كرسي الأعتراف 2 ( حاليآ الفاضلة Dreamwithme )

[Damo]

يارب مكون نسيت حد

chocolate rs:

[MaYousof]

سؤال SophiaAstrophy:

- ((ان العقل قادر على ان يصنع من الجحيم نعيما ويصنع من النعيم جحيما))

هل بتؤمن بالقول ده؟

بصراحة؟ نعم, بل ولأقصى حد, وبشكل لا يمكن أن يتصوره عقل حتى يشهده بنفسه. وعلى فكرة دي نعمة كبيرة واستخدامها هو مصدر السعادة الحقيقي للأنسان.

طب أنا هاسمح لنفسي أن أتوسع شوية في إجابتي على سؤال حضرتك. أنا بعد مشاهدتي في الحياة اقتنعت إن السعادة في الرضا .. السعادة في كلمة الحمد لله.

ممكن واحد ثري, معاه ملايين, وعنده صحة تهد جبال, وزوجة مخلصة ومُحبة لأقصى حد, وأولاد مطيعين ومُحبين له وناجحين, بس هو مش راضي. باصص لغيره, عايز يكون أغنى من ساويرس, ولو بقى أغنى, عايز يكون أغنى من بل جيتس, ولو أغنى ممكن برده يكون مش عاجبه حالُه, عايز يتجوز واحدة تانية, ولو اتجوز, عايز لسان لعصفور عشان يحس إنه مش مقريف ويحس بالرضا, ولما يجيب لسان العصفور يفضل برده مقريف ومش راضي, أصله كان عايز يتجوز ماريا شارابوفا وهي طلعت مرتبطة, عموما, إنسان زي ده عمره ما هيرضى .. هو إنسان عاجز عن الرضا .. عاجز عن حمد الله .. دايما باصص للكحكة اللي في إيد غيره حتى لو كان غيره طفل يتيم محتاجها, هو عايزها عشان حاسس إنها هي اللي هتخليه يرضى .. لكن هيهات .. لأن الرضا ليس بما يملك المرء .. لو كان بما يملك فتأكدي إنه عمره ما هيرضى. الرضا نابع من القدرة على حمد الله بما رزقك .. غابت القدرة دي؟ ساعتها العقل هايعيش في جحيم ومش هينعم بلحظة سعادة ..

على النقيض .. واحد معدوم .. لكن شايف إنه أحسن من اللي بيموتوا في بلدان المجاعة .. مريض .. لكن شايف إنه أحسن من اللي مرضهم بيخليهم يتمنوا الموت عن الحياة .. بلا زوجة أو اطفال .. لكن حمد الله على رزقه فقد يكون فيهم ما يجعله في حال أسوأ .. إنسان قادر دوما ان يدرك إن فيه أسوأ إن أراد به ربه ذلك .. وعليه قدر أن يرضى ويحمد الله ..

الأولاني كل ليلة بينام تعيس .. التاني كل ليلة بينام سعيد ..

مين أحسن ..

السعادة هي أن يكون عقلك قادر على الرضا بما قسمه الله لك .. وهو كفيل إن يجعل حياتك في الدنيا جنة ..

تم تعديل 25 فبراير 2010 بواسطة MaYousof

[joo]

على فكرة ممكن كل واحد ياخد اسمة ويحطة فى التوقيع او الصور الرمزية

[لماضة مصرية جدا]

السلام عليكم و رحمة الله و بركاته

مسيو جو......

احساسك فاق المدي

ميرسي لذوق حضرتك كتير.....

ألا قولي يا جو.....الاقيش عندك ورد اصفر......؟؟؟

طب تركواز.....

طب كاروهات؟؟؟

مسااااااااااك ورورد تتفرش في كل خطوة تخطيها في حياتك و تسعدك بحبايبك و اصحابك

[MaYousof]

معلش انا اتاخرت فى الرد بس كان لازم اجاوب لانك حلفتنى وتبت (أكدت يعنى ) عليا انى مانفضلكش :o

أقولك رأيى بصراحة واللى باحاول اعمل بيه وبانجح اوقات وبافشل كتير

انا باعتبر تقبل الاخر مش متعلق بطبيعته لانى ممكن أرفض طبيعة الشخصية او التصرف بمعنى اصح تماما

لكن انا باحاول اشوف الأمور من وجهة نظره

يعنى مين قال ان المسفسطين عارفين انهم جهلة

انا مثلا ممكن اكون جاهلة وباتفلسف ولانى جاهلة فانا مش فاهمة كده

او مثلا باشوف ناس مثقفة بتتكلم وباحاول اتكلم زيهم فيخرج كلامى للناس اللى بتفهم انه تفاهة وسفه وانا لانى مش فاهمة متخيلة انه اصلى ومش صينى ولا تايوانى

طبعا ده مش مبرر لجهلى ولا لانى احاول اخد الطريق الصعب فى الفهم والادراك لكن انا بافتكر دائما حديث الرسول صلى الله عليه وسلم " خاطبوا الناس على قدر عقولهم " وحتى وان كان الحديث قيل انه ضعيف لكن اعتقد انها مقولة قوية جدا

لانها حتى فى مجال الحوار العادى بتخلينا نلتمس للناس اعذار فكل عقله له ادراكه وقدراته بل ورغباته ايضا ومستوى طموحه وفهمه

وعقلى انا شخصيا أقل من عقول كتيرة ولكن الحمد لله ان ربنا هدانى انى احاول اقرأ واسمع واستفيد و لا اخجل انى اسأل عن اى حاجة

وده فضل من الله اتمنى ان يديمه عليا اللهم امين

لانه اذا بلغت الاعتقاد بانك فاهم كل حاجة ومش محتاج حد يفهمك فكده كل سنة وانت طيب

الفكرة ان الناس دى فعلا مسكينة ومريضة بشكل او باخر والفكرة ايضا انى ممكن اكون منهم ومش واخدة بالى

والفكرة انى اكيد مليئة بعيوب قد لا يطيقها ناس كتيرة

كل ده باحطه قصادى وانا باهاجم حد بينى وبين نفسى

وباخرج من الموضوع بنوع من السلام الداخلى وتقبل الاخرين على قد ماقدر

بس زى ماقلت احيانا بانجح وكتير بافشل :sad:

طيب يا جماعة .. أنا وأم مروان شراقوة زي بعض .. يعني الكرم كله :happy:

ففكرت إننا, أنا وهي, نقطع عرق .. ونسيّح دم :blink:

ونعزمكم على وجبة مسفسطن مع طبق سلطة السفهاء على جنب rs:

ملحوظة: كل المكتوب بالأسود منقول!

-----------------

السفسطة:

الكلام الذي فيه تمويه للحقائق مع فساد في المنطق لصرف الذهن عن الحقائق والأحوال الصحيحة أو المقبولة في العقل وتضليل الخصم عن الوجهة الصحيحة في التفكير. وفي المعجم الوسيط نجد المسفسط هو من أتى بالحكمة المموّهة. ومنها التلاعب بالألفاظ لطمس الحقائق بغرض إفحام الخصم أو إسكاته.

يعني من الآخر, واحد عارف كويس قوي هو بيعمل إيه. عارف إنه بيغالط, مش هدفه إظهار الحق ولكن هدفه الزن ويجادلك المسفسط وهو مقتنع بغير ما يجادلك به, لا لشيء سوى إن هي دي السفسطة! يعني هو بالفعل عارف جدا إنه غلط! بس بيجادل بعكس ما يعتقده عشان مريض نفسيا (لا اعتبرهم مساكين وإلا فالحرامي مسكين والقاتل مسكين والكذاب مسكين إلخ. ولا اعتبر مرضهم النفسي يعفيهم من مسئولية أعمالهم, عندهم عقل يستطيعوا به طلب علاج لمرضهم. لكن غرتهم انفسهم بما هم فيه ففضلوه على غيره من صحيح النفس)

-----------------

السفه: هو قلة التدبير وفساد الرأي والعمل بجلاف مقتضى العقل. والسفه عند الجاحظ فيه الطيش من يسير الأمور، وإظهار الجزع من أدنى ضرر.

السفاهة: خفة الرأي في مقابلة ما يراد منه من المتانة والقوة.

السفيه: ظاهر الجهل، عديم العقل، خفيف اللب، ضعيف الرأي، رديء الفهم, مستخف القدر، سريع الذنب، حقير النفس، مخدوع الشيطان، أسير الطغيان, دائم العصيان، ملازم الكفران، لا يبالي بما كان، ولا بما هو كائن أوسوف يكون.

-----------------

الفرق بين العبث والسفه: العبث ما يخلو عن الفائدة، والسفه مالا يخلو عنها، ويلزم منه المضرة.

والسفه أقبح من العبث، كما أن الظلم أقبح من الجهل، وقيل: العبث فعل فيه غرض، ولكنه ليس بشرعي، والسفه ليس فيه غرض أصلا!

ذم السفاهة: حذر الرسول الكريم من السفهاء في حديث الرُّوبيضة فقال صلى الله عليه وسلم: "إنها ستأتي على الناس سنون خدَّاعة، يُصَدَّق فيها الكاذب، ويكذَّب فيها الصادق، ويؤتمن فيها الخائن، ويخون فيها الأمين، وينطق فيها الرويبضة، قيل: وما الرُّوبيضة؟ قال: السفيه يتكلم في أمر العامة" (رواه ابن ماجة وأحمد وإسناده صحيح)

-----------------

يعني من الآخر, السفيه ماعندهوش القدرة على الحوار, واستدلالاته باطلة، وتفكيره قاصر، وأفقه ضيق، ومنطقه الجعجعة. هدفك بيكون الإصلاح وهدفه هو إنه يزهو بنفسه. هدفك التصحيح وهدفه إنه يسنزفك. هدفك الهدايه وهدفه الصعود على أكتاف الأخرين.

أنا لا أدّعي إن عقلي وسع كل شيء, لكن لما آجي أناقش حد وبعدين أجد من وجهة نظري إنه بيندرج تحت صنف من الصنفين دول, المسفسطن والسفهاء, بأصبح غير قادر على عدم اضطهاده. هل ده كويس؟ لأ :sad: أنا لم أنكر إني محتاج علاج نفسي يخليني قادر على أن يعلوا وجهي ابتسامة بلهاء أول ما ييجي واحد أنا شايفينه مسفسط أو سفيه ويزن جنب ودني smk:

أكيد بين الـ 11 ألف عضو فيه ناس أنا شايفهم مسفسطن وسفهاء .. جركن الـ DDT بقى موجود للمحافظة على إبقاهم مدروخين وهم بيعبروا المجال الجوي بتاعي bv:- وماسمعش زنّهم rs:

بس يا ستّي

[om marawan]

كلام رائع ولا يخرج سوى من أفواه الحكماء. كعهدي بحضرتك يا أم مروان, في كل مداخلاتك إشارة على رجاحة عقلك ووسع علمك. وحضرتك من أساتذتي في هذا المنتدى ..

بس هي الفكرة في زاوية تناول الموضوع .. أنا عندي رد على رسالة حضرتك بشكل أشمل. وفي الأثناء دي ممكن أترك سؤال لحضرتك, إيه الفرق بين الجدل والسفسطة؟ وبين الجهل والسفه؟

خالص تقديري لقلم الجميل وشخص حضرتك الكريم rs:

مين

فيييييين

ليييييييه ( وش لماضة مصرية rs: )

يا محمد باشاااااااا ده انت حتى الريسة فلانة بذات نفسها شهدت لمداخلاتك

طب ده احنا هنعمل فرع للجامعة هنا فى المحاورات ونعملك قسم اسمه الردود والاجابات الذكية فى الاستفسارات المفترية وهناخدك بالكرسى عشان تبقا أستاذ كرسى فى القسم

( :o ماعنتش تشكر فيا وتقولى كده تانى عشان باتحرج )

[MaYousof]

أسئلة jasmin hamed:

- (الاختلاف فى الراى لا يفسد للود قضيه) ليه كل المصرين عارفين المقوله ديه لكن ماحدش بيطبقها؟

أنا عندي قناعة كبيرة جدا أصبحت الآن معششة في تفكري إن المصريين, وعرب هذا الزمن على عمومهم, عندهم شيزوفرنيا لا شعورية غير عضوية مكتسبة وحادة rs:

غير عضوية مكتسبة يعني سببها مش ذهني .. مش مرض عضوي .. سببها نفسي .. بينشأ مع التربية .. عشان كده مكتسبة .. ولأنها مع التربية فبتترسب في اللاوعي وبتصبح لا شعورية rs:

كلام كبير

المهم .. أهلنا (العرب على عمومهم) بيربّونا واحنا أطفال بالقول إن الكذب حرام وغلط جدا إننا نكذب .. وبعدين يكذبوا قدامنا .. ويكذبوا علينا .. ونلاقي إن اللي بيتقال شيء واللي بيتعمل شيء .. ويقولولنا الظلم حرام .. وبعدين تلاقي الأم والأب يظلم طفله بالضرب دون تبرير مقنع .. وصور ظلم أخرى عديدة .. وتلاقي الأهل يقولولنا لازم نتعاون .. ونحب بعض .. وعند الفعل تلاقي أفعال تحث على تسلق الآخر عندما تحين الفرصة حتى لو مش دورنا .. تترسب الأفعال دي كلها في لاوعينا ونكبر (كعرب) واحنا بنكذب ومش شايفين الكذب .. نظلم ومش شايفين الظلم .. نتسلق وننافق ومش شايفين ده .. عشان اتربينا على الانفصام في الشخصية واصبحت جزء لا يتجزأ منا .. ونقول .. الاختلاف في الرأي لا يفسد للود قضية .. ونمسك لبعض السكاكين ..

- الى اى حد ممكن تستحمل اختلاف الراى لو المختلف عنك ابنك او بنتك او اخوك او زوجتك؟

بوجه عام أنا مش ضد الاختلاف في الرأي مع أي حد. لكن لازم أأكد إن الاختلاف في الرأي ليه آداب لازم الالتزام بها من الطرفين المختلفين سويا وانا مش مستعد إني ألتزم بيها من طرف واحد. من أهم الآداب دي القدرة على استيعاب إن كلا الرأيين المخالفين ممكن يكون صحيح في نفس الوقت! أيضا القدرة على استيعاب إن من حق المخالف أن يبقى على رأيه مدام الحجة المقدمة من الآخر غير مقنعة لعقل المخالف. إيه المشكلة في الكلام ده؟ أنا مرة تحاورت مع إسلام المصري حوار راقي جدا وكنا مخالفين في الرأي ومع ذلك كلنا احترم الآخر للغاية لدرجة إن ماحدش حس بينا واحنا بنتحاور! لكن عندما يأتي أحدهم بنيّة قهري برأيه باضطر إني أذيقه مر دواءه smk:

في واقع الأمر, أنا مقتنع إن ربنا خلق الناس مختلفين وإن التنوع في الفكر والرأي من أكبر مصادر ثراء العقل. وآخر شيء ممكن أريده إن عقول الناس كلها تكون مستنسخة من عقل واحد أنا شايف إنه صحيح لأن ده قتل أي فرصة لاستحاثة العقل وهادم للإبداع. يعني أنا باشجع على إنه يكون فيه رأي آخر لان ده ممكن يتمخض منه رأي تالت أصح :o

كان هذا إيه؟ استهلالا لابد منه bv:-

رجوعا لسؤالك, أنا مش عندي أولاد أو زوجة لكن عندي أخ وأختين. أنا ديمقراطي جدا وباسمح بالخلاف للحدود شبه القصوى. لكن أضربلك مثل. أنا أخويا حاليا مش في مصر, وأبويا وأمي مش صغيرين في السن. أختي دخلت المستشفى عشان عملية من عمليات اليوم الواحد وهتطلع محتاجة اللي يقعد جنبها بقية اليوم, أنا لازم أخرج مشوار في مساء اليوم ده, وأختي التانية (الأصغر) صاحبتها من أيام المدرسة هيجتمعوا وهي عايزة تروح عندهم. مين هيقعد مع اللي لسه خارجة من غرفة العملية؟ أبويا اللي كويس إنه مكفي نفسه؟ ولا أمي اللي عندها السكر؟ ولا أنا ألغي مشواري اللي ماينفعش يتلغي؟ قلتلها مش هينفع خالص لازم تقعدي في البيت, وكانت لهجتي حادة بعض الشيء, مع ذلك قلتلها وعموما أنت حرة وكل واحد مسئول عن أفعاله (خصوصا إن مامتها ماكانتش معترضة على إن أختي الصغيرة تروح لصاحبتها). طبعا هي عشان لسه عندها 19 سنة بس كانت غير مدركة إنهم محتاجينها حقيقي في البيت فكانت مقموصة إني قلتلها مش هينفع ولازم تقعدي. لما رجعت من برة لقيتهم كلهم محتاجينها. قلتلها كانوا هيتصرفوا إزاي دول وانتي عند صاحباتك؟ أنا ماكنتش عايز أمشي رأيي عليكي بس ساعات الأوضاع بتحكم :sad:

[MaYousof]

- هل المصرين فعلا مافيش فيهم امل فى حوار موضوعى؟

لا أظن :closedeyes:

دول مش محتاجين زقة للموتور .. دول محتاجين عَمرة موتور كاملة .. ودي من نظري عايزة أحداث عنيفة يمروا بيها قبل ما يصبح فيهم أمل :closedeyes:

مش هتنفع الطبطبة .. لازم قلم :blink:

- ايه السبب فى حده الاختلافات فى المحاورات؟ وليه بقى فيه عدم مراعاه لشعور الاخرين؟ يعنى الى بيكتب ما بقاش بتفرق معاه تاثير كلاماته على نفس الاخرين, ده ياترى راجع الى اختلاف الطبقات الاجتماعيه؟ ولا مفاهيم مختله عن معنى الحريه؟ ولا الفوضويه اصبحت جزء من الشخصيه المصريه؟ و لا حب ظهور؟

ثقافة الحوار مش موجودة .. ألوم البيت .. التربية في الصغر ..

والنتيجة .. مفاهيم مختلة .. وحب ظهور ..

- طبقية ما قبل الثوره ولا غوغائيه الانفتاح وما بعده؟

يعني إنت بتخيريني بين الطبقية و الغوغائية؟ مش ممكن يكون فيه اختيار أسلم؟

عموما لو الخيار لازم ولابد يكون يا ده يا ده يبقى اعتقد إن شر الطبقية أهون ألف مرة من رحمة الغوغائية .. خصوصا لو كانت غوغائية تصل لحد البربرة :closedeyes:

- ليه زاد التدين الشكلى فى مصر و نقصت الاخلاق؟

الموضوع ده مش جديد .. ده أزلي وموجود من أيام الفراعنة .. وفيه نصوص هيروغليفية بتشتكي من نفس القضية .. هو الموضوع ده هيفضل بالشكل الموجي طلوعا ونزولا مع اتجاه عام طفيف ناحية التدهور لغاية آخر الزمان لما ييجي وينعدم الدين تماما وتقوم القيامة بقى ..

- لو حضرتك معاك 100 مليار دولار لصرفهم على الاصلاح فى مصر هتبداء باصلاح ايه؟

هاعمل تفوير كامل وشامل وجذري للتعليم في مصر بمبلغ 90 مليار ..

هاستعمل 5 مليار لعمل مراكز تأهيل على نطاق الجمهورية لتأهيل المتزوجون حديثا والآباء والأمهات اللي أبنائهم في عمر الطفولة من الناحية التربوية .. عشان بصراحة التربية في مصر فيها عوار جامد جدا .. الدورة هتكون من 4 إلى 6 اسابيع وبيتعلم فيها الأم الأب إزاي يربوا أولادهم تربية سليمة لا تولّد عند النشء شيزوفرنيا لا شعورية غير عضوية مكتسبة وحادة :closedeyes:

هاستعمل 3.5 مليار في حملات توعية ضخمة على نطاق لجمهورية هدفها تصحيح المفاهيم المغلوطة لدى المصريين ..

آخر مليار ونص هاجيب بيهم كتب توزع مجانا على كل من يعرف القراءة في مصر .. وهابيع العيش بفلوس .. أنا مش اشتراكي .. اللي عايز عيش يشتغل ..

عموما .. الـ 100 مليار كلهم مصروفين على إصلاح عقول المصريين وفكرهم .. لأن مايميز الإنسان عن الحيوان هو عقله .. مش بطنه ..

تم تعديل 25 فبراير 2010 بواسطة MaYousof

[om marawan]

أنا لا أدّعي إن عقلي وسع كل شيء, لكن لما آجي أناقش حد وبعدين أجد من وجهة نظري إنه بيندرج تحت صنف من الصنفين دول, المسفسطن والسفهاء, بأصبح غير قادر على عدم اضطهاده. هل ده كويس؟ لأ أنا لم أنكر إني محتاج علاج نفسي يخليني قادر على أن يعلوا وجهي ابتسامة بلهاء أول ما ييجي واحد أنا شايفينه مسفسط أو سفيه ويزن جنب ودني

تقصد ان انا اللى باحط على وشى ابتسامة بلهاء :closedeyes:

ماشى يا ما يوسف بس اما اشوفك ع القهوة

وبعدين انا عزومة المسفسطين دى تعبتنى والدكتور قالى ماتاكليش سمين ولا حار

الجد بقا انى مش مختلفة معاك انا قلت انى فعلا فيه تصرفات باكرهها جدا وباخاف على فكرة انها تكون فيا :closedeyes: لكن باحاول ماكرهش الناس على قد ماقدر

ولو انها بتكون صعبة

طبعا انا لا باخدهم أصدقاء ولو عرفت ماشوفش وشهم باحاول اعمل كده عشان ماكرههش اكتر وعشان كمان ماضطرش احط ابتسامة بلهاء :closedeyes:

باعتبرهم عيانين وانا مش عاوزة اتعدى ياعم

تم تعديل 25 فبراير 2010 بواسطة om marawan

[MaYousof]

أسئلة Folana:

ميييين .. فيييييييييين .. ليييييييييييييييه (وش لماضة وهي طالعة من المطبخ جري وفي إيدها اليمين ماسكة الكبشة wst::)

الريسة فولانة بذات نفسها بتسألني وأنا قاعد على العمبوكة wst::

والله أنا باعتبر ده شرف كبير جدا ليَّ إن أستاذتي الكريمة فولانة تسألني قبل ما أنزل من على الكرسي :blink:

------------------

- ممكن أستعير سؤال الاخت الفاضلة جاسمين وأسأله بطريقة أخرى؟

يقولون أن "الاختلاف فى الرأى لا يفسد للود قضية"

وأنا أقول "أن الاختلاف فى الرأى قد ينشىء عنه ألف قضية وقضية"

تفتكر حضرتك ليه دايما بنستخدم المقولة الاولى؟ هل لاسكات الطرف الأخر؟ هل نوع من أنواع الدهاء الفكرى لنسمح لانفسنا بقول كل مافى جعبتنا وننهى حديثنا بأن الاختلاف فى الرأى لا يفسد للود قضية؟

قول حضرتك يا أستاذتي الكريمة سليم بكل تأكيد, ولا تشوبه أدنى شائبة. وممكن جدا حضرتك تمسكي قلم, وانا أمسك قلم, ونتعاون سويا في وضع أربع خطوط تحت كلمة "قد" فيما تقولين. معلمتي فولانة ذات مرة علمتني إن كلمة "بعض" في الآية الكريمة (إن بعض الظن إثم) تدعونا لكثير من التأمل. وفيما قلت يا أستاذتي أرى كلمة "قد" وقد دعتني إلى الكثير الكثير من التأمل. في واقع الأمر, فإن "قد" فيما قلت كانت كفيلة ألّا تتضارب العبارتين مع بعضهما في المعنى. لكن العبارة الأولى قد تحتاج لزيادة كلمة "يجب" حتى تستوي تماما في المعنى فتقرأ هكذا "الاختلاف فى الرأى يجب ألّا يفسد للود قضية".

اسمحي لي بعدها في استخدام مايقولون (بعد ما أضفت عليها من تعديل), وما قلت أنت, في وضع جملة مفيدة شاملة تقول "الاختلاف فى الرأى يجب ألّا يفسد للود قضية, لكن للأسف, قد ينشىء عنه ألف قضية وقضية"

يمكن إحنا في نطاق عالمنا العربي مش متعودين على إنه يجوز الختلاف في الرأي دون إفساد القضية لأننا بنتربّى على إن عدم تصارعنا مع من نختلف معهم في الرأي قد يعني إقرارنا برأيهم. طبيعي إنه عند هذه النقطة تحديدا بيجب علينا التصارع ومحاولة قهر من نختلف معهم وتنشأ عندها ألف قضية وقضية. سؤال حضرتك هو ليه دايما يقولون الشق الأول فقط من الجملة المفيدة الشاملة بينما دايما ينفذون الشق الثاني فقط منها. من رأيي الشخصي إن السبب هو إن عندنا شيزوفرنيا لا شعورية غير عضوية مكتسبة وحادة :lol:

- هل نفعل ذلك لاسكات الطرف الأخر؟

ما أظنش, احنا عارفين إنه كده كده مش هيسكت.

- هل نفعل ذلك كنوع من أنواع الدهاء الفكرى لنسمح لانفسنا بقول كل مافى جعبتنا وننهى حديثنا بأن الاختلاف فى الرأى لا يفسد للود قضية؟

ده مش دهاء فكري, دي من رأيي إنها خيبة فكرية. ليه خيبة؟ لأن الهدف هنا أصبح إننا "نقول كل مافى جعبتنا" بدل ما يكون الهدف هو الوصول للحق والصواب بغض النظر عن هو تابع لأنهو طرف فينا. عموما, الشيزوفرنيا طول عمرها خيبة.

- أيهما أصح من وجهة نظرك, المقولة الاولى أم الثانية؟ ولماذا؟

المقولة الثانية, مقولة أستاذتي الكريمة فولانة, لا يشوبها أدنى شائبة. خصوصا وقد احتوت كلمة "قد".

المقولة الأولى يجب أن يزيد فيها كلمة "يجب" حتى تستوي في المعنى.

الأكثر صحة هو استخدام الجملة المفيدة الشاملة الناتجة من المقولتين والتي تقول "الاختلاف فى الرأى يجب ألّا يفسد للود قضية, لكن للأسف, قد ينشىء عنه ألف قضية وقضية"

[MaYousof]

- حضرتك ذكرت فى أحد اجابتك انك "عبيط...مغرور...رزل", مش شايف ان فيه تضاد وتناقض بين المعانى الثلاثة؟ يعنى صعب انها تجتمع معا فى شخصية واحدة, ولاسيما ان الشخصية دى هى "محمد يوسف"؟ wst::

wst:: مين محمد يوسف ده!

صفة عبيط دي منتهى منها. تم إثباتها منهجيا بالدليل والبرهان في إحدى مداخلات موضوع "اعمل عبيط", وأصبحت شيء مفروغ منه بلا أدنى شك. قد تكون الصفة دي حقيقة مؤلمة بشكل شخصي, أو مش مستصاغة لدى البعض, لكنها حقيقة منتهية وإنكارها مش هيغير الواقع :blink:

نخش على اللي ممكن يتغير wst::

حضرتك شايفة إن العبيط صعب يبقى رزل .. وده صحيح .. أنا بصراحة فكرت قليلا .. عبيط يعني ضعف شديد في القدرة على إدراك الأمور بالشكل الصحيح. هل ينفع واحد عنده الضعف الشديد ده إنه يصبح رزل؟ بصراحة أنا لاقيت إنه لو عنده ضعف شديد في القدرة على إدراك الأمور وكمان رزل يبقى إنسان عنده تخلف ذهني حاد مؤثر على سلوكه مع المحيطين به wst:: إستر يا رب wst::

أنا أكيد ماوصلتش للمرحلة دي لسه :lol: يبقى أكيد أنا مش رزل .. الظاهر والله أعلم إني باسترزل مش أكتر wst::

إنما مغرور بقى, هو فيه لحظات بيغتر البني آدم فيها بعقله ويحسب إنه وصل وماحدش هيعرف يحصله خلاص. حتى لو عنده ضعف شديد في القدرة على الإدراك ممكن يعجبه عقله ويحسب إنه وصل! إذن يبدو إنه عادي إن العبيط ممكن يتغر في نفسه ويعجبه عقله زي حالاتي كده wst::

بصراحة حضرتك ساعدتيني إني أعرف إني مانفعش أبقى رزل مادام عبيط .. وإنما كل الرزالة دي بتدور في فلك الاسترزال wst::

[MaYousof]

- كثيرا مانسمع هذه الجملة: "أنا لى فلسفتى فى الحياة...."

يمكن ناس كتير بتستخدم هذه المقولة دون تبصر أو تحديد, ولكن لاخلاف بالطبع على أن كل انسان له مجموعة من المبادىء التى يتكون منها كيان سلوكى عقلى يجعل الشخصية تتميز عن غيرها وتتسم بسمات معينة يطلق عليها فلسفة الحياة. وقد تكون هذه الفلسفة عبارة عن شعار أو بيت شعر أو آية قرآنية. كما انها قد تختلف باختلاف الظروف والتجارب, وتختلف من شخص لاخر, ومن ثقافة لاخرى.

استاذ محمد يوسف, ماهى فلسفتك فى الحياة؟ وهل قمت بتغير فلسفتك من قبل؟ وان كانت الاجابة بنعم, ماهى الظروف التى دفعتك لتغيير تلك الفلسفة التى أمنت بها من قبل؟

أنا لي فلسفتي فى الحياة ... :blink:

دانا مش لي فلسفة في الحياة .. دانا لي فلاسف ... :lol:

حضرتك فاضية الاسبوع ده؟ wst::

آه صحيح .. الترم التاني بدأ ..

طب في أجازة الصيف بقى إنشاء الله wst::

بوجه عام, أنا باحاول إن إيماني بالله يكون قوي .. وده مفيد كدرع أول في لحظات الشدائد اللي ممكن تمر علينا في الحياة .. أنا ايضا باحاول أعمل بحديث الرسول الكريم (طوبى لمن شغله عيبه عن عيوب الناس) .. وللأسف .. شايف البشر أندال بالفطرة .. ومحتاجين شغل على نفسهم لمحاربة الفطرة دي .. بس الشغل ده محتاج رغبة في نبذ أي خلق غير حميد موجود بالفطرة في البشر ..

طبعا أنا "فلاسفي" في الحياة بتتغير حسب مشاهداتي فيها. وأكبر عامل من عوامل تغيري لفلاسفي الكتيير قوي اللي عايزين إسبوع عشان أرصهم اسمه عامل "البشر" ..

- ما الفرق بين التحيز والتعصب؟

لما يكون فيه أمر ما ونقيضه أو المخالف له فإنه عادة ما يمكن أن نمثّل الوضع ده على إنه خط مستقيم ليه نقطة وسط وعلى أقصى كل طرف (أو قطب) من طرفين الخط المستقيم ممكن نضع أمر من الأمرين دول.

لو قسمنا الخط المستقيم ده إلى سبع قطع مستقيمة متساوية سنجد إن فيه قطعة في الوسط, وثلاث قطع مستقيمة متتالية على يمين القطعة الوسطى ومثلهم على يسارها.

لو حضرتك وقفت في القطعة الوسطى فأنت وسطية ..

لو وقفت على القطعة التي على يمينها فأنت عندك ميول يمينية ..

لو وقفت على القطعة التي على يمينها فأنت متحيّزة لليمين ..

لو وقفت على آخر قطعة على اليمن, والتي يقع أحد الأمرين الأساسين على آخر طرفها اليمين, فأنت متطرفة يمينيا ..

ويقاس عليه القطع الثلاث على يسار القطعة الوسطى ..

- هل لخبراتك الماضية دور فى تحديد علاقاتك المقبلة؟ أم انك دائما تبدأ من جديد مستعينا بمبدأ المحاولة والخطأ؟ اتحدث هنا عن خبراتك وعلاقاتك بوجه عام, مع الاصدقاء او زملاء العمل او الجيران الى اخره.

بكل تأكيد خبارتي الماضية تحدد علاقتي المقبلة .. ده معناه إني ممكن أشوف الناس أندال بالفطرة, بينما هم في حقيقة أمرهم أحسن (أو ربما أسوأ) من ذلك .. وبالتالي بتفرق خبارتي في طريقة تعاملي مع كل من يسوقوني قدري للتعامل معه ..

- من أنت؟ wst::

ده اصله سؤال اجبارى علينا هنا wst::

أنا طفل صغير محبوس في جسد إنسان بالغ wst::

[MaYousof]

- الفرق بين المجاملة والنفاق؟

أحسن واحد يعلمنا الموضوع ده هو موضوع المداراة والمداهنة في فقه الدين الإسلامي. حيث المداراة هي المجاملة والمداهنة هي النفاق.

-------------------

المداهنة والمُدارة

:blink: بتصرف

التعريف:

المُداهنة: المصانعة والنفاق بإظهار خلاف ما يُضمر مع عدم طيب نفس أو محبة.

يقول ابن منظور في لسان العرب: الإدهان هو الغش, ودَهن الرجل إذا نافق.

وفي التوقيف على مهمات التعاريف: المداهنة أن ترى منكراً تقدر على دفعه فلم تدفعه.

وقال ابن العربي في أحكام القرآن: الإدهان هو إظهار المقاربة مع الاعتقاد للعداوة.

التعريف:

المداراة: الملاينة والملاطفة وخفض الجناح للناس. ومنها لين الكلام، وترك الأغلاط في القول. وهي دليل كمال العقل وحسن الخلق والمعاشرة.

وقال ابن الأثير في غريب الحديث: المداراة ملاينة الناس وحسن صحبتهم واحتمالهم لئلا ينفروا عنك.

وفي المصباح المنير للفيومي: داريته مداراة أي لاطفته ولايَـنْـتُـه.

-------------------

حَدَّثَنَا صَدَقَةُ بْنُ الْفَضْلِ أَخْبَرَنَا ابْنُ عُيَيْنَةَ سَمِعْتُ ابْنَ الْمُنْكَدِرِ سَمِعَ عُرْوَةَ بْنَ الزُّبَيْرِ أَنَّ عَائِشَةَ رَضِيَ اللَّهُ عَنْهَا أَخْبَرَتْهُ قَالَتْ "اسْتَأْذَنَ رَجُلٌ عَلَى رَسُولِ اللَّهِ صَلَّى اللَّهُ عَلَيْهِ وَسَلَّمَ" فَقَالَ (ائْذَنُوا لَهُ بِئْسَ أَخُو الْعَشِيرَةِ أَوْ ابْنُ الْعَشِيرَةِ) فَلَمَّا دَخَلَ أَلَانَ لَهُ الْكَلَامَ قُلْتُ "يَا رَسُولَ اللَّهِ قُلْتَ الَّذِي قُلْتَ ثُمَّ أَلَنْتَ لَهُ الْكَلَامَ" قَالَ (أَيْ عَائِشَةُ إِنَّ شَرَّ النَّاسِ مَنْ تَرَكَهُ النَّاسُ أَوْ وَدَعَهُ النَّاسُ اتِّقَاءَ فُحْشِهِ). وَفِي رِوَايَة أَنّه قَالَ (يَا عَائِشَةُ مَتَى عَهِدْتِنِي فَحَّاشًا إِنَّ شَرَّ النَّاسِ عِنْدَ اللَّهِ مَنْزِلَةً يَوْمَ الْقِيَامَةِ مَنْ تَرَكَهُ النَّاسُ اتِّقَاءَ شَرِّهِ). رواه البخاري ومسلم.

-------------------

الحديث المعروف بـ "بئس أخو العشيرة" حديث صحيح أخرجه الإمام البخاري.

لا بد من الإنتباه في الحديث إلى الأمور التالية :

1 ــ النبي الأكرم عليه الصلاة والسلام أسَرّ بكلمته تلك "بئس أخو العشيرة" إلى عائشة ولم يواجه بها ضيفه.

2 ــ النبي الأكرم عليه الصلاة والسلام لم يكن ليعلن ذلك لعائشة لولا قدوم ذلك الرجل أي لولا تنزل الحاجة لذلك.

3 ــ كلمة "بئس أخو العشيرة" ليس فيها سب ولا شتم ولا تعيير إنما هي بيان لحال رجل كما هو بل دون تفصيل في مظاهر وأسباب ذلك البؤس.

4 ــ المكان الذي جرت فيه المعاملة الحسنة لذلك الرجل رغم بؤسه هو بيت النبوة أي أنه ضيف عليه.

5 ــ النبي الأكرم عليه الصلاة والسلام لم يقتصر على الإسرار بالكلمة إلى عائشة عليها الرضوان بل علل لها ذلك بقوله "شر الناس من يهجره الناس إتقاء شره". وذلك ليوضح القضية بجلاء للناس.

-------------------

قد تكون المداهنة في أمر مُحرّم ، بل قد يكون في الكفر والعياذ بالله.

ولذا قال عز وجل: (وَدُّوا لَوْ تُدْهِنُ فَيُدْهِنُونَ). قال ابن عباس فيها: ودوا لو تكفر فيكفرون.

أما والمُدارة فهي على خلاف ذلك, فالكريم يُجامل ويُداري من يكرمه, واللئيم يُداهن ويُنافق من يبغضه. وقد يمرّ الشخص الواحد بموقفين مُتماثِلين، فيُداهن ويُنافق في أحدهما، ويُداري ويُجامل في الآخر.

ومِن هنا فإن النبي صلى الله عليه وسلم لما استأذن عليه رجل قال (ائذنوا له بئس أخو العشيرة أو بن العشيرة) فلما دخل ألان له الكلام. قالت عائشة رضي الله عنها قلت "يا رسول الله قلتَ الذي قلت، ثم ألنت له الكلام" قال (أي عائشة إن شرّ الناس من تركه الناس - أو ودعه الناس - اتقاء فحشه). رواه البخاري ومسلم.

وكان مِن مُداراة النبي صلى الله عليه وسلم أنه كان لا يواجه الناس بما يكرهون. وإذا غضب عُرِف ذلك في وجهه. ومن ذلك ما رواه أبو هريرة رضي الله عنه قال: "ما عاب النبي صلى الله عليه وسلم طعاماً قط؛ إن اشتهاه أكله، وإن كرهه تركه". رواه البخاري ومسلم.

والرجل قد تأتيه زوجتك بطعام، ولا يُعجبه فيُجاملها، ويُداري خاطرها، فهذه مجاملة ومُداراة، وهي مطلوبة.

فالمجاملة والمدارة: مستحبة.

والمداهنة والنفاق: محرمة.

[MaYousof]

أنا كان فخر ليَّ إن آخر اعترافاتى تكون على أسئلة أستاذتي الكريمة فولانة.

الحمد لله إن العمبوكة عدت على خير :blink:

بس .. يا ترى .. أبو جنيور .. سأل أول دفعة أسئلة وبعدين خد الطاقية الأسواني وراح على فين wst::

عموما .. أنا مش هانزل من على الكرسي لحد ما يرجع هو والطاقية بالسلامة ويسأل الدفعة الأخيرة من الأسئلة وأجاوبه عليها. بس باب تلقّي الأسئلة من بقية الأعضاء الحمد لله أغلق في تمام العاشرة مساء اليوم :lol:

بالنسبة للترشيحات ..

1. الحاج أبو جنيور Scorpion wst::

2. أبو إياد mzohairy wst::

3. الترجمان wst::

تم تعديل 26 فبراير 2010 بواسطة MaYousof

[رضوي]

جووووووووووو

ميرسي بجد علي ذوقك

حقيقي حضرتك انسان ذوق جداً

[Scorpion]

أنا كان فخر ليَّ إن آخر اعترافاتى تكون على أسئلة أستاذتي الكريمة فولانة.

الحمد لله إن العمبوكة عدت على خير :lol:

بس .. يا ترى .. أبو جنيور .. سأل أول دفعة أسئلة وبعدين خد الطاقية الأسواني وراح على فين :unsure:

عموما .. أنا مش هانزل من على الكرسي لحد ما يرجع هو والطاقية بالسلامة ويسأل الدفعة الأخيرة من الأسئلة وأجاوبه عليها. بس باب تلقّي الأسئلة من بقية الأعضاء الحمد لله أغلق في تمام العاشرة مساء اليوم :closedeyes:

بالنسبة للترشيحات ..

1. الحاج أبو جنيور Scorpion :closedeyes:

2. أبو إياد mzohairy :closedeyes:

3. الترجمان :closedeyes:

حقك عليا يا عزيزي اخوك محطوط علي عمبوكة من نوع تاني في الشغل مش مخلياني عارف اتلم علي نفسي فعلآ :sad: ... و عليه سيادتك معفي من جهتي ...

و ان كان لدي اعتراف ...

:blush2:

لوكشة الأسئلة الأولانية اللي كتبتها ما كانتش متوجهة ليك كشخصك و لكن للي كنت فاكره انه انت و يتفق معاك في حيازته لمفاتيح اللغة و تشابه الأفكار و اعجابي الشخصي ... و لكن اجوبتك حدفتني بعيد لذا ستجدها اسئلة غبية اعتذر عنها ..

و لكن يظل الفضول يلح علي بصورة مريضة .. و عليه سأستغل مساحة الأسئلة الباقية لي لأسئلك ثلاث :

- متي اشتركت لأول مرة في المحاورات و هل كان بمعرف آخر؟ ( سؤال اختياري )

- متي اصبحت المحاورات جزءآ من روتينك اليومي و اذا كان هذا من فترة طويلة لماذا انضممت لها مؤخرآ فقط ...

- فين الترومبيل ؟؟

من ناحية ترشيحي فأعتذر عن هذا الشرف لثلاث اسباب :

1. عملي... مازلت علي عمبوكة في الشغل ستطول و القانون المدني يعفي المواطن دافع الضرائب من تحمل عمبوكتين في آن واحد

2.ديني ... كرسي الأعتراف يتطلب تواجد أب اعتراف و كلهم مشغولين في مظاهرة بالكاتدرائية .. و عليه فلا يجوز ...

3. تشائمي .. فتجربتي الوحيدة علي كرسي مماثل كانت علي صفحات الهايدبارك و جاب ضرفه بعدها ..

ارشح مهدي النفوس زهيري باشا بل الندي طرطوره

[MaYousof]

و لكن يظل الفضول يلح علي بصورة مريضة .. و عليه سأستغل مساحة الأسئلة الباقية لي لأسئلك ثلاث :

- متي اشتركت لأول مرة في المحاورات و هل كان بمعرف آخر؟ ( سؤال اختياري )

- متي اصبحت المحاورات جزءآ من روتينك اليومي و اذا كان هذا من فترة طويلة لماذا انضممت لها مؤخرآ فقط ...

- فين الترومبيل ؟؟

..

..

ارشح مهدي النفوس زهيري باشا بل الندي طرطوره

أقرب إخوتي في المنتدى لقلبي, العزيز بجد, أخويا سكوب,

إيه يا أبو جنيور! من غير ما تتعب نفسك إنت تسأل سؤال مباشر وانا أقر واعترف على طول .. بس صدقني يا أبو جنيور .. أنا شخصيا متأكد إني مش اللي إنت فاكر إني هو :lol:

حتى اسأل Damo هتقولك :lol:

مش أنا يا Damo طلعت واحد تاني؟

أنا مش عارفني .. أنا تهت مني .. أنا مش أنا ..

لا دي ملامحي .. ولا شكل شكلي .. ولا ده أنا ..

ولا ده أنااااااااااااا :sad:

صضّقني (بالضاد المشددة) .. لو أنا هو كنت اعترفتلك من أول سكينة كهربا :sad:

ماتقولي حاجة يا Damo .. هل ممكن إن أنا أكون اللي في بال أبو جنيور؟

طب ده أنا حتى طلعت دور تالت :hi:

و Damo شاهدة :lol:

- متي اشتركت لأول مرة في المحاورات و هل كان بمعرف آخر؟ (سؤال اختياري)

أول مرة وصلت للمحاورات كانت في آخر أغسطس 2009. لم أعرفها قبل هذا التاريخ اطلاقا. رغبت في عمل حساب/معرف على شهر سبتمبر, على ما نجحت في عملية فتح الحساب/المعرف كان أكتوبر 2009 دخل بالفعل. وهذا هو المعرف الأول, والوحيد لي في المنتدى. وإنشاء الله لما هابطّل دخول المنتدى بهذا المعرف فأنا متأكد إن مش من سلوكي إني أعمل معرف تاني أدخل بيه ..

عموما ده مازال محسوب في علم الغيب وغير قطعي بعد :o

- متي اصبحت المحاورات جزءآ من روتينك اليومي و اذا كان هذا من فترة طويلة لماذا انضممت لها مؤخرآ فقط؟

المحاورة أصبحت جزء من روتيني اليومي على آخر أيام 2009. وأصبحت مشارك بشكل شبه يومي مع بداية 2010. يعني من شهرين بس.

- فين الترومبيل؟

عبده يا سيدي .. راسه فضلت لافّة من ساعة الملوحة .. راح نازل واخد الطرومبيل وطلع عالصيدلية يجيبله حاجة عشان يفوق .. البوليس شافه بيسوق وهو مدروخ جري وراه ووقفه .. كشفوا عليه لقيوا نسبة الملوحة في دمه أعلى من الحد المسموح راحوا ساحبين الرخصة بالطرمبيل wst::

-------------------

أنا بكده نزلت من على الكرسي رسمي ..

وفيه اتنين من الأعضاء حتى الآن بيرشحوا كبير كبراء بريتيش كولومبيا وفانكوفر البلد, صاحب المقام الرفيع, بلّ الندي طرطوره, زهيري باشا أبو إياد ..

والسؤال الأول ليه معروف جدا .. جدا .. جدا :lol:

تم تعديل 27 فبراير 2010 بواسطة MaYousof

[om marawan]

..

ارشح مهدي النفوس زهيري باشا بل الندي طرطوره

أقرب إخوتي في المنتدى لقلبي, العزيز بجد, أخويا سكوب,

أنا بكده نزلت من على الكرسي رسمي ..

وفيه اتنين من الأعضاء حتى الآن بيرشحوا كبير كبراء بريتيش كولومبيا وفانكوفر البلد, صاحب المقام الرفيع, بلّ الندي طرطوره, زهيري باشا أبو إياد ..

والسؤال الأول ليه معروف جدا .. جدا .. جدا :lol:

من انت ؟؟؟

وكده يبقا ثلاثة اعضاء رشحوا زهيرى باشاا فليتفضل باستلام جائزته قصدى كرسيه

وشكرا للفاضل محمد بجد امتعتنا بردودك المنتقاة والمميزة واخص بالذكر مداخلتك عن الرئيس السادات رحمه الله

ملاحظة على جنب للفاضل سكوب

كنت اظن ان احترام الناس للشخص يزيد من رصيده فى الحياة ولكنك يا استاذى الفاضل أنت من تضيف لرصيدنا نحن باحترامنا وتقديرنا لشخصك الكريم

تقبل خاااااالص تحياتى ومودتى

تم تعديل 27 فبراير 2010 بواسطة om marawan

[عنبو]

وانا كمان برشح الاستاذ موزهيرى

وبقوله من هنا الكبير كبير واتفضل ومتخفش

ولما تيحى ابقى صحينى انا نايم جنب الكرسى

[joo]

وانا كمان برشح الاستاذ موزهيرى

وبقوله من هنا الكبير كبير واتفضل ومتخفش

ولما تيحى ابقى صحينى انا نايم جنب الكرسى

انا كمان موافق