كرسي الأعتراف 2 ( حاليآ الفاضلة Dreamwithme )

[engtaha]

هو ممكن ادخل معاكم فى الحوار ولا ايه..

ممكن اسأل حضرتك

دراستك ايه وفين

بتشتغل ايه أوشغلك عبارة عن ايه

زولحفتك اسمها ايه

عرفت منين ان عنيها خضرا

ايه موضوع المراجيح

مسافر فين ومع مين

هاتجيبلنا ايه معاك من السفر ولمين

[MaYousof]

سيتم الرد على المداخلات رفم 176# صعودا بعد تمديد أسلاك كهربائية جديدة للكرسي.

نأسف للإصلاحات.

--------------

أظن مافيش أحسن من إن الواحد يجيب من الآخر. ومافيش آخر أحسن من سرد قصة الحياة كاملة, من طقطق لسلامو عليكم.

--------------

قصة حياة MaYousof

أنا لما اتولدت ..

كنت طفل جميل جدا ..

وكانت كل البنات لما يشوفوني يقوموا يشيلوني علطول وهاتك يا تقريص على خدودي الاتنين

وهاتك يا بوس على أرنبة مناخيري :blush2:

وفي لحظة توقف عندها التاريخ ..

لحظة .. غيرت مجرى حياتي .. بالكلية ..

لحظة .. كانت فاصلة فاصمة .. ونهائية ..

أخدتلي بوسة على أرنبة مناخيري من بنت جميلة جدا .. جدا .. جدا ..

ومن ساعتها .. حصل اللي حصل ..

واتقلبت عبيط :closedeyes:

أهلي ماكانوش متوقعين أبدا إن سيبانهم للبنات يقرّصوا في خدودي ويبوسوا في أرنبة مناخيري كان ممكن يكون ليه مردود سلبي كده ..

وبصراحة ..

كان باين على شكلي إني عبيط :closedeyes:

ماعرفوش يعملوا إيه عشان يداروا العبط اللي كان باين جدا على وشّي ..

لفّوا بيَّ في أحسن المستشفيات ..

خدوني لأحسن دكاترة ..

لحد ما عتروا على دكتور وصفلهم وصفة سحرية ..

ممكن تعالج العيوب الظاهرة على الشكل ..

وهو إنهم يشترولي لبس معين .. ألبسه لمدة سبع ساعات .. خمس تيام كل أسبوع ..

وكان اللي كان ..

وبدأت علامات العبط الظاهرية تختفي من على وشّي بالتدريج :closedeyes:

أهلي برضه كانو لسه زعلانين ..

عشان العلاج ده ماكانش فيه حل للمشكلة الذهنية اللي ضربت نافوخي من البوسة إياها اللي كانت على أرنبة مناخيري ..

سافروا بيَّ بلاد برة ..

ودوني عند مشعوذين ..

كانوا عايزين أي حل ..

أي حل ..

ماهو حرام بجد إن ابنهم البكري يتولد سليم ..

وبوسة من بنت فلتانة على أرنبة مناخيره تعمل فيه كل ده ..

أخيرا ..

وجدوا بعض الأمل ..

عند واحد دجال من غجر المجر ..

قال لهم ..

مشكلة إبنكم الذهنية مالهاش حل غير إنكم تشتروله ..

مرجيحة :swing:

وقد كان ..

وبدأت علامات العبط الذهنية تختفي من على تفكيري بالتدريج :closedeyes:

أنا لما كبرت .. حكولي على الموضوع ده .. وكنت هاتجنن ..

أنا ..

أنا ..

عبيط ..

ماكنتش مصدق ..

لدرجة إني في لحظة ضعف كنت هانتحر من الحقيقة المُرة دي ..

ولحقوني في آخر لحظة :closedeyes:

بعد كده سلّمت بالأمر الواقع ..

وبدأت أحاول أعيش حياتي طبيعي ..

لكن مانكرش .. إن موضوع العبيط ده .. ترك أثره على نفسي .. ويمكن على عقلي .. لحد يومنا هذا :closedeyes:

-----------------

أشوف وشكم كلكم على خير انشاء الله ..

بحبكم كلكم :wub:

[مغتربة]

استاذ محمد

ما فهمته من كلام حضرتك انك عاشق للغه العربيه و دراساتك العليا تتمركز حولها

لذلك اسمحلى ان اسالك بعض الاسئله المتعلقه بها و اتمنى عليك التوسع فى الاجابه قليلا حتى نستطيع ان نلملم الامور من زواياها كلها بعد اذنك

1- اسالك كباحث فى اللغه العربيه عن منظور حضرتك للحلول الفعاله من وجهه نظرك لتتدهور حال اللغه العربيه عند الناطقين بها و كيفيه مواجهه التحديات الملمه بها بسبب طغيان ثقافه العولمه بما فى ذلك عولمه لغه العالم اجمه

2- ما هى الوسائل و الاجراءات الازمه لتبسيط تدريس النحو بشكل يحبب الدارسين له و يجعل تفهمه عمليه اكثر سلاسه ( و دا سؤال يهمنى بشكل شخصى جدا لان مقدرش اقولك اد ايه العلاقه جميله بينى و بين مستر نحو :aslam: :king: )

3- هل ترى ضرورة لاستمرار الربط بين اللغه العربيه و الثقافه الاسلاميه بشكل عام الى حد اعتبارها الوعاء لها

4- ما هى ابرز التحديات الخاصه بتدريس اللغه العربيه لغير الناطقين بها

5- كيفيه تفعيل الانتشار المامول للغه العربيه فى غرب افريقيا كامتداد لفتره ازدهار سابقه يخشى عليها من الاندثار

اعلم انى اثقلت عليك بالاسئله لذلك اذا اردت ان تفصلها فى موضوع منفصل فلك كل الحريه

و كذلك لك كل الحريه فى عدم الاجابه على اى سؤال منهم

دمت بالف خير

[لماضة مصرية جدا]

السلام عليكم و رحمة الله و بركاته

اعزائي المستمعين....مش عارفة ليه طالبة معايا راديون اليومين دول

سؤال يطرح نفسه.... هو الرفيق السيد الدكتور اللواء محمد يوسف... بعد ما حطلنا السيرة الذاتية بتاعت فتح القسطنطينية....... ليه اختفي في ظروف غامضة؟؟؟؟

نداء عاجل..... للمرة الحوكشيليون (دي اكتر من الديشيليون قيمة شبر و نص)......الي جميع قوات المنتدي....مطلوب سرعة ضبط و احضار المدعو....محمد يوسف ليتم سلخه و تشفيته...... و توضيبه طرنشات...طرنشات...(ضحكات شريرة متقطعة..... :lol: )

بالنوسبة للاخ عنبو...... انا بقول سيبوه نايم جنب الكورسي.....

و رايي الشخصي ان عنبو هيفوق لو بعد ما استاذ محمد يقوم بالسلامة رافع رايه النصر....

نقعد عنبو مرة تانية..... ايون

ليه بقي..... لان الرفيق عنبوووووووف شكله.....محتاج فولت كهربا عااااااااالي

هذا ودامت كراسيكم عامرة بالافراح...... و منورة بالضحايا

كان معكم مراسل شفخانة الاعتراف

المعلم

لماضة العنتبلي........ :blush2:

[Scorpion]

هو مش قايلكم من اول حلقة بلاش تختاروه علشان طالع رحلة مدرسية لأسوان في اجازة نص السنة ..

قال و لا ما قالش ؟؟؟

هه

يبقي تستنوا بقي لما الشاندوشتات تخلص و يرجع بالسلامة و ساعتها ابقوا اهروه اسألة علي مزاجكم .. بس ساعتها ابقوا اندهولي من عالقهوة عشان فيه سؤالين مزنوق فيهم ...

ياللا ...

شيلوه

[لماضة مصرية جدا]

هو مش قايلكم من اول حلقة بلاش تختاروه علشان طالع رحلة مدرسية لأسوان في اجازة نص السنة ..

قال و لا ما قالش ؟؟؟

هه

يبقي تستنوا بقي لما الشاندوشتات تخلص و يرجع بالسلامة و ساعتها ابقوا اهروه اسألة علي مزاجكم .. بس ساعتها ابقوا اندهولي من عالقهوة عشان فيه سؤالين مزنوق فيهم ...

ياللا ...

شيلوه

طب انا مش هقدر اشيل....... (وش حسب الله و هو بيحاول يشيل خلتي آمونة...... :lol: )

طب عمو سكوربيون..... ممكن اقتراح آد النملة

احنا نجيب كورسي.... و نحطه جنب الكورسي.....نخلي الرفيق يوسفوف ياخد الجورعة بتاعته.... و عقبال ما يجي من اسوان ماشي ان شاء الله

نحط الرفيق عنبوووووف ع الكورسي التاني

ايه رايك يا رياسة

معاك

لماضة كلاشينكوف

حول

[om marawan]

رحلة مدرسية :lol:

ايه ده هو التعليم اتغير فى مصر للدرجادى يعنى هو بعد الدراسات رجع المدرسة تانى

امممممممم عظيم

طب انا مش بحب اشارك وأسأل وكده عشان الدنيا سلف ودين يعنى باتفرج من بعيد

بس السؤال مؤرقنى الحقيقة :blush2: هو محمد عاوز جركن ال DDT فى ايه ؟؟؟؟؟

يعنى لو هيرش " الناموس " اللى فى بالى يبقا الجركن مش هيكفى

[عنبو]

لماضة مصرية جدا مشاركة بتاريخ أمس, 09:30 PM

بالنوسبة للاخ عنبو...... انا بقول سيبوه نايم جنب الكورسي.....

و رايي الشخصي ان عنبو هيفوق لو بعد ما استاذ محمد يقوم بالسلامة رافع رايه النصر....

نقعد عنبو مرة تانية..... ايون

ليه بقي..... لان الرفيق عنبوووووووف شكله.....محتاج فولت كهربا عااااااااالي

انا بقالى فتره بقوم من النوم مفزوع وقول الكرسى لا الكرسى لااااااااااااااااااااااا

احنا نجيب كورسي.... و نحطه جنب الكورسي.....نخلي الرفيق يوسفوف ياخد الجورعة بتاعته.... و عقبال ما يجي من اسوان ماشي ان شاء الله

نحط الرفيق عنبوووووف ع الكورسي التاني

ايه رايك يا رياسة

انا حاسس يا لماضه ان انتوا عاوزين تقعدونا على الكرسى وتنشلوا علينا

بس لااااااااا ده كده كتير قووى بقى عنبو ومحمد يوسف الراجل الكبره اللى لف العالم كله " مصر الجديده _ حلوان _ اسوان "

يتعمل فينا كده

هو فين هو فين اللى عملى فيها خفاش وربنا لنومك من المغرب يا محاورات

[shiko]

انا افتكرتكم ...لاقيته زبون جديد ..ولا حاجة ..

وبعدين انا موافقة على اقتراح لماضة بس بشرط

نعلى الفولت بتاع الكهربا ...ونشيل مسند الراس ...

وندخل ماااااااااااكدونالد"ده بدل رضوى" ...يخدم على الزبون ..واديلوه المنيوه يختار من الاسئلة اللى هو يحبه

خليه يقعد يقول ...ماااااااااااكدونالد ...انا بحبه

[engtaha]

رحلة مدرسية :ninja:

ايه ده هو التعليم اتغير فى مصر للدرجادى يعنى هو بعد الدراسات رجع المدرسة تانى

امممممممم عظيم

طب انا مش بحب اشارك وأسأل وكده عشان الدنيا سلف ودين يعنى باتفرج من بعيد

بس السؤال مؤرقنى الحقيقة wst:: هو محمد عاوز جركن ال DDT فى ايه ؟؟؟؟؟

يعنى لو هيرش " الناموس " اللى فى بالى يبقا الجركن مش هيكفى

والله نفس السؤال برضه اللى كنت عاوز اساله

يمكن فاكر الدى دى تى ده زيت عربيات

افتينا يا استاذنا انت عاوز الجركن فى ايه شكلك هاتولع فينا بس هاقولك بلاش حرام مع بنات وامهات هنا حرام عيالهم حرام يا محمد حرام

[engtaha]

اجمل مافى المراءة واسوء مافيها ؟

ايه رايك فى

المراءة عنيدة

المراءة ضعيفة

المراءة قوية الشخصية

ماهى مميزات وعيوب مهنتك؟

اهلاوى ولا زملكاوى ياعم الشباب والرياضة؟

[joo]

اهلا اهلا اهلا اهلا يابو الشباب 00 هم مسكوك انت وكهربوك 00 طيب اللة يكون فى عونك؟

خالى بالكو منة دا عنبو دة حبيبى00 مش عاوز ارجع الائى شعرة وقف00 اوعى تكون اصلع يا عنبو؟ :lol:

[لماضة مصرية جدا]

اهلا اهلا اهلا اهلا يابو الشباب 00 هم مسكوك انت وكهربوك 00 طيب اللة يكون فى عونك؟

خالى بالكو منة دا عنبو دة حبيبى00 مش عاوز ارجع الائى شعرة وقف00 اوعى تكون اصلع يا عنبو؟ :lol:

السلا عليكم و رحمة الله و بركاته

يعني يا جودعان نقدر نقول كده ان عنبي استلم الراية......بالشفا

طب نزق كتف يعني

هاتولنا بقي الضحية

مستنييين اهه

[Scorpion]

طب عمو سكوربيون..... ممكن اقتراح آد النملة

احنا نجيب كورسي.... و نحطه جنب الكورسي.....نخلي الرفيق يوسفوف ياخد الجورعة بتاعته.... و عقبال ما يجي من اسوان ماشي ان شاء الله

نحط الرفيق عنبوووووف ع الكورسي التاني

ايه رايك يا رياسة

ماكانش يتعز يا فندم .. ما كان من الأول .. الجدع قعد يقولكم استنوا .. جيبوا حد بدالي .. و لا الهوا ...

نستني بقي لما يرجع ..

و كمان اي حاجة في الدنيا ليها كواعد لازم نحترمها .. و بالذات لو كانت لعبة

و في حالتنا دي الطلب ما ينفعش لسببين

1. الكواعد

2. الرفيق عنبوووووف اتحط عالعمبوكة اولريدي ... و القانون صريح في النقطة دي .. القانون بيقول ايه :

لا يتعمبك العضو مرتين في المحاورات ...

و زي ما انتي عارفة .. القانون ما فيهوش ايه ؟؟؟؟؟؟؟؟؟؟؟؟

صح

اسم الله عليكي

نحط بقي الموضوع ده في الفريجيدير يومين لحد ما ابعت عم عبده بالترومبيل يروح يجيب سي الأستاذ من فندق كتراكت ....

نهارك سعيد أوي خالص

[MZohairy]

من انت؟ :lol:

[om marawan]

اجمل مافى المراءة واسوء مافيها ؟

ايه رايك فى

المراءة عنيدة

المراءة ضعيفة

المراءة قوية الشخصية

ماهى مميزات وعيوب مهنتك؟

اهلاوى ولا زملكاوى ياعم الشباب والرياضة؟

ياباشمهندس طه الاخ محمد يوسف بتاع عربى وعلم وكلام من ده اكتبله" المرأة" همزة على ألف مش ع السطر ليوصلك سلك من كهربة الكرسى

تم تعديل 18 فبراير 2010 بواسطة om marawan

[om marawan]

من انت؟ :closedeyes:

ايه ده هو ازاى الاستاذ زهيرى ماخدش دور فى الكرسى هو و حبيب الملايين عمنا سكوربيون

ولو كانوا قعدوا زمان يبقا احنا مالناش دعوة " الكواعد " تتغير

[حسام يوسف]

اول مرة اجي الموضوع من ساعة ما كنت ع الكرسي

وماكنتش عارف والله ان محمد يوسف عليه

وفوجئت انه فى اسوان

لو حد يعرف اى وسيلة اتصال يجيبلي رقم الراجل ده

وانا أجيبلكم حقكم منه :closedeyes:

[MaYousof]

نحط بقي الموضوع ده في الفريجيدير يومين لحد ما ابعت عم عبده بالترومبيل يروح يجيب سي الأستاذ من فندق كتراكت ....

** بيييييب بيييييب .. بيبيب بييييييييييييييييب .. أوووووو أوووووو عاااا **

يظهر طرومبيل عم عبده على خط الأفق من بعيد وهو يزمجر كعادته متأرجحا من أثر السفر .. ويترائى ظل عم عبده وبجواره ذلك المشاغب ذو الشعر الكثيف والذي عاد لتوه من رحلة أسوان المدرسية ..

وبمجرد اقتراب الطرومبيل من شارع المحاورات يترجل الكائن المكوش من العربة ويتجه مباشرة ناحية حارة الطلاينة حيث يقبع السيد سكوب على أحد الكراسي في مقهى الحارة وبعد تحية مقتضبة يميل ذو الشعر الكث على إحدى أذني السيد سكوب ويحدثه هامسا:

- :lol: إيه يابو جنيور اللي إنت عملته ده .. ميس سعاد مشرفة الرحلة ماكانتش مصدقة نفسها لما شافت عم عبده جاي بالطرومبيل عشان ياخدني من أسوان مخصوص .. كان لازم يعني إحراج قدام كل التلاميذ .. وخصوصا البت جيجي ..

الواد شريف قعد يتمقلت عليَّ ويقولي يا نُغّة .. يا نُغّة .. باعتينلك السواق لحد أسوان عشان يجيبك مخصوص .. ده أنت لو في تانية ابتدائي ماكانوش عملو معاك كده ..

وبعدين يابو جنيور إنت سيحتلي قدام كل المحوراتية .. أنا ماكنتش قايل إنها رحلة مدرسية .. أنا مش عارف أودي وشّي من الناس فين دلوقتي ..

وعم عبده واحنا راجعين طول السكة هاريني مواعظ .. "يا محمد يابني مفيش حد يروح أسوان ومايشتريش كيلو كركديه" "لازم تشيل فإيدك نص كيلو خروب وربع دوم" "خدتش معاك كيلو بلح أسواني ليه" "فين يا عم برطمان الملوحة"

هو كان فاكرني رايح أسوان أشتري خزين الشتا ولا إيه ..

بصراحة أنا شكلي بقى وحش قدام الجميع .. وخصوصا جيجي .. أكيد هتبطل تقعد معايا في الفسحة وهتروح تقعد مع سي شريف .. لكن ده بعده .. أنا هاخلي عم عبده يشرحلها القصة عشان ماتحسبنيش نُغّة زي ما شريف قال عليَّ ..

وربنا يسترها مع ميس سعاد هي روخرة .. كويس إن عيد الأم قرب عشان أسكتها بأي هدية ..

على أي حال ..الرحلة كانت جميلة جدا وموقف عم عبده ده أكيد خير ..

يبتعد الكائن المنكوش عن أذن السيد سكوب ثم يردف:

- جبتلك معايا طاقية أسواني إنما إيه .. عَجَبة .. ومتشكرين على التوصيلة بتاعت عم عبده يابو الكرم كله :wub:

تم تعديل 21 فبراير 2010 بواسطة MaYousof

[MaYousof]

يااااه .. عظيم الغروووب

من رحلة

أسوان - كوم أمبو - إدفو - هاويس إسنا - الأقصر

النيلية

التفاصيل الكاملة في موضوع مستقل انشاء الله