التعليم في مصر .. إلى أين ؟

[الغريب]

السلام عليكم ورحمة الله وبركاته

..

أسمحولي هنا أثير موضوع غاية في الأهمية من وجهة نظري وهو موضوع التعليم في مصر والمستوى الذي آل إليه..

وإن كان التعليم والصحة يمثلان قضايا أمن قومي بالنسبة لمصر "على حد تعبير القيادة السياسية"

فمن يلتفت إلى التعليم بوضعه الحالي..

أنا أعتقد أن موضوع التعليم لو تم توجيهه بشكل سليم سيتم التخلص من مشاكل أجتماعية ربما يراها البعض بعيدة عن التعليم مثل التحرش الجنسي والفقر والبطالة والفوضوية وعدم النظام الذين أصبحو من متلازمات المصريين في كل مكان..

[Amr Radwan]

التعليم اهم استثمار الدولة ممكن تستثمر فيه ..

لو طلع جيل متعلم كويس اكيد هتختفي كل الافات اللي احنا فيها سواء داخل مصر او خارج مصر ..

انا كنت ببقا مستغرب جدا لمستوي الاداء و الاحترافية في العمل اللي بشوفها للاخوة اللبنانيين و لكن مفيش حاجة بتيجي كده .. الناس دي بتتعلم صح و بتتعلم ازاي تتعلم مش مجرد مناهج تتحفظ لا تودي و لا تجيب ..

فعلا .. جودة الشعوب من جودة التعليم فيها ..

المهم انا ليا اقتراحين للمشكلة دي ..

1- كل واحد في مجاله يعمل مبلغ يستثمره في انه يتعلم حاجة جديدة تفيده في شغله ..

2- لو عايز يضمن مستقبل ابنه فعلا .. يستثمر في تعليمه مش انه يسيب له حساب في البنك او شقة و عربية ..

تحياتي لكم

[لماضة مصرية جدا]

السلام عليكم و رحمة الله و بركاته

كنت بقرا من يومين... تساؤل عن ايه جدوي الجامعات العربية.... اذا كان غير معترف بيها في العالم؟؟؟ اللي بياخد دكتوراة من جامعة عربية مثلا (لا تعني شيئا لو فكر انه يعيش بالخارج؟؟؟ و دي حالة حقيقية جدا

ممكن افكر معاكو بصوت عالي في شوية حاجات كده:

1- الاصل في كلمة تعليم كان زمان كلمة اسمها....instruction.....و دي كانت منحصرة في التعليم الديني اللي بيقدم في المساجد و الكنايس...بكل مفرداته... شكلا و مضمونا....

المصطلح اتحول بعد كده بقي....education..... يعني بتحاول تدي الفرد العلوم اللي بيحتاجها.....

و بعدين تتطور بقي....Learning.....لان المفروض طالب العلم بيبقي في حالة نهم شديدة لا تتوقف للاستزادة من المعرفة

آخر حاجة اعرفها عن تطور المصطلحات قالهالي استاذي .. اللي هي ايه

Learning is abiltiy to push the boundaries of knowledge

يعني التعلم الحقيقي هو مش انك تستزيد من المعرفة..... لا التعلم الحقيقي انك ترفض المسلمات اللي وصلها السابقون عشان تكون قادر علي تخطي الحاجز الضيق جدا للتفكير.... يعني فكر بره الصندوق...

سؤالي بقي..... احنا في انهي مرحلة م اللي فوق؟؟؟؟و عايزين نوصل لانهي مرحلة؟؟؟

2- هو احنا بنتعلم ليه؟؟؟ لو لقينا اجابة للسؤال ده..... التغيير يبدا برفض وضع راهن....و برغبة و قناعة بضرورة التغيير.... طب احنا عندنا حلم قومي.... عشان نقول ان التعليم هيخدمنا فيه......؟؟؟

هو ليه الناس اتجمعت علي مشروع مستشفي 57357... بس مش قادرة تتجمع ع التعليم.... مع ان اللي حاصل دلوقتي ممكن يكون اشد ضراوة من مرض عنيف زي السرطان عافانا الله؟؟؟

3- امتي الناس.... اللي هو انا و انت.... و اي حد عنده طفل بيتربي في البلد دي.....هيرفض ان مشروعه الصغير اللي بيستثمر فيه حلمه و عمره... امتي هنرفض اني اتعلم من غير جودة حقيقية......و تبقي بس الدنيا ماشية ع الورق؟؟؟

رايي الشخصي..... التعليم... و لا التعلم..... مش محتاج فلوس.... و الدليل نظرة سريعة ع التعليم في الخليج... و قارنوه بالتعليم في اقليم اسمه التبت في الصين....(الاول حيث تتضاعف الثروة و تنقرض العقول... و الثاني حيث يتم انشاء فصول في كهوف الجبال....بس عقول قادرة انها تتصدي للحكومة الصينية)

التعليم عايز رؤية..... و قناعة..... و ايمان ان ابسط حقوقي ان اشارك في تعليم يحترمني كبني آدم و يحترم عقلي

انا لو عندي اسرة صغيرة.... هضطر اعمل تعليم موازي..... يعني مدرسة.....و مدرسة بره المدرسة..... عشان احافظ علي مشروع حلمي في اطفالي.... كحق مشروع ليا جدا جدا

فوتكم بعافية

[Amr Radwan]

كلام جميل و منطقي .. بس لي تعقيب صغير و هو ان في الفترة الحالية .. التعليم له تكلفة و كل ما كانت التكلفة عاليه كل ما كانت جودته عاليه ..

مع العلم ان دي مش قاعدة ثابته و ليها شواذ لان بعض الجامعات او المدارس الضعيفة بترفع تكلفتها عشان تقول انها تعليم راقي .. و خاصة في الخليج .

و لذلك لازم هنرجع في النهاية و نقول ان عشان نتعلم كويس او نعلم اولادنا كويس لازم نفكر و ندرس كويس المكان اللي هندرس فيه .. و نفكر فيه علي اساس استثماري زي ما رجال الاعمال بيفكروا .. بيدفع دلوقتي مبلغ عشان يحصد بعد كده مبلغ مضاعف عدة مرات .. بس في حالتنا هيكون المحصلة هي عقول قادرة علي تحويل المجتمع الي مجتمع راقي و متحضر ..

حاجة كمان .. مش مجرد نعتمد اننا بنعلم اولادنا او بنتعلم في اماكن كويسة و خلاص .. لا .. تحصيل العلم و المتابعة و الاصرار من الحاجات المهمة ..

كنت حضرت مرة Presentation لجامعة "لستر" البريطانية عن ال MBA او ماجستير ادارة الاعمال و الراجل قال كلمة حلوة قوي .. عشان تدرس معانا لازم يكون معاك 3 حاجات (فلوس و وقت و ارادة) لو مش معاك واحدة منهم ما تضيعش وقتك معانا :wub:

كمان برده افتكرت حلقة للدكتور طارق السويدان كان بيتكلم فيها عن التعليم في الوطن العربي و انه اصبح سئ قال مقوله مش هنساها و هي اننا عشان نوصل للغرب و نتخطي المراحل اللي وصوللها لازم تكون سرعتنا في التعلم و البحث العلمي اكبر بكثير من سرعتهم عشان نوصل لهم و نتخطاهم لاننا دلوقتي الفجوة بتكبر بينا .

و لذلك يجب ان نصحوا بسرعة لايقاف التوسع في الفجوة