باقي بضعة أيام على حلول عيد الحب

[MZohairy]

أيام قليلة إخواني تفصلنا عن عيد الحب الجميل

كل منا يستطيع استغلال هذه الفرصه لإصلاح ما أفسده الدهر

كل منا يستطيع استغلال هذه الفرصه ليرى الحبيب بالمنظور الإيجابي فقط و يتناسى قليلا الجوانب السلبية التي لا يخلوا منها بشر

طاحونة الحياة تلهينا كثيرا عن التعبير عن المشاعر الجميلة المدفونة بسبب أعباء الحياه

انتهزوا هذه المناسبة الجميلة للتعبير عما لم تستطيعوا التعبير عنه خلال الفترات السابقة

و لتبدءوا بداية جديده تجعل كل حياتكم 14 فبراير

قول الحب نعمة مش خطية

الله محبة .. الخير محبة النور محبة

يا رب تفضل حلاوة سلام أول لقا في ايدينا

وفرح أول ميعاد منقاد شموع حوالينا

ويفوت علينا الزمان يفرش أمانه علينا

يا رب لا عمر كاس الفراق المر يسقينا

ولا يعرف البعد مطرحنا ولا يجينا

وغير شموع الفرح ما تشوف ليالينا

يا حبيبي ياللا نعيش في عيون الليل

ونقول للشمس تعالي بعد سنة مش قبل سنة

دي ليلة حب حلوه بألف ليلة وليلة

بكل العمر .. هو العمر إيه غير ليلة زي الليلة

[joo]

:cry1:كل سنة وانت طيب

هابى فلنتاين

[MZohairy]

:cry1:كل سنة وانت طيب

هابى فلنتاين

و حضرتك بالصحة و السلامة :cry1:

[أسد]

ربننا يجعل أيامنا كلها حب ..

أنا شخصياً سأشتري هديتين ..

واحدة لزوجتي .. والثانية لإبني ..

rs: :happy: :)

[MZohairy]

باقي من الزمن اربعة أيام :sad: :lol:

هل الهديه لازم تكون غاليه؟

و هل ممكن تكون معنوية أو غير مادية؟

[أسد]

باقي من الزمن اربعة أيام :sad: :lol:

هل الهديه لازم تكون غاليه؟

و هل ممكن تكون معنوية أو غير مادية؟

الهدية بشكل عام هي تعبير رمزي عن المشاعر ..

وحيث أنها تعبير رمزي .. فمهما زاد ثمنها أو قل .. بكل تأكيد لن تكون على قدر المشاعر التي لا تقدر بثمن ..

ولا سيما الحب ..

:) -_-

[عنبو]

هو عيد الحب ده مخصص بالناس اللى عندهم نص حلو ؟؟

طيب اللى ماعندوش يعمل ايه ؟؟

طيب الواحد لو محتفلش بعيد الحب هيبقى حرام عليه ؟

طيب هو لازم ورده حمرا مينفعش اى لوون يعنى ؟؟

[MZohairy]

هو عيد الحب ده مخصص بالناس اللى عندهم نص حلو ؟؟

طيب اللى ماعندوش يعمل ايه ؟؟

مش شرط ابدا

انا مثلا كنت بجيب لأمي الله يرحمها هديه في عيد الحب

و هديه تانيه في عيد الأم

و هديه تالته في عيد ميلادها

طيب الواحد لو محتفلش بعيد الحب هيبقى حرام عليه ؟

سؤال مش غريب منك يا عنبي

طيب هو لازم ورده حمرا مينفعش اى لوون يعنى ؟؟

When in Rome, do as the Romans do

مش شرط حمرا

اي لون

بس بلاش الأصفر

[doha]

اهو موضوعك ده ياحج زهيري فكرني بلحظة مريت بيها من يومين تلاته . .

كنت ماشيه في الشارع من يومين لوحدي . . كان في محلات كتير مليانه احمر في احمر .. اشي دبدوب واشي قلب واشي ( كرومبو ) الي مش فاهمه لغايه دلوقت ايه علاقته بالحب بس مدام صحاب المحلات قالوا كده يبقى اكيد هو كده ..

قلت هختار حاجه حلوة لزوجي اجيبها واخبيها بحيث اطلعها له يوم عيد الحب فيتفاجيء بيها جبتها منين ـ بحب اعمل الحركات القرعه دي من وقت للتاني ..

وانا واقفة قدام الفاترينة بختار .. جاء في بالي خاطر عجيب .. قلت طيب وياترى هو هيجيب لي ايه في عيد الحب ؟ القلب ولا الدبدوب ؟

بصراحه ومخبيش عليكم .. استنكرت الفكرة بشكل لا تتصوروه ..

تخيلت زوجي داخل علي كده بكارت احمر ولا قلب لا مؤاخذة ( اهبل ) وبيقولي كل سنة وانتي طيبة .. بصراحه قلت لو عملها اما ان في ان او ان في ان ..

عن نفسي بزعل جدا لو زوجي مفتكرش عيد ميلادي .. ويهمني جدا كلمه كل سنة وانتي طيبة الي بيقولها يومها سواء بقى جات ( حاف ) او كان معاها غموس .. بس مع عيد الحب بالذات حسيت ان الامر مختلف ..

بصراحة استغربت شعوري .. وكررت بيني وبين نفسي تاني .. لو زوجك جابلك هدية من دول في عيد الحب ؟ لقيت نفسي بستنكر الفكرة اكتر .. قعدت افكر انا مش متقبلاها ليه ؟ هل لانه ميعملهاش ؟ بالعكس ممكن جدا يعملها خاصه وده المعتاد منه في عيد ميلادي انه المفروض بيهتم .. امال ايه ؟

بيني وبينكم حسيت ان طبيعته ( كرجل ) اصلا مش هتملي عليه الواجب ده .. وانه لو عملها هيبقى بيعملها ( تقضية واجب ) لا اكثر ولا اقل ..

لو كنا لسه مخطوبين كان هيسعدني اوي حاجه زي كده منه تحسسني ان في حد ( فاكرني ) او ان لي حد في اليوم ده الي لازم كل وحده فيه يكون لها فيه ( حد ) .. بس بما اننا متزوجين وبما اننا الحمد لله مع بعض فيوم زي كده مش محتاجه فيه ورده ولا قلب يفكروني ان الحمد لله ( عندي قلب ) .

تصدقوا اني قعدت افكر وفت سطر المحلات مشتريتش منها شيء ..

التساؤل الي كان في ذهني وقتها .. ياترى هل انا لوحدي الي بفكر كده ؟ هل انا بس الي مش هفرح لو جات لي هدية في عيد الحب بعكس عيد ميلادي الي اكيد اتمنى دائما وابدا زوجي بالذات يكون فاكره على طول ؟

هل كل الستات المتزوجات تفكيرهم زيي كده ان عيد الحب ده لنا احنا نهدي فيه لكن مش هنفرح بنفس القدر لو كان لينا الاهداء ؟

سؤالي لكل وحده متزوجه معانا في المحاورات .. لو زوجك اهدالك في عيد الحب هدية .. هتعني لك الكثير ؟ فكري قبل ماتجاوبي ..

[MZohairy]

مداخلتك عايزه رد بتركيز يا ضحى

راجعلك بالتفصيل ان شاء الله

باقي من الزمن ثلاثة ايام wst:: :lol:

[MZohairy]

بيني وبينكم حسيت ان طبيعته ( كرجل ) اصلا مش هتملي عليه الواجب ده .. وانه لو عملها هيبقى بيعملها ( تقضية واجب ) لا اكثر ولا اقل ..

هل انا بس الي مش هفرح لو جات لي هدية في عيد الحب بعكس عيد ميلادي الي اكيد اتمنى دائما وابدا زوجي بالذات يكون فاكره على طول ؟

اولا يا ضحى مش كل راجل زي التاني في مشاعره و طرق التعبير عنها...مفيش ستاندرد

و اذا وصلت الحكايه لتقضية الواجب يبقى طبعا مالهاش اي معنى ولا لزوم بالطبع

انما رجاله كتير جدا بيبقوا فعلا حاسين بشعور جميل بيخليهم يهادوا زوجاتهم في اليوم ده

و ستات كتير ايضا مش رجاله بس

يعني شعور متبادل

و اخيرا انا مش شايف الفرق اللي يخليكي تفرحي لما يجيبلك هديه في عيد ميلادك و تزعلي لما مايجيبش

و بين انه يعمل نفس الشيئ في عيد الحب!

الاتنين في رأيي مناسبتين لإظهار المشاعر الجميلة و للتعبير عن الحب اللي موجود فعلا و بنحطه بين قوسين كزياده في توضيحه

أو تكون مشاغل الدنيا و همومها مش مديانا الفرصه للتعبير عنه كما يجب و بننتهز فرصه زي دي عشان نصلح مايمكن اصلاحه

[jasmin hamed]

اهو موضوعك ده ياحج زهيري فكرني بلحظة مريت بيها من يومين تلاته . .

كنت ماشيه في الشارع من يومين لوحدي . . كان في محلات كتير مليانه احمر في احمر .. اشي دبدوب واشي قلب واشي ( كرومبو ) الي مش فاهمه لغايه دلوقت ايه علاقته بالحب بس مدام صحاب المحلات قالوا كده يبقى اكيد هو كده ..

قلت هختار حاجه حلوة لزوجي اجيبها واخبيها بحيث اطلعها له يوم عيد الحب فيتفاجيء بيها جبتها منين ـ بحب اعمل الحركات القرعه دي من وقت للتاني ..

وانا واقفة قدام الفاترينة بختار .. جاء في بالي خاطر عجيب .. قلت طيب وياترى هو هيجيب لي ايه في عيد الحب ؟ القلب ولا الدبدوب ؟

بصراحه ومخبيش عليكم .. استنكرت الفكرة بشكل لا تتصوروه ..

تخيلت زوجي داخل علي كده بكارت احمر ولا قلب لا مؤاخذة ( اهبل ) وبيقولي كل سنة وانتي طيبة .. بصراحه قلت لو عملها اما ان في ان او ان في ان ..

عن نفسي بزعل جدا لو زوجي مفتكرش عيد ميلادي .. ويهمني جدا كلمه كل سنة وانتي طيبة الي بيقولها يومها سواء بقى جات ( حاف ) او كان معاها غموس :lol: .. بس مع عيد الحب بالذات حسيت ان الامر مختلف ..

بصراحة استغربت شعوري .. وكررت بيني وبين نفسي تاني .. لو زوجك جابلك هدية من دول في عيد الحب ؟ لقيت نفسي بستنكر الفكرة اكتر .. قعدت افكر انا مش متقبلاها ليه ؟ هل لانه ميعملهاش ؟ بالعكس ممكن جدا يعملها خاصه وده المعتاد منه في عيد ميلادي انه المفروض بيهتم .. امال ايه ؟

بيني وبينكم حسيت ان طبيعته ( كرجل ) اصلا مش هتملي عليه الواجب ده .. وانه لو عملها هيبقى بيعملها ( تقضية واجب ) لا اكثر ولا اقل ..

لو كنا لسه مخطوبين كان هيسعدني اوي حاجه زي كده منه تحسسني ان في حد ( فاكرني ) او ان لي حد في اليوم ده الي لازم كل وحده فيه يكون لها فيه ( حد ) .. بس بما اننا متزوجين وبما اننا الحمد لله مع بعض فيوم زي كده مش محتاجه فيه ورده ولا قلب يفكروني ان الحمد لله ( عندي قلب ) .

تصدقوا اني قعدت افكر وفت سطر المحلات مشتريتش منها شيء ..

التساؤل الي كان في ذهني وقتها .. ياترى هل انا لوحدي الي بفكر كده ؟ هل انا بس الي مش هفرح لو جات لي هدية في عيد الحب بعكس عيد ميلادي الي اكيد اتمنى دائما وابدا زوجي بالذات يكون فاكره على طول ؟

هل كل الستات المتزوجات تفكيرهم زيي كده ان عيد الحب ده لنا احنا نهدي فيه لكن مش هنفرح بنفس القدر لو كان لينا الاهداء ؟

سؤالي لكل وحده متزوجه معانا في المحاورات .. لو زوجك اهدالك في عيد الحب هدية .. هتعني لك الكثير ؟ فكري قبل ماتجاوبي ..

اكيد هتعنى لى اكثر من ما كانت بتعنيلى فى الخطوبه لان فى الخطوبه بتبقى متوقعه و منتظره بس فى الجواز مش هيجيبها الا اذا كان حاسس انو عايز يجبها يعنى مش فرض .

وانا بتهيقلى الى يسعدنى اكتلر من دبدوب ( الى مش شايفالو لمعنى ولا طعم و مش عارفه الناس بتشتريه ليه )هو انو مثلا يجبلى حاجه هو عارف انها ناقصانى او مثلا يعمل حاجه احس فيها ببه هوة مش كارت و خلاص .

و بالنسبة للمتزوجين اتصور انوا الى اهم من الهديه هو تخصيص الوقت لبعض لانوا للاسف بتهيقلى بعد الجواز الوقت الى بنعد فية مع بعض بيبقى اقل من قبل الجواز . اما بالنسبه ليه انا اتصور انو لو مثلا عملتلوا اكله نفسو فيها ولا تورته ولا حتى اشتريت كرافت يكون ناقصوه هتكون حاجة جميله و اكيد هيقدرها . ولا حضرتك رايك ايه

[Tafshan]

باقي من الزمن اربعة أيام :lol: :lol: :blink: :lol:

هل الهديه لازم تكون غاليه؟

و هل ممكن تكون معنوية أو غير مادية؟

من غير فزلكه .. اه

ممكن تجيب ورده بس "مع " الهديه

هم بيعرفوا لما نكون مزنوقين و بيعدوها لكن لما تكون الدنيا ماشيه حتى لو ما قالوش بتبقى بايخه اننا ما نجبش هديه مناسبه ..

الهدايا مهمه في التعبير عن قيمة العواطف .. هى بتعبر عن وجود "الحب" على خارطة الميزانيه العامه للمنزل

[shiko]

حصرياً ...أفكارمبتكرة ... بمناسبة عيد الحب ..."لو سمحتم للازواج فقط "..واللى عاوز يعمل كده مع بابا ..ماما ..اخوك ...اختك ..وماله جعله الله فى موازين حسناتكم ...

افكار للازواج :

1. أغنية ...من ارقام الاتصالات المختصرة "مصر اتهيألى 2323"

2. رسالة صوتية ...عن طريق المحمول ...

3. صورة قديمة ....تتبروز ببرواز جديد ...او يعاد رسمها بالفحم عن طريق متخصصين

4. قصيدة مكتوبة على ورق بردى باهداء شخصى ...

5. كتاااااااب ...نفسه ..او نفسها ..فيه يوصل على البيت ديليفيرى

6. ...خطاب يصل عن طريق الـdhl

7. او ممكن تسيبوه من تحت عقب الباب

8. البوم صور يعاد فيه ترتيب الذكريات ...بشكل جديد

9. تعديل صورة على الفوتو شوب وطباعة الصورة على ورق عادى وممكن تتلزق فى اى حجرة ....وده طبعاً بخلاف الهدية ...

للزوجات ...فقط

1. زهرى المنزل برائحة العطر المحببة لزوجك.."منقول"

2. فاجيئيه واعمليلوه المارد السحرى ...وقليلوه ليك 3 طلبات ممكن نحققهوملك "منقول "

3. ثبتى الورد بخيط ليصبح على شكل حبل وزينى بيه ارجاء الحجرة "اعملى اطار للصورة السابقة مثلا"

4. استخدمى الشموع فى الاضائة الجانبية..واضيفى البلالين والورود

5. اصنعى قصاصات من الورق واكتبى فيها جمل غرامية ...ودعيها فى سلة مليئة بالبنبون واجعليه يفتح الوريقات ويقرئها

6. اصنعى فطور ..وضعى رسالة حب له بجوار الاطباق..

7. رسالة حب مكتوبة على مراية الحمام بخط واضح "طبعا الحركة دى للزوجات بس"

8. اكتبى له عبارة حب على شاشة الكمبيوتر وثبتيها ..على الخلفية

9. طاولة ...للازواج هواة الطاولة ...وممكن جواها تحطى اى رسالة او صورة ليكم مع بعض

اخيراً تبسمك فى وجه اخيك صدقة ...فما بالك ...بشريكك...

نهاركم حب لكل محب ... :lol:

[MZohairy]

باقي يومان wst:: :unsure:

و قد اعذر من انذر

[shiko]

ممكن نفتح بنك الافكار..لكل محب ...ومحبة ..عاوزة اسمع افكاركم ..

بتحب مين ...وازاى هاتقول بحبك

[Damo]

انا نفسي في ورده حمره :ninja:

[MaYousof]

مش لازم حمرة يا دامو .. مشّي حالك بأي لون ..

أساسا في المنتدى هنا هيكون في ناس يوم 14 بيقفشوا كل اللي معاه وردة حمرة أو بيحاول يديها لحد ..

البمبى بناتي ومش وحش قوي ..

[Damo]

اوكيه همشيها بمبي.

بس هفضل نفسي في ورده حمره...

[MZohairy]

باقي من الزمن يوم واحد :ninja:

أظن انا كده عملت اللي عليا و خلصت ذمتي قدام ربنا