كرسي الأعتراف 2 ( حاليآ الفاضلة Dreamwithme )

[mekkawy]

يا جدعان فيه قانـــــــــــــــون

اخونا هيرو راكب راكب في العنبوكة .. لكن لازم نلتزم باة بالقوانين .. و القانون المرة دي بمبي (أنثى يعني) و المرة الجاية لبني (هيرو يعني)

أنا بيس

إنتوا بيس ؟؟

مكاوى

[hOuSsAm]

يا جدعان فيه قانـــــــــــــــون

اخونا هيرو راكب راكب في العنبوكة .. لكن لازم نلتزم باة بالقوانين .. و القانون المرة دي بمبي (أنثى يعني) و المرة الجاية لبني (هيرو يعني)

أنا بيس

إنتوا بيس ؟؟

مكاوى

ياعمى عديها المرة دى

البند ده فى الدستور محتاج انه يتعدل لان الرجالة هنا اكتر بكتير

وكدة بقالنا اكتر من اسبوعين متعطلين وبنبحث عن حد نكهربه

بص يابن الحلال انت يا تجيب البمبى اللى بتقول عليه

لتدى صوتك لهيرو وبكدة نبقى كتفناه

بجد هتستمتع اوى بهيرو وهتكتشف فيه حجات عمرك مكنت متخيلها :cry1:

[mekkawy]

أنا بيــــــــــــــــــس

اركب يا عم هيرو

نستفتح كدة ع السريع ولا نلم رواد العنبوكة الأول ؟؟

______________________________________________

حسام أنا سايبك عشان ضرسك و عشان عنيك و عشان الطيران السعودي و عشان نازل أجازة و شوية الحاجات اللي فوق بعضيها دي .. لما ترجع إن شاء الله هأعملك عنبوكة تفصيل يا معلم .. تيك كير بأة و كل كويس في مصر

مكاوى

[عبير يونس]

أنا جيت يا جودعان

و نفسي اتكهرب موت

على فكرة

انا جاية بقوة القانون

انا من المرشحين

و ده حقي الدستوري

آه

الكهرباء حق لكل مواطن

و الا اكمني متغربة يعني حتسلبوني هذا الحق

:lol:

و

كمان انا بمبي

و كمان هي دي فرصتكم

لأني كمان اسبوعين حأنشغل جدا جدا

و حأروح أسجل غياب عند فتفوتة

يللا بسرعة

مش حناخد وقت

لانكم غالباعارفين كل حاجة عني

فاضل بيانات صغيرة حاملاها و اتكهرب شوية و اقوم

يللا

بس انجزوا بسرعة بليز

مصرية ...انجز في الوينجز

[mekkawy]

و مع ظهور الفاضلة مصرية ممتغربة و مطالبتها بحقها الدستوري (عنبوكة لكل مواطن) و كونها "بمبي" و سيتحول للون الأزرق لاحقاً بفعل الكهربا .. فـ.....

انا بيس :lol:

نقول على بركة الله؟؟

حد يلا من البنات يتفضل ينزل يكتف و يربط و يوصل السلوك و الفيوزات بالمخ دايركت

الله المستعان

طبتم و طاب ممشاكم و تبوأتم من الجنة منزلاً .. ايــــــــــــه كانت طيبة و الله

مكاوى

[mekkawy]

تسخين خفيف و إحماء ع الماشي

الفاضلة مصرية متغربة .. انا مش هأسأل أسئلة النيابة الاسم و السن العنوان و المؤهل .. هنسيب دي لإخواتك عضوات العصابة .. ندخل في الصميم

1 - متى تعرفتِ إلى محاورات المصريين و هل كانت معرفة تبادل منفعة أم منفعة بس أم وقت .. ماذا تعني محاورات المصريين لكِ ؟

2 - الغربة .. اختيار وحيد ولا اختيار من بين اختيارات كثيرة ولا إجبار؟

3 - توجهاتك ما شاء الله تتسم بالإيجابية .. ايه سر الإيجابية دي ... دراسة ... فطرة ... هدف .. استراتيجية ؟

4 - ما هو منهجك الديني .. يعني ايه فكرك في الدين لنفسك و للمجتمع و للدين نفسه؟ لا أقصد المسميات الانقسامية للجماعات المختلفة .. أقصد هدفك و طريقتك؟

5 - مصرية متغربة في مكة .. فهل لذلك أثر ؟ إيجابي أم سلبي؟

6 - البنوتة القمر كبرت و عاوزة تشتغل في سوبرماركت .. على اعتبار إننا في بيئة تسمح بكدة .. ما الموقف؟

7 - الواد الحليوة كبر و شنبه خط و صوته طخن و قالك هأروح اشتغل يا ماما نقاش في الاجازة .. صبي نقاش مع واحد صنايعي كويس ... هتوافقي ؟

8 - مصر لسة عايشة ؟ لو لأ .. طب ايه ؟ لو اه .. تفتكري هتكمل ؟

9 - عبر بكلمة أو جملة أو صفحة من احساسك عن:

الغربة

الاسلام

الأسرة

الذرية

المال

الصداقة

الأب

الألم

عمل المرأة

الزواج

الإيجابية

10 - تشربي شاي ؟

مكاوى .. إحماءات و لاحقاً الاغماءات

[اغابي]

أنا جيت يا جودعان

و نفسي اتكهرب موت

على فكرة

انا جاية بقوة القانون

انا من المرشحين

و ده حقي الدستوري

آه

الكهرباء حق لكل مواطن

و الا اكمني متغربة يعني حتسلبوني هذا الحق

:rolleyes:

مصرية ...انجز في الوينجز

اموت فى احترام القانون والدستور - يا حنان الام :lol:

كله يجمع يا جدعووووان - بسرعة يا جدعوان - قبل ما يعقل يا جدعون - مين يدخل المزاد بعد مكاوى

طيب

انت جيتى يا شابة - ما تخافيش على راى ضحى - دا احنا حنريحوكى

هات الشرباات يا حسب الله للشابة :happy:

الا هو الكردان داه حقيقي ولا قشرة :blink:

اغابي

الوان الطيف

[عبير يونس]

تسخين خفيف و إحماء ع الماشي

الفاضلة مصرية متغربة .. انا مش هأسأل أسئلة النيابة الاسم و السن العنوان و المؤهل .. هنسيب دي لإخواتك عضوات العصابة .. ندخل في الصميم

1 - متى تعرفتِ إلى محاورات المصريين و هل كانت معرفة تبادل منفعة أم منفعة بس أم وقت .. ماذا تعني محاورات المصريين لكِ ؟

انا اتعرفت على المحاورات في صيف 2008

بس بدأت أشارك بعد فترة

محاورات المصريين هي بيت العيلة اللي انا محرومة منه

فيه بابا ماما واخواتي

2 - الغربة .. اختيار وحيد ولا اختيار من بين اختيارات كثيرة ولا إجبار؟

مع أهلي زمان مكانش اختيار

بس لما اتجوزت كان اختياري مع زوجي

و بالتحديد مكة

جت لي بعد ما كنت قاعدة يوم عرفة باتفرج عليه في التلفزيون

و سمعت في الدعاء اللي بيقوله المذيع ما معناه ان بيت الله الحرام لا يأتي إليه إلا من دعاه رب البيت

فتأثرت و قلت لربنا

يعني انت مش عايزني يارب

يوم عرفة اللي بعده كنت في مكة مع زوجي وأولادي أؤدي فريضة الحج

و منذ ثمان سنوات و أنا مقيمة هنا و أحمد الله تعالى على استضافته لي كل هذه المدة

3 - توجهاتك ما شاء الله تتسم بالإيجابية .. ايه سر الإيجابية دي ... دراسة ... فطرة ... هدف .. استراتيجية ؟

هي كل ده

أنا دراستي بكالوريوس تجارة

و طبعا

درست إدارة و تنمية بشرية و علوم سلوكية

و هي فطرة طبعا

للبشر كلهم

بس الظروف المحيطة يا بتنميها يا بتطمسها بالمرة

و هي هدف

لإن كل ما كنت إيجابية كل ما زادت قدراتي على مواجهة التحديات المختلفة في الحياة

و هي استراتيجية

لتحقيق الأهداف المختلفة في الحياة

4 - ما هو منهجك الديني .. يعني ايه فكرك في الدين لنفسك و للمجتمع و للدين نفسه؟ لا أقصد المسميات الانقسامية للجماعات المختلفة .. أقصد هدفك و طريقتك؟

أنا باعتبر الدين هو كتيب التعليمات ( اليوزر مانيوال) بتاع البني آدم و اللي عمله الصانع الخالق العظيم

و ارسل الرسل كمرشدين لكيفية اتباع التعليمات

و طبعا من غير اتباع تعليمات الكتيب و من غير المرشد

الجهاز يخرب طبعا

و بأعتبر الاسلام هو ال فيرجين الحديثة و الختامية اللي لازم الجهاز يمشي

عليها لضمان أفضل النتائج

5 - مصرية متغربة في مكة .. فهل لذلك أثر ؟ إيجابي أم سلبي؟

حكاية مكة معايا كبيرة

و تجربة الاقامة فيها تجربة فريدة مليئة بالدروس و التحديات

و على فكرة لازم نفرق بين الحرم و البلد نفسها

و بأعتبر إنه من الظلم أن نحاسب أهلها و كأنهم من الصحابة

فهم أناس طبيعيون في بلد كأي بلد و فيهم الكويس و فيهم الوحش

6 - البنوتة القمر كبرت و عاوزة تشتغل في سوبرماركت .. على اعتبار إننا في بيئة تسمح بكدة .. ما الموقف؟

اذا كان قصدك على رأيي في الشغل بشكل عام

فأنا شايفاه حاجة جميلة

و عن نفسي اتعلمت كتير من الشغل

أما اذا كان قصدك

في سوبر ماركت بالتحديد

فعن نفسي

أنا ممكن اشتغل في سوبر ماركت عادي

انما بنتي

مش عارفة

صعب

ما يهونش عليا تتبهدل

بس في بنات جدعان اوي و بميت راجل و ممكن يفوتوا في الحديد

زيي مثلا

:blink:

انما بنتي

مش عارفة

يمكن لو كنا في كندا مثلا أوافق

انما في مصر

و مع الأوضاع الحالية

لو رجعت

مش حأخللي بنتي تمشي لوحدها في الشارع

مش تشتغل في سوبر ماركت

:happy:

7 - الواد الحليوة كبر و شنبه خط و صوته طخن و قالك هأروح اشتغل يا ماما نقاش في الاجازة .. صبي نقاش مع واحد صنايعي كويس ... هتوافقي ؟

و ماله

ياريت

الراجل لازم يتعلم كل حاجة يقدر يتعلمها

و يمر بتجارب مختلفة لشحذ شخصيته

ده ما ينفعش أخاف عليه من البهدلة

ده لازم يتعجن في الشغل

و يتعلم تحمل المسئولية

و يذوق الكسب من عمل يده

بتفرق كتير بعد كده

8 - مصر لسة عايشة ؟ لو لأ .. طب ايه ؟ لو اه .. تفتكري هتكمل ؟

طبعا عايشة

و موجودة بناسها الطيبين إلى أن يرث الله الأرض ومن عليها

ما يحدث الآن غمامة

ستنقشع قريبا جدا بإذن الله تعالى

يتبع...

تم التعديل لتغيير لون الاجابات

ياريت

فضلا لا أمرا

الأسئلة تبقى باللون الأحمر

عشان أجاوب بالأزرق

:rolleyes:

تم تعديل 22 يونيو 2010 بواسطة مصرية متغربة

[عبير يونس]

9 - عبر بكلمة أو جملة أو صفحة من احساسك عن:

الغربة

أقسى غربة هي غربة النفس

أما غربة المكان فطبيعتنا كبشر مجبولة على التكيف مع كل جديد

مع اعتبار اختلاف الوقت المستغرق لاتمام عملية التكيف من شخص لآخر

الاسلام

أحدث و أكمل نسخة من اليوزر جايد بتاع الانسان

و باتمنى يوصل لأكبر عدد ممكن من البشر

خصوصا اللي ما يعرفوش عنه أي حاجة

و ذنبهم في رقابنا جميعا

الأسرة

صمام الأمان

الذرية

أجمل النعم

و زينة الحياة الدنيا

مع المال طبعا

:)

المال

وسيلة

و لا يجب اعتباره غاية مطلقا

الصداقة

نادرة

و لكنها ليست مستحيلة

و الأخوّة في الله أفضل و أعلى

الأب

أبي الله يرحمه

الألم

تجرعه ضرورة لمعرفة طعم السعادة

كما أنه نعمة كبيرة

فهو انذار بأن هناك شيء ما في خطر

عمل المرأة

ده موضوع كبير يافندم

قبل ما أجاوب

لازم أعرف ايه دوافع المرأة للعمل

عن نفسي

كنت أعمل

و ان شاء الله أعود للعمل قريبا

و لكن أبنائي لهم الأولوية

و قد حدث هذا مرات عديدة

فقد انقطعت عن العمل بسبب أولادي

و لكني كنت أعمل في المنزل

دروس و ترجمة

في رأيي

ايه المانع ان المرأة تستفيد من امكانياتها و قدرتها على العمل لزيادة دخل الأسرة

بشرط الا يطغى ذلك على الأبناء

في ناس عندها طاقة عالية بفضل الله

و ناس طاقتها يدوب على قد اللي حواليها

مش قلت لك الموضوع كبير

wst::

الزواج

ضرورة و أمان

يارب يجوز كل اخواني و أخواتي في المحاورات و يرزقهم الشريك أو الشريكة الصالحة و الذرية الصالحة

اتجوز الأول يا حسام قبل تشطيب الشقة

:lol:

الإيجابية

منهج حياة

10 - تشربي شاي ؟

ممكن نسكافيه

اذا بتريد

:lol:

مكاوى .. إحماءات و لاحقاً الاغماءات

[عبير يونس]

أنا جيت يا جودعان

و نفسي اتكهرب موت

على فكرة

انا جاية بقوة القانون

انا من المرشحين

و ده حقي الدستوري

آه

الكهرباء حق لكل مواطن

و الا اكمني متغربة يعني حتسلبوني هذا الحق

wst::

مصرية ...انجز في الوينجز

اموت فى احترام القانون والدستور - يا حنان الام :lol:

كله يجمع يا جدعووووان - بسرعة يا جدعوان - قبل ما يعقل يا جدعون - مين يدخل المزاد بعد مكاوى

طيب

انت جيتى يا شابة - ما تخافيش على راى ضحى - دا احنا حنريحوكى

هات الشرباات يا حسب الله للشابة :)

الا هو الكردان داه حقيقي ولا قشرة :lol:

اغابي

الوان الطيف

اوه

الكردان ده من بيير كردان

:lol:

[mekkawy]

ممممم

كويس كبداية

و لو إن فيه بعض الاجابات الدبلوماسية اللي ما كيفتنيش :lol:

لكن ممكن نسيبك تعيشي و نرفع الفولت شوية

مكاوى

[عبير يونس]

ممممم

كويس كبداية

و لو إن فيه بعض الاجابات الدبلوماسية اللي ما كيفتنيش :lol:

لكن ممكن نسيبك تعيشي و نرفع الفولت شوية

مكاوى

فين الدبلوماسية دي يا معلم؟؟؟

و بعدين ايه نسيبك تعيشي دي

انا جاية اتكهرب و بس

انا عارفة حقوقي يافندم

:)

والقانون ينص ....

ياربع ...يا تمن

wst::

مساك كهربا فولت عالي

احنا ولا يهمنا لا مؤاخذة

:lol:

[لماضة مصرية جدا]

السلام عليكم و رحمة الله و بركاته

حبيبة امها.....يا اخواتي بحبها....يا اخواتي....يا اخواتي... يا اخواتي بحبها...(وش صباح....و هي ماسكة بنوتة زي العسل و بتفعص فيها.....انا طبعا صبااااح :rolleyes: )

و ده كان السلام الجمهوري لكورسي الاعتراف.....و بعدين بقي ننزل برصة الندالة.....

1- كل واحد عنده لحظة كده في حياته حس انها فرقت معاه....مش لازم تكون غيرت مساره.....بس خلته يشوف امور اوضح...او يزهد في حاجات او يعيد ترتيب احساسه و افكاره....ايه بقي....؟؟؟

2- متابعة طبعا موضوع خالد....لو قولتلك انا مش هنزل مظاهرة....هل انا من وجهة نظرك انسانة سلبية؟؟؟ انا بس بحب اشتغل في مربع بتاعي....في منطقشتي....ده يبقي تخلي عن قضية ما مثلا؟؟؟...معاكي المكرفون.....و قدامك قورطة شباب اهه...ذيعي بقي؟؟

3- درستي تنمية بشرية......رائع.....قابلتي شاب او فتاة....انتي ترين فيهم خيرا كثيرا و لا نزكي علي الله احدا......لكن تحسي انهم بيعيشوا كده حياة عشوائية....يعني سايبين حياتهم للموجة منين ما توديهم..... يا تري...تصحي المارد اللي جواهم ازاي....من غير موعظة....من غير ما يحسوا ان اده جاي من براهم....؟؟؟

4- بتؤمني انك تحلمي حلم...و تصحي من النوم...تلاقيه بيتحقق زي ما هو......و تضحكي...لانك دلوقتي شايفاه واضح اوي......يا تري ده حصلك قبل كده؟؟؟ارغي بقي...كلنا لابسين زعابيط النوم و قاعدين اهه؟

5- حد من البشر فعلا انتي شايفة انه نموذج لحياتك (غير الرسول صلي الله عليه و سلم طبعا)......ممكن شخصية مشهورة....او انسان او انسانة انتي تعرفيهم بشكل شخصي؟ و يا تري ايه اللي بيميزهم اوي؟

6-...."إن ما تشعر به تجاه الاخرين.....سيعود اليك يوما ما" يا تري دي رسالة فيها مزيج من التفاؤل.....و لا تحذيرية......و لا خلاصة مواقف فوق بعضها و حسيتي بيها؟؟؟

7- آية قرآنية......او حكمة...تردديها دايما...و دايما بتلاقي فيها اجابة و خصوصا لما يبقي عندك لحظة...وهن.....حيرة...او لخبطة؟؟؟؟؟

8- بتلومي نفسك علي حاجة.......و مش قادرة تنسيها و لا تسامحي نفسك عليها.....يا تري ده احساس عشتيه......مش هحب اتقل و اقولك احكيه...لكن احب اعرف ازاي بتتصالحي معاه...او بتنيميه...او بتقنعيه...انه ينساكي؟؟؟؟

9- دخلتي بنتتك مدرسة اجنبية...و دخلت عليكي في يوم من الايام وقالتلك.....البنات في المدرسة بيعايروني ان معنديش بوي فريند...لاني محجبة......بنتك في سن 13...و انتي مربياها كويس...بس ده اول تحدي بتقع فيها....لانك بتربيها علي قيم ممكن متبقاش موجودة في مجتمع بره البيت....هتثبتيها إزاي؟؟؟

10- كملي الجمل اللي جاية دي

اكتشفت أن.................

أصعب احساس.....

و بقدر عليه لما...............

كله ...إلا...........

ممكن...اتغير...في حالة واحدة....الا و هي.......

نفسي اغير.................فيا

مساااكي

جمل

ممكن تكمل حاجات...ممكن تنور....حاجات...بس اكيد هتكون سبب في اقتراب اكثر

في أمان الله

[عبير يونس]

السلام عليكم و رحمة الله و بركاته

و عليكم السلام ورحمة الله و بركاته

أيوة هللو هللو

(وش هاني شاكر و هو بيقوهللي في سمايا هللي )

حبيبة امها.....يا اخواتي بحبها....يا اخواتي....يا اخواتي... يا اخواتي بحبها...(وش صباح....و هي ماسكة بنوتة زي العسل و بتفعص فيها.....انا طبعا صبااااح :rolleyes: )

و ده كان السلام الجمهوري لكورسي الاعتراف.....و بعدين بقي ننزل برصة الندالة.....

لا يا حبيبتي اسم الله عليكي من الندالة

و لا يهمك

انا داخلة هنا بكامل ارادتي الحرة المستقلة

1- كل واحد عنده لحظة كده في حياته حس انها فرقت معاه....مش لازم تكون غيرت مساره.....بس خلته يشوف امور اوضح...او يزهد في حاجات او يعيد ترتيب احساسه و افكاره....ايه بقي....؟؟؟

المشكلة يا لمضمض انها لحظات كتير جدا جدا

بأحس ان ربنا معايا على طول

و مابيسيبنيش

و دايما يبعت لي رسايل على ايدين ناس حواليا تنبهني و تذكرني لو غفلت

تعرفي بأحس انه فعلا بيحول بيني و بين السوء

2- متابعة طبعا موضوع خالد....لو قولتلك انا مش هنزل مظاهرة....هل انا من وجهة نظرك انسانة سلبية؟؟؟ انا بس بحب اشتغل في مربع بتاعي....في منطقشتي....ده يبقي تخلي عن قضية ما مثلا؟؟؟...معاكي المكرفون.....و قدامك قورطة شباب اهه...ذيعي بقي؟؟

شوفي يا لمضمض

أنا مبحبش اصدار الأحكام

كل واحد و له تفكيره و ظروفه اللي محدش غيره يعرفها

و اللي طبعا مش مطلوب منه يشرحها لحد أو يبرر أفعاله

من الآخر

لا يمكن حأحكم على حد أنه كذا أو كذا

ياما أفعال بتصدر من ناس لا تمثل حقيقتهم بالمرة

3- درستي تنمية بشرية......رائع.....قابلتي شاب او فتاة....انتي ترين فيهم خيرا كثيرا و لا نزكي علي الله احدا......لكن تحسي انهم بيعيشوا كده حياة عشوائية....يعني سايبين حياتهم للموجة منين ما توديهم..... يا تري...تصحي المارد اللي جواهم ازاي....من غير موعظة....من غير ما يحسوا ان اده جاي من براهم....؟؟؟

أكثر حاجة بتضايقني هي النصيحة المباشرة

أو أسلوب الوعظ

أو الترهيب

بأحب جدا النصيحة الفعلية اللي بالأفعال مش بالكلام

عن نفسي حأحاول أحطهم في الفعل

يعني أحاول أفكر في حلول

او حاجات يعملوها

لأني مبأحبش النقاشات الطويلة والشكوى

بأحب أفكر في حل

يعني اللي مش لاقي شغل

أحاول أساعده

يعني مثلا

اقوله تعالى وريني السيرة الذاتية بتاعتك

و ادي له اقتراحات يحط ايه و يشيل ايه

حأديله روابط مواقع توظيف

حأرشده لطريقة سهلة و عملية لتقوية اللغة عنده

حأشجعه ياخد دورات كومبيوتر

و في أماكن بتعملها رخيصة جدا و في متناول الشباب

ممكن اشترك له و اقدمها له هدية مثلا

أي حل بقى ربنا يهديني ليه

و لو مقدرش يبقى حأكتفي بالدعاء ليهم بظهر الغيب لحد ما ربنا ينور طريقهم

على فكرة حتى لو كان في حلول

فربنا برضه اللي بعتهالهم عن طريقي

4- بتؤمني انك تحلمي حلم...و تصحي من النوم...تلاقيه بيتحقق زي ما هو......و تضحكي...لانك دلوقتي شايفاه واضح اوي......يا تري ده حصلك قبل كده؟؟؟ارغي بقي...كلنا لابسين زعابيط النوم و قاعدين اهه؟

كتيييييييييير

و كنت بأخاف اوي

في ناس قالوا لي دي شفافية

و ناس قالوا لي قرينك بيضحك عليكي عشان تغتري بنفسك

و عرفت ان الواحد ما ينفعش يقول الكلام ده غير للي بيحبوه بس

لأن الرؤيا بتتحسد

5- حد من البشر فعلا انتي شايفة انه نموذج لحياتك (غير الرسول صلي الله عليه و سلم طبعا)......ممكن شخصية مشهورة....او انسان او انسانة انتي تعرفيهم بشكل شخصي؟ و يا تري ايه اللي بيميزهم اوي؟

مفيش

اؤمن ان كل واحد هو نموذج لوحده

و ما يشبهش حد تاني

حتى لو كان أخوه التوأم

أكره المقارنات جدا جدا

و خصوصا المقارنات الجاهلة بين الاخوات

شوفي اختك شاطرة ازاي ...انتي ليه مش زيها

و نفسي كل حد يتقال له كده يرد : لأنني لست هو و هو ليس أنا

6-...."إن ما تشعر به تجاه الاخرين.....سيعود اليك يوما ما" يا تري دي رسالة فيها مزيج من التفاؤل.....و لا تحذيرية......و لا خلاصة مواقف فوق بعضها و حسيتي بيها؟؟؟

هي كل ده يا ستي

منتهى التفاؤل و الأمل في الحياة

لأنك تقدر تكسب حب الناس اللي انت بتحبهم

كل ما تكون مشاعرك قوية و صادقة بتصل للآخرين

و تحذيرية

لأنها بتصل كما هي

يعني الحب بيوصل و الكره بيوصل

عشان كده ربنا سبحانه و تعالى قال:

" ادفع بالتي هي أحسن"

لأنه يعلم عز وجل ان المشاعر تصل

فلنجعلها بالتي هي أحسن

و فعلا بتلاقي اللي بينك و بينهم عداوة

كأنه ولي حميم

في مقولة للدكتور ابراهيم الفقي

ان المشاعر دي طاقة

ممكن تكون ايجابية و ممكن تكون سلبية

و كأنها كرة بترميها و بتتردلك تاني

و ده قريب جدا من تأمين الملك على دعاءنا

" ولك مثله"

سواء دعيتي لحد بخير أو بشر

و طبعا جربتها كتير على وجوه مختلفة

7- آية قرآنية......او حكمة...تردديها دايما...و دايما بتلاقي فيها اجابة و خصوصا لما يبقي عندك لحظة...وهن.....حيرة...او لخبطة؟؟؟؟؟

دعاء

" يا حي ياقيوم برحمتك استغيث أصلح لي شأني كله و لا تكلني إلى نفسي طرفة عين"

يتبع....

في أمان الله

[عبير يونس]

8- بتلومي نفسك علي حاجة.......و مش قادرة تنسيها و لا تسامحي نفسك عليها.....يا تري ده احساس عشتيه......مش هحب اتقل و اقولك احكيه...لكن احب اعرف ازاي بتتصالحي معاه...او بتنيميه...او بتقنعيه...انه ينساكي؟؟؟؟

كنت يا لماضة

لحد ما شافاني الله عز وجل من داء اللوم و داء العيش في الماضي

انا كنت أشطر واحدة تفتكر مواقف من دي

و اعيش الاحساس تاني بتفاصيله

و أفضل ألوم نفسي لحد مبقاش عارفة آخد نفسي

تم شفائي ولله الحمد

لا شيء يستحق اللوم مادام عدى و انتهى

لا طائل من وراء ذلك

اللهم الا النظر في الماضي لعدم تكرار الأخطاء

أو لإصلاح أخطاء يمكن اصلاحها بالإعتذار مثلا

أو تعويض من أخطأنا في حقه

اذا كان حي يرزق

و الدعاء له اذا كان قد توفاه الله

أما عدا ذلك

فبالبلدي كده بأردم عليه يا أوختشي

و الواحد يأمن نفسه بكثرة الاستغفار

9- دخلتي بنتتك مدرسة اجنبية...و دخلت عليكي في يوم من الايام وقالتلك.....البنات في المدرسة بيعايروني ان معنديش بوي فريند...لاني محجبة......بنتك في سن 13...و انتي مربياها كويس...بس ده اول تحدي بتقع فيها....لانك بتربيها علي قيم ممكن متبقاش موجودة في مجتمع بره البيت....هتثبتيها إزاي؟؟؟

هو طبعا موقف صعب جدا و حساس جدا جدا جدا

أنا عايزها تحافظ على الأمانة لحد ما يجي صاحبها

و في نفس الوقت مش عايزة اقتل مشاعرها الطبيعية و ميلها الفطري للجنس الآخر

و طبعا الموقف يفرق

لو هي عايزة بوي فريند فعلا

و الا لمجرد ان الكل عندهم و هي لأ

اولا حأستعين بالله

لأنه هو اللي يقدر يثبتها مش أنا

و هو اللي حيثبتني عشان أعرف اتعامل معاها بدون خسائر

من جانبي حاتكلم معاها بالراحة و حأفهمها انها لما تتجوز ان شاء الله حيبقى لها بوي فريند

حأشوقها لزوجها اللي ربنا كاتبهولها

و حأقولها ان مشاعرك لازم تحفظيها له هو وبس

و بصراحة انا نيتي الجواز المبكر ان شاء الله لأولادي و بناتي

و ربنا يقدرني على كده

لأني مثلا اتربيت على كده

بس ماكانوش بيشجعوا الزواج المبكر

كان لازم اخلص جامعة و اشتغل الأول

صحيح حافظت على مشاعري

و الحمد لله صنت الأمانة

بس طول الانتظار خلى المشاعر دي فترت

و اتعودت انها مش موجودة

و اني أقدر أعيش من غيرها

لأني بالفعل عشت من غيرها آخر فل

ده طبعا أثر على زوجي بعد كده

لأنه طبعا واصله الاحساس ده مهما تظاهرت بغيره

عشان كده الزواج المبكر لو في ايدي لبناتي

مش حأتردد لحظة

بس زي عادتي اني دايما بأبص على الشيء من كل الجوانب

و اني أؤمن ان كل حاجة لها مزايا و عيوب

برضه التعليم و الشغل بيفرقوا في نضج البنت لما تتجوز

م الآخر محدش بياخد كل حاجة

لازم دايما حاجات تبقى على حساب حاجات

و أولا وأخيرا ربنا وحده اللي يعلم ايه اللي يناسب كل واحد فينا

و أكيد بيختار لنا الخير لو استعنا به عز وجل

يتبع....

[عبير يونس]

10- كملي الجمل اللي جاية دي

اكتشفت أن.................

البني آدم مهما كانت امكانياته و مهاراته

لا يمكن ينجح إلا بتوفيق ربنا فقط

مهما حللنا البني آدميين اللي بنتعامل معاهم

و مهما حاولنا نفهم شخصياتهم

مش هينفعنا بأي حاجة اننا نفهمهم

لا بد من وجود مؤلف القلوب بينك و بين أي بني آدم عشان تعرفي توصلي له

أو على الأقل عشان يكفيكي شره

ما ينفعش نعتمد على ان ربنا شايف حالنا و مطلع لازم نتضرع اليه و نتواصل معاه كل ثانية

و في كل أمر من الأمور

مهما كنا شايفينها تافهة او ما تستاهلش

هي دي العبادة

أصعب احساس

.....

العجز

و بقدر عليه لما

...............

استعين بربنا القوي

ذي القوة المتين

وارمي حمولي عليه

أي بني آدم بيحبك أقصى حاجة يعملها انه يساعدك على التحمل

بينما ربنا وحده القادر على ان يزيح عنك الحمل نفسه

كله ...إلا...........

مش عارفة

مبقتش أخاف من حاجة

و لا أحمل هم حاجة

من يوم ما عرفت ان ليا رب

ممكن...اتغير...في حالة واحدة....الا و هي.......

اولا انا مبتغيرش عشان حد

أو عشان أرضي حد

انا ممكن اتغير عشان ارضي ربنا بس

و طبعا ده بيبقى من غير شروط

نفسي اغير.................فيا

جسمي اللي تخن و كلبظ

و انا اللي كنت دايما باتباهى اني حجمي صغير و وشي بيبي فيس و ما بيبانش عليا سني

بجد دلوقتي بقيت حيزبون

:blink:

مساااكي

جمل

ممكن تكمل حاجات...ممكن تنور....حاجات...بس اكيد هتكون سبب في اقتراب اكثر

في أمان الله

في أمان الله

:sad:

[hOuSsAm]

ايه ده

انتوا بداتوا ولا ايه؟

كدة تستغلوا غيابى وتبداوا

باذن الله لى عودة ومش هسيب حقى :sad:

[اغابي]

ايه الاسئلة اللى تشل وتعل دى :yahoo: - هى دى الامانة اللى اؤتمنتم عليها

لماضة ومكاوى ورضوى وحسام فين الباقيين

اجرى يا ابنى نادي الباقييين من الجاكوزى وكفاية ميه ما خدناش حاجة من ميه الجاكوزى

كله يحضر فورا لكرسي الكهربا - لحسن انفذ الخطة الشريرة بتاعتى - واوصل سلوك الكهربا بمية الجاكوزى وارقصهم هناك على 2000 فولت - ادينى بحذركم

انا عاوزة اسئلة تكهرب بجد الجد - مش اسئلها البنوتة القمر كبرت وعاوزة تشتغل فى سوبر ماركت - ماركت ايه مكاوى يا برنس

قال سوبر ماركت قااااال

ايه الاسئلة دى - باللى ما في سؤال قالتلكم عليه مصرية مغتربة - اسفة مش حاقدر ارد - ولا - انا ممكن اتكهرب كدا او مثلا حطو خط احمر على السؤال داه

ليه جاوبت كل االاسئلة - لان كل الاسئلة تيك اوى - ومنها دلفرى كمان - دى اسمها هزار - احنا عاوزين كهربة بجد مش هزار

زود الفولت يا ابنى

اغابي فاير

اوى خالص :yahoo:

تم تعديل 23 يونيو 2010 بواسطة اغابي

[لماضة مصرية جدا]

السلام عليكم و رحمة الله و بركاته

القريبة جدا.....ع البعد

مصرية....اوي اوي....لكنك مش متغربة

قريت كلامك لبنوتك.....في موقف "البوي فريند"

لو تسمحيلي ااقولك حاجة صغنتتة كده آد النملة

بحييك اوي علي موضوع الامانة....انك بتعلمي بنتك ان هي في حد ذاتها أمانة

هقولك حاجة و يمكن تستغربي منها.......انا عمر امي....ما كلمتني في الموضوع ده.....مع ان معظم حياتي تعليم مختلط...و فرص متاحة للحوار اللي فوق.....بس هي كانت بتعمل حاجة واحدة بس.....بتخليني احكيلها علي كل حاجة.....مهما كانت عبيطة...بتوجع...محرجة......كل حاجة عند امي....و دي خصلة انا علي سني ده لسه بعملها.....بس دلوقتي بفتكس وسايل جديدة عشان اخزنلها كل الحكايا المؤجلة

هي عملت حاجة تانية......خلتني احب ربنا.....و احس امتي يكون سبحانه و تعالي راضي عني...او العياذ بالله غير راضي....و كانت دايما تقولي لو حاجة استخبيتي و انتي بتعمليها يبقي اعرفي انها غلط.....حتي لو انا مش جنبك...انتي هتحسيها لوحدك

و فعلا.....لقيت ده بيحصل معايا في كل موقف ممكن هي متكونشي موجودة فيه

ع جنب بقي

فيه فترة البنت......هتحتاج جدا باباها.......هتحتاج تسمع كلام كتير من باباها.....مش منك...حتي لو كان كلامكم واحد...من باباها هيكون غير.....صدقيني.....هيملا جواها حاجات صعب انك تمليها بكلامك

ربنا يسعدك بيها......و يقر عينك بيها في الدنيا و الاخرة

مش هتعزميني بقي علي عمرة في مكة

انا علي شوق فوق الوصف

ادعيلي

في امان الله

مسااااااكي...حوار بنت و ابوها......بنت و امها.....بنت و نفسها.....بس فيه حوار يفتح شبابيك ع الدنيا

فوتك بكل الخير

[لماضة مصرية جدا]

السلام عليكم و رحمة الله و بركاته

اغابي

استاذ حسام

خدوا دي

bsh:)

طب وجعتكم

معلشي

خدوا دول

:sad:

بس بجد يعني مينفعشي يعني الواحد يخش من غير ما يولع في الضحية....قصدي يطري القعدة كده بكام سؤال

يالا يا جدعان

انتو معاكو حتة المااااااااااااااااااااااااااااظ

قلبوها بقي بين صوابعكم

كام معكم

لماضة....جواهرجي بني آدمين

فوتكم بعافية

ع جنب

انا مش هنزل باسئلة عشان آدي فرصة للناس التانية و كده.....(جرعة حنان ع المسا اهه مش حرماكم من حاجة... :lol: )

مساكم رضا