كرسي الأعتراف 2 ( حاليآ الفاضلة Dreamwithme )

[mekkawy]

يا حــــــــــــــلاوة .. أغيب يومين أرجع ألاقيكم ميتين مش نايمين

حطولنا الفيشة كدة و شغلولنا الكرسي .. النوم ده ميمشيش معانا خالص

يااااااااه ... هنسخن من الأول .. حرام كدة و الله

مكاوى

[بركة]

مصرية متكهربة قصدي متغربة مش عارفة تدخل لسه

[mekkawy]

مصرية متكهربة قصدي متغربة مش عارفة تدخل لسه

الفاضلة بركة

اذا كان لك صلة باي حد من إخواتنا و مش عارفين يدخلوا المنتدى .. انا كان عندي نفس المشكلة و الحل وصل من هنا لمنتدى آخر و لهنا تاني

و هو

ندخل على المسار التالي في أي كمبيوتر بنستخدمه

C:\Windows\System32\drivers\etc

في فايل اسمه hosts

نفتح الفايل باستخدام notepad :

right click ----> open with -----> notepad

بعد كدة نضيف السطر الآتي في آخر الفيال خالص

66.63.184.220 www.egyptiantalks.org

و بالتوفيق .. هتلاقيه اشتغل فوراً

مكاوي

[عبير يونس]

ايه الاسئلة دى - باللى ما في سؤال قالتلكم عليه مصرية مغتربة - اسفة مش حاقدر ارد - ولا - انا ممكن اتكهرب كدا او مثلا حطو خط احمر على السؤال داه

ليه جاوبت كل االاسئلة - لان كل الاسئلة تيك اوى - ومنها دلفرى كمان - دى اسمها هزار - احنا عاوزين كهربة بجد مش هزار

زود الفولت يا ابنى

اغابي فاير

اوى خالص :blink:

طب يللا يا جميل إسألي و أنا أجاوب أيتها سؤال

احنا و لا يهمنا لا مؤاخذة

شكلك انتي اللي خايفة تسألي

:sad:

[عبير يونس]

جيت لكم يا قوم

ايه الكرسي الخرع ده

اللي ما فيه زغزغة حتى

مش كهرباء

:wub:

اصحوا كده معايا

أنا مين؟

أنا ميمو يااه

أنا ميمو

:sad: مصرية... الدراع اليمين لعبد التواب النمساوي

ملحوظة على جنب

بأشكر بنتنا لماضة على البؤين الحلوين اللي فوق

وابننا مكاوي على طريقة دخول الموقع اللي وصلتني من الفاضلة بركة على بريدي

و أحب أسمع موال

كهربني شكرا

لابننا سين سين

:blink:

[اغابي]

ايه الاسئلة دى - باللى ما في سؤال قالتلكم عليه مصرية مغتربة - اسفة مش حاقدر ارد - ولا - انا ممكن اتكهرب كدا او مثلا حطو خط احمر على السؤال داه

ليه جاوبت كل االاسئلة - لان كل الاسئلة تيك اوى - ومنها دلفرى كمان - دى اسمها هزار - احنا عاوزين كهربة بجد مش هزار

زود الفولت يا ابنى

اغابي فاير

اوى خالص :blink:

طب يللا يا جميل إسألي و أنا أجاوب أيتها سؤال

احنا و لا يهمنا لا مؤاخذة

شكلك انتي اللي خايفة تسألي

:P

تصدقى بايه انى مش باعرف اسال - انا تخصص بس فاير :lol: قصدى تخصص اشعللها حواليكي - كمان وكمان

بس حاظبطك - ما تقلقيش - حابعت علىالبريد الخاص اجمع جروب الكهربا كلهم علشان يجو بسرعة يكهربوكى

ولا يهمك - غسلت سنانك بسيجناتو نهارده :D

اغابي

[عبير يونس]

بطيء... بطيء

(وش محمد صبحي في مسرحية تخاريف و هو تخين و نايم فوق الشغال و هو بيعمل التمارين)

[mekkawy]

صباحك معطر .. مصبح ممطر .. هنا القاهرة .. بأصبح عليك

أجب على كل من:

1 - يا ترى ايه الحاجة اللي تبكي مصرية متغربة أوي و ايه الحاجة اللي تسعدها أوي؟

2 - أكتر حاجة ندمانة إنك عملتيها و أكتر حاجة ندمانة إنك ما عملتيهاش؟

3 - أكتر حاجة سعيدة إنك عملتيها و أكتر حاجة سعيجة إنك ما عملتيهاش؟

4 - رجعتي في مرة من الشغل لقيتي ابنك بيولع سيجارة .. بيجرب .. أصله شافها في التزيون ... هتعملي ايه؟

5 - مصاحبة أولادك لدرجة إنهم لما يكبروا يأتمنوكي على سرهم ولا تربية و خلاص؟

6 - طب لو الأسرار دي لقيتي فيها ما يضر لكن الولاد معتبرينها مجرد سر مع مامتهم .. ابنك مثلاً بيحب بنت الجيران و هو عنده 16 سنة ؟؟

7 - ايه أكتر عبادة بتجيب قلبك في الأرض تماماً و تخلي نفسك كدة طايرة؟

8 - رمضان .... بتصلي القيام في البيت ولا في المسجد و أيهما أقرب لقلبك؟

9 - لو زوجك قالك إنه عاوز يتجوز تاني عشان (أي سبب بأة انتي عارفاه) هتعملي ايه؟ أصلاً موافقة على المبدأ ؟ ولا هتسعي لتغيير السبب ده؟

10 - زوجك قالك إنك كويسة و زي الفل و لو لف مش هيلاقي تراب رجليكي بس هو عاوز يتجوز تحقيقاً للتكافل الاجتماعي و لشرع الله .. و كانت عنده القناعة دي .. أن التعدد مرضاة لله و صيانة للمجتمع .. هااا ؟

11 - موقف اتحطيتي فيه في حياتك و حسيتي إن (ليس لها من دون الله كاشفة)؟

12 - سؤال لولبي ملتف بأة .. إنتي جبارة ولا طيبة .... في البيت .. في الشارع .. مع الأهل .. مع الولاد .. مع الجيران ... عامة ؟؟؟

تحياتي و يتبع .. بالأحمر أهو

مكاوى

[عبير يونس]

صباحك معطر .. مصبح ممطر .. هنا القاهرة .. بأصبح عليك

أجب على كل من:

1 - يا ترى ايه الحاجة اللي تبكي مصرية متغربة أوي و ايه الحاجة اللي تسعدها أوي؟

الدموع عندي فرج

و لا أربطها بالحزن

فقد أبكي من الفرح أو التأثر أو التعاطف

أو للشعور بالعجز

أو حتى رؤية شخص عاجز

و قد يبكيني بكاء شخص أمامي

خصوصا لو كان مسنا لا يجد من أفنى حياته لهم

أو إمرأة ضعيفة ليس لها رجل يحميها

أو طفل خائف

أو رجل مقهور (اللهم إنا نعوذ بك من غلبة الدين و قهر الرجال)

ما يسعدني حقا هو الشعور بالرضا

عندما أكون راضية أشعر بالسعادة

و الحقيقة موضوع السعادة ده غريب و عجيب

و ملوش مقاييس محددة

ممكن الواحد يكون في وسط مشاكل ضخمة و فجأة يشعر بالسعادة

رغم ان كل حاجة زي ما هي و مفيش حاجة اتغيرت

السعدة نفحات ربانية يمنحها لنا الخالق العظيم

2 - أكتر حاجة ندمانة إنك عملتيها و أكتر حاجة ندمانة إنك ما عملتيهاش؟

ما بأندمش يا مكاوي

لأن كل شيء مقدر و مكتوب

و لأني واثقة و موقنة أن ربنا سبحانه و تعالى دايما بيختار لنا الأفضل

عشان كده لا يمكن اندم

على اختياراتي

لكن في ندم إيجابي

اللي مش يحسسك بالحسرة و اليأس

لا

اللي يدفعك للتوبة و الاستغفار

و اللي بيقوي إيمانك بإن ربنا جل و علا هو التواب الرحيم

و إننا حتى لو ما نستاهلش المغفرة

فلينا رب هو أهل التقوى و أهل المغفرة

3 - أكتر حاجة سعيدة إنك عملتيها و أكتر حاجة سعيجة إنك ما عملتيهاش؟

مش عارفة

شكلي لسه ما عملتهاش

اللي سعيدة اني معملتوش

اني كنت و أنا صغيرة نفسي أبقى باليرينة (أرقص باليه)

و الحمد لله انه ما حصلش

" و اعلموا أن الله يحول بين المرء وقلبه"

4 - رجعتي في مرة من الشغل لقيتي ابنك بيولع سيجارة .. بيجرب .. أصله شافها في التزيون ... هتعملي ايه؟

في الواقع زوجي ولله الحمد مش مدخن

و ده كان من أسباب موافقتي على الزواج

لكن لو حصل و حب ابني يجرب

حأسيبه يجرب واحدة و طبعا مع أول نفس حيكح و تبقى حالته طين

و بعدين حأفرجه على يوتيوب حلو اوي فيه مكونات السيجارة و انها من قطران

و حأعرفه انها بتهري الرئة و من أول أسباب السرطان

و أسيبه يقرر

على فكرة ابني (10 سنوات)

عارف ده كله عن السجاير من قبل ما يفكر يجرب

أصلي أؤمن جدا بأن الوقاية خير من العلاج

بمجرد ما أحس ان حاجة لفتت نظرهم

بنتكلم عنها على طول بالشكل اللي يخليهم يعرفوا الواقع

و طبعا لما يعرفوا مني أفضل ما يعرفوه بطرق جاهلة و مضللة من أصحابهم

5 - مصاحبة أولادك لدرجة إنهم لما يكبروا يأتمنوكي على سرهم ولا تربية و خلاص؟

نعم بفضل الله

أنا صديقة أكتر من كوني أم

6 - طب لو الأسرار دي لقيتي فيها ما يضر لكن الولاد معتبرينها مجرد سر مع مامتهم .. ابنك مثلاً بيحب بنت الجيران و هو عنده 16 سنة ؟؟

ما هو ده لازم حيحصل

و لو ما حصلش هو ده اللي يقلقني على الولد

حنقعد نتفاهم و نتباحث و ندور على مقترحات و حلول

بس حأخليها تطلع منه هو

هو اللي يشوف الموضوع من برة

حأنقله الصورة اللي أنا شايفاها بطريقة غير مباشرة

عشان يبقى واثق انه هو اللي بيتصرف مش حد بيجبره

بس الله يعين على باباه

أصله دقة قديمة حبتين

و لسه عايش في دور والده و تربية والده له

اللي ما تنفعش مطلقا خصوصا مع الجيل اللي جاي

أولا و أخيرا

الله المستعان

7 - ايه أكتر عبادة بتجيب قلبك في الأرض تماماً و تخلي نفسك كدة طايرة؟

الذكر والصلاة

8 - رمضان .... بتصلي القيام في البيت ولا في المسجد و أيهما أقرب لقلبك؟

بقى لي سنين بأصليها في البيت عشان ولادي

مينفعش اخدهم

و مينفعش اسيبهم

بس بجد الصلاة في البيت أفضل بكتير و فيها تركيز أعلى

و صدق رسول الله صلوات الله و سلامه عليه" صلاة المرأة في بيتها خير من صلاتها في مسجدي هذا"

9 - لو زوجك قالك إنه عاوز يتجوز تاني عشان (أي سبب بأة :blink: انتي عارفاه) هتعملي ايه؟ أصلاً موافقة على المبدأ ؟ ولا هتسعي لتغيير السبب ده؟

شوف يا مكاوي باشا

دايما المواضيع الكبيرة دي بتبقى مختلفة من شخص لآخر

و ما ينفعش فيه رأي قاطع لكل الحالات

فأنا عارفة كويس أن تعدد الزوجات مباح

و لكني بأعتبر ان الطلاق برضه مباح

و زي محدش يقدر يقول الطلاق ضروري

كمان التعدد مش ضروري

في حالات ما لهاش حل الا الطلاق

و حالات ملهاش حل الا التعدد

بالنسبة لوضعي و ظروفي أنا و اللي مش شرط تتفق من ناس تانية

أنا ماشية بمبدأ اللهم لا اعتراض

و بعدين انا بيني و بين ربنا في دايما رجاء انه لا يبتليني بما لا أطيق

"ربنا لا تحملنا ما لا طاقة لنا به"

مع يقين في الله تعالى أنه عز وجل لا يكلف نفسا الا وسعها

" لا يكلف الله نفسا إلا وسعها"

و هو أعلم بنا من أنفسنا

"ألا يعلم من خلق و هو اللطيف الخبير"

يعني لو زوجي حب يتجوز عليا لازم ربنا يكون رايد

و مفيش حاجة حتبقى فوق إرادة ربنا

و لو ربنا أراد كده لاقدر الله

يبقى ساعتها أكيد هيرزقني الصبر والرضا

و زي ما قالت أمنا هاجر رضي الله عنها لنبينا إبراهيم عليه السلام

لما أخبرها أنه سيتركها مع رضيعها في واد غير ذي زرع

أ الله أمرك بهذا؟

قال:نعم

قالت: إذن لن يضيعنا

باختصار زواج زوجي عليا زي الموت

لا أتمناه

و لكنني لا يمكنني الاعتراض عليه

10 - زوجك قالك إنك كويسة و زي الفل و لو لف مش هيلاقي تراب رجليكي بس هو عاوز يتجوز تحقيقاً للتكافل الاجتماعي و لشرع الله .. و كانت عنده القناعة دي .. أن التعدد مرضاة لله و صيانة للمجتمع .. هااا ؟

الكلام جميل

بس الموضوع ده مش سهل يا مكاوي

و ما أضمنش حالي يبقى ايه وقتها

و ان الأمر يكون فتنة و العياذ بالله

الكلام على البر سهل

بس لما الواحد يتحط ع المحك

ممكن يفتن

و بعدين لإن أعطى فأشكر خير من أن ابتلى فأصبر

11 - موقف اتحطيتي فيه في حياتك و حسيتي إن (ليس لها من دون الله كاشفة)؟

كل أمور حياتنا ليس لها من دون الله كاشفة

فهو وحده سبحانه الذي يجيب المضطر إذا دعاه و يكشف السوء

في مواقف كتيرة صعبة مريت بيها

و طبعا لجوئي لربنا وحده هو اللي بيحلها

آخرها الولادة الأخيرة

كانت متعسرة جدا

و الكل متوقع لي قيصرية

بس ربنا حبيبي ماخذلنيش و جابها زين

و عدت

و اديني الحمد لله اهو

زي القردة معاكم باتكهرب و انا شايلة ايديا

و لا هامنني

في أحلى من كده

12 - سؤال لولبي ملتف بأة .. إنتي جبارة ولا طيبة .... في البيت .. في الشارع .. مع الأهل .. مع الولاد .. مع الجيران ... عامة ؟؟؟

ما يشكرش في نفسه الا ابليس

الحقيقة انا زي ما تقول كده بين البنين

يعني لا جبارة 100% و لا طيبة 100%

لكل مقام مقال

تحياتي و يتبع .. بالأحمر أهو

مشكور و ما قصرت

:lol:

مكاوى

[mekkawy]

كويس كويس

مستواكي بيتحسن .. ندخل على اللي بعده

مهو أنا النهاردة ما ورييش غير سعادتك و البري سيلز ريبورت بتاع الشهر :blink:

هأطلع فيكم المواهب الدفينة إن شاء الله

مكاوى

[Howayda Ismail]

الجاكوزى مغلق ليه اليومين دول اجازة ولا ايه؟!

[hOuSsAm]

مصرية

يا مرحب

معلهش مشغول عليكى ومش لاحق اعمل اى حاجة

عالعموم خدى السؤالين دول اتسلى فيهم لحد مفوق من اللى انا فيه (ومتاسف لو فيه حاجة مكررة انا ملحقتش اقرا اللى فات)

1- طبعا شفتى فيلم ولاد العم......... فيلم حلو

حطى نفسك بقى مكان منى زكى بس من غير ميبعتولها ظابط مصرى وقوليلى هتتصرفى ازاى من ايه تو زد

انتى لوحدك فى اسرائيل وعايزة عيالك ومفيش ايتهو حد بيساعدك ولا ظابط مصرى ولا اى حاجة عايز اعرف مشاعرك وهتتعاملى ازاى مع الاسرائيلين اللى هما طلعوا اهلك وولادك اللى بيتهودوا يوم ورا التانى وبيتعلموا مبادئ التوراة وطبعا الامكانيات بتاعتك ضعيفة

عايز اعرف ازاى هترجعى مصر انتى وولادك

2- فى الموقف اللى فات لو لاقيتى بيان طالع عن وزارة الخارجية بيتهمك انتى وزوجك الاسرائليى بالجاسوسية وبيسقطوا عنك الجنسية وطبعا محدش سامعك ولا حد عارف اللى انتى فيه ................... عايز تصور منك هتتصرفى ازاى وتصور للاحداث

3- ماشية فى شارع عباس العقاد (مدينة نصر )كنت هناك امبارح والجو تحفة اوى و مكنتش عايز اروح بيتنا (بجد مصر حلوة اوى)

المهم

قابلتلك واحدة زميلتك من ايام الجامعة وزميلتك دى كانت هاى كلاس اوى ومن عيلة غنية جدا ولاقتيها بتتسول

هى مش عرفاكى وانتى عرفاها

هتتصرفى ازاى ساعتها

وهتديها فلوس ولا لاء

ولو هتديها هتديها اد ايه

وهتعرفيها بشخصيتك الحقيقية ولا لاء

وايه الانطباع اللى هيسيبه الموضوع ده عليكى

ومين اول حد هتروحى تحكيله اللى حصل

4- نزلتى انتى وزوجك الاجازة وبعد مخرجتوا من المطار ملقتوش حد فى الشارع

البلد فاضية

العربيات موجودة وبمفاتيحها والسوبر ماركت والمبانى وكل حاجة بس مفيش بنى ادمين

رجعتوا المطار تانين لاقتوه فاضى ومفهوش حد (متسالنيش ازاى)

قوليلى بقى شعورك ساعتها ايه

وهتتصرفى ازاى

وهل هتعتبرى ده بداية جديدة انك تكونى ملكة متوجة عالبلد وزوجك هو الريس

هتغيرى اسمها

هتحاولى تفتحى بيوت مش بتاعتك

قوليلى تخيل كامل للى هيحصل

5- جبتى هدية لحد عزيز عليكى اوى

وبعد يومين لاقتيه بقلة زوق بيقولك الهدية دى مش عجبانى وكنت متوقع تجيبيلى حاجة احسن من كدة شوية :ninja:

بوش بلاستيك

انطباعك ايه وهتتصرفى معاه ازاى

ولو هتجيبى هدية لحد تانى عزيز عليكى بعد كدة هتتعاملى ازاى مع الهدية

6-

ولا اقولك كفاية كدة عشان جايلى ضيوف

همخمخ كدة فى ردودك وهعرف شخصيتك وهجزهلك شوية اسئللة نار حمرا من اللى بتلسع

بالشفا باذن الله

ميكاوى برافو عليك يا بطل

اغابى عايزين كدة شوية فاير

[عبير يونس]

مصرية

يا مرحب

معلهش مشغول عليكى ومش لاحق اعمل اى حاجة

عالعموم خدى السؤالين دول اتسلى فيهم لحد مفوق من اللى انا فيه (ومتاسف لو فيه حاجة مكررة انا ملحقتش اقرا اللى فات)

1- طبعا شفتى فيلم ولاد العم......... فيلم حلو

الحقيقة ما شفتش الفيلم

لأني عرفت انه في اسرائيل

و انا بصراحة مبحبش النوعية دي من الفلام

فمش حقدر افيدك اوي

نؤجل السؤال لحد مأشوف الفيلم

حطى نفسك بقى مكان منى زكى بس من غير ميبعتولها ظابط مصرى وقوليلى هتتصرفى ازاى من ايه تو زد

انتى لوحدك فى اسرائيل وعايزة عيالك ومفيش ايتهو حد بيساعدك ولا ظابط مصرى ولا اى حاجة عايز اعرف مشاعرك وهتتعاملى ازاى مع الاسرائيلين اللى هما طلعوا اهلك وولادك اللى بيتهودوا يوم ورا التانى وبيتعلموا مبادئ التوراة وطبعا الامكانيات بتاعتك ضعيفة

عايز اعرف ازاى هترجعى مصر انتى وولادك

2- فى الموقف اللى فات لو لاقيتى بيان طالع عن وزارة الخارجية بيتهمك انتى وزوجك الاسرائليى بالجاسوسية وبيسقطوا عنك الجنسية وطبعا محدش سامعك ولا حد عارف اللى انتى فيه ................... عايز تصور منك هتتصرفى ازاى وتصور للاحداث

برضه مش حقدر أفيدك

الا ما اشوف الفيلم

بس مأوعدكش

3- ماشية فى شارع عباس العقاد (مدينة نصر )كنت هناك امبارح والجو تحفة اوى و مكنتش عايز اروح بيتنا (بجد مصر حلوة اوى)

المهم

قابلتلك واحدة زميلتك من ايام الجامعة وزميلتك دى كانت هاى كلاس اوى ومن عيلة غنية جدا ولاقتيها بتتسول

هى مش عرفاكى وانتى عرفاها

هتتصرفى ازاى ساعتها

وهتديها فلوس ولا لاء

ولو هتديها هتديها اد ايه

وهتعرفيها بشخصيتك الحقيقية ولا لاء

وايه الانطباع اللى هيسيبه الموضوع ده عليكى

ومين اول حد هتروحى تحكيله اللى حصل

شوف يا فندم

مش هأعرفها أني عارفاها خالص

و حاديها اللي في النصيب

و السبب اني مش عايزة اجرحهابس حأعرض الموضوع على زوجي

و أشوف ممكن نساعدها ازاي

من غير ما نجرحها

ارحموا عزيز قوم ذل

4- نزلتى انتى وزوجك الاجازة وبعد مخرجتوا من المطار ملقتوش حد فى الشارع

البلد فاضية

العربيات موجودة وبمفاتيحها والسوبر ماركت والمبانى وكل حاجة بس مفيش بنى ادمين

رجعتوا المطار تانين لاقتوه فاضى ومفهوش حد (متسالنيش ازاى)

قوليلى بقى شعورك ساعتها ايه

وهتتصرفى ازاى

وهل هتعتبرى ده بداية جديدة انك تكونى ملكة متوجة عالبلد وزوجك هو الريس

هتغيرى اسمها

هتحاولى تفتحى بيوت مش بتاعتك

قوليلى تخيل كامل للى هيحصل

ده زي فيلم آدم بدون غطاء بتاع محمد صبحي و نيللي

بصراحة المعالجة كنت ممتازة في الفيلم ده

فعلا الجنة بلا ناس ما تنداس

5- جبتى هدية لحد عزيز عليكى اوى

وبعد يومين لاقتيه بقلة زوق بيقولك الهدية دى مش عجبانى وكنت متوقع تجيبيلى حاجة احسن من كدة شوية :blink:

بوش بلاستيك

لو حد عزيز اوي زي زوجي مثلا

عادي

متعودة منه على رد الفعل ده

ههههههههه

طبعا قصدي انها متعجبوش

و مش قصدي انه بيرد بقلة ذوق

:sad:

و لو واحدة صاحبتي اوي

برضه عادي

مش حأزعل

و حأسألها كمان كانت عايزة ايه

مفيش مشاكل

انطباعك ايه وهتتصرفى معاه ازاى

ولو هتجيبى هدية لحد تانى عزيز عليكى بعد كدة هتتعاملى ازاى مع الهدية

ما هو لو الشخص عزيز

مش حاعتبرها قلة ذوق

و لا حأزعل

و لو مش عزيز

مش حأجيب له هدية من بابه

:lol:

6-

ولا اقولك كفاية كدة عشان جايلى ضيوف

همخمخ كدة فى ردودك وهعرف شخصيتك وهجزهلك شوية اسئللة نار حمرا من اللى بتلسع

بالشفا باذن الله

الله يشفيك يافندم

smk: :P

ميكاوى برافو عليك يا بطل

بطل ايه و بتاع ايه

دي اسئلة ميكي جيب

دي حتى ما حصلتش مستوى الطالب الأبيض المتوسط

:blink:

اغابى عايزين كدة شوية فاير

بلا فاير بلا بتاع

دي كهرباء دي

يا ألف خسارة

شكلي حأروح الجاكوزي

لحد ما تشتغلوا جد شوية

:ninja:

ابقوا وصلوا لي سلك هناك

اهو اي منظر وخلاص

كسفتونا

md2:

:happy:

[mekkawy]

الجاكوزى مغلق ليه اليومين دول اجازة ولا ايه؟!

أبداً بس مكنتش عارف أدخل اليومين اللي فاتوا .. عامة الجاكوزي أعدنا افتتاحه و جاري أعمال الترميمات .. نرجو المشاركة في الصيانة :ninja:

مكاوى

[لماضة مصرية جدا]

السلام عليكم و رحمة الله و بركاته

صباحك اصفي من اللبن الحليب

1- ايه اكتر اكلة بتعرفي تعمليها؟ او بتحبيها مووووت اوي جدا خالص؟

2- حيوان بتحبيه اوي.....طب ربتيه قبل كده؟؟؟ (وش عيل صغير بيترجي مامته تجيب قوطة في البيتو عمال يتحنن عليها... :unsure: )

3- ليه بنطبق الغسيل..... wst:: سؤال هيموتني....و ليه بنقمع البامية....سؤال محيرني الحقيقة؟؟؟

4- انتي كنتي بتشتغلي قبل الزواج.....طب بتفكري ترجعي للشغل....او بتحني مثلا لنفسك و انتي بتشتغلي؟

5- بلد تحلمي تزوريها اوي......و نفسك تحققي الحلم ده (هو طبعا مافيش بعد مكة و المدينة...بس حتة كده يعني؟)

6- لو حبيتي تخططي لمفاجاة لزوجك....و تكون مفتكسة جدا ممكن تكون ايه؟؟؟

7- توبيك اثر فيكي جدا في المحاورات....؟؟؟

8- لو بنعمل تعديل في المحاورات....تقترحي ايه؟؟؟ ممكن تلغي عضوية مين....و مين تديله انذار....و مين تحطي في قائمة المحاورين الشطار الامامير؟؟؟

9- اختاري 10 اسماء من المحاورين....و اوصفيهم براحتك.....في كلمة...في سطر....في توبيك...عيشي بقي

10- امتي بتحبي الصمت عن الكلام؟؟؟

11- لو عندك وقت خاص لمصرية متغربة...لنفسها...تحب تقضيه ازاي....و مع مين؟؟؟

12- فيه شبه بين المحاورات دلوقتي و زمان......ايه اللي اتغير....سلبا او ايجابا؟؟؟ و الجيل الجديد بتاع يا آسي يا راجون فيه شبه من قدامي المحاربين (انزلي بقي باغنية.....فاكرك يا ناسيني... :lol: )

13- نصيحة تقوليها....للماضة.....لريهام؟؟؟

14- الرجولة يعني ايه؟؟ الانوثة يعني ايه؟؟؟ الامومة يعني ايه؟؟؟

15- انتي كنتي طفلة شكلها ازاي....مطيعة....و حاضر يا ماما و حاضر يا بابا...و لا كنتي اطفال شوارع لمؤاخذة يعني؟؟؟؟

16- حاجة مكنتشي في طفولتك بس بتحاولي اوي تديها لاولادك؟؟

17- الموقف اللي جاي ده افتراضي جدا: زوجك شخص تقليدي اوي.....متحفظ جدا.....سي السيد جدا جدا....بيبص لكل لحظات الجنون و الرومانسية انها سطحية...طفولة لا تليق.....سذاجة.....يا تري تعملي ايه...تغيريه...تتقبليه.....تحبطي...و تحاولي تنضجي و تستوي كده زي ما هو عايز....و لا تعملي ايه؟؟؟

18- انتي امام شخص فوضوي جدا......يشعر ان الفوضي لازم تولد ابداع....(اوعي وشك... :sad: ).....اديه روشتة...احسن فعلا كده بقي مش كويس خااااااااالص

19- يوم من عمري.........ايه بقي؟؟؟(وش عيل بيتفرج علي البوم الصور بتاعك و عمال يسال)

20- سؤال رخم....غتيت...لا مونكن ابدا تجاوبي عليه...(وش عيل اخو العيل اللي فوق....بس شرير حبتين)

بس خلاص

فوتك بعافية

صباحك.....عيال...بوشوش مختلفة...بس برضه هيفضلوا عيال... بنحبهم اوي...مهما اتغابوا... wst::

[mekkawy]

و عشان الضرب ف الوش مفيهوش معلش .. نقول مستعينين بالله

1 - سؤال كدة بس مش هنخليه بيرسونال ... لو واحدة صحبتك سعيدة جداً في حياتها الزوجية و بعد 5 سنين اكتشفت إن زوجها كان عنده علاقة قديمة كدة .. لكن أثناء زواجهم و راحت لحالها خلاص .. نزوة يعني .. تنصحيها بإيه و تتصرف إزاي؟

2 - كلنا شفنا موقف نشوي سعيد ... (يا رب يا رب ما تكتبه على حد أبداً) لكن لو (بلا بيرسونال بردو) حد قريب منك أوي أوي زيك مثلاً اتعرض للموقف ده هتتصرفي ازاي و هتسكتي عن حقكم ولا هتطالبوا بيه في ظل ظروفنا المنيلة دي في البلد؟

3 - أبو العيال رجع من الشغل في يوم حضرتك مصرة تفتجي موضوع لبس المدارس و قالك .. خليها شوية كدة .. هتخليها شوية كدة ولا هتصري تكملي موضوعك ؟

4 - الزوجة الصالحة ... إزاي يعني ؟

5 - سؤال مهم أوي (ليا ع الاقل) لو حسيتي إن حد بيستغلك .. بيستغل علمك .. طيبتك .. مالك .. أي حاجة فيكي .. و طبعاً بيستغل يعني مش محتاج بالضرورة .. هتتصرفي ازاي؟ هتسيبيه يستغل في حدود ولا هتقطعي و لا هتديله في وشه ولا ايه النظام ؟

6 - دخلتي منتدى تاني (أي منتدى و السلام) لقيتي إتنين اسمهم مكاوي و لماضة مثلاً ماسكين واحدة اسمها مصرية متغربة نميمة و رغي و ذم و حاجات بايخة كدة .. هتعملي معاهم ايه .. هنا ولا هناك ولا بالليل على المصلية مع ربنا ؟

7 - حفل تخريج الابتدائية في مدرسة العساسيل و انطلب منك بصفتك أم الأوائل (يا رب) تلقي كلمة على الحاضرين .. هتقولي ايه .. المكرفون مع سيادتك و لن نقبل أقل من خطبة عصماء شماااااااء .. عشان كلنا هنا جمعـــــــــــــــــــــاء :happy:

8 - القرآن الكريم ... يا ترى قانون في حياة مصرية متغربة ولا قراءة بس ولا على قد ما بنقدر ولا في البوفيه؟

9 - ألا الكتاكيت اسمهم ايه ؟

10 - كتكوت من الكتاكيت باة جاله استدعاء ولي أمر رحتي تاني يوم المدرسة لقيتي ولد جنب منه كدة و متخيط .. و أتاري المحروس الغالي هو اللي باطحه 5 غرز في دماغه .. ايه النظام ؟؟

11 - ولا أقولك .. العبي في دول عما أقدم التقرير عشان الجدع مسافر بكرة خلاص

مكاوى

[عبير يونس]

السلام عليكم و رحمة الله و بركاته

صباحك اصفي من اللبن الحليب

يسعد صباحك يا قمر

1- ايه اكتر اكلة بتعرفي تعمليها؟ او بتحبيها مووووت اوي جدا خالص؟

كتير بفضل الله

مكرونة باشميل

كشري

بروست الفراخ

محشي

رز بأنواعه

و كل أنواع الخضار مطبوخ و سوتيه و طواجن

كباب حلة ( اللحم بالبصل)

ساندوتشات أشكال و ألوان (تفانين) جوزي بيقوللي افتح كافيتيريا :lol:

تفانين في المشروبات الساخنة

المعجنات و الكيك والحلويات

ماليش في السمك اوي بس ممكن آكله و بحبه مقلي بس عشان كده مابأطبخهوش كتير

عشان بأقنن المقليات لصحة أسرتي :happy:

كل حاجة يعني

لازم أنوع عشان الأولاد ما يملوش

أما أنا بأحب ايه

حطيني في سوق الخضار والفاكهة

مبحبش اللحوم اوي

كنت باموت في كل انواع الجبنة لحد ما اليوريك اسيد علي عليا فاضطريت اقلل منها اوي

باموت في المشروبات الساخنة و خصوصا الاعشاب زي الزنجبيل و القرفة و الشاي الأخضر والأسود و القهوة بكل أنواعها

مليش في الرز و المكرونة اوي بس بحب العيش البلدي الجميل و شوية فينو مش كتير

بأحب المهلبية و الرز بلبن

2- حيوان بتحبيه اوي.....طب ربتيه قبل كده؟؟؟ (وش عيل صغير بيترجي مامته تجيب قوطة في البيتو عمال يتحنن عليها... :lol: )

كنت زمان نفسي في قطة اوي

بس الوالد والوالدة الله يرحمهم لم يتبنوا الفكرة

و اقنعوني بذلك

و لما كبرت عرفت ان القطط بتنقل فيروس بيسبب الاجهاض

و ده حصل مع بنت خالتي أكتر من مرة

طبعا الكلاب طول عمري مفيش بيني و بينها عمار بالإضافة انها نجسة

اذا كنتي بتلمحي على هاميستر فانسي

جوزي بقى عيشيه في حديقة حيوان :lol:

بحب السلاحف والعصافير والأسماك

بس مش عندي منهم حاليا

ربيت سمك

و مرة عصفور

و سلحفة كنت بألعب معاها عند صاحبتي

في ناس قالوا لي الحاجات دي في البيت بتجيب الفقر

بس مش عارفة ده صح والا لا

لكن أذعنت (حلوة أذعنت دي) لأني حسيت بتأنيب الضمير على حبس الحيونات بعيد عن عالمها الطبيعي

3- ليه بنطبق الغسيل..... :lol: سؤال هيموتني....و ليه بنقمع البامية....سؤال محيرني الحقيقة؟؟؟

كنت و لازلت بحب أطبق الغسيل موت و تطبيقة محلات مش أي تطبيق و خلاص

بس كتير ولادي ما شاء الله بيلبسوا الغسيل من المنشر قبل ما ألحق أطبقه

و فايدته انه بيخلي الهدوم زي ما تكون مكوية

و بأموت في كوي الهدوم كمان و غسيل المواعين

حاجتين طول عمري بأكرههم

مسح البوتجاز و نشر الغسيل في البلكونة

كانت ماما بتغريني بالفلوس عشان اعمل الحاجتين دول

:wub:

تقميع البامية ده كمان محيرني بس مضطرة اقمعها

حاليا بأجيبها مجمدة و متقمعة جاهزة

4- انتي كنتي بتشتغلي قبل الزواج.....طب بتفكري ترجعي للشغل....او بتحني مثلا لنفسك و انتي بتشتغلي؟

و بعد الجواز كمان

و لازلت حاليا في البيت دروس و ترجمة

لم انقطع عن العمل الا 3 سنين الاولي في الزواج و باختياري

مقدرش اعيش من غير شغل

و لازم اشتغل عشان جهازي العصبي ما يضربش

لما تكون عندك طاقة عالية بفضل الله و لا يتم تفريغها تنقلب الى طاقة تدميرية لك و لمن حولك

5- بلد تحلمي تزوريها اوي......و نفسك تحققي الحلم ده (هو طبعا مافيش بعد مكة و المدينة...بس حتة كده يعني؟)

كتير

نفسي اهاجر كندا

و نفسي ازور اليابان اوي

وأمريكا و خصوصا أريزونا عند أخويا

و نفسي ازور انجلترا و فرنسا و ألمانيا و ايطاليا

نفسي اروح جنوب افريقيا

و نفسي اروح المكسيك

انا بأحب الدنيا بحالها و الناس والثقافات المختلفة

6- لو حبيتي تخططي لمفاجاة لزوجك....و تكون مفتكسة جدا ممكن تكون ايه؟؟؟

من واقع تجربتي جوزي مفيش حاجة بتفرحه

:wub:

و المفاجآت بتقلب نكد معاه

بس ده ما يمنعش انه حبوب ولطيف

بس لما يكون رايق

وده بقى نادر حاليا

7- توبيك اثر فيكي جدا في المحاورات....؟؟؟

مباراة مصر والجزائر

موضوع كان حيتسبب في قتلي

و كنت واخدة الموضوع على أعصابي بشدة

يمكن كان نقطة تحول في حياتي

اني ابطل آخد كل حاجة على أعصابي بالشكل ده

في توبيكات كتير بتعجبني

و غالبا هي اللي بأشارك فيها

توبيكات المشاعر و الأحاسيس بتعجبني جدا

بس مش بأشارك فيها

بأحس اني مش بأعرف أعبر اوي

يعني بأحس لو كتبت مش حيبقى على المستوى اللائق

باتخنق من الجدال المستمر في باب هدى الإسلام

بس أوقات بيبقى لازم أرد

اكتر حاجة بأكرهها التطاول وقلة الذوق في الرد

حتى لو مش موجه ليا

8- لو بنعمل تعديل في المحاورات....تقترحي ايه؟؟؟ ممكن تلغي عضوية مين....و مين تديله انذار....و مين تحطي في قائمة المحاورين الشطار الامامير؟؟؟

حألغي عضوية كل من يفتقر إلى الذوق و الأدب في التحاور

و حأنذر اللي في أمل في اصلاحه لأسلوبه

و أحط طبعا كل الناس المحترمة اللي عارفة حدودها و تدرك جيدا ان حريتها تنتهي عند حدود حريات الآخرين في قائمة المحاورين الأمامير

:lol:

يتبع...

[عبير يونس]

9- اختاري 10 اسماء من المحاورين....و اوصفيهم براحتك.....في كلمة...في سطر....في توبيك...عيشي بقي

10 بس؟؟

ناس كتير

عشان الوقت دي كانت مشاركة شاركت بيها في موضوع عضو وكلمة

الحقيقة خايفة انسى حد

و مش عارفة ارتب ازاي

لأن كل اللي حأكتب عنهم بأكن لهم معزة حقيقية

طبعا الترتيب لا يعني اي شيء

الهوانم

Ladies first

طبعا مع حفظ الألقاب

و كامل الاحترام

لولا...

إحساس متدفق يمشي على قدمين... ذوق و أدب جم

قلب أبيض...

زي اسمها ...بتحسسني بالأمان

أم مروان...

حنان و ود و اهتمام

ماما سلوى...

يعني مش عايزة أكبر حضرتك في السن... بس هو ده احساسي... أم

لماضة...

مزيج غريب من خفة الدم المتناهية مع عقل و حكمة يصاحبهم أخلاق عالية

رضوى...

بنوتة عسل و دمها سكر

سوسو راني ...

لا يمكن أقرأ مداخلتها من غير ا أفطس على روحي من الضحك... و في نفس الوقت حس مرهف للكلمة

فولانة...

صورتها الرمزية بتعدل مزاجي :) ... بأحس إني بأقرأ لكاتبة صحفية محترفة

ذهبية...

أخت أو على الأقل قريبة ... تحس معاها بروح العائلة

مصرية و مغتربة...

يا ما ناس لخبطوا بيننا... شخصية ظريفة و لطيفة جدا و في منتهى الود و الاحترام

مغتربة...

فكر راقي و أخلاق عالية

برينسيس...

برنسيسة فعلا... ذوق موسيقي عالي... شخصية متمردة لكن في نفس الوقت محافظة على القيم و تربية عالية

ريمو...

أم مريومة السكرة ربنا يبارك لها فيها... بنت الاسكندرية الجدعة... رقيقة و عسولة... لكن لما تتنرفز... و الا بلاش :wub:

فتفوتة...

بنت مصرية جدعة اوي

شيكو...

عالم خاص من الشياكة

بوسي...

أم عموري ربنا يبارك لها فيه يارب...بتهتم جدا بكل ما يساعد الآخرين

جيسيكا...

انسانة حبوبة بس مش بتشارك كتير

ميرا ميخائيل...

الزمن الجميل

ضحى...

دماغ بتفكر... نفسي نبقى أصحاب

أغابي...

بأحس انها عفريتة و شقية و جد في نفس الوقت

منال شوقي...

شخصية لذيذة جدا... مثقفة و دمها خفيف و مكافحة و لها رؤية للحياة...ردودها السهل الممتنع

بركة...

بركة فعلا... طيوبة و خدومة جدا

طبيبة مصرية...

الروح الجميلة و الكلام الرشيق

أم يمنى...

عسولة بس مشاركاتها قليلة أوي

دعاء...

عسل و طيبة و ربنا يهديلها غربتها و يطمنا عليها

سمية صالح

انسانة راقية بمعنى الكلمة و خدومة فوق الوصف

دامو...

البنوتة الشقية ودمها زي العسل

و الأساتذة الأفاضل

مع حفظ الألقاب

أبو محمد...

بيحسسني إن لسه مصر بخير

د. هشام...

أدب و ذوق و ثقافة و رقي بأحس كده انه يوسف بيك وهبي في فترة الثلاثينات الميلادية

ايهاب سالم...

شخصية عملية جدا... جد جدا... الجواب على قد السؤال... ما بيتحملش السخافة و الجهل

...

د. الشامي...

حببني في كندا

زوهيري...

مثابرة ونفس طويل لتوصيل رؤيته... مزاج موسيقي فريد

محمد...

له هيبة كده بمجرد ما أشوف اسمه بأعرف اني حأشوف كلام جد أو نقد لاذع

Maksoof

روح شابة جدا... لم أصدق انه كان شاب في فترة الستينات :lol: ... ربنا يديه الصحة و طولة العمر

...

عنبو...

بلدياتي العزيز... بأفرح اوي لما أشوف اسمه... كل مواضيعه لذيذة و خفيفة بتحسسني ان الدنيا لسه فيها ناس بتعرف تفرح

... Nizza la bella

برغم انه عايش بره مصر الا اني بأحس انه مصري اوي

الباشمهندس ياسر...

أحيانا بتكون ردوده حامية حبتين بس اجمالا طيب و ابن حلال

سين سين...

المعلم الكبير... بلدياتي... و دفعتي في الكلية... دماغ عالية... أخلاق عالية مع و لاد الناس... و العين الحمرا مع ال....

أحيانا بيرد بحدة ... بس قلبه أبيض

بيعالج حاجات كتير بانه يخللي الواحد يفطس من الضحك و بس خلاص

اوريكس...

طموح جدا و مجتهد ربنا يوفقه في الايلتس يارب

جيمي...

صورته الرمزية (الحصان) بيحسسني انه بيجري بسرعة و محدش بيعرف يحصله... ردود لاذعة وقت اللزوم... حس موسيقي عالي

جو...

مش عارفة مرتبط بصورة ميل جيبسون معايا :lol: لا بجد شخصية ظريفة و في نفس الوقت باحس انه أخ حنين

حسام يوسف...

مهذب جدا...جد جدا جدا ... و بيزعل بسرعة... حلو فيه ان مزاجه منيري

تهامي...

بأحس فيه بالطيبة الشديدة... حتى لو زعل و رد بحدة برضه طيب

الرحالة باشا... زميل الفرنسية

جست هيم ...

عقّد الهوانم في لعبة الهوانم و السوالم... لا بجد شاب مصري جدع... بس اسمه في شوية أنانية يعني

:happy:

هيز يوزر نيم ...

ردوده كانت كتير بتبقى لاذعة و بيقفش بسرعة

بس بدأ يفرفش شوية و ياخد علينا

متهيألي ابتدي يحس اننا عيلة واحدة

:)

... انسان مثقف و واعي ssmaly

أفكاره متمردة... mayousef

مسافر زاده الخيال...

انسان محترم و مثقف...كلامه كتير بيبقى في الجون... يبين وجهة نظره في منتهى الهدوء و الأخلاق العالية

الساري...

بيعرف يرد بذكاء ... بس كلامه أحيانا بيبقى حاد بس لا يخرج عن إطار التهذيب

زناتي...

مصري جدا... طبيعة سكان السواحل اللي زي البحر يبقى هادي و لطيف و فجأة أمواجه تعلى و تبتلعك

عادل أبو زيد...

كبير العيلة

دايما بيحللي مشاكلي ... Advisor

عاشق الترحال...

مزيج غريب من دنيا و دين ... دمه حامي اوي و خفيف في نفس الوقت

سهل جدا...

مفتقدة مشاركاته... شخصية محترمة

تامر السعدني...

انسان محترم و طيب يريد الخير للآخرين و لا يفقد الأمل

صراحة بلا مواربة ... و كتابات ساخرة عالية الجودة... scorpion

دي انطباعاتي

و يارب ما أكون زعلت حد مني :lol:

تحياتي للجميع

:lol:

10- امتي بتحبي الصمت عن الكلام؟؟؟

كتير بيكون الصمت أفضل من الكلام و أبلغ

لما يكون الكلام زي قلته و مش حيحوق في اللي قدامك يبقى قلته أحسن

و لو بأشتغل يبقى طبعا الصمت عشان ميحصلش اهدار للطاقة

و لما مالاقيش كلمة تعبر عن اللي جوايا

و لما أصادف بني آدم قليل الذوق و غلاّط

و لما أحب أفسح الطريق لإحساسي مبحبش اتكلم كتير و لا أسمع بأحب أحس بقلبي و روحي

11- لو عندك وقت خاص لمصرية متغربة...لنفسها...تحب تقضيه ازاي....و مع مين؟؟؟

شوفي يا جميل

انا بأحب التنوع جدا

و لأني بأحب الكل كليلة

فممكن مرة يكون لزوجي

ومرة للولاد

و مرة لصاحباتي

و مرة للمحاورات

انوّع يعني

و أحيانا مع نفسي

و لو اني أجيد الخلوة بنفسي وسط الناس

12- فيه شبه بين المحاورات دلوقتي و زمان......ايه اللي اتغير....سلبا او ايجابا؟؟؟ و الجيل الجديد بتاع يا آسي يا راجون فيه شبه من قدامي المحاربين (انزلي بقي باغنية.....فاكرك يا ناسيني... :lol: )

انا مش من زمان في المحاورات عشان أقدر أحكم

بس هي المحاورات طوال الوقت فيها تنوع شديد في نوعيات الناس اللي بتشارك و في توجهاتهم و تياراتهم الفكرية

و ده باين في الموضوعات القديمة و مواضيع دلوقتي

بس ملاحظة ان الناس أخلاقها ضاقت أكتر

و كتير بقوا بيحبوا ياكلوا اللي قدامهم من أول كلمة يقولها

وأغلبهم مبيكملوش قراءة أول جملة و تلاقيهم فتحوا ع الرابع

يتبع...

حأشوف الأفندي بتاعي يا أوختشي

و ابقى اكمل لاحقا

عقبال ياختشي ما تسيبيني كده عشان الافندي بتاعك قريبا

قولي آمين

:wub:

[عنبو]

ابووووووس مين اللى على الكرسى

مصريه متغربه بلدياتى

ازيك يا فندم وان شاء الله تكونى بخير انتى والاسره الكريمه وازى البنوته الصغيوره " حلوه الصغيوره دى "

دى كانت مقدمه لابد منها

انا كنت عاوز اجول ايه انا كنت عاوز اجول ايه انا كنت عاوز اجول ايه

اه افتكرت

انا كنت عاوز أسأل مش اجول

على العموم

بما انك عشت جل عمرك فى الغربه وكان ليكى احتكاك بالعنصر النسائى من جميع الجنسيات

تفتكرى ما هو اهم ما يميز المرأه المصريه عن باقى الجنسيات وما هو اهم ما يميز المرأه من باقى الجنسيات عن المرأه المصريه ؟

لماذا مصريه متغربه عاوزه تهاجر ؟

تفتكرى ان الغربه بتقرب الزوج وزجته من بعض وا العكس ؟ يعنى علشان ان مافيش مكان تغضب فيه لو زعلت منه يعنى ؟

لما ابن حضرتك يجى يقولك يا ماما الواد ده شتمنى بتعملى ايه ؟ علماً بان ابن حضرتك عنده 10 سنين طيب لو واحد ضربه بتقولى له ايه ؟

ايه اكتر حاجه انتى فرحانه بيها فى الدنيا دى ؟ وليه ؟

ما هو رأيك فى اهل مكه من خلال معايشتك ليهم يعنى ؟

ايهم اقرب الى قلبك المحاورات ام المطاريد ؟ متقوليش كلهم اولادى والكلام ده ؟

ليكى فى العربيات " بعد لما قولت السيارات اكتشفت ان فيه ناس هنا هم عارفين نفسهم بيزعلوا لما باقول سيارات فقولت اقول عربيات " ما هى عربيتك المفضله ؟

بتتصرفى ازاى لما تبقى قاعده فى قاعده وتلاقى واحد او واحده مصري ونازل سب وشتيمه فى مصر ؟

ما هو رأيك فى الزواج المبكر وما هو السن المناسب للزواج من وجهة نظرك طبعاً للجنسين ؟

موقف حصل قدامك مع ناس انتى متعرفهش والدمعه نزلت من عينك ايه هو الموقف ؟

لو بنت حضرتك قالت يا ماما انا بحب فلان الفلانى وفلان الفلانى ده مكنش مصرى كان سعودى هتقولى ليها ايه وهل هتفرق مصرى من اى جنسيه تانيه ؟

كفايه كده ونكمل بكره

عنبو

[عبير يونس]

13- نصيحة تقوليها....للماضة.....لريهام؟؟؟

أنا طبعا مبحبش كلمة نصايح دي

بتبقى تقيلة جدا

بافضل اسميها رأيي

اللي ممكن تقبليه أو لا

و طبعا رأيي حيبقى على حسب معلوماتي القليلة عنك

بس حيدخل فيه احساسي بيكي

انا شايفة فيكي انسانة مهذبة ورقيقة و احساسها عالي و دمها زي العسل و جد جدا

ياريت تفضلي كده على طول

بس كمان شايفاكي حساسة اوي و سهل انك تنجرحي

لازم تجمدي شوية

تذكري دايما

أن العاصفة اذا لم تقتلعك

فهي بالتأكيد تزيدك صلابة

14- الرجولة يعني ايه؟؟ الانوثة يعني ايه؟؟؟ الامومة يعني ايه؟؟؟

الرجولة أخلاق

و مش هي الذكورة

رجولة يعني شهامة...احتواء..قوة ممزوجة بحنان

الأنوثة فطرة طبيعية

في رأيي لا يمكن اكتسابها أو تعلمها

موجودة أو غير موجودة

هي كل ما يخالف الذكورة

الرقة...النعومة..الضعف

الأمومة

رابطة قوية جدا مع الأبناء

لا تنقطع بقطع الحبل السري

15- انتي كنتي طفلة شكلها ازاي....مطيعة....و حاضر يا ماما و حاضر يا بابا...و لا كنتي اطفال شوارع لمؤاخذة يعني؟؟؟؟

لا كنت برنسيس

فساتين منفوشة و شعر طويل و شرايط ملونة

ستايل أطفال السبعينات

و طول عمري مطيعة

مليش في التشرد نهائي

ولو اني كنت اتوق لكام مغامرة تشرد زي اصحابي

بس

كان الموضوع ده بعيد تماما

ماما الله يرحمها كانت متفرغة لي

:blink:

و ده عيب التربية المثالية

بتمنع المغامرات

و اللي اعتقد الواحد بيتعلم منها كتير

16- حاجة مكنتشي في طفولتك بس بتحاولي اوي تديها لاولادك؟؟

المغامرة

الاكتشاف

نفسي تتاح لي الفرصة و اعمل لهم كوخ الشجرة

و يكون في مكان يلعبوا فيه برة البيت يكتشفوا فيه الطبيعة

طبعا انا اتربيت

ان التراب و الطين والحاجات دي ياي

و موتسخيش فستانك

و اخذ كل الاحتياطات لنظافة الملابس والمكان

طبعا انا ماشية بنفس البرمجة

بس من جوة

نفسي اسيبهم يتمرمغوا في الطين و يلعبوا في التراب

و يتنططوا تحت المطر

و يرجعوا لي بالمنظر ده

و انا و لا يهمني

لأني بأغسل بتايد و باستعمل صابون ديتول

:lol:

17- الموقف اللي جاي ده افتراضي جدا: زوجك شخص تقليدي اوي.....متحفظ جدا.....سي السيد جدا جدا....بيبص لكل لحظات الجنون و الرومانسية انها سطحية...طفولة لا تليق.....سذاجة.....يا تري تعملي ايه...تغيريه...تتقبليه.....تحبطي...و تحاولي تنضجي و تستوي كده زي ما هو عايز....و لا تعملي ايه؟؟؟

شوفي يا لمضمض

أنا أؤمن تماما انه لا يمكن لأحد تغيير انسان آخر

ممكن يؤثر فيه

انما التغيير لازم ينشأ من رغبة الشخص نفسه في التغيير

يعني اقصى شيء ان أوريكي مفتاح النور

بس لازم انتي اللي تفتحيه

و ده مش حيحصل الا لو كنتي عايزة تفتحيه

انا طبعا في حاجات كتير في جوزي بتضايقني

و انا كمان فيا حاجات بتضايقه

انا بفضل الله قدرت اغير حاجات

و هو كمان اتغير

من ناحية الجنون والرومانسية

فانا أساسا مليش فيهم

طبعا راجع لتربية القرون الوسطى اللي اتربيت بيها

زي أطفال النبلاء والأسرة الحاكمة

قائمة طويلة من القيود و الممنوعات

و التصرف بحساب

كل نظرة أو كلمة أو حركة محسوبة عليا

كل حاجة عندي تقليدية

لا مكان للجنون

و لا حتى في تفكيري

نرجع لزوجي

من تجربتي 11 سنة جواز

الكلام مبيغيرش أي حاجة بل بيزود النفور

لكن في حاجة اسمها عدوى التغيير

لما بانجح أغير حاجة سلبية فيا

بتحصل للمحيطين بيا عدوى التغيير و طبعا زوجي هو اول المحيطين بيا

في حاجات لازم تتقبليها زي ما هي في الطرف الآخر

و في حاجات ممكن تحاولي تؤثري فيه عشان يغيرها بدون الكلام المباشر والشكوى و الانتقاد

لكن لا اسمح لأي شيء انه يحبطني

انا اتجوزت بني آدم باكيج على بعضه

بحلوه و مره

لازم اتقبله كما هو

لا مكان للاحباط في حياتي

طبعا ده من اقوى التغيرات الايجابية في حياتي

لأني كنت هشة جدا

والنظرة ممكن تحبطني

18- انتي امام شخص فوضوي جدا......يشعر ان الفوضي لازم تولد ابداع....(اوعي وشك... :lol: ).....اديه روشتة...احسن فعلا كده بقي مش كويس خااااااااالص

لما كنت صغيرة كنت بأعشق الفوضى المنظمة

يعني احب كتبي تبقى متناثرة امامي لأراها مرة واحدة

ملابسي كانت متناثرة

و كان يسعدني الفوضى اللونية لتناثر قطع الملابس المختلفة الألوان

طبعا مع النظافة

يعني اكنس و امسح واحط الحاجة متناثرة برضه

:blink:

طبعا ده كان التنفيس الوحيد في غرفتي ضمن سلسلة القيود في حياتي

بس لما اتجوزت

اختفت الفوضى بالتدريج

خصوصا بعد ما بدأ ابني الأول يحبي

اجبرني اشيل حاجاتي المتناثرة لأحميها من هجماته الشريرة

حتى اختفت الفوضى من امامي

تصدقي ان سؤالك ده فسر لي الفوضى بتاعة ولادي

و انها برضه تنفيس عن اللي بأعمله فيهم

اللي اكتشفته ان الفوضى الظاهرة ما هي الا انعكاس للفوضى الداخلية

و ان كل ما النفس اترتبت من جوة انعكس ده على السلوك الخارجي

19- يوم من عمري.........ايه بقي؟؟؟(وش عيل بيتفرج علي البوم الصور بتاعك و عمال يسال)

انا كنت من الناس اللي باحب أعيش في الماضي

و اخاف المستقبل

و النتيجة انني لم أكن أعيش الحاضر

كنت دوما أؤجل الحياة

لأن الحياة هي الحاضر

فالماضي لانملكه و لا المستقبل

ليس لدينا الا الا اللحظة التي نعيشها

و التي يمكن ان تكون آخر لحظة في حياتنا

سامحيني بطلت أعيش في الذكريات

عشان كده مش حأحاول حتى افتكر لك يوم من عمري فات

20- سؤال رخم....غتيت...لا مونكن ابدا تجاوبي عليه...(وش عيل اخو العيل اللي فوق....بس شرير حبتين)

شوفي انا ممكن اعطي ادق تفاصيل حياتي بس بمزاجي

و بالتالي أي سؤال اشم فيه ريحة فضول فهو بالنسبة لي غتت و رخم و لا مونكن اجاوب عليه

حتى لو كان اسمك ايه

:blink:

بس خلاص

فوتك بعافية

الله يعافيكي يا قمر

صباحك.....عيال...بوشوش مختلفة...بس برضه هيفضلوا عيال... بنحبهم اوي...مهما اتغابوا... :lol: