إعمل عبيط

[MaYousof]

وعلشان انا استأثرت بالعبط كله لوحدى ممكن تعلن عن جوايز علشان العبيط اكتر يتصل اكتر وفرصته تكون اكتر من اللى عامل عبيط وموش عبيط على طبيعته

الفاضلة shiko,

المحاورات منتدى ديموقراطي, ولا يجوز في أي تجمع ديموقراطي الاستئثار بحق العبط لعضو واحد فقط في هذا التجمع دون غيره. أنا كمان إجابتي على السؤال الأول هي رقم 2, فلازم نقتسم العبط سويا.

وبالمناسبة دي ممكن أسأل حضرتك سؤال شخصي؟ :happy:

أخبار هيثم إيه؟ :egyflag:

تم تعديل 31 يناير 2010 بواسطة MaYousof

[MaYousof]

الفاضل أسد, شكرا جزيلا على الإجابة والتفاعل. استفدت شخصيا من رد حضرتك :happy:

------------------------

الشكر الجزيل لكل من شارك, وكل من جاوب على السؤال الأول أو تفاعل مع معطيات الموضوع :egyflag:

------------------------

الاسئلة الآتية اسئلة جادة وليست مجال للاستخفاف, على الأقل من وجهة نظري.

------------------------

السؤال الثاني

الشعب المصري, هل عامل عبيط؟

1. العبيط مش محتاج يعمل عبيط.

2. اللي مش عامل فيهم عبيط مش محتاج يعملها.

3. أيوه, بالفعل, الشعب المصري عامل عبيط.

4. السؤال ده فاجئني. بس ممكن جدا يكون عامل عبيط. ليه لأ؟ الشعب المصري قادر, ويعملها.

5. اغلبهم عاملين عُبْط, والباقي مابين رافض ومستنكر ومعترض وممتعض.

6. عبيط اللي يقول إن الشعب المصري عامل عبيط.

7. الشعب المصري أذكى شعب في الدنيا. أذكى شعب على وجه الكرة الأرضية.

8. والله ما أعرف, بس تبقى لذيذة لو عرفت.

9. أنا مش من حقي أكون المتّهم والقاضي في نفس الوقت عشان أرد على السؤال ده.

10. يا أخ محمد, الله يهديك يا أخي بس, لا يجوز التعميم في مثل هذه الأمور.

11. ولا اختيار من اللي فوق.

------------------------

السؤال الثالث

جحا:

1. كان عبيط.

2. كان عامل عبيط.

3. شخصية خيالية ألفها كاتب خياله مريض.

4. مين جحا ده حضرتك؟

5. ولا اختيار من اللي فوق.

------------------------

السؤال الرابع

جمال الشاعر:

1. عبيط.

2. عامل عبيط.

3. واعر.

4. بجح.

5. ما أقدرش أحكم.

6. ولا اختيار من اللي فوق.

------------------------

السؤال الخامس

أنت لم تشارك في هذا الموضوع لأن:

1. إنت متأكد إن صاحب الموضوع ده عبيط.

2. الإيمان بضع وسبعون شعبة والحياء شعبة من شعب الإيمان.

3. العُبْط بس هم اللي بيشاركوا في موضوع عن العَبَط.

4. دي أول مرة تدخل الموضوع ده.

5. إنت بتشارك بالفعل, فالسؤال لا ينطبق عليك.

6. ولا اختيار من اللي فوق.

------------------------

السؤال السادس

دلالة من دلالات عبط صاحب الموضوع:

1. إنه حط الموضوع في باب الموضوعات الجادة.

2. إن عقله بيصورله إن في إيده قِرْبة مخرومة عَمّال ينفخ فيها.

3. إن خياله المريض محسسه إنه ينفع يبقى جزء من مَنفِلّة موتور أثري.

4. كل الخيارات اللي فوق.

5. ولا اختيار من اللي فوق.

[MaYousof]

السؤال الثاني: الشعب المصري, هل عامل عبيط؟

بسم الله الرحمن الرحيم, الاجابة رقم 4:

السؤال ده فاجئني. بس ممكن جدا يكون عامل عبيط. ليه لأ؟ الشعب المصري قادر, ويعملها :happy:

------------------------

السؤال الثالث: جحا:

بسم الله الرحمن الرحيم, الاجابة رقم 2:

كان عامل عبيط :egyflag:

------------------------

السؤال الرابع: جمال الشاعر:

بسم الله الرحمن الرحيم, الاجابة رقم 3:

واعر :egyflag:

------------------------

السؤال الخامس: أنت لم تشارك في هذا الموضوع لأن:

بسم الله الرحمن الرحيم, الاجابة رقم 5:

أنا باشارك بالفعل, فالسؤال لا ينطبق عليَّ :egyflag:

------------------------

السؤال السادس: دلالة من دلالات عبط صاحب الموضوع:

بسم الله الرحمن الرحيم, الاجابة رقم 4:

كل الخيارات اللي فوق :egyflag:

تم تعديل 31 يناير 2010 بواسطة MaYousof

[MaYousof]

يكون جميل جدا لو تمكننا كلنا من معرفة إجاباتكم الشخصية على الأسئلة المطروحة :blush2:

[ريمون]

اتفق مع محمد يوسف و د. هشام و اسد!

ساعات الواحد يتمنى انه كان بسيط او عبيط او معندهوش فكره. لكن المشكله ان الواحد عرف و اتفتحت عينيه و صعب يفضل ساكت!

سليمان الحكيم بعد ما ربنا اعطاه الحكمه و المعرفه قال "لان في كثرة الحكمة كثرة الغم و الذي يزيد علما يزيد حزنا "(الجامعه 1:18)

اجابه السؤال الاول هى رقم 6 "مين عارف إنه مش عبيط ومش مستعد يعمل عبيط ومقتنع حقيقي من جواه إن مايصحش الواحد لا يكون عبيط ولا يعمل عبيط؟"

[أسد]

إجاباتي على الأسئلة الباقية ..

السؤال الثاني: الشعب المصري, هل عامل عبيط؟

إجابتي هي :

5. اغلبهم عاملين عُبْط, والباقي مابين رافض ومستنكر ومعترض وممتعض.

السؤال الثالث : جحا

الإجابة ..

2. كان عامل عبيط

السؤال الرابع : جمال الشاعر

3. واعر

باقي الأسئلة ..

ناوي أعمل عبيط وما أجاوبش عليهم ..

[MZohairy]

الأمريكان الأشقاء عندهم مثل جميل قوي يا محمد في الموضوع ده

Successful life formula: one third is to be smart and two third is acting stupid

يعني معادلة الحياه الناجحه ثلثها انك تكون ذكي و ثلثينها ان تدعي الغباء

[Folana]

السلام عليكم ورحمة الله....

أعمل عبيط....وماله

السؤال الأول :...أختار الاجابة رقم (3)....مع بعض التعديلات

مين عارف إنه مش عبيط بس عامل عبيط بمزاجه ومبسوط إنه عامل عبيط؟

يعنى ممكن نقول :

مين عارف أنه مش عبيط بس أحيانا يعمل عبيط الى حين....

كده معقول .....

وحضرتك مش طالب تفسير للاختيار لحسن الحظ...

السؤال الثانى:

5. اغلبهم عاملين عُبْط, والباقي مابين رافض ومستنكر ومعترض وممتعض

وأضيف....والقليل منهم مستسلم لمجريات الأمور على طريقة "ليس فى الامكان أبدع مما كان"

السؤال الثالث:

جحا كان عبيط...ومكار بالفطرة...

فالعبط والمكر طلعوا قماشة نسيجها واحد...تجعلنا نتصور أنه كان عامل عبيط....قاصد يعنى.. :lol:

لكن لا ننكر أبدا اننا نستشهد بعبطه فى المواقف التى تستدعى الحكمة...أو نستطيع القول بأننا استخلصنا الحكمة من عبطه ...او ادعائه العبط (ليكن)

تحضرنى هنا حكاية جحا والحمار وابنه......والتى نشير بها دائما الى مقولة " رضا الناس غاية لا تدرك"...

هو توصل لها ببساطة جدا ومن مشوار واحد بالحمار....ممكن ناس تانية تقتنع بها بعد العديد والعديد من التجارب.....وهكذا....

الا أننا أيضا لا نستطيع انكار عبطه فى رضوخه لاراء الناس واهتمامه بها .....

يعنى ممكن نقول انه احيانا كان بيعمل عبيط...لكن فى الغالب هو كان عبيط... :lol:

السؤال الرابع:

ما أقدرش أحكم على جمال الشاعر ان كان عامل عبيط أو واعر... :lol:

السؤال الخامس..:

هذا السؤال تحديدا يتعارض مع اجابة حضرتك على السؤال الاول وهى "انك عبيط ...الى اخر الاجابة"

لان حضرتك بطرحك لهذا السؤال بتدفع اللى ما اشتركش فى الموضوع الى ان يشترك...زى حالاتى كده....وبكده تبقى نجحت فى استقطاب أراء اخرى لم تشارك منذ بداية الموضوع....فين العبط هنا بقى :lol: ...وعليه فأنا أعترض على اجابتك على السؤال الأول ...لان السؤال الخامس يدل على ذكاء خارق..

السؤال السادس:

بما انى مش مقتنعة باختيار حضرتك لاجابة السؤال الاول...

وبما ان اجابة السؤال الاخير مبنية على الاستنتاج او الموافقة ضمنيا على اجابة السؤال الاول

اذن...لن اجاوب على السؤال الاخير....

لانى مش...

وأخيرا ..ياريت لو حضرتك تكتب لنا تعريف العبط من وجهة نظرك...ربما يساعد على توضيح فكرة الموضوع....احتمال اطلع كده وانا مش واخدة بالى.... :lol:

خالص مودتى واحترامى

[MaYousof]

اجابه السؤال الاول هى رقم 6 "مين عارف إنه مش عبيط ومش مستعد يعمل عبيط ومقتنع حقيقي من جواه إن مايصحش الواحد لا يكون عبيط ولا يعمل عبيط؟"

ريمو العزيز, اسعدتني مشاركتك جدا ونتمنى نشوف إجابات حضرتك على باقي الأسئلة

-------------------

إجاباتي على الأسئلة الباقية ..

أخي الفاضل أسد, إجاباتك وتفاعلك يثرني ويثري الآخرين. استفيد دوما من مشاركاتك :D

-------------------

معادلة الحياه الناجحه ثلثها انك تكون ذكي و ثلثينها ان تدعي الغباء

أبو إياد, أعتقد أن أعزاءنا الأمريكان يطبقون هذا المثل بحذافيره :happy:

شاكر من كل قلبي على التفاعل والمشاركة

[MaYousof]

أستاذتي الكريمة فولانة,

شرفت بشكل كبير بمداخلة حضرتك. ودعني أبدأ ردي بآخر مطلب لحضرتك, وهو تعريف العبط, العبيط, والعامل عبيط.

تعريفات

عبط: ضعف شديد في القدرة على فهم وإدرك الأمور المحيطة ينتج عنه عدم الاكتراث لأي منها.

عبيط: فرد ذو ضعف شديد في القدرة على فهم وإدرك الأمور المحيطة ينتج عنه عدم اكتراثه لأي منها.

عامل عبيط: فرد عديم الاكتراث للأمور المحيطة بالرغم من قدرته الكاملة على فهمها وإدركها جميعا.

بالنسبة لإجابة حضرتك على السؤال الخامس, أستاذتي الكريمة, فقد أوردت ما نصه: "وعليه فأنا أعترض على اجابتك على السؤال الأول". فاسمحي لي بالتوضيح. لقد اعتمدت مبدأين أساسيين في مداخلاتي بهذا الموضوع وهما:

المبدأ الأول: مبدأ نسبية الحقيقة.

المبدأ الثاني: مبدأ عدم الاستخفاف بعقول قراء الموضوع بأي شكل كان. وذلك دون التنازل عن حق استثارة عقولهم للحدود القصوى بهدف المصلحة العامة ودون أي منفعة شخصية.

المبدأ الأول يقضي بحقيقة إني عبيط, وذلك عند أخذ المصريين في الاعتبار كعامل أساسي تقاس عليه حقيقة عبطي.

المبدأ الثاني يقضي بنزاهة كل كلمة في أي مداخلة لي في هذا الموضوع, بما فيها عدم المحاولة باختيار أي إجابة كاذبة أو غير نزيهة حتى ولو على وجه الاستظراف.

برهان الحقيقة التي يقضيها المبدأ الأول سهل, سلس ويمكن استيعابه بكل بساطة. لكني سأبين معني "نسبية الحقيقة" سريعا, مع علمي يقينا بكفاية حضرتك عن بيانها, لكن يقضي الحفاظ على نزاهة جميع مداخلتي أن أفعال. نسبية الحقيقة تعني إن أي معلومة هي بالفعل صحيحة بالنسبة للعوامل الأساسية المقاس عليها تلك المعلومة. وأن نفس هذه الحقيقة قد تكون خطأ إذا اتخذت مرجعية أخرى كعامل أساسي للقياس. نعود لبرهان حقيقة عبطي, فأنا بكل وضوح مختلف عن عموم المصريين. فما أراه قيّما يرونه غثّا والعكس بالعكس. وهذا يقودنا لحالتين, واحدة منهم صائبة:

الحالة الأولى: هم الصحيحين في رؤياهم وأنا الخطاء. ما يعني ضعف شديد في قدرتي على فهم وإدرك الأمور المحيطة مقارنة بهم, وهذا يعني إني عبيط.

الحالة الثانية: هم الخاطئين في رؤياهم وأنا الصحيح. ما يعني إن محاولاتي لإصلاح التيار الجارف هو ضعف شديد في قدرتي على فهم وإدرك إن من يتصدى له مصيره محتوم, وهذا يعني إني عبيط.

وبما إن حالة من الحالتين لازم تكون صائبة, ولأني عبيط في الحالتين, فلن نتكبد عناء إثبات صواب حالة منهم على حساب الأخرى,

إذا, أنا عبيط

حقيقة لا لبس فيها, ولا بهتان ولا نكران. وعلى فكرة, أن بكالوريوس رياضيات. يعني التزمت منهجية صارمة عند البرهان.

بخصوص جزئية "وبأنكرها" في إجابتي على السؤال الأول, فهذه حقيقة, وهذا الموضوع استلزم الاستثناء وعدم الإنكار وإلا تداعت أركان كثيرة فيه, فلزم استثناء الموضوع. عداه تجدين بعض مداخلتي في كل المواضيع الأخرى تحتوي على عبارة إنكار صريحة لحقيقة عبطي فأقول مدعيا عكس الحقيقة "أنا مش عبيط :D". وهو دلالة على إصراري في إنكار حقيقة مؤلمة.

بالنسبة لإجابة حضرتك على السؤال السادس, أستاذتي الكريمة, سؤال "دلالة من دلالات عبط صاحب الموضوع", فقد امتنعت عن الإجابة لعدم موافقة حضرتك على إجابتي على السؤال الأول. فربما الآن وقد تم البرهان على صحة الإجابة المختارة أن تكوني قد اقتنعت به, وراغبة عندها على الإجابة على السؤال السادس.

بالنسبة للسؤال الثاني, أستاذتي الكريمة, سؤال "الشعب المصري, هل عامل عبيط؟", من باب المشاركة بالرأي أبرر. أنا شخصيا اخترت الإجابة "4. ممكن جدا .. إلخ" بدلا الإجابة "5. أغلبهم .. إلخ" لان في رأيي الشخصي إنه حتى المعترض والممتعض فيهم العامل عبيط. في واقع الأمر, وبناء على تعريف العامل عبيط, فالمصريين كلهم عاملين عبط من وجهة نظري. لكن حتى أخرج من مأزق التعميم المطلق أدرجت الإجابة "3. بالفعل .. إلخ" للتعميم المطلق والإجابة "4. ممكن جدا .. إلخ" لترك مجال لفلفصة أفراد يأبون حقا أن يعملوا عبط فيبدون كل الاكتراث اللازم من الفرد الغيور بعقل على وطنه.

ولا أنكر أستاذتي الكريمة استفادتي بشكل شخصي من إضافة حضرتك القيمة للإجابة التي اخترتها لهذا السؤال.

بالنسبة للسؤال الثالث, أستاذتي الكريمة, سؤال "جحا", من باب المشاركة بالرأي أبرر. أنا شخصيا اخترت الإجابة "2. كان عامل عبيط" استنادا لحكايتين من حكايات جحا, الأولى ما تفضلت بذكرها سلفا, حكاية "جحا والحمار وابنه", والثانية حكاية "مسمار جحا". فرأيت شخصيا أن جحا في الحكاية الأولى كان يقول لابنه ما معناه: "يابني اعمل عبيط, زي أبوك, وخلينا نحاول نراضي الناس", وفي هذا بيان على عدم عبط جحا, أما حكاية المسمار, فبالتأكيد تستدعي مكرا فطريا كما تكرمت بالذكر سالفا, لكنها تنفي من وجهة نظري عبط جحا وإن كان مكارا. وبه اعتبرت أن الحقيقة هي أن جحا كان عامل عبيط, مع اعتبار الحكايتين مرجع للقياس. قد يكون اعتبار حضرتك أن الحقيقة هي أن جحا كان عبيط وليس كان عامل عبيط سببه افتراض ان الرضوخ لآراء الناس والاهتمام بها هو من العبط. لكن طبقا للتعريف الموضح لمعنى العبط والعبيط والعامل عبيط فإن الرضوخ لآراء الناس والاهتمام بها سبب غير كافي لتصنيف الفرد عبيطا. ما أوردته الآن هو بالتأكيد رأيي الشخصي, ولا أنفي عدم جزم حضرتك بعبط جحا, بل وبيان مكره لنا.

بالنسبة للسؤال الرابع, أستاذتي الكريمة, سؤال "جمال الشاعر", من باب المشاركة بالرأي أبرر. نجد في تعريف العامل عبيط: "عديم الاكتراث للأمور المحيطة", ولأني أرى كتابه "اعمل عبيط" اكتراثا منه للأمور وعدم التواني بالسكوت عليها, فرأيت أن الحقيقة إنه واعر ومش عامل عبيط. كثيرون رأوه بجحا فوجدت وجوب إضافة صفة "بجح" للاختيارات. لكن من السطحية بمكان أخذ عنوان الكتاب بمعناه الظاهري. إنه مثل قول أحدهم للآخر "يا ناصح, إيه بس النباهة دي كلها" وهو يعني في باطن الأمر "يا خايب, إيه الغباء ده كله". عندما اختار الشاعر عنوان "اعمل عبيط" فهو لم يعني سوى "ما كفاياكوا بقى استعباط", وليس أدل على ذلك من قيامه بحث الناس على الاكتراث ونبذ إعمال العبط في قوله: "حاول أن تعمل حاجة لمصر .. فالسيارة عطلانة .. لكن البكاء لن يدير الموتور .. قل للناس من حولك يلا يلا يا رجالة .. إيدك يا حج اللي يحب النبي يزق". ويظهر لي إن ده مش كلام واحد عامل عبيط.

أخيرا أقول, أستاذتي الكريمة, إن كل من شارك في هذا الموضوع حمل معه جوهرة رصّع بها وساما على صدري, وكانت مداخلتك هي الدرة التي توسطت هذا الوسام. فلي الفخر بكل مداخلاتكم.

خالص اعتباري وتقديري لشخصك ولكل من مر بالموضوع

[MaYousof]

الاسئلة من السابع إلى الحادي عشر.

------------------------

السؤال السابع

وإنت راكب مترو الأنفاق جا واحد وركب ولما الباب قفل بدأ يقزقز لب أسمر ويتف القشر في أرض العربية اللي إنت راكب فيها على اعتبار إن أنتم الاتنين راكبين صفيحة زبالة كبيرة ومش عربية مترو, أنت:

1. عبيط, فمش فاهم إن السكوت على الموقت ده دلالة من دلالات تخلف كل الشعب بما فيهم ركاب المترو.

2. عامل عبيط, فمش فارقة معاك إنك تتعامل على إنك زبالة راكبة في صفيحة زبالة متحركة مادام الصفيحة المتحركة دي هتوصلك للمكان اللي أنت رايحله.

3. شايفنا كلنا عبط, فهتدّعي إنك في الموقف ده بتطلع منديل من جيبك وتروح للّي بيتف القشر وتقوله بأدب "ممكن حضرتك تحط قشر اللب في المنديل ده وترميه حضرتك في الزبالة أول ماتنزل عشان المفروض حضرتك إننا مانعاملش عربية المترو على إنها مكان مش نضيف؟".

4. ماعندكش أي شخصية, فلما شفت الناس كلهم سكتوا على الموقف ووافقوا إنهم يتعاملوا على إنهم زبالة راكبين في صفيحة زبالة متحركة, لاقيت إن انعدام الشخصية عندك أفضل من إن الناس تحسبك عبيط لو إنت بس اللي اتكلمت.

5. لاسع, فشايف إن المترو المفروض مايتخيّرش عن صندوق الزبالة الأكبر اللي إحنا كلنا عايشين فيه.

6. شاذ مقارنة بعموم المصريين, فبتكلم الراكب بأدب عشان كلام الناس مش أحسن من انعدام الشخصية.

7. عمرك في حياتك ما ركبت مترو في مصر, فالسؤال لا ينطبق عليك.

8. ولا اختيار من اللي فوق.

------------------------

السؤال الثامن

وإنت راكب عربيتك زي الباشا, وسايق وانت بتقول في في عقل بالك: "يا أرض إتهَدّي ماعليكي قدّي", دخلت على إشارة حمرا وماوقفتش. إنت:

1. عبيط, فمش فاهم يعني إيه إشارة حمرا.

2. عامل عبيط, فكسرتها على أساس إنك طاووس من الطواويس المتواجدة الآن بين كل الأفراد المصريين, ووقت جناب فخامة سعادتك لازم يكون أهم عند مخاليق ربِّنا من سلامتهم وأروحهم, وإن الطواويس لازم ولابد تستثنى من الالتزام بالقوانين.

3. شايفنا كلنا عبط, فهتدّعي إن دي أول مرة في حياتك تكسر إشارة حمرا وإنك دايما بتقف في الإشارة الحمرا.

4. ماعندكش أي شخصية, فخايف إن الناس يحسبوا إنك عبيط لو وقفت في الإشارة الحمرا.

5. بتخاف مابتختشيش, ولإنك مش عايش في مصر فبتقف في الإشارة الحمرا خوف مش خشا, والوِدّ وِدّك لو هم كمان يبقوا همج عشان تكسر الإشارة براحتك.

6. شاذ مقارنة بعموم المصريين, وبتقف في الإشارة الحمرا, سواء سوقت جوه مصر أو برّاها, حتى لو هتتشتم, فالسؤال لا ينطبق عليك.

7. مابتسوقش عربيات, فالسؤال لا ينطبق عليك.

8. ولا اختيار من اللي فوق.

------------------------

السؤال التاسع

عندك شقة بتاعتك مقفولة في مدينة نصر قيمتها حوالي نص مليون جنيه مصري, جالك جواب من الضرايب العقارية عشان تروح تسدد مبلغ 30 جنيه مصري مستحقة كضريبة على الوحدة العقارية. إنت:

1. أهبل, فماتعرفش إن عندك شقة بتاعتك.

2. عبيط, فمش فاهم يعني إيه ضريبة عقارية.

3. عامل عبيط, فعارف إنهم استحالة هيحجزوا إداريا على الشقة عشان يحصّلوا 30 جنيه.

4. نتن, فخايف لحسان صحيح يحجزوا على الشقة وتروح منك, فهتطلع جري على مأمورية الضرايب العقارية وتسوق الهبل على الشيطنة لحد ما ينزلولك الضريبة المستحقة على الشقة أم نص مليون جنيه من 30 جنيه إلى 20 جنيه.

5. حقودي, بس ماعندكش شقة قيمتها نص مليون جنيه, فهتدّعي إنك مستعد تدفع 300 جنيه ضريبة بدل 30 جنيه لو كنت مكان اللي عندهم شقق من أم نص مليون بس ربنا هو اللي مارزقكش, مع إنّك عارف ومتأكد إن أول ما ربنا يرزقك بشقة من دول هتسب وتلعن في قانون الضريبة العقارية على اللي عملوه وهتدعي عليهم بخراب البيوت.

6. شاذ مقارنة بعموم المصريين, فمؤمن إن حتى لو الحكومة فيها حرامية وفاسدين فده مايحللش ليك في أي شرع سماوي أو وضعي إنك تتحايل على القانون وتمتنع عن دفع التزاماتك تجاه بلدك بما فيها الضريبة الواجبة على أي وحدة قيمتها نص مليون فأكتر, فهتروح تدفع الـ 30 جنيه اللي على الشقة وإنت بتحمد ربنا القادر إنه يعمل منك عبرة وتبقى أجوع من بتوع دارفور لكنه بدل كده وهبك من فضله.

7. ماعندكش شقة قيمتها نص مليون جنيه. ولو ربنا رزقك بشقة منهم هتروح بجد وتدفع الضريبة عشان إنت عارف إن عليك للبلد دي زي ما ليك فيها, فالسؤال لا ينطبق عليك.

8. ماعندكش شقة قيمتها نص مليون جنيه. ومافكرتش لسه لو ربنا رزقك هتدفع غصب عنك ولا بمزاجك. فالسؤال لا ينطبق عليك.

9. ولا اختيار من اللي فوق.

------------------------

السؤال العاشر

واحد عامل عبيط, وانت عارف إنه عامل عبيط. في رأيك إيه الأفضل إنك تشوفه من الواحد ده:

1. ينكر وبشدة إنه عامل عبيط.

2. مايخافش, ويعترف عادي إنه عامل عبيط.

3. ولا اختيار من اللي فوق.

------------------------

السؤال الحادي عشر

طب لو إنت بقى اللي عامل عبيط؟

1. هتنكر وبشدة إنك عامل عبيط.

2. مش هتخاف, وهتعترف عادي إنك عامل عبيط.

3. إنت استحالة بتاتا أساسا إنّك تفكر يوم تعمل عبيط.

4. إنت عبيط, فماينفعش تعمل عبيط.

5 . ولا اختيار من اللي فوق.

تم تعديل 3 فبراير 2010 بواسطة MaYousof

[MaYousof]

السؤال السابع: وإنت راكب مترو الأنفاق جا واحد وركب ولما الباب قفل بدأ يقزقز لب أسمر ويتف القشر في أرض العربية اللي إنت راكب فيها على اعتبار إن أنتم الاتنين راكبين صفيحة زبالة كبيرة ومش عربية مترو, أنت:

بسم الله الرحمن الرحيم, الاجابة رقم 6:

شاذ مقارنة بعموم المصريين, فباكلّم الراكب بأدب عشان كلام الناس مش أحسن من انعدام الشخصية

------------------------

السؤال الثامن: وإنت راكب عربيتك زي الباشا, وسايق وانت بتقول في في عقل بالك: "يا أرض إتهَدّي ماعليكي قدّي", دخلت على إشارة حمرا وماوقفتش. إنت:

بسم الله الرحمن الرحيم, الاجابة رقم 6:

شاذ مقارنة بعموم المصريين, وباقف في الإشارة الحمرا, سواء سوقت جوه مصر أو برّاها, حتى لو هاتشتم, فالسؤال لا ينطبق عليَّ :D

------------------------

السؤال التاسع: عندك شقة بتاعتك مقفولة في مدينة نصر قيمتها حوالي نص مليون جنيه مصري, جالك جواب من الضرايب العقارية عشان تروح تسدد مبلغ 30 جنيه مصري مستحقة كضريبة على الوحدة العقارية. إنت:

بسم الله الرحمن الرحيم, الاجابة رقم 6:

شاذ مقارنة بعموم المصريين, فمؤمن إن حتى لو الحكومة فيها حرامية وفاسدين فده مايحللش ليّ في أي شرع سماوي أو وضعي إني أتحايل على القانون وامتنع عن دفع التزاماتي تجاه بلدي بما فيها الضريبة الواجبة على أي وحدة قيمتها نص مليون فأكتر, فهاروح ادفع الـ 30 جنيه اللي على الشقة وأنا بأحمد ربنا القادر إنه يعمل مني عبرة وأبقى أجوع من بتوع دارفور لكنه بدل كده وهبني من فضله

------------------------

السؤال العاشر: واحد عامل عبيط, وانت عارف إنه عامل عبيط. في رأيك إيه الأفضل إنك تشوفه من الواحد ده:

بسم الله الرحمن الرحيم, الاجابة رقم 2:

مايخافش, ويعترف عادي إنه عامل عبيط :happy:

------------------------

السؤال الحادي عشر: طب لو إنت بقى اللي عامل عبيط؟

بسم الله الرحمن الرحيم, الاجابة رقم 4:

أنا عبيط, فماينفعش أعمل عبيط :closedeyes:

[OReX]

السلام عليكم

اجابة اول سؤال :

قديما

6. مين عارف إنه مش عبيط ومش مستعد يعمل عبيط ومقتنع حقيقي من جواه إن مايصحش الواحد لا يكون عبيط ولا يعمل عبيط؟

بس الحمد لله وصلت لمرحلة

4. مين عارف إنه مش عبيط بس عامل عبيط غصب عنه ومش عاجبه إنه عامل عبيط؟

حمد الله على سلامتى -تقمص نوع من انواع العبط الفكرى-

الاسئلة الاخرى

------------------------

السؤال الثاني

5. اغلبهم عاملين عُبْط, والباقي مابين رافض ومستنكر ومعترض وممتعض.

------------------------

السؤال الثالث

جحا:

5. ولا اختيار من اللي فوق.

كان بيعمل عبيط ووصل بيه الحال فى النهاية الى انه ياخد كارنية العبط بجدارة فلم ينفعه مكره من الوقوع فيه

------------------------

السؤال الرابع

جمال الشاعر:

3. واعر.

ليست الاجابة الصحيحة ولكنها الاقرب

------------------------

السؤال الخامس

أنت لم تشارك في هذا الموضوع لأن:

5. إنت بتشارك بالفعل, فالسؤال لا ينطبق عليك.

------------------------

السؤال السادس

دلالة من دلالات عبط صاحب الموضوع:

5. ولا اختيار من اللي فوق.

صاحب الموضوع مش عبيط نفسة يبقى عبيط بس مش عارف هذا هوا التحليل بعد قراءة البراهين والدالات المذكورة على لسان صاحبه

[shiko]

احم احمحححححححححم بسم الله الرحمن الرحيم

استكمالاً لمسيرة العبط ...اللى مفتوحة على البحرى

السؤال السابع

وإنت راكب مترو الأنفاق جا واحد وركب ولما الباب قفل بدأ يقزقز لب أسمر ويتف القشر في أرض العربية اللي إنت راكب فيها على اعتبار إن أنتم الاتنين راكبين صفيحة زبالة كبيرة ومش عربية مترو, أنت:

ولا اختيار من اللي فوق” وده لانى هاكلمه بقلة ذوق ...اتهيألى مافيش مجال للادب مع واحد بيعاملنا على اساس اننا زبالة "

السؤال الثامن

وإنت راكب عربيتك زي الباشا, وسايق وانت بتقول في في عقل بالك: "يا أرض إتهَدّي ماعليكي قدّي", دخلت على إشارة حمرا وماوقفتش. إنت:

عبيط, فمش فاهم يعني إيه إشارة حمرا. ...وده تطبيقاً لسياسة خالف تعرف

السؤال التاسع

عندك شقة بتاعتك مقفولة في مدينة نصر قيمتها حوالي نص مليون جنيه مصري, جالك جواب من الضرايب العقارية عشان تروح تسدد مبلغ 30 جنيه مصري مستحقة كضريبة على الوحدة العقارية. إنت:

عامل عبيط, فعارف إنهم استحالة هيحجزوا إداريا على الشقة عشان يحصّلوا 30 جنيه.. smk: ..وده نوع من انواع الحقد الطبقى اكيد

السؤال العاشر

واحد عامل عبيط, وانت عارف إنه عامل عبيط. في رأيك إيه الأفضل إنك تشوفه من الواحد ده:

ينكر وبشدة إنه عامل عبيط. ...ازاى عبيط وهايعترف ...لازم ينكر لا طالما الادلة والشهود موش موجودين :lol:

السؤال الحادي عشر

طب لو إنت بقى اللي عامل عبيط؟

إنت عبيط, فماينفعش تعمل عبيط. ...

الامضاء

مواطن مصرى عبيط :wub:

[حسام يوسف]

اجابتي هية رقم 6:

6. مين عارف إنه مش عبيط ومش مستعد يعمل عبيط ومقتنع حقيقي من جواه إن مايصحش الواحد لا يكون عبيط ولا يعمل عبيط

[حسام يوسف]

معلش يا عم محمد يوسف

انى جاي متاخر ودي اجابتي على السؤال التاني

11-ولا اختيار م اللى فوق

البعض الأكثر عذرا يعنى عبيط

والبعض لا

لسؤال الثاني

الشعب المصري, هل عامل عبيط؟

1. العبيط مش محتاج يعمل عبيط.

2. اللي مش عامل فيهم عبيط مش محتاج يعملها.

3. أيوه, بالفعل, الشعب المصري عامل عبيط.

4. السؤال ده فاجئني. بس ممكن جدا يكون عامل عبيط. ليه لأ؟ الشعب المصري قادر, ويعملها.

5. اغلبهم عاملين عُبْط, والباقي مابين رافض ومستنكر ومعترض وممتعض.

6. عبيط اللي يقول إن الشعب المصري عامل عبيط.

7. الشعب المصري أذكى شعب في الدنيا. أذكى شعب على وجه الكرة الأرضية.

8. والله ما أعرف, بس تبقى لذيذة لو عرفت.

9. أنا مش من حقي أكون المتّهم والقاضي في نفس الوقت عشان أرد على السؤال ده.

10. يا أخ محمد, الله يهديك يا أخي بس, لا يجوز التعميم في مثل هذه الأمور.

11. ولا اختيار من اللي فوق.

وبخصوص سؤال جحا

ولا اختيار من اللى فوق برضة

جحا شخصية خيالية من الأدب الشعبي فى أكثر من بلد مليئة لادروس والعظات والضحكات

وبخصوص جمال الشاعر فهو برضة ولا اختيار من اللى فوق كالعادة -يعنى جات عليه

فهو خال من اى موهبة وطالب مناصب بأى طريقة

واللى ناسي أفكره بقضية متفبركة اسمها عبدة الشيطان بتوع مزيكا الهيفي ميتال-لا مؤاخذة يا بروف هشام-بعدها طلع نجمه كالصاروخ لأنه بيسمع الكلام

لم أشارك فى الموضوع من قبل

الاجابة رقم 4

دي أول مرة أدخله والله العظيم

والسؤال الأخير برضة ولا اجابة

لأنى لا أري صاحب الموضوع عبيطا لا سمح الله ولا حاجة

وأقدره وأحترمه

حتى لو انى مش بطيق جمال اللى مش شاعر ده

وبجد شكرا ع الموضوع يا عم محمد يوسف

وانا اللى خسرت لأنى متتبعتوش م الاول

:sad: