أمثال محرمة شرعآ

[الباشمهندس ياسر]

عموما مازلت عند تفسيري للجمله محل الخلاف و انها تقرير واقع بدون إخلال بحق الخالق و الخوف من حرمانية ترديدها غير مبرر

تحياتي

طب و مين اختلف معاك ع النقطة دي

لو النية اننا نقول مثلا

ده المهنة الفلانية مبتعملش حاجة و دخلها بيوصل ل 70000$ سنويا بينما المهنة الفلانية مبتعملش 5000$ و بيطلع عنيها

من باب الاقرار بالحال

يبقي فين المشكلة

انما لو النية اننا نعترض القسمة فاكيد الموضوع هيختلف... و انا متأكد انك استحالة تقصد ده

عارف الازمة فين

الازمة ان الكلام عبر النت ممكن يحتمل تأويلات متعدده

ربنا يرزقنا جميعا حسن الظن بأحدنا الاخر

ربنا يهدينا كلنا للحق و يهدي انفسنا

زهيري و محمود ........ اديكم بقي علي 20 جنيه عشان خاطر الكلمتين دول

[الغريب]

مهلاً.. أستا زهيري وأستاذ محمود مصطفى

أنا حاسس أننا بقينا زي الأهلي والزمالك وده مينفعش في الدين ياجماعة المفروض أن كل واحد يفترض من البداية حسن النية للزميل ولا يتعامل معه بخلفيته عنه، كل موضوع وليه كلام ومش معنى أننا أختلفنا معا في مسائلة أننا هنفضل على طول الخط مختلفين..

سامحني يأستاذ محمود مصطفى أنت رديت على مشاركة أستاذ زهيري الأولى بشكل خاطئ شوية لأن فعلا النية اللي هو أتكلم عنها صحيحة لما يطلق المثل المذكور كتصديق للواقع وليس كأعتراض على مشيئة الله وكان ممكن تقره على كلامه بس توضحله أننا لو أستعملنا المثل بهذه النية لا يسلم الأمر من الوقوع في النية الخاطئة عند بعض الناس فمن باب أولى تجنب المثل، وأنت يأستاذ زهيري رديت على الخطأ بخطأ لما قولت كنت متوقع الرد وكأنك تزيد الأمر ..

كل واحد بيتربص بالآخر، ياجماعة الموضوع بسيط خالص ونقدر نستفيد من بعضنا أكتر من كدة

وأشكرك على أضائتك الجميلة يا بشمهندس ياسر.. تحياتي ..صبّح، صبّح

[MZohairy]

وأنت يأستاذ زهيري رديت على الخطأ بخطأ لما قولت كنت متوقع الرد وكأنك تزيد الأمر ..

كل واحد بيتربص بالآخر، ياجماعة الموضوع بسيط خالص ونقدر نستفيد من بعضنا أكتر من كدة

اشكرك يا أستاذ غريب كل الشكر

بس كنت عايزني اقول ايه طيب ؟

حاجه بقول رأيي فيها بكل حسن نيه على اساس اننا في حوار طبيعي

الاقي الرد بهذا الشكل !!

هل تتوقع مني اجادل واحد رفض الحوار استباقيا ؟

انا عن نفسي عمري ما تربصت بحد

قد تكون آرائي مخالفة بعض الشيئ عن بعض الآراء او المعتقدات العامه

و لذلك تجد البعض يتربص بي فعلا و الموضوع هنا اكبر دليل على ذلك

انما انا اتربصت فين بس؟

اشكركم جميعا و لكم تحيه بحجم بستان :closedeyes:

[msayed]

وكمان ناس بتكسب ولا تتعبش وناس بتتعب ولا تكسبش

ده إقرار لما يحدث احيانا في الواقع و هو يحدث فعلا

زي ما نقول مثلا ناس بتاكل و لا تتخنش و ناس بتتخن و مبتاكلش

تشبيه عادي على أمر واقع فعلا و مش مقصود بيه معارضة حكمة الخالق

لاحول ولاقوة الا بالله .. اللهم ارنا الحق حقآ وأرزقنا اتباعة وأرنا الباطل باطل وارزقنا اجتنابة

أنا مش شاي شايف أى داعى للخلاف زى ماقال الباشمهندس ياسر

كلام محمود صحيح لو إللى بيقوله فى نيته الإعتراض على قسمة الله وإن غيره مش بيشتغل زيه وبيكسب أكثر منه.

وكلام زوهيرى مظبوط لو إللى بيتكلم بيفسر واقع زى المثل إللى جابه بتاع الناس إللى بتاكل.

تم تعديل 26 يناير 2010 بواسطة msayed

[eslam elmasre]

وايه المشكله

فعلا فيه ناس بتتعب ولا تكسبش وناس بتكسب ولا تتعبش علي رأي اسماعيل يس في احد منلوجاته

يعني لما واحد وهو قاعد كده ويكسب جايزه في مسابقه ويكون مكسبه لا يتناسب مع ما بذله من مجهود تقوم تقع عليه فجأه ثروه كبيره دون مجهود يذكر غير انو جاوب علي كام سؤال هبل اي واحد يجاوب عليهم

فين التعب هنا

يبقي فيه ناس بتكسب ولا تتعبش

في نفس الوقت لاقي واحد طفحان الكوته من صباحية ربنا لمساه ويادوب بيجيب لقمتو بالعافيه ويمكن يروح من غير ما يكسب حاجه خالص

يبقي بردوا فيه ناس بتتعب ولا تكسبش

انا شايف ان المثل ده واقعي جدا

[عاشق الترحال]

وايه المشكله

فعلا فيه ناس بتتعب ولا تكسبش وناس بتكسب ولا تتعبش علي رأي اسماعيل يس في احد منلوجاته

يعني لما واحد وهو قاعد كده ويكسب جايزه في مسابقه ويكون مكسبه لا يتناسب مع ما بذله من مجهود تقوم تقع عليه فجأه ثروه كبيره دون مجهود يذكر غير انو جاوب علي كام سؤال هبل اي واحد يجاوب عليهم

فين التعب هنا

يبقي فيه ناس بتكسب ولا تتعبش

في نفس الوقت لاقي واحد طفحان الكوته من صباحية ربنا لمساه ويادوب بيجيب لقمتو بالعافيه ويمكن يروح من غير ما يكسب حاجه خالص

يبقي بردوا فيه ناس بتتعب ولا تكسبش

انا شايف ان المثل ده واقعي جدا

الأستاذ الفاضل إسلام

الأساتذه كانوا مختلفين على نفس النقطه دي في الموضوع ؟؟؟

أحدهم بينظر لها من زاويه والآخر من زاويه تانيه .

يعني الغرض والخلاصه أن أنا ماقولش كده من باب الإعتراض على قضاء الله

مثلاَ لما أكون شغال وتعبان وراتبي قليل وألاقيك كسبت جايزه كده خماشر ألف زورار مثلا :closedeyes: .

ففي الحاله دي ويكأني أعترض على قضاء الله وتوزيعه للأرزاق .

تحياتي :closedeyes:

[الباشمهندس ياسر]

وأشكرك على أضائتك الجميلة يا بشمهندس ياسر.. تحياتي ..صبّح، صبّح

صباحين و حتة

بس فين العشريييييييييييييين جنيه :blink:

[hossamsabry]

السلام عليكم ورحمة الله وبركاته

بصراحة لقد اعجبنى الموضوع جدا وياريت كل من يجد مثل مخالف لشرع الله يضعه حتى نلزم الستنا بالكلام الذى يرضى الله

واكثر قول منتشر ويستفزنى كل من يقوله ( لا حول الله يارب ) وكل ما اجد شخص يقوله ابين له انه ينفى القدرة عن الله بغير قصد فيدرك الشخص المعنى ويقول صحيح ولكن بعد فترة يقع فيها ويرددها ولكن طول احنا نصر ان شاء الله على الصح ان شاء الله تختفى هذه الامثال

ولتكن حمله بان لا نترك احد يقول هذه الامثال الا فهمنها له

والله الموفق لما فيه الخير

[msayed]

- رب لا نسألك رد القضاء ولكن نسألك اللطف فيه. دعاء خاطىء فالإنسان ممكن يدعى ربنا برد القضاء أو أن يسأل الله بأن يقدر الخير وليس فى هذا إعتراض على قضاء الله وقدره.

[doha]

جزاك الله كل خير على الموضوع وجعله في ميزان حسناتك ..

من الكلمات الي بحسها ( بتجرح ) الودن والواحد احيانا بيسمعها لما يقولوا فلان ( ربنا افتكره ) بمعنى توفاه .. اعتقد الاسلم نقول اختاره احسن لان ربنا بالتأكيد مبينساش حد ..

برضه مبحبش كلمه ( المغفور له ) حتى لما بيحاولوا يصححوها ويقولوا المغفور له باذن الله .. اعتقد الافضل والانفع للميت ان الواحد يقول غفر الله له او رحمه الله ودي دعوة حلوة احسن من ( فرض ) الغفران لان ده مش مضمون اكيد .. الغريب ان الكلمه دي دائما بتقال على الملوك والحكام السابقين وكأن الناس مش عاوزه تدعي لهم لا حيين ولا ميتين ..

ده الي جه في بالي ولو افتكرت حاجه تانية هحطها ..

[جيمي]

- رب لا نسألك رد القضاء ولكن نسألك اللطف فيه. دعاء خاطىء فالإنسان ممكن يدعى ربنا برد القضاء أو أن يسأل الله بأن يقدر الخير وليس فى هذا إعتراض على قضاء الله وقدره.

انا كنت فاكر ان الدعاء ده عباره عن حديث شريف او هكذا سمعت .... فهل ممكن توضيح بدرجة صحة هذا الحديث.. وشكراا

[walidfh]

بسم الله الرحمن الرحيم

السلام عليكم و رحمة الله وبركاته

أخوتي في الله

قال رسول الله صلى الله عليه و سلم :" ان العبد ليتكلم بالكلمة ما يتبين ما فيها يهوى بها فى النار ابعد ما بين المشرق و المغرب " رواه مسلم

و كان ابو بكر رضى الله عنه يقول عن لسانه : هذا الذى اوردنى الموارد

و قال الحسن : ما عقل دينه من لم يحفظ لسانه

جزاكم الله خيرا على هذا الموضوع وأحب ان اضيف بعض الكلمات والأمثلة والتي كانت قد وصلتني من مدة على النت إستكمالا لهذا الموضوع

1- "مدد يا نبى"

هذه الكلمة رغم شيوعها الا انها من الشرك الاكبر الذى لا يغفره الله لان المدد هو طلب العطاء وهو دعاء والدعاء لا يطلب الا من الله سبحانه و تعالى وكذلك مدد يا يا حسين ومدد يا يا ام هاشم وكثير من الاخطاء اللفظية فاذا كان المدد من النبى صلى الله عليه وسلم شركا فكيف يكون بغيره ؟‍

2- "سب الزمان"

فاذا ألم ببعض الناس مصيبة يقولون كلام غريب مثل " تعس الزمان , زمن لا يرحم , يوم اسود , ساعة نحس , الخ " وهذه من مداخل الشيطان لان المسلم لا يطيق ان يسب ربه قال رسول الله فى حديث عن رب العزة :" يؤذينى ابن ادم يسب الدهر وانا الدهر "

وقال رسول الله صلى الله عليه و سلم :" لا تسبوا الدهر فان الدهر هو الله " متفق عليه

3- "مرض لعين"

لا يجوز لعن المرض لانه من قضاء الله وذلك يتنافى مع الصبر الذى امرنا الله به

4- " ليه يا ربى كده ,, هو انا عملت ايه فى الدنيا عشان يحصلى كده ,, هو مفيش غيرى فى الدنيا عشان يجراله كده ......"

السخط على القدر كما يقول البعض ذلك سوء ادب مع الله مما يستوجب غضب الله بالاضافة الى انه لا يصبر على قضاء الله

5- " ما شاء الله وشئت انت ,, ساعتمد على الله وعليك,, انا متوكل على الله وعليك ,, لولا الله وفلان "

جعلوا المخلوق ندا لله كقول البعض وذلك من الشرك لانه سواى بين الله والشخص لان الواو تفيد التسويه فى المقام لكن القول الصحيح " ما شاء الله ثم شئت ,, مليش الا الله ثم انت ..وهكذا

6- التسمى باسماء منكرة

مثل عبد النبى ,,, وعبد الرسول ,,, وبد الرضا .... ونحو ذلك وذلك ينافى الاسلام لاننا عبيد لله وخير الاسماء ما عبد وحمد مثل عبد الرحمن ..... الخ ....

7- " خناقة لرب السماء "

والمعنى ان الخناقة كانت عظيمة لدرجة انها وصلت للسماء وذلك لا يجوز لانها لا تليق مع الله وقال الله تعالى :

" وما قدروا الله حق قدره "

8- " ربنا افتكره ,,, افتكاره رحمة "

قال الله تعالى :" وما كان ربك نسيا " وان كان هناك من يقولوها عن جهل فيجب ان نطهر السنتنا من تلك الكلمات ....

9- " دفن الى مثواه الاخير "

وفى تلك الكلمة تحمل معنى عدم الايمان بالبعث فالمثوى الاخير هو الجنة او النار

10- " ربنا وقف معى "

والمفروض ان نقول ربنا اعاننى على كذا وكذا .........

11- " ساعة لقلبك و ساعة لربك "

والمقصود بساعة القلب هى ساعة المعصية ولكن المفروض ان تكون حياتنا كلها لله " قل ان صلاتى و نسكى ومحيياى ومماتى لله رب العالمين " ... فهل نقبل ان نعذب ساعة فى النار وننعم ساعة فى الجنة ؟؟؟؟؟

12- " ربك رب قلوب "

وقول " المهم ان قلبى ابيض ,, انا بحب ربنا .. تلك خدع نخدع بها انفسنا فكيف نحب الله ولا نطيعه ونعمل ما يحبه اين هى امارات الحب اذن ؟؟؟ قال تعالى " قل ان كنتم تحبون الله فاتبعونى يحببكم الله " ...

13- " انا عملت اللى على والباقى على ربنا "

كلمة الباقى تشير ان العبد عليه جزء والله سبحانه وتعالى جزء هل يصح ذلك ؟؟؟؟ ولكن الصحيح ان الكل على الله والتوفيق من عنده سبحانه و تعالى ... لكن ممكن ان نقول عملت ما اقدر والتوفيق من الله او نحو ذلك ...

14- " اللهم اجعله خير "

وتلك الكلمة نقولها بعد الضحك الكثير اعتقادا انه سيحدث مصيبة بعد ذلك وذلك سوء ظن وتشاءوم ونحن نعلم ان التشاؤم من المحرمات التى لا يجب ان نقع فيها ....

15- " انا اصطبحت بوش مين النهاردة "

بنقولها كتير اليس كذلك ؟؟؟ وهى من التشاءوم كما نقول انه من المحرمات التى لا يجب ان نقع فيها .....

16- " ده بياكل رز مع الملائكة "

ولماذا الارز ؟؟؟؟؟؟؟؟؟؟ وهل تاكل الملائكة ؟؟؟؟ ذلك استهزاءا بالملائكة الذين عظم الله قدرهم ...

17- " لا حياء فى الدين "

الدين كله حياء فالحياء شعبة من شعب الايمان والصحيح القول لا حياء في العلم ....

18- " اسم النبى حارسه وصاينه "

والله الواحد بيسمع الكلام ده بيبقى عايز يضحك !!! من يحمى الانسان ؟؟ من يحمى الانسان من البلاء إلا الله ؟؟ نعم اسم النبى صلى الله عليه و سلم فيه البركة و الخير و لكن المفروض ان نتعوذ باسماء الله الحسنى

19- " يا شمس يا شموسة خدى سنه الجاموسة وهاتى سنة العروسة "

و ذلك شرك اعتقادا بان الشمس هى التى تهب الاسنان للاطفال!!!!!! ... وقد يقولها البعض دون قصد لكن ذلك ليس بمبرر....

20- " ادى الله و ادى حكمته "

وهذا سوء ادب مع الله واعتراض على قدره .....

21- " انا فتحنا لك فتحا مبينا "

الكتابة على ابواب المتاجر ذلك عبث بكلام الله لان الفتح كان مقصودا بفتح مكة وليس للمتاجر او الرزق كما يقصد البعض .....

وكثير وكثير من الكلام الذى والله لا يحصى فارجو ان نحذر ونعقل كلامنا قبل التفوه به ويقول تعالى :" وما يلفظ من قول الا لديه رقيب عتيد " صدق الله العظيم .......

والله اعلى وأعلم

[من بعيد]

رزق الهبل على المجنانين

الله جعل المجانينن سبب لرزق الهبل

فين هو الاعتراض على حكمه ربنا وعدم التأدب مع الله

يدى الحلق للى بلا ودان

ودى برضه حكمه ربانيه لا يعلمها احد

يرزق من يشاء بغير حساب يا مشايخنا

[tantrum]

- رب لا نسألك رد القضاء ولكن نسألك اللطف فيه. دعاء خاطىء فالإنسان ممكن يدعى ربنا برد القضاء أو أن يسأل الله بأن يقدر الخير وليس فى هذا إعتراض على قضاء الله وقدره.

انا كنت فاكر ان الدعاء ده عباره عن حديث شريف او هكذا سمعت .... فهل ممكن توضيح بدرجة صحة هذا الحديث.. وشكراا

جزى الله الفاضل msayed خيرا لأن فى إشارته تلك فائدة عظيمة لأن عدم صحة الدعاء من الأمور المجهولة بالرغم من شهرة الدعاء.

الأخ جيمى

هذا الدعاء ليس بحديث و الدعوة به مكروهه بل محرمه برأى كثير من العلماء

وهذا من فضل الله أن الدعاء قد يرد القدر.

[tantrum]

القسم بغير الله مثل:

و النبى..........

و المصحف الشريف...............

و القرأن...............

و رحمة فلان..............

و....................

و..................

[msayed]

- ده إحنا زارنا النبى. وتقال للمبالغة بالترحيب بالضيف وأشعر أنها مبالغة غير مقبولة.

[MZohairy]

- ده إحنا زارنا النبى. وتقال للمبالغة بالترحيب بالضيف وأشعر أنها مبالغة غير مقبولة.

أهي دي بقى انا فعلا مابحبهاش

[msayed]

21- " انا فتحنا لك فتحا مبينا "

الكتابة على ابواب المتاجر ذلك عبث بكلام الله لان الفتح كان مقصودا بفتح مكة وليس للمتاجر او الرزق كما يقصد البعض .....

إللى بيتكتب على العربيات النقل والمحلات ده بقى فظيييييييييييييع، بصراحة ساعات بيبقى مضحك وبيدل على الجهل إللى كاتبه :sad:

والحاجات دى شفتها بنفسى.

شوف دول:

1- محل ترزى كاتب على المحل "وكل شيء فصلناه تفصيلاً" ..... لا تعليق.

2- سيارة نقل مكتوب عليها "ربنا لا تحملنا ما لا طاقة لنا به" ..... لا تعليق برضه.

تم تعديل 27 يناير 2010 بواسطة msayed

[msayed]

بصراحة الموضوع ممتاز ولكن لى إقتراح.

ليه ما نخليش الموضوع لإتجاهين

الأمثال المخالفة للشرع وكذلك الأمثال التى تحث على الفضيلة والمعانى النبيلة،

وبرضه فيه أمثال مافيهاش خطأ فى العقيدة ولكن هى فى حد ذاتها مصيبة لو إتعاملت على أنها مبدأ زى مثل "أصرف ما في الجيب يأتيك ما في الغيب" و "صباح الخير يا جاري أنت في حالك و أنا في حالي" و"الاقارب عقارب ".

وأيضاً فيه أمثال ممكن يبقى فيها الجانبين الحلو والوحش.

يعنى يبقى تقييم كامل للأمثلة الشعبية المصرية والأقوال الدارجة على اللسان،

ونشترط قبل أن نبدأ أن الإختلاف على أى مثال يكون مرة واحدة أقصد إن كل واحد يقول رأيه المخالف مرة واحدة ويترد عليه مرة واحدة وبعدين ننتقل للمثل التالى.

وأكيد ها يكون الموضوع شيق جداً.

وأظن فى هذه الحالة الموضوع ده مش ها ينتهى أبداً.

الموافق يتفضل برفع يده، ........................................................ أغلبية ...... من غير ماأبص:sad:.

تم تعديل 27 يناير 2010 بواسطة msayed

[عاشق الترحال]

طلب المدد من فلان أو من علان

زي اللي بيقولوا مدد يا بدوي أو مدد يا مرسي أو مدد يا رسول الله

لأن المدد بيطلب من الله وحده واللي بيقول مدد يا بدوي ده أكيد عارف أن السيد البدوي ميت ولا يملك لنفسه ضر ولا نفع

ولو فكر شويه هيعرف أن ابسط دليل أنهم لما بيحطوا على قبر السيد البدوي أو غيره صندوق للنذور بيحطوا عالصندوق ده قفل علشان

ميتسرقش مش كان أولى لو أنه بيضر أو ينفع أنه كان يحرس صندوق النذور من اللصوص .

فالمدد لا يطلب من أحد إلا الله وحده

تم تعديل 27 يناير 2010 بواسطة عاشق الترحال