كرسي الأعتراف 2 ( حاليآ الفاضلة Dreamwithme )

[fatfouta]

مين اللي قال ان ضحى قعدت على الكرسي قبل كده

بتجيبوا الكلام دا منين و تطلعوا اوشاعات مغرضة كده

اعوذ بالله عليكم

ليه كده انتوا مش عارفين ان اللي بيطلع اوشاعات بيروح النار :lol:

عموما حتى لو قعدت قبل( و دا ما حصلش ) ايه المانع انها تقعد تاني بناءا على رغبات الجماهير

انا عن نفسي كمان بانضم لصفوف الجماهير

و تنتخبوا مين ؟؟؟؟؟؟؟؟؟؟؟؟؟؟؟؟؟؟؟؟ ضحى :blink:

و حبيبتكم مين ؟؟؟؟؟؟؟؟؟؟؟؟؟؟؟؟؟؟ ضحى :lol:

طب ماتقعدى انتى يا ريمو :h!!!h:

[اغابي]

ضحى 6 أصواااات لغاية دلوقتى - اغلبية ساحقة

حد يوصل ينادى ضحى - يا جماعة

اغابي

[shiko]

...هو مال الكهربا زادت كتير النواحى دى ليه يا ولاد ....

....

ايه بتقولوا مين اللى هييتكهرب وعاوزين تزودوله الفولت ؟؟

؟؟

بتقولوا مين ؟؟؟

ضحى ....

هاتوها ....

وبناءا عليه امرن نحن المحرر العام بضبط واحضار ...المدعو فى حقها ...

وكهربتها على الكرسى وتعلية الفولت الكهربى حتى 45653 امبير ....

هذا وقد اقفل المحضر فى ساعته وتاريخه

[doha]

ضحى بتقول انها قعدت على الكرسي قبل كدااا

مش فاكرة مين يا جماعة ضحى ولا رضوى قعدو على الكرسي

قبل كدا . . ؟؟

مهو المشكلة ياجماعه كده هكسر القوانين هو صحيح انا مش فاكره اني قعدت او حتى وقفت على الكرسي بس بما ان اغابي قالت اني قلت يبقى قلت هو انا يعني هفهم احسن من الدكتور

[hOuSsAm]

ضحى .... ربنا معاكى

هبدا انا بحاجة خفيفة

من انتى؟

جاوبى ده على مجهز اسئلة الفولت العالى

[doha]

ضحى .... ربنا معاكى

هبدا انا بحاجة خفيفة

من انتى؟

جاوبى ده على مجهز اسئلة الفولت العالى :wub:

خلاص يعني نويينها نوييننا ؟

طيب الامر لله نخش بقلب جامد بعد اذن الموجودين

بس على فكره البتاع ده طلع بيخوف بجد وريحه الشياط الي ماليه المكان تخليني اقلق على مصير مكاوي الله يرحمه كان راجل طيب

وحدوه ياجماعه ..

على العموم ادي الحاجات الي معايا قبل ماقعد على الكرسي سلمتهم للماضه على الباب .. خلي بالك من البقجه يالمضمض وان حصل لي حاجه ابقي سلميها للورثة اما الشومه فخديها ليكي حلال مش عوزاها هم عندهم غيرها وان ربنا كتب لي عمر بعد التوبيك ده ابقي هاتيها يابنتي اكمل بيها تنفيض في المنتدى .. انتي عارفه الايد البطالة نجسه وانا مبحبش اقعد من غير شغل

توكلنا على الله ..

=========

من انتى؟

بسم الله الرحمن الرحيم الاجابة .. معرفش

لو سالتني اي سؤال في الدنيا كان ممكن اجاوبك عليه بشكل قطعي الا السؤال ده لان فعليا صعب اوي اجاوبك عليه بشكل حاسم لا يحتمل الشك

لو هجيبها لك من البطاقة فانا ضحى احمد مواليد يناير 75 ـ دلو يعني ودي فارقة معايا كتير اوي على فكره ـ متزوجه وعندي بنت واحده عمرها 6 سنين .. بكالريوس تجاره بشتغل في مجال الحاسب والبرمجه تقدر تقول يعني بصلح بواجير .. عايشه حاليا في الرياض ولو سالتني نفس السؤال بعد اسبوعين تلاته باذن الله فهيكون في الجزئية دي اختلاف

مصرية من الغربية عشت معظم سنوات عمري برا مصر تحديدا في السعوديه ـ ودي فرقت معايا برضه على مايبدوا كتير ـ لو هكلمك عن هواياتي فالافضل انك تستثني خمس ست هوايات خطرة جسمانيا زي التزحلق على الجليد او قياده سيارات السباق او تسلق الجبال .. فيما عدا ذلك فاعتقد اي هواية توصلت لها الانسانية فلابد انها كانت هوايتي في يوم من الايام

اكتر حاجه بحبها من الهوايات الحية القراءة والفن اجمالا من رسم لنحت لتصوير وكل حاجه تحس ان فيها ابداع او مشاعر او احاسيس مختلفة هتلاقيني مستمتعه بيها

دي بيانات البطاقة الشخصية والشكل العام الي الناس القريبة مني بتعرفني بيه .. اما الشكل الي بعرف انا شخصيا بيه نفسي فتقدر تقول كده ولو ان لاي منا حياة اخرى فاعتقد اني كنت انتمي فيها لفصيلة القطط ومتستغربش

لو جبت اي قطه في الدنيا هتلاقيها كائن تركيبته شديده الغرابة

احيانا تلاقيها مستمتعه جدا باللعب والجري والتنطيط واحيانا تانيه تلاقيها جاده ومكشرة ولا تقبل منك ادنى خطأ

تلاقيها مع صاحبها رومي وبشريطه اورجانزا وهي هي تلاقيها بعد شويه مع حد غريب حاده وبتخربش ومش بعيد كمان ديلها مقطوع منه حته

ساعات تلاقيها نايمه تتشمس وبايعه الدنيا وساعات تانيه مهمومه شايلها عيالها في اسنانها وبتجري تدور لهم على حته امان

متعتها الغريبة انها تلاعب الفار وتنكشه وتتفرج عليه وهو حيران باكثر مما تستمتع باصطياده

لو سالت اي قطه من دول انتي ايه بصراحه مش عارفه هترد تقولك ايه بالظبط .. لكن الغالب هتقولك لو كان في لي حياة اخرى فاعتقد اني هكون ضحى .. ضحى وبس

تم تعديل 17 مايو 2010 بواسطة doha

[hOuSsAm]

كويس

هو انا حاسس انى قاعد لواحدى هنا كدة ليه

امال فين بقيت الناس

عالعموم اسخن مواتير السد العالى اهو تعمل منظر لحد ما الشباب يجوا

1- ضحى انتى بتقولى تربيتك فى الخارج وتحديدا فى السعودية فرقت معاكى وعلى مايبدو انه كتير.

ايه تاثير التربية فى السعودية عليكى فى نقاط محددة من حيث المزايا والعيوب؟

2- واضح انك درستى الكلية فى مصر وبقية الدراسة كانت فى السعودية على ما اظن

ايه انطباعك فى اول سنة عن الدراسة فى مصر والطلبة والمدرسين واصدقائك اللى بقوا مقربين ليكى بعد كدة؟

وايه الاختلافات الاساسية كدراسة بين السعودية ومصر؟

بالنسبة لبنتك تحبى انها تدرس فى مصر ولا السعودية ؟ وليه؟

3- اخوكى بيشتغل فى الخليج ومستقر هناك واتعرض عليه شغلانة فى مصر طبعا مش هتكون بنفس الراتب ولا نفس المميزات وكمان هيتعب فيها اوى فى اول سنتين بس بعد كدة هيبقى ضمن مستقبل وظيفى قوى جدا احسن من الخليج بكتير لو كان استمر على نفس الشغلانة ولو حب بعد كدة يسافر الخليج هيسافر على اضعاف المرتب اللى كان بياخده.

تنصحيه بايه؟

4- أصعب موقف فى حياتك حصلك ومستحيل تنسيه؟ واتصرفتى ازاى؟ واتعلمتى ايه من الموقف ده؟

5- ايه اخر 3 كورسات ضحى اخدتهم ؟ ونبذة فى سطر عن كل كورس

6- عندك 3 اخوات ولاد فى اعمار مختلفة تحبى تنصحيهم بايه وتحذريهم من ايه كل واحد على حسب الفئة العمرية بتاعته

أ - واحد لسه داخل الجامعة.

ب - واحد متخرج جديد وبيدور على شغل.

جـ - واحد بيشتغل بقاله فترة وداخل على جواز.

د - واحد متزوج وعنده اولاد

7- ايه الحاجة اللى ناقصة ضحى فى السى فى؟

8- ضحى معاها 5 مليون ريال سعودى ومعاها 7 ايام لازم تصرف كل الفلوس دى بشرط متصرفهمش فى شراء عقارات ولا اراضى ولا شراء وسائل نقل؟ معاكى اسبوع اهو هتعملى فيه ايه؟

بالشفا باذن الله :wub:

[لماضة مصرية جدا]

السلام عليكم و رحمة الله و بركاته

واااااااااااااد يا سليط...افقع صوفارة.....براااافو ضحي عندنا يا هلا و غلا

انا لسه هخش في ترحيبات.....خودي دول:

1- جواكي حلم.......كل شوية يفضل يتنطط في دماغك...رايح جاي ...جاي رايح....بس مش عارفة او مش قادرة تحققيه دلوقتي؟؟؟

2- يا ضحي انا حبيتك من زمان....و حبيتك اكتر لما لقيت الكلام الشاعري بتاع القطط ده....القطط كائنات مظلومة بجد....بيحطوها انها بتحب تتدلع و تتشاقي و بس....بس هي كائن مالوش حل....لو ضحي بقت قطة....هتاخد من صفات القطط ايه؟؟؟

3- بصي ل...ضحي....من 10 سنين فاتوا.....كانت بتحلم يايه...بتفكر ازاي.....و تعالي بقي دلوقتي....اتغيرتي....طب لانهي اتجاه؟؟؟؟.....طب شايفة نفسك بعد 5 سنين ازاي؟؟

4- ضحي...هل هي....أم واعية.....قارئة جيدة.....مشروع سيدة اعمال مستني الطلعة الاولي.....ست في حالها؟؟؟

5- زمان كنت قولتي كلمة و فضلت ترن في ودني......الناس هنا في المنتدي.....بتكرر نفس الشخصيات الي فاتت.......يا تري ممكن تعملي زي لعبة آيس هارت قرين بين محاورين دلوقتي و محاروين زمان؟

6- انتي قولتي انك كنتي في منتديات كتير قبل كده......ايه اغرب حاجة مرت عليكي في عالم المنتديات.....سواء هنا او في الحاجات التانية؟

7- بتحبي الهوايات الخطيرة.......(انا امل حياتي اركب موتوسيكل...)......هل لانك شخصية مغامرة.....هل لانك اتربيتي في السعودية....و جه عامل عندنا كبت لكل الاحلام المتوحشة....هل هي كده؟؟

8- انتي شخصية طموحة جدا......بس زوجك...(ده سؤال افتراضي).....عايز يعيش و السلام....معندوش حلم.....يا تري تنكشيه ازاي؟

9- بنوتك ربنا يخليها.....مين اخترا الاسم.......هي صاحبتك....و لا بنتك....و لا مامتك...(انا مقتنعة ان الولاد هما اللي بيربوا والديهم ع فكرة)......و لا مشروع عمرك؟؟؟

10- بتقولي انك بتحبي اي حاجة فيها مشارع و احاسيس و حركات و كده.....بس عمري ما قريت ليكي مداخلات في توبيك الشعر و الادب....انتي بتحبي تخبي مشاعرك...مع انها عنيفة جدا....بتخافي تبينها.....و عشان كده بتاخدي ليها اتجاه مضاد انك تكتبي في حاجات جادة؟؟.....و لا بتحبي تعبري عن مشاعرك بطرق تانية...طب ايه؟؟؟

11- لماضة....او ريهام.....او البنت اللي اتكعبلت في المحاورات من قيمة مش عارفة اد ايه....بس كل يوم الصبح تبص للمداخلات بتوعوها و تقول هو انا هنا بعمل ايه.......انصحيها نصيحة....من قلبك اوي؟؟؟

12- لو انتي بقي عندك اوبشن تبقي ولد.......يا تري هتختاريه......و هتبقي ملامح شخصيتك ساعتها ايه؟؟؟

13- ايه احساسك لما بتنزلي مصر.......طب ليه.....و بتعملي ايه عشان تطلعي بره الاحساس ده؟؟؟.....او لو حلو.....بتصدقي بجد...و لا بتصبري نفسك؟

14- شخصية اثرت فيكي اوي في حياتك....ممكن م الاسرة...ممكن وش حد من الحياة.....ممكن كتابة عضو في عالم المنتديات الافتراضي؟

15- لما بتبقي مع ربنا في جوف الليل....ايه الدعوة اللي بتبقي من قلبك اوي....و بتبكي فيها؟

16- في توبيك لحظات غيرت حياتنا.....ذكرتي لحظة فارقة اوي معاكي.....يا تري بقيتي بعديها اكثر زهدا....و لا اكثر يقينا و لا اكثر تسليما....و لا احتجتي وقت عشان تستوعبي و تعيدي حساباتك الايمانية؟

17- بنوتك........كبرت ربنا يبارك لك فيها....و دخلت عالم المنتديات....و في يوم قالتلك...ماما العضو "نوسو الحندوسو" اللي في منتدي "انا بآكل شطة و عندي زوغطة".... ....عايز يتقدملي....احساسك بقي في اللحظة التاريخية دي ايه....و هتتصرفي ازاي.....(ابوس القدم اوعي ترصي كلام في قوالب.....سيبي نفسك كدهون....و امسكي المايك....و عيشي)

18- فكرتي تسلكي سلك الدعاة.....و يا تري...ايه المنهجية بتاعتك؟

يااااااااااااااااااااااااااااااااااااااااه تعبت

بصي انتي ازاوي فيهم كده و اشوفك كمان شوية (معاكي 10 دقايق.... wst:: )......و حطي عليهم فرق التوقيت بينا يالا يا عم عيشي بقي

صباااااااااااااااااااااحك فضول......ينكش في راسي عشان اعرف اكتر عن حد بحبه

فوتك بعافية

[Mr MAGED]

لا حول ولا قوة إلا بالله

والله كانت طيبة وبنت حلال

الله يكون فعونك يا ضحي

أنا بصراحة بعد اللي شفته ده معرفتش أحط أي أسئلة

تعيشي وتاخدي غيرها

[the consultant]

بسم الله ........ شوفي يا مدام ضحى / انا ما بطولش و اسألي السيد الفقيد مكاوي اللي اختفى في ظروف غامضة هما كام سؤال صغيرين:

1: لو رجع بيكي الزمن و كان ليكي حق الاختيار كنتي حتتولدي في السعودية؟

2: اكتر قرار ندمتي عليه في حياتك؟

3: رايك في كلمتين بصرااااحة شديدة في كل من (س س -لماضة -اغابي - مكاوي -حسام- يوزر- زهيري- كونسلتانت,..........اي حد عايزة تضيفيه)

4: بصراحة برده ايه احساسك لما اترشحتي للجلوس على الكرسي ( اثارة, خوف, تردد,........)

5: هل تعتقدي انك الاذكى دايما او ان نظرتك في الحياه دايما هي الاصوب ؟

6: هل تحبين نفسك ؟

7: ايه الحاجات اللي نفسك تغيريها في نفسك؟

8: كام نسبة المعلومات عن حياتك اللي مايعرفهاش حد غيرك و لا حتى جوزك ولا بنتك؟

يالا كفاية كدة مبدئيا و فاصل و نواصل

[pink rose]

صبح صبح يا عم الحاج

انتي عرفاني طيبة و ما بحبش الوك كتير هما كام سؤال على الماشي كده

بحب ارمي التماسي يا واد يا راسي يا اللي قاعد على الكراسي wst::

1_عندك كام اخ و كام اخت؟و مين اقرب واحد او واحدة ليكي شكلا؟ و مين اكتر واحد او واحدة قريب منك؟

2_ضحى لما بتزعل مين اللي بتجري عليه تفضفض معاه؟

3_ايه اكتر حاجه مجنونة و مطرقعه عملتيها في حياتك (طبعا انا عارفه و انتي عارفه)؟ لو رجع بيكي الزمن تاني كنتي هاتعمليها ؟

4_ميار هانم لاظوغلي اول ما ولدتيها كان شعورك ايه اول ما شوفتيها؟

5_ميار هانم اوغلو تتمني تشوفيها ايه؟ امنياتك ليها ايه؟

6_لما تنزلي مصر ان شاء الله ايه اول حاجه ناوية تعمليها؟

7_كان عندك معهد قبل كده ايه مميزات و عيوب التجربة دي و استفدتي منها ايه و هل ممكن تكرريها في الوقت الحالي؟

8_مين اصحابك سواء في الحياة العادية او في المنتديات و ايه اهم صفاتهم؟

9_ايه اكتر اكله بتحبيها؟ايه اكتر اكله بتتميزي بعمايلها (و ان اكيد مش بشر اللي عاملين البتاعه دي ) ؟ و ايه اكتر اكله بتكرهيها عمى؟

10_حاجة نفسك تشتريها و بتحوشي عشان تجيبيها؟

11_ايه الالوان الي بتحبيها؟ ايه الالوان اللي بتكرهيها؟ وايه اكتر لون مميز عليكي؟

12_فرق معاكي ايه برج الدلو؟

13_بتعنيلك ايه كلمات دي

الحب

الصداقة

الطموح

14_عندك بطاقة انتخابية؟طب لو عندك و جت انتخابات الرئاسة و كان المتقدمين هم حسني مبارك _ ايمن نور_البرادعي_ عمرو موسى_حمدين صباحي_جمال مبارك ترشحي مين فيهم و ليه؟

15_ايه نوعية افلامك المفضلة الاكشن _ الرومانسي_ التراجيدي_ الكوميدي؟اكتر فيلم عجبك و مش قادرة تنسيه؟

16 _ ايه الاغنية اللي رقصتي عليها سلو في فرحك؟

17_ اكتر لحظة فرح عدت في حياتك و اكتر لحظة حزن؟

18_ قرار اخدتيه و ندمتي عليه ؟قرار اخدتيه و مقتنعة تماما انك اتصرفتي 10 على 10؟

19_ ضحى و هي طفلة صغننة كانت ايه شقية _ هادية _ مطيعة _ متمردة؟

20_ ضحى ليها تجارب مع الريجيم اكتر وزن نزلتيه ؟ و لما نزلتي كنتي حاسة بايه ؟

كفاية عليك كده يا ضحضح لحسن تموتني بس ما اوعدكيش ان دي اخر الاسئلة بس قولت اسيب للشباب و الشابات فرصة

[doha]

يالهوي يالهوي يالهوي

حرام عليكم انا برضه بنت ناس ..

ايه كل ده .. اجاوبهم امتى دول

انا بحب اكتب برواقه واستفاضه ومخمخه .. الحاجات دي عاوزه عمر فوق العمر عشان تتجاوب

بس اقولكم .. انتم الي جبتوه لنفسكم

هروح اعمل كوباي شاي واعصب راسي بايشارب قديم والبس عفريته التنظيف وافضالكم

التوبيك ده هيتنفض تنفيض النهرده ..

عشان تبقوا تبطلوا اسئلة ..

.. استعنا على الشقا بالله ...

[mekkawy]

طب ما شاء الله ما شاء الله

طب اسيبك شوية كدة يا مدام ضحى تجاوبي الستميت سؤال دول و أرجعلك بما لذ و طاب

تخيلي بأة أنا لسة قايم من ع الكرسي و مخي شايط ... تفتكري هأرجعلك بإيه

هأسيبك تعيشي وهم الخيالات في أسئلتي قبل ما أفجرها في الفولت بتاع الكورسي

مكاوى .. عودة الندل

[رضوي]

السلام عليكم ورحمة الله وبركاته

مش ممكن

بقي حبيبة قلبي ضحي قاعدة متكتفة ع الكرسي وانا معرفش

يادي الكسوووووووووف

معلش ........ ولا يهمك .... رودي برده موجودة

اولاً تحية الكرسي

( بقالي فترة بشرب لمون ملتج ........ مزااااااااج )

تشربي لمون معايا

ولا نعمل الموز بلبن ( المشروب الرسمي للكرسي ؟؟؟؟)

* ضحي ....... حققتي كام في المية من طموحاتك ؟؟

* الدنيا علمتك ايه ؟

* اتعرفتي علي المحاورات ازاي ؟

* احلي حاجة في دنيتي هي ...........؟

* لو لم أكن ......... لوددت ان اكون ..........؟

* شخصية أثرت فيكي اوي ؟؟

* حكمة تؤمني بها ؟

* حدث غير مجري حياتك ؟؟

* دور الصدفة في حياه ضحي ؟؟

* بتمني ارجع لأيام زمان ؟؟؟؟ ولا بعيش احلي ما في عمري ؟؟

* اتعرفتي علي زوجك ازاي ؟؟

* علي اعتبار ان عمر الانسان يقاس باللحظات السعيدة التي عاشها ........ يبقي عمر ضحي كام لحظة ؟؟

* اكتر حاجة بتحبيها في المحاورات ؟؟

* اكتر حاجة بتضايقك من المحاورات ؟؟

* ايه اكتر حاجة تضايق ضحي ؟؟

* طب واكتر حاجة تفرحها ؟؟

* ضعي مرادفاً لكل كلمة مما يلي :-

- الحياه

- الصدق

- الغربة

-الوطن

- اللقاء

- الامنيات

* ايه رأي ضحي في عمل المرأة ؟؟

* اجازة لمدة شهر ........ تحبي تقضيها فين ومع مين ؟؟

* ما هو الذنب الذي لايغتفر ؟؟

بلاش بقي اطول عليكي ياحياتي

بس ان شاء الله هرجع تاني ......... اذا كان في العمر بقية

[doha]

استعنا على الشقا بالله ...

1- ضحى انتى بتقولى تربيتك فى الخارج وتحديدا فى السعودية فرقت معاكى وعلى مايبدو انه كتير.

ايه تاثير التربية فى السعودية عليكى فى نقاط محددة من حيث المزايا والعيوب؟

مبدئيا اهلي سافروا السعوديه لما كنت في المرحلة الابتدائية يعني من تقريبا عمر بنتي وانا في الخارج . رجعت مصر فترة الكلية ورجعت السعوديه تاني سنة بعد الكلية ثم رجعت مصر قضيت فيها عشر سنين تجنيد واخيرا رجعت السعوديه سنتين كده على السريع واديني راجعه للغالية تاني .. جيالك ياخضرة ..

سبحان الله هو تقريبا نفس الي كان ميزه هو ذاته الي كان عيب .. خذ عندك

اننا ولمده 17 سنة تربية الام والاب بس .. مكانش في اقارب او جيران او اصحاب مقربين ننحشر في وسطهم ويتدخلوا في تكوين شخصيتنا زي مابيحصل لو اننا تربينا في مصر .. لنا زميلات في المدرسة وكانت بالمناسب مدرسة صارمه جدا خاصه في المرحلة الثانوية .. لنا ام واب بيقضوا معانا وقت طويييييل خاصه الاب الي كان حريص اوي على زرع قيم معينة .. مش فاكره ان والدي ووالدتي اختلفوا في اسلوب تربيتنا نهائيا .. والدي كان القوى المسيطرة في البيت ومع ذلك كان ومازال حنون جدا ووالدتي احن واغلب منه .. مكانش في حما ولا عم ولا خال يقول ليه او مليش . . كل انواع الدلع الي ممكن تتخيل ان حد يتدلعها اتدلعناها انا واخواتي وطبعا مختلف انواع البذخ وعدم الحرمان شفناه في تلك السنين الله يعيدها بالخير

عايش في مجتمع مرتاح . مفيش عندهم مشاكل بقى ان واحد يبص للثاني او يعوز حاجه من ايد الثاني خاصه انك في الاول والآخر غريب عن المجتمع ده فحتى عيوب المجتمع الداخليه انت محمي منها لانك اصلا لا تنتمي اليه .. تقدر تقول كده خذنا احسن مافيها وتركنا السيء غير مأسوف عليه ..

ده كحاله خاصه بينا اما وبشكل عام فالسفر زي ماقالوا له سبع فوايد انا اعتقد انها مش بس سبعه وانما تفوق العشرين فايده وفايده

الشخص الي بيسافر بيتعلم يشغل مخه وبيتعلم يستقل بحياته ويتعلم انه ميرضاش بالحياه الساكنة .. محتاج كل يوم جديد وكل يوم تغييير .. اعتقد اني مدينة بالجزء ده من شخصيتي للسفر

على الجانب الآخر طبعا بفتقد جدا اني مش قادره ازور مدرستي القديمه ولا حتى اعرف فين بالظبط بيتنا القديم. .بشعر بالغير من زوجي الي كل قطعه من شارعهم له فيها تذكار . . رجعت مصر لي اقاربي بس وقلة قليلة من صديقاتي الي تعرفت عليهم فترة الجامعه فيما عدا ذلك معرفش حد .. والاهم اني اكتشفت على مايبدوا ان رغبتي الملحه في السفر خارج مصر حتى لو مكانش في ضرورة اكيده لكده منبعها اني تعودت ان حياتي كلها منتظره الاجازه تيجي عشان ننزل مصر او مستعجله لازم اخلص الي ورايا لان اسبوع ولا الثاني ومسافرة .. كنت فاكره ان كل ده طبيعي وان السفر جزء اصيل في حياة اي حد تقابلة مشكلة فممكن جدا يكون حلها في السفر .. اكتشفت مؤخرا ان الاحتمالية عالية كون الحكايه دي خاصة بي انا بس وان احتمال برضه السفر مكانش ضروري اوي في حالتي وانما مجرد اعتياد ..

اكتشفت اني وطوال عمري كنت ومازلت وحياتي كلها متوضبه في شنطه .. واسمي على تذكرة السفر

2- واضح انك درستى الكلية فى مصر وبقية الدراسة كانت فى السعودية على ما اظن

ايه انطباعك فى اول سنة عن الدراسة فى مصر والطلبة والمدرسين واصدقائك اللى بقوا مقربين ليكى بعد كدة؟

اول يوم كلية فكراه كويس اوي .. اساسا كنت عاوزه ادخل هندسة .. كنت جايبه 92 في المية والهندسة اخذت 96 .. كتبت علوم وعشان اضمن ان والدي ميغيرش الرغبات رحت لصقت الطوابع واديته الظرف بتاع التنسيق وحطيت في بطني شادر بطيخ .. خلاص عارفه انها علوم علوم لاني كتبت كل علومات الدنيا من اول طنطا لغايه اسيوط .. طلعت نتيجه التنسيق وقالوا لي تجاره .. افتكرت ابن عمي بيهزر لما بلغني بالنتيجه .. قلت له لاه بجد دخلت ايه قالي والله تجاره .. انصدمت .. طيب ازاي ده انا كتباها آخر رغبتين ..سالت والدي قالي ايوه يافالحه انتي لاصقة طوابع التنسيق علوم طنطا اول اختيار ووراها علوم المنيا ثم علوم اسيوط .. طبعا انا جايه من السعوديه طازه معرفش جغرافية مصر ولا اعرف مين الي قريب ومين الي بعيد فعكيت الدنيا .. قام بابا الله يكرمه راح رمى ظرف التنسيق كله على بعضه واشترى واحد جديد ولصق فيه الخيارات على كيفه . حط اول حاجه علوم طنطا ووراها على طول تجاره طنطا على اساس انها في نفس شارع بيت جدتي الي هسكن فيه.. وقد كان

اول يوم كان معايا بنت خالي الصغيره في اعدادي كانت وقتها طلبت منها جدتي تروح معايا توريني الكلية .. وانا طويلة كده وماشية وراها عيلة صغيره .. المهم شاورت لي على سور عالي كده بالحديد وقالت لي هي دي وسابتني ومشيت .. قبل ماروح الكلية كنت متضايقة جدا ومش مصدقة اني خلاص دي آخرتها .. قبل مانزل من البيت صليت استخاره ان لو معجبتنيش هنقل اي كلية تانيه .. ماشيه في الشارع غضبانه وداخله الكلية مش مصدقة الظلم الي حصل ..

حضرت اول محاضرة .. كانت محاضرة تامين للدكتور عبد المولى الله يمسيه بالخير ..

المدرج كان كبير جدا فيه بتاع اربع الاف طالب ولا حاجه .. وكان لسه مفتوح جديد .. والخشب بقى نظيف كده وبيلمع .. والدكتور كان ملعلع يومها ..

تخيلوا طلعت من المحاضرة حابه الكلية جدا .. دخلت مزاجي وقلت خلاص هي دي الي هكمل فيها .. يجوز دي نتيجه الاستخاره او النصيب او يمكن الاثنين .

احلى حاجه ان في ظرف اسبوع حصل زلزال 92 الشهير وانقفلت الكلية فترة مؤقته لغايه مايشوفوا ايه الي هيحصل وانا بقى كنت داخله سخنة وعاوزه اذاكر والكلية اجازه ..اما دي كانت ايام .. ابقى احكي لكم على حكايه الزلزال دي بعدين ..

وايه الاختلافات الاساسية كدراسة بين السعودية ومصر؟

بالنسبة لبنتك تحبى انها تدرس فى مصر ولا السعودية ؟ وليه؟

الصراحه معنديش فكرة الدراسة في مصر وقتها كان شكلها ايه بس ندمت اني ماخذتش الثانوية العامه من مصر لان لما شفت المناهج وشفت الامتحانات عرفت ان العملية سهله انما الي بيحصل ان الي جايين من برا لهم نسبة 3% تقريبا من كل كلية وبالتالي بتبقى المسابقة على اشدها ان مين يجيب اعلى مجموع عشان يدخل كلية قمه .. يعني انا كان تقديري 92 ودخلت تجاره مع زميلتي الي جايه معايا من السعوديه و تقديرها 86 ومعانا زميلتنا الثالثه 73 دخلت حقوق بمزاجها يعني كلنا تساوينا ببعض مع الفارق الشاسع في التقدير .. وكان معايا في نفس المدرج طالبه جايبه ثانوية عامه من مصر معدلها 53 وداخله انتساب .. يعني ظلم صارخ ولكن هو نصيب بالتاكيد قبل كل شيء ..

لو اقدر كنت خليت بنتي تدرس في السعوديه افضل لكن مصر برضه مش بطاله لو معايا فلوس كتير ادخلها مدرسة انترناشونال او لو عايشه في القاهرة اعتقد مستوى المدارس الخاصه هناك افضل .. بالنسبة لنا كسكان في الاقاليم ومن متوسطي الدخل فاعتقد اننا نلاقي تعليم راقي لابناءنا بقى فيه شيء من الصعوبه ..

3- اخوكى بيشتغل فى الخليج ومستقر هناك واتعرض عليه شغلانة فى مصر طبعا مش هتكون بنفس الراتب ولا نفس المميزات وكمان هيتعب فيها اوى فى اول سنتين بس بعد كدة هيبقى ضمن مستقبل وظيفى قوى جدا احسن من الخليج بكتير لو كان استمر على نفس الشغلانة ولو حب بعد كدة يسافر الخليج هيسافر على اضعاف المرتب اللى كان بياخده.

تنصحيه بايه؟

هو طالما (( مستقر )) فده الي ممكن يخليني اتردد قبل مااسدي له نصيحه لاني معرفش هو مستقر لاي مدى ولا خططه للمستقبل ايه .. خاصه وهو عاوز يرجع تاني وباضعاف الراتب .. الي اقدر انصحه بيه وبقوة ان لو قدامه فرصة في مصر براتب كويس ومستقبل مضمون يتمسك بيها مهما كان هيتعب في البدايه لكن مش عشان يرجع السعوديه تاني وانما عشان يكمل طريقه في مصر خاصه لو كان لسه سنه صغير نسبيا وقت ماتعرضت عليه الفرصة دي . اما لو سنه كبير الى حد ما اقوله ارجع مصر وفورا حتى لو براتب اقل كتير طالما الفرصة مناسبة لان السعوديه مش مستقبل السعوديه حاضر ومش مضمون كمان ..

4- أصعب موقف فى حياتك حصلك ومستحيل تنسيه؟ واتصرفتى ازاى؟ واتعلمتى ايه من الموقف ده؟

اصعب موقف فعلا ذكرته قبل كده في احد المواضيع وبجد مبحبش افتكر كل ماله علاقه بالموضوع الي حدث في اطاره الموقف فمعليش مش هقدر اقوله تاني ..

لكن في موقف تاني صعب تعرضت له وتعلمت منه درس لا انساه بس احكي لك عليه في مداخله جايه باذن الله عشان بس مكونش طولت عليكم في الرد ..

[pink rose]

يا امي كده هانناملنا اد يومين تلاتة على ما تخلصي اول مجموعة

[doha]

يا امي كده هانناملنا اد يومين تلاتة على ما تخلصي اول مجموعة

منا قلت انام انا احسن ماتناموا مني انتم

على العموم انتي الي جبتيه لنفسك .. حالا انزل برد صفحتين فولسكاب وعددين اهرام وصلحوووو ..

[doha]

توقفنا قبل البريك عند السؤال ده . .

يامسهل ..

4- أصعب موقف فى حياتك حصلك ومستحيل تنسيه؟ واتصرفتى ازاى؟ واتعلمتى ايه من الموقف ده؟

ثاني اصعب موقف مريت بيه في حياتي كان من حوالي سبع او ثمان سنوات من دلوقت ..

كنت بدرس كورس وزارة الاتصالات وكان باقي شهر ونخلص بس كان لازم الاول نقدم مشروع تخرج

المشروع كان عباره عن موقع انترنت من الألف للياء ويكون باحد لغات البرمجه للويب يعني موقع تفاعلي مش مجرد تصميم صفحات .. ومفروض اننا نقسم نفسنا مجموعات ثلاث الى اربعه في كل مجموعه بحد اقصى وطبعا نقسم الشغل على بعض بحيث كل واحد يمسك حاجه في المشروع ..

معرفش هو حظ ولا غباء ولا عدم متابعه جيده للسينما المصرية اني مكنتش قبل الوقت ده سمعت انور وجدي وهو بيقول لا بارك الله العمل القائم على الصداقة لكن اهو الي حصل

كان من نصيبي ان مجموعتي فيها بنتين على اساس انهم افضل صديقات لي في الكورس كله .. طبعا احنا طوال الست شهور الي قضيناها في الكورس بنحضر بشكل يومي من 8 الصبح لغايه 4 او 5 العصر مش فاكره .. وطبعا كل واحد فينا قاعد على جهاز بتاعه متوصل بالنت طول الوقت .. مكاتش النت السريع لسه دخلت مصر كان كله على خط التليفون .. وعشان كده البعض استغل ( المنحه ) دي في انه يقعد على الانترنت لاطول مرة ممكن في الشات .. اعني بالبعض دول تحديدا بنتين هم في الكورس كله .. لدرجه انهم بقوا معروفين بالاسمين دول ( م ) آي سكيو .. و ( ش ) ماسنجر ..

مش محتاج اقول ان هم دول الجروب بتاعتي الي بدأت معاهم رحلة الكفاح لانجاز المشروع ..

في بدايه الكورس طبعا كان الامل في اني هكون من الاوائل الي يعملوا المشروع الي محصلش والي هيتم ترشيحهم لبعثه يستكملوا دراستهم فيها بامريكا .. طبعا كله طلع في الهجايص بعد كده مش دي المشكلة كويس اني فقدت الامل قبل مانعرف الحقيقة اصلا.. سبب تخلي عن الامل اني وبعد ماتكونت المجموعه وبعد ماشفت الامكانيات وبعد ماوزعت علينا الشغل بقى كل املي نسلم اي حاجه ينقال عليها سايت محترم ومش مهم ينافس على المركز الاول المهم انه يكون شيء يستحق يتقدم .. بيني وبينكم كان لسه عندي امل اني لوحدي هقدر انجز المشروع ..

كنت اقعد ابص للبنتين الي معايا واحتاس واقول ياربي مش عارفين حاجه خالص العيال فعلا متعلمتش حاجه نهائي .. والمصيبة انهم الاثنين بس الي متعلموش في تقريبا طالب او اثنين كمان في الدفعه كلها من اصل 36 هم الي مش عارفين والباقي امواس .. حظي سبحان الله وقع في الجروب ده ..

اعتقد نسيت اقولكم ان كان في شرط جزائي ماضيين عليه كلنا قبل مانقبل المنحه ان الي مش هيسلم مشروع تخرج هيدفع للدولة 10 الاف جنيه غرامه ..

مبقيتش عارفه هعمل المشروع ازاي والمجهود الجبار المطلوب مني وانا لوحدي تقريبا

بس بقيت اصبر نفسي واقول مش مهم ربنا معايا وباذن الله هيساعدني ..

المهم توليت الخطوة الاولى في المشروع وهي انجاز قاعده البيانات الخاصه بيه وعملتها وانتهينا .. بدأت الخطوة التانيه اني اربط قاعده البيانات دي بالصفحات الي لسه متصممه بشكل مبدئي .. بدأت اكتب الاكواد وفي الفترة دي جات ( م ) وقالت لي كفايه على كده انا جبت مهندس شغال في الآي تي آي وفي بينا مشروع خطوبة وكده يعني وقال هيعمل الشغل المطلوب مني في المشروع بدالي .. قلت لها على البركه .. قالت لي وقفي انتي بقى شغل كتر خيرك على كده واحنا هنكمل .. قلت مية ميه . .كده انا انجزت قاعده البيانات وجزء من الاكواد وميم هتكمل بقية الاكواد وشين هتعمل الفلاش يبقى مش باقي الا اعمل الجرافيك بتاع الصفحات .. ونمت على كده

بيني وبينكم كان قلبي متوغوش ومش مديه امان .. مش عارفه ليه حسيت ان المفروض مطمنش بس قلت لاه وساوس .. وركزت بقى في المذاكرة عشان الامتحان ونسيت امر المشروع لمده اسبوعين كده ولا حاجه .. المهم مرت الايام وكان باقي اقل من اسبوع على الموعد النهائي لتسليم المشروع

ولقيت ميم جايبه المهندس وجايه وقالت لي تعالي بقى شوفي الي عمله عشان هو كده خلاص مش هيكمل ( مشروع الخطوبة باظ على فكره ) فقلت لها هاتي .. ببص والله العظيم زي مابحكي لكم .. البيه بدأ من الاول خالص .. اعاد نفس الاكواد لبعض الصفحات الي انا كنت عامله اكوادها اصلا وبثيوري تانيه خالص يعني لا ينفع تتربط بما قبلها ولا بما بعدها واساسا عمل الي معمول يعني من الآخر معملش حاجه ..

وساب لنا المشروع ومشي

طبعا مش محتاج اقولكم اني خسرت ميم في الحركه دي بعد ماكانت من اعز اصدقائي .. ومش محتاج اقولكم اني عيطت لما شفت الي اتعمل وتم انجازه في شهر تقريبا وهو يمكن عشرة في المية او اقل من الي مفروض يعمل في خلال الثلاث ايام الباقية .. بكيت بجد لما ادركت ان خلاص فات الاوان وخلاص مفيش فايده ..

ولقيت الناس كلها انفضت كده من حوالي .. ميم غسلت ايدها .. وشين قالت مليش دخل انا هعمل الفلاش بس الي اتفقنا عليه ثم احنا مش مستفيدين حاجه من المشروع ده انتي قلتي انك ممكن تستفيدي منه بعد كده في شغلك الخاص انما احنا علينا بايه من كل ده .. وتقريبا فهمت السبب الي خلاهم اصلا يتعاملوا مع المشروع باستخفاف ..

وروحت البيت .. قعدت على المكتب بتاعي والكمبيوتر قدامي .. بصيت للصفحه الهوم الي لسه بصمم فيها ولسه حتى مكتملتش . . وصعبت علي نفسي الي كنت متوقعه ان مشروعي ينافس على مستوى المحافظات لاكتشف اني محتاجه معجزه عشان اسلم اي حاجه بس والسلام ..

واقسم لكم بالله العظيم .. ولاول مرة في حياتي .. اسمع وكأن صوت بيقول في اذني .. مش ده ربنا الي كنتي بتقولي هيساعدك .. خليه ينفعك

لقيتني بكلم نفسي بحماس .. هينفعني .. وهتشوف

والله مابضحك او ببالغ . . الحوار ده حصل وكأني بسمعه وادركت وقتها ان الشيطان استغلني في لحظة هوان وضعف تقريبا ممريتش بمثلها قبل اليوم ده .. حب يثبت لي اني تعلقت بامل كاذب .. هو كان عارف ومتاكد اني محتاجه معجزه عشان اقدر اسلم المشروع وعارف زي ماانا كنت عارفه في اللحظه دي ان خلاص مفيش معجزات ..

كان يوم الاحد .. قعدت وتفرغت تماما للمشروع.. شويه اصمم في الصفحات بتاعته وشويه اكتب اكواد وشويه اجمع صور من النت واكواد جاهزه وشويه اعبي بيانات في قاعده البيانات عشان ينفع يتجرب بيها ..

قعدت اشتغل اشتغل اشتغل ..

وجنبي كوباية النسكافيه تخلص اعمل غيرها ..

كان باقي لي الجرافيك بتاع المشروع من بانرات دعائية افتراضية لازم تكون فيه واللوجو بتاع الموقع والاشياء الي زي كده سبحان الله بعيت لي شخص اعرفه على الانترنت ومن دولة تانيه وعلاقتي بيه سطحيه تطوع انه يعمل لي البانرات وعملها لي كاملة لوجه الله بلا اي مقابل وكانت اكثر من رائعه .. اخذتها وحطيتها في الموقع ..

وقعدت تاني اشتغل واشتغل واشتغل

يمكن دخلت نمت ساعه او حاجه زي كده مش فاكره بس اتوقع اني منمتش في ذلك اليوم ..

المهم بقي كام صفحه كده في الموقع والدكيومنتيشن بتاعت السايت يعني الاكواد الي فيه وتركيبه قاعده البيانات نفسها لازم تبقى مطبوعه ومشروح على الورق ازاي نستخدم الموقع .. كان باقي شويه حاجات اني اخلص المشروع واحطه على اسطوانات واوديها تتنسخ ( مكانش لسه السي دي الرايتر انتشر ) وبقيت محتاسه هخلص كل ده امتى واوديه امتى

الدكتور صاحب المركز حاول انه يجيب لنا تاجيل لمده يوم عن موعد التسليم المفترض.. المهم اتصلوا بينا وقالوا تعالووا في المبنى الجديد للمركز على الطريق السريع قالوا اعملوا حسابكم هتسهروا لان لازم نسلم النهرده باي طريقة .. اخذت اخويا الصغير معايا يومها المهم تجمعنا كلنا في المركز .. انا جبت معايا البرنتر وناس تانيه جابت ناسخ اقراص وناس تالته جت تتفرج .. والدكتور جايب لنا الشاي والقهوة والنسكافيه والمية السخنه والسكر .. ملناش حجه بقى ..

المكان كله كان زي خلية النحل

الدنيا ليلت علينا وفضلنا سهرانين نشتغل .. لغايه مالقيت نفسي بعمل الصفحه واجي احفظها اكتشف اني عملتها اصلا من قبل كده وانها محفوظه اصلا بس من كتر الارهاق خلاص مخي فوت بجد .. ببص كده وانا بشتغل تفاجأت باحلى مفاجأة كان ممكن اتوقعها في موقف زي ده

اكتشفت اني خلصت ..

والله ..

ادور كده لقيت كل الصفحات تم انجازها وخلاص الدكيومنتيشن اتعمل وكله ..

قعدنا بسرعه نصور الورق وننسخ الاقراص وسلمناها للدكتور صاحب المركز على اساس ان في واحد هيجي يستلم منه كل المشاريع ويسافر بيها القاهرة ..

بعد ماسلمت مبقيتش مصدقة نفسي .. بجد مكنتش مستوعبه ايه الي حصل او بيحصل

استأذنت بقى عشان اروح انام .. اخويه بقى كان لسه صغير و من شده اعجابه باللحظه وخلية النحل الي كنا عايشين فيها قالي روحي انتي انا هعقد معاهم شويه ..

بسأل هي الساعه كام .. قالوا لي 11 الصبح

لاحظوا الدنيا ليلت علينا والفجر طلع والصبح كمان واحنا ولا قمنا من مكانا

بسأل بقى وده الاهم .. احنا النهرده ايه ؟ قالوا لي الخميس الصبح او الاربعاء مش فاكره..

تخيلوا .. ثلاثه ايام بلياليها وكام ساعه فوقها وانا منمتش نهائيا .. عمري في حياتي ماعملتها ولا اظنني هعملها .. ازاي قدرت اواصل .. وازاي اصلا قدرت انجز عمل ذهني يحتاج تركيز مضاعف وانا اصلا مش نايمه .. ومين الي بعت الراجل يعمل لي الجرافيك ومين الي خلا شين الي لاتفقه شيء في الدنيا تنجز الفلاش المطلوب منها وانا كنت فاقده فيها الامل !!

صرخت داخلي بانتصار ساحق ..

مش قلت لك هينفعني .. اهو نفعني

وخرجت من باب المركز وانا ماشية اترنح بمعنى الكلمه بحط رجلي معرفش بتنزل فين .. عاوزه انام ومش شايفه قدامي ومع ذلك كانت السعاده تملأني فلاول مرة اشعر بهذا الشعور ولاول مرة احس ان لسه في امكانية لحدوث المعجزات ..

5- ايه اخر 3 كورسات ضحى اخدتهم ؟ ونبذة فى سطر عن كل كورس

عامه انا بحب اوي ( السيلف ستدي ) او اني اذاكر بنفسي .. وعلى هذا آخر ثلاث كورسات بالمعنى الاكاديمي للكورس فهي بالترتيب الاقدم

سنة 94 وكنت في ثالث كلية واخذت دورة داتابيز ثري بلس ( انقرضت خلاص )

وسنة الفين وحاجه اخذت الكورس الي حكيت لكم عنه فوق ده وكان عن الـ E-business

في نفس السنة اخذت كورس صناعه حلويات منزلية وبجد استفدت منه في حياتي اكتر من الكورسين السابقين

اما عن آخر ثلاث حاجات درستها بالترتيب ..

من سنتين كده رجعت درست محاسبة واقتصاد من تاني

من سنة تقريبا رجعت ذاكرت الجافا تاني عشان اعرف اشتغل بيها ( لغه من لغات البرمجه و كانت احد الاشياء الي درستها في المنحه بتاعت الإي بزنس )

واخيرا من شهرين كده لقيت نفسي فاضيه وبدأت تعلم اللغه الالمانية ( جوتن نيخت شميخت بخت )

6- عندك 3 اخوات ولاد فى اعمار مختلفة تحبى تنصحيهم بايه وتحذريهم من ايه كل واحد على حسب الفئة العمرية بتاعته

أ - واحد لسه داخل الجامعة.

ب - واحد متخرج جديد وبيدور على شغل.

جـ - واحد بيشتغل بقاله فترة وداخل على جواز.

د - واحد متزوج وعنده اولاد

أ . واحد لسه داخل الجامعه :

اتعب الاربع سنين دول ترتاح العمر كله .. ترتاح الاربع سنين هتتعب العمر كله

ب. واحد لسه متخرج وبيدور على شغل

ابني نفسك وطورها خليك متميز في مجالك الشغل الي دور عليك مش العكس ..

جـ - واحد بيشتغل بقاله فترة وداخل على جواز.

هخليه هو الي ينصحني حاكم الجماعه الي بيبقوا مقبلين على جواز دول بتبقى الدنيا عندهم بمبي بمبي ولهم وجهات نظر كده احنا يامتجوزين بنتعجب منها .. بس مين عارف يمكن يكون معاه حق هسمع له يمكن استفيد

واحد متزوج وعنده اولاد

هوصيه على مراته لو ريحها هيرتاح ويريح عياله

7- ايه الحاجة اللى ناقصة ضحى فى السى فى؟

البكالريوس

كان امنيتي اكون هندسة قسم حاسب لان ده المجال الي حابه اشتغل فيه وده المجال الي خبرتي كلها تقريبا فيه .. بس من جهة مجبتش مجموع هندسة ومن جهة تانيه اهم مكانتش اصلا اقسام الحاسب فتحت سنة مادخلت الكلية .. وطبعا لو كان في على ايامي تجارة انجليزي مكنتش هتردد ابدا ادخلها بس حظوظ فتحت بعدنا بسنة او اثنين على مااذكر

8- ضحى معاها 5 مليون ريال سعودى ومعاها 7 ايام لازم تصرف كل الفلوس دى بشرط متصرفهمش فى شراء عقارات ولا اراضى ولا شراء وسائل نقل؟ معاكى اسبوع اهو هتعملى فيه ايه؟

هشوف اثنين ثقة اكون واثقة فيهم اوي اعينهم موظفين مهمتهم يجيبوا لي ثلاث اربع قرى فقيرة كده واروح نفحاهم خمس مليون وثمانمائة الف .. اوزعها بايدي برضه عشان اتأكد ان الي خذوها غلابه اوي ..

هاخذ الميتين الف الباقية واثناء مالموظفين بيدوروا لي على الناس المستحقين هروح اتفسح بقى واشوف حياتي .. هطلع شرم ( عشان قريبة والحق ارجع اوزع الفلوس ) وهروح اغلى فندق فيها واطلب اغلى اكل واتفسح احلى فسحه واصرف ببذخ .. وفي اليومين دول مش هحرم نفسي من حاجه لا تقولي رجيم بقى ولا سعرات .

وبعدين هرجع لو باقي حاجه هتبرع بيها بعدين تخلص السبع ايام هقعد زي شهرين تلاته كده استعيد التجربة واحكيها للرايح والجاي .. بعدين تعدي سنة كده الحكايه تهدأ .. ست سبع شهور كده هقعد افكر ياخساره هو انا مرحتش اليونان ليه مش كانت احسن ؟ طيب ماكنت خذت الطيارة وطلعت على باريس لفيت لي في الشانزلزيه شويه ولا بلبطت في نافورة الحظ في روما شويتين ..

هبدأ الوم نفسي بقى واقول خساره كان في الف حاجه وحاجه المفروض اعملها .. هتتحول سعادتي لسعاده منقوصه ثم فتور واخيرا حزن وحسره اني ضيعت الوقت بدون ماستفيد .. بس كان هيبدد ده كله شعوري بالرضى ان الناس الي وصل لها الفلوس اكيد عملت حاجه وان في كل لحظه بتمر علي يجوز جدا في مكان ما على الارض في حد وقبل ماينام دعى لي ربنا يدخلني الجنه او افتكرني بالخير ..

هسكت ؟ لاه

هتمر الايام والسنين وهعجز واكبر وافتكر الموضوع ده . هيروح مني كل احساس بالمراره على الفرصة الي راحت وهبقى بس فاكره الفلوس الي تبرعت بيها واني احسنت استخدامها .. بس تعرفوا في تلك المرحلة من العمر وبعد ماخلاص شبعت من الدنيا اتوقع اني هبقى زعلانه على حاجه وحده بس .. الميتين الف الي راحوا بدون مااديهم لغلبان .

بالشفا باذن الله :lol:

دي مني انا لكم على فكره .. ولسه

[doha]

ندخل على استجواب الرفيق لماضه .. على فكره ياجدعان الكرسي ده فيه براغيت ..

1- جواكي حلم.......كل شوية يفضل يتنطط في دماغك...رايح جاي ...جاي رايح....بس مش عارفة او مش قادرة تحققيه دلوقتي؟؟؟

نفسي اطلع سياحه دولة اروبيه واكون بصحتي يعني مش بعد ماعجز ..

2- يا ضحي انا حبيتك من زمان....و حبيتك اكتر لما لقيت الكلام الشاعري بتاع القطط ده....القطط كائنات مظلومة بجد....بيحطوها انها بتحب تتدلع و تتشاقي و بس....بس هي كائن مالوش حل....لو ضحي بقت قطة....هتاخد من صفات القطط ايه؟؟؟

قصدك لو قطه هتاخذ من صفاتي ايه

مفيش فرق الهم ان هي لها ذيل وانا مليش .. تقريبا خسرته في خناقة ..

3- بصي ل...ضحي....من 10 سنين فاتوا.....كانت بتحلم يايه...بتفكر ازاي.....و تعالي بقي دلوقتي....اتغيرتي....طب لانهي اتجاه؟؟؟؟.....طب شايفة نفسك بعد 5 سنين ازاي؟؟

مش عارفه بس اعتقد مفيش فرق كبير .. يمكن بقيت اقل اندفاعا .. اكثر حرصا ..

قبل ماتجوز بسنتين تلاته كده كان في مشروع حرب في العراق .. مش فاكره كانت اي ضربه فيهم .. بس على مااذكر كان لسه صدام موجود .. ووقتها سرت اشاعه ان الموضوع ممكن يمتد لاقدر الله لمصر .. مش فاكره قالوا مين هيضرب فينا لو ده حصل ..

وقتها اخذت الامر بجديه وفكرت اني اتعلم التمريض بحيث لا قدر الله حصل شيء اقدر افيد بلدي بحاجه بجد كنت مقررة ان لو ده حصل وقامت حرب في مصر هتطوع فورا في اي حاجه اقدر عليها حتى لو مت مش مشكلة

كان في قلق وقتها من الناس بس انا بجد مكنتش خايفه ابدا .. كنت بقول ان لو ده حصل هواجه الموقف مش ههرب منه .. هقابله وجها لوجه وساعتها هخاف من ايه ؟

الحمد لله الموضوع مر بسلام وعدت على خير

بعدها بسنتين تلاته وكنت مخطوبه وبستعد للزواج وحصلت مناوشات تانيه في العراق برضه وسرت نفس الاشاعه ان ممكن تمتد الحكايه لمصر ( معرفش ايه العلاقه مع انهم في اخر الدنيا بالنسبة لنا بس اهو احنا كده بنتعب على السيرة )

وقتها قعدت اقول يعني حبكت ؟ خلاص الفرح بعد شهرين تلاته وانتم جايين تبوظوا لنا الدنيا .. ماتستنوا الواحد يفرح له يومين بعدين عكوها على مزاجكم ..

عدت تاني على خير ومرت سنة او اثنين وكنت جبت بنتي

القلق رجع تاني بس على خفيف وكان لسبب ما في اشاعات كما العاده ان تحصل حرب بس مش فاكره مين قالوا وقتها الي هيضرب ايران ولا حد تاني .

بصراحه يالماضه لو سالتيني وقتها كنت بقول ربنا يستر ومتحصلش حرب بجد كنت خايفه عليها جدا وبجد مش عاوزه حاجه وحشه تحصل

مش عارفه بقى هي المسؤوليه ولا حماس الشباب الي راح ولا العقل يكون اتغير بس اكيد في سبب ما للتغير الي حصل

بعد خمس سنين اعتقد اني ( هعجز ) اكتر وشوفي انتي بقى

4- ضحي...هل هي....أم واعية.....قارئة جيدة.....مشروع سيدة اعمال مستني الطلعة الاولي.....ست في حالها؟؟؟

بني آدم

5- زمان كنت قولتي كلمة و فضلت ترن في ودني......الناس هنا في المنتدي.....بتكرر نفس الشخصيات الي فاتت.......يا تري ممكن تعملي زي لعبة آيس هارت قرين بين محاورين دلوقتي و محاروين زمان؟

مش بس في النت على فكره .. قبل ماتخرج من كليتي بسنة كده وبعدها كمان كان عندي هواية لما امشي في الشارع اتفحص وجوه البنات الي طالعين من الكليات المختلفة .. كنت بدور علي وعلى صاحباتي فيهم .. وفعلا .. دي فلانه ودي علانه ودي انا .. لدرجه كنا ثلاث بنات مع بعض تلاقيهم هم الثلاثه برضه ماشيين مع بعض .. الوجوه بتتشابه بشكل مذهل حتى اللبس مع المشية مع لفة الطرحه ومسكة الكتاب .. في كل مكان واي بيئة حقيقة كانت او افتراضية فالناس والشخصيات بتتكرر حد التطابق ..

بالنسبة لقرين المحاورات فهو للاسف انا مش عارفه من بتوع زمان غير قلة اوي فمش هقدر احكم بالظبط

بس من قرائتي للبعض فـ

فيروز = مغتربة

اصلا بلخبط بين الاثنين والاثنين لهم عندي معزه خاصه بعيالها كمان

وجدي = طفشان

الاثنين نفسي مرة اختلف مع حد فيهم في رأي كتبه او مقولش الله تسلم الايد الي كتبت..

بنت شعنونه = هبه

( الله يمسيها بالخير )

مهيب = المهندس ياسر

ومتسألونيش ليه

سي السيد= سين سين

الحاجات دي مبيعملوش منها حتتين

بودا = بندق افندي طبعا

ولو ان الاولاني الطبخ عنده هواي مع دراسه والثاني افتكاسه بس الاثنين أكلهم ـ ماشاء الله ـ لايعلى عليه

6- انتي قولتي انك كنتي في منتديات كتير قبل كده......ايه اغرب حاجة مرت عليكي في عالم المنتديات.....سواء هنا او في الحاجات التانية؟

كنت في منتدى تاني واحدى العضوات بعتت تستشيرني في مشكلة خاصه بيها وكنت هعيط من جهل الامهات الي تسيب بنتها لما توصل للمرحله دي من الجهل لدرجه توقع نفسها في مصيبه زي دي .. وبعتذر طبعا مقدرش اتكلم ف التفاصيل .

ده بشكل خاص .. اما بشكل عام فخذي عندك

تلاقي موضوع مفتوح بيتكلم في حاجه ما .. عشرة عشرين رد بتشتم في الحاجه دي .. يدخل رد يقولهم اختشوا على دمكم الحاجه دي حلوة وصاحبها مغلطش .. خمسمية رد يقولك ايوه تمام فل عليه .. والعكس .. ردود ورا بعضها بتقول روعه ومشكور واول ماحد يدخل يقول ايه القرف ده تلاقي حنفية وانفتحت شتيمه في صاحب الموضوع ..

شخصية تدخل بمعرف ( وتشهل ) لنفسها بمعرف ثاني مهمته بس يتكلم عن صاحب المعرف الاولاني ويمجد في اعماله او العكس يشتم فيه ويعاديه بشكل مباشر مش مهم هيجيب سيرته بالخير ولا بالشر المهم انه يخلي صاحب المعرف ( تحت النظر ) طبعا لما بتكوني مشرفه وبتشكي في الموضوع وتراجعي الآي بي بتكتشفي التطابق التام وبتعرفي ان الاثنين واحد مع الوقت بيبقى سهل تميزي الاعضاء من هذا النوع وبقينا بنعرفهم من غير حتى مقارنة الآي بي

في المنتديات الي بتمتاز بالكثافة من ناحية الاعضاء تلاقي المواضيع ( موض ) جمع موضه يعني .. فوحده تفتح موضوع وتلاقيه رائج والردود عليه كتير حتى لو هايف ـ وبالمناسب اكثر المواضيع ردودا ومتابعه هي اكثرها هيافه ـ فتلاقي عشرة عشرين وحده تانيه فتحت موضوع يدور حول نفس السياق على اساس تضمن اكبر عدد من المشاهدات والتعليقات .

واخيرا . . في ناس في الانترنت شديده القذارة لدرجه لايمكن لعقلنا القاصر تصورها .. وفي ناس كمان خطره شديده الخطورة لدرجه ممكن تتهميني بالجنان او الهبل من كتر مااحذرك منها .. وفي كمان ناس شديده السذاجه لدرجه الاشفاق عليها لانهم فاكرين الانترنت كلها متربية في اوضه مغلقة زي الي تربوا فيها وميعرفوش ان في ناس فعلا معاشتش غير في الشارع .

7- بتحبي الهوايات الخطيرة.......(انا امل حياتي اركب موتوسيكل...)......هل لانك شخصية مغامرة.....هل لانك اتربيتي في السعودية....و جه عامل عندنا كبت لكل الاحلام المتوحشة....هل هي كده؟؟

لاه منا قلت قبل كده .. كل هواياتي مفيهاش اي مغامرة بدنيه .. الحكايه دي لاحظتها بالصدفة .. معرفش بقى لاني تربيت في السعوديه ولا لان ده طبعي بس اتوقع انه طبع

اذكر اختي الصغيره حطت مرة سلم وطلعت على سطح البيت انا مستحيل اعمل حاجه زي كده .. برضه مرة تانيه مشيت على سور قلعة قايتباي وكانت هتقع .. انا اصلا طول عمري بخاف من الاماكن المرتفعه ومبطلتش اخاف غير لما سكنا في الدور العاشر ..

الحاجه الخطيرة الوحيده الي نفسي اعملها اركب قطار الموت في الملاهي بتاع دريم بارك تحديدا .. للاسف لم امتلك الوقت لركوبه معرفش بقى انا ماطلت عن قصد ولا فعلا كنت خايفه مع اني في حاجات تانيه ممكن اكون جريئة جدا وممكن اتصدى لمواقف كتير بشجاعه احسد عليها لكن مش عارفه ليه في الحته دي بجي واتنح ..

على العموم احد الخطط بتاعتي المستقبليه اني اروح دريم وباذن الله هعملها يالمضمض وهبقى ابعت لك الصور ..

بالمناسبة انا امل حياتي اركب بيتش بج او موتسيكل مية وهعملها باذن الله لما اروح الغردقه في واحده من خططي الخمسية .

8- انتي شخصية طموحة جدا......بس زوجك...(ده سؤال افتراضي).....عايز يعيش و السلام....معندوش حلم.....يا تري تنكشيه ازاي؟

لاه هو السؤال مش افتراضي خالص هو ده قريب جدا من الواقع

بس مش بالظبط كده

انا بحب استغل وقتي في حاجه تفيد وبحب اسخر امكانياتي في شيء يفيد .. هو اكثر مني طموحا بس نفسه قصير ومش من النوع الي بيرتب افكاره او يعرف يبدأ منين او يوصل لطموحه ازاي .. انا على العكس مش مهم عندي اوصل لايه المهم اني احس ماشيه صح على طريق صح .. وزي ماتيجي بعد كده تيجي

بالنسبة له فاذا اعترضته عقبه بيتوقف ويدور شمال بالنسبة لي اذا اعترضتني عقبه ممكن جدا اتوقف بس بعد تفكير عميق ومحاولات للاختراقها .. ولما بدور شمال فبعكس زوجي مش بقف وانما ببحث في طريق جديد

بس هو فيه ميزه انه اعقل مني بكثييير او تقدري تقولي ( راسي اكتر ) ودي بحاول اوصل لها بصراحه بس اعتقد قدامي شويه ..

عامه لو حصل نتيجه للاختلاف في رؤية كل منا وكان لي طموح وزوجي مش عاوز يعمله هحاول احققه لوحدي طالما لايتعارض ذلك مع وجودنا معا

9- بنوتك ربنا يخليها.....مين اخترا الاسم.......هي صاحبتك....و لا بنتك....و لا مامتك...(انا مقتنعة ان الولاد هما اللي بيربوا والديهم ع فكرة)......و لا مشروع عمرك؟؟؟

اكثر وصف منطبق انها صاحبتي فعلا ..

اسمها انا الي اخترته واسمها على فكره له قصة طويييله تحبي تسمعيها ؟ لو تحبي اكتبي لي ده في سؤال

10- بتقولي انك بتحبي اي حاجة فيها مشارع و احاسيس و حركات و كده.....بس عمري ما قريت ليكي مداخلات في توبيك الشعر و الادب....انتي بتحبي تخبي مشاعرك...مع انها عنيفة جدا....بتخافي تبينها.....و عشان كده بتاخدي ليها اتجاه مضاد انك تكتبي في حاجات جادة؟؟.....و لا بتحبي تعبري عن مشاعرك بطرق تانية...طب ايه؟؟؟

ياخبر ابيض ازاي ..

طيب خذي دي على الماشي

رسالة الى البحر

كان لي مجموعه قصصيه صغيره منشوره على النت في احد مواقع القصص بس للاسف مش عارفه اوصل لها يبدوا انها حذفت ودي كانت آخر قصة باقية منها عثرت عليها بالصدفة على جهازي في مصر ونشرتها من فترة في المحاورات .. على العموم لما ارجع باذن الله هبقى ادور لك على حاجه تانيه ولو لقيت هبعتهالك

بحب الرسم اوي على فكره .. وجات لي فترة كنت برسم بورتريهات جامده .. بس بطلت من مده .. على العموم دي رسمه هدية مني لك يالماضه وعقبال ماتبعتي لي صورتك مكانها

فاصل ونواصل

[لماضة مصرية جدا]

يا امي كده هانناملنا اد يومين تلاتة على ما تخلصي اول مجموعة :closedeyes:

انا بوقي نمل.....مينفعشي كده يا كبيرة الياوران

بس في نفس ذات الوقت احنا متمسكين بيكي لاخر فولت...و الحقيقة انا مستمخية آخر حاجة من الاجابات..هي بتفكرني بملحمة نجيب محفوظ...."حديث الصباح و المساء"...

فانا هقترح اقتراح صغنتوت

احنا نعمل اسبوع للاسئلة

و اسبوع للاجابات

و كده يعني

مواااااااااااااااااااااااااافقة (وش فتحي سرور...و هو بيبص لقاعة مجلس الشعب....و كلهم يا ولداه رافعين ايديهم)