا فندم " وطظ في التنمية ولا التعمير وخلي سينا خرابه كده من 73 وخلي الناس اللي بتفهم وعاشت الوضع هناك تتمنى عودتها لأيدي الصهاينة اللي كانوا عارفين قيمتها

الراجل جه عالتليفون أمبارح وكانت المناظر البشعة المروعة شغاله في الخلفية والصورة بتتكلم ... لكن معاليه كان بيتكلم كإن عن دولة تانية او شيء تاني في خياله المريض وقال " قمت بجولة تفقدية وأستقبنلي الأهالي بالزغاريط والأهازيج والفرحه - آه والله يا جماعه - لإن اللي جالهم ده خير ومياه وفيرة "

آه يابن الــــ

بأمارة أول امبارح لما كانوا هايموتوا أحمد نظيف وحذره حراسه الشخصيين ونصحوه بضرورة مغادرة العريش حالاً وإلا فتك به الاهالي ... وفعلاً لم تستغرق الزيارة أكثر من 5 دقائق

وكل اللي جه من الحكومة إنهم أمبارح أمروا لهم بـ 40 ألف بطانية ...

طبعاً بطانيات الجيش السودا الكئيبة ... وإن شاء الله يفروشها علي المياه وهم يلتحفون السماء ويصطادوا سمك من المية أو ياكلوا تراب ... مش مهم .. دول مواطنين درجة عاشرة ...

المنظر البشع كان ايضاً في مباني القرية الأوليمبية الرياضية اللي مبنيه في مجرى السيل وكانت المياه تقتلع المباني اللي تحت الأنشاء وكأنها ريشة في مهب الريح ....

وكأن مقاول أنفار هو اللي مصمم القرية وبناها و اللي اتصرف عليها عشرات الملايين واصبحت الان اثر بعد عين

سمعت عضو مجلس الشعب عن جنوب سيناء بيقول إن القوات البحرية هاتشارك في نقل الطلاب المحاصرين في المناطق المنكوبة إلى لجان الأمتحان ... حيث إن في امتحانات نصف العام شغاله دلوقت ...................

لا تعليق من غيظي وغضبي على هذا الهبل والجهل

حسبي الله ونعم الوكيل على جميع الفاسدين وعلى رأسهم رأس الفساد الأكبر

-----------

أيضاً شاهدت أول أمس ما حدث في أسوان وما حدث للمحولات الكهربائية .. وأعمدة الضغط العالي التي تهاوت مثل أكوام القش

وبيوت الناس الغلابة اللي راحت ودُكت تحت وطأة السيول ...

وعلى رأي عمرو أديب " هو لحد دلوقت مافيش مراسلين مصريين في تلك الدول الصديقة ينقلوا لنا ما يحدث من كوارث هناك ؟؟؟؟؟؟؟؟؟؟؟؟ "

[miramikhail]

وأعمدة الضغط العالي التي تهاوت مثل أكوام القش

بس للتوضيح الأعمده دية من عمر السد و أعتقد أنه كان لازم لها صيانة و حاجات كده

أما موضوع القرية الأولمبية فأنا قريت أن نائب شمال سينا السابق حدز من أن الموقع ده فى مخر السيل فى جلسات مجلس الشعب و محدش عبره ولا سأل فية ودية تستاهل مسألة قانونية للمسؤل عن أختيار هذا الموقع للقرية الأولمبية و الملايين اللى راحت

[محمد عبدالعزيز]

كتير قالوها قبل كده

لو فى مسئول واحد اتحاسب على إهماله وفساده وتقصيره حساب عسير, كان أى مسئول يفكر ألف مرة قبل ما يطلع يقول أى تصريح من نوعية الهرتلة وتخاريف ونكت السادة المسئولين.

وأول مسئول يجب حسابه هو الرئيس طبعاً, لكن ده مين اللى ممكن يحاسبه وهو فوق المساءلة بحكم الدستور.

ياريت نتجمع كلنا ونضغط فى اتجاه مطلب واحد وهو تعديل الدستور أو تغييره لتكون أول خطوة فى طريق مواجهة الفساد.

[الترجمـان]

طيب مافيش حد يعرف رقم حساب علشان لو الواحد عيز يتبرع للناس اللي في الصعيد ..؟؟؟

ربنا يكون في عونهم الواحد قاعد في مصر وبيرتعش من البرد .. مابالكم الناس اللي تحت دي عايشن إزاي دلوقتي ..؟؟

انا سامع في النشره إن الحرارة هناك بتوصل لتحت ال 5 ..

اللهم الطف بهم ..