استاذ جمال و استاذ علاء

[MZohairy]

لاحظت مشاعر ايجابيه فياضه من الكثيرين من عامة الشعب المصري تجاه نجلي الرئيس مبارك منذ مباراة الجزائر

جمال و علاء

أو استاذ جمال و استاذ علاء كما يطلق عليهم الإعلام المصري

ظهورهم كرويا مع المنتخب طور هذه العلاقه بشده

و بعض العامه اصبح يحبهم بشده و قال بعضهم:

دول مننا و حاسيين بينا و بيفرحوا لفرحنا و يزعلو لزعلنا

ما تفسيركم لهذه المشاعر؟

و هل نجحت الميديا الموجهة في تهيئة الفرشه المطلوبه لتقريب الأخين الى قلوب المصريين استعدادا لأمر آخر؟

و هل اعلامنا ماهر لهذه الدرجه؟ أم هكذا شاءت الأقدار؟

[جيمي]

ايوه نجحت يا استاذ م.زهيري وده شئ طبيعي لان اساسا ده الهدف الاهم و الاساسي والرئيسي والوحيد للنظام المسيطر على الاعلام وعلى كل حاجه .... يعني تخيل حضرتك لما توجه كل طاقاتك لهدف واحد سواء هدف نبيل او لئيم ... لازم تصيب جزء من النجاح ان لم يكن كله .. وبعدين احنا الشعب بتاعنا طيب وبيتاثر بالاعلام بطريقه كبيره جداا

[pink rose]

الناس كلها تعاطفت بشكل غير عادي مع علاء مبارك من ساعة وفاة ابنه الله يرحمه

و بعدين جت مباراة المنتخب في السودان و اتصال علاء مبارك و الكلمتين اللي قالهم خلوا الناس تحبه

قناة الحياة في تغطيتها للاحداث الاخيرة في انجولا و جابوهم هما الاتنين بيرقصوا و يهتفوا و يغنوا و التركيز الشديد على انهم مننا و مواطنين مصريين فرحانين زيهم زينا

و عمكم شوبير جاب صور لجمال ماسك كاميرا و بيصور بنفسه و قعد يقول كام تعليق كده جامدين اوي عليه طبعا كله في نطاق التطبيل

و شغال زن في الحته دي انهم ابناء الرئيس لكن قمة التواضع و الاخلاق لازم تخلي الناس تتعاطف معاهم لا و تحبهم كمان

هما ما شاء الله في الاعلام عندنا ماشيين و مستمرين في الحوار دا

و الزن على الودان امر من السحر دي سياسة الاعلام

[الباشمهندس ياسر]

و بعض العامه اصبح يحبهم بشده و قال بعضهم:

دول مننا و حاسيين بينا و بيفرحوا لفرحنا و يزعلو لزعلنا

و هل اعلامنا ماهر لهذه الدرجه؟ أم هكذا شاءت الأقدار؟

بالظبط كده

هو من العوام

و الاعلام شاطر اوي كده

[eTiger]

أكيد اللي بيتأثروا بسهولة وبيحصلهم غسيل دماغ أكيد أغلبهم جهلة أو أنصاف متعلمين عشان كده الدولة بتهتم جدا بنشر الجهل والتخلف والهبوط بمستوى التعليم لأقصى حد عشان تضمن ولاء أكبر عدد ممكن من الشعب.

[ذهبية]

انا شايفة ان فية كتيبة كبيرة ورا الاستاذ علاء وجمال بيعرفوا بجد يتعاملوا مع الاحداث بطريقة منتهى الذكاء يعنى مثلا طول عمرهم فى قلعة عالية بعيد عن الشعب بدا الجدار دة ينزل حبة حبة لحد ما اتذاب

بعد كدة يتهم الحزب الوطنى انة الحزب اللى انتشر على عهدة الفساد من كل نوع بدانا نسمع عن طلعت مصطفى مع انة راس كبيرة قوى لكنة بدا بية و انتهاء ابراهيم سليمان و بدا الحزب يثبت للشعب ان فية حساب

لما طلعت موجة من الشعب ان مش عايزين توريث بدا اعضاء يقولوا مفيش توريث ومش هيترشح

لما جاءت اصوات من برة مصر تقول ان مصر بلد مش ديمقراطى الكرسى مرسوم على واحد بس سمعنا بعدها ان البرادعى بيترشح و نور وواحد قاضى مش فاكرة اسمة ودة اثبات ان مصر بلد دايمقراطى

يعنى دة مقصود و فية ناس واعية جدااا عارفة بتعمل اية و بتقول اية و بيدخلوا من الشباب ومن الفيس بوك و عارفين كويس قوى ان الشباب كلة بيعتبر الكورة كل حياتة على هذا الاساس كان المدخل لكل مصر

يا جماعة اعلامنا اكبر اعلام فى افريقيا والدول العربية احنا الى عملنا الناس يعنى اية اعلام والناس دى عارفة بتعمل اية

ونجحت فية بدرجة كبيرة جداااااااااااااااااااااااااا

[الجدار]

انا مش شايف ان الإعلام أثر في رأي الناس قوي

كل الناس اللي أعرفها بيحملوا نفس المشاعر تجاه السيدين (السيد علاء والسيد جمال وليس الأستاذين يا سيد زهيري)

الإعلام بيحاول يقنعنا ان الناس بتحب السيدين دول

يعني مايمنعش ذكر اساميهم في كل البرامج الحوارية

والتليفونات المدبرة اللي تبع البرنامج بتشكر السيدين والراس الكبيرة

الناس عندنا مش عبيطة

وكذلك الحكومة مش عبيطة ولو عايزين يحطوا جمال على الكرسي مش حتبقى مشكلة زي ما كله متخيل

عملية نقل السلطة حتمشي بكل سلاسة دي بلدي وأنا عارفها وعارف شعبها الطيب الحنين

السيدين مش محتاجين تعاطف من حد

السيد يحكم وماعلينا غير السمع والطاعة

[الغريب]

أنا حاسس ان الناس في مصر بدأ ينتبهو "للأستدراج الإعلامي" المشاهد في قضية تلو الأخرى

وأعتقد من المفترض أن ينتبه الشعب المصري إلى أن تواجد علاء وجمال في مثل هذه المناسبات لا يجعلهم ينخلعون من صبغة تربية القصر الرأسي إلى صبغة أبناء الشعب المعايشيين لهمومه..

ولكن .. الأمر العجييب جدا بالنسبة لي هل قصد الإعلام أن يوجه أنتقاد ورفض الشعب لتوريث جمال مبارك، ثم هو يسحبه (دون شعور) للتعاطف مع علاء مبارك كمرشح للرئاسة بناء على رغبة الشعب.. أعتقد أن دي هتكون ضربة قوية من الإعلام إذا نجح فيها، وهو مارأيت ثمار نجاحه بعد أحداث مباراة الجزائر في السودان ونشوة البعض بتصريحات علاء مبارك النارية ضد الجزائر وكأنه معايش لآلام المصريين ، تسمحولي أضحك :sad:

[لونا]

أكيد اللي بيتأثروا بسهولة وبيحصلهم غسيل دماغ أكيد أغلبهم جهلة أو أنصاف متعلمين عشان كده الدولة بتهتم جدا بنشر الجهل والتخلف والهبوط بمستوى التعليم لأقصى حد عشان تضمن ولاء أكبر عدد ممكن من الشعب.

معلش أنا مش شايفة إن اللي اتأثروا هما بس الجهلة و أنصاف المتعلمين

لأن فيه ناس كتير هللت لمكالمة علاء الأولى بعد ماتش أم درمان

و بعض الناس دي كانت من أعضاء المحاورات !!

و أنا لا أعتقد إن أي من أعضاء المحاورات يمكن أن يكون جاهل أو نصف متعلم

للأسف الإعلام استطاع أن يؤثر فعلا في بعض الناس :sad:

[MZohairy]

بالطبع الإعلام المصري لن يستطيع خداع الطبقة المثقفة من الشعب

لكن كم هي نسبة هذه الطبقة من المجتمع؟

و بالتالي لو استطاع اقناع 80% من اجمالي شعب مصر لأصبح الأستاذ علاء و الأستاذ جمال زعيمان كبيران

ما استرعى انتباهي في الواقع هو لماذا ينجح الاعلام في الأمور الداخلية و يفشل في الأمور الخارجية؟

اعلامنا المصري فشل تماما في موضوع مباراة الجزائر و تداعياتها

اعلامنا المصري فشل تماما في المواضيع الخاصة بمصر و قطر و العلاقه المتوترة

اعلامنا المصري فشل تماما في مواضيع مصر و حماس بكل محتواياتها

ليه بيفشل بره و ينجح جوه؟

طبعا ده رأيي الشخصي مع احترامي لكل الآراء

شكرا

[shiko]

لاحظت مشاعر ايجابيه فياضه من الكثيرين من عامة الشعب المصري تجاه نجلي الرئيس مبارك منذ مباراة الجزائر

جمال و علاء

أو استاذ جمال و استاذ علاء كما يطلق عليهم الإعلام المصري

ظهورهم كرويا مع المنتخب طور هذه العلاقه بشده

و بعض العامه اصبح يحبهم بشده و قال بعضهم:

دول مننا و حاسيين بينا و بيفرحوا لفرحنا و يزعلو لزعلنا

ما تفسيركم لهذه المشاعر؟

و هل نجحت الميديا الموجهة في تهيئة الفرشه المطلوبه لتقريب الأخين الى قلوب المصريين استعدادا لأمر آخر؟

و هل اعلامنا ماهر لهذه الدرجه؟ أم هكذا شاءت الأقدار؟

ما تفسيركم لهذه المشاعر؟

دى مشاعر المرح التى تصاحب دائماً شرب زجاجات المياه الغازية

لا بمكنك دراسة الظلام بتسليط الضؤ عليه .......

و هل نجحت الميديا الموجهة في تهيئة الفرشه المطلوبه لتقريب الأخين الى قلوب المصريين استعدادا لأمر آخر؟

الاعلام الموجه ...حاجة كدة تشبة الفيديو اون دموند...تعتمد على العرض والطلب

و هل اعلامنا ماهر لهذه الدرجه؟ أم هكذا شاءت الأقدار؟

إذا رأيت ثعباناً فلا تنشغل بمعرفة من أين جاء...

:sad: bv:- bv:-

[MZohairy]

إذا رأيت ثعباناً فلا تنشغل بمعرفة من أين جاء...

bv:- bv:-

ده انا انشغل و نص و تلات تربع كمان

ماهو انا لو حموت التعبان و ازأطط و ادخل انام فرحا مسرورا و مش واخد بالي ان فيه جحر مليان تعابين حتبقى ليله سعيده جدا :sad:

[عنبو]

صحاب اه لكن نسااااااايب لاااااااااااا

ممكن الشعب يكون تعاطف معاهم لكن لو رشحوا نفسهم الموضوع هيختلف تماماً وخصوصاً لو فيه انتخابات نزيه لكن لو كوووسه فمش فارقه تعاطفوا ام لااااااااااااا

[مغتربة]

صحاب اه لكن نسااااااايب لاااااااااااا

ممكن الشعب يكون تعاطف معاهم لكن لو رشحوا نفسهم الموضوع هيختلف تماماً وخصوصاً لو فيه انتخابات نزيه لكن لو كوووسه فمش فارقه تعاطفوا ام لااااااااااااا

الله ينور عليك يا استاذ عنبى

جبت المفيد

صحاب اه

نسايب

لا

[fatfouta]

لما كنا بنتابع المباريات وكانت الكاميرا تيجى على وشهم كنت ابقى عاوزة ادور وشى وابقى عاوزة اقولهم مش قادرة احبكوا ولا اتعاطف معاكوا وانتوا وابوكوا السبب فى كل اللى احنا فيه ومهما عمل الاعلام مش هيغير من اللى فى قلبى ليهم ....لانهم هما نفسهم مش هيقدروا يغيروا اللى وصلوا مصر ليه

لما كانت الحفلة بتاعة الاستاد شغالة كنا فرحانين وقاعدين نتفرج عليها وبرضو ساعة الماتش والاحتفالات اللى بعده كنا بنتفرج واحنا فرحانين جدا وبنهيص وبنضحك....واول ما الكاميرا تيجى على وشوشهم اكشر وابقى حاسة ان فيه حاجة عملت لفرحتى انترابشن حتى جوزى لما تيجى الكاميرا عليهم كان يقول.....يعن لازم النكد ده ماحنا فرحانين الله يخليكوا 

وفضلنا على كده نضحك ونهيص ولما تيجى الكاميرا عليهم نرجع نكشر وهكذا 

وعلى هذا الاساس اقدر اقول ان الاعلام مش هيقدر يغير اللى جوانا من ناحيتهم لكن ممكن يغصبنا مش يغيرنا

طب هقولكوا على حاجة من كتر ماحنا مش طايقين نشوفهم ....بعد الماتش كنا بنتفرج على قناة الحياة وبعدين لما جايتهم فى غرفة اللبس مع اللعيبة وقالوا ان المشاهد دى حصريا ومش هتشوفوها غير هنا.....انا حولت من على القناة دى للنيل الرياضية عشان مش عاوزة اشوف كم النفاق والهتاف الخايب بتاعهم(ذى ماقال الريس...منتخب مصر كويس) يعنى هو عشان الريس قال كده احنا كسبنا؟؟؟؟؟

يعنى اهو وجودهم فى قناة خلانا مش عاوزين نتفرج عليها .....معنى كده ان ايوه الاعلام بياثر فينا لكن اعتقد مع ناس ذى دول انا عن نفسى مش هيقدر يأثر فيا ابداااا واوافق عليهم وبقولها يمكن ييجى اليوم اللى فعلا يبقى واحد فيهم الريس لكن انا فى الوقت ده هبقى مش موافقة لكن هبقى مغصووووووبة ......كالعادة دايما مع حكومتنا

مغصوبين عالغربة

مغصوبين عالعيشة

مغصوبين عالاكل

مغصوبين عالعيس

مغصوبين عالزحمة

مغصوبين عالمواصلات

حتى الزبالة مغصوبين عليها.....قدر الاعلام يعملنا حاجة ولا يحل المشاكل دى؟؟؟؟

الاعلام مهما ان كانت قناة قومية او مش قومية فهو فى الاول والاخر اعلام حكوووووووومى ......بيطبل وبسسسسسسسسس

تم تعديل 7 فبراير 2010 بواسطة fatfouta

[أسد]

المصريون شعب عاطفي جداً ..

هذا في مجمله ..

أي الصفة الغالبة عليه ..

مهما قلنا نحن هنا .. فلن يغير كلامنا شئ من تلك الحقيقة ..

وطبعاً .. الجماعة عارفين الكلام ده كويس ..

ومذاكرينه .. ودارسينه .. وبيعرفوا يلعبوا على الوتر الحساس ده ..

بعد هزيمة 1967 .. وتنحي جمال عبد الناصر .. خرجت جحافل من كوادر الاتحاد الاشتراكي في حركة موجهة تطالبه بعدم التنحي ..

ولأن المصريين شعب عاطفي جداً جداً .. وينضحك عليه بحتة عسلية ..

خرجت ملايين الجماهير بمنتهى الصدق تطالب جمال عبد الناصر بعدم التنحي ...

الناس في مصر تحكمهم العاطفة بالدرجة الأولى ....

المنتخب المصري .. هو هو .. نفس اللعيبة .. اللي كانوا بيحرقوا دمنا طوال الشهو ر الماضية .. ومخليينا قاعدين نحسب في حسبة برمة .. ومين حيكسب ومين حيخسر ومين حيتعادل علشان إحنا نتأهل ..

وبعد فشلهم .. تعاطفنا معاهم .. لأن الجمهور الجزائري .. كان شرس حبتين ..

وإشتغلونا الرجالة وخلونا ننسى خيبتهم الثقيلة ..

صحيح .. هم لعبوا حلو جداً في البطولة الأخيرة .. وطبعاً المصريين الطيبين نسوا تماما خيبتهم التقيلة اللي قبل كده ..

بنفس المنطق ..

يظهر جمال وعلاء .. في مشاهد تدغدغ مشاعر المصريين ..

وبالتالي يتعاطف الناس معهم ..

هذه هي مصر ..

وهؤلاء هم المصريون ..

ممكن أي حد يضحك عليهم ..

وهذا سر نجاح الإعلام بتاعنا في الداخل .. لأنه عارف كلمة السر ..

ولكنه يجهل مفاتيح الخارج ..

فهو دائماً يفشل .

[الغريب]

كلامكم جميل بس مُفجع ومروع ومؤلم

وفي النهاية

حسبي الله ونعم الوكيل في اللي خلانا مشردين في الأرض

حسبي الله ونعم الوكيل في اللي خلانا نتحمل إهانة الناس لجنسيتنا وليس لأشخاصنا والحمدلله

حسبي الله ونعم الوكيل في اللي بعدنا عن أهلنا ووطنا

[د هشام ابراهيم]

طبيعي جدا إن الاعلام يأثر علي الناس و الحكاية ديه مش حكر علينا لا كمصريين و لا كعرب ...بني بشر كلهم بيتأثروا بالاعلام .....قليلين جدا اللي عندهم القدرة علي التحليل و الأستنباط و الانتقاء و فلترة ما يبثه الاعلام كل دقيقة و ثانية علي ظهر الكرة الأرضية كلها (أنا مش منهم طبعا لحد يتصور إني بادعي حاجة hypr:) ..... و فيه اللي الموضوع بيقلب معاهم بالعكس و بيبقى عندهم ميل طبيعي لرفض أي حاجة و كل حاجة مبثة

نرجع لموضوعنا .....أعتقد إن موقف أستاذ علاء غير موقف أستاذ جمال .....علاء مبارك كانت تحوطه اشاعات قوية جدا و مشاعر كراهية و غضب لحد ما حاجة حصلت خليته ينسحب من الحياة العامة لفترة .... ساهمت في تحييد مشاعر المصريين تجاهه .....وفاة ابنه و مشاعر الشماتة اللي ظهرت من البعض سواء داخل أو خارج مصر قلبت المشاعر الحيادية لتعاطف من كتير من فئات الشعب ....موقفه من مباراة الجزائر سواء مدبر أو عفوي صادف هوي عند جزء كبير من الشعب زهق من الاستكانة و الدعة الرسمية و تدني مكانة و كرامة المصريين في كل مكان و شاف فيه مسئول أو شبه مسئول قادر علي اتخاذ موقف قوي من قضية رأي عام إن شا الله بالكلام بس .....ده يدل علي يأس واحباط أكتر منه طيبة في رأيي الشخصي

الاستاذ جمال بقي فده قصة تانية خالص .....ده اللي ما كانش حد يعرف عنه حاجة و بعدين بقي مفروض علينا في الصبح و الليل و مشروع التوريث واضح وضوح الشمس و اللي بيأكده أكتر النفي المتواصل ليه من الأجهزة الرسمية

السؤال المهم بقي ...لو صحينا من النوم بكره لقينا الأستاذ حسني اختفي من الساحة لسبب أو لاخر و جماهير الشعب نادت بترشيح السيد الرئيس جمال .....إيه الموقف اللي احنا متصورين إن جماهير الشعب المعارض حتاخده ......هي جماهير الشعب المعارض لاستاذ حسني كانت عملت إيه و لا هي منتظرة اللي بعده علشان تاخد موقف أيجابي ؟!!

الناس عندنا مش عبيطة

وكذلك الحكومة مش عبيطة ولو عايزين يحطوا جمال على الكرسي مش حتبقى مشكلة زي ما كله متخيل

عملية نقل السلطة حتمشي بكل سلاسة دي بلدي وأنا عارفها وعارف شعبها الطيب الحنين

السيدين مش محتاجين تعاطف من حد

السيد يحكم وماعلينا غير السمع والطاعة

كلمتين من الاخر