مش عايزة اتجوز, بس هتجوز...

[Damo]

السلام عليكم

امبارح بليل قبل ما انام قعدت افكر. قعدت افكر في كم الحاجات اللي بتمنى احققها من خلال مهنتي في المستقبل ان شاء الله و ازاي كل شوية حاجة تزيد على اللستة...

بعدين قولت لنفسي...ظروفي دلوقتي اكيد هتتغير في المستقبل. اكيد هتجوز و يبقى عندي اسرة و واجبات تانية. طيب انا طول عمري بؤمن انو لازم علطول Family First .

بس لو انا مشيت على المبدا ده لااا يمكن ابدا هقدر احقق اكبر حلم عندي و اكيد هتخلى عنو... طيب ليه اعمل في نفسي كده احلم و اخطط على حاجة مش هتحصل في الاخر. وقف تفكيري شوية بعدين قولت لنفسي..انا صحيح ليا رغبة اني في المستقبل ارتبط بشخص احبه و يحبني و احترمو و يحترمني و اكون اسرة و اربي عيال يطلعو عيني بس يطلعو حاجة كبيرة و يرفعوا راسي.. بس رغبتي في تحقيق طموحاتي في مهنتي اقوى. بصيت للسقف شوية و بعدين وصلت لقرار...انا مش هتجوز...

ليه احط نفسي في الموقف ده و اظلم ناس تانيه معايا. ليه اظلم واحد كان ممكن يكون هو الاول و الاخير في نظر واحدة تانية و اجيب اطفال ملهومش ذنب انهم مش اهم حاجة في حياتي.

بعدين انهردا طول اليوم نفس الموضوع ده شاغل دماغي (بدون مناسبة). لحد ما قريت موضوع scorpion , هل تتذكر ابي؟:

http://www.egyptiantalks.org/invb/?showtopic=73061

بعد طبعا ما خفيت من الاكتئاب اللي دخلتو لمى قعدت اتخايل الدنيا و بابايا مش فيها.. قولت انا ازاي انسى حاجة مهمة زي دي!! مش ممكن بابايا مثلا بعد كده يضايق ان بنتو الكبيرة قعدة و متجوزتش...

استرجعت كلام كتير قالهولي قبل كده. علطول يقولي نفسو يشوفني حاجة كبيرة و ليا كياني في المجتمع و ابرع في المجال اللي انا بحبو..

ولا مرة سمعتو بيقولي نفسي اشوفك في الكوشة ولا يا رب تلاقي ابن الحلال ولا عومرو قاللي حاجة في السياق ده...قولت يا ترى يا هل ترى هو مش هامو قوي اني اتجوز؟

روحت رايحة سائلاه: ايه طموحات حضرتك فيا بالظبط؟

اجابتو كانت واضحة و مختصرة و مرقمة :blink: :

١ـ تكوني على احسن خلق و تدركي تعاليم ديننا و ثقافتنا

٢ـ تفضلي طموحة للابد

٣ـ تدرسي اللي نفسك فيه بدون حواجز

٤ـ تبرعي في مجالك و يكونلك مكانة عالية في المجتمع

و بس كده..

سكت شوية بعدين سالتو سؤال تاني:

ليه حضرتك ولا مرة اتمنيتلي اني الاقي الشخص اللي يسعدني و يهنيني و كلام من ده؟

الاجابة:

انا حرصت اني مقولش كده لان اللي بيحصل في مجتماعتنا ان من كتر البنت ما بتسمع الدعوات و الامنيات دي من ابويها..بيخلقلها مفهوم ان ده اخر حاجة و نهاية المطاف و اول ما تتجوز والديها يقولولها احنا كده خلاص اطمنا عليكي و هنموت مرتاحين و هكذا و البنت تحس ان كده خلاص عملت اللي عليها و كل حاجة تقف. انا مش عايز يتخلق عندك المفهوم ده. الجواز ده عبارة عن حدث او خطوة في حياتنا..مش النهاية!!!

قولتلو: مممم .اي سي...طيب لو انا مش اتجوزت هتضايق؟

قال: عندي تتجوزي متاخر حد كويس احسن من بدري لحد هيقرفك بقيت حياتك.

انا: لا يا بابا سيبك من امتى دي. افرض يعني ان في يوم من الايام صحيت قولتلك انا قررت اني مش عايزة اتجوز. هتضايق؟

بابايا: اكيد طبعا هضايق. الجواز ده سنة الحياة و شيء مهم جدا يكون ليكي اسرتك و حياتك الشخصية الخاصه مش تتوقفي عند اسرتنا دلوقتي دي بس... اكيد طبعا هضايق لو بنتي اغلى حاجة عندي امتنعت عن الزواج.

اخترت احتفظ بما يجول بخاطري لنفسي و قررت اني هتجوز. هفضل اسعى في تحقيق حلمي لكن هفضل عارفه اني في مرحلة من المراحل هضطر اوقف مجهوداتي و اوجه اولوياتي لطريق تاني و هكتفي بالحاجات البسيطة اللي هقدر اوصلها. اكيد كل شوية هفتكر و هتسائل هل لو متجوزتش..كان زماني وصلت للاخر؟

بس هعمل ايه

هتجوز..بس عشان خاطر بابايا...

[الباشمهندس ياسر]

بس هعمل ايه

هتجوز..بس عشان خاطر بابايا...

طب عيني ف عينك كده... :blush2:

طب بجد بقي

من غير اي هزار خااااااااااالص

لو هتتجوزي عشان خاطر بابا بس ... قولي و احنا نشوف دكتور ليه اسمه و نحجزلك

:blink: :closedeyes: :blush2:

لا .. بجد فعلا

ربنا خلق الولد و البنت ..عشان يتكاملوا ف الحياة

ايه فايدة الدكتوراة و متسمعيش كلمة ماما

[zika]

مزعجة جدا حكاية ان الجواز يكون بس استجابة لضغط اجتماعي

لكن في حالة حضرتك و الوالد متفهم فدي ميزة لازم تستغليها

مش طبعا اقصد انك تلغى فكرة الجواز (الا لو دي فعلا رغبتك)

انما انك تخدي وقتك في انك تلاقي انسان مناسب لافكارك

انسان يكون مؤمن فعلا بالمساواة و ان تربية الاولاد مسؤولية مشتركة

حتى لو من بلد تانية مش مهم , المهم يكون كدة فعلا

كمان لازم بقدر الامكان تسعي ان يكون ليكى دخلك الخاص سواء قبل الجواز او بعده

فمن يملك قوته يملك حريته

[Damo]

يا باشمهندس ياسر اكيد طبعا انا فاهمه جمال و اهمية الزواج. لكن حاسة اني هبقى سعيدة اكتر لو اتنازلت عن الجواز و حققت حاجات تانيه.

استاذ زيكا. فعلا انا محظوظة جدا بوالدي و اكيد طبعا (لو ربنا قاسملي) هلاقي الشخص المناسب التفكيرنا احنا الاتنين ينسجم مع بعض. دانا لو مش عايزه اتجوز و كماااااان بابايا مصمم اتجوز بدري او حد معين كان زماني انتحرت :blink:

الانا قصدي عليه ان انا نفسي في حاجات في دماغي كبيرة قوي مش هقدر انفذها بسبب ان ورايا اسرة ممكن تتبهدل معايا و هقصر في حقها

تم تعديل 8 فبراير 2010 بواسطة Damo

[myusername]

فيه اعتقاد خاطئ فى مجتمعنا, ان الجواز بيأخر - او بيمنع تحقيق الطموحات!

الجواز مبيمنعش تحقيق الطموحات... ولا بيعرقل الطريق الى تحقيق المزيد من التقدم. ممكن الكلام ده يكون هنا فقط.. لكن معتقدش انه موجود فى اوروبا و الدول المتقدمة :blink: .

الموضوع بس محتاج شىء من التنظيم.. لا أكثر ولا أقل. لكن النظرة الساذجة ان الجواز بيقتل الطموحات و الكلام ده... لا اعتقد. :closedeyes:

[Damo]

فيه اعتقاد خاطئ فى مجتمعنا, ان الجواز بيأخر - او بيمنع تحقيق الطموحات!

الجواز مبيمنعش تحقيق الطموحات... ولا بيعرقل الطريق الى تحقيق المزيد من التقدم. ممكن الكلام ده يكون هنا فقط.. لكن معتقدش انه موجود فى اوروبا و الدول المتقدمة :closedeyes: .

الموضوع بس محتاج شىء من التنظيم.. لا أكثر ولا أقل. لكن النظرة الساذجة ان الجواز بيقتل الطموحات و الكلام ده... لا اعتقد. angl::

يعني افهم من كلام حضرتك اني اتجوز اوروبي و على بركة الله ؟ :blush2: :blush2: :blink:

يعني عيالي ميتكلموش عربي؟؟؟!!!؟؟؟ يا سنة سوووخة :blink:

تم تعديل 8 فبراير 2010 بواسطة Damo

[myusername]

فيه اعتقاد خاطئ فى مجتمعنا, ان الجواز بيأخر - او بيمنع تحقيق الطموحات!

الجواز مبيمنعش تحقيق الطموحات... ولا بيعرقل الطريق الى تحقيق المزيد من التقدم. ممكن الكلام ده يكون هنا فقط.. لكن معتقدش انه موجود فى اوروبا و الدول المتقدمة :blush2: .

الموضوع بس محتاج شىء من التنظيم.. لا أكثر ولا أقل. لكن النظرة الساذجة ان الجواز بيقتل الطموحات و الكلام ده... لا اعتقد. :sad:

يعني افهم من كلام حضرتك اني اتجوز اوروبي و على بركة الله ؟ :blink: angl:: bv:-

يعني عيالي ميتكلموش عربي؟؟؟!!!؟؟؟ يا سنة سوووخة :closedeyes:

اوعى تفهمينى صح :blush2:

انا اقصد ان الانسان بيعيش الحياة من نظرته هو... يعنى حياته بتمشى على حسب ما هو شايف.

عشان اوضح اكتر... الدنيا ليها سنن كونية, و من ضمن السنن دى ان الواحد يقدر يعيش.. بغض النظر عن الطريقة اللى هو مختارها... هتلاقى المسلم عايش حياته, و المسيحى.. و اليهودى.. و العلمانى... كل واحد عايش حياته بالطريقة اللى هو شايفها, بغض النظر بقى اذا كان ده صح ولا غلط.

يعنى لو انتى شفتى ان الجواز مش هيكون معرقل لطريقك.. هتقدرى تعملى ده.. طالما انك مؤمنة بيه! طالما انك شايفة ان ده صح.. يبقى هيحصل فى الواقع, لان افكارنا و طموحاتنا ممكن تنتقل للواقع.. طالما انها لا تخالف السنن الكونية. (يعنى مينفعش تطيرى مثلا فى الجو مع نفسك كده.. لان فيه الجاذبية الارضية wst:: )

اتمنى ان كلامى يبقى واضح :blink:

[Alshiekh]

ياجماعة بالراحة على " Damo " شوية

هى مازالت صغيرة السن ،

واى آنسة فى سنها وفى بلد مثل نيوزيلند او اوروبا لازم يكون التعليم هذف اساسى لان موضوع الزواج ليس هو الاولوية الاولى.

شوفى يا دامو

الاولوية الاولى ان تكونى ناجحة فى دراستك ثم فى عملك ، واتركى موضوع الزواج لظروفه لانه يعنى زى الحصبة حايحصل حايحصل ، لكن كل شيئ بأوان.

وانا متفق مع والدك فى كل ماقاله لك ، مش لازم الاب او الام يشغلوا بنتهم اثناء الدراسة بالكلام عن الزواج ، بل بالنجاح فى الدراسة اولا والتى ستخلق مركزا متميزا يؤهل لزواج متميز ايضا.

ركزى فى دراستك ومستقبلك الذى من المفروض ان تخططى له جيدا ، وعندما يدق القلب ويأتى العريس يكون وقتها كلام آخر.

[لماضة مصرية جدا]

السلام عليكم و رحمة الله و بركاته

دامو...ديمو.... دووووووومة..... :blink:

عارفة يا دامو..... انتي قعدتي باصة للسقف كتير و عمالة تقلبي الموضوع يمين و شمال..... و شمال و يمين....؟؟؟

عشان يا حبيبة قلبي انتي في مرحلة النظريات.... ايون.....

العلماء بقي.... ايون انجعصي كده ع الكورسي...عندهم مشكلة حقيقية انهم بيعيشوا عالم في دماغهم هم....و علي أد ما ده مهم جدا لابداعهم بعيد عن صخب الحياة.... بس علي اد ما ده بيفصلهم عن الحياة بكل مفرادتها الحقيقية

عايزة رأيي الشخصي......انا بحب بابا أوي.... و بحب رغبة عيلتي اوي... انها تشوفني في إطارة الصورة التقليدي....بس لما تتربي بطريقة مختلفة يبقي لازم حياتك تكون مختلفة.....(بطريقة تقليدية جدا...) حد فاهم حاجة

طلعي نفسك بره دايرة بابا عايز ايه.....او اني هتجوز... عشان ارضيه.....

رضاه الحقيقي انه يشوف فرحة في عينيكي....

و راحة بال يلمسها في تصرفاتك و استقرار في حياتك يخليكي تنجحي اكتر

عارفة يا دامو..... دوري علي نفسك...... قولي لنفسك انتي عايزة ايه....ابني شخصيتك....بشكل مستقل.....

و علي اد ما تكوني مستقلة.... علي أد ما هتعرفي ان الحياة فعلا بتكتمل بوجود شريك.... يشاركنا كل لحظات الحياة بافراحها و اتراحها

فيه ناس تقولك اللي اتعودت انها تكون مستقلة.... خلاص بتتنازل عن الجواز....... انا اري الاتجاه المعاكس.....اللي بيتعود يكتشف نفسه... هيكون أكثر اشتياقا لانه يكتشف الجانب الكامن في نفسه و اللي بيشوفه لما بيرتبط مع شريك حياته

البني آدم..... كتلة حاجات مع بعضها......شخصية جادة جدا في العمل.....عملية....حزم في اتخاذ القرارات....و في البيت.... ممكن تكون قمة الطفولة.... و قمة الست امينة.....و علي فكرة هي دي متعة الحياة و مغامرتها..... انك تعيشي المتناقضات..... باختيارك انتي و توقيتك انتي .... و مع من تختارين

هقولك علي راي... يمكن نختلف او نتفق عليه.... بس هقوله

اتجوزي..... بدري.....لما تلاقي الشخص المناسب اللي هيبقي في كتفك.... و تبقي في ضهره...... متدوريش عليه...... هو هيلاقيكي

متخشيش الجواز بفكرة مسبقة عن نماذج او صور متحركة مستعارة من حيوات اخري..... انتي حياتك يا صاحبة قصة حياة أسرة حول العالم.... اكبر دليل ان الاسرة بدفئها المتماسك... تستطيع ان ان تتخطي برودة الغربة.....و صعوبة تحقيق الطموح

خليني اعيش معاكي في المشهد ده:

دامو.... لابسة مريلة المطبخ.....و طالعة جري و في ايديها الكبشة.... و هووووووووووب علي حسانين (ايون لازم يبقي صعيدي... معرفشي الراجل لازم يبقي فيه عرق صعيدي كده).... حسانين حاطط قرطاس لب و قاعد في الليفنج روم.... بيتفرج علي الست رزات في البرنامج ديل اور نو ديل (انا عارفة عاجبهم ايه في المعضمة دي.... :closedeyes: )

حساااااااااااااااااااااانين......(دامو.... كالطلقة من المطبخ)..... انا دلوقتي قدرت اعرف الخريطة الجينية للبامية....لو عملنا معاها رز ابيض..... اما لو حطينا علي الرز شعيرية..... يبقي لازم نعيد التجربة......قولي بقي يا ح....ي.....تاكل سلطة خضرا و لا كول سلو؟؟؟

انتهي المشهد

عارفة يا دامو..... انا معظم الافكار العميقة في شغلي... بتجيلي يا اما و انا بمسح (يمكن عشان الطراوة...)..... يا إما و انا بطبخ..... يمكن ريحة التوابل بتنغشش كده في المخيخ

ببساطة عيشي باجمل ما فيكي انك انسانة مختلفة......

و ستكوني قادرة علي صنع حياة مختلفة.....تكفيكي انت اولا.....

و ستجدي ان من حولك يرون سعادتك و يسعدون بك حتي و ان لم تتكلمي.

صباحك....توابل.....خاااااااااااصة جدا.......لطبخة بوصفة خاصة جدا.......و هتعرفي تظبطيها لوحدك.... أنا متاكدة من كده

فوتك بعافية

[عبير يونس]

الحقيقة يا دامو مش لاقية كلام بعد كلام لماضة

كلام في الجون

شوفي يا دامو يا حبيبتي

الزواج حاجة مهمة جدا جدا جدا

مش عشان الأسرة والمجتمع و الكلام ده

عشان الاستقرار النفسي والعاطفي

و دي أشياء مهمة للنجاح العلمي و المهني

في مقولة غربية بتقول

IF I CAN GET MILK, WHY SHOULD I BUY A COW

همة عندهم علاقات كاملة ممكن تفرغ جزء من احتياجاتهم العاطفية

عشان كده مهماش مستعجلين على الزواج

بس صدقيني

بتبقى زي الجنك فوود

مجرد تصبيرة بتسد الجوع وقتيا

بس بتدمر الصحة على المدى البعيد

همة نفسهم

برغم إحساسهم بالحرية المزيفة

و بأنهم مالكين أنفسهم و عواطفهم

برضه في أعماقهم نفسهم يستقروا مع شريك واحد لأطول مدة ممكنة

و طبعا ده ما بتحققش الا بالزواج

شوفي يا دامو

الزواج عمره ما يعطل البنت عن تحقيق طموحاتها

العبرة بس ان ربنا سبحانه وتعالى يرزقك بإنسان متفهم و بيحبك

ساعتها هيقف جنبك و يساندك و يفرح لنجاحك و يعتبره نجاح له هو كمان

يعني في الأول والآخر هو توفيق من رب العالمين

أدعو الله أن يرزقك و كل آنسات المنتدى بالزوج الصالح والذرية الصالحة

آمين

:blink:

[عنبو]

بصى يادامو انا هقولك على كذا حكايه كده

اعرف دكتوره فى cell biology ومسكة رئيسة قسم وسفريات ومؤتمرات ودوشه ورسائل علميه واشراف على رسائل دكتوراه وماستر

وبرغم ده كله اول لما تبصى فى عينيها تشعرى انها غير سعيده بسبب الوحده لان بمجرد انتهاء الشغل والعوده الى البيت بتلاقى الحياه فااااااضيه وممله بجد

كان فيه دكتور مشهور قووى واستاذ ايضاً فى كلية طب كان فاتح عياده جنب المعمل بتاعنا كنا فى رمضان وكنا بننزل تقريباً قبل المغرب بساعه او بنص ساعه علشان نفطر ونرجع تانى بعد التراويح

فانا نازل فى يوم كده لقيته قاعد لوحده فى العياده بوعدين قولته ايه يادكتور انت مش نازل ولا ايه قلى لا انا هبعت اجيب اى حاجه وخلاص وافطر هنا مهو هنا زى البيت

طبعاً هو لا اتجوز ولا خلف وسنه وصل فوق الستين سنه وعايش وحيد

وعلشان اكون صريح

صعب قووى انك تحققى طموحك العلمى وفى نفس الوقت يكون ليكى اسرتك وخصوصاً انا عارف ان طموحك العلمى لا حدود له

يعنى الموضوع مش هينتهى لحد دكتوراه او مثلاً وظيفه مرموقه وخلاص لاااااااا الموضوع ابحاث ومذاكره وقرأه طوول الوقت ولو فيه وقت للراحه ممكن فى الويك اند

يعنى الموضوع مش سهل بالمره لازم نتنازل شويه عن طموحاتنا علشان الاسره

وكان فيه واحد قاتلى مره انها معها خمسه دكتوراه تقصد على اودلاها يعنى

بصى بقى يا داموووو علشان انا كل لما اكتب كلمه الاقى تليفون جالى اللى عاوز قوله

حاولى تنجحى فى كل مجالات الحياه احسن من ان تنجحى فى حاجه واحده وتفشلى فى الباقى

يعنى لو هتنجحى فى كل مجالات الحياه بنسبة 90 % احسن من ان تنجحى فى حاجه واحده بنسبة 100 % والباقى بنسبة صفر

يلا بقى انا عندى ليكى عريس فكرى وردى عليا

[shiko]

...اتجوز ...لا ماتجوزش

...اتجوز ...لا ماتجوزش...لا اتجوز...بس يابنتى سيبك من حلة الرز اللى عمالة تبحطريها دى ...واستنى اسمعينى ...

الزواج ....حالة اجتماعية ...احتياج روحى ...غير مادى

الشغل والدراسة ......وضع علمى.... احتياج فكرى ...ومادى

ماينفعش نعيش بالمادة بس....وماينفعش نعيش بالروحانيات بس

حضرتك ....احمد زويل متزوج ...اكيد زواجه وارتباطه معطلهوش بل على العكس ممكن يكون الدافع الرئيسى لنجاحه

مافيش اى وجه تعارض بين ارتباط جزيئاتك ....بجزيئات طرف اخر لتكوين ذرة ثنائية الجزيئات متحدة الايونات ....

زواج مبارك ان شاء الله

حد بقى يسمعنا زغروتة...وياريت تعزمينى فى الفرح يا دوم دوم :closedeyes:

[joo]

يا ريت يا دمدومة يا عزيزتى لما تختارى شخص يكون فية صفات مهمة جدا وهى

طيب000لان الشخص الطيب تطمنى على نفسك معاة

حنين000لان الشخص الحنون هيحبك اكتر من روحة انت واولادك

متدين000لان الانسان القريب من ربنا بيراعى ربنا فى تصرفاتة مع بيتة

كريم000لان الشخص البخيل بخيل حتى فى مشاعرة

صادق000لان الصدق من اسباب نجاح اى علاقة

بس الاهم يا دمدومة انك انت متنتظريش كل حاجة منة لان لازم يكون العطاء متبادل

وكل ما تعطية حب وحنان ورعاية هيديكى مقابل ولو كلمة حلوة

[رضوي]

السلام عليكم ورحمة الله وبركاته

بصراحة ياداموا ياحبيبتي ......... ماعنديش كلام اقوله بعد الكلام اللي قالوه اخواتي ......... بصراحة كله كلام في الجون بجد

بس هقولك علي نقطة صغيرة

مش لازم الجواز ياحبيبتي يعطلك عن تحقيق أهدافك وطموحاتك .......... مين قال كدة؟

طالما احسنتي الاختيار وارتبتطي بانسان متدين علي خلق يتحمل المسئولية ويقدر ماتقومين به

اذن انتي علي بداية الطريق السليم

لما ترتبطي بشخص يهمه علمك ونجاحك ويشجعك ........ يبقي فين المشكلة

بس لازم خطوة الزواج دي تييجي بعد لما تحطي رجلك ياحبيبتي علي الطريق السليم في شغلك ودراستك

يعني مش تكوني في مفترق الطرق ومحتاجة كل ثانية في وقتك ....... لا خطوة الارتباط دي لازم تيجي بعد لما تكوني فعلاً استقريتي وعرفتي خطتك هتنفذيها ازاي وامتي ....... وكمان زوجك يكون مقتنع بخطتك واهميتها علشان يكون مشجع وحافز ليكي

عارفة كويس اوي ان الزواج مسئولية ليست بالهينة ...... ومحتاج وقت ومجهود كبير علشان تقدري تبني حياه ناجحة ...... بس بالتخطيط السليم والتفاهم بين الطرفين ممكن نعمل كل حاجة .

ولما بتقولي بابا ...... طيب بصي لبابا كويس ....... اد ايه هو مشغول .......... بس قدر يبني دامو اللي كلنا نعرف عنها اخلاقها وعلمها وعقلها .

اهم حاجة الايمان بما تستطيعي فعله

وبعيدها تاني

طالما زوجك مؤمن بكي وبنبل واهمية علمك واهدافك ......... يبقي هيقف جنبك ويساعدك

وماتنسيش ياحبيبتي انك لما تكبري في السن هتلاقي الونيس والرفيق اللي يقدر يكون معاكي ويؤنس وحدتك بعد عمر مليان بالتعب

هقولك علي قصة حقيقية ....... في الواقع هي قصة جدي وجدتي

جدي كان مشغول جدا جدا جدا ............ مشغول لدرجة انه دايماً مسافر علشان شغله مهم اوي ..... وكانت جدتي متحملة المسئولية الكاملة في كل حاجة

وبعد لما جدي تقاعد علي المعاش ...... ولانه كان متعود علي الانشغال ...... بدأ ينشغل بجدتي ويعوضها عن كل ماسبق ......لقي ونيس الكبر اللي يرافقه بحب وطمأنينة ....... ورافقته حتي وفاته .

حقق نجاحه في عمله وعمله وحياته ....... التلاتة مش متضادات ...... ابداً بالعكس دول مترادفات لمعني واحد وهو ( الحياه )

باختصار

الزواج مسئولية ........ وأولوية ......... بس أماااااااااااااااااااااااان انك تلاقي رفيق العمر وشريك المستقبل ...... انك تلاقي اولاد تحسني تربيتهم ويبروا بكي ويرحموكي في كبرك ..... ان ابنك يدعوا لكي الخالق بغفران ذنوبك ......

علشان كدة لازم نحسن الاختيار ......... هي دي النقطة المهمة

ومش هتجوز علشان بابا عايز كدة ..... او علشان مايزعلش ...... لا ... بابا هيبقي سعيد جداً لو لاقاني انسانة ناجحة وليا وضعي في المجتمع هيفتخر وهو بيقول دي بنتي ......... بس هيزعل اوي بجد لو ارتبطت وفشلت .

وتحياتي

[shiko]

:unsure: :lol:

السلام عليكم ورحمة الله وبركاته

بصراحة ياداموا ياحبيبتي ......... ماعنديش كلام اقوله بعد الكلام اللي قالوه اخواتي ......... بصراحة كله كلام في الجون بجد

بس هقولك علي نقطة صغيرة

مش لازم الجواز ياحبيبتي يعطلك عن تحقيق أهدافك وطموحاتك .......... مين قال كدة؟

طالما احسنتي الاختيار وارتبتطي بانسان متدين علي خلق يتحمل المسئولية ويقدر ماتقومين به

اذن انتي علي بداية الطريق السليم

لما ترتبطي بشخص يهمه علمك ونجاحك ويشجعك ........ يبقي فين المشكلة

بس لازم خطوة الزواج دي تييجي بعد لما تحطي رجلك ياحبيبتي علي الطريق السليم في شغلك ودراستك

يعني مش تكوني في مفترق الطرق ومحتاجة كل ثانية في وقتك ....... لا خطوة الارتباط دي لازم تيجي بعد لما تكوني فعلاً استقريتي وعرفتي خطتك هتنفذيها ازاي وامتي ....... وكمان زوجك يكون مقتنع بخطتك واهميتها علشان يكون مشجع وحافز ليكي

عارفة كويس اوي ان الزواج مسئولية ليست بالهينة ...... ومحتاج وقت ومجهود كبير علشان تقدري تبني حياه ناجحة ...... بس بالتخطيط السليم والتفاهم بين الطرفين ممكن نعمل كل حاجة .

ولما بتقولي بابا ...... طيب بصي لبابا كويس ....... اد ايه هو مشغول .......... بس قدر يبني دامو اللي كلنا نعرف عنها اخلاقها وعلمها وعقلها .

اهم حاجة الايمان بما تستطيعي فعله

وبعيدها تاني

طالما زوجك مؤمن بكي وبنبل واهمية علمك واهدافك ......... يبقي هيقف جنبك ويساعدك

وماتنسيش ياحبيبتي انك لما تكبري في السن هتلاقي الونيس والرفيق اللي يقدر يكون معاكي ويؤنس وحدتك بعد عمر مليان بالتعب

هقولك علي قصة حقيقية ....... في الواقع هي قصة جدي وجدتي

جدي كان مشغول جدا جدا جدا ............ مشغول لدرجة انه دايماً مسافر علشان شغله مهم اوي ..... وكانت جدتي متحملة المسئولية الكاملة في كل حاجة

وبعد لما جدي تقاعد علي المعاش ...... ولانه كان متعود علي الانشغال ...... بدأ ينشغل بجدتي ويعوضها عن كل ماسبق ......لقي ونيس الكبر اللي يرافقه بحب وطمأنينة ....... ورافقته حتي وفاته .

حقق نجاحه في عمله وعمله وحياته ....... التلاتة مش متضادات ...... ابداً بالعكس دول مترادفات لمعني واحد وهو ( الحياه )

باختصار

الزواج مسئولية ........ وأولوية ......... بس أماااااااااااااااااااااااان انك تلاقي رفيق العمر وشريك المستقبل ...... انك تلاقي اولاد تحسني تربيتهم ويبروا بكي ويرحموكي في كبرك ..... ان ابنك يدعوا لكي الخالق بغفران ذنوبك ......

علشان كدة لازم نحسن الاختيار ......... هي دي النقطة المهمة

ومش هتجوز علشان بابا عايز كدة ..... او علشان مايزعلش ...... لا ... بابا هيبقي سعيد جداً لو لاقاني انسانة ناجحة وليا وضعي في المجتمع هيفتخر وهو بيقول دي بنتي ......... بس هيزعل اوي بجد لو ارتبطت وفشلت .

وتحياتي

الله عليكى يا رضوى

فعلا ...مترادفات ...=حياة

استخدامك للكلمات دى اختصر كل السطور والكلام اللى ممكن يتقال...

عجبتنى اكتر قصة جدك وجدتك ..جميلة الرفقة...حلوة الصحبة والحب اوى فى سن ذى ده

واقبلى دى منى....

تم تعديل 8 فبراير 2010 بواسطة shiko

[Damo]

السلام عليكم

اولا مرسي للكل على الردود المفيدة :unsure: :lol: :aslam:

Mohamed

ياجماعة بالراحة على " Damo " شوية

هى مازالت صغيرة السن ،

واى آنسة فى سنها وفى بلد مثل نيوزيلند او اوروبا لازم يكون التعليم هذف اساسى لان موضوع الزواج ليس هو الاولوية الاولى.

شوفى يا دامو

الاولوية الاولى ان تكونى ناجحة فى دراستك ثم فى عملك ، واتركى موضوع الزواج لظروفه لانه يعنى زى الحصبة حايحصل حايحصل ، لكن كل شيئ بأوان.

وانا متفق مع والدك فى كل ماقاله لك ، مش لازم الاب او الام يشغلوا بنتهم اثناء الدراسة بالكلام عن الزواج ، بل بالنجاح فى الدراسة اولا والتى ستخلق مركزا متميزا يؤهل لزواج متميز ايضا.

ركزى فى دراستك ومستقبلك الذى من المفروض ان تخططى له جيدا ، وعندما يدق القلب ويأتى العريس يكون وقتها كلام آخر.

اولا شكرا لتهدئة النفوس

ثانيا فعلا انا دراستي حياتي كلها و مش حاسة ان في اهم منها. و بكلام حضرتك و myusername فهمت ان لسه في امل اعمل اللي انا عايزاه لما اتجوز :lol:

لماضة

السلام عليكم و رحمة الله و بركاته

دامو...ديمو.... دووووووومة.....

عارفة يا دامو..... انتي قعدتي باصة للسقف كتير و عمالة تقلبي الموضوع يمين و شمال..... و شمال و يمين....؟؟؟

عشان يا حبيبة قلبي انتي في مرحلة النظريات.... ايون.....

فيه ناس تقولك اللي اتعودت انها تكون مستقلة.... خلاص بتتنازل عن الجواز....... انا اري الاتجاه المعاكس.....اللي بيتعود يكتشف نفسه... هيكون أكثر اشتياقا لانه يكتشف الجانب الكامن في نفسه و اللي بيشوفه لما ..

.

.

.

.

و ستكوني قادرة علي صنع حياة مختلفة.....تكفيكي انت اولا.....

و ستجدي ان من حولك يرون سعادتك و يسعدون بك حتي و ان لم تتكلمي.

صباحك....توابل.....خاااااااااااصة جدا.......لطبخة بوصفة خاصة جدا.......و هتعرفي تظبطيها لوحدك.... أنا متاكدة من كده

فوتك بعافية

انا قريت مداخلتك مرتين اول مرة وانا فطسانة و تاني مرة جد قد ما اقدر.

يااا رب اعرف اظبطها كده زاي ما بتقولي. و لو محدش ظبط الباميا جينيا مين هيظبطها؟! مرسي على كلامك انا فعلا استفدت.

فكرتيني بمرة و احنا في السعودية قاعدة في امان الله مع باقي الجروب مستنيين الحصة تبدا. طلع سؤال مواصفات فارس احلامك. لمى جه الدور عليا لسه هفتح بوقي راحت صحبتي باعلى صوت: داااامو يا بنت ابووو دامووو انتي هتتجوزي حسنين من بولااااء.

انا مش فاهمة حسنين ده معلق معايا كده ليه.

تم تعديل 8 فبراير 2010 بواسطة Damo

[Damo]

مصرية مغتربة

الحقيقة يا دامو مش لاقية كلام بعد كلام لماضة

كلام في الجون

شوفي يا دامو يا حبيبتي

الزواج حاجة مهمة جدا جدا جدا

مش عشان الأسرة والمجتمع و الكلام ده

عشان الاستقرار النفسي والعاطفي

و دي أشياء مهمة للنجاح العلمي و المهني

في مقولة غربية بتقول

IF I CAN GET MILK, WHY SHOULD I BUY A COW

.

.

.

أدعو الله أن يرزقك و كل آنسات المنتدى بالزوج الصالح والذرية الصالحة

آمين

مرسي مصرية مغتربة على الدعوة الجميلة دي و شكرا على النصائح

عنبووووو

بصى يادامو انا هقولك على كذا حكايه كده

يعنى لو هتنجحى فى كل مجالات الحياه بنسبة 90 % احسن من ان تنجحى فى حاجه واحده بنسبة 100 % والباقى بنسبة صفر

.

.

.

يلا بقى انا عندى ليكى عريس فكرى وردى عليا

حكايات جميلة و مقنعة. و يمكن حضرتك كمان اكتر واحد فاهمني. بس انا فعلا مفكرتش في موضوع لما اكبر و اعجز ده...

فييييين العريييس سيبووني علييييه. هخدو احوطو في الفريزر و كمان كام سنة اطلعو يفك اكون خلصت انا اللي ورايا wst::

shiko

...اتجوز ...لا ماتجوزش

.

.

.

حضرتك ....احمد زويل متزوج ...اكيد زواجه وارتباطه معطلهوش بل على العكس ممكن يكون الدافع الرئيسى لنجاحه

مافيش اى وجه تعارض بين ارتباط جزيئاتك ....بجزيئات طرف اخر لتكوين ذرة ثنائية الجزيئات متحدة الايونات ....

زواج مبارك ان شاء الله

حد بقى يسمعنا زغروتة...وياريت تعزمينى فى الفرح يا دوم دوم

ارائك جميلة و مقنعة. بس انا اختلف معاكي في حتة زويل. صحيح ممكن تكون اسرته من الحاجات اللي سعدت في نجاحة لكن الوضع يختلف...لانو راجل!!!

مش ينفع جوزي تبقى شغلتو يطبخ الغدا و يحمي العيال عشان انا ورايا شغل كل يوم و مش فاضية للكلام ده. يمكن من حين الى اخر لكن مش تكون دي العادة.

و بخصوص الفرح انا بفكر ابقى اعملو على المنتدى و خلاص و كلو واحد يجيبو سندوتشو و جاتوهو و يقعد قدام الكمبيوتر...نص النيزانية هتكون في بوفيهي الخاص :sad:

joo

يا ريت يا دمدومة يا عزيزتى لما تختارى شخص يكون فية صفات مهمة جدا وهى

طيب000لان الشخص الطيب تطمنى على نفسك معاة

حنين000لان الشخص

.

.

.

.

بس الاهم يا دمدومة انك انت متنتظريش كل حاجة منة لان لازم يكون العطاء متبادل

وكل ما تعطية حب وحنان ورعاية هيديكى مقابل ولو كلمة حلوة

مرسي يا جو. انا عريسي يجيلي معاه السي في بتاعو وانا هحولو عليك علطول للتقييم المبدئي :sad:

رضوى

السلام عليكم ورحمة الله وبركاته

بصراحة ياداموا ياحبيبتي ......... ماعنديش كلام اقوله بعد الكلام اللي قالوه اخواتي ......... بصراحة كله كلام في الجون بجد

بس هقولك علي نقطة صغيرة

.

.

.

باختصار

الزواج مسئولية ........ وأولوية ......... بس أماااااااااااااااااااااااان انك تلاقي رفيق العمر وشريك المستقبل ...... انك تلاقي اولاد تحسني تربيتهم ويبروا بكي ويرحموكي في كبرك ..... ان ابنك يدعوا لكي الخالق بغفران ذنوبك ......

علشان كدة لازم نحسن الاختيار ......... هي دي النقطة المهمة

ومش هتجوز علشان بابا عايز كدة ..... او علشان مايزعلش ...... لا ... بابا هيبقي سعيد جداً لو لاقاني انسانة ناجحة وليا وضعي في المجتمع هيفتخر وهو بيقول دي بنتي ......... بس هيزعل اوي بجد لو ارتبطت وفشلت .

وتحياتي

قصة مؤثرة فعلا و مرسي على الدعوة :sad:

[ذهبية]

طبعا كل الاخوات ردوا ردود جميلة جدا جداا

اسمحيلى اتكلم معاكى كاختك كبيرة ليكى

بما انك بنت عملية جداا و عقلك شغال جدا واحلامك و طموحك هما الغالبين عليك مش هاتكلم من المشاعر و الاحساسيس

لان الاعضاء اوفوا جدا من الناحية دى انا هاكلمك من ناحية تانية خالص

دموا احلى حاجة فى الجواز الاولاد ربنا يدنها نعمة علينا يارب بجد احلى كلمة ممكن تسمعيها فى حياتك كلها هى كلمة ماما

اسالى بابا وماما اغلى واحلى حاجة فى حياتكم اية بلا تردد هيقولوا انتم يا اولادى

لية تاخرى الحلم الجميل دة

انتى مش عارفة يا دامو ان للست سن معين لو تعدتة بيكون فرص الحمل و الانجاب صعبة شوية

متزعليش منى بس انا بقولك حقائق علمية ممكن تكون تايهة عن بالك

الراجل يا دامو ممكن يخلف فى اى سن لحد ما يموت لكن الست لا يا دامو

الست لها سن معين للانجاب و بعدها صحتها مش هتساعدها وتريبة الاولاد محتاجة صحة

الماجستير و الدكتوراة و العلم و الشغل و كل حاجة فى المواضيع دى ملهاش لا سن ولاوقت مفتوحة طول ما انتى عايشة

لكن يا حبيبتى الزواج لا

لاحظى نقطة تانية ان البنت كل ما تكبر فى السن هتلاقى برضة العريس الى جايلك كبير فى السن وبعد كدة هتروحى

لفئة تانية من المطلقين والارامل انا مش عايزة اكبر المواضيع بس للاسف يا دامو دة مجتمعنا

اللى سهل جدا الراجل يتجوز اضغر منة بعشرين سنة لكن الست صعب جدااااا

علشان كدة انا من مشجعة الزواج و الانجاب بدرى وبعد كدة اعملى الى انتى عايزاها

اختارى اللى يتناسب معاكى

و نصيحة فى ودنك من اخت

لما تختارى اختارى اب لولادك قبل ما يكون زوج ليكى

لك منى كل تحياتى يا دامو وكل السعادة و هدوء البال و دعوة فرح عليها احلى اسم عروسة داموووووووووو

ذهبية

[goodfaith]

اجيب اطفال ملهومش ذنب انهم مش اهم حاجة في حياتي

ان شاء الله لما ربنا يرزقك باطفال هتكتشفي انهم اهم حاجة في حياتك من اول ما تعرفي انك حامل كمان

انا حسيت انه اكبر واهم حدث في حياة الست هو حملها وانجابها على الاقل لاول مرة

وبخصوص طموحاتك العملية اولادك لما يشوفوكي ناجحة في عملك وطموحة هيفتخروا بيكي وهتكوني لهم خير قدوة وانا اعرف ناس كتير حققوا طموحاتهم العملية في وجود اسرة واطفال يمكن الجدة ساعدت شوية يمكن كان فيه شغالة بتساعد في شغل البيت التقيل بس ان الاولاد يعطلوكي عن طموحك ده مش حقيقي

وطبعا ردود الاخوة هنا كافية وشافية بس الجملة المقتبسة من موضوعك استفزتني

لماضة هو انتي رحاب؟؟

[برنس الشرق]

حياة الانسان كلها عبارة عن قرارت بعد ما ندرس كل احتمالات القرارت

قرار بنندم عليه وقرار بنتوفق فيه قرار بتنجح بيه حياتنا وقرار بنتمى ان الزمن يرجع بينا علشان مكناش نختاره

(( قــــــــــرار الــــــزواج )) من اهم اهم القرارت اللى بناخدها فى حياتنا

قرار مصيرى فى مستقبل كل انسان فينا علشان كدة لازم نفكر مرة واتنين وتلاتة وعشرين قبل ما ناخد القرار دة

بس ايه اللى هيحصل اذا قررت انى مش هاتجوز قررت انى احقق طموحى واشتغل واوصل لاعلى المناصب

بــــــكل تـــأكيد هتندمى اشد الندم وهتتمنى لو رجع الزمن واخترتى الاختيار التانى

هتلاقى نفسك بعد فترة عايشة لوحدك بين اربع حيطان مفيش حد بيهتم بيكى لو تعبتى مفيش حد بيزعل لزعلك هتلاقى نفسك حققتى طموحاتك بس مش هتكونى سعيدة بكدة

اوعى تنسى ان الزواج دة امر من ربنا

الاهم انك لما تاخدى قرار الارتباط ترتبطى بالانسان المتدين اللى يخاف فيكى الله ويراعيكى

اللى يحبك ويكون معاكى فى كل الاوقات سند ليكى فى الحياة

اوعى يكون كل هدفك هو الجانب المادى والطموح الشخصى زى الاجانب لانهم محسوش بمتعة وبقت حالات الانتحار منتشرة هناك جدا ....

اتمنى انك تكونى اقتنعى بكلامى