الحب .. و العسل الاسود

[فــيــروز]

الحقيقه لا اعرف هل نوقش هذا الموضوع من قبل فى المنتدى ام لا

بالامس وانا فى طريق العوده للمنزل كنت فى تاكسى مشغل الغنوه الجديده لمصطفى قمر .. اللحن من النوع المالوف لكن لانى فى كل المرات السابقه التى صادفت فيها وسمعت الاغنيه كان عندى شئ آخر اعمله وبالتالى لم اكن اركز معها خالص !! بالامس ركزت و حسيت بغثيان من كتر كلمات الحب فى الغنوه و ما تلاها من اغانى

ولا ادرى لم لا تدور اغنياتنا سوى عن الحب و الغرام و الهيام و اللوعه الى آخر هذه الاشياء !! ده حتى حاجه تموع النفس .. ولانى لست من هواة اكل السكريات قوى وباحس بضيق اما آكلها كتير فكرنى الموضوع ده بالعسل الاسود المركز !! مسكر اوى بطريقه مزعجه !! عشان كده بيحطوا عليه طحينه

اين الطحينه فى الاغانى؟ وكيف تكون كل اغانينا تتكلم عن الحب و الحاله الرومانسيه و الاجتماعيه لدينا فى النازل !! هو كل شئ فى حياتنا بيمشى بالعكس ليه !!

[linux]

اين الطحينه فى الاغانى؟ وكيف تكون كل اغانينا تتكلم عن الحب و الحاله الرومانسيه و الاجتماعيه لدينا فى النازل !! هو كل شئ فى حياتنا بيمشى بالعكس ليه !!

يا أخت فيــــــــروز،

أسمحي لي أختلف معاكي بشأن هذا الرأئ و أرد عليكي رد علمي بحت و مختصر و هو: أزاي بئة؟!!!

و اليكي مجموعة من الدلائل:

- ساكن في حي السيدة و حبيبى ساكن في الحسين

تناقش مشكلة المرور ... و الزمخشري رأية انها تناقش أرتفاع أسعار اجزم و القباقيب ... و الله اعلم

- السح الدح أمبوا

تعالج قضية نقص المياه و خاصة في الأدوار العليا

- بقي عايز تنساني

فقدان الذاكرة و اللاذاهيمر و العياذ بالله

- بيت العز يا بيتنا

ظاهرة التفاخر المتفشية في المجتمع المصري

- انا و العذاب و هواك

تناقش مشكلة الفريق القومي لكرة القدم

- لا مش انا اللي ابكي

المجدعة بتاعت الرجالة المصريين و لا مؤاخذة

- جانا الهوا

مناخ مصر الجاف و مترب ليلا و حار عرقان صيفا

- كامل الاوصاف / مداح القمر

مقتبسة من مقالات سمير رجب في مدح الزعيم

- ليالي الانس في فينا

أيام الهلس و الذي مضي

- افتح زرار قميصي

واحد مراهق لسة فرحان بشعر صدرة!

- الكون كله بيدور

تأييد للأخ جاليليو جاليليلي ربنا يجحمة مطرح ما راح

- احمر شفايف

غلو أسعار مستحضرات التضليل ... أقصد التجميل!

- محلاها عيشة الفلاحة

حقد الأنسان لأخية

- الدنيا ريشة ف هوا

أحلام واحد منجد بلدي ... بس مرهف الأحاسيس حبتين

- الف ليلة وليلة

قرأة أدبية

- اروح لمين

ظاهرة العيال التايهة و كيفية القضاء عليها

- الاطلال

أنهيار المنازل الغير مطابقة للمواصفات

- اسال روحك

حوار رقيق بين زوجة نكدية و جوزها ... يذكر هنا أن الرقابة قد غيرت أسم الأغنية الأصلي و هو "اسال روحك يا منيل"

- يا مسهرني

حملة القضاء علي البراغيت

- شبكنا ستايرو حرير

شغل محدسين ... أقولك أية؟!

- يا سارق من عيني النوم

يقظة البوليس المصري

- مدام امستردام

العلاقات الدولية مع أوروبا

- البت بيضا

واحد مجنون و قليل الحيا!!

- شيخ البلد خلف ولد

الهيكل التنظيمى و الأداري لحكومة المحروسة و "آليات" العمل

أظن أقتنعتي ... مش كده؟

[فــيــروز]

هو فيه قول بعد قولك يا اخ لينكس

هو انت كنت غطسان فين الفتره اللى فاتت عشان تبقى راجع بهذا الانتعاش بسم الله ما شاء الله هاتولنا خشبه نمكسها ..

الحقيقه كثيرون تكلموا فى انحصار اغانينا فى الحب و الغرام !! ولو لقيت اغانى اخرى تتناول موضوعات مختلفه تلاقيها ركيكه او مكتوبه سلق بيض !! مره فى برنامج ربات البيوت سمعت غنوه بيقول مغنيها "وشك حلو عليا لو شفته الصبحيه .. " ماكملتش باقى الحكايه الحقيقه من البرود اللى الغنوه بتتغنى بيه !!

ليه زمان الاغانى الوطنيه كانت ولازالت تمس القلب و تحمس من يسمعها .. و الاغانى الدينيه التى كنت اسمعها فى الصباح قبل ذهابى للمدرسه لازلت اتذكرها الى اليوم و افرح جدا حين اسمعها بينما كل ما ينتج الآن ليس له طعم او روح

تم تعديل 10 فبراير 2004 بواسطة فــيــروز

[ragab2]

فعلا

الأغانى كلها عن الحب والغرام والهيام والهجر

أو

لناصر كلنا بنحبك وحبيب الملايين

مافيش وسط

مافيش عن الطبيعة والوفاء والأخوة والورد والفل

التى لا تحتاج طحينة

[Katamando]

يقال أن الفن مرآة الشعوب، فإن كان المعروض و المقدم من فن قوياً وممتعاً ويحاكي العقل فهو دلالة على قوة المتلقي (وهو الشعب) لأنه نابع منه في الأصل أما إذا كان المعروض أو المقدم ركيك دل على استهتار كلا الطرفين ببعضهما البعض الملقي والمتلقي

في الزمن السابق كان الجد هو سمة الشعب وهي صفة فرضتها الظروف من حروب وضعف اقتصاد فكان المنتج الفني يعكس حالة الجدية كل في مجاله

أما في حالة الإنهزام الثقافي والاقتصادي والحضاري الحالية التي تعيشها المنطقة فلابد وان يكون المنتج الفني بهذه الضحالة والسطحية

قديما كانت أم كلثوم تغني

اخي جاوز الظالمون المدى

وحالياً هل يستطيع أحد أن يجد اغنية تمثل عنواناً لهذه المرحلة؟

لا أعتقد فهي مرحلة ضبابية منعدمة الرؤية

فلا جناح على أي أحد ان يفعل ما يشاء

ولله الامر من قبل ومن بعد

[linux]

هو انت كنت غطسان فين الفتره اللى فاتت عشان تبقى راجع بهذا الانتعاش بسم الله ما شاء الله هاتولنا خشبه نمكسها ..

أنا تحت النظر يافندم

بلاش نفتح الموضوع ده ياشابة لحسن بيقلب علي المواجع ...

واضح أني بقالي كتير غايب و برة الفورمة ...

طيب، طالما أن ردك كان جاد، فأليكي تعليقي الجاد (نوعا):

ما وصفتيه ليس مقصورا علي مصر فقط، معظم الأغاني في العالم عن الحب و الهيام والغرام الخ.

لذلك أنا أحب أسمع فرق زي Pink Floyd مثلا، تلاقي معظم أغانيهم عن حاجات جادة، كبعض أمثلة: الحروب، سياسة تاتشر، أنواع البني آدمين، الخ.

انما ده أنشقاق عن القاعدة العريضة الا وهي أغاني الحب.

[بنت شعنونة]

fsh:: fsh:: وفيه اغاني

شبراااااااا وبنات شبراااااا

عادي في المعادي وكذلك في الزمالك

اما انت مش اجنبي ما تصلي بينا ع النبي

وكتييييييييير كتييييييييير من عينة اغاني الميكروباااااااااص

هييييييييييييه فكرتووووووووني بالميكروباصااااااات

وحشتنييييييييييي الشغلالالالانة دييييييييي fsh:: fsh:: fsh:: :angry: :angry: :angry: :angry: :angry:

[فــيــروز]

والله يا دكتور رجب حتى الاغانى التى كتبت لناصر تختلف كثيرا عن "اخترناه" و "يامعلى راية الحريه"

اغانى ناصر ميزتها ان من كتبها كان يشعر حقا بما يقول بينما الاغانى الحديثه من يكتبها يشعر بالجوع و يكتبها فقط من اجل اكل العيش

الم يكن لسيد درويش اغانى تتحدث عن الظواهر الاجتماعيه المختلفه؟ الم يكتب بيرم التونسى على ما اظن مقارنا بين حياتنا وبين لندن و باريس !! اذن الموضوعات موجوده ويمكن الكلام فيها بسهوله و طلاقه ايه اللى بيمنع !!

Katamando

حمدلله على السلامه

تمام الفن مرآة الشعوب .. ولكن الحاله الاقتصاديه التى نعيشها حاليا ضنك الضنك فلم لم يفرض هذا بعض الجديه على الفن المنتج حديثا !! بيقولوا بعد النكسه تعددت الافلام الهابطه و اعتقد ان كان منها خلى بالك من "الفاضله" زوزو

لينكس عبده لينكس وولده

اللى يهمنا عودتك منتعشا و سعيدا يا فندم ويا رب دايما

اضطريت ارد بجديه على ردك الاول الاكثر من رائع الذى اضحكنى بعمق حتى لا ينقل الموضوع الى باب الابتسام :angry: انت عارف اول ما حد يضحك فى الموضوع يبقى مهدد يتنقل باب الابتسام

لا اعلم هل اغانى الحب و الغرام فى الخارج تماثل اغانينا التى تشعر الانسان انه عاوز يصيبه الصمم ولايسمع الاغانى الركيكه التى فاضت بها علينا قريحة طفح الشعراء الغنائيين الذين ابتلينا بهم !! لا اعتقد ان هناك شئ يماثل "لو مره نادانى اوهب له زمانى واقول آه يانى" الى آخر هذه الجمله ذات قافية "آنى" دى !!

شعنونه

اغلب ثقافتى الغنائيه فى فترة ثانوى كانت من الميكروباصات :angry: كنت بافرح بشبابى جدا اما الاقينى عارفه اغانى محدش ابدا سمعها من اسرتى بسبب تنطيطى بين الميكروباصات خلال مرواحى للمجاميع الدراسيه !! هييييييييه دنيا

[R.M.G.]

بالعكس أغاني الايام دي قل فيها قوى الحب والكلام عنه بعكس اغاني زمان التي تربينا عليها وكلها عن 3حاجات مافيش غيرهم الحب والهجر والعزول وحكاية العزول دي تقريبا اختفت من اغانينا وانا والله عشت فترة طويلة من عمري نفسي اعرف ايه هو العزول ده وخايف اسأل لا تطلع كلمة اكبر من سني ولا حاجه لغاية ما عرفته وللأسف بعد ماعرفته بطلوا يكتبولوا في الأغاني

انا طبعا لاأؤيد أغاني هذه الأيام لأنها -وخاصة في الأواخر-أصبحت سوقية مثل قوم أقف وانت بتكلمنى وبيتهيألي انها متألفه في قسم بوليس والبنت اللزقه اللي بتقول مش حسيبه ومهما يبعد مش حيهرب من نصيبه وحتجيبه حتجيبه وناقص تقول "وشرف امي لاجيبه" هو في ايه؟

تم تعديل 12 فبراير 2004 بواسطة R.M.G.

[فــيــروز]

وناقص تقول "وشرف امي لاجيبه" هو في ايه؟

ضحكتنى وانا ماليش نفس mfb: :blink: :blink:

[Sherief AbdelWahab]

موضوع جميل ورائع يا فيروز..و إن كنت أعتقد أن الفن عموما و ليس الغناء فقط يجب أن يخرج من دائرة الحب "الملزقة" المملة ، و ليكن لنا عظة فيما يحدث في الخارج حيث هناك

أغنيات لكل شيء ، للكراهية و للغضب و حتى للضحك..

تبقى ملحوظة: لمن يريد أن يرسل مواضيع في تلك الزاوية..أكرر : هذه الزاوية مخصصة لوسائل الإعلام المصرية المقروءة و المسموعة و المرئية ، و ليس للفنون التي لها زاوية خاصة بذاتها..

ولذلك أستأذن فيروزة محاورات المصريين بنقل الموضوع إلى شعر وفنون و قراءات..وهو ركن يحتاج لمواضيع ثرية و هامة مثل هذا الموضوع..

خلص الكلام

[afiona]

1-الأغانى الجديدة تندرج تحت تصنيف الردح العاطفى والشبشبة الرومانسية وبطلته الأخت شيرين أحمد.

2- هناك فرق بين الشعبى بتاع عدوية والأسمر والعزبى وبين الإسفاف بتاع بهاء سلطان.

3- الأغانى الوطنية موجودة، اللى وحشاه قوى ممكن يسمع محمد ثروت أو هانى شاكح فى أوبريت يدور حول مصر مبارك.

4- زمان كنت بأحب أغنية (فدائى) لحليم وأغنية (طالعين فى إيدنا سلاح) اللى أظن أول مرة إتغنت كانت فى فيلم (العصفور) ليوسف شاهين و أغنية شادية بتاعة الوحشين اللى مابيعدوش على مصر.

حاليا إقتصرت إداعتها على إنتصارات مزعومة لأندية هزيلة.

5- فريق Scorpion فى مطلع التسعينات مع سقوط الشيوعية وإنهيار سور برلين عملوا أغنية رائعة عن التغيير والحرية ..... إسعفنا يا وايت باشا هارت....

6- كان فى أغنية هابطة عبارة عن dialogue بين رجل ومراته بتاعة( عندك تلاتين فستان..وبتشكى من الحرمان) وهى ترد(طلقنى يا واد طلقنى....بابا جاى أهوه دلوقتى)....أغنية مؤثرة قوى...

أفيونة

نائب من نواب الكيف

[afiona]

ضحكتنى وانا ماليش نفس

هو الضحك مش عيب، أنا عندى فكرة طبقتها بنجاح منقطع الحمير:

خزنى فهامة أحمد رجب و نص كلمة بتاعته ولما تحسى برغبة فى الإكتئاب والنكد طلعيهم....بتنفع كل مرة وأحسن من أقوى حبوب هلوسة...

أفيونة

من نواب الفسيخ

[R.M.G.]

ومن مساخر ما يحدث حاليا على ساحة الأغاني الوطنية ان أغنية من أغنيات اكتوبر الجميله أخذوا لحنها وعملوه أعلان لأسمنت أسيوط"أغنية ماشيين في ايدنا سلاح"بالذمة دي مش مسخرة؟بكرة يعملوا نشيد بلادي إعلان لزبادي جهينه واقترح ان يكون المطلع"زبادي زبادي زبادي ..من جهينه ياولادي ترا ترا ترا ترالم!!!

[Sherief AbdelWahab]

العزيز أفيونة:

ما لدينا ردح فعلا.. لكنك تظلم شيرين ، ففي بعض اغاني المدعوة أصالة تشعر أن الحبيب الذي تغني له هو سلوبودان ميلوسوفيتش!..و تتوعده بالويل و الثبور و عظائم الأمور..ردح ارتقى في بعض أغانيها إلى مستوى الهذيان "سنين و أنا با داري عليهم"..و التي تذكرني بالبيت العظيم البليغ لأحد الشعراء: مين كسر إيه دة!

كله يرقع بالصوت الحياني و يدعو على الحبيب الجزار قاتل النساء و الأطفال شارون العالم العربي..و نفس الشيء في العالم الرجالي..فالمدعو أحمد سعد مثلا "اللي في جراحي نسيني..و في حزني بيبكيني ..حد الله بينه و بيني و بين الهوا"...

وهناك أغاني تستدعي مخزون قلة الأدب لدى المستمع ليصف بها مغنيها و كاتبها ..كأغنية اللبنانية مايا نصري:

تحب أحبك حبة حب

أحب من حب الأحباب؟

و لا تحب أحبك حب

حبيب لحبيب و أحباب لأحباب

شوقك شقشق شق الشوق

شوقني من شوق على شوق

وحياة شوقك لأشقيك شوق

و لا شقشق و لا شق الشوق!

هذا الإسفاف و الـ.....الغنائي لا يمكن مقارنته حتى بالغناء العاطفي التقليدي كرائعة ماجدة الرومي "كن صديقي"...فقط قارن الأبيات التالية بالهراء المذكور بأعلى:

أنا محتاجة جدا لميناء سلام

و أنا متعبة من قصص العشق و أخبار الغرام..

فتكلم..

لماذا تنسى حين تلقاني نصف الكلام

في مقال قديم بمجلة بدائع الزهور التي صدرت منذ قرن تقريبا..كان الكاتب ينتقد الأغاني واصفا إياها بأنها كلها حب و شوق و غدر و حزن ..

ما أشبه الليلة بالبارحة..

شد اللحاف..

عفوا ..

خلص الكلام

[se_ Elsyed]

طبعاً الأغاني الحديثة اللي بتتكلموا عنها هي لوغاريتمات بالنسبة لي لأني ببساطة بطلت أركب ميكروباصات ...

لكن عجبتني جداً الكلمات اللي قالها شريف وبتغنيه مايا نصري

تحب أحبك حبة حب

أحب من حب الأحباب؟

و لا تحب أحبك حب

حبيب لحبيب و أحباب لأحباب

شوقك شقشق شق الشوق

شوقني من شوق على شوق

وحياة شوقك لأشقيك شوق

و لا شقشق و لا شق الشوق!

بتفكرني بفيلم الكيف بتاع محمود عبد العزيز لما كان قاعد مع مؤلف الاغاني المشهور وهو بيسمعه

يا سابل الصبر

صبر الصباي المتصبصبين

وصبرني بحبت صبر بصبابة المتصبرين ...