الميل للبكاء ...هلى هو مرض نفسى ؟؟

[shiko]

لى صديقة اعتز بها جداً...

الاحظ عليها اشياء استغرب منها جداً ويستغرب كل من حولنا ....

هى كريمة خلوقة وملتزمة ومضحية بشىء من الاستفزاز وتحس كده انها بنت بلد وجدعة ومستواها المادى جيد وليس لديها اى مشاكل على الظاهر "اعرف عائلتها وهى عائلة عادية ايضاً "نحسبهم على خير ولا نزكى على الله احد "يعنى انا موش شايفة اى مشكلة فى حياتها ممكن تعمل عندها خلفية لاى ضغوط مع العلم ان اول التعامل معاها تحس انها عاقلة جدا ومش سهلة فى تفكيرها ...بس اول ماتعاملت معاها لاحظت ظاهرة عفوية غريبة

انها ما ان تعرضت لاقل اقل الضغوط "مثلاً موش لاقية تاكسى أو بتعلب معانا وجه عليه حكم ما ...سهل وعادى "الا انها تنهار من البكاء ودموعها تنساب منها دون ادنى داعى وبمنتهى العفوية ...وتحس انها بتعيط بمنتهى القهر وكانها مقهورة غصباً واغتصاباً

تحدثت اليها ...وناقشتها فى الامر ..وقد كان انهارت من البكاء وقالتلى انها مشكلة قى حياتها موضوع العياط ده ومش لاقياله اى حل وانه بيعملها مشاكل كتير اثناء تعاملتها اليومية نصحتها بالذهاب إلى طبيب نفسى اكدت لى انها قد ذهبت وشخص حالتها بأنها حالة اكتئاب وكتب لها ادوية مضادة للاكتئاب ..تناولتها لفترة ولم تغير شىء فى الموضوع فتركتها

مع العلم انى اراها مرحة جدا وكوميدية إلى حد كبير يعنى موش مكتئبة ولا حاجة بس حقيقى غلبت معاها فى موضوع العياط ده

وموش عارفة هل ده مرض نفسى ولا سلوك غلط ؟؟

ممكن حد يساعدنى باسم طبيبة مسلمة مؤتمنة أو أيه هو الاسلوب الامثل لتعديل السلوك الانسانى ...

وشكرا

[shiko]

تشكرات افندينا لعدم الرد ونعتذر عن دخول العيادة بس ممكن حق الكشف بقى ؟؟

[tantrum]

الأخت الفاضلة

نفسى أساعدك بالرد و لكنى مجرد قارىء للطب النفسى و لست مختصا

لكن يبدوا أن هذه الأعراض غير طبيعية طبعا و تبدوا و كأنها إحدى أنواع الفوبيا (المخاوف المرضية) أو نمط مرضى للشخصية كالشخصية العصابية (الهستيرية). وكل هذا من أنواع القلق و ليس الإكتئاب.

لو حضرتك ذكرتى أعراض أخرى أو مشاكل أخرى يمكننى أن أسأل لك صديقا لى خبير بالطب النفسى.

مثل حالت صديقتك عند التعرض لأى ضغط هل تبكى فقط أم يصاحب ذلك زيادة فى ضربات القلب أو تعرق أو إغماء مثلا أو أيه أعراض أخرى.

خدى حق الكشف بس لو سألت صديقى و أفدتك فسأسترده مره أخرى.

[shiko]

شكراً .......سيدى على اهتمامك وردك الفريد والوحيد فى المنتدى ...

بس ده مايمنعش انى اخد حق الكشف مؤقتاً لحين استشارة الصديق..

وكدة يتبقى ليك 3وسائل مساعدة اخرى ..غير الاستعانة بالصديق

..وعلى العموم ممكن تسأل أسالة محددة وانا هاحاول اجاوب لو ده هايفيد .؟..

شكرا مرة أخرى

[جيمي]

انا كان نفسي اساعد والله ... بس خفت اعمل فيها دكتور نفساني ... اخليها تمشي فى الشارع تقول انا مش زعلانه انا مش هعيط تاني :happy: بس علشان نحدد هل الحاله وصلت للحاله المرضيه فعلا اللي تستدعي العلاج بالعقاقير .. بعض الاساله المهمه اللى لو راحت لدكتور نفسي هيسالها ... اهمها_ حالة النوم .. هل فى ارق ولا النوم طبيعي ... طبيعة الاحلام اذا كان فى احلام او كوابيس ...

_العرق ... وخصوصا الايدين والرجلين ..._ وياريت لو تعرفي تقوليلي معدل ضربات القلب وحالة ضغط الدم ... لان من غير المعلومات دي ممكن الحاله ماتتعداش واحده مرهفة الحس شويه ... او ممكن تكون مجرد ظرف طارق زي خروجها للعمل لاول مره وتركها لبيت الاسره .... وخصوصا ان حضرتك ذكرتي

مع العلم انى اراها مرحة جدا وكوميدية إلى حد كبير يعنى موش مكتئبة ولا حاجة بس حقيقى غلبت معاها فى موضوع العياط ده

يعني ممكن تكون من النوع الحساس الطفولي اللى ممكن اقل حاجه تفرحو واقل حاجه تبكيه ... وعلى فكره النوع ده نادر الوجود دلوقتي ... يعني لو صحبتك كده يبقي يا بختك بيها ... بجد

[رضوي]

السلام عليكم ورحمة الله وبركاته

عزيزتي شيكو

الشخصيات سريعة البكاء زي صاحبتك بتتجه للبكاء لتخفيف حدة التوتر والشعور بالقلق ...... وفي بعض الاحيان يطلق عليه المتخصصون في علم النفس البشرية اسم / النكوص ...... وهو انتهاج أساليب طفولية

وصعب جداً تشخيص ماتعاني به صديقتك من أعراض دون الرجوع لسجل الحالة الشخصية او بمعني ادق تاريخ طفولتها المبكرة والمتأخرة ومرحلة المراهقة ........ لان كل مايحدث في تلك الفترات يؤثر بطريقة مباشرة وواضحة علي حياه الشخص طول حياته .

لو لاحظتي المواقف اللي صديقتك تلجأ فيها للبكاء هتلاقيها هي المواقف التي تشعر فيها بعدم الامان ........ مهما كانت درجته

لا اعتقد أن الادوية والعقاقير تفيد في مثل هذه الحالة و من وصف حضرتك للحالة لا اعتقد ابداً انها حالة اكتئاب علي الاطلاق ( لانها دائمة البكاء مش عرض زائل يعني ) ........

دة من واقع قرأتي المتواضعة جداً في مجال علم النفس

هذا والله أعلي وأعلم

تحياتي

[tantrum]

بقينا تلاتة أهة ردوا عليكى

و كلنا غير مختصين

و كل واحد قالك رأى شكل

و لسه

أى خدمة بس بعد كده متقوليش أن أتلخبطت و مبقيتش فاهمة حاجة.

[rewsha]

ممكن الحاله ماتتعداش واحده مرهفة الحس شويه ... او ممكن تكون مجرد ظرف طارق زي خروجها للعمل لاول مره وتركها لبيت الاسره .... وخصوصا ان حضرتك ذكرتي

مع العلم انى اراها مرحة جدا وكوميدية إلى حد كبير يعنى موش مكتئبة ولا حاجة بس حقيقى غلبت معاها فى موضوع العياط ده

يعني ممكن تكون من النوع الحساس الطفولي اللى ممكن اقل حاجه تفرحو واقل حاجه تبكيه ...

هوه انا ممكن اقول حاجه؟ :wub:

صراحه انا شايفه ان تفسير او تحليل الاخ جيمي للموضوع فيه نسبه كبيره من الصحه وتفسير مقبول جدا

واقدر اقولك ان مش صاحبتك بس هيه اللي كده

انا نفسي من النوع ده .اللي لو اتعرضت لاي موقف بسيط بابكي علطول .وده مش بيكون ضعف ولا حاجه .ولا مرض نفسي .ولا اكتئاب

لاْن انا شايفه نفسي كويسه جدا رغم ان كل اللي بتحكيه عن صاحبتك زي ماتكوني بتحكي عني

لكن اللي اقدر اقوله ان فعلا ممكن ده يرجع لظرف طاريْ فعلا زي ما الخ جيمي ما قال .زي خروجها للعمل وتركها لبيت الاسره

انا واحده من الناس عشت مع والدي ووالدتي طول عمري حتى بعد ما اتجوزت كنت في الشقه اللي قصادهم وكنت باعتمد عليهم في حاجات كتير

ولذالك لما باتعرض لاْي موقف لوحدي .باتاْْثر بسرعه لاْني مش متعوده اني اكون لوحدي

ولاحظت فعلا ان انا من النوع اللي اقل حاجه تفرحه .واقل حاجه تبكيه

وفي ناس بتبقى كده ...........حساسه زياده عن اللزوم

[ذهبية]

هو معروف علميا يا شيكو ان المراءة اكثر بكاء من الرجل لطبيعتها الفسيولوجية اللى ربنا خلقها علية لوجود هرمونات معينة بتزيد

دموع المراءة اكتر بكتير من الرجل على قد ما الدموع لها فايدة انها بتريح الاعصاب و بتغسل العين و بتقلل من الاكتئاب

لكن مع حالة صحبتك اعتقد ان صديقتك بتستخدمها كنوع الهروب من الموقف لانها مش متعودة على المواجهة و اعتقد ان ممكن جدا

يكون تربيتها صارمة نوعا مااا فكانت دائما تلجا للبكاء للحصول على ما تريد

و مع الايام اتعودت عليها و اعتبرت ان دة طريقة تعبير طبيعية جداااا لعدم مواجهة الموقف او التاثير على الطرف الاخر واصبحت تصرفات لا

ارادية منها بدون ما تشعر ومع تفاهة الموقف نفسة

اعتقد ان صديقتك لها بعض الراوسب النفسية كتعبير عن احساسها بالاضطهاد

صديقتك مفتقدة الامان فى حياتها هى امامك لا ينقصها شىء و انتى محتارة فى حالاتها لكن الحقيقة

صديقتك تفقتد الى الامان والعطف و الحنان و تتبع هذا النوع للتاثير على الطرف الاخر لتحفيزة على العطف عليها او كاسلوب للوصول الى ما ترجو الية كما اتعودت من ضغرها

اعتقد ان علاجها من اللى حواليها اكتر منها هى عايزة تشعر بالامان و الحب و العطف

ولازم الى معها يعرفها ان الوصول الى ما تريد ليس بالرجوع الى الخلف مثل الاطفال بل مواجهة الموقف والتصرف كالكبار

لو كان البكاء لة تاثير فى البداية لكن بمرور الزمن سيمل منها زوجها ومن حولها لانة سوف يحس انها مازالت طفلة ضغيرةةةة

[fatfouta]

ياما ناس بتضحك ومرحة ادامك لكن متعرفيش ايه اللى جواها.........

بصى يا شيكو يا جميلة انا كمان كان عندى واحدة صحبتى ايام الجامعة مكانش فيه ادها فى الضحك والهظار ةالجرى واللعب وكان كل الناس تحب تتكلم معاها وتتلم حواليها وكل الناس كانت تشتيكلها همومها والله ماكانت بتتعب ولا تقول كفاية من هموم الناس ........لكن اول ماتتعرض لاقل موقف كانت تقعد تعيط ولو حتى كان موقف بسيط جدااا

ولما اتخرجنا واتجوزت وبقى عندها اطفال بقى فيه مسئوليه فطبعا بانت هنا المشكلة واتقلب الموضوع ده باكتئاب وبقت مش عاوزة تكلم حد ولا تشوف حد وعلطول بكااااااء .....دايمااااااااا

وده لانها اتحملت لاول مرة المسئوليه.....عارفة ليه اتقلب اكتئاب لان اكييييييد كان فيه غلط فى تربيتها يعنى مثلا فيه ظلم معين او عدم اعتماد على النفس........او اعتماد عالنفس زيادة شوية ومش لاقيه حد جمبها وحاجات كتير ممكن انتى ماتبقيش عارفاها

اللى عاوزة اقولهولك ان صاحبتك دى اكيد المشكلة جوا بيتها نفسه.....

اانتى ممكن تكونى عارفاها من بدرى ايوه وعارفة كل حاجة عنها بس فيه ناس مش بيعرفوا يعبروا عن اللى جواهم حتى لاقرب الناس ليهم ........وبعدين تفضل ساكته ساكتة ومستحمله وبعدين عند اول مسئوليه تنهار وتعيط

وعلى فكرة ده بيكون اساسه من البيت ...... هى عندها مشكلة جوا نفسها ممكن ماتكونش حساها ولا قادرة تحط ايدها عليها .......ايوه انا معاكى هى ممكن تحتاج دكتور نفسى بس عشان يخليها تعرف فين اللى مضايقها.........ايه اللى بيخليها تبكى من غير سبب .....وهكذا

بس هل هى سألتك وطلبت منك تشوفى معاها حل ولا انتى لوحدك شايلة همها كده ؟؟؟ انا بسأل كده عشان هى ممكن ماتكونش حاسه انها عندها مشكلة اصلا

بس يا حبيبتى الست او البنت المصرية بتشوف حاجات كتير جداااا على مدى عمرها كله من متاعب وتحمل مسئوليات وانتوا لسه صغنيين لو ماقدرتش تحل المشكلة دى من دلوقتى .....ادام فعلا ذى ما ذهبية قلتلك هتبقى نكدية ومتعبة لكل اللى حواليها وخصوصا جوزها طبعا

لكن لو على سؤالك ان الميل للبكاء مرض نفسى ؟؟؟ ايوه ساعات بيبقى كده بس مش فى كل الحالات فيه ناس بتبقى حساسة جدااا وتلاقيها من اقل حاجة تعيط

وفى الاخر ممكن ماتبقاش فيه مشكلة وتكون هى حنينة وطيبة زيادة شوية وانتى كمان احن لانك بتخافى عليها وعشان كده بيصعب عليكى انها بتبكى كتير .......ان شاء الله مايبقاش فيه حاجة

بس خدى بالك فى كل الحالات هى محتاجة لحد جميل ذيك يبقى معاها وده من حظها طبعا

وربنا يسعدك

[shiko]

أيه كل ده شكلى هادفع وبالدولار...شيكات بقى وتحويلات

أولاً جزاكم الله خيراً عنها كل الخير ...والله يا جماعة انا موش عارفة من غيركم ...كان ممكن ابتدى ازاى واعمل ايه ...بس بعد ما اقريت ردودكم أجمعين ..تقريباً بدءت احط ايدى على اول الخيط

أستاذى المحترم /جيمى

حقيقى الكلام ده ...قال وانا اللى فاكرة ان حضرتك داكتور "بفتح الدال" ..بس على العموم ده برضه مايمنعش من الاجابة على استفساراتك ...الحقيقة انه مافيش اى اعراض اخرى بتظهر عليها ولا ارق ولا غيره وعلى طول ضغطها فى الطبيعى وموش بتعانى من اى مشاكل صحية ..ومسألة خروجها للشغل موش هى اللى مأثرة عليها لانها صاحبتى من المدرسة الثانوى ..يعنى الموضوع موش مسئولية ولا ضغوط

لكن مسئلة مرهفة الحس دى ...هى اللى ممكن نقف عندها شوية انا بشوفها كده فعلاً هى فعلاً طفولية جداً فى مشاعرها زى ماحضرتك ذكرت بس هنا بقى لينا وقفة ؟؟ هل هى حبست نفسها فى سجن الطفولة وقعدت هناك وماعجبهاش الدنيا اللى هى وصلت عندها وعايزة تفضل طفلة على طووول ...بس ده موش واضح فى تصرفاتها ..يعنى هى مشهورة بأنها عقلانية وتفكيرها كبير و فى اغلب الاوقات الناس بتاخد بمشورتها ورأيها .. موضوع بقى يا بختى بيها ده نقدر نقول يا بختها هى انها لاقيت من حضراتكم كل الاهتمام ده ..ربنا يكرمك

أختى رضوى

كلامك بالذات استوقفنى كثيراً لانه فى جانب كبير من الصحة ...هى فعلاً بتعيط بمنهج الاطفال ..وبالرجوع لتاريخها حسبما ذكرتى ..تلاقى انه معاها منذ الطفولة ..وموضوع عدم احساسها بالأمان ممكن يكون صحيح لحد كبير ..بس اللى وصلتله انه فعلاً الموضوع اكبر من كونه اكتئاب ..وردك فيه جانب كبير أوى من النور الذى اضاء جانب كبير من الظلام .. ممكن تواصلى معايا ازاى نخليها تقدر تحط ايديها على العلة ..علشان نقدر ندور على العلاج ..تحياتى لكى

Tantrum

لا بالعكس انا بحي فيك مبادرتك الطيبة فى مساعدتى واغلب الردود ساعدتنى فى مناقشة صديقتى ..وان شاء الله اكيد هايكون ليها مردود طيب فى المساعدة

روشة

طب انا عجابنى اوى انك واضحة مع نفسك وتحليلك للامور اكيد ساعدك كتير للخروج من المشكلة ...الحساسية شىء محمود للبنات احياناً..بس صديقتى دى متحملة مسئولية من طفولتها ..يعنى مسئولة عن اخواتها ومذاكرتهم والنادى والخروج والتمرين وكده وهى معجبة جداً بالموضوع ده ..وخروجها للعمل ماخليهاش تتعرض لأى ضغوط ..

هو الموضوع يمكن يكون زى مارضوى قالت يرجع للطفولة وده اللى اكشف لى بالمناقشة بعد ما قريت ردودكم..

انا عاوزاكى تتابعينا بالموقف عندك وتقوليلنا ازاى عالجتى المواقف دى مع المجتمع الخارجى ؟؟وخصوصاً ان الموضوع بيبقى محرج لو الناس اول مرة تقابلك وماتعرفكيش...وربنا يخليلك بابا وماما ياروشة.

ذهبية

هو معروف علميا يا شيكو ان المراءة اكثر بكاء من الرجل لطبيعتها الفسيولوجية اللى ربنا خلقها علية لوجود هرمونات معينة بتزيد

دموع المراءة اكتر بكتير من الرجل على قد ما الدموع لها فايدة انها بتريح الاعصاب و بتغسل العين و بتقلل من الاكتئاب

معظم تحليلاتك فى محلها فعلا دموع البنت اكتر من الراجل..

لكن مع حالة صحبتك اعتقد ان صديقتك بتستخدمها كنوع الهروب من الموقف لانها مش متعودة على المواجهة و اعتقد ان ممكن جدا

يكون تربيتها صارمة نوعا مااا فكانت دائما تلجا للبكاء للحصول على ما تريد

. موضوع الهروب ده ..اكيد برضه ليه اسبابه .. تربيتها صارمة نوعا مااا ...صح 100% ..ويمكن ده عامل اساسى ورئيسى فى القصة ومعاه زاد احساسها بالاضطهاد ده صح جداً..لانها كتير بتحس ان تصرفات اللى ادامها اضطهاد ليها هى شخصياً موش لعيب فى شخصه أو قلة ذوق منه وانا اتهيألى انه بالسبب ده بدءنا نحط ايدينا على اول الخيط ...واتهيالى انها بتحمل نفسها فوق طاقتها .. بس ملحوظة هى بتزعل أوى لو حد تراجع عن موقفه وعملها اللى هى عاوزاه لو عيطت ...بجد بتحس انه بيشفق عليها وصعبت عليه وهى فعلا بتضايق من الاحساس ده وبكد نستبعد فكرة انها بتستعمل الاسلوب ده للحصول على ماتريد ..

اعتقد ان صديقتك لها بعض الراوسب النفسية كتعبير عن احساسها بالاضطهاد

صديقتك مفتقدة الامان فى حياتها هى امامك لا ينقصها شىء و انتى محتارة فى حالاتها لكن الحقيقة

افتقادها للامان ...انا معاكى فيه ..هى خوافة بعض الشىء مع العلم انها بتعمل فيها 7 رجالة يمكن علشان تدارى رعبها ...ومسألة علاجها من اللى حواليها دى فعلاً انا شايفة ان الاقربون منها هما اللى لازم يساعدوها وعشان كده بدءت بمناقشتها فى الموضوع وهى متفهمة ده جداً وعلى فكرة انا بأكد تانى هى مابتستعملش ده علشان تاخد اللى عاووزاه ..واصلا هى مابتبقاش عاوزة حاجة معينة دى كتير بتبقى صاحبة حق وتسيبه ...سطورك اضافت لى الكثير ..بجد جزاكى الله خيراً عنها وعنى

فتافيت السكر فتفوتة

عندك حق ...ربنا اعلم بكل واحد ..من جواه ايه ...وشوش كتير بتضحك وقلوب كتير بتبكى ...كان الله فى عون صديقتك وعفا عنها وهىء لها كل الخير

هى عندها مشكلة جوا نفسها ممكن ماتكونش حساها ولا قادرة تحط ايدها عليها...

وده موش صح علشان كده هى بتدور جوه نفسها على الغلط فين لجؤها لطبيب للأسف محلش حاجة بالعكس كانت حلول فى منتهى منتهى السطحية

بس هل هى سألتك وطلبت منك تشوفى معاها حل ولا انتى لوحدك شايلة همها كده ؟؟؟ انا بسأل كده عشان هى ممكن ماتكونش حاسه انها عندها مشكلة اصلا

هى فعلاً ..حاسة بالمشكلة وفضفضت معايا كتير وكتير بتجيلى وهى مكسوفة من نفسها موت ومنهارة من العياط علشان موقف عدى عليها وعيطت غصب عنها وصعبت عليها نفسها ومع تفاهة الموقف عياطها خلاها ماتعرفش تتصرف صح

وهى عارفة انى بحاول اقدملها المساعدة فى الموضوع ده بكل السبل وهى معترفة تماما بالمشكلة بس موش عارفيين نبدأ الحل منين وازاى ..

بس خدى بالك فى كل الحالات هى محتاجة لحد جميل ذيك يبقى معاها وده من حظها طبعا

انا بجد بحبها جداً ولانها صديقتى الصدوقة ولانها دى المشكلة الرئيسية اللى بتواجهها ..كان لازم نحطها فى محل النقاش ...واذا كان حظها حلو علشان ان كنت قدراً صاحبتها ...لكن واشهد الله على ذلك انى انها محظوظة اكتر وانا معاها بصحبتكم الجميلة

اخيراً...ايديكم امتدت لى ولها بالعون ...تكرماً واحساناً وطمعاً فى كرم اخلاقكم اسألكم الدعاء لها ..ان يعينها الله ...

[رضوي]

السلام عليكم ورحمة الله وبركاته

عزيزتي شيكو

أختى رضوى

كلامك بالذات استوقفنى كثيراً لانه فى جانب كبير من الصحة ...هى فعلاً بتعيط بمنهج الاطفال ..وبالرجوع لتاريخها حسبما ذكرتى ..تلاقى انه معاها منذ الطفولة ..وموضوع عدم احساسها بالأمان ممكن يكون صحيح لحد كبير ..بس اللى وصلتله انه فعلاً الموضوع اكبر من كونه اكتئاب ..وردك فيه جانب كبير أوى من النور الذى اضاء جانب كبير من الظلام .. ممكن تواصلى معايا ازاى نخليها تقدر تحط ايديها على العلة ..علشان نقدر ندور على العلاج ..تحياتى لكى

اكيد طبعاً اكون سعيدة جداً لو قدرت أساعد صاحبتك .... تحت أمرك طبعاً

بس لازم نرجع لتاريخها في مرحلة الطفولة والمشاكل اللي اتعرضت لها في فترات طفولتها لان مرحلة الطفولة ومايحدث فيها مهمة جداً في حياه كل منا .

يعني محتاجين معلومات أكتر ......... وربنا يهدينا لما فيه الخير

تحياتي

[shiko]

شكراً ليكى يا رضوى ..انا استأذنت صديقتى

وبعد مناقشة ..واسئلة واجابات ..لاقيت ان معظم الاسئلة دى هى طرحتها على نفسها قبل كدة

هى...تربت تربي عادية جداً مع اسرة ..اكثر من ممتازة "ده على حد قولها

ترتيبها رقم 3 فى العائلة

تربية والدها ووالدتها وجدها ...كانت صارمة جداً وهنا بقى لينا وقفة ...يمكن تكون الشدة فى التربية هى اللى عملت فيها كده ؟؟ علاوة على انها شخصية بطبيعتها حساسة ..ولم يدرك من حولها فرط حساسيتها ..وبالغوا فى اجبارها على كل تفاصيل الحياة ؟؟

بس هى دلوقتى مافيش عليها اى شدة ولا حاجة هى بتعترف بكدة وان الشدة عليها فى الطفولة كانت علشان مصلحتها

ودلوقتى الجميع يثق فى قدرتها على التصرف السليم ورجاحة عقلها فى اتخاذ القرار يبقى ايه بقى لزمه العياط؟؟

[ذهبية]

بس انتى يا شيكو ما قولتيش علاقتها اية مع زوجها و اولادها يعنى مثلا سايب الحمل كلة عليها فى تربية الاولاد عشلان كدة دة سايب جواها ضغط جامد

علاقتها مع زوجها فيها تقصير معين او نقص فى نقطة معينة

شخصية جوزها معتدلة او متشددة او حنين عليها ولا قاسى و سى السيد ولا لة علاقات كتير

علاقتها مع اهل زوجها حماتها مثلا و عمتها فية ضغط من النقطة دى

كان ليها احلام لم تحقق و دة سبب لها احساس ان دايما فيى حاجة ناقصة

ياريت تساليها احلامها اية و نفسها فى اية مش يمكن احلامها فى المستقبل تحمل داخل نفسيتها حلم قديم لم يتحقق بعد

[رضوي]

السلام عليكم ورحمة الله وبركاته

عزيزتي شيكو

الحساسية ليست سبب كافي للبكاء في مواقف عادية ........ زي اللي قلتيها في أمثلتك

في كام سؤال

- هي بتبكي لما تتعرض للمواقف دي وهي لوحدها ولا لما بيبقي معاه حد ؟

- طيب لو اتعرضت لموقف سخيف و خلص الموقف ..... وجت تحكي الموقف لحد من عيلتها بتعيط وهي بتحكي ولا خلاص الموقف عدي وهي هديت ؟

- ولو هي في مكان لوحدها ( نقول مثلاً قاعدة في البيت لوحدها ) وحصل اي حاجة ..... وجه حد من عيلتها ياتري حدة البكاء بتزيد لما بتشوف حد من عيلتها ولا بتقل ؟

- قلتي ان ترتيبها الثالثة ... طيب ياتري هي البنت الوحيدة ولا عندها اخوات رجالة ؟

- ياتري هي بتبكي في المواقف المفرحة ؟

- لما يحصل اي موقف بتحس انها مخنوقة اوي وفي حاجة واقفة في الحنجرة ومش قادرة تتنفس ؟ وبعدين تبكي ؟ ولا دمعوها تسبق اي شعور ؟

- ياتري وهي صغيرة كانت لما بتحتاج حاجة ( عايزة تشتري فستان مثلاً ) كانت بتلجأ للبكاء ؟ ولو اه ياتري كان الاسلوب دة بيجيب نتيجة مع عليتها ؟

شوفي يا حبيبتي

من خلال اجابة الاسئلة دي ممكن نقدر نحدد سوا اذا ماكان صديقتك تعاني من اعراض لمرض نفسي ولا لاْ

بس من وجهة نظري المتواضعة جداً اعتقد ان دة مش مرض نفسي ولا حاجة .... دة مجرد اسلوب دفاعي لاشعوري لتخفيف حدة القلق والتوتر نتيجة للشعور بعدم الامان

هذا والله أعلم

تحياتي

[shiko]

fhvبارlk فى البداية انا ممتنة جداً لمساعدتكم الكريمة ...كونكم اصدقائى ..القدامى الذين لم التقى بهم بعد

ذهبيتى الحبيبة :

أنا مبدئيا عرضت عليها استفساراتكم ودى كانت تقريباً اجابتها:

• ما قولتيش علاقتها اية مع زوجها و اولادها يعنى مثلا سايب الحمل كلة عليها فى تربية الاولاد عشلان كدة دة سايب جواها ضغط جامد
  

هى فى الاساس موش متزوجة ...ومع ذلك هى من النوع الذى يستمتع بمساعدة الاخرين وبالتالى هانستبعد اى عامل من العوامل التالية

كان ليها احلام لم تحقق و دة سبب لها احساس ان دايما فيى حاجة ناقصة

تعترف ان موضوع العياط ده معاها من صغرها وقبل وجود ...اى عوامل او احلام ...

ياريت تساليها احلامها اية و نفسها فى اية مش يمكن احلامها فى المستقبل تحمل داخل نفسيتها حلم قديم لم يتحقق بعد

احلامها برضه غريبة .."انا طلبت منها تكتب احلامه على ورقة طلعتلى من قاع مكتبها ورقة مكتوب فيها "اسردها لكى مع حذف الشخصيات "

مدرسة لذوى الاحتياجات الخاصة لـ.....

سواق لماما

جنينة واسعة....

مرجيحة لـ.....

حج لـ.....

وحاجات تانية خاصة بس اغلبيتها موش ليها

رضوتى الجميلة :

هي بتبكي لما تتعرض للمواقف دي وهي لوحدها ولا لما بيبقي معاه حد ؟

الحقيقة مابتفرقش فى الحالتين احيانا بزورها فى البيت لوحدها والاقيها بتعيط من موقف حصلها فى التليفون مع حد مثلاً ومافيش غيرها فى البيت ..

طيب لو اتعرضت لموقف سخيف و خلص الموقف ..... وجت تحكي الموقف لحد من عيلتها بتعيط وهي بتحكي ولا خلاص الموقف عدي وهي هديت ؟

لا بتعيط لما تيجى تحكى الموقف كأن الموقف بيحصل حالاً

لو هي في مكان لوحدها ( نقول مثلاً قاعدة في البيت لوحدها ) وحصل اي حاجة ..... وجه حد من عيلتها ياتري حدة البكاء بتزيد لما بتشوف حد من عيلتها ولا بتقل ؟

لا بتزيد ولا بتقل

لتي ان ترتيبها الثالثة ... طيب ياتري هي البنت الوحيدة ولا عندها اخوات رجالة ؟

ترتيبها 3 بعد اتنين بنات ويليها ولدين يصغراها

- [

لما يحصل اي موقف بتحس انها مخنوقة اوي وفي حاجة واقفة في الحنجرة ومش قادرة تتنفس ؟ وبعدين تبكي ؟ ولا دمعوها تسبق اي شعور ؟

مخنوقة اوي وفي حاجة واقفة في الحنجرة ومش قادرة تتنفس وبشوف شفايفها بترتعش وتحور وجنتيها بشدة

اتري وهي صغيرة كانت لما بتحتاج حاجة ( عايزة تشتري فستان مثلاً ) كانت بتلجأ للبكاء ؟ ولو اه ياتري كان الاسلوب دة بيجيب نتيجة مع عليتها ؟

لا ...والاسلوب ده مابيجيبش اى نتيجة مع والدها ...بالعكس باعترافها ان الموضوع ده بيخليها تضيع حقوقها

ودى كل المعلومات المتاحة بعد استئذنها والرجوع اليها ....

تم تعديل 30 يناير 2010 بواسطة shiko

[لماضة مصرية جدا]

شكراً ليكى يا رضوى ..انا استأذنت صديقتى

وبعد مناقشة ..واسئلة واجابات ..لاقيت ان معظم الاسئلة دى هى طرحتها على نفسها قبل كدة

هى...تربت تربي عادية جداً مع اسرة ..اكثر من ممتازة "ده على حد قولها

ترتيبها رقم 3 فى العائلة

تربية والدها ووالدتها وجدها ...كانت صارمة جداً وهنا بقى لينا وقفة ...يمكن تكون الشدة فى التربية هى اللى عملت فيها كده ؟؟ علاوة على انها شخصية بطبيعتها حساسة ..ولم يدرك من حولها فرط حساسيتها ..وبالغوا فى اجبارها على كل تفاصيل الحياة ؟؟

بس هى دلوقتى مافيش عليها اى شدة ولا حاجة هى بتعترف بكدة وان الشدة عليها فى الطفولة كانت علشان مصلحتها

ودلوقتى الجميع يثق فى قدرتها على التصرف السليم ورجاحة عقلها فى اتخاذ القرار يبقى ايه بقى لزمه العياط؟؟

السلام عليكم و رحمة الله و بركاته

تصدقي يا شيكو بون... انا و انا بقرا الجملة اللي فوق..... انا عيطت.... الله يسامحك!!!

احيانا حقيقي حب الاهل الشديد لينا....بيخلي الواحد حساس جدا.....حتي النسمة ممكن توجعه......؟؟؟؟

و عشان كده لما بيخرج بره البيت الدافي ده جدا.... و بتخطفه الدنيا.....مبيلاقيش منها غير الوجع.....و بيضطر يعيط

يا خراااااااااااااااااشي..... ايه اللون الغامق ده......(اكيد انتي بتفكري مشهد عادل إمام لما قالك.....و انا اعيييييييييييييييط)

عارفة يا شيكو..... بعيد جدا جدا عن كل التحليل النفسي.....

ليه عندي احساس....

ان صاحبتك هي الوحيدة القادرة انها تعيد اكتشاف نفسها....

تعرف مفاتيحها...

تواجه مخاوفها.....

و تحاول تتحكم في مشاعرها.... لأنها الوحيدة القادرة علي ذلك....

يمكن انا غلط....بس ده رأيي

الكتب احيانا بتقولنا حاجات كتير..... بس كل واحد فينا بيقرا بعين غير

كل واحد عارف وجعه من جوه إيه.....يمكن بيتوه مني.... بس عارف فين الوجع

بس عارفة برضه يا شيكو.....الوجع...... كل الوجع هيروح

لما يكون عندها حالة من الانس بالله

و الله اعلي و أعلم

ع فكرة يا شيكو..... انا برضه كنت بكلمك و بكلم نفسي

مساااااااااااااااكي........ راحة..... بعد دموع ....

مسااااااااكي.......يقين....... أن ما عاد يعني في الدنيا شيئا و ان ما يأتي به الله هو قطعا كل الخير

[ذهبية]

شيكو صاحبتك مش عايشة لنفسها خالص صاحبتك من دنيا ملائكية مختلفة عن دنيا البشر

قمة الحساسية اللى لو اللى قدمها مافهمها هيظلمها جامد جدااااا

للاسف تربيتها من الاساس كانت خطا لانهااتربت انها تلغى شخصيتها و تدوب فى شخصية الاخرين و تتفاعل بانفعالهم و تتاثر بيهم اكتر ما بتفكر فى نفسها هىىى

صديقتك للاسف عايزة تربى نفسها تانى من الاول لان الى روبوها ربوها غلط لغوا شخصيتهاااا تماما طلعوها ضعيفة اضعف ن ورقة الدينا بتشليها و تحطها و لما تلاقيها نفسها بتتشال تخاف و تترعب و تعيط

انا لو مكانك لازم اقف جنيها لانها مش هتعرف تساعد روحها لانها م شعارفة الطريق اساساااا

انا انصحك انك تساعديها بانك تهدى لها مجموعة من الكتب اللى فيها تنمية بشرية اكتر

زى ازاى تثق فى نفسك ازاى ازاى تقاوم القلق

وقبل كل دةةةة لازم تحدد لنفسها هدف فى الحياة لازم تعمل حاجة بتحبها و تنجح فيها علشان تحس انها ناجحة فى حاجة

و تعلميها مواجهة الموقف

لو مش بتشتغل تشتغل لو بمجال مش بتحبة تدور على مجال بتحبة تاخد كورسات فى حاجة مختلفة عن مجالها

تتعرف على ناس كتيرة و تكبر علاقاتها الاجتماعية لان دة اللى هيكسر حاجز الخوف جواها

تشترك فى خدمات انسانية زى رسالة او اى جمعية فيها تجمعات كتيرةةة

ودة حسب راى المتواضع و ربنا يخلى دة فى ميزان حسناتك يا شيكو انك شايلة هم صديقتك و بتفكرى لها

[shiko]

ولم يدرك من حولها فرط حساسيتها ..وبالغوا فى اجبارها على كل تفاصيل الحياة ؟؟

السلام عليكم و رحمة الله و بركاته

تصدقي يا شيكو بون... انا و انا بقرا الجملة اللي فوق..... انا عيطت.... الله يسامحك!!!

تصدقى انتى ...انا كنت قاعدة فى الباص وانا بقرا ردك الصبح وكنت بقراها على الموبايل ...لانى مابقدرش استنى لما اوصل الشغل ...واتفتحت فى العياط ...وطبعاً الكل كان مستغرب انا دموعى دى منهارة ليه وياترى انا ايه الخبراللى وصلنى على التليفون خلى دموعى تنزل كده...لماضتك دى موش هاتبطليها بقى ؟؟؟ حتى فى دموعك لمضة وشقية .

احيانا حقيقي حب الاهل الشديد لينا....بيخلي الواحد حساس جدا.....حتي النسمة ممكن توجعه......؟؟؟؟

وعلشان كدة انتى النسمة اللى وجعتنى ...بس ده صعب يستمر مع الواحد يفضل يتوجع كده ...صعب استمرار الالم بالشكل ده

ليه عندي احساس....

ان صاحبتك هي الوحيدة القادرة انها تعيد اكتشاف نفسها...

فعلا هى بتحاول بس احيانا بتحس ان الطريق طويل اوى ..واللى فات صعب

و تحاول تتحكم في مشاعرها.... لأنها الوحيدة القادرة علي ذلك....

يمكن انا غلط....بس ده رأيي

بالعكس انتى صح الصح ...هى ادرى بذاتها ...علشان كده هى متمسكة انها تحاول تغبر ده بس لازم تلاقى المساعدة ولو بالكلمة

بس الحقيقة علشان نسيب الغلط ونروح ناحية الصح ...لازم نفكر صح ونتلاشى الاخطاء

يعنى هى لما بتواجه موقف وتحاول ماتعيطش فيه..تلاقيها بتزعق جااااااااااامد جدا وصوتها بيعلى ..يمكن علشان تدارى ضعفها !!حاولت تكحلها عميتها ...والناس طبعاً شايفة ادامها فيلم جبروت امراءة....

كل واحد عارف وجعه من جوه إيه.....يمكن بيتوه مني.... بس عارف فين الوجع

بس عارفة برضه يا شيكو.....الوجع...... كل الوجع هيروح لما يكون عندها حالة من الانس بالله

بالمناسبة دى هى علمتنى دعاء حلوووووو قوى ...اللهم يامؤنس كل وحيد ويا صاحب كل فريد ويا قريب غير بعيد ..اللهم اجبر كسرنا و انس وحشتنا واقل عثرتنا واجب دعوتنا

ع فكرة يا شيكو..... انا برضه كنت بكلمك و بكلم نفسي

أنا شايفة انك لازم تتعلجى من موضوع الكلام مع نفسك ده !!وانا ممكن اعرفك على صديقتى وتتعالجوا سوا (علشان نفتحها شوية)

دمتى بكل الخير والحب .......صباحك بنفسج يا لماضتى

[shiko]

شيكو صاحبتك مش عايشة لنفسها خالص صاحبتك من دنيا ملائكية مختلفة عن دنيا البشر

قمة الحساسية اللى لو اللى قدمها مافهمها هيظلمها جامد جدااااا

للاسف تربيتها من الاساس كانت خطا لانهااتربت انها تلغى شخصيتها و تدوب فى شخصية الاخرين و تتفاعل بانفعالهم و تتاثر بيهم اكتر ما بتفكر فى نفسها هى

فعلاً هى دى كل الكلمات اللى ممكن تتقال ...

انا لو مكانك لازم اقف جنيها لانها مش هتعرف تساعد روحها لانها م شعارفة الطريق اساساااا

انا انصحك انك تساعديها بانك تهدى لها مجموعة من الكتب اللى فيها تنمية بشرية اكتر

زى ازاى تثق فى نفسك ازاى ازاى تقاوم القلق

احنا بدءنا من 3 سنين ولحد دلوقتى النتيجة تكون بنسبة 5%...احنا بدءنا بكتاب عائض القرنى لاتحزن

وكتب تانية عبارة عن مواقف ساخرة ...علمتها تسخر من الموقف بدل ما تعيط ...وده كان ليه التأثير الأكبر

وقبل كل دةةةة لازم تحدد لنفسها هدف فى الحياة لازم تعمل حاجة بتحبها و تنجح فيها علشان تحس انها ناجحة فى حاجة

و تعلميها مواجهة الموقف لو مش بتشتغل تشتغل لو بمجال مش بتحبة تدور على مجال بتحبة تاخد كورسات فى حاجة مختلفة عن مجالها تتعرف على ناس كتيرة و تكبر علاقاتها الاجتماعية لان دة اللى هيكسر حاجز الخوف جواها تشترك فى خدمات انسانية زى رسالة او اى جمعية فيها تجمعات كتيرةةة

..الغريب انها بتعمل كل الحاجات اللى قرلتيها دى ...الاشتراك فى رياضة ..بتشتغل فى مجال كويس جداً ....كورسات ...العمل الاجتماعى ..كل ده بتعملوه ...

ودة حسب راى المتواضع و ربنا يخلى دة فى ميزان حسناتك يا شيكو انك شايلة هم صديقتك و بتفكرى لها

اللهم امين ...بس انا كمان مكانتش متخيلة استجابتكم الكريمة دى ....ودايما بفكر نفسى ان الله فى عون العبد ما دام العبد فى عون اخيه...