كرسي الأعتراف 2 ( حاليآ الفاضلة Dreamwithme )

[Alrefaey]

تسجيل متابعة

عارفه يامدام ضحى بعد قراءاتى لأجوبتك وقرأءة مداخلة فتفوته فى موضوع انت و ظيفتك ايه وقراءة قصص بعض الاخوات هنا

استطيع اقولك انو انتن غيرتن نظرتى للمرأءة بشكل عام ونظرتى للمرأءة المصرية بشكل خاص

[jasmin hamed]

ربنا يسامحكوا عجبكم كدا اهى اهيه الشابه باشت من اول غسله

ايه ده انتو مابتصدقوا

لماضه........... انتى تانى....................... مش حرام عليكى يا بنتى

مش عايزه اشوفك تسئلى جنس ايتها سؤال لغاية مانشوف عنعمل ايه فى الست الى راحت فى غيبوبه ديه

ضحى يا ضحى حبيبتى فوقى ردى عليا يا اخوانا حد يلحقنا بشوية كولونيا و لا يدش بصله يشممهلها

اه دنيا ماحدش بياخد غير نصيبه

[لماضة مصرية جدا]

ربنا يسامحكوا عجبكم كدا اهى اهيه الشابه باشت من اول غسله

ايه ده انتو مابتصدقوا

لماضه........... انتى تانى....................... مش حرام عليكى يا بنتى

مش عايزه اشوفك تسئلى جنس ايتها سؤال لغاية مانشوف عنعمل ايه فى الست الى راحت فى غيبوبه ديه

ضحى يا ضحى حبيبتى فوقى ردى عليا يا اخوانا حد يلحقنا بشوية كولونيا و لا يدش بصله يشممهلها

اه دنيا ماحدش بياخد غير نصيبه

السلام عليكم و رحمة الله و بركاته

مش عارفة ليه كل ما تيجي يا جيسي الحوتة دي.....إيدي تاكلني....احدفك شوية اسئلة كده ع الجنب

طب و ليه......هو مش انتي ناوية تنويرينا قريب.......(هع هع هع....ضحكاااااااات ماكرة...حيث يلتمع السن الذهبي لزعيم عصابة القناع الاسود)

طب و عهد مين....و عهد الله....انا بنفعل اوي بالسخصية اللي بتقعد ع الكورسي.......و بلاقي الهويس بتاع الاسئلة اتفتح ع الاخر

مش عارفة ليه حاسة نفسي بقيت شبه جست مي....ربنا يجيبه بالسلامة (جتله اعارة في جبال تورا بورا...عقبالك يا اللي انتي سمعانا و داخلة متخفية.... )

جربي بقي انك تحدفي سؤالين كده...و الله هتلاقي الموضوع ظريف و خصوصا لما بتحاولي تسالي كل واحد سؤال خاص بيه هو ميكونشي اتسال لغيره من قبل

مساااااااااااااااااكي....سؤال من غير علامة استفهام....بس في آخره.....دماغ صاحية

فوتك بعافية

[doha]

ياخبر ابياااااااااااااااااااااااض

بجد بجد حاجه يعني . . مش عاوزه اقول

بقالي يمكن ساعه او اكثر بكتب رد على اسئلتك بس يالماضه .. من قلب القلب بقى وبتفاصيل التفاصيل

قوم ايه اضغط باك سبيس .. قوم ايه الله لا يوفقه يعمل تراجع للصفحه نفسها .. هو كده .. كل الي كتبته راح وانقضى ومنك لله يانجاة

عليكي خير بقى لو هيقطعوني مش هكتب الرد تاني دلوقت .. بليل يمكن

( وش دماغه بقت قد البطيخة من كتر ماعصر فيها ومحتاج وقت على ماتبرد شويه )

[hOuSsAm]

:) كويز

بصراحة مستمتع بالاجابات جدا جدا بجد

انا مبهور

وعشان كدة انا بقترح انهم يزودوكى شهر كمان وكله يحضر السيوف والشوك ويبدا بالهجوم عالكرسى :lol:

انا كل محاول الاقى وقت اروح السد العالى اجيب سلكين ضغط عالى انشغل ومش بروح :sad:

حظك حلو :ninja:

خدى دول عالسريع

1- ايه اكتر 5 حجات بيميزوا ضحى.

2- طب ايه اكتر 4 حجات ضحى عيوب فى ضحى

3- ضحى خبيرة فى التدبير المنزلى ...... النهاردة جوزك قالك يا ضحى انا معييش غير 100 ريال لاخر الشهر اتصرفى عشان الشهر يعدى بسلام wst:: (هستثنى من المصاريف مصاريف بنتك)

4- طموح ضحى ممكن يوصلها لايه

5- طموح ضحى فى نفس اتجاه طموح جوزها ولا ده طريق والتانى ماشى فى طريق تانى

6- ايه اكتر 3 دول ضحى عايزة تعيش فيهم غير السعودية ومصر (معيشة وليس سياحة)

7- ضحى خريجة تجارة طنطا (رايك ايه فى الدكتور ثناء) ايوة ده اللى بيشرب سجاير كتيرة اوى وبيحب يقطع فى الكلام (اى معلومتين كدة تعرفيهم عنه اصله غامض بالنسبة ليا)

8- ضحى ........ هى مصر رايحة فين؟ :happy:

9- اتصال هاتفى بين ضحى ووزيرة القوى العاملة (عائشة عبد الهادى) هتقوليلها ايه

10- ايه هى السلبيات اللى بتاخديها عالمغتربين المصريين.

10- 2- وايه اكتر حاجة تنصحيهم بيها

11- ايه هى نظرة المصريين اللى عمرهم متغربوا للمغتربين من وجهة نظر اختلاطك بالمجتمع

12- ايه انطباع ضحى ورايها عن الاتى اسمائهم (بمضوعية وشفافية ..... راى فنى محايد) ايوة اللى درستيه فى مراجعة سنة تالتة :lol:

العنبى

مكاوى

لماضة

شيكو

حسام يوسف

سين سين

رضوى

الرفاعى

زوهيرى

عمرو رضوان

أغابى

الشامى

عمدة

يوزر نيم

حسام (انا) wst::

13- ضحى امتى بتقلب الترابيزة وتقول يووووووووووه زهقت بقى انا عايزة ارتاح............ وايه الخطوات اللى بتعملها بعد متقلب الترابيزة عشان تبقى satisfied or comfotable

14- ضحى ..... مفيش حد بيدخل كلية الا بيطلع بيها بحجات حلوة وحجات ممكن متكونيش راضية عنها.

ايه ايه الحجات الحلوة والحجات اللى انت مش راضية عنها دى

15- ضحى دراستها مالية واقتصاد وادارة وبتهوى الرسم والكتابة وبتشتغل فى البرمجة والداتا بيز ورجعت من تانى تقرا اقتصاد ومحاسبة وحودت شوية عالالمانى ثم اضطرت انها تراجع الجافا (مش عارف نسيت حاجة ولا اي) ............ هو ده عدم وضوح الهدف ولا تناغم معرفى ولا ناوية على ايه بالظبط

وتفتكرى ضحى لوكانت ركزت فى حاجة واحدة بس من اللى فاتت كانت تحب تركز على ايه وكانت هتوصلها لايه

16 - دكتور جامعى او دكتورة بيثقوا فى ضحى جدا و امانتها واطلاعها ..... اتصلوا بيها يا ضحى عايزينك تصححى اجابات الطلبة فى سنة اولى (مادة مبادئ محاسبة ) وهنديكى نموذج تمشى عليه

شعورك هيبقى ايه وهتبقى ولا هترفضى ورايك ايه فى الموضوع ده

17- ساعة احداث ابريل 6 ضحى كانت فين وايه تحليلك للى حصل وتفتكرى ساعتها ان مصر كانت فى خطر

18-

ولا اقولك كفاية عليكى كدة

وعشان بردوا افسح المجال لبقية الزملاء

الا فين مكاوى واغابى والعنبى

[doha]

معليش بقى يالمضمض هقفز على اسئلتك عشان مش هقدر اجاوب نفس الحاجه مرتين في جلسة وحده بس وعد باذن الله هجاوبها كلها بعد مااخلص اشطب الحتتين الي في ايدي دول .. ياجماعه اي حد عنده اي سؤال يكومه هنا على جنب وجايه لكم جميعا .. متستعجلوش على رزقكم..

1: لو رجع بيكي الزمن و كان ليكي حق الاختيار كنتي حتتولدي في السعودية؟

هل تقصد اعيش فيها ولا اني ابقى سعوديه الجنسيه ؟

لو تقصد الاولى فانا متولدتش في السعوديه اتولدت في مصر لكن عشت في السعوديه ولو رجع الزمن وكان لي حق الاختيار كنت هختار نفس المعيشه برضه

اما عن الجنسية لاه مكنتش احب ابقى سعوديه

2: اكتر قرار ندمتي عليه في حياتك؟

ممكن ندمت على تصرف او كلام قلته او رد فعل اتخذته لكن القرارات مش فاكره اني ندمت على قرار فيهم لاني دائما بستخير وبفكر في قرارتي قبل مااقوم بيها .. صحيح اني ممكن اتخذ قرارات سريعه جدا بس بيكون بعد تفكير سريع برضه وكمان الاستخاره بتسهل الامور ..

3: رايك في كلمتين بصرااااحة شديدة في كل من (س س -لماضة -اغابي - مكاوي -حسام- يوزر- زهيري- كونسلتانت,..........اي حد عايزة تضيفيه)

عاوزه اضيف ناس كتير بس هكتفي بالي ذكرتهم عشان منساش حد

س س

كتير اوي لما اقرأ كلامه افتكر حديثين اثنين .. (( من احب الاعمال الى الله سرور تدخله على قلب مسلم )) و (( ان لله خلقا اختصهم بقضاء حوائج الناس اولئك الآمنون من عذابه يوم القيامه ))

ماشاء الله عليه عنده موهبه ربانية مخليه له اسلوب مميز جدا في الكوميديا مش عارفه ليه بيفكرني اوي باسلوب ايمن بهجت قمر في الشعر .. حاجه كده متفرده .. بسيطه . . كلامها عادي كان قدامنا كلنا لكن هو اخذه وصاغه بطريقة متقدرش معاها غير تقول .. الله

واحلى مافيه انه عصبي موت وده يخليني اموت من الضحك واشمت فيه شماته الدنيا لما حد يسال عن البصمه او اي موضوع متكرر في باب المغتربن :happy:

لماضه ..

لماضه بالظبط ضحى من عشر سنين تقريبا .. بشوف فيها شبابي بشكل كبير اوي .. وعلى فكره بشوف نفسي برضه في الفاضل عادل ابو زيد واتوقع انه انا بعد كام سنة ..

اغابي ..

غريبة انك اخترت لماضه واغابي لاني ـ وفي مرحلة ما ـ كنت متفقة مع اغابي بشكل غريب جدا في حاجات كتير اوي .. تصرفاتها في مواقف كتير تقريبا هي تصرفاتي بل وظروفها من وهي صغيره لغايه ماكبرت تقريبا هي ظروفي بالظبط .. بحس ان حياتنا متطابقة الى درجه كبيرة اوي وطريقتنا في تعاطي الامور في حالات كتير هي واحده .. بس برضه اكيد في بيني وبينها فروق كتير في حاجات تانيه فمش هتخليها في درجه تطابقي مع لماضه ولكن ده لاينفي التشابه .

مكاوي

شخصية لذيذة بجد برضه عنده خفه دم من نوع خاص جدا .. مصري اوي وابن حلال واحلى مافيه غيرته على الدين .. و .. ( مش هقول ) ..

حسام وكونسلتانت

تعرفت عليهم من فترة في اوضه الاعتراف .. العالم دي بتعرف تكهرب كويس خلي بالكم ..

يوزر

صريح ودي احسن حاجه بتعجبني فيه .. بس في المقابل مستفز ولسانه زالف .. عامه الاستفزاز ده صنعه في ناس بتتقنها وبتعرف ( تنكش ) الي قدامها بحيث يطلع احسن ماعنده وبتعرف برضه توصل الي عندها له مهما كان جارح بدون ماتعمل غلط .. يوزر بيحاول يتقن الصنعه بس اعتقد قدامه لسه .. حاجه بسيطه

احياا اقرا مداخلات ليوزر وبتعجبني على فكره واحيانا تانيه اقرأ له مداخلات لايقال عليها الا ( شكل للبيع )

زهيري

من الشخصيات القليلة الي بتجمع مابين الذكاء وخفة الدم ومن الناس الي بستمتع بالتحاور معهم باكثر من استمتاعي بالصيد :ninja: .. ابن حلال وبرغم اختلافي معه معظم الاوقات الا ان ساعات بيكون معاه حق وساعات بيكون رايه صح .. من الناس الي بترفض مبدأ القطعان في الاخذ بالراي وانا شخصيا احترم جدا الناس الي كده .. عيبه الوحيد انه بيحفر في الغابه الغلط

4: بصراحة برده ايه احساسك لما اترشحتي للجلوس على الكرسي ( اثارة, خوف, تردد,........)

تردد ؟ لاه .. وقت الترشيح نفسه عادي بالنسبة لي بالعكس انا بحب جدا اجاوب على الاسئلة لاني شخصيا بحب اطلع الي جوايا من وقت للتاني ..

لكن بالامانة وبعد ماتكتفت .. الكرسي له رهبه

وبيشوك wst:: ..

5: هل تعتقدي انك الاذكى دايما او ان نظرتك في الحياه دايما هي الاصوب ؟

لا بالعكس ابدا

على فكره كلمة انتي ذكية دي بسمعها من الناس لكن متوصلتلهاش لوحدي فعمري ماحطيتها في بالي .. انت مبتشوفش نفسك على فكره من برا وعند الناس شكلها ايه ومحتاج تعرف ده من ردود افعالهم

يجوز اكون ذكية بس الاذكياء كتير على فكره ده غير ان الخبرة في الحياه اكثر اهمية في بعض الاحيان من الذكاء . قد يكون عندي خبره حياتيه لكنها تظل قليلة جدا مقارنة بما يفترض ان تكون عليه وبالتالي مقدرش ابدا اقول ان رايي دائما صح او ان نظرتي للامور هي اكيد النظره الصح

بحب اراجع نفسي من وقت للتاني وبفتح اذاني اوي للراي المخالف لي باكثر مابسمع للمتفق معايا لعل وعسى اكون على خطأ فاجد عنده تصويب يساعدني للوصول للصح

بس بيني وبينك .. دائما لما احب اذل اخواتي او زوجي او حد قريب مني اوي بعد مااكون خمنت حاجه هتحصل ومصدقونيش وتحصل بحذافيرها ..

(( سئمت كوني على حق )) :lol:

6: هل تحبين نفسك ؟

احيانا كتيرة .. بس الاكيد ان في اثنين تانيين بحبهم اكتر

7: ايه الحاجات اللي نفسك تغيريها في نفسك؟

مزاجيتي الشديده .. يعني لو فرحانه بخلي الي حوالي كلهم فرحانين ولو زعلانه يبقى يومهم اخضر وهتنكدوا معايا غصب

شفت البحر .. شفت بيتقلب ازاي .. اهو انا كده .. نفسي ابطل الصفه دي

8: كام نسبة المعلومات عن حياتك اللي مايعرفهاش حد غيرك و لا حتى جوزك ولا بنتك؟

يمكن 1- 2 %

يالا كفاية كدة مبدئيا و فاصل و نواصل

وانا كمان

[doha]

ونخش على اسئلة الحاجه ريمو ربنا يجمعنا بيها كده قدام زمزم قادر ياكريم

1_عندك كام اخ و كام اخت؟و مين اقرب واحد او واحدة ليكي شكلا؟ و مين اكتر واحد او واحدة قريب منك؟

بصي ياستي احنا ثلاث بنات وولد .. لي اخت اكبر مني بسنة وشويه ( فوق راس بعض يعني ) واخت اصغر مني بكام سنة واخيرا اخويا الصغير اخر العنقود

بما اني محشوره في النص ـ ودي ثالث حاجه مدينة لها بتكوين شخصيتي اني ابن اوسط ملوش سطوة الكبير ولا دلال الصغير ـ فاقدر اقولك ومن موقعي هذا اني متفقة مع كل اخت لي بشكل مختلف ..

اختي الكبيرة انا وهي بالظبط توم وجيري .. ومع ذلك بتفق معاها ولاننا شبه توام نظرا للتقارب الكبير بينا في العمر فخبراتنا الحياتيه في مرحلة ما هي واحده .. يعني شفنا نفس الكرتون وعرفنا نفس الناس ورحنا نفس المدرسة .. فتلاقي مثلا وده شيء معتاد جدا .. وحده فينا تكون بتتكلم فترد الثانيه بنفس الكلمه في نفس الوقت .. يعني تطابق غريب

اختي الصغيره بتفق معاها في انها من الشخصيات القليلة جدا الي ممكن اتحاور معاها فلسفيا واسمع لها .. لها نظرتها في تحليل الامور وبرضه عندها موهبة ( التنظير ) بحيث انها ممكن تحط قاعده لامر ما او تخبرك بحقيقة من حقائق الحياه مكنتيش واخده بالك منها قبل كده

واخيرا اخويا الصغير.. بيني وبينه 11 سنة وبناء عليه هو ابني اكتر منه اخويه .. بحبه موت وهو ده اقرب شخصية الى نفسي من وهو صغير من وقت ماكنت برضعه بالبزازه واغير له لغايه ماشاء الله مابقى كبير

معندوش بقى نظريات ولا فلسفيات لكن مستحيل يكون في ايدي حاجه ويطلبها واقدر امنعها عنه .

2_ضحى لما بتزعل مين اللي بتجري عليه تفضفض معاه؟

على حسب ايه الي مزعلني

يعني غالبا بيكون السبب حاجه متراكمه او موضوع له جذور .. فعلى حسب مين الي متابع معايا الموضوع من الاول بجري واشكي له واقوله شفت الي حصل كيت وكيت وكيت

وساعات بتضيق بي فبكتفي بالشكوى لربنا .. بيني وبينك بعمل كده لما تبقى الحكايه بجد ومحتاجه حل بصحيح فيما عدا ذلك فالفضفضه لمجرد الفضفضه طبع اصيل في كل ست مصرية وانا مش استثناء ..

3_ايه اكتر حاجه مجنونة و مطرقعه عملتيها في حياتك (طبعا انا عارفه و انتي عارفه)؟ لو رجع بيكي الزمن تاني كنتي هاتعمليها ؟

wst:: :ninja: :lol: :lol: :sad: wst::

ايوه

4_ميار هانم لاظوغلي اول ما ولدتيها كان شعورك ايه اول ما شوفتيها؟

اول ماشفتها طبعا فرحت بيها بس الفرحه العاديه او المتوقعه خاصه وماشاء الله عليها كانت جميلة جدا اول ماتولدت ..

لكن الشعور الي لايمكن انساه كان بعد ولادتها بساعه كده او ساعتين

كنت خلاص اخذتها ورجعنا البيت كانت على السرير ولقيتها بتعيط .. رحت عشان اشيلها ولسه هسكت فيها بقى زي مابعمل مع اي طفل في الدنيا .. يادوب شلتها ويادوب قربت مني سكتت تماما كأن زرار وضغطت عليه

بصراحه الشعور ده عمري في حياتي ماحسيته .. حاجه كده من الراحة الشديده او الاطمئنان المغلفة بالحنان.. انك تشيلي حاجه هشة وطرية .. جميلة ورقيقة .. والحاجه دي عوزاكي بس ومش عاوزه منك حاجه غير انها تكون جنبك

بصراحه اللحظه دي فرقت معايا كتير اوي مكنتش اتوقع ابدا ان الامومه كده او ان العلاقه بين الطفل وامه بتكون بالشكل ده

5_ميار هانم اوغلو تتمني تشوفيها ايه؟ امنياتك ليها ايه؟

نفسي تفضل اموره ودلوعه بس في نفس الوقت ذكية ويعتمد عليها

6_لما تنزلي مصر ان شاء الله ايه اول حاجه ناوية تعمليها؟

حلة محشي

:)

باذن الله اول مارجع مصر ..

هدور على شغل :happy: ..

7_كان عندك معهد قبل كده ايه مميزات و عيوب التجربة دي و استفدتي منها ايه و هل ممكن تكرريها في الوقت الحالي؟

استفدت حاجات كتيره اوي . .

في بدايه مشروعي كان في موقع اجنبي على الانترنت بيقدم اختبار مجاني تعرفي منه هل انتي مدير ناجح او لا

طبعا كنت عارفه نفسي ومقتنعه اني مدير بالفطرة .. اجريت الاختبار وكانت نسبه النجاح 75 فما فوق

سقطت طبعا

هو مكانش حاطط لك اجابات نموذجية ولا شيء بس يقولك نتيجتك فبالتالي انا معرفش الغلط فين او سقطت ليه .. سيفت الموقع عندي في المفضله

من ضمن الاسئلة مثلا الي كانت بتسأل ..

هل تعتقد كمدير ان بيئة العمل المفروض تكون قائمه على الصداقة المتبادله بين المدير وفريق العمل ؟

ومديلك خيارات ..مقتنعه جدا .. نص نص .. احيانا .. لاه دي حاجه غلط .. الخ

لو انت قائد لفريق عمل وشغالين على مهمه معينة وفي مشكلة فيها قابلتكم وانت اقترحت حل وواحد من فريق العمل اقترح حل آخر على نفس درجه التكلفة ونفس درجه الصحه من الحل الي انت اقترحته .. تعمل ايه ؟

تاخذ بحلك ؟ ولا تاخذ بحله ؟ ولا ترفض الاثنين وتطلب حل ثالث ؟

لما بتكون قائد على مشروع بتبص لايه اكتر ..

الصورة الاجمالية ولا التفاصيل الدقيقة ؟

وقيسي على ذلك ..

المهم اشتغلت لي يمكن سنة كده او سنة ونص .. ورجعت اعيد الاختبار تاني .. لقيت حاجات كتير جدا من الي كنت مجاوباها قبل كده اجابتي فيها تغيرت تماما وحاجات كتيركنت فاكره انها الصح زمان دلوقت طلعت غلط خالص .. طبعا درجتي في الاختبار المرة الي بعدها تعدت حاجه وثمانين في المية

من الحاجات الي استفدتها من المكتب الي كنت فتحاه اني احتكيت بناس كتير اوي وقابلت نماذج من البشر كان صعب جدا اتعامل معاها في حياتي العاديه .. اكيد برضه الثقة بالنفس الي اكتسبتها .. ووضعي كقائد لمجموعه لو غلط هيغرقهم كلهم ومفيش مرجع اسند عليه فيما لو احتجت قرار دي فرقت معايا كتير ..

اهم حاجه خرجت بيها طبعا من مشروع مكتب الكمبيوتر في مصر ..

انه مشروع فاشل مفتحوش تاني ..

8_مين اصحابك سواء في الحياة العادية او في المنتديات و ايه اهم صفاتهم؟

مع ان لي معارف قد طوب الارض بس اصحابي قليلين اوي على فكره ممكن ينعدوا على الصوابع ..

في الحياه العاديه لي صديقتين تلاته بس من ايام الجامعه غالبا.. وقريبة وهي من اقرب الناس لنفسي برغم اختلافنا في التفكير لكن الدم يحن اكيد .. وفي الانترنت لي اصحاب كتير غالبيتهم مش مصريين وصديقة واحده مصرية هي عارفه نفسها معرفش ليه اخترتها من بين النت كله وقلت دي هتبقى صاحبتي ..

اهم صفات اصحابي اني بحس انهم بيحبوني والاهم اني بحبهم بجد .. مش عارفه ايه السبب بس احيانا سبحان الله انجذب لشخصية معينة وخلاص نبقى اصحاب من اول يوم .. واحيانا تانيه بحس ان عادي نكتفي نكون .. معرفة

ده لاينفي اني بحب ناس كتير اوي وبعتبرهم في مثابة الاصدقاء لكن الحديث هنا عن الصداقة المقربة اني احكي لها ادق اسراري وهكذا .. قلة ومفيش بينهم رابط محدد في الشخصية او الصفات الهم الا ان كلهم بنات حلال يعني والاهم انهم معايا على طبيعتهم خالص وانا بالتاكيد نفس الشيء ..

[doha]

9_ايه اكتر اكله بتحبيها؟ايه اكتر اكله بتتميزي بعمايلها (و ان اكيد مش بشر اللي عاملين البتاعه دي ) :happy: ؟ و ايه اكتر اكله بتكرهيها عمى؟

شكلك حفظاني من ايام موضوع الملوخيه ياريم ..

عامه هم بيقولوا علي بعرف اطبخ .. وبيقولوا اكلي لذيذ كمان. الصراحه .. معاهم حق في بعض حاجات ..

في كذا حاجه غير الملوخيه بعرف اعملها حلو اوي زي محشي الكوسى والفراخ المشويه والرز المعمر وو وو حاجات كتير لاني زي مايمكن باين من كلامي كنت أكيلة زمان وكنت يعني مبرحمش في الاكل

اكتر اكله عملتها وكرهتها موت حاجه كده من الجحيم .. كانت صينية القلقاس في الفرن باللحم المفرم .. مش فاكره جبت الوصفه منين وقلت اجربها ومع اني بموت في القلقاس الا ان الصينية دي طلعت من الفرن الى مثواها الاخير مباشرة بدون مايمر على معده اي من المتابعين سوى لقيمات

برضه قبل كده حاولت اعمل تورلي الخضار في الفرن اكتر من مرة ولاقى نفس مصير القلقاس ابو لحمه .. مش عارفه ليه مليش حظ في عمله مع ان الكل بيجمع انها اكلة سهله جدا

فيما عدا الاثنين دول اعتقد انا بحب الاكل كله لاني زي ماقلت لك .. اكيل قديم .. اييه ايام الصحه بقى

10_حاجة نفسك تشتريها و بتحوشي عشان تجيبيها؟

ديب فريزر .. ده في الخطه الخمسية الجايه باذن الله على راس الاولويات..

ونفسي بجد يكون عندي عربية 4×4 وتكون بتاعتي انا مش بتاعه البيت يعني اروح واجي بيها بمزاجي السوق والمشاوير واوصل العيال المدرسة وكده يعني

بس للاسف معتقدش في امكانية حاليا لكن مش مستبعده ابدا ده يحصل مستقبلا فزي ماقلت قبل كده اصبحت بصدق جدا في المعجزات ..

11_ايه الالوان الي بتحبيها؟ ايه الالوان اللي بتكرهيها؟ وايه اكتر لون مميز عليكي؟

بشرتي بيضا فبتليق علي كل الالوان تقريبا .. لكن انا شخصيا بحب البيج في السكري بدرجاته الهادية .. وبحب البمبي مع البنفسجي الفاتح والسماوي في كل حاجه اشتريها لبنتي

مفيش لون بكرهه لذاته لكن في درجات لونيه مبحبهاش ابدا .. الاخضر الفسفوري او البرتقالي الفاقع او البنفسجي الثقيل الزاهي اوي .. وكل الالوان ( الفلح ) الي بتسد النفس دي

12_فرق معاكي ايه برج الدلو؟

كتيييييير

انا دلويه اوي زي مالكتاب بيقول .. وكل الصفات الي بحبها في لقيتها انها صفات الدلو ..

اكتر حاجه فرقت معايا كوني دلويه في بدايه تعارفي على زوجي كنت فاكره انه ونظرا لتركيبته الجسمانية برج الثور

في نقاش عابر اكتشفت انه دلو وصميم بل ومولود قبلي بيومين اثنين بس مع اختلاف سنة الميلاد طبعا

ساعتها بس قلت هو ده .. مش هتقوم بقى تقرأ الفاتحه ؟

اما صفات برج الدلو المميزه له اوي خذي عندك ..

اولا هوائي مبيحبش يلتزم بنفس الشيء ويكرره كل يوم .. عاشق للتغيير والتطوير من الدرجه الاولى

الدلو ثاني اجمل البنات بعد برج الميزان .. الحمد لله لحقت لي لحسة

الدلو سواء راجل او ست له مشيه مميزه تشبه المشية العسكرية من ناحيه استقامه الظهر وطول القامه

سابق سنة وبيقول كلام بعد عشرين سنة الناس تعرف انه كان على حق ( على فكره والله الكتاب الي بيقول مش انا )

الدلو الست بالذات بتهتم بالقضايا العامه اكثر من اهتمامها بالامور الي بتهتم بيها الستات عاده ومن هذا فالزواج اخر طموحاتها

الدلو ملهاش عزيز لانها مش حالمه او خيالية في المشاعر فلو انجرحت من شريكها سواء بقى كان زوج او صديقة او اي شخص له علاقه بيها بتفصل

عنه بلا مشاكل وبيفضلوا برغم كده اصدقاء . .

وكفايه عليكي كده النهرده

ملاحظه : بما اني تكلمت عن الابراج فياريت نفرق مابين برجك ايه وحظك ايه .. الحظ القائم على الابراج ده طبعا استهبال رسمي ملوش اي اساس من الصحه انما صفتك بناء على الوقت الي اتولدت فيه فثبت لي انا شخصيا انها صحيحه بدرجه كبيرة جدا بس لسه مش عارفه تفسيرها العلمي ايه )

13_بتعنيلك ايه كلمات دي

الحب

تضحيه تشعري بعدها بالسعاده والرضى ..

الصداقة

علاقه سامية جدا للاسف مش متاحه لناس كتير

الطموح

جنة ونار .. لعنة ميقدرش البعض يعيش من غيرها

14_عندك بطاقة انتخابية؟طب لو عندك و جت انتخابات الرئاسة و كان المتقدمين هم حسني مبارك _ ايمن نور_البرادعي_ عمرو موسى_حمدين صباحي_جمال مبارك ترشحي مين فيهم و ليه؟

معنديش بطاقة انتخابيه وعن تعمد

لو كان عمرو موسى اصغر سنا من دلوقت كنت بكل تاكيد رشحته بلا منازع .. شخصية قيادية .. كاريزيما .. دبلوماسي من الطراز الاول .. خبرة وشبكه علاقات دولية طيبة .. لكن وبما انه مش صغير فمش هرشحه ولا اي واحد من الي ذكرتيهم ولكن لو حد تاني غير موسى فاز هتمنى لو ان عمرو موسى كان من بين المستشارين بتوعه هو وشله كامله من الناس الي ممكن تساعد في ادارة الحكم ..

شخص لوحده ابدا غير كافي لحكم مصر ومن تسطيح الامور الاعتقاد بعكس ذلك ..

15_ايه نوعية افلامك المفضلة الاكشن _ الرومانسي_ التراجيدي_ الكوميدي؟اكتر فيلم عجبك و مش قادرة تنسيه؟

بكره افلام الاكشن جدا .. جدا

وكذلك الافلام الحزينة الي من اولها لاخرها عياط او تلك الي فيها حبكه تخلي الواحد يحبس نفسه ومستني بقى ربنا يفرجها ..

اجيب لنفسي وجع القلب ليه ؟؟

بحب جدا الافلام الفلسفيه والي بتطرح فكره جديده عمر ماحد قالها او الي بتتناول احداث عاديه جدا ممكن تحصل بس من زاويه مختلفه مبصيتش بيها من قبل كده

بحب اوي الفيلم ايا كان الي يخليني افكر فيه فتره بعد انتهائي من مشاهدته

بحب برضه اوي الافلام الكوميدي الي بتبقى معموله صح

من كل ماسبق فانا مش غاويه افلام عربي تقريبا مبشوفهاش وبقتصر على الافلام الاجنبي

من الافلام الي شفتها وحبيتها وعلقت معايا وخرجت بعدها بتفكير مختلف

افلام كتير شفتها وعلقت معايا جامد بس اخرها فيلم بعتبره قنبله الموسم هبقى باذن الله لما افضى انزل لكم موضوع مفصل عنه بالقصة والصور لو امكن ..

16 _ ايه الاغنية اللي رقصتي عليها سلو في فرحك؟

مش فاكره كانت اغنيه ايه بس فاكره كويس آخر اغنيه كانت واحنا خلاص بقى بناخذ صور تذكارية مع المعازيم

ياغايب ليه ماتسال لمطربي المفضل .. فضل شاكر

17_ اكتر لحظة فرح عدت في حياتك و اكتر لحظة حزن؟

بلاش اللحظات الحزينة خلينا في السعيده افضل ..

لحظات الفرح كتير منها لما عرفت اني حامل ثاني مرة

ولما كنت قاعده انا وبنتي ولقيت باب الاوضه بينفتح ودخل علينا زوجي بجلابيه بيضا وحالق شعره خالص ولسه راجع حالا من الحج ..

لما جالي موبايل بكاميرا هديه من والدتي وكان احدث حاجه وكان نفسي فيه بس مطلبتوش

لما كنت قاعده انا وزوجي على السرير وميار معانا وعمرها اقل من سنة وفجأه لقيناها بتضحك بصوت لاول مرة في حياتها ومكانتش قبل كده بتضحك بصوت يادوب ابتسامه

واخيرا لما كنت رايحه احج ومعاييش ترخيص ومتوقع يرجعوني من التفتيش في اي لحظه وانا قلقانه وفجاه كده في وسط ضلام الليل الاقي قصر ابيض كبير منور بقوة .. لقيت نفسي وجها لوجه امام الحرم الشريف ودقائق كنت في ساحته ودقائق تانيه واجد نفسي في مقابلة الكعبه .. من اللحظات الي لا انساها ابدا

[doha]

18_ قرار اخدتيه و ندمتي عليه ؟قرار اخدتيه و مقتنعة تماما انك اتصرفتي 10 على 10؟

عن القرارات النادمه جاوبت قبل شويه اما اصوب القرارات الي باخذها في رايي اختيار توقيت التراجع عن قرار ما قبل مايتحول بجد لخاطيء .

19_ ضحى و هي طفلة صغننة كانت ايه شقية _ هادية _ مطيعة _ متمردة؟

مكنتش شقية ولا متمرده كنت مطيعه بس لمضه وكثيرة الاسئلة بشكل كان مطفش المدرسات بتوعي ..

20_ ضحى ليها تجارب مع الريجيم اكتر وزن نزلتيه ؟ و لما نزلتي كنتي حاسة بايه ؟

اوهوووووو

اكثر وزن نزلته بلاش اقوله لانه ممكن يكون اكثر من نصف وزن ناس من القطع الضعيف .. وطبعا كنت حاسه ان الدنيا بمبي بمبي بتبقى شخص تاني طبعا

هي كانت هفه جات في بالي مرة اني اعمل نيو لوك وعملته بس المشكلة الي بجد انك تحافظي عليه ..

واديني بحاول ..

تم تعديل 20 مايو 2010 بواسطة doha

[hOuSsAm]

انا متاسف جدا على تكرار بعض الاسئلة

[doha]

اولاً تحية الكرسي

( بقالي فترة بشرب لمون ملتج ........ مزااااااااج )

تشربي لمون معايا

ولا نعمل الموز بلبن ( المشروب الرسمي للكرسي ؟؟؟؟)

ودي عاوزه كلام الموز باللبن طبعا .. احد المشروبات الي لا اكتفي منها ابدا .. بس ربنا يستر من كوني قاعده على الكرسي حاكم انا لي قصة كده مع كرسي وموز بلبن برضه كرهتني فيه سنين طويله لغايه مانسيتها .. فاكره اني حكيت القصة دي قبل كده لو محكيتهاش قولي لي احكيها تاني ..

* ضحي ....... حققتي كام في المية من طموحاتك ؟؟

هقولك حاجه عندي دفتر او اجنده مذكرات محتفظه بيه من ايام ثانوي كان بابا جابها لي هديه ولسه عندي لغايه دلوقت .. بكتب فيها باستمرار لما يكون عندي حاجه حابه اقولها من موقف مضايقني او مشاعر خنقاني ومحتاجه حد يسمعها او حاجه عجبتني او لحظه محتاجه ( توثيق ) ..

في الاجنده دي كتبت مرة ( احلامي ) عن الفترة القادمه .. حاجات نفسي احققها .. كانت حاجات بسيطه اوي وهايفه يعني مش كبيرة بالدرجه او ( حلم عمر ) زي مابيقولوا .. كتبتها على اساس اني ارجع بعد سنة او اثنين اشوف بس عملت منها ايه مش من باب التقييم وانما من باب العلم بالشيء

مرت فترة وجيت بقلب مرة في مذكراتي ووقعت عيني على الصفحه دي .. قلت لما اقرأ كده وانا عارفه ومتاكده اني لم احقق اي شيء من الي كتبته بس كنت فعلا ناسيه انا كتبت ايه .. قلت اقرأ واشوف كده حلمي كان ايه ولا طموحي في ذلك الوقت كان ايه . .

مش هتصدقي يارضوى .. ذهلت بمعنى الكلمه

تقريبا كنت عملت كل حاجه على القائمه ..

كنت كاتبه اني عاوزه اخذ دبلومه دراسات عليا وكنت اخذتها خلاص

كنت كاتبه اني عاوزه اعمل حوض سمك وكنت عملته خلاص

كنت كاتبه اني عاوزه اخلي اوضتي بورق الحائط وكنت خليتها خلاص

اكتشفت ان تقريبا كل الي كنت كتباه على انه ( فنتازيا ) او حاجه كده من قبيل الاحلام اتعملت بس هي كانت محتاجه وقد وجهد ..

من فترة كتبت لي قائمة تانيه بالحاجات الي نفسي فيها وكتبتها بالتفصيل .. مش هقولك اني بسعى لعملها بما اوتيت من قوه ولكن هقولك اني متاكده باذن الله ولو ان بعضها يبدوا لي من الآن ضرب من الخيال او المستحيل الا ان امكانية حدوثه باذن الله اظنها وارده وبقوه ..

بالمناسبة احد الاشياء الي لاحظتها كقانون من قوانين الحياه التي لا تتغير مهما اختلف الزمان او المكان ان الشخص لما بيكون نفسه في حاجه اوي ومتعلق بيها اوي بيحصل عليها في النهايه .. هي مسألة وقت .. ده قانون .. ومش شطاره على فكره انك تحصلي على الي كان نفسك فيه او عشتي عمرك كله بتحلمي بيه .. الشطاره انك تعرفي من الاول تحلمي بايه .. الشطاره تختاري صح الي عاوزه تحصلي عليه لان محدش بياخذ كل حاجه .. قرري بعدين اصبري مع بعض السعي لازم دائما وابدا الي طلبتيه هيكون عندك .. مسألة وقت

* الدنيا علمتك ايه ؟

حاجات كتير اوي ..

منها ان الي تعود ياخذ من حد.. عمره ماهيديله هو بالذات

ومنها ان ايام زمان مبترجعش مهما حاولتي فمتضيعيش وقتك في انتظارها او ترفضي الواقع على امل يتغير ويرجع زي ماكان ..

اني معولش على حد تاني تحقيق حلمي انا الخاص .

اني محكمش ابدا على نتائج تجربة في لحظتها .. انتظر .. فالطبيعي ان الايام بتثبت احيانا قصر النظر

اني مش محتاجه آكل البيضه كلها عشان اتأكد من فسادها

اني منتظرش لما الحاجه تحصل لي وتخلص عشان اتعلم منها وانما اشوف البدايه والظروف مشابهة لبدايه وظروف مين واشوف النهاية كان شكلها ايه فاقدر ( اخمن ) مبدئيا ان كنت ماشيه صح او غلط

واخيرا تعلمت ان حياتنا كلها مش شريط سينما يايكون كوميديا او دراما .. وانما .. هي علبة صور فوتوغرافيا .. زي ما فيها لحظات حلوة ووشوش بتضحك فيها الحظات الوحشه والناس المكشرة . . من الحماقه اني اقف عند صورة منهم ايا كان الي فيها واقول هي دي حياتي وهو ده الي بشوفه فيها . . من قصر النظر اني اتشبث بوحده فيهم واقول لاه وقف عندك انا مش هتحرك عن دي .. الحياه بتستمر زي القطار ولازم تقف في محطات بعضها بيعجبنا وبعضها ابدا مش على هوانا واحنا علينا مش نعترض او حتى نقبل بالموجود بلا امل في التتغير وانما نتقبل وزي ماكنا من شويه في المحطه السابقة فاحنا بعد شويه هنكون في المحطه التاليه .. مفيش حاجه بتفضل على حال ومفيش واقع مبيتغيرش مهما كان درجه تعلقنا بيه او حتى رفضنا له ..

* اتعرفتي علي المحاورات ازاي ؟

من جوجل كنت بعمل بحث اكتر من مرة ويجيبني المكان للمحاورات وفي النهايه قررت المشاركه فيها ..

* احلي حاجة في دنيتي هي ...........؟

بنتي ميار ..

* لو لم أكن ......... لوددت ان اكون ..........؟

لو لم اكن انسان لوودت ان اكون كذلك

* شخصية أثرت فيكي اوي ؟؟

السؤال ده جاوبته في موضوع لماضه بس اتمسح .. وفقا للبند القائل بالحق في اول رزعه قفا فاعتقد واجب علي يكون الاجابه في المحضر بتاعها ..

هجاوبهولك هناك ..

* حكمة تؤمني بها ؟

العلم ثلاثه اشبار من وصل الشبر الاول تكبر . . ومن وصل الشبر الثاني تواضع.. ومن وصل الثالث علم انه لا يعلم شيئا ..

[doha]

* حدث غير مجري حياتك ؟؟

في حياتي مفترقات طرق معدوده بس كان تاثيرها جوهري كان ممكن جدا تكون حياه تانيه خالص فيما لو اخترت او تمكنت من اختيار طريق غير الي كملت فيه ..

خذيها كده بالترتيب ..

دخولي كلية التجاره

سفري للسعوديه بعد الكلية وعملي هناك

تركي للعمل بكامل ارادتي وتفضيلي استكمال الدراسه على الفلوس

قراري بفتح المكتب او مشروعي الخاص

زواجي

( نقدر نقول اني في كل ماسبق كنت على كوكب الارض ومن بعد زواجي مش بس غيرت الكارير وانما انتقلت الى المريخ او بعباره اخرى غيرت الشعبه والفصيله يعني الاول كنت انتمي للبرمائيات تزوجت فبقيت زواحف )

ولاده ابني ووفاته ومااستتبعه من سفري للعمره بغرض الاستجمام الي قلب بعد كده برغبه في تغيير النشاط من اجبان لمخلل

الكام حاجه دول كانت علامات فارقه في حياتي وبينها احداث معادتش حياتي فيها بكل تأكيد زي الاول ابدا ..

كل منها هو 911 الخاص بي قائم بذاته برغم اختلاف مشاعري في مابينها

* دور الصدفة في حياه ضحي ؟؟

لا اذكر ان في حياتي حاجات كبيرة يعني بحيث اني افتكرها وكان للصدفه دور واضح فيها ..

لكن وبالمقابل بشوف ( ترتيب ربنا ) في امور كتير بكون مذهوله ازاي تراتبت مع بعض بالدقة دي وبالشكل ده بحيث تعطي النتيجه الي اعطتها بالظبط .. يعني لو حللت كده موقف مؤثر ومهم كنت الاقي ان في كذا حاجه كان ممكن تحصل وتعوق حدوثه ماذا لو ان كذا .. او ماذا لو لم يكن كذا .. ومع كده تلاقي ان الامور ترتبت وتظافرت بحيث اوصل وبما يشبه المعجزه للموقف ده او النتيجه دي

حاجات كتير بقول لو ان مخرج عاوز يعمل حبكه بالشكل الي حصلت بيه لاتهمه الجمهور بالمبالغه بس سبحان الله الدنيا احيانا بيكون فيها اشياء بتحصل بتوقيتات وتزامن عجيب يخلينا بس نتعجب من قدره ربنا على التدبير..

* بتمني ارجع لأيام زمان ؟؟؟؟ ولا بعيش احلي ما في عمري ؟؟

لاه بكل تاكيد بعيش احلى مافي عمري لاني في ذروة شبابي دلوقت .. صحتي الحمد لله هي الافضل وتركيزي وقدراتي .. تقريبا وصلت للقمه او قريب منها

فرحانه بده ولكن في نفس الوقت قلقانه لانها كلها سنوات معدوده ويبدأ العد التنازلي

الهبوط اصعب بكتير من الصعود .. زمان كنت اتمنى ابقى كبيرة واديني بقيت . اعتقد مستقبلا ممكن اتمنى العكس اني ارجع يعني اقف في اللحظه الي انا فيها دلوقت ..

ياريت كان ممكن ..

* اتعرفتي علي زوجك ازاي ؟؟

من ايام ماكنا نفس واحده وانخلقت منها التانيه :blush2:

* علي اعتبار ان عمر الانسان يقاس باللحظات السعيدة التي عاشها ........ يبقي عمر ضحي كام لحظة ؟؟

حوالي 30 سنة

* اكتر حاجة بتحبيها في المحاورات ؟؟

اللمه والعيله وان بقى في معرفه تكاد تكون شخصية بين معظم الي بيكتبوا فيها ..

* اكتر حاجة بتضايقك من المحاورات ؟؟

الجدل السفسطائي خاصه لو كان الموضوع اصلا مش مستاهل وحتى لو مفيش خلاف فالاتفاق فيه مش هيعود بفايده

* ايه اكتر حاجة تضايق ضحي ؟؟

حد يشتتني بحاجه وانا مركزه في حاجه تانيه

* طب واكتر حاجة تفرحها ؟؟

بنتي

* ضعي مرادفاً لكل كلمة مما يلي :-

- الحياه

حلوة بس نفهمها ونفهم احنا فيها ليه

- الصدق

منجاه .. وبجد

- الغربة

محدش بيختارها بايده

-الوطن

مكان تعرف تعيش فيه مع ناس بتحبك مش خايف من حاجه ولا على حاجه .. متشيلش هم النهرده ولا تقلق على بكرا .. مكان تحس فيه انك بجد لك فيه .. مكان

اعتقد ان كتير مننا ملوش وطن

- اللقاء

ساعات بيبقى امل يستحق نعيش عشانه

- الامنيات

مهما كانت .. فهي مش مستحيلة التحقق

[doha]

* ايه رأي ضحي في عمل المرأة ؟؟

اضطرار سواء بقى لانها محتاجه له ماديا او اجتماعيا او لانها من النوع الي صعب تعيش بدون عمل

وساعات .. لكل ماسبق .

* اجازة لمدة شهر ........ تحبي تقضيها فين ومع مين ؟؟

مع زوجي في كام دولة اوروبيه وبعدين اتخانق معاه واقوله ياريتني ( ماجبتك معايا ) ياريتني خدت اختي الصغيره افضل :happy:

* ما هو الذنب الذي لايغتفر ؟؟

الذي يأتي به صاحبه وهو يعلم انه لا يغتفر

بلاش بقي اطول عليكي ياحياتي

بس ان شاء الله هرجع تاني ......... اذا كان في العمر بقية

me to :blush2:

[doha]

1- ايه اكتر 5 حجات بيميزوا ضحى.

هي القاعده الصحيحه ان مادح نفسه كذاب .. وبناء عليك هقولك الي البعض بيقوله عني مش الي بقوله عن نفسي ويمكن جدا يكون كلام الناس دي صح .. يمكن

1. بسامح ومبحطش في بالي في معظم الاحيان

2. لو حسيت اني غلطت بعتذر ومبيهمنيش شكلي هيكون ايه المهم اريح ضميري

3. بقول الحق ولو على رقبتي زي مابيقولوا

4.بفكر في الآخرين احيانا كما افكر في نفسي

5. في احيان كتير بكون اهل لتحمل المسؤوليه مهما كانت

2- طب ايه اكتر 4 حجات ضحى عيوب فى ضحى

1. بجد صعوبه اني اكون تابع الا لو كان القائد متفوق علي بجد ساعتها بقف منه موقف التلميذ من استاذه

2. معظم الوقت عاوزه كل حاجه تمشي زي مانا عاوزه وبتضايق لو الحاجه اتعملت بطريقة غير الي في مزاجي حتى لو كانت صح برضه .. بحاول اتخلص من الصفه دي

3. متقلبه زي ماقلت قبل كده ودي صفه ممكن تتعب الي يهمهم امري

4. باخذ الامور على اعصابي في معظم الوقت مع انها في حالات كتير ممكن تكون امور هايفه او متكونش مستاهله القلق الي عملاه بسببها

في كمان لو عاوز بس انت قلت اربعه بس ودول اول اربعه جم على بالي .. :blush2:

3- ضحى خبيرة فى التدبير المنزلى ...... النهاردة جوزك قالك يا ضحى انا معييش غير 100 ريال لاخر الشهر اتصرفى عشان الشهر يعدى بسلام :blush2: (هستثنى من المصاريف مصاريف بنتك)

ده يعتمد احنا يوم كام في الشهر

بس عامه لو ده حصل فهخلي المبلغ كله للاكل والشرب وهصرف بحرص ومن بدايه استلامه تحسبا انه ميقضيش للنهاية ..

4- طموح ضحى ممكن يوصلها لايه

على فكره انا اقصى طموحي اعيش عيشه مرتاحه يعني مش غنيه اوي بس بالتاكيد مش فقيره ..

وان يكون لي حياه اعيشها سواء بقى شغل كويس اروحه او علاقات اجتماعيه وصديقات اتزاور معاهم او الاثنين ..و يكونوا ابنائي مستقرين في دراستهم او عملهم ويكون زوجي مبسوط .. بس

اعتقد لو وصلت للمرحله دي هيبقى حققت طموحي ولو لاقدر الله موصلتش يبقى عادي .. مايقدر على القدره الا ربنا ..

5- طموح ضحى فى نفس اتجاه طموح جوزها ولا ده طريق والتانى ماشى فى طريق تانى

نفس الاتجاه وهدفنا ـ على مااظن ـ مشترك .. متفقين على المطلوب بس الاختلاف في الوسائل الي هنوصل بيها ليه

6- ايه اكتر 3 دول ضحى عايزة تعيش فيهم غير السعودية ومصر (معيشة وليس سياحة)

المانيا

فرنسا

امريكا

7- ضحى خريجة تجارة طنطا (رايك ايه فى الدكتور ثناء) ايوة ده اللى بيشرب سجاير كتيرة اوى وبيحب يقطع فى الكلام (اى معلومتين كدة تعرفيهم عنه اصله غامض بالنسبة ليا)

متنصدمش .. بس هو مات الله يرحمه ..

8- ضحى ........ هى مصر رايحة فين؟ :happy:

هي مش رايحه هي ( بتتدقلب )

9- اتصال هاتفى بين ضحى ووزيرة القوى العاملة (عائشة عبد الهادى) هتقوليلها ايه

هقفل السكه في وشها

[doha]

10- ايه هى السلبيات اللى بتاخديها عالمغتربين المصريين.

انهم بيبصوا لبعض ومبيبصوش للناس الي حواليهم ..

10- 2- وايه اكتر حاجة تنصحيهم بيها

حدد هدفك عشان متكتشفش بعد طول عمر انك بعت عمرك ببلاش ..

11- ايه هى نظرة المصريين اللى عمرهم متغربوا للمغتربين من وجهة نظر اختلاطك بالمجتمع

ان المصري برا حتى لو تعبان فهو على الاقل مرتاح عن الي جوا مصر وان مفيهمش خير لان لو كده كانوا جابوا لهم شغل زي ماجابوا لنفسهم .. دي النظره السائده على فكره لكل المصريين بلا استثناء لكل معارفهم الي طلعوا برا .. وطبعا وطالما الي برا ده ندل وخلي باقاربه او معارفه ومطلعهمش يبقى من حقهم شرعا وعرفا يقروا عليه وينقوا براحتهم على اساس ان ده رد فعل طبيعي للي عمله فيهم من اكله (لحقهم ) في السفر ..

12- ايه انطباع ضحى ورايها عن الاتى اسمائهم (بمضوعية وشفافية ..... راى فنى محايد) ايوة اللى درستيه فى مراجعة سنة تالتة :blush2:

شكلك كنت دفعتي ولا ايه .. الله يرحمه كان بيدرسهالنا دكتور سناء ( ثناء ) كمدرس مساعد وعلى فكره جبت فيها درجه كويسه اوي .. من المواد القليله الي حبيتها في تجاره .. ماعلينا

هعلق بس على الناس الي معلقتش عليهم قبل كده ..

العنبى

ابن حلال ولولا خايفه يزعل من كلامي كنت نصحته يكتب في امور جاده اكثر .. لا اقصد شيء على فكره او موضع بعينه لكن هو انطباع عام

شيكو

نموذج للشابه المصرية بكل احلامها وطموحاتها وطريقة تفكيرها وكذلك ( مصطلحاتها ) .. نفس الشيء بالنسبة لرضوى .

حسام يوسف

خرج ولم يعد ..

الرفاعى

الراجل قايل عني بقين حلوين من شويه فاكيد معرفش عنه غير كل خير .. على فكره من الناس الي بحترم رايها و لا اذكر اني اختلفت معاه قبل كده

عمدة

ذكي جدا .. طموح جدا .. واحتمال كبير يبقى حاجه كبيرة .. بس لو يبطل يبص تحت رجليه

13- ضحى امتى بتقلب الترابيزة وتقول يووووووووووه زهقت بقى انا عايزة ارتاح............ وايه الخطوات اللى بتعملها بعد متقلب الترابيزة عشان تبقى satisfied or comfotable

على فكره انا نفسي قصير وده عيب اكتشفته مؤخرا ..

بقلب الترابيزه لما بتعب بجد واكتشف ان تعبي بيروح على الارض

بعمل ايه عشان ارتاح اني مبصش لورا ولا افكر في الي حصل وانما هعمل ايه جديد بعد قررت التوقف عن القديم..

14- ضحى ..... مفيش حد بيدخل كلية الا بيطلع بيها بحجات حلوة وحجات ممكن متكونيش راضية عنها.

ايه ايه الحجات الحلوة والحجات اللى انت مش راضية عنها دى

زمان كنت بقول اني متعلمتش في تجاره العلم وانما الدنيا ..

انت عارف الدراسه عندنا مكانتش بتاخذ وقتنا كله .. وبالتالي الواحد كان فاضي معظم السنة

تعلمت في تجاره اللبس والاهتمام بالشكل وازاي اكون ( ستايل )

وتعلمت برضه من مراقبة الي حوالي حقائق كتير عن الناس والي جوا نفسهم وعلاقته بالي خارجها

لما مرت السنين ومؤخرا بس اكتشفت اني وعلى عكس ماكنت متصوره اتعلمت برضه علم الى حد ما .. نافع

يعني كنت فاكره ان الحاجات الي بعملها عشان ادبر مصروف البيت او اظبط ميزانيتي دي حاجات بديهيه يعني كل الستات بتعرفها .. اتضح ان دي مش بديهيه ولا فطرة وانما حاجه مكتسبه نتيجه طبيعه دراستي في فترة حساسه جدا من عمر البني آدم صعب اوي ينسى الي تعلمه فيها حتى لو بدى له انه نسيه

15- ضحى دراستها مالية واقتصاد وادارة وبتهوى الرسم والكتابة وبتشتغل فى البرمجة والداتا بيز ورجعت من تانى تقرا اقتصاد ومحاسبة وحودت شوية عالالمانى ثم اضطرت انها تراجع الجافا (مش عارف نسيت حاجة ولا اي) ............ هو ده عدم وضوح الهدف ولا تناغم معرفى ولا ناوية على ايه بالظبط

وتفتكرى ضحى لوكانت ركزت فى حاجة واحدة بس من اللى فاتت كانت تحب تركز على ايه وكانت هتوصلها لايه

مش مستغربه سؤالك لاني نفسي كنت بستغرب لما نقرأ في سيرة العلماء زمان وتلاقي مثلا ابن سينا ولا الرازي نابغ في الطب والفلك بل والشعر والنثر في احيان تانيه .. كنت بتعجب ايه علاقه ده بده .. بس بعدين لما الواحد كبر اكتشفت انك وطالما ملكش منهج معين تلتزم بيه فانت ولما تحس انك عرفت في مجال ما وخلاص استوعبت كل الي انقال فيه بتقلب بقى على حاجه تانيه تتعلمها .. امال يعني هتقعد فاضي ؟

بالنسبة لي كان في ظروف خاصه جدا للتقلب الي حضرتك ذكرته ..

بدايه فانا خريجه محاسبة مش ماليه ولا ادارة .. مكنتش بحب المحاسبة ابدا يجوز لانها انفرضت علي .. من ثانوي وانا بحب جدا الكمبيوتر والبرمجه سافرت السعوديه وصادف اني لقيت شغل كمدربة حاسب ولقيت نفسي في المجال ده وقررت اني هكمل فيه ..

قبل مااسافر كنت مسجله في دبلومه ضرايب لان دي الي كانت متاحه وقتها بعد ماكل التخصصات قفلت .. سبتها ومدخلتهاش اصلا .. بعد مارجعت سجلت في دبلومه احصاء وحاسب آلي لان هو ده المجال الاقرب للي بحبه

اجلت السنة الثانيه من الدبلومه لانهم قبلوني في منحه وزارة الاتصالات الي كان من ضمن الي درسته فيها الجافا .. بصراحه الدكتور الي كان بيدرسها لنا مكانش بيعرف يشرح كويس فبقيت اسيب المحاضرة واقعد ارسم بورتريهات للكلاس لغايه مالدكتور قفشني .. جاب لي صورة ابنه عشان ارسمهوله :happy:

طلعت من الكورس وانا بكره الجافا والي اخترعها ومكملتش فيها ..

لما جيت السعوديه تاني من سنتين مكنتش جايه اشتغل ولا استقر .. كنت جايه استجم .. لظروف خاصه كان لازم افضل هنا كام شهر قبل ماانزل مصر تاني .. اتعرضت علي فرصة عمل في مجال تدريس المحاسبه والاقتصاد .. قلت وماله ليه لاه .. فرصه اشغل نفسي في حاجه عشان مفكرش في شيء يزعلني وفي نفس الوقت فلوس جايه لي استفيد منها

طبعا عشان ادرس ماده لازم اكون عرفاها من الالف للياء عشان لو انسألت في حاجه اكون ملمه بيها تماما مش بس حافظه كلمتين هقولهم وخلاص .. رحت جبت الكتب ورجعت ذاكرت من اول وجديد .. الحق يقال اني ملقيتش صعوبه في استعاده المعلومات الي مكنتش اعرف اصلا اني عرفاها ..

سبحان الله كل الي اخذته في الكلية وكنت فاكره ملوش لازمه او اني نسيته رجعت استرجعته تاني لما ذاكرت وبقيت افتكر كلام الدكاتره بتوعنا وحتى الامثلة والتشبيهات الي كانوا بيقولوها رجعت استعدتها تاني ..

خلصت بقى المرحلة دي وقررت اننا ندي نفسنا فرصة عشان نستقر هنا .. قلت وطالما فيها استقرار يبقى لازم اشوف شغل احسن براتب افضل .. انعرض علي موضوع الجافا .. كنت مش متمكنه منها طبعا. .رفضت الفكره في البدايه بس لما لقيت انه مجال مطلوب وفلوسه مضمونه اكتر ولما كنت محتاجه شيء زي كده قررت اخوض التجربة .. ولاني كنت نسياها تماما ولاني ممارستهاش اصلا قبل كده فكان لازم ارجع اذاكرها تاني من اول وجديد لان عيب البرمجه انك لو كلمه وحده مش عارفها او كاتبها غلط هتضرب لك الكود كله ده غير انك عشان تصحح لغيرك الكود بتاعه لازم تبقى عارف الطرق المختلفه لكتابته لان ممكن جدا هو كاتبه صح بس مش بالطريقة الي انت حافظها او متبرمج انت شخصيا عليها ..

الكلام ده كان السنة الي فاتت

السنة دي انا بقى فاضيه معنديش حاجه وخلاص راجعه مصر .. عندي شهرين فاضيه فيهم .. مش هقولك اني من النوع الي بحب استغل وقتي اقصى استغلال .. ياريت .. ولكن بحب اوي لما ابص لورا محسش ان الفترة دي من حياتي راحت بدون فايده او كان المفروض اعمل حاجه ومعملتهاش

( طقت ) في دماغي اتعلم لغه جديده ..انا بعرف انجليزي كويس الحمد لله مفيش جديد ممكن اضيفه في الجزئيه دي .. طيب ليه متعلمش الالماني ؟

بصراحه اخذتها تحدي وبدات فيه ..

مخبيش عليك اللغه صعبه فعلا ..بل مقرفه

وواجهتني مرتين تلاته فيها كنت قررت ابطل خلاص واتوقف بس بقيت اقاوم وضغطت على نفسي .. قلت لو نجحت وتخطيت العقبه دي ممكن انجح في اي حاجه تانيه ولو توقفت هتبقى نقطه ضعف هفكر نفسي بيها كل مااجي اعمل شيء جديد اني مستسلمه فبلاش اتعب نفسي في التجربه ..

الحمد لله قطعت الى حد ما شوط معقول والى حد ما ممكن اعبر عن نفسي بالالماني وممكن افهم بعض اجزاء حوار دائرة بيه .. طبعا مازال امامي الكثير بس لو اعتبرت نفسي في بدايه فهي بدايه مش بطاله من وجهة نظري

بس ياسيدي دي القصة ..

16 - دكتور جامعى او دكتورة بيثقوا فى ضحى جدا و امانتها واطلاعها ..... اتصلوا بيها يا ضحى عايزينك تصححى اجابات الطلبة فى سنة اولى (مادة مبادئ محاسبة ) وهنديكى نموذج تمشى عليه

شعورك هيبقى ايه وهتبقى ولا هترفضى ورايك ايه فى الموضوع د

على حسب الناس دي كلمتني ليه

لو مزنوقين فعلا ومحتاجين مساعده هبقى مبسوطه اني بساعد .. مش هحس بغرابه لاني في حياتي درست يجي الف ولا الفين طالب وطالبه وصححت ووضعت امتحانات كتير لا اذكر عددها ..

اما لو المسالة استسهال مثلا او بيشتروا دماغهم فجايبين حد يصحح بدالهم فطبعا هرفض ..

17- ساعة احداث ابريل 6 ضحى كانت فين وايه تحليلك للى حصل وتفتكرى ساعتها ان مصر كانت فى خطر

مش عارفه بس مبصدقش ان الحاجات من هذا النوع ممكن تغير الوضع الي احنا فيه

مبدئي ان التغيير بيأتي من تحت مش من فوق ..

[لماضة مصرية جدا]

السلام عليكم و رحمة الله و بركاته

مش عارفة ااقولك ايه

بس بجد و الله مستمتعة جدا بكل كلمة بتقوليها (اينعم زوعلانة ع الكلام اللي راح)....بس الكلام اللي طلع م القلب...وصل للقلب بسرعة

بجد يا ضحي انا مبسوطة آآآآآآد البحر لما قولتي اني اشبهك....يبقي ليا في ذمتك انك تنصحيني بقي....بما انك ركبتي آلة الزمن....و نطيتي ع المستقبل....اكسبي فيا ثواب

ع فكرة بقي انا محتاجة اقرا الاجابات اكتر من مرة......فيها حاجات كتير مستخبية ورا الكلمات

يا رب يسعد قلبك

متخليكي معانا شوية.... :blush2:

صباااااااااااااااااحك كلمات...ليست كالكلمات

[doha]

11- لماضة....او ريهام.....او البنت اللي اتكعبلت في المحاورات من قيمة مش عارفة اد ايه....بس كل يوم الصبح تبص للمداخلات بتوعوها و تقول هو انا هنا بعمل ايه.......انصحيها نصيحة....من قلبك اوي؟؟؟

بلاش موضوع القلب ده عشان آخر مرة كتبت لك فيها من قلبي و( حشاشة يوفي ) صفحتين تلاته فولسكاب وخمسة متر دمور وكل ده طار في الهوى شاشي ..

بصي يالماضه يابنتي ( وش زوزو نبيل في ونيس )

مهما كانت قعدتك على النت دلوقت واخده وقتك ومهما بدت لك قعده ( ابدية ) مش هتفكي منها فكوني على ثقة دي مرحلة مؤقته من حياتك هتعدي زي غيرها ماعدى وهيجي وقت هتبقى النت دي عندك زي قراءة جريده الاهرام كده عند كثير من الناس .. كانت عاده حميده ـ تحولت الى ذكريات ..

استغلي وقتك الي بتقضيه دلوقت على النت في حاجة من اثنين .. ياتتعلمي حاجه .. ياتعلمي حد حاجه .. اي مداخله تكتبيها او تقريها متكونش بتحقق المعادله فكري مرتين قبل ماتتميها للنهاية ..

واخيرا نصيحه بجد .. اوعي تخلي لماضه .. تنسيكي ريهام ..

12- لو انتي بقي عندك اوبشن تبقي ولد.......يا تري هتختاريه......و هتبقي ملامح شخصيتك ساعتها ايه؟؟؟

زمان وانا صغيره كنت زعلانه اني مطلعتش ولد .. كنت كتير بقول يابخت الرجاله اصل الاسلام معمول عشانهم .. كنت فاكره ان دي حقيقة وان الراجل الدنيا دي بتاعته يخرج بكيفه ويطلع بكيفه يلبس الي على كيفه ويتصرف على كيف كيفه .. مكنتش اعرف ان الانطباع ده مش لان الاسلام دين ذكوري ولكن لان المجتمع الي تربيت فيه هو الي كده مش اكتر ..

لما كبرت طبعا غيرت وجهة نظري تماما ولو في اوبشن اني اتحول لراجل عمري ماهستخدمه .. كده رضى اوي ..

13- ايه احساسك لما بتنزلي مصر.......طب ليه.....و بتعملي ايه عشان تطلعي بره الاحساس ده؟؟؟.....او لو حلو.....بتصدقي بجد...و لا بتصبري نفسك؟

اول حاجه بتقابلني لما بنزل مصر ( النفس ) الي بسحبه وانا خارجه من المطار ..

جو غريب فيه شيء ..

مش هقول تراب ولا هقول غبار ولا برضه هقول نسيم ولا هقول انتعاش .. وانما حاجه كده الواحد بيسحبها بتملا صدره براحه او تقدري تقولي بتحسي انك بتتنفسي نفس بجد ..

بتفضل العربية ماشية ماشيه .. وبنام واصحى وارجع انام تاني .. ثلاث ساعات لغايه مانعدي بنها ( العقبه الكؤود ) ونبدأ نقترب من البيت ..

شويه شويه تلاقي الدنيا بدت تتوسخ كده .. وتلاقي العمارات على الطريق السريع في الجانبين لونها مغبر كده . . تعرفي انك على مدخل المدينة ..

فجأه تلاقي وكأن ماسورة بشر ضربت في الشارع .. وناس كتيييييييييييير متعرفيش جايه منين .. في البدايه ولو بقالي فترة مرجعتش مصر بفتكر النهرده مولد ولا حاجه .. بعدين ابدأ استعيد وعيي واعرف ان ده الطبيعي بس انا الي بقالي فترة في الشوارع ( الهس ) حيث اللابشر ..

بعد بقى السلامات والكلامات والذي منه الواحد بيكون بقاله يومين منامش فبنام لي يومين تلاته كده ..

في اول يوم تحسي وانتي ماشيه ان رجلك بتغوص في الارض مش عارفه ليه ..

اكتر حاجه بجد صعوبه شويه في التاقلم معاها استخدام حنفية المية او مكان مقبس النور .. كل الحاجات دي بتبقى ايدي متبرمجه عليها وبحس ملمسها غريب او بخطيء مكانها في اول يوم لي او يومين ..

وتمر الايام وابدأ اتعود على كوني ( مواطن ) وورايا التزامات فابدأ ادور بقى على تخليص الاوراق او حتى شراء الخضار من السوق .. ابدأ امشي في الشارع والاحظ اختفاء الرصيف .. وابدأ اضطر اركب التاكسيات واول مابيلفت نظري اني ( بغطس ) في الكنبة الورانية معرفش ليه .. وابدأ اذوب في افواج البشر الامنتهيه الي بتموج في شوارع مصر كل يوم ..

مبكونش متضايقة عاده لما بكون عايشه في مصر .. وبرضه مبكونش فرحانه ..

الاستقرار عندي هو اكثر شيء يخليني مبسوطه وطالما انا جايه من سفر او طالعه على سفر فبتبقى الامور بالنسبة لي مقلقه .. كل مالاقي حاجه حلوة مبحاولش افرح بيها لانها ( مؤقته ) وكل مابلاقي حاجه وحشه مبتهمنيش بقى على اساس اني خلاص ( فيتهالكم مخضرة )

14- شخصية اثرت فيكي اوي في حياتك....ممكن م الاسرة...ممكن وش حد من الحياة.....ممكن كتابة عضو في عالم المنتديات الافتراضي؟

زوجه احد اقاربنا ..

ست عظيمه ربنا يديلها الصحه يارب .. من الناس القلائل الي قابلتهم و بيصدق فيهم قول ربنا (( ومن يؤت الحكمة فقد اوتي خيرا كثيرا )) .

هي طبيبه .. سابت شغلها من سنين طويلة عشان تتفرغ لتربية ابنائها .. ولما الابناء دول كبروا واتجوزا رجعت شغلها تاني وفي نفس الوقت بتؤدي رساله اجتماعيه فبتلقي دروس او محاضرات دينية تربويه من وقت للتاني بشكل مجاني طبعا ..

ذكية جدا .. متدينة جدا .. حكيمة جدا .. قلبها ابيض معندهاش وقت تضيعه في النميمه او القيل والقال ولا فيما لاينفع

عمري في حياتي ماجلست معاها غير لازم اخرج بفايده من جلوسي ده .. معلومه مفيده .. راي صائب .. وجهة نظر تستحق الوقوف امامها ..

متعمقه في الدين وعندها مكتبة اسلامية كاملة لدرجه اني لما بعوز اعرف فتوى من شخص ثقة بسألها ..

لما بروح ازورهم ببقى مش ملاحقه في اسئلتي لها في كل المجالات لان الدقيقة معاها تستحق واي كان الي هتقوله اكيد هيكون ذو فائده ..

بيتها قمه في الترتيب والنظام .. ابنائها كانوا دائما الاوائل على مدرستهم .. طبخها لا يعلى عليه ..

بجد ست عظيمه ربنا يكرمها دائما وابدا ومثال يستحق ان الواحد يتوقف عنده ويحتذي بيه ..

15- لما بتبقي مع ربنا في جوف الليل....ايه الدعوة اللي بتبقي من قلبك اوي....و بتبكي فيها؟

( --------- )

16- في توبيك لحظات غيرت حياتنا.....ذكرتي لحظة فارقة اوي معاكي.....يا تري بقيتي بعديها اكثر زهدا....و لا اكثر يقينا و لا اكثر تسليما....و لا احتجتي وقت عشان تستوعبي و تعيدي حساباتك الايمانية؟

ليه بس كل شويه تفكروني ..

لاه بقيت اكثر يقينا واقل ( تحديدا ) في الطلب ..

بقيت ببص للامور من منظور تاني مختلف شويه وبقيسها بمعيار تاني اكثر دقة ..

زمان كان ممكن ادعي واقول ربنا مستجابش .. النهرده بدعي وانا عارفه انه استجاب .. الافضل .. ولو الي قلته بالظبط محصلش يبقى بكل تاكيد مش هو الافضل ..

لاانكر اني اصبحت فيما بعد اكثر زهدا في حاجات كتير ويمكن اكثر اهتماما بحاجات كتير .. ويمكن برضه اكثر ( حده ) في التعامل مع بعض الناس احيانا .. بس مكانتش اللحظه دي تحديدا هي السبب ولكن ماتبعها ..

عامه اتوقع ان السنتين الي فاتوا لغايه دلوقت ومنذ تلك اللحظه فرقوا معايا واعتقد اني بقيت .. افضل ..

17- بنوتك........كبرت ربنا يبارك لك فيها....و دخلت عالم المنتديات....و في يوم قالتلك...ماما العضو "نوسو الحندوسو" اللي في منتدي "انا بآكل شطة و عندي زوغطة".... mf_p: ....عايز يتقدملي....احساسك بقي في اللحظة التاريخية دي ايه....و هتتصرفي ازاي.....(ابوس القدم اوعي ترصي كلام في قوالب.....سيبي نفسك كدهون....و امسكي المايك....و عيشي)

فكرتيني بمرة كان عمر بنتي تقريبا سنتين .. وكنا معزومين في مناسبة خطوبة وكنت بلبسها فستان افراح فخم كده و( مفرح ) ..

التفتت عشان اقفل لها السوسته .. ويادوب بقفلها.. ولقيت الفستان وكأنه متفصل عليها .. وحسيت كأنها عروسه بجد ..

بصراحه عيني دمعت ..

احساس غريب اول مرة اجربه ..

برغم اني وانا صغيره مكانش فستان الفرح احد احلامي .. حتى وانا مخطوبة مكنتش بوليه اهتمام كبير (( وان كان ده لاينفي اني يوم مارحت اشتري الفستان قبل الفرح وقسته وطلع مظبوط علي مكانش هاين علي اخلعه معرفش ليه lol: ))

برغم كل ده الا اني حسيت بسعاده كبيرة اوي لمجرد تخيل ان بنتي كبرت وبقت عروسه .. وتمنيت يجي اليوم ده فعلا الي البسها بنفسي فستان فرح وافرح بيها ..

يارب ..

كنتي هتنسيني .. ايوه لو نوسو الحندوسو تقدم لها من المنتديات فاحتمال اوافق لان احتمال وقتها يكون الجواز عن طريق النت شيء طبيعي ويمكن كمان يكون هو جواز الصالونات بتاع تلك الايام ..

18- فكرتي تسلكي سلك الدعاة.....و يا تري...ايه المنهجية بتاعتك؟

الصراحه لاه ..

انا لا اصلح داعية دينية وان كنت بحب اني اتكلم في امور اجتماعيه او اي حاجه احس انها ممكن تحدث تغيير للافضل .

اما منهجي فهو ان قامت الساعه وفي يد احدكم فسيله فان استطاع ان لايقوم حتى يزرعها فليزرعها ..

فوتك بعافية[/

quote]

:Exclam:

[اغابي]

ايه يا ضحى الشخصية الجميلة الشاملة دى

اقول ايه ولا ايه ولا ايه mfb:

تسجيل اعجاب بشخصيتك يا ضحى وطريقة تفكيرك

رغم فاتك انى اسخنهم عليكي بسبب انى مشغولة اليومين دوول - بس الحمدالله هما مش محتاجين تسخين

اكملى يا بنت النيل ولا بلاش النيل لانه بقى شركة افريقية دلوقتى :lol:

طب خلاص اكملى يا بنت مصر بلادي .

اغابي

[doha]

لاه اكمل ايه بقى يااغابي انا شطبت حتتين المواعين الي كانوا تحت ايدي خلاص الحمد لله ..

جبرنا ..

[عماد حمدي]

اول مرة أخش الموضوع دا وبصراحة إنبهرت ...

تسجيل متابعة ,,