مهزلة اسمها مشروع مبارك لاسكان الشباب بكفر الشيخ

[بحار الغربة]

باختصار

مشروع اسكان مبارك للشباب كلنا عارفينه وهو مشروع اعلنت عنه الدولة من 4 سنوات تقريبا

المهم ان المشروع كان نظامه انك بتدفع 5 الاف جنيه مقدم وتستلم شقة مدعمة من الحكومة وتدفع ايجار شهرى لها يبدأ ب 160 جنيه ويزيد كل سنة بقيمة 7.5 % لمدة عشرين سنة وفى النهاية بتبقى الشقة ملكك

كلام جميل

المهم انهم قالوا ايامها ان ده مشروع استثمارى وبرضه اعانة للشباب وان شرطه الوحيد انك يكون معاك بطاقة رقم قومى وقالوا لنا ايامها ان كل ما كان مرتبك كويس كل ما كانت فرصتك احسن لاننا ساعتها هانتأكد انك هاتقدر تنتظم معانا فى السداد

مرت 3 سنوات وبدأ بناء العمارات فى مركز البرلس بكفر الشيخ واول ما الناس شافت العمارات راح الكل يسأل قالولهم باب التقديم مقفول من زمان ... فى الوقت ده احنا متعودين على شوية حرمية فى مجلس المدينة دايما بيعملوا حركة قذرة وهى انهم يعشموا اكبر عدد ممكن من الناس علشان يحصلوا على اكبر مبلغ متاح والاخر يخلوا الناس تشتكى بعضها عقبال ما هما يشغلوا الفلوس ويكسبوا منها

وعملوا قرعة لنا وقالوا اللى مقدمين من 3 سنوات يجوا يسحبوا ارقام علشان يعرفوا شققهم ورحنا وسحبنا ارقام وعرفنا الشقق بتاعتنا

المهم فتحوا باب الحجز تانى لمدة شهر وقدم عدد 800 شاب .... تخيل بقى 800 شاب فى 5000 جنيه

المهم قالوا اللى عاوز يخلص الشقة كاش يدفع 30 الف جنيه وهايستلمها اول ما تخلص بعد كام شهر وطبعا الكتير من الناس دفع

راح مجموعة كبيرة من اللى مقدمين حديثا اشتكوا الناس اللى مقدمه من 3 سنوات وطبعا انا كنت منهم وقالوا ان امكانياتهم المادية كويسة ( لاننا بنسافر بلاد برا ااااا ) واحنا يابيه شحاتين ومش لاقيين لقمة ناكلها

جه المحافظ الجديد احمد زكى وقال مش هانسلم الشقق الا للى يستحق ... يعنى اى حد بيسافر برا مش هاياخد شقة حتى لو دافع فلوسها كاش ومقدم بقاله 4 سنوات ومش مهم هو راتبه كام برا حتى لو راتبه الف ريال المهم انه برا مصر ( يعنى ابن ستين ...... ) اما ولاد مصر الا بيشربوا من نيلها هانديهم الشقق حتى لو مقدمين البارح

المحافظ ده طبعا كان من شهر تقريبا باع شقق نفس المشروع ( بس فى مركز الرياض ) فى مزاد علنى رغم ان الناس اللى هاتستلمها دفعت فلوسها وحجته ان الشقق فى مكان مميز وان الناس دى ماتستاهلش تسكن فى المكان ده

وراح منزل كام اسم واستبعد اسماءنا مع اننا المفروض نستلم زى ما المشروع بيتم تطبيقه على مستوى الجمهورية

فى اى مكان فى الجمهورية ما حصلش المسخرة دى ماعدا فى كفر الشيخ

المهم انى دلوقتى عاوز اى طريقة ان الموضوع ده يتناقش فى برنامج زى العاشرة مساءا او 90 دقيقة او الحياة اليوم علشان نعرف ايه اللى بيتم ورا الكواليس بالظبط

حد يقدر يدلنى على طريقة يا جماعة

تم تعديل 20 يناير 2010 بواسطة بحار الغربة

[se_ Elsyed]

اتفضل اخي الكريم

ده البريد الألكتروني لبرنامج العاشرة مساءً

al3ashera@dreams.tv

وده 90 دقيقة

90min@elmehwar.tv

[Alshiekh]

السلام عليكم

لو لكم حق اتجمعوا والجأوا للقضاء وارفعوا دعوى باسترداد حقوقكم ودعوى ضد المحافظ شخصيا بالتعويض ومصاريف اتعاب المحاماة والقضاء.

[بحار الغربة]

الاستاذ سى السيد

جزاك الله خيرا على اضافتك لايميلات البرامج التليفزيونية

انا ارسلت لهم موجز عن الموضوع ككل

وربنا يعلم اننا لنا الحق

مجلس المدينة اخد مننا 5000 جنيه من 4 سنوات وبعدين 30 الف جنيه من سنة يعنى كل المبلغ 35 الف جنيه

وبعد ما بنوا المشروع بفلوسنا عاوزين يدوا الشقق لناس تانية بحجة انهم اولى مع ان المشروع فى كل انحاء الجمهورية تم تسليمه حسب الاولوية فى التقديم

واللى زاد الطين بله انه فتحوا التقديم لعدد 800 طلب علشان يستغلوا الفلوس دى ويشغلوها ويكسبوا منها عقبال ما الناس تخلص شكاوى وخناقات يكونوا عملوا منها سبوبة

ربنا ينتقم منهم