كرسي الأعتراف 2 ( حاليآ الفاضلة Dreamwithme )

[MZohairy]

سؤال للاستاذ زهيري:

ايه اكتر اكلة حضرتك بتحبها?

آهي دي الأسئله ولا بلاش

الحواوشي wst::

[MZohairy]

ارشح

1- موديست

2- لولا

3- واحد تاني

سلامو عليكم wst::

[حسام يوسف]

ارشح

1- موديست

2- لولا

3- واحد تاني

سلامو عليكم wst::

استني بس يا عم الحاج

ايه الكروتة دي؟ :lol:

قدامك اسبوع يا مايسترو

وبخصوص سؤالي الخاص بالتشبيه لأعضاء المحاورات أرجو الاجابة عليه بما يتناسب مع انطباعاتك

حتى لو ماشفتش كل الاعضاء

ده طبعا لو تسمح بالاجابة على السؤال

smk:

[joo]

استاذ زوهيرى او محمد

احنا دائما لما بنسمع اغنية قديمة00 مش قديمة اوى بنفتكر موقف او شخص او حالتنا الشخصية فى ذات الوقت00 فياريت تقول لى

الاغنية دى بتفكرك بمين او اية؟

http://www.youtube.com/watch?v=VbiBigQVYFY

والاغنية دى بتهديها لمين

http://www.youtube.com/watch?v=s7kRh-M59Gc

تم تعديل 1 مارس 2010 بواسطة joo

[رضوي]

السلام عليكم ورحمة الله وبركاته

أستاذ زوهيري

منور الكرسي

شوية أسئلة علي الماشي

- ايه رأيك في عمل المرأة ؟

- اكتر بلد نفسك تعيش فيها ؟

- ايه اللي ممكن يزعلك اوي من مصر ؟ أو علي مصر ؟

- عمر الانسان يقاس بلحظات السعادة اللي بيعيشها ........ كم تبلغ من العمر ؟

-موقف حدث في الماضي البعيد ....... ولن تنساه ؟

- مين الناس اللي قابلتهم في حياتك واتعلمت منهم ؟

- ممكن تكتب مذكراتك ؟

-موقف حصل وندمت عليه ؟

- كلمة/موقف كانت سبب في تغيير مجري حياتك ؟

- رحلة لمكان بعيد مسموح بمرافقة شخص واحد فقط ......... من هو ؟

فاصل ونواصل

[MZohairy]

هكلمك على انطباعي على اللي تحاورت معاهم او شفتهم بس طبعا

مع احترامي لكل الأسماء الأخرى

س س

سكوربيون

ايهاب سالم

دكتور تهامى

حسام يوسف

وجدي

:lol:

س س ده يا سيدي راجل ابن بلد جدا و عنده خفة دم نادره و لما بيعزمني على ساندوتشات بياكلها هو و وعدني بفسيخ و ماوفاش بوعده

سكوربيون راجل طلياني مصري حتى النخاع و يملك أدب جم و لا يقل في خفة الدم عن شقيقه س س

ايهاب سالم راجل مخه نضيف و بيستعمله دايما لتخطيط اموره و متدين على فكره

دكتور محمد تهامي راجل نضيف قوي و بيووور و ابن حلال و مجموعة حاجات حلوه فوق بعض و كنت بتكلم معاه تليفونيا بالساعات و مبحسش بالوقت

حسام يوسف !!!!! طب ينفع اقول رأيي فيك ليك؟ انت مجتهد و متدين و مابتقبلش اي كلام الا لما تفلتره زي حالاتي و هتنجح في كندا و على مسؤليتي

وجدي ده مون شير و فعلا شخصيه تحتار تتكلم عليها و توصفها..فهو انسان لارج و شيك و مدردح (مش صايع يعني) :waving: و متدين و مثقف و حواره لا يمل منه

[MZohairy]

السلام عليكم ورحمة الله وبركاته

و عليكم السلام و رحمة الله و بركاته

أستاذ زوهيري

منور الكرسي

ده نورك يا فندم و الله يجازيك يا سكوب انت و محمد يوسف :lol:

- ايه رأيك في عمل المرأة ؟

اذا تجاوزت تكاليف اي مشروع ارباحه فيجب التوقف فورا

و بالتالي هي لازم توزن بين احتياجات اسرتها الماديه

و احتياجات اسرتها الأموميه و الزوجيه

و تاخد القرار السليم هي و جوزها

يعني في بعض المواقف لا يمكن لأي عقل ان يسمح لمرأه معينه بالعمل

و العكس صحيح

- اكتر بلد نفسك تعيش فيها ؟

فانكوفر اللي انا عايش فيها فعلا

- ايه اللي ممكن يزعلك اوي من مصر ؟ أو علي مصر ؟

مصر ما يتزعلش منها

مصر يتزعل عليها

و اللي حاكمينا ما يتزعلش عليهم

يتزعل منهم

- عمر الانسان يقاس بلحظات السعادة اللي بيعيشها ........ كم تبلغ من العمر ؟

يعني لو نقول اني انا 42 سنه حاليا يبقى عمري بتاع 40 سنه مثلا

-موقف حدث في الماضي البعيد ....... ولن تنساه ؟

وفاة أمي الله يرحمها

- مين الناس اللي قابلتهم في حياتك واتعلمت منهم ؟

انا بتعلم من كل الناس اللي بقابلهم من الصغير للكبير

و اللي يقول انا اتعلمت كل حاجه اعرفي انه ماتعلمش حاجه

- ممكن تكتب مذكراتك ؟

لألألأ

كتبتها مره و انا في ثانوي و اخويا قراها و جرسني

-موقف حصل وندمت عليه ؟

اني ماشوفتش ابويا قبل مايموت

- كلمة/موقف كانت سبب في تغيير مجري حياتك ؟

فؤاد المهندس

مراتي قبل ما تبقى مراتي كانوا ساكنين فوق شقة فؤاد المهندس

و الراجل اشتكى من دوشتهم (توانسه بقى و غاويين زيطه)

فأخوها بلغ السفاره يشوفوله مكان تاني بعيد عن سي فؤاد المهندس

راحوا اجروله الشقه اللي جنبنا

و عرفنا بعض

يعني لولا فؤاد المهندس مكانتش اتجوزت مراتي و خلفت عيالي

- رحلة لمكان بعيد مسموح بمرافقة شخص واحد فقط ......... من هو ؟

مراتي طبعا

اصل انا ابويا ميت و أمي ميته :waving:

[عنبو]

مسو زوهيرى

قرار الهجره الى كندا اخدته بعد لما جيت الخليج ولا انت اساساً مخطط له من زماااااااان قبل لما تيجى الخليج ؟

احياناً كثيره اشعر بأنك تتبنى وجهة نظر انت غير مقتنع بها وتدافع عنها مش خايف اصل واحد يقتنع بوجهة النظر دى اللى انت مش مقتنع بها وتبقى انت السبب ؟

هل انت دخلت كلية التجاره رغبه ام مكتب تنسيق ؟

ما هى البلاد التى زرتها , وما هى اجملهم ؟

نصيحه تنصحها للى اصغر منك ولسه جايين الخليج بما انك خبره تقولهم ايه ؟

ما هو رايك فى شباب المحاورات ؟

هل تقرأ لكل اللى فى المحاورات ولا ناس ناس ؟

ما هو رأيك فى الزواج المبكر ؟

هل تؤمن ان الاب لازم يجوز ابنه ولا على الابن ان يشقى ويتعب حتى يزوج نفسه ؟

بعد 15 سنه فى الخليج شايف الخليج ازاى ؟

ايه اكتر مكان بيوحشك فى مصر ولما بتنزل مصر بتقول ده اول مكان هروحه غير بيت العائله يعنى ؟

لو فى يوم من الايام لقيت ابنك بيدخن هتتصرف معاه ازاى ؟

من خلال قرأتك للاعضاء الاتى اسمائهم تنصح كل واحد فيهم بأيه

سوسو R

الدكتور هشام ابراهيم

الباشمهندس ياسر

لماضه مصريه

رضوى

جووو

احمد سيف

محمد العبنى

شكراً

[MZohairy]

استاذ زوهيرى او محمد

احنا دائما لما بنسمع اغنية قديمة00 مش قديمة اوى بنفتكر موقف او شخص او حالتنا الشخصية فى ذات الوقت00 فياريت تقول لى

الاغنية دى بتفكرك بمين او اية؟

http://www.youtube.com/watch?v=VbiBigQVYFY

والاغنية دى بتهديها لمين

http://www.youtube.com/watch?v=s7kRh-M59Gc

اغنية عدى الليل لإيهاب توفيق (دفعة 89 من كلية التربية الموسيقية) يعني قدي بالضبط و زميل اخويا في نفس الكليه

الأغنيه دي عملها ايهاب أواخر سنة 1994

و نجحت نجاح ساحق و كنت انا اياميها بشتغل في مكه و بعمل استقدام لمراتي عشان تيجي معايا السعوديه

يعني كنت عايش لوحدي

كنت انزل آخد العربيه الساعه 1 بالليل و احط الأغنيه دي و امشي في شوارع مكه و احود على مزدلفه و منى و ابقى على حافة البكاء

بكاء من الوحده و الغربه و فراق الأحباب اللي من ضمنهم ابويا الله يرحمه

عموما انا شايف ان ايهاب توفيق لن ينجح اكثر مما نجح و لن يقدم اكثر مما قدم للأسف

أما الأغنيه التانيه فوالله عمري ماسمعتها :lol:

[MZohairy]

مسو زوهيرى

قرار الهجره الى كندا اخدته بعد لما جيت الخليج ولا انت اساساً مخطط له من زماااااااان قبل لما تيجى الخليج ؟

واخده من زمان و قبل الخليج

احياناً كثيره اشعر بأنك تتبنى وجهة نظر انت غير مقتنع بها وتدافع عنها مش خايف اصل واحد يقتنع بوجهة النظر دى اللى انت مش مقتنع بها وتبقى انت السبب ؟

و ايه الداعي لأني اتبنى وجهة نظر انا مش مقتنع بيها؟ فيه حد في المنتدى حيدفعلي فلوس؟ :lol:

و بعدين اؤكدلك ان شعورك ده خاطئ 100% و انا واثق تمام الثقه من موقفي امام الله بخصوص كل ما أكتبه و اللي مقتنع به 100% ايضا

هل انت دخلت كلية التجاره رغبه ام مكتب تنسيق ؟

تنسيق بس حبيتها بعد كده و بعد ما رحت الخليج عرفت ان خريج التجاره الشاطر ممكن ياخد اضعاف راتب الدكتور و المهندس الشاطر

ما هى البلاد التى زرتها , وما هى اجملهم ؟

كتير جدا

و اجملهم فانكوفر

نصيحه تنصحها للى اصغر منك ولسه جايين الخليج بما انك خبره تقولهم ايه ؟

اقولهم وضبوا نفسكم عشان الشغل يجري وراكم مش العكس

يعني المحاسب مثلا يقوي الانجليزي بتاعه على قد ما يقدر و يقوي الإكسيل و البرامج المحاسبيه و يحاول يدرس و ياخد شهاده تدعمه زي ال CPA او CMA

ده جوه مخه

أما اللي بره مخه فلا يقل اهميه ايضا يعني لازم يحسن مظهره و لبسه و ريحته و لسانه و اسلوب حواره (برستييجه بشكل عام)

و عمره ما يعتبر انه في احسن وظيفه و مفيش داعي يدور

دايما خلي السيفي بتاعتك في السوق و سعر نفسك دايما

ما هو رايك فى شباب المحاورات ؟

ربنا معاهم و يوفقهم

هل تقرأ لكل اللى فى المحاورات ولا ناس ناس ؟

بصراحه مش كل المواضيع بتستهويني و بقرأ اللي احس انه ممكن يكون مناسب

ما هو رأيك فى الزواج المبكر ؟

حلو اذا كانت الإمكانيات المادية جيده و العقليه ناضجه

و وحش لو العكس

هل تؤمن ان الاب لازم يجوز ابنه ولا على الابن ان يشقى ويتعب حتى يزوج نفسه ؟

دي حاجه راجعه للظروف

يعني لو الأب مقتدر ايه اللي يمنعه من دعم ابنه؟؟؟

بعد 15 سنه فى الخليج شايف الخليج ازاى ؟

فرصه ماديه جباره لمن يحسن استغلاله و يفهم اصول اللعبه

ايه اكتر مكان بيوحشك فى مصر ولما بتنزل مصر بتقول ده اول مكان هروحه غير بيت العائله يعنى ؟

شارع المنتزه في الزمالك على النيل

لو فى يوم من الايام لقيت ابنك بيدخن هتتصرف معاه ازاى ؟

سؤال صعب و فعلا مش عارف بس اوعدك اني هحكيلك لو حصل

من خلال قرأتك للاعضاء الاتى اسمائهم تنصح كل واحد فيهم بأيه

سوسو R

الدكتور هشام ابراهيم

الباشمهندس ياسر

لماضه مصريه

رضوى

جووو

احمد سيف

محمد العبنى

دول كلهم ناس كبيره و ناضجه و هم من يقدمون النصح للآخرين مش العكس يا حماده

شكراً

[Scorpion]

ايه ده .. بقي يبقي زهيري نفسه قاعد عالعمبوكة .. و ما حدش يستغل الفرصة الذهبية دي ...

لاااااااا .. حاشا و كلا .. فلنأخذ من كل رجل ... قبيللللللللللة !

طيب يا زهيري :

- تفتكر الأشاعة اللي طالعة عليك بأنك مهدي للنفوس ليها جانب من الصحة ؟؟؟

- هل لديك رغبة داخلية في ان تحط رحالك انت و اسرتك الكريمة في مصر بعد اللف في الدول المختلفة ؟

- لماذ تنتهج الأسلوب التصادمي الذي يصل أحيانآ الي حد "الأستفزاز" في حوارك مع تيارات تختلف مع منهجها ؟

- ماذا تتمني بالفعل لزهيري بشخصه فقط .. و ليس لدوره كأب أو زوج ؟

- من هو مثلك الأعلي في الحياة ؟؟

مطلوب اجابة جادة و مباشرة و غير دبلوماسية ..

ياللالالالالا.... شيلوه

[Morial]

انا اول مرة اكتب هنا في التوبيك الجميل ده وبصراحة انا جيت لما عرفت ان استاذ زهيري هو اللي علي الكرسي فلقيتها فرصة بصراحة

اني أسأل كام سؤال من نفسي

استاذ زهيري ;

تعمل إيه لو اكتشفت انك اخدت قرار غلط في حياتك ترتب عليه ضياع وقت وجهد وفلوس

ايه هو القرار اللي اخذته ثم ندمت عليه ؟

تعمل ايه لو فجأة وجدت كل من حولك ضدك ؟

بتعمل إيه لما بتزعل من نفسك ؟

إيه اكتر حاجة بتقلقك ؟

تعمل ايه لما تكون لازم تنام لكن عندك ارق ؟

لمين تقول الكلام ده ؟

مقدرش علي زعلك ؟

في المشمش ؟

مش عايز اشوف وشك تاني؟

هفضل طول عمري احبك؟

إرحم نفسك ؟

ميرسي واتمني مكونش تقلت علي حضرتك

[MZohairy]

ايه ده .. بقي يبقي زهيري نفسه قاعد عالعمبوكة .. و ما حدش يستغل الفرصة الذهبية دي ...

لاااااااا .. حاشا و كلا .. فلنأخذ من كل رجل ... قبيللللللللللة !

سكوب اخي في المواطنه و في حب الله و منك لله

طيب يا زهيري :

- تفتكر الأشاعة اللي طالعة عليك بأنك مهدي للنفوس ليها جانب من الصحة ؟؟؟

والله طلعوها عليا بدون اي اسانيد يا سكوب و انت عارفني غلبان و في حالي و مبحبش المناهده

- هل لديك رغبة داخلية في ان تحط رحالك انت و اسرتك الكريمة في مصر بعد اللف في الدول المختلفة ؟

لأ

- لماذ تنتهج الأسلوب التصادمي الذي يصل أحيانآ الي حد "الأستفزاز" في حوارك مع تيارات تختلف مع منهجها ؟

ولا استفزاز ولا اي حاجه يا سكوب

الناس اللي بختلف معاه انا في الواقع بحبهم و عايزهم افضل و مش مضحوك عليهم من جهات لها مصالح

فيمكن اسلوب الميه البارده بعد السخنه و العكس يعمل شوية حراك و يخلي خلايا المخ عندهم تعمل بأقصى طاقتها

- ماذا تتمني بالفعل لزهيري بشخصه فقط .. و ليس لدوره كأب أو زوج ؟

ولا حاجه

عايز اربي العيال كويس و بس

و آخد معاش مبكر و اكمل حياتي انا و مراتي في نورث فانكوفر حيث الحياه المتعه و المتعه الحياه

- من هو مثلك الأعلي في الحياة ؟؟

ابويا الله يرحمه

[عنبو]

لماذ تنتهج الأسلوب التصادمي الذي يصل أحيانآ الي حد "الأستفزاز" في حوارك مع تيارات تختلف مع منهجها ؟

ولا استفزاز ولا اي حاجه يا سكوب

الناس اللي بختلف معاه انا في الواقع بحبهم و عايزهم افضل و مش مضحوك عليهم من جهات لها مصالح

فيمكن اسلوب الميه البارده بعد السخنه و العكس يعمل شوية حراك و يخلي خلايا المخ عندهم تعمل بأقصى طاقتها

معلش سؤال ياعم زوهيرى ليه انت مفترض انهم مضحوك عليهم ليس مش العكس ؟؟

[MZohairy]

انا اول مرة اكتب هنا في التوبيك الجميل ده وبصراحة انا جيت لما عرفت ان استاذ زهيري هو اللي علي الكرسي فلقيتها فرصة بصراحة

اني أسأل كام سؤال من نفسي

تحت أمرك يا فندم

استاذ زهيري ;

تعمل إيه لو اكتشفت انك اخدت قرار غلط في حياتك ترتب عليه ضياع وقت وجهد وفلوس

عموما انا بدرس اي قرار آخده بمنتهى الدقه

و لكن الأمر لا يخلو من المفاجآت

انا لا ابكي على اللبن المسكوب ابدا

و طالما ليس بالامكان افضل مما كان يبقى ببتدي من الاول و كأني ماخسرتش حاجه

بالعكس كسبت التجربه و الخبره

ايه هو القرار اللي اخذته ثم ندمت عليه ؟

غالبا مفيش

تعمل ايه لو فجأة وجدت كل من حولك ضدك ؟

ده يعتمد على مين اللي حولي

يعني لو قصادي 100 جاهل معاهم ابتدائيه و بيكلموني في الطب

غير لما يكونوا اطباء استشاريين بيقولوا رأي طبي مخالف لرأيي

انا بوزن الأمور على حسب كل حاله

بتعمل إيه لما بتزعل من نفسك ؟

غالبا ما بزعلش من نفسي

إيه اكتر حاجة بتقلقك ؟

مستقبل ولادي رغم اني مخليها على الله

تعمل ايه لما تكون لازم تنام لكن عندك ارق ؟

بطبق نصيحة محمد عبد الوهاب اللي هي: ان طال بك ليل الأوهام و عيونك مش قادره تنام

صدقني خد لك حمام ييجي نومك و الليله هنيه

لمين تقول الكلام ده ؟

مقدرش علي زعلك ؟

مراتي و ولادي

و ابويا و امي الله يرحمهم لما كانوا عايشين

في المشمش ؟

اي حد غير جمال مبارك ...مش حبا فيه و انما استقراء منطقي للمستقبل

مش عايز اشوف وشك تاني؟

ابوه

هفضل طول عمري احبك؟

مراتي :blink:

إرحم نفسك ؟

اقولها لسي السيد عشان كان واعدني يجيبلي فسيخ و ماجابليش و قاعد ياكله لوحده

ميرسي واتمني مكونش تقلت علي حضرتك

آ فوتر سيرفيس ما دام

تم تعديل 6 مارس 2010 بواسطة mzohairy

[MZohairy]

لماذ تنتهج الأسلوب التصادمي الذي يصل أحيانآ الي حد "الأستفزاز" في حوارك مع تيارات تختلف مع منهجها ؟

ولا استفزاز ولا اي حاجه يا سكوب

الناس اللي بختلف معاه انا في الواقع بحبهم و عايزهم افضل و مش مضحوك عليهم من جهات لها مصالح

فيمكن اسلوب الميه البارده بعد السخنه و العكس يعمل شوية حراك و يخلي خلايا المخ عندهم تعمل بأقصى طاقتها

معلش سؤال ياعم زوهيرى ليه انت مفترض انهم مضحوك عليهم ليس مش العكس ؟؟

كل شيئ ممكن يا حماده

لكن حتى يثبت العكس يبقى الحال كما هو عليه :blink:

[لماضة مصرية جدا]

السلام عليكم و رحمة الله و بركاته

استاذ زوهيري.....مستمتعة جدا بحالة التصالح مع النفس.....و تعايشك مع الواقع و قدرتك ان تظل متفردا مهما تشابهت الصفحات

بعد البوءين دول بقي... اسمحلي ننزل بالبهاريز:

1- السفر...له متعة لا تقاوم....و ليه ألم اوقات نقدر نقاومه.....ايه متعته....و ايه ألمه؟؟؟

2- لو عند حضرتك بنوتة....تخاف عليها من ايه.....هتربيها ازاي.....و دايما تنصحها بايه؟؟؟

3- حاجة لازم تحيها في المرأة........و حاجات تخنقك منها؟؟؟ (شايف ديمقراطية السؤال.... :blink: )

4- لو ااتنين غاليين عليك اوي مقدمين علي الزواج...... تنصحهم بايه؟؟؟ (غير طبعا انهم بلاش يتجوزوا احسن....لا هيتجوزا حضرتك....هي طالبة كده.... :lol: )

5- نصيحة ليا ...لو تكرمت....(الهي و انت جاهي يطعمك ما يحرمك..).....عندي فرصة ازور كندا....عندي عرض اني اشتغل في الصين (ايون و عينيا يبقي شكلها كده... ).....و همووووووت و اشوف امي في مصر........و احساسي بيقولي لازم ابقي أم....ارتب اولوياتي ازاي؟؟؟

6- ايه المواقف اللي ممكن تربطك بالعبارات التالية..... او تقولها لمين.....

- "بإمكانك أن تموت بلا ثرثرة....و تأفل دون ضجيج"

- "في علبة سردين محكمة الاغلاق....قالوا تجول"

- "جلبة الصمت في اعماق الروح....أشد صخبا من قرع الطبول"

- " لا تنفض رمادك في أحداقي....أريد أن أراك بوضوح"........(الكلمات ل محمد زيدان...... غادة السمان...)

7- لما تحب تهرب من صحراء الضجر تعمل ايه؟؟؟

8- الحياة..... في كلمات

9- الرجل.....في كلمة واحدة

10- الحرية........في سطور و صفحات

تحياتي استاذي

مش عارفة ليه انا قلبت علي برنامج أوتار آخر الليل.....كان بييجي زمان ع القناة الأولي قبل ما الارسال يقول تششششش

صباااااااااحكم إرسال.....و استقبال.......و موجة تاخدنا و تعلمنا.......نحن لا ننتمي لشاطيء المألوف

[MZohairy]

السلام عليكم و رحمة الله و بركاته

استاذ زوهيري.....مستمتعة جدا بحالة التصالح مع النفس.....و تعايشك مع الواقع و قدرتك ان تظل متفردا مهما تشابهت الصفحات

يا ستي كتر خيرك و اخجلتم تواضعنا

بعد البوءين دول بقي... اسمحلي ننزل بالبهاريز:

1- السفر...له متعة لا تقاوم....و ليه ألم اوقات نقدر نقاومه.....ايه متعته....و ايه ألمه؟؟؟

المتعه في مشاهدة الجديد و الغريب و يكفي اقولك ان الخواجه الالماني مثلا بيجد متعه رهيبه في مشاهدة الصحراء !!!

أما الألم فأعتقد انه فقط في فراق الأحباب و الأقارب و الأصدقاء

و ده بيخف كتييير مع الزمن حتى ينعدم

2- لو عند حضرتك بنوتة....تخاف عليها من ايه.....هتربيها ازاي.....و دايما تنصحها بايه؟؟؟

عندي و الحمد لله (لجين) و كل اللي طالبه من ربنا انها تكون مصريه متفتحه و كنديه متدينه

3- حاجة لازم تحيها في المرأة........و حاجات تخنقك منها؟؟؟ (شايف ديمقراطية السؤال.... :blink: )

احب قوي الست اللي مخها كبير و بتحاول تعتبر انها زوجة زوجها و أمه و صديقته في آن واحد

و أكره جدا الست اللي رأسمالها في حياتها كله هو شكلها فقط

4- لو ااتنين غاليين عليك اوي مقدمين علي الزواج...... تنصحهم بايه؟؟؟ (غير طبعا انهم بلاش يتجوزوا احسن....لا هيتجوزا حضرتك....هي طالبة كده.... :lol: )

لو مش قد الزواج ماديا و مخيا ما تتجوزش

و لو اتجوزت فأحسن الإختيار (راجل او ست)

من عوامل نجاح الزواج هو التقارب الفكري و الاجتماعي و المادي و العاطفي و الثقافي و التعليمي

كل ما الصفات دي قربت من بعض كل ما يكون الزواج انجح بإذن الله

5- نصيحة ليا ...لو تكرمت....(الهي و انت جاهي يطعمك ما يحرمك..).....عندي فرصة ازور كندا....عندي عرض اني اشتغل في الصين (ايون و عينيا يبقي شكلها كده... ).....و همووووووت و اشوف امي في مصر........و احساسي بيقولي لازم ابقي أم....ارتب اولوياتي ازاي؟؟؟

:D

اولا الجواز و الأمومه ما بيترتبوش ...دول بييجوا لوحدهم زي القضاء و القدر و بالتالي نخرجهم بره الموضوع

و بما اني مش عارف حضرتك فين حاليا يبقى الاجابه حتكون ناقصه شويه

بس بالويم كده تروحي بسرعه تطمئني على والدتك في مصر و تطلبي رضاها و تبوسي ايديها

و تطلعي جري تضمني الشغل في الصين و تستقري

و بعدها تزوري كندا في الاجازه

6- ايه المواقف اللي ممكن تربطك بالعبارات التالية..... او تقولها لمين.....

- "بإمكانك أن تموت بلا ثرثرة....و تأفل دون ضجيج"

اقولها حاليا للسيد احمد شوبير عضو مجلس الشعب الموقر

- "في علبة سردين محكمة الاغلاق....قالوا تجول"

:ninja: لكل قائد سياره في دبي في شارع الشيخ زايد و اثناء التوقف و الشلل المروري التام لساعات تجدين لوحه كبيره بجانبك في الشارع مكتوب عليها : السرعه القصوى 120 كيلو متر

- "جلبة الصمت في اعماق الروح....أشد صخبا من قرع الطبول"

اقولها لأي متغرب و سايب احبابه

و اهديله فوقها اغنية محمد عبد الوهاب :

طول عمري عايش لوحدي فريد و راضي بحالي

و ان زاد على القلب وجدي اسهر معاه الليالي

- " لا تنفض رمادك في أحداقي....أريد أن أراك بوضوح"........(الكلمات ل محمد زيدان...... غادة السمان...)

حسين السيد الله يرحمه بيقول:

يغيب و يفتكر و يجيني بشكوته

يكذب و يعتذر و اصدق حجته

و ازاي اكدبه؟ و انا روحي تعشقه

و القلب لو عشق الكذب يصدقه

7- لما تحب تهرب من صحراء الضجر تعمل ايه؟؟؟

غالبا لا اشعر بالضجر و ان حدث و هذا نادرا بدخل انام و بيجيلي نوم فورا

8- الحياة..... في كلمات

عشان تعيشها من غير تعب لازم تخلي ثلثها ذكاء و ثلثيها اعمل غبي

9- الرجل.....في كلمة واحدة

من بره هلله هلله و من جوه يعلم الله

10- الحرية........في سطور و صفحات

لا يشعر بقيمتها الا من عاشها

[مغتربة]

استاذ زوهيرى ايه مميزات و عيوب كلا من تجربه دبى و تجربه كندا و ايه اهم الفروق الجوهريه ما بينهم

[اغابي]

متابعة ومستمتعة جدا

كمان

و كمان