كرسي الأعتراف 2 ( حاليآ الفاضلة Dreamwithme )

[Scorpion]

دي كانت كروزة بقي ...

مش اسوان بس .. يبقي ماشفتش اسوان .... يوم واحد ما يكفيش ابدآ ..

و عليه سؤال من التلاتة طاروا ....

نبتدي نعد من دلوقتي .. باقي من الزمن 5 ايام علي العمبوكة ....

خش علييييييييه ...

[MaYousof]

دي كانت كروزة بقي ...

مش اسوان بس .. يبقي ماشفتش اسوان .... يوم واحد ما يكفيش ابدآ ..

و عليه سؤال من التلاتة طاروا ....

نبتدي نعد من دلوقتي .. باقي من الزمن 5 ايام علي العمبوكة ....

خش علييييييييه ...

كانو 11 ساعة في أسوان بالتمام والكمال .. ومالحقناش متحف النوبة

أنا كنت هطق بجد .. المصريين دول ناس عجيبة .. شادّين الرحال الأسوان عشان يتغدّوا .. طب الغدا يتعوض بتصبيرة لحد العشا .. متحف النوبة بقى يتعوض إزاي رحنا الغدا واتلغى المتحف! شوف مخ المصاروة النِوِر بجد مش قادر أفهم المخ راكب عندهم إزاي

هي دي مش أول مرة ليَّ في أسوان .. بس المرة اللي قبلها برده كانت نص كم .. حسبة كام ساعات واحنا في طريقنا لأبو سمبل .. أصل أنا أبوسمبل دي قعدت فيها عشر تيام .. بس الكلام ده كان من 17 سنة ونص :lol:

عموما أنا واخد أكتر من الفين صورة وشوية فيديو على ماقُسُم من الرحلة دي هاحطهم في موضوع خاص للّي هاوي صور وتاريخ

أنا مستني أسئلتكم .. وهاجاوب على الاسئلة السابقة ابتداءا من الليلة إنشاء الله :wub:

[shiko]

يظهر هارى بمنزل ال دروسلى محدثا هافلباف عن رحلته إلى أرض هوجورتس وكيف واجه كائنات التورينتو ...تلك الحيوانات السحرية التى ظهرت فى بيت سنايب...والمهمة التى كلفه بها اللورد فولدمورت لمواجهة جماعة العنقاء...

يرتدي هاري عبائته السحرية ويختفي ...

ايه جو هارى بوتر ده...هو حضرتك جاى منين قولتلى ...انا نسيت انا فكرة رحلة مدرسية ..بس ماعرفش انها لارض هوجورتس

على العموم حمد الله على السلامة يا استاذ بوتر ...وان شاء الله يكون اجازة سعيدة ونعيد تمديد الاسلاك الكهربية ...وضبط الفولت .على ان تحضر ريا بعصير العناكب الممتاز ..."جو الجزء السادس"...

ونجهز بالاسئلة وياريت ياجماعة حد يصحى عنبه ويقوله نمته طولت اوى جنب الكرسى ...

ولو حد شاف لماضة ,,,ورضوى ينادى عليهم ويقولهم حد يروح ينقذ شيكوز من جماعة العنقاء .....

[engtaha]

ياقهلا ياقهلا حمد الله على السلامة

هجبلك اسئلة علي قد غلاوتك و معزتك عندي

الاسئلة :

هل مفاجأت جلوسك على كرسي الاعتراف لها وقع في نفسك ؟ وماهو شعورك وانت على الكرسي ...

أكثر شيء عاجبك في المنتدى؟

أكثر شي مضايقك في المنتدى؟

أحب الناس الى قلبك " من الأعضاء " ؟!

ماهو القسم الذي تفضله في المنتدى ؟

هل أنت ممن يقتنعون بسرعه؟

ماالشيء الذي يجعلك تنفجر من الغضب؟

ماهي أحسن صفه فيك , وماهي أسوء صفه فيك؟

توقيع لفت إنتباهك بالمنتدي؟

ماهو شعورك عندما يطرح عليك سؤال تعجز عن الرد عليه؟

عضو مواضيعه وردوده تعجبك ويستحق لقب مبدع بالنسبه لك ؟

اذكر لنا موقف طريف حدث لكِ ؟

اذكر لنا موقف محرج تعرضت له ؟

اسعد واجمل موقف حصل وتفتخر به حتى الآن ؟

اسواء موقف او ذكرى حصلت لك ؟

ماهي نقطة ضعفك ؟

كتاب قرأتهِ ... وما زلت تعود إليه بين فينة وأخرى؟

هل تتمني أن تكون في بلد آخر هذه اللحظة ... ماهو البلد؟ لماذا؟

آخر موضوع شدك ونال على إعجابك في المنتدى ؟

ماهي المواضيع التي طرحتيها اذكرعلى الأقل (5) مواضيع..

وما احبها اليك .؟ .. ولماذا؟؟

ما مدى الاتفاق والاختلاف بين عقلك وقلبك......ومن اقوى فيهما....؟

ايه اكتر حاجه بتحبها في كل من :

الاكلات

المشروبات

المطاعم

الفصول

الالوان

الاغاني

الافلام

المسلسلات

المسرحيات

[MaYousof]

اسئلة HanaaOsama:

- ملاحظتي لاجابات المتكهربين (قصدي المعترفين) نلاقي ان السن القانوني لعزاب المنتدي يعني 30, 31, 32 كدا يعني, ده بقي لاسباب ماديه فقط ولا لاسباب اخري؟ ما رأيك استاذ ميوسوف?

عن نفسي, لأ أظن إن الاسباب مادية فقط.

[MaYousof]

أسئلة محمد العنبى:

- تعمل ايه لو شغال مهندس فى شركه ومطالب بزيادة انتاجية العمال ولما جيت تتكلم مع العمال قالوا لك المرتبات تعبانه يعنى من الاخر على قد فلوسكم؟

خليني أذكر الإطار العام اللي أنا بانتهجه عند تعاملي كرئيس مع مرؤوسيه وهو إطار معروف من قرون ووضحه الخليفة معاوية رضي الله عنه فيما يعرف عند العرب بشعرة معاوية. حلو الكلام؟ حلو smk:

بعد كده بقى ياسيدي عينك ماتشوف إلا النور :blink:

العقد اللي بين الشركة والعمال مش عقد مقاولة بيعطي أجر مقابل عمل يتم إنجازه وإنما عقد عمل بيعطي أجر مقابل استخدام كل مهارات العامل المنصوص عليها خلال كامل ساعات العمل, واللي مش عاجبه الباب يفوّت بعير وأربع نوق في نفس واحد. أنا لو ما أخدتش الأوبتيمام أوت بوت من العامل اللي تحت إيدي خلال ساعات عمله مايلزمنيش بنكلة. وللأسف, أنا زي ما الانجليز بيقولوا ruthless, يعني بالعربي ماعنديش يامّا إرحميني, وبجد ماعرفش أبويا في الشغل. أنا بأفعّل نظام الثواب والعقاب بشكل كبير جدا وصارم جدا جدا .. جدا. والثواب مهم جدا جدا .. جدا, والعقاب أهم منه دونما ظلم, وبدونه تظلم العامل الصالح بشكل كبير للغاية, وأنا لا أرضى على نفسي الظلم وهي مدركة له. من لا يعمل لا يخطئ فهتلاقيني أشجع واحد عمل غلطة لو كان سببها عدم التهاون أو الكسل! أشجعه بحرارة وأكافئه كمان, لأنها دليل على العمل, مع التنبه على استدراك أسباب الخطأ واعتبار الوقوع فيها مرة أخرى تهاون يعاقب عليه من يقع فيه لاحقا. لو ماشجعتهمش يبقى عندهم حق العمال اللي مش عايزين يشتغلوا عشان خايفين يغلطوا فيتعاتبوا. الغلط وارد وانت في غرفة العمليات بتعمل قلب مفتوح لمريض. لازم نقبل حدوث الخطأ لو عايزين الناس تشتغل دون خوف. كمان لازم تعطي حق اتخاذ القرار لبعض المميزين من المرؤوسين دون الرجوع لرئيسهم عند الضرورة, مع إيضاح إنهم غير مسئولين عن العواقب مادام انتفت في قراراتهم شبهة التهاون في اتخاذهم ليه. يا عنبي أنا لما كان يجيني واحد اصبابه الهلع الشديد بسبب مشكلة حدثت في العمل كنت باسأله بالنص كده: فيه حد فيكم عينه اتفقعت؟ يقولي: لأ يا مستر, أروح سائله: طب حد أمه ماتت؟ يقولي: برضك لأ يا مستر, أروح سائله: يعني المشكلة حتى لو كانت ضياع مليون جنيه ممكن تتعوض تاني؟ يقولي: أيون يا مستر, أقوله: جميل جدا, يبقى لازم نهدا خالص عشان نعرف نفكر صح ونتدارك المشكلة أيا كان حجمها, لأن اللي حصل حصل خلاص, والندب والولولة زي الوَلايا ماظنش هيصلح اللي حصل, و مادام المشكلة مش عين اتفقعت ولا أم ماتت يبقى ممكن تداركها, والهلع هو اللي ممكن يغرق المركب كلها بدل ما يوصلنا لبر الأمان. أخيرا يا بون بون, أنا كنت باستخدم لوحة يكرم فيها العامل المثالي كل شهر معنويا ويكافئ ماديا عشان يكون مثال يحتذى بيه. يارب أكون جاوبتك وماقعدتش أحكي قصص مالهاش لازمة :blush2:

وتذكر, كن في الحق كنصل السيف, لكن .. لا تقطع بنصل سيفك تلك الشعرة.

- راكب عربيتك وهباااا خبطت عربية واحد لقيت الراجل جاى يمسك فيك هتتعامل معاه ازاى؟

مبدئيا يا بون بون, أنا راجل طول بعرض بارتفاع, وشعري منكوش زي ما أنت شايف كده. طبعا دي عوامل منحتها الطبيعية لشخص غلبان مثلي عشان تستخدم عند الطلب. فيه ناس بتفهم, لو أنت كلمتها بالذوق واعترفت بخطأك وكنت مستعد بشكل كامل على تحمل عواقبه وبيكونوا متفاهمين. وفيه ناس, تجيبها يمين, وبعدين شمال, وترجعهم يمين تاني, يا فندم, أنا اسف, شوف طلبات حضرتك إيه وانا تحت أمرك, يافندم أنا حاطط نفسي مكان حضرتك وحاسس بيك, أنا حقيقي مكانش عندي نية في إصابة سيارة حضرتك ومعاها سيارتي. يا فندم أنا من إيدك دي لإيدك دي.

عدّاني العيب يا عنبي؟

طب لو أخدته الجلالة وساء فيها, خصوصا إنه شاف مني إسلوب متعاون, فحب يخرّج عقدة النقص اللي عنده عليَّ استغلالا للموقف؟

هو فيه احتمالين في الحالة اللي زي دي:

يا الرجل ده أمه لسه عايشة وكانت بتدعي عليه في اللحظة دي.

يا الله يرحمها ماتت وهي غضبانة عليه.

- رايح انترفيوا مهم قووى وانت ماشى لقيت شوية شباب بيعاكسوا واحده وبيتحرشوا فيها ولو وقفت وتكلمت معاهم هيضربوك وفى نفس الوقت الانترفيوا هيضيع منك تتصرف ازاى؟

شوف يا عنبي, اتفقنا إني للأسف شايف الناس (ربما بالخطأ) اندال بالفطرة angl::

الناس المحترمة بتحارب الندالة الفطرية دي لحد ما بتبقى شبه منعدمة عندهم. وبالخطاء, أو عن قصد, في مرات قليلة, ممكن الندالة دي تطفوا على السطح وتتغلب على المبادئ الأخلاق.

أكذب وانا بجاوبك واقول الأخلاق المبادئ؟ لو انت كنت ماسك عليَّ ذلّة هاكذب. لكن إيه داعي إني أكذب دون سبب حقيقي؟ عشان أطلع شيك قدام الناس؟ شي لله ياناس, اللي بيدوهولي يمنعوه.

كان هذا استهلالا لابد منه ..

أتصرّف إزاي؟

هاطلع ندل يا عنبي :blush2:

- هل عصبيتك اثرت على حياتك العمليه؟

ماظنش, أنا مابامنعش نفسي إني أكون عصبي. لكن مش بالسهولة اللي ممكن أخلي موقف ينرفز جدا قادر على إنه يخليني أتصرف تصرف ممكن يضر بي أدنى ضرر. مثلا, الراجل اللي أنا خبط عربيته فوق ده, في جميع الأحوال أنا عارف إني لو عايز أجننه من الأول وما أخليهوش يطول مني خمسة جنيه على بعض هاعرف أعمل كده, لكني أستحرم أعمل كده. لما هو يسوء في التطاول بيحلل من وجهة نظري اللي هاعمله فيه. لكن أنا لو عارف إنه ممكن يعملّي مشاكل تأكد إني مش هاتعصب عليه angl::

وعلى فكرة أنا ورايا محامين تقال قوي :closedeyes:

- ما هو رأيك فى الموضه بتاعت ايام لما كنت فى الجامعه واليومين دول؟

مابفهمش في الحجات دي يا بون بون ..

أنا عمري ماكنت بتاع جل وديودرانت وسوالف وسكاسيك ومانطالونات جربانة ومهريه م الرُكَب وكلام منده :blush2:

- امتى قولت طز واللى يحصل يحصل؟

هنا. كذا مرة :closedeyes:

- ما هو رأيك فى الحب الاول وهل قدرت تنساه ولا؟

الحب جميل, أول, تاني, تالت, رابع, مارشدير, دايما جميل. ولو الواحد حب حد ماظنش بينساه.

- هل تصدق كل ما تقرأه؟

ولا حتى رُبعه. بس أقرأه بكل تأكيد وأفكر في دوافع كاتبه دوما.

- امتى حسيت انك بتتكلم اكتر مما تعمل؟

هنا :closedeyes:

- فى توقعك مين رئيس مصر القادم؟

لو بتتكلم على انتخابات 2011, لو لسه عايش, حسني.

مش حسني اللي يسيب لحد المنصب مادام لسه فيه الروح, حتى لو كان هيسيبه لابنه فلذة كبده اللي من صلبه ولحمه ودمه. حسني رجل عسكري ومايعرفش أبوه في الحجات دي. إحنا بس اللي بنعشق تسطيح الأمور.

من أتوقع إنه يمسك بعد ما حسني يموت؟

حقيقي مش عارف أتوقع حد معين.

هل أتوقع إنه يكون جمال ابن حسني؟

لا يوجد مايؤكد بشكل قطعي ولا يوجد ماينفي بشكل قطعي. لكن بالنسبالي, ومع احترامي الشديد لجمال مبارك كشخص مثقف, طموح, وقيادي, أنا بكل ما أوتيت من قوة ضد أن يكون رئيس مصر بعد موت حسني هو جمال تحديدا تحديدا. ومستعد أكون من المحاربين لشيء زي ده عند تأكده, لأني أرى في أمر زي ده تسفيه فج وبشع أبشع صورة لكل المصريين بأن يتم اختزال قدرة قيادة مصر في إبن واحد ليها. أنا متعايش سلميا مع حسني كرئيس ولما بانظر ليه بانظر لكل أفعاله وتاريخه دون تطرف مني أو إصرار إن حسني طاغوت أو شيطان أو ملاك أو كل الصفات المتطرفة اللي المصريين بيعشقوها دي.

[MaYousof]

أسئلة engtaha:

- دراستك ايه وفين؟

أنا معايا BSc في الرياضيات من جامعة القاهرة.

- بتشتغل ايه أوشغلك عبارة عن ايه؟

باشتغل .. كمبيوترجي

- زولحفتك اسمها ايه؟

سمسمة :closedeyes:

- عرفت منين ان عنيها خضرا؟

مرة كنا قاعدين مع بعض ف البلكونة ف ساعة صفا, قمت بصيتلها كده, وبصيتلي كده, رحت همستلها وقلتلها: طب عيني في عينيك كده. لاقيت النني بتاع عينيها اخضر فسدقي, حواليه هالة من الأخضر الزرايعي المزهزه :closedeyes:

- ايه موضوع المراجيح؟

ده كان علاج بسبب علّة أصابتني وانا صغير, كتبهولي واحد دجال من غجر المجر.

- مسافر فين ومع مين؟

أسوان ورادد على الأقصر. مع أهلي.

- هاتجيبلنا ايه معاك من السفر ولمين؟

أنا جبت حاجات شخصية لكن كهدية ماجبتش لحد من المحوراتية هدية غير للحاج أبو جونير smk:

[MaYousof]

أسئلة مغتربة:

- اسالك كباحث فى اللغه العربيه عن منظور حضرتك للحلول الفعاله من وجهه نظرك لتتدهور حال اللغه العربيه عند الناطقين بها و كيفيه مواجهه التحديات الملمه بها بسبب طغيان ثقافه العولمه بما فى ذلك عولمه لغه العالم اجمع؟

اختي العزيزة مغتربة, أنا شاكر جدا على اسئلتك القيمة دوما ..

خليني أوضح نوعية دراستي اللي أنا اهتميت على جعلها في خدمة اللغة العريية.

عنوان الرسالة: "Diacritics Impact on the Effectiveness of Arabic Information Retrieval"

الـ Diacritics بالنسبة للعربي يعني التشكيل وكمان الهمزات بكل أنواعها ومعاهم علامة المد والنقاط اللي فوق الهاء وتحت الياء.

علامة المد مثلا موجودة في أبجدية الأسبانية, والنقاط موجودة في أبجدية الألمانية, وهتلاقي لغات كتير فيها حركات زي الفتحة والسكون والشدة والهمزة إلخ إلخ. بس العربي الموضوع ده فيه مش بس كثيف جدا (التشكيل بس ليه 14 شكل مختلف), لكنه مركّب تركيب تكعيبي (مش هزار) smk:

ده باختصار معنى Diacritics angl::

احنا ممكن للتوضيح نبسط كلمة Information Retrieval في إنها محركات البحث, لكن هي أوسع من كده بعض الشيء.

أنا الدراسة بتاعتي كانت مختصة بالـ Effectiveness وليس الـ Efficiency أو بالعربي الفعالية وليس الكفاءة, عشان الكفاءة دي بحر تاني. وكل كلمة من دول ليها تعريف رياضياتي محدد ومنهجية يتمشي عليها.

ترجمة بقى لعنوان الرسالة بالعربي: "دراسة تأثير علامات الحروف على فعالية استرجاع المعلومات باللغة العربية"

ملخص الرسالة أو ما يسمى بالـ Abstract:

Diacritics in Arabic language are used to represent the phonetic sound of the letters. They are more often left out in a written text, which is a major reason for low effectiveness in retrieving Arabic information. This study introduces two approaches in an attempt to increase the effectiveness of Arabic retrieval. The full retrieval approach returns more relevant results than present systems. It enables the retrieval system to recognize similar words without the confusion arise due to different diacritization. The fuzzy retrieval approach investigates the behavior of diacritics to set up a ranking algorithm depending on the degree or relevance between Arabic words.

وجهة نظري بعد اللي أنا قلته ده مش هتمثل شخص متخصص أساسا في العربي. لكني كمصري مافيش مانع عندي إني أفتيلي شوية :closedeyes:

مافيش مجمع أعلى للغة العربية مشتركة فيه جميع الدول الناطقة بالعربية يا مغتربة. فيه عروبة وجعجعة أيوة, لكن مافيش مجمع موحد, وكل دولة من دول العروبة عندها مجمع لغة عربية مالهوش دعوة ببقية الدول العروبية التانية. عشان كده للأسف الأساف مافيش معيارية موحدة في المصطلحات العربية على النطاق العربي الشامل. وده خطر كبير جدا على اللغة, وشجّع مناهضين كتير على بدء النخر في جسم اللغة والخروج عليا وتلفيق الأكاذيب عنها بشكل أقل ما أود وصفه بيه إنه منحط ودنيء. المشكلة إن محاربة الخطر ده عايز إيمان بالعربية مش موجود عند عرب الزمن ده, اللي لم يستطيعوا كعروبين إنهم يبدأوا رمضان مع بعض وعيد الفطر مع بعض. يبقى استحالة هيقعدوا مع بعض عشان اللغة. من الآخر, مفيش أمل منظور إطلاقا :closedeyes:

كمان للأسف بين أبناء مصر مافيش استهجان لإستخدام الانجليزي بشكل مخزي في بعض الأحيان, خصوصا بين متفرنجين الجيل السيس اللي حتى الانجليزي مش بيعرفوه لكن عايشين في دور الأجانب ومحسسيني إن العربي ممكن بيوجعلهم ضرس العقل لو اتكلموا بيه. واكتر حاجة تنقطني لما ييجي واحد ينطق كلمة بالانجليزي فيها حرف B وينطقه P, طب ده لا طال عربي ولا انجليزي :closedeyes:

الداهية إن مافيش أي مشكلة عند المصريين كلهم - إلا حفنة ممن رحمهم الله - إن الناس تتريق على اللغة العربية, ومافيش مشكلة عند حد إن إعلان مصري موجة للمصريين يكون ناطق من الأول للآخر بالانجليزي, قال يعني تعليم أجنبي. والله وقاحة وقلّة علم.

الحل إن الناس تستوعب إن العربي لغة أكبر وأكتر بكتير من مجرد قادرة على استيعاب كل الآداب والعلوم, وإنها لغة إبداع, وأحسن من اللغات الخواجاتي ميت ألف مرة, ولغة جميلة جدا وفخر للبشرية كلها, ومن أقدم اللغات الحية, ولازم يبطلوا عقد النقص اللي مبهدلالهم أفكارهم. عندك روسيا مافيهاش حد بيعرف انجليزي. والصين كذلك. ومافيش حاجة عندهم اسمها لغة بشرية غير قادرة على استيعاب العلوم وتطورتها. بجد تخلف وجهل ولازم يتحارب مفهوم إن العربي لغة قاصرة. ثقافة العولمة خطر فقط عند الناس اللي ماعندهمش أصل, والظاهر والله أعلم إن كتير من ولاد البلد دلوقتي ماعندهمش أصل :blush2:

- ما هى الوسائل و الاجراءات الازمه لتبسيط تدريس النحو بشكل يحبب الدارسين له و يجعل تفهمه عمليه اكثر سلاسه (و دا سؤال يهمنى بشكل شخصى جدا لان مقدرش اقولك اد ايه العلاقه جميله بينى و بين مستر نحو)

اعتقد إن الواحد محتاج 1. يحب النحو. 2. مايحسش تجاهه بأي رهبة. أنا شايف إن النحو مش صعب زي ما ناس ممكن تكون حاسة. بالعكس, ده بجد سهل للناطقين الأصليين, واسهل من علوم كتير تانية, بس لازم اقتناع بأهميته. أنا أذكر كتاب من كتب وزارة التعليم المصرية كان بيوزع على الطلاب في سنة أولى ثانوي ويضم كل قواعد اللغة. مش فاكر اسم الكتاب إيه لكنه كان كتاب فوق الرائع. أظن اسمه "قواعد اللغة العربية". هو من الكتب اللي المفروض الطالب يحتفظ بيها طول التلات سنوات بتوع الثانوي بس احنا بنتفزليك ونجيب مدرسين خصوصي ونروح مراكز دروس خصوصية وفي الآخر عادي جدا إن واحد يدخل هندسة مابيعرفش "يكتب" عربي مادام حفظ الملزمة والكتاب الخارجي ونسي كتاب المدرسة الأساسي. يا مغتربة إنك بتتكلمي عن النحو بينما الكتابة .. أيوة الكتابة اللي بندرسها من واحنا في أولى ابتدائي .. مابنعرفهاش! أنا مستعد أعمل عبيط لما حد ييجي عند الـ ذ ويكتبها ز .. هنقول بيكتب بالعامية .. وانا ما عنديش مانع من الاستخدام الغير رسمي للعامية في الكتابة .. آآآآآآآآآجي بقى عند واحد يعمل نفسه حامي حمى الأمة ويتفزلك في العربي والـ ز يكتبها ذ :blush2: طب ده لا طال فصحى ولا طال عامية :blush2: المشكلة إني إنسان عندي عنصرية ضد الناس دي .. باكرههم يا مغتربة .. باكرههم باكرههم باكرههم :blink:

لازم أروح لدكتور نفساني لأني باكرههم بجد angl::

- هل ترى ضرورة لاستمرار الربط بين اللغه العربيه و الثقافه الاسلاميه بشكل عام الى حد اعتبارها الوعاء لها

اللغة العربية في صورتها الحالية مختلفة في عن اللغة اللي كانت موجودة من قولي 1300 سنة. كلمة لغة فصحى اللي بنستخدمها كلمة أساسا مستجدة! ولا تعني اللغة اللي كان الناس بيتكلموها من 1300 سنة, وإنما تعني اللغة المعيارية المعاصرة (تكتب بها الكتب المدرسية, تقرا بها النشرات الإخبارية, إلخ إلخ). طبعا النحو في العربي كان ثابت بشكل كبير جدا لكن التراكيب (مثل تقديم المفعول على الفاعل) والمصطلحات (بالآلاف) مختلفة بشكل نسبيا مش قليل. اللي حافظ على النحو هو ارتباط اللغة بنص القرآن الكريم اللي كان أول أساس للنحو العربي (العربي قبل القرآن ماكانش كله بنفس النحو). لكن استقرار النحو العربي لأسباب دينية لا يعني إن غير المسلمين مش مستعدين يبدعوا بالعربي (إليا أبو ماضي وجبران خليل جبران كتبهم ترجمت لكل لغات العالم وهم من غير المسلمين)

لا استطيع إنكار تفرد العربية بصفة ثبات النحو منذ نزول القرآن الكريم لكن ده مش معناه إنها لغة دينية. ولا حتى معناه إنها لغة مقدسة. هي لغة نزل بها نص مقدس وده غير كافي إنه يصبغ قدسية على اللغة بصورتها قبل الإسلام وبعده. لكن صفة ثبات النحو صفة أصيلة إن ذهبت ذهبت معها اللغة برمتها واصبحت لغة مختلفة. لا مانع من وجود لهجات مختلفة ولغات فرعية (زي ما المالطية مثلا لغة فرعية من العربية). لكن لما دستور انجلترا ينص على إن الانجليزي هو لغة البلاد يبقى لازم الكلام اللي في كتب المدارس يكون كله في القاموس الانجليزي القياسي. ماجيش أنا بقى واقول لأ عايزين كتب المدارس بالعامية, أهو ده مخالف للدستور.

أخيرا, وجود صفة ثبات النحو في العربية لا يجعل من الإسلام (أو الحضارة الإسلامية) وعاء للغة بأي شكل من الأشكال. دي مجرد صفة مميزة. زي مثلا ما اللغة العربية تتميز بثلات حالات للاسم, اللغات السلافية تتميز بستة حالات, اللغة العربية تتميز بثبات القواعد. بس! زي العبري كده. قواعد ثابتة. بس أصل العبري مش لغة مؤثرة عالميا. لغة تاريخية وعريقة نعم, لكن دون تأثير حالي. بينما العربي (250 مليون متحدث) من ناحية التأثر الدولي ييجي في المرتبة الخامسة بعد الانجليزي, الفرنساوي, الأسباني, الروسي (على الترتيب), وقبل الألماني, الطلياني, البرتغالي, الصيني (مليار متحدث بلهجة الماندرين), الهندي (كمان مليار غيرهم). الموضوع مش بالعدد. الفرنساوي والروسي مثلا أقل في عدد المتحدثين من العربي لكن تأثيرهم الكلي في العالم المعاصر أكبر من العربي. عشان كده العبري عريق وتاريخي لكن ولا ليه أي لازمة في العالم المعاصر. وقواعده ثابتة عشان النصوص الدينية القديمة بيها, غيرت القواعد مابقاش عبري.

[MaYousof]

- ما هى ابرز التحديات الخاصه بتدريس اللغه العربيه لغير الناطقين بها؟

سؤال جميل smk:

شوفي يا مغتربة, دراسة اللغة العربية لغير الناطقين بها على نوعين:

1. دراسة الفصحى (للتخصصات المتعمقة - تلات سنين فأكتر)

2. دراسة عامية (ودي تلات مدارس, المصري والشامي هم المدرستين الكبار, ومدرسة صغيرة عراقي!) أحمدك يا رب إن مفيش مغربي :blush2:

أنا على معرفة بدارسين من كل المدارس (الجنسيات اللي أعرفها فيهم ألمان, تشيك, روس, أمريكان). بصراحة, أنا لست مع تدريس العربية بقواعد غير القواعد الصحيحة. بس ساعات المواقف تحكم, خصوصا إن عرب هذا الزمان المقعقعين مابيعرفوش يتكلموا عربي!! ييجي واحد ألماني يتعلم العربي الفصيح ويتكلم بيه هنا في مصر, ولا هو هيفهم المصريين ولا لمصريين المجعجعاتية المهيصاتية هيفهموه :blush2: عادة بيلهيهم التفنن في الجعجعة عن تعلم العربي اللي بينسبوا نفسهم ليه :closedeyes: وهو ده التحدي يا مغتربة .. إزاي الغير ناطق يتعلم الفصحى ويضمن إنه يفهم ويتفهم في كل مكان في الدول العروبية (العروبية - نسب مؤنث من عروبة)

- كيفيه تفعيل الانتشار المامول للغه العربيه فى غرب افريقيا كامتداد لفتره ازدهار سابقه يخشى عليها من الاندثار؟

سؤال جامد :closedeyes:

مش عارف اجاوب إزاي .. حاسس إني عايز أجاوب على سؤال تاني بيقول "كيفيه تفعيل الانتشار المأمول للغة العربية بين العروبيين المستعربن عشان يعرفوا يكتبوا بيها بل ويقرأوها من الأساس"

أنا هجاوب على السؤال التاني ده.

يبطلوا جعجعة ويتلهوا في خيبتهم. وأول ما خيبتهم تِقل هيبتدوا يعرفوا عربي. ممكن ساعتها بقى يكونوا عامل على انتشار اللغة العربية في السنغال ومالي وكل غرب أفريقيا. لكن البحث عن انتشار العربي في غرب أفريقيا واحنا أساسا مانعرفهوش, مش ممكن, فاقد الشيء لا يعطيه :closedeyes:

[مغتربة]

رد قيم

كعهدنا بك استاذ محمد

اسفه ان كنت ارهقت حضرتك فى الرد على استفساراتى

كل الشكر لك

[MaYousof]

سؤال om marawan الوحيد:

- السؤال مؤرقنى الحقيقة :blush2: هو محمد عاوز جركن ال DDT فى ايه ؟؟؟؟؟

أنا بعد اشتراكي في المحاورات يا أم مروان لاقيت إني لازم أعيد ترتيب أولوياتي في الحياة smk:

وأصبح وجود جركن DDT في حوزتي من أولى الأولويات :closedeyes:

وأيقنت حق اليقين إن الجركن ده ليه يوم :closedeyes:

ولازم ولابد أحوشلي واحد :closedeyes:

واشيله .. لوقت عوزة :blush2:

هو عموما جركن 25 لتر, مش جالون صغير :blush2:

[MaYousof]

أسئلة engtaha:

- اجمل مافى المراءة واسوء مافيها ؟

مش عارف.

ممكن نخلي السؤال إيه أجمل حاجة ممكن تكون في المرأة وإيه أسوأها؟

ده أعرف أجاوب عليه smk:

الولاء ممكن يكون أجمل حاجة.

وأسوأها الغدر.

- ايه رايك فى المراءة عنيدة؟

على روحها :closedeyes:

- ايه رايك فى المراءة ضعيفة؟

مافتكرش فيه مرأة ضعيفة, من غير ما أجيب أدلة وبنصوص كمان.

فيه مرأة غبية :closedeyes:

- ايه رايك فى المراءة قوية الشخصية؟

جميلة جدا, بس على مين بالضبط؟

- ماهى مميزات وعيوب مهنتك؟

مميزات: مجال جميل بالنسبالي.

عيوب: مش أكتر من عيوب أي شغل.

- اهلاوى ولا زملكاوى ياعم الشباب والرياضة؟

أنا بجد ماباتفرجش على ماتشات كرة قدم محلية. وبوجه عام أفضّل وجود دوري قوي على وجود فريق قوي.

بصراحة لما بالصدفة باشوف لقطة من ماتش في الدوري المصري "الممتاز" بيجيلي هاجس كده خير اللهم اجعله خير إننا أيام الجامعة كنا بنلعب كرة قدم أحسن سنة صغننة من اللي جايبينه على التلفزيون ده :blush2:

عموما دي تهيؤات مش أكتر :closedeyes:

تم تعديل 22 فبراير 2010 بواسطة MaYousof

[رضوي]

السلام عليكم ورحمة الله وبركاته

حمدالله ع السلامة

اخبار أسوان ايه ؟

والجو هناك ............ أكيييييييييييد كان حر مووووووت

يارب تكون استمتعت بالرحلة

شيكوووووووووووووووووو........................ ياااااااااااااااااه اخيرا لقيت حد بيحب هاري بوتر معايا

حبيبتي شيكو حبيبتي

الاخ مايوسف

فاصل ونواصل

راجعييييييييين بالاسئلة

ان شاء الله

انتظرونا

[om marawan]

سؤال om marawan الوحيد:

- السؤال مؤرقنى الحقيقة wst:: هو محمد عاوز جركن ال DDT فى ايه ؟؟؟؟؟

أنا بعد اشتراكي في المحاورات يا أم مروان لاقيت إني لازم أعيد ترتيب أولوياتي في الحياة

وأصبح وجود جركن DDT في حوزتي من أولى الأولويات

وأيقنت حق اليقين إن الجركن ده ليه يوم

ولازم ولابد أحوشلي واحد wst::

واشيله .. لوقت عوزة :closedeyes:

هو عموما جركن 25 لتر, مش جالون صغير :rolleyes:

بجد انا احييك على ردودك على الأسئلة لانك أضفت قيمة رائعة للاجابات وخاصة فى موضوع اللغة العربية اللى فعلا أعشقها

هأقولك بأه سؤال تانى يونس اخوه عشان مايزعلش

أفهم من كده انك تؤمن بمبدأ " الابادة " لأشخاص أراءهم مابتعجبكش :blink:

أصل انا الأول كان ينتابنى الاحساس ده لحد مع الوقت فعلا بقا عندى تقبل اكتر للآخر :lol:

[لماضة مصرية جدا]

السلام عليكم و رحمة الله و بركاته

أهه يا شيكوز,....... أنا و خالتك رضوي جايييييين مدردبين ورا بعض اهه......

استاذ محمد

حد يبقي في اسوان.... و يرجع.....القاهرة.... و ايه كمان داخل ع المنتدي.....كده فعلا effective.....مش efficient.... !!!!

توكلنا ع الله

1- ليه منظر الغروب بيستهويك..... ايه الاشخاص اللي هلوا عليك خير اللهم احعله خير و انت سرحان في الشمس و هي بتعمل فشش فششاش....(وش عادل إمام في مدرسة المشاغبين)

2- امتي تاخد قرار ان المنتدي ده كلام و طق حنك.....و مش هرجع هنا تاني؟؟؟

3- لو حد جرحك اوي....بتتعامل معاه ازاي؟؟؟

4- بتعرف تقول انا آسف.... و لا بتحب تعبر عنها بطريقة تانية؟؟؟

5- نصيحة ممكن تقولها لاخواتك البنات......أيون هات شعرك بقي علي جنب...و احوبك الكوفية....قدامك المكرفون....يالا ذيع؟؟؟

6- محفظتك...... ايون اطلع بيها.....فيها حاجة مميزة..... ايه بقي و لمين.. و ازاي و امتي و فين......(كتفووووه... خلوه يعترف.... عنبوووووووو حرام عليك قوووووم مافيش حد غيرك هنا م المجندين......يا جودعان حد يكب مية مع سلك كوهربا..... )

7- البس الخوذة.....اركب آلة الزمن.....هتعيش ف انهي وقت و ليه؟؟؟

8- لو هتمسك طباشيرة و تشخبط ع السبورة......هتكتب ايه..... بس خلي بالك فصل تالتة اول هنضمه علي فصل تالتة تاني و كلهم هيجوا يتفرجوا ع السمبورة

9- بنوتة معجب بيها موووووت جت و حكتلك انها معجبة بصاحبك الانتيم....و انت عارف انه مالوش في الالتزام....(النسخة الهندية من جعلوني مجرما.... ) تعمل ايه؟؟

10- كلمة واحدة توصف

الحياة

السفر

الغدر

الانكسار

السذاجة

الغباء

و طبعا..........سمسمة

و بس خلاص

فوتك بعافية

معلشي نسيت

سؤال مش ممكن تجاوب عليه؟؟؟؟؟؟؟ ايه بقي...... ضحكات شريرة متقطعة........ wst::

[MaYousof]

سؤال om marawan الوحيد:

- السؤال مؤرقنى الحقيقة wst:: هو محمد عاوز جركن ال DDT فى ايه ؟؟؟؟؟

أنا بعد اشتراكي في المحاورات يا أم مروان لاقيت إني لازم أعيد ترتيب أولوياتي في الحياة

وأصبح وجود جركن DDT في حوزتي من أولى الأولويات

وأيقنت حق اليقين إن الجركن ده ليه يوم

ولازم ولابد أحوشلي واحد wst::

واشيله .. لوقت عوزة :closedeyes:

هو عموما جركن 25 لتر, مش جالون صغير :rolleyes:

بجد انا احييك على ردودك على الأسئلة لانك أضفت قيمة رائعة للاجابات وخاصة فى موضوع اللغة العربية اللى فعلا أعشقها

هأقولك بأه سؤال تانى يونس اخوه عشان مايزعلش

أفهم من كده انك تؤمن بمبدأ " الابادة " لأشخاص أراءهم مابتعجبكش :lol:

أصل انا الأول كان ينتابنى الاحساس ده لحد مع الوقت فعلا بقا عندى تقبل اكتر للآخر wst::

طب أنا راضي ذمتك يا أم مروان ..

بذمتك كده ياشيخة .. وجاوبيني وماتنفضيليش .. بذمتك .. جركن 25 لتر كافي إنه يبيد المسفسطين والسفهاء من وسط 11 ألف عضو؟

أنا عندي تقبل كبير جدا لأنواع كتير من الآخر .. لو قلتلك أنا ممكن أتقبل أنهي أنواع من الآخر ممكن أسبب للمحوراتية كلهم صدمة كبيرة. هل ده ينفي إني إنسان غير عنصري بنسبة 100%؟

بالتأكيد لأ.

أنا مش قادر حتي الآن إني أتخلص من عنصريتي ضد المسفسطن, السفهاء, والمتخلفين. لو تمّيت 40 سنة دون حل في الموضوع ده تأكدي إني هالجأ لدكتور نفساني. أنا أتمنى إن واحد ناموسة أو دبور كبير يجي يزن على خراب عشّه جنب ودني وابقى قادر على رسم ابتسامة بلهاء على وجهي واحس إني كول وبيس وآخر انسجام. لكن يا أم مروان, أنا بيجي واحد من الزنانين دول يزن من هنا وأنا يا أم مروان عفاريت الدنيا كلها تتنطط قدام عيني من هنا. تقوليش أمريكاني أبيض من أيام الخمسينات ركب جنبه واحد أسمراني, أنا بابقى أسخم.

عموما جاوبيني على السؤال, يمكن تلاقي في إجابتك رد على السبب في احتفظي بجركن الـ DDT.

تحياتي :blink:

[رضوي]

السلام عليكم ورحمة الله وبركاته

عدنا

النهاردة فيه شاي اخضر ........ عن نفسي بفضله عن الشاي الأحمر

مين يشرب شاي اخضر ؟

أستاذ مايوسف

فاكر أول مرة تروح المدرسة !!!!!!!!!!!!!!!

ياتري كنت بتعيط زي معظم الاطفال ولا........؟

لحظة الم مش قادر تنساها ؟

لحظة نجاح غيرت طعم الدنيا ؟

مين بس اللي مضايقك ؟

كام أمنية لسة ما اتحققتش في حياتك ؟

قرار لازم تاخده .......... ليه مستني ؟

مين أكتر حد في المحاورات بتتفق معاه ؟

اكتر صفة بتكرها في البني ادم ؟

امتي بتقول خلاااااااااااااااااااااااص تعبت مش قادر ؟

صفة في مايوسف بتعتز بيها جداً ؟

لماذا لغتنا الجميلة ؟

مين أكتر الادباء المصريين قرباً الي قلبك ؟

ليك في الادب الانجليزي ....... شيكسبير والناس دي ....... ولا العربي لايعلي عليه ؟

الاختلاف في الرأي لا يفسد للود قضية ولكن .................................. أكمل

نقطة ضعف مايوسف ؟

مصدر الامل الذي تستمد منه طاقتك ....... فين ؟

تتمني تعيش كام سنة ؟ وعايز تعمل فيهم ايه ؟

لما تتجوز ان شاء الله ( روح لعنبي وهو يفكلك اللعنة ) ممكن تساعد المدام في شغل البيت لو هي تعبانة او مشغولة اوي ؟

اتعلمت ايه من الدنيا ؟

كم عدد أصدقائك المخلصين ؟

استفدت من المحاورات ؟ ولو الاجابة بنعم ....... استفدت ايه ؟

هكمل بكرة بقي

مش حضرتك لسة منورنا لحد شهر ابريل ؟؟؟؟؟؟؟

[MaYousof]

أسئلة engtaha:

- هل مفاجأت جلوسك على كرسي الاعتراف لها وقع في نفسك ؟ وماهو شعورك وانت على الكرسي ...

الحقيقة يا باشمهندز طه .. مانيش عارف أقولها لحضرتك إزاي دي .. بس يعني .. بصراحة يعني .. الحقيقة .. أني .. عارف .. إني .. هاقعد على الكرسي .. من قبل ما حضرتك تسجل عضوية في المحاورات

ومنه .. نستنتج إني فعلا ماتفاجأتش :blink:

شعوري .. حاسس إني .. إني .. متكهرب wst::

الظاهر السلك الجديدة حمل 40 أمبير :closedeyes:

البركة في البنات .. بيحبوني بيحبوني بيحبوني يا باشمهندز .. معزّة جامدة بحق وحقّاني

عندك رضوى مثلا .. من ساعة ما طلبت الموز أبو لبن وهي قافلة البوفيه بكالون الأهرام أبو ست تكات :lol:

- أكثر شيء عاجبك في المنتدى؟

المنتدى ده حققلي حلم ماكنتش أتخيل تحقيقه في يوم من الأيام, وهو إني أتعرف على ناس أقل ما أستطيع وصفهم بيه إنهم جواهر مكنونة. أنا كنت عارف إن مصر فيها الناس دي, لكني لم أتخيل إني ممكن أقابل منهم كل دول مرة واحدة.

- أكثر شي مضايقك في المنتدى؟

مش هاقول wst::

- أحب الناس الى قلبك "من الأعضاء" ؟!

ناس كتير جدا wst::

- ماهو القسم الذي تفضله في المنتدى ؟

في الوقت الحالي, مواضيع خفيفة

- هل أنت ممن يقتنعون بسرعه؟

أكيد, المهم تكون الجحة بتاعتك مقنعة لعقلي مش لعقلك. تعرف؟

- ماالشيء الذي يجعلك تنفجر من الغضب؟

التخلف :rolleyes:

[MaYousof]

- ماهي أحسن صفه فيك , وماهي أسوء صفه فيك؟

أحسن صفة: العبط.

أسوأ صفة: الرزالة.

- توقيع لفت إنتباهك بالمنتدي؟

"رب ابن لي عندك بيتا في الجنة"

- ماهو شعورك عندما يطرح عليك سؤال تعجز عن الرد عليه؟

مين ده .. حدش قالك إني واد مخلّص وعندي إجابة على كل الأسئلة اللي في الدنيا

يا بنات .. اعملوا حسابكوا .. الباشمهندز طه هيقعد على الكرسي عن قريب .. عايزين محطة رفع جهد كهربائي جنب الكرسي من فضلكم

- عضو مواضيعه وردوده تعجبك ويستحق لقب مبدع بالنسبه لك ؟

كتير والله .. مبدعين بجد .. لو ذكرت واحد أكون ظلمت الآخرين.

- اذكر لنا موقف طريف حدث لكِ ؟

موقف طريف .. موقف طريف ..

مرة واحد سألني سؤال بيقول "اذكر لنا موقف طريف حدث لكِ" راح حاطط كسرة تحت الكاف بتاعت لك :closedeyes:

إنت شكلك عامل كوبي وبيست للأسئلة دي يا باشمهندز :rolleyes:

- اذكر لنا موقف محرج تعرضت له ؟

مرة هزّرت مع حد متواضع هنا في المحاورات قام اتقمص مني :blink:

- اسعد واجمل موقف حصل وتفتخر به حتى الآن ؟

اليوم اللي جاتلي فيه المرجيحة

- اسواء موقف او ذكرى حصلت لك ؟

يوم ما مامتي شحّتت العجلة البي إم إكس بتاعتي :lol:

- ماهي نقطة ضعفك ؟

الكاراتيه wst::

- كتاب قرأته ... وما زلت تعود إليه بين فينة وأخرى؟

القرآن الكريم.

- هل تتمني أن تكون في بلد آخر هذه اللحظة ... ماهو البلد؟ لماذا؟

لع (معلش أصلي لسه راجع من الصعيد )

- آخر موضوع شدك ونال على إعجابك في المنتدى ؟

مسجل بعلم الوصول.

- ماهي المواضيع التي طرحتيها اذكر على الأقل (5) مواضيع..

طب إديني عقلك دقيقة ونص .. أنا فتحت أربع مواضيع .. أذكر على الأقل خمسة إزاي؟ wst::

عموما .. أنا فتحت المواضيع التالي أسماءها:

1. مصر الوطن, حاضر أليم, وأمل في غد عظيم.

2. التسامح .. في تعاليم المسيحية والإسلام.

3. اعمل عبيط.

4. أنا أتنازل طواعية عن عروبتي.

على فكرة يا باشمهندز .. احكيلك موقف طريف تاني اتعرضت ليه؟

مرة .. واحد .. بيسألني .. "ماهي المواضيع التي طرحتيها" .. قام إيه .. قام إيه يا باشمهندز .. قام .. حاطط حرف ي في كلمة طرحتها.

- وما احبها اليك .؟ .. ولماذا؟؟

اعمل عبيط.

موضوع جاد وبيناقش مشاكل اجتماعية ..

بس مانجحش لما نزل ..

عشان كان قصة .. مش مناظر wst::

ومنغير مناظر .. ماحدش يعرف يزنّ .. وماحدش يعرف يطبل ويهيص ..

ودي بصراحة مش من عاداتنا وتقاليدنا ..

[MaYousof]

- ما مدى الاتفاق والاختلاف بين عقلك وقلبك......ومن اقوى فيهما....؟

متعايشين بشكل جيد مع بعضهم ..

القلب أكيد أقوى .. بيضخ 5 لتر دم للعقل كل دقيقة ..

إنما العقل .. بوسة على أرنبة المناخير بتلحسه

- ايه اكتر حاجه بتحبها في كل من:

الاكلات الكراتيه

المشروبات الكركديه

المطاعم الأكل wst::

الفصول الشتا :closedeyes:

الالوان الأخضر الزرايعي المزهزه :rolleyes:

الاغاني أغنية "أنا مش عارفني .. أنا تهت مني .. أنا مش أنا" :blink:

الافلام فيلم "غرام في الكرنك" :lol:

المسلسلات مسلسل "دموع في عيون وقحة" wst::

المسرحيات مرسحية "سيدتي الجميلة" wst::