النهل الجميل لكل من سار في موكب الرحيل

[aya]

انا مشتركه جديد في المنتدي

جزاك الله خير علي الموضوع والمعلومات المفيده ويجعله في ميزان حسناتك

لا اله الا الله وحده لاشريك له له الملك وله الحمد وهو علي كل شئ قدير

السلام عليكم

تم تعديل 12 فبراير 2010 بواسطة aya

[kodo]

wst::

بصراحة الواحد مش عارف يشكر حضرتك علي ايه ولا ايه

ما شاء الله حضرتك دائما متميز في ردودك وكمان الموضوع الجديد اكتر من رائع

جعله الله في ميزان حسناتك

في رعاية الله

[dcfarouk]

السلام عليكم

اصدار خاص

الاجهزه الكهربائيه في جوله حول العالم

وهنتكلم في نقطتين

اولا ....فيشه الكهرباء ....هتحتها اكيد طالما انت معاك اي جهاز حتي لو لاب توب

ثانيا ....محول الفولت ....وده ممكن تحتاجه او لا حسب الجهاز اللي معاك

اولا..... فيشه الكهرباء

وديه حاجه عامه هيحتاجها اي واحد معاه جهاز جاي بيه من مصر سواء لاب توب او غيره

فيشه الكهرباء بتاعه كندا تختلف عن بتاعه مصر عشان كده لو نات جايب معاك اي جهاز من مصر لازم تجيب معاك فيشه (بلج) لكل جهاز معاك تناسب كندا

وديه صور توضح نوعين الفيش المتوفرين في كندا عشان تعمل حسابك عليهم

ثانيا.....هل انت هتحتاج محول فولت ولا لا

الاجهزه في كندا تفرق عن مصر في حاجتين

1.الفولت

في مصر 220 وفي كندا 110

2. التردد

في مصر 50 hz وكندا 60 hz

ودول حاجتين لازم تاخد بالك منهم يعني لازم قبل ما تشيل جهاز علي قلبك من مصر لكندا الاول اقرا عليه من وره مواصفات الكهربه بتاعته

وده موقع فيه الفولت والتردد لكل دول العالم

http://international-electrical-supplies.c...ctricguide.html

الحلول

عامه ممكن التغلب علي مشكله الفولت عن طريق محول فولت ولكن للاسف مشكله فرق الهرتز ملهاش حل علي مستوي الاستخدام المنزلي

و للتوضيح

لو انت معاك جهاز شغال في مصر ولقيت عليه من ورا

volt 100_220

+

50 - 60 hz

يبقي الجهاز ده هيشتغل زي الفل في كندا وده هتلاقيه في اللاب توب يعني يشتغل علي طول بس هات فيشه معاك

لو مكتوب

volt 220

+

50 - 60 hz

يبقي انت محتاج محول فولت وتشتريه من مصر ارخص كتير من انك تجيبه من كدا لانه في كندا اقل حاجه ب 25 دولار بس في ملاحظات عليه لسه هوضحها

لو مكتوب

volt 220

+

50 hz

الافضل متخدش معاك الجهاز ده اصلا لانه لو جبتله محول فولت لسه مشكله الهرتز بتاع تردد لتيار وديه ملهاش حل وعلي فكره ممكن الجهاز يشتغل بس هتكون كفائته اقل وعمره اقل تبعا لراي الخبراء يعني لو حاجه فيها موتور زي المروحه او التكييف هتشتغل بجهد اعلي لو هي 50 وانت شغلتها علي تردد 60 وهتبوظ اسرع وهتسخن جامد ولو هي 60 وانت شغلتها علي كهربه 50 هتشتغل ابطاء وممكن تبوظ الميكانيكا بتاعتها

وبكرر تاني مشكله الهرتز ملهاش حل

بالنسبه للمحول بتاع الفولت

حبيت اضيف حاجه مهمه لازم تاخد بالك منها وهي الوات بتاع المحول او بمعني اخر القدره او القوه بتاعه المحول يعني لو جايب محول وات مش عالي وجيت حضرتك رحت موصل منه مشترك ورحت موصل فيه كزا جهاز كل واحد بيسحب وات جامد كده انت هتخلي المحول يتحرق وممكن يولع لانه اتحمل اكتر من طاقته

في محولات 2000 وات يعني يطلع قوه 2000 وات

الوات =فولت * امبير

مثلا الاب توب الخارج( output not input) بتاعه 20 فولت و 4 امبير تقريبا يبقي الوات= الفولت * الامبير =20 *4 =80 وات

يعني لو محول فولت قوته 200 وات مينفعش تشغل عليه تلاته لاب توب مثلا زي اللي عند دكتور تهامي كده المحول مش هيستحمل

وطبعا الفولت والامبير بيختلف من جهاز لجهاز

يبقي انت لما تجيب محول فولت من 110 الي 220 (مش محول العكس من 220 الي 110 اوعي تتلغبط )اعمل حساب انت هتشغل عليه كام جهاز وايه نوعيه الاجهزه

من الاخر

يعني لو انت جايب اللاب توب بس يبقي مش هتحتاج غير فيشه عشان يدخل في الكوبس بتاع كندا ومش هتحتاج محول فولت

ونصيحه عامه متجبش معاك اجهزه من مصر الا في اضيق الحدود عشان الوزن في الطياره وخاصه انه اصبح اقل من الاول زمان وكمان معظم اجهز مصر 50 هرتز

وزي ماقلت مشكله الهرتز ملهاش حل

صوره لمحول الفولت

والسلام عليكم

رضيت بالله ربا وبالاسلام دينا وبسيدنا محمد نبيا ورسولا

تم تعديل 12 فبراير 2010 بواسطة dcfarouk

[prince]

مجهود رائع يا د فاروق ربنا يكرمك...

ده موقع خاص بالمعادلة الكندية وتقريبا نص الكتب اللى فيه ممكن تنزلها فرى منهم كتاب اسئلة 250 سؤال خاص بالمعادلة الكندية

http://stores.lulu.com/mcceereview

[اسكندرانيةكنداوية]

ما شاء الله يا د/ فاروق مجهود عظيم و كم معلومات هايل حقيقى تعجز كلمات الشكر أن توفيك حقك جزاك الله كل خير و جعله فى ميزان حسناتك

[مازن أطرش]

مجهود كبير ..مشكورة جهودك ..وربنا يتقبل ..نصايح وارشادات حلوة ...بنتمنى الكل يشتغلو بنفس الروح والهمة ..

[norbakrahmed]

موضووع رائع جدااااااااااا و مجهود جباااار و ربنا يجازيك خير ان شاء الله و تسافر و تشتغل بسرررررررررررررعه بصراحه من اللي شايفاه دي اهم دعوه

[NaWiCaNaDa]

السلام عليكم

تسجيل متابعة لموضوعك الرائع

جزاك الله كل خير

[م جرجس فوزي]

الموضوع لذيذ جدا و شكرا بجد علي هذة الخبرة

ربنا يباركك

[ELSHAMY]

جزاك الله خيرا

[kodo]

:aslam:

اللي حضرتك طلبته يا دكتور فاروق بارك الله لك وجعله في ميزان حسناتك

صور توضح نوعين الفيش المتوفرين في كندا

صورة توضحية لمحول الفولت

في رعاية الله

[tofaha]

شكرا على هذا المجهود الرائع

[ehabtaher]

ما شاء الله بسرعه كده بقيت خبير فى لزق الصور

iframe بين قوسين زى التانيين

كود تانى يستعمل للزق صفحات مواقع النت يفيدك برضه

[eaglsson]

د.فاروق والله بجد تسلم ايدك ومجهودك . ياجماعه النت والمنتديات حقيقي كشفت ان الناس فيها خير كتير وعندها همه عاليه واقبال كبير على العمل الاجتماعي المشترك ومساعدة الغير وبعد عن السلبيه .

تسجيل متابعه وشكر

ودهشه لغياب المشاركات من يوم 16 فبراير مع ان الموضوع رائع بجد

عسى المانع خير ان شاء الله

وفي انتظار اخر فقره بحراره وهي بدائل عمل للاطباء

[ايهاب سالم]

عمل رائع يا د / فاروق

جزاك الله خيرا

[أكسيلانس]

تحية الي د/ فاروق علي المجهود البحثي المنظم -

لو كان العرب و المصرين علي هذه القدره من البزل و التفاني في مساعدة أخوانهم - و لو توازي هذا مع نفس القدر من الاخلاق و الدين

لكنا نسير في بلاد العالم كاللأعلام - يقف لها القاصي و الداني ليلقي التحيه تقديرا و أجلالا

نسأل الله العلي القدير أن ينفعنا بما علمنا و أن يبارك لك في عللمك و معرفتك و أن يثبت علي الدرب خطاك

و بالله التوفيق

[dcfarouk]

بسم الله الرحمن الرحيم

7.الادويه اللي هتحتاجها في السفر

انا كنت بحاول اخلص الجزء الخاص بالادويه قبل ما الاخوه تسافر لاني لاحظت في ناس مسافره في شهر سته كتير والحمد لله انتهيت منه

في الموضوع ده باذن الله هناقش استعداد المهاجر من الناحيه الطبيه للسفر

وعاوز ااكد علي حاجه ان اللي هعرضه هنا ادويه يعني ناقص التشخيص وده شئ مهم جدا لان الطب اساسا هو التشخيص وليس العلاج ...........

حيث انه من الممكن بمجرد معرفه التشخيص ان تبحث عن العلاج في اي مكان او موقع او اي مصدر ولكن الخبره والصعوبه تكمن في التشخيص ولذلك باكد ان يفضل انك تستشير اي دكتور تعرفه في كندا مهاجر معاك او من علي النت تساله ماعدا في بعض الحالات البسيطه زي البرد والمغص البسيط مع الاخذ في الاعتبار الاثر الجانبي للدواء

فقد يكون المرض بسيط كالبرد وتاخد دواء بسيط كالفلورست وانت تظن ان كل شئ يسير ببساطه ولكن لانك لم تضع في اعتبارك اثار الدواء الجانبيه يمكن ان يؤدي لاضرار ولذلك مثلا يجب ان تضع في اعتبارك ان الفلورست في الناس المريضه بالضغط او البروستاتا او الميه الزرقا بيرفع الضغط وبيتعب البروستاتا عند الرجال وبزود الميه الزرقا (بيرفع ضغط العين )

عشان كده هنا انا هحاول اجمع شويه ادويه نستخدمها مع ذكر الاثار الجانبيه وموانع استعمال كل منها و زي ما مدام سميه قالت ان معظم الادويه هناك في المحلات العاديه و مش في الصيدليه ممكن تشتريها بس الفكره ان احنا هناخد امعانا لادويه الغاليه هنا من مصر ولكن الادويه قريبه السعر او الارخص من مصر طبعا مش هناخدها زي المسكنات او خوافض الحراره

ولذلك انا هعمل ميزانيه لثمن الادويه ديه في حدود 250 جنيه الي 300 جنيه للفرد باذن الله

طبعا ممكن ناس تقول يا كابتن لطيف ده كتير هرد وأقول خد بالك ان علبه المضاد الحيوي الواحده هناك ب توصل الي 270 جنيه مصري وده من المواقع الاجنبيه وهوضحه بالتفصيل بعد كده وكمان التامين بيغطي الكشف و مش بيغطي العلاج يعني انت بتمن علبه مضاد حيوي واحد هتاخد ادويه تغطي كل شئ لفتره سنه ونص او سنتين للفرد

فاعتقد والله اعلم ان ال 250 جنيه دول ممكن يوفروا مكانهم اكتر من 1500 جنيه من ثمن ادويه هتشتريها هناك

وياذن الله هعمل جزء خاص بالاطفال والادويه بتاعتهم الطارئه ليهم

في الجزء العلاجي اللي هنا هنغطي ثلاث نقاط

اولا : نصائح عامه لكل المهاجرين وللمرضي بالامراض المزمنه لتحاشي تفاقم المرض او التعرض لحاله طوارئ

ثانيا :الادويه اللي هتاخدها وانت مسافر

ثالثا :مستلزمات طبيه

اولا : نصائح عامه لكل المهاجرين وللمرضي بالامراض المزمنه لتحاشي تفاقم المرض او التعرض لحاله طوارئ

نصيحه عامه لكل مهاجر تذكر انك يجب ان تحافظ علي صحتك لكي يكتمل نجاح مشوارك في الهجره ولذلك انصح كل فرد مهاجر بتحاشي اي عادات سيئه كان يمارسها من شانها تعريضه للمرض

1.ايقاف التدخين مضيعه للمال والصحه والحسنات (اللهم خلص كل مسلم من عاده التدخين )

2.تحاشي الخروج في البرد بدون الاستعداد الازم

3.التعامل مع اي مرض في بدايته قبل ان يتفاقم

4.تحاشي التعامل مع المواد الحاده والحذر منها سواء في العمل او المنزل

5.العادات الغذائيه الصحيحه بدايه من الطعام الجيد كثير الفيتامينات وقليل الدهون مع ايقاف عاده المياه الغازيه السيئه التي تؤدي للسمنه وهشاشه العظام واملاح الكلي و الانتفاخ وتهيج القولون وغيرها من المضار

6.النظافه العامه في المنزل والنظافه الشخصيه للحفظ من الامراض المعديه

7. المواظبه علي الرياضه بقدر المستطاع

8.القرب من الله والمحافظه علي الصلاه خير حافظ واهم نقطه

وتذكر حديت الرسول صللي الله عليه وسلم

عن عثمان ابن عفان رضي اللة عنة قال :قال رسول اللة صلي اللة علية وعلا آلة وسلم (ما من عبد يقول في صباح كل يوم ومساء كل ليلة :بسم اللة الذي لا يضر مع اسمة شئ في الارض ولا في السماء وهو السميع العليم ثلاث مرات لم يضرة شئ) (صحيح الترمذي)

فهل قبلت هذا الحديث هديه من رسولنا صلي الله عليه وسلم وما اجملها من هديه فحافظ علي الدعاء ثلاث مرات في الصباح فلن تضر حتي تمسي و ردده ثلاث في المساء ولن تضر حتي تصبح

اما بالنسبه لاصحاب الامراض المزمنه

بالنسبه لادويه الضغط والسكر صعب التغيير فيها لانها خطر ومحتاجه متابعه للمريض وطبعا مش هغير علاج دكتور تاني

نصيحه هامه لاي مريض ضغط او سكر في السفر

1 . في الشهرين قبل السفر حاول انك تقيس الضغط والسكر بانتظام عشان لو في اي عدم انتظام خفيف تصلحه عند الدكتور بتاعك قبل السفر بفتره كافيه والتأكد من انتظام تاثير الدواء

2. مرضي الضغط والسكر لازم يلتزموا في الاكل كويس اوي قبل السفر عشان تظبيط القياس يكون صح وكمان الاهم بعد السفر عشان ميحصلش ارتفاع مفاجئ وكفايه الضغط بتاع الغربه

3 . اشتري مخزون يكفيك من الادويه لفتره وخد بالك من تاريخ الصلاحيه علي العلبه

وخد بالك ان العلاج بالغذاء اهم مليون مره من العلاج الدوائي

الممنوعات للضغط

1.الملح وطبعا اي جبن بها نسبه ملح عاليه او رنجه او فسيخ او المخللات او او او

2.العرقسوس وجوز الهند

3.شوربه اللحمه او شوربه الفراخ بترفع الضغط

4.الجزر والسبانخ بيرفع الضغط (ممكن ناس كتير تستغرب)

5.السهر لساعات متاخره وقله ساعات النوم

6.التعرض للارهاق النفسي او البدني

7.ادويه ممكن ترفع الضغط مثل

ادويه البرد بصفه عامه

ادويه الحساسيه بترفع الضغط لان فيها كورتيزن او سودوافدرين ومشتقاته زي اللي في الفلورست او النوفلو او الكونجستال

ادويه المسكنات ترفع الضغط لو استخدمت بافراط لمده طويله ما عدا ماده البارامول الموجوده في البانادول او سيتال او بارامول

ممنوع الاكلات الدسمه بصوره عامه عشان الدهون وتصلب الشرايين بوجه عام وخاصه

لمرضي الضغط

ديه ممنوعات عامه بس انا مقدرش اكتب ادويه ضغط

خوافض الضغط من الطعام

1.الفواكه عامه ماعدا التين الجاف

2.البردقوش (له تاثير قوي وممتاز )

3.عصير الدوم

يالنسبه لمريض السكر

اهم حاجه توازن معادله الغذاء والمجهود والعلاج

وعامه مفيش اكل ممنوع الا السكريات البسيطه زي الشكولاته والحلويات وسكر الشاي مثلا

خوافض السكر من الطعام

1.الحلبه (في الابحاث جرامات الحلبه تساوي بالانسولين كما انها توفرفيتامين ب 12 للعصاب في السكر )

2.البردقوش (طبقا لابحاث عديده يخفك السكر بنسبه 30 % )

بالنسبه لمن يرتدي نظاره او عدسه

اي شخص يرتدي مصحح للنظر سواء نظاره او عدسه او اي حاجه تانيه (مش عارف زي ايه بصراحه ) مطلوب منه

1. يعمل تشيك قبل ما يسافر انها مظبوطه ومش محتاجه للتغيير حيث انها تحتاج لتعديل كل فتره من الزمن وبذلك تاخذ فتره اكبر من الزمن للتغير مره اخري في كندا

2. عمل عدسه او نظاره احتياطيه عشان لو واحده اتكسرت تكون عامل حسابك في واحده احتياطي

التصاق العدسه بالعين في الجو المتجمد بين الحقيقه والخيال

طبقا لما نشر في الابحاث فانه بعد اجراء ابحاث علي العدسات في المناطق المتجمده في كندا انه لا يحدث تجمد لعدسه في درجه حراره -20 الي -80 وانه لا يحدث لها التصاق بالعين

ومن البحث اللي عملته لقيت ان كل الحالات اللي ذكرت التصاق العدسه بالعين في البروده الشديده كانت مجرد سؤال عن احتمال حدوث هذا ولكنها لم تسجل مع اي فرد في العالم وهو افتراض خيالي

مشاكل العدسه في البرد ليست معدومه

فانه في البروده الشديده والرياح يحدث لاي شخص كان جفاف بالعين ومع وجود عدسه فان العدسه تعطي شعور غير مريح كما انها تؤدي لاحمرار بالعين نتيجه الجفاف مع العدسه

ولذلك في حاله ارتداء العدسه ينصح ب استعمال نقط مرطبه للعين باستمرار وذلك لتحاشي الحفاف الذي يؤدي بدوره لاحمرار

الخلاصه

من الاخر انت بأي حال كان هتروح لدكتور العيون و تعمل واحده احتياطي وبالمره تتاكد ان القديمه كويسه ومظبوطه علي نظرك

ثانيا :الادويه اللي هتاخدها وانت مسافر

طبعا الادويه اللي هكتبها ممكن يكون ليها اكتر من عشر بدايل او ادويه مشابهه بس انا هكتب نوع واحد منهم عشان الناس متشتتش وتوه بين الادويه

وكمان هحاول اختار الادويه اللي بتكون شامله مش تحتوي ماده علميه واحده علي قدر المستطاع عشان اوفر كميه الشرايط في الشنطه

لازم وانت بتشتري الادويه تحرص ان يكون تاريخ الصلاحيه بتاعها حديث لانك حضرتك بتاخد ادويه ممكن تخزنها فعلي الاقل يكون قدامك سنتين تلاته قبل الانتهاء

وانت بتحط العلب في شنطه السفر حاول تجمع مثلا محتويات علبتين في علبه واحده وكده بحيث توفر مساحه وكمان يبان انهم اقل في الكميه

توكلت علي الله

المضادات الحيويه

اهم ادويه تاخدها معاك وانت مسافر لان فرق السعر بين مصر وكندا مرعب لان كندا قرص الاوجمتين 1 جرام ب 3.5 دولار

طبعا سعر مرعب يعني كورس اسبوع ب اتنين قرص في اليوم ب 49 دولار او 270 مصري

http://www.canadadrugs.com/pre******ion/pr...yword=Augmentin

حط مكان النقط عشان تشوف الرابط كلمه s-c-r-i-p-t -

في مصر العلبه تكفي اسبوع ب 55 جنيه تقريبا

وطبعا المضادات انواع عشن كده هنشتري كزا نوع منها بحيث تغطي كزا نوع من العدوي

فيناكسان 500 مجم venaxan قرص كل 24 ساعه (ممنوع في الحوامل او الرضاعه او السن اقل من 18 سنه ) الكورس لمده 5 ايام في حالات التهاب الشعب والبلغم الشديد وقد يمتد العلاج لمده 10 ايام حسب شده المرض

اوجمنتين مجم 625 .1000 augmentine قرص كل 12 ساعه لو واحد جرام لمده خمس ايام او اسبوع حسب شده المرض وكل 8 ساعات لو 625 جرام (امن في الحوامل وممنوع في من يعاني حساسيه من البنسلين )

سبترين مضاعف القوه septrin d s قرص كل 12 ساعه في حالات الاسهال لمده ثلاث ايام والتهاب مجري البول البسيط لمده خمس ايام

اموكسللين 500 amoxil 500 mg(امن في الحوامل ) وممنوع في الحساسيه من البنسلين ومشتقاته ويستخدم في التهاب الحلق قرص كل 6 ساعات لمده خمس ايام

مضاد للتقلصات

تستخدم في المغص المعوي او الكلوي او الام الدوره الشهريه

بوسكامول اقراص buscamol tab قرص 3 مرات يفضل لانه لا يؤذي جدار المعده علي المدي الطويل كما في الدواء التالي

سبازموبيرالجين اقراص spasmopyralgen tab قرص 3 مرات مسكن ومضاد تقلصات قوي ولكنه لو استخدم لفتره قد يؤدي لالتهاب جدار المعده

مضادات التقلصات ممنوعه في مرضي البروستاتا من الرجال والمياه الزرقاء بالعين

خافض درجه الحراره ومسكنات

يصوره عامه تشتريها من كندا ارخص واجود

وباكد انها ارخص من مصر

اسبرين

الشريط في كندا ب 50 قرش مصري

http://www.walmart.com/ip/Equate-Aspirin-T...500-Ct/10325057

ادول (بارامول )

سعره في كندا للشريط 650 مجم للقرص حوالي 230 قرش يعني ارخص من مصر القرص 500 ملم وطبعا انضف الف مره

250 قرص ب 10.5 دولار

http://www.walmart.com/ip/Equate-Arthritis...250-Ct/10324738

لذلك رخص كتير في كندا عشان كده انت هتاخد شريط كفايه او علبه من كل نوع يادوب تكفي علي ما تستقر ,وبعدين تجيبلك برطمان بارامول وبرطمان اسبرين كخوافض حراره ومسكنات في البيت

وهتاخد عينه من كل من

ديكلوفين اقراص 50 مجم declophen 50 mg مسكن وخافض حراره جيد القوه ثلاث مرات

اندوسين لبو س indocin suppository (مسكن قوي جدا ) ينقع في الالم الشديد زي واحد عنده علي طول مغص كلوي بيجيله وده بديل قوي للحقن

كتافست فوار catafast sachets (مسكن سريع ) علاج قوي وسريع للكدمات و المغص الكلوي (اقل قوه من السابق )

المسكنات وخوافض درجه الحراره كلها ممنوعه في التهاب جدار المعده ما عدا ماده الباسيتامول الموجوده في السيتال او ادول او بنادول

اكسدرينللصداع ده هتاخده معاك في الطياره عشان لو حسيت بصداع وكمان شريط اناليرج عشان لو حبيت تنام تاخدلك قرصين اناليرج

فيتامينات

اقوي نوع فيتامينات في العالم هو السنترم sintrum silver

العلبه 220 كبسوله ب 20 دولار او القرص ب 50 قرش بجد انا مش مصدق

http://www.walmart.com/catalog/product.do?...indingMethod=rr

طبعا الفيتامينات عامه في مصر اغلي بكتييييييييير

مطهر معوي للاسهال او الامساك

سيبروفار 500 اقراصciprpfar 500 mg tab. قرص كل 12 ساعه لمده خمس ايام

سبترين دي اسseptrin d.s tab قرص كل 12 ساعه

بروتوزول اقراصprotozole tab..اربع اقراص مره واحده لمده 3 ايام في الشخص البالغ للاميبا

لاعراض الاسهال

سميكتا اكياس بعض الاطباء لا يفضلها ولكنها تحسن من الاعراض نسبيا يوضع كيس علي نصف كوب ماء ويؤخد ثلاث مرات

ايموديم اقراصimodium tab او بديله (سيدوميد اقراص sidomid 2 mg tab ) وديه خطر في الاسهال جدا ومتسخدمهاش الا عند الشديد القوي في صوره نص قرص الي قرص عند اللزوم لو نازل مثلا مشوار مهم ومش عاوز يحصل مفاجات ملحوظه لازم تاخد في دور الاسهال ده مطهر قوي زي سيبروفار كورس كامل قرص كل 12 ساعه لو هتستخدم الايموديم او السيدوميد حتي لو جرعات بسيطه منهم ومتزدش في اليوم عن قرص ونص من اي منهم باي صوره بس بصراحه دول بيسعفوا لو عندك شغل مهم

مضاد للهرش والحساسيه

(غاليه في كندا عن مصر )

اناليرج اقراص anallerge tab (يسبب النعاس ) وكذلك يستخدم احيانا كمساعد للنوم بجرعه اثنين قرص قبل النوم وايضا مضاد للحساسيه وجرعه مضاد الحساسيه 3 اقراص في اليوم ممنوع في الحوامل الا للضروره وممنوع في مرضي البروستاتا وفي المياه الزرقاء بالعين وقبل قياده السياره لانه يسبب النعاس

لوراتيدين او موسيدين 10 مجم loratadine or mosedin tab 10 mg مضاد للحساسيه ولكن لا يسبب النعاس وليس له الاثار الجانبيه والممنوعات مثل الاليرجيل

الشريط ب 7 جنيه في مصر في كندا الشريط ب 32 مصري

ادويه البرد والرشح

(في كندا ضعف السعر في مصر مرتين الي ثلاثه تقريبا )وهنحتاجها كتير هناك عشان البروده الشديده علي ما نتعود عليها

ادويه البرد في السوق كتير جدا لس اللي انا اخترتها هنا فيها ثلاث ميزات مهمه جدا

لا تسبب النعاس مثل غيرها في السوق وايضا سعرها نسبيا معقول بالنسبه للمواد العلميه بها وايضا لا توجد موانع الاستعمال مثل البرستاتا والمياه البيضاء كما في الفلورست والكونجستال مثلا

سيتافيد اقراص CETAPHED tab. قرص 3 مرات ويفضل لمفعول ضد البرد افضل يؤخز معه 2 قرص اناليرج

التركيبه (سيتافيد + 2 قرص اناليرج ) تركيبه رخيصه التكلفه ولكنها تسبب النعاس نتيجه وجود اناليرج بالتركيبه مع مراعاه الاثار جانبيه

لوراتين دي او موسيدين بلس اقراص LORATIN D repetabs or MOSEDIN PLUS S.R.caps

دواء برد اغلي من التركيبه السابقه الخاصه بالسيتافيد

(دواء للبرد غير منوم ) قرص مرتين يوميا ولتاثير اقوي يؤخذ معه بارامول ثلاث مرات

(الموسيدين بلس اغلي من بديله اللوراتين دي)

ادويه البرد بصوره عامه ممنوعه في الضغط او البروستاتا او المياه الزرقاء كما ان بعضها يسبب النعاس مثل الكونجستال

الادويه اللي ذكرتها هنا من الممكن استخدامها في حالات الجيوب الانفيه البسيطه مع العلم انه علاج الجيوب الانفيه قد يحتاج ادويه اخري حسب شده المرض

فرش اسنان

الفرشه بحوالي 2 دولار او 12 جنيه

لو جبت كام واحده من مصر مش هتخسر

زبده كاكاو

لتشقق الشفتين نتيجه البروده (هام جدا )

علاج العين

كورتيفين نقط للعين cortiphen eye drops خمس مرات يوميا

مطهر للعين كما في وجود صديد او افراز من العين (عماص) ومضاد للحساسه يالعين عند الاحمرار الشديد والشعور بحكه في العين

تيراميسن مرهم عين terramycin eye ointment (وليس جلد ) مرتين يوميا مضاد حيوي للعين

مراهم

للحروق

درمازين كريم dermazin cream ممكن تشتري البرطمان الاسود اوفر من انبوبه المرهم يتم الغيار به علي الحروق

ميبو مرهم mebo cream ب 17 جنيه في مصر و ب 20 دولار بره مصر ممتاز ولكن غالي للحروق والجروح يسرع من الالتئامhttp://www.drugdispensary.com/products/detail.asp?sku=2080451

مضاد حيوي مرهم للجروح

فاركوسين مرهم farcosin oint. يوضع مع الغيار علي الجرح

مرهم للفطريات الحلقيه بالجلد

ميكوناز اتش miconaz-h cream مرتين يوميا دهان

عدوي الفطريات ممكن تحصل نتيجه العدوي من اماكن السكن او الملايات المشتركه او من الرحلات والنوم علي اشياء بها عدوي فطريه

مرهم للتسلخات

كيناكومب كريمkinacomb cream (وليس كيناكومب مرهم ) مرتين يدهن فوق اماكن التسلخ

كريم للحساسيه

بيتنوفيت سي كريم betnovate-c cream مرتين الي ثلاثه في حساسيه الجلد صغيره المساحه 0لو كانت كبيره المساحه يستخدم اقراص الحساسيه)

مطهر للجروح

بيتادين betadine solution (مش هتحتاج تشتريه من مصر لان علبه 500 ملم ب 11 دولار وفي مصر العلبه 100 ملم ب حوالي 10 جنيه علي ما اذكر ) بس اوعي تنسي تشتريه اول ما توصل عشان ده مهم لتطهير الجروح عشان متتلوثش وتحتاج ادويه تانيه ومكلفه يعني لما تتجرح تستخدمه علي طول

شامبو الشعر

رخيص جدا في كندا

750 ملم دوف شامبو 4.5 دولار تقريبا

في مصر نفس الحجم ممكن توصل ب 75 مصري تقريبا للمستورد

معلومه هامه

ممنوع تاخد ادويه بخاخ معاك او سرنجه في غرفه الركاب الا اذا كانت كميه صغيره وكمان لازم يكون معاك روشته تثبت الحاجه لهذا الدواء

ثالثا :المستلزمات الطبيه

كيس قطن طبي حجم كبير

بكره بلاستر طبي حجم كبير 10 سم

مقص طبي او مقص صغير نظيف

خمس بكرات شاش حجم كبير

ترمومتر طبي زئبقي مهم جدا خاصه لو في اطفال

السرنجات هناك مش غاليه بحوالي جنيه السرنجه

[kitkat]

برغم كراهيتي الشديدة لكندا

لكن موضوع يستحق القراءة وبكل تركيز كمان

شكرا :lol:

[Lendo]

جزاك اللة كل خير موضوع و مجهود رائع و هائل

اخوك ليندو في انتظار الميديكال :lol: :blink:

[yosef elmadysm]

بارك الله فيك يا د فاروق