"الولد بلية الميكانيكى" أم "التوكيل" أين خط التوازن بينهما

[عادل أبوزيد]

من عنوان الموضوع كل أصحاب السيارات عندهم إدراك بالمعضلة التى أتكلم عنها و لكن المسألة أكبر بكثير من مجرد الحديث عن "ميكانيكا السيارات " ... السؤال أو المعضلة تواجهنا فى معظم ممارستنا الحياتية - فى مصر على الأقل - هل تلجأ إلى مكتب ديكور متخصص لتشطيب شقتك أم تلجأ ل "مقاول بلبدة" ما هى نقطة التوازن الرشيدة.

ما سبق كان إستهلالا لابد منه

أعتقد أن معظم القراء لهم خبرات بشكل أو آخر فى هذه المسألة ... دعونا نتواصل معا لنصل إلى فهم معين كيف نتعامل مع المواقف المختلفة.

منذ سنوات لاحظت هروب الفرامل أثناء القيادة و ذهبت للتوكيل عدة مرات و فى كل مرة كنت أدفع ما يقرب من الألفين من الجنيهات و بمجرد خروجى من التوكيل ثانى يوم أجد نفس المشكلة مرة أخرى ...... و فكرت فى البحث عن بديل !!

بمرور السنوات كان قرارى أن أبحث عن نقطة التوازن بين الميكانيكى و بين التوكيل.

بالنسبة للغسالة و المجفف فى المنزل إشتريت غسالة و مجفف أمريكانى من السوق الحرة فى مصر "منذ عشرين سنة تقريبا " و مرت فترة و أنا أتعامل مع التوكيل و فجأة توقفت شركة الأسواق الحرة عن تقديم خدمة الصيانة و أشاروا إلى بإسم شخص"سيد سلامة" كان يقوم بالصيانة فى الشركة و يقوم الآن بتقديم الصيانة لمن يطلبها.

و تعاملت مع "سيد سلامة" عدة سنوات فى عمليات صيانة بسيطة .... حتى جاء الوقت الذى إقترح على عمل صيانة كاملة للغسالة و المجفف و قد كان و كانت نهاية الغسالة و المجفف.

و الآن أواجه مسألة إعادة تشطيب كامل لشقتى و طبعا بين شقى الرحا مهندس الديكور يصر و يحاول إقناعى أن "تنزل الشقة على المحارة" و يبدأ من جديد "على "مية بيضة" و من الناحية الأخرى أحد أقاربى له أعمال جديدة فى مجال المعمار يلح على فى أن يلم الموضوع بتكلفة قليلة .. كم بالضبط لم أعرف.

و هناك طرف ثالث هو مقاول يقوم بتشطيب شقة فى الدور الرابع منذ البداية و يقول أنها ستكلفه خمسون ألفا على شقة 200 متر تقريبا .. شقتى مساحتها 380 متر و كنت أعيش فيها فعلا و لكن تحتاج لتشطيب جديد جزئى "الحمامات موجودة مثلا" و هذا المقاول تقديره أن شقتى تحتاج إلى خمسين ألف جنيه !!!! لذا تجدونى فى حيرة كبيرة ما هى نقطة التوازن أضف إلى ذلك بالنسبة للمبانى فإتقدير المقاول قد يصل فعليا لضعف هذا التقدير.

السؤال هنا للأعضاء هل وقعت يوما بين شقى الرحى أو ضرورة الإختيار بين "بلية الميكانيكى" و بين "التوكيل" ... هل فكرت فى الخيار بين تفصيل فستان لحضور مناسبة مهمة فى أتيليه مشهور بتكلفة عشرة آلاف جنيه أو شراء القماش و الذهاب لخياطة محترمة بتكلفة كلية الف و خمسمائة جنيه. ؟

[Mercedes]

السلام عليكم و رجمة الله و بركاته

أنا بالنسبة لى فى التعامل مع هده الأمور فأنا أقوم بالآتى:

ادا كانت الشغلانة بسيطة و معروف أولها و آخرها, بروح للواد بلية و خلاص, ادا كانت الشغلانة - فى نظرى - تحتاج الى خبرة بالفعل, بروح للمتخصص مهما كان هياخد, و بحاول دايما أشوف أى ناس تانيين زى حالاتى كان عندهم نفس المشكلة و أشوف هم عملوا ايه, منهم اللى راح لبلية و لو كان الواد بلية حل المشكلة فعلا و ما عادتش تتكرر, خلاص بروح لبلية, لكن لو كان صاحبى ده راح لبلية و بلية أفندى ماعرفش يصلح المشكلة بضطر أروح للمتخصص, الحاجة اللى أنا اتعلمتها فى مصر, أنى لما آجى أشترى أى حاجة, بالدات فى الاجهزة الكهربائية و الالكترونية و السيارات, ماشتريش حاجة هاى تكنولوجى اوى, بالعكس أشترى الجاحة اللى كل الصنايعية يقدروا يصلحوها و ده السبب اللى أنا عشانه لسه متمسك بالعربية البيجو 505 مو 1980 اللى عندنا من 30 سنة و هو ده برده السبب اللى مخلينى , لما التلاجة الفيليبس المستوردة بتاعتنا موتورها اتحرق, روحت دورت على التلاجة الأكثر انتشارا و اللى قطع غيارها عند البقالين و اشتريتها و هى كريازى نوفروست.

MERCEDES S430

[ابو محمود]

المشكلة يا استاذى اكبر من بلية ومن التوكيل

بلية هتلاقية داخل التوكيل لو هناك اساس للعمل فى مصر يبقى اقولك روح للتوكيل بصراحة دى مشكلة كبيرة كل شيء بة صيانة فى مصر خرب من اول السباكة الى دهان الحائط صدقنى مهندس الديكور افضل من عم ابو لبدة وشال لانة متعلم بس ياريت تسأل علية كويس وتحدد معاة الوقت والتكاليف والمطلوب بدقة لانهم اكثرهم واخدنها وراثة وعدم تخصص ...

اما بخصوص السيارة او اى شيء بة ميكانيكا او كهرباء فعلية العوض ربنا يديك الصحة وتشترى اجهزة بدل ما تصلحها عزيزى .. عندى جهاز التراسونك موجات صوتية

صنع ايطاليا ويعمل بكل دقة وهو باهظ الثمن وعندما ضعفت الترددات واصبح بدون موجة حبيت اودية لمهندس يصلحة فما كان منة الا ان وضع المقبس الفيشة وقال أن السماعات انتهت وتم تركيب سماعات جديدة وحمدت الله انها جاءت بها العيب سماعة ( bizo) وثمن الواحدة 250 ج وعندما تم تشغيل الجهاز لم يحرك ساكنآ ومن ثم ضاعت عليا الف جنية لأن السماعات مادامت فكت من برشامها خلاص انا شربتها وبعد تفكير منى وقلت ياواد باظ الجهاز حاولت فكها وعندها اكتشفت انها غير ملتصقة القاعدة ودى من خبرات سابقة فقمت بلحامها من جديد بألاستعانة ببلية وورشتة وركبت البيزو القديم واشتغل الجهاز كأنة فى الفابريكة وسلملى على المهندسين والزمالك

يعنى يا عزيزى محدش بقى يعرف يفرق بين الفاهم والل مش لانها ماشية بالبركة والحمد للة انها بتيجى فى الات وحديد وربنا يديك الصحة وتصرف

[shiko]

موش عارفة ...ليه هاقولك التوكيل ...

يمكن علشان الابتسامة الحلوة اللى بتشوفها على وشوش الناس هناك ؟؟ :blink:

يمكن علشان ترييح الدماغ ... :lol:

يمكن الخوف من التخريب ...وترجع برضة تروح التوكيل ..

هو اكيد لكل مقام مقال ...يعنى لو خبطة ...بلاش منه التوكيل ...يمكن علشان فيه بليااات "جمع بلى " كتير بيفهموا فى تصليح الصاج ...بس لو العيب فى الميكاميكا انسى ..

الخلاصة العيب محدد والهدف واضح ...يبقى بليه ممكن هنا يلعب دوره ...

لكن الحاجة المتعددة الوظائف "مالتى فانكشنز"التوكيل يسد ...وترييح الدماغ هنا ليه تمنه..

تحياتى ....بصيانة دايمة...مجانية ...فول اوبشن :lol:

[Diab]

أغلب الميكانيكية في التوكيل لم يحصلوا علي تدريبات للتعامل مع منتج التوكيل

فهم لا يزيدوا كثيرا عن بلية

اغلبهم بلية ولكن لهم واسطة للعمل في هذه الشركات

من تجربتي الماضية بشركة رجب وكيل فورد سابفا ايام التدريب العملي الصيفي بكلية الهندسة

[ابو محمود]

أغلب الميكانيكية في التوكيل لم يحصلوا علي تدريبات للتعامل مع منتج التوكيل

فهم لا يزيدوا كثيرا عن بلية

اغلبهم بلية ولكن لهم واسطة للعمل في هذه الشركات

من تجربتي الماضية بشركة رجب وكيل فورد سابفا ايام التدريب العملي الصيفي بكلية الهندسة

ياسلام على الناس اللى بتجيب من الاخر

يا عمنا انا عندى مشكلة عندى فى المكتب تكييف كاريير 18000 وحدة اثناء تنظيف الجريلات تم كسرها ياترى التوكيل ولا بلية وعلى فكرة خارج الضمان لانة من ثلاث سنوات ومن شمس ربنا يهدة

اعمل اية يا زعيم التكييف وهل من الممكن ان اضمن بلية

[مهندس تحكم]

أغلب الميكانيكية في التوكيل لم يحصلوا علي تدريبات للتعامل مع منتج التوكيل

فهم لا يزيدوا كثيرا عن بلية

اغلبهم بلية ولكن لهم واسطة للعمل في هذه الشركات

من تجربتي الماضية بشركة رجب وكيل فورد سابفا ايام التدريب العملي الصيفي بكلية الهندسة

معلش يا استاذ دياب اسمحلي اختلف معك في تعميم ما حدث في توكيل رجب فورد علي جميع التوكيلات في مصر...

انا عن نفسي ليا تجارب كتير في توكيل تويوتا....وشفت بنفسي قد اية العمالة مدربة وفاهمة هي بتعمل اية وبتشتغل ازاي....

يبقي المشكلة في المكان اوالعلامة التجارية ايلي حضرتك اتعاملت معها ...مش في الفكرة نفسها ...وهي الاستعانة باهل الخبرة في مجال العمل....

في بعض ماركات سيارات في مصر لا يفضل معها التعامل مع توكيلها لسؤ التعامل بكافة مجالاتة ...ومنها قلة اوانعدام الخبرة في المنتج..وايضا سؤ معاملة العميل...والخ

بالنسبة لحكاية الديكورات ....دي مرجعها الاساسي لمدي الاهتمام بتنسيق الديكورات...والامكانيات المادية المتاحة...يعني المقاول ابو لبدة ..هايشطب الشقة وهايخليها زي الفل ...بس مالوش في المدارس المعمارية واية ينفع مع اية ....واية ما ينفعش مع اية...دة شغل مهندسي العمارة والديكور...حتي اختيار قطع الاثاث من المتاجر جزء من عمل مهندس الديكور...ولي زملاء كتيرين يعملون في هذا المجال...

بالنسبة لشقة الاستاذ الفاضل / عادل ابو زيد....

ممكن حضرتك تسأل المهندس لية عايز ينزلها علي المحارة...علي قد معلوماتي البسيطة عن شغل التشطيبات....لوالمهندس ناوي يعمل شغل كهرباء جديد زي زيادة اعداد اسبوتات او نظم اضاءة حديثة..او هايعمل شغل بالمحارة او حجر ...يبقي عندة حق...لان دة معناة مواسير كهرباء في الحيطة في امكان جديدة وشغل جديد خالص....وفي الاخر زي ما قولت دة يرجع لميزانية التجديد والديكورات....لو العملية تجديد دهانات وترميمات ..يبقي مقاول او حتي نقاش ممكن يقوم بالعملية كلها ...

الخلاصة:

من وجهه نظري....اذا كان الامر معقد وقد يترتب علية خسارة او مستجدات اكثر تعقيدا ويحتاج لخبرة علمية وعملية...اذا لابد من اللجوء لذوي الخبرات والعلم...اذا كان الامر بسيط ولا يتطلب خبرة كبيرة فقد يقوم بة اي شخص ممارس دون مقدار علمي كبير...وهنا يقع ميزان اللجوء للوكيل او اي صنايعي كويس...

[icehearted girl]

قاللك تعرف فلان

قاله ايوا

قاله عاشرته؟

قاله لا

قاله تبقي متعرفووووووووش

وبالتالي بما اانني مجربتش غير بلية مقدرش احكم

هوا بس الفرق

بلية لما بروحله بحدد طلبي وبيشتغل علي اد امكانياتي

انما التوكيل مهمته يحافظ علي العربية فحالة جيدة ككل

فمتهيالي ممكن تروحله فحاجة بسيطة يطلعلك القطط الفطسانة

داغير ان التعامل مع بلية كشخص اسهل من التوكيل كإدارة متكاملة