ماذا تفعل لو كنت مكاني ؟؟؟؟

[se_ Elsyed]

بجد وصل بي الحال لليأس والقرف مما يحدث في أبواب معينه .. ومنها باب المغتربين وباب كندا

نفس اللت والعجن كل دقيقة مش كل يوم ...

بل أن هناك أوقات تجد موضوعين تلاته ورا بعض ... يمكن بنفس العنوان بس من اشخاص مختلفين عشان يسأل هو لو بصم وهو خارج من السعودية ينفع يرجع تاني .. طب لو رجع .. يرجع طيران ولا بري .. ولو طيران يبقى سعودي ولا مصري ... آه صحيح هو المطار فين قصدي يروحوا له إزاي .. والجو بقى في السعودية يستلزم أجيب جاكت جلد مبطن بفرو من جوه ... ولا بفته ومبطن قطن من بره ؟

طب بالنسبة لمقابلة الهجرة لكيبك .. هي بتبقى لكيبك ولا لكيبك .. أوعى حد يقول لي لكيبك ؟ وبعد ما الزملاء الأفاضل أصحاب الخبرة يدخلوا يضيعوا وقتهم ويجاوبوا لوجه الله وتصل الصفحات إلى أكثر من 300 صفحة لموضوع واحد بسيط .... تخيلوا ؟ آه والله 300 صفحة .... ممكن تلاقي نفس الزميل اللي لسه هايهاجر ويتوافق على ورقه بعد 4 سنين . دخل يشكرهم ويعيد عليهم السؤال بصيغة أخرى : أيوه يعني .. لو كملت الأجراءات .. يبقى في أمل إني أهاجر لكيبك ولا مافيش أمل أهاجر لكيبك أصلي بأحب كيبك ؟

وهكذا دوخيني يا لمونه ...

وهذا الموضوع الذي اكتبه ليس بجديد ... بل أكتبه للمرة المائه ... يئساً .. وأملاً في أن أجد آذاناً صاغيه ... وأملاً في أن يستخدم كل منا عقله ولو لخمس دقائق ويقرأ الموضوعات ومنها المُثبت ، على الأقل قبل أن يدخل ليصرخ طالباً النجدة ..

بالمناسبة ..... يصلني شخصياً يومياً ... أقول يومياً ما لا يقل عن 5 رسائل ... من زملاء مختلفين ... عن نفس الموضوعات الشائعة واللي متنطورة في المنتدى .. البصمة ... الخروج والعوده .. الخروج النهائي .. وأجد حرجاً شديداً في تجاهل تلك الرسائل أو عدم الرد عليها ...

طب أقرأ ... يعني عشان خاطر النبي ..5 ثواني ... 5 فقط .... إيه كتير ؟

وليه تحسسونا إن مجهودنا كله راح في الزبالة وإن ردنا بالأسهاب والتفصيل ذهب أدراج الرياح ...

تماماً زي ما يكون واحد واقف جانب لوحة أرشادات مكتوب فيها كل ما يريد ومع ذلك يسأل عن عنوان هذه اللوحة وهل هي لوحة أرشادات أم لوحه سيريالية من بتوع فاروق حُسني ...

أقسم بالله وقسم يحاسبني عليه الله . إن ما أجده في باب كندا تحديداً . أتحدى إن كان كل كندي عاش وأتولد في كندا يعرف تلك المعلومات اللي في المواضيع دي بالتفصيل الممل واللي تخلي كثيرين يشعروا إنهم عايشين في كندا من عشرات السنين ، واللي لو أتجمعت في مجلدات تعمل سيكلوبيديا محترمه عن كندا منذ العصر البريتوني إلى العصر الحلزوني ...

ومع ذلك لا حياة لمن تنادي ... وناس تبقى داخله واخده في وشها وولا هاممها إيه اللي مكتوب ... يا عم لسه هاقرأ .. أنا ألطع موضوع جديد ... أو أبعت رسالة خاصة لحد كنداوي أسأله عن استفسار أتجاوب عليه بأسهاب ما لا يقل عن 10 الاف مره ..

أيوه ايوه ... عارف والله هاسمع كلمة " معليش .. أستحمل أصل الغريب أعمى ولو كان بصير "

ما هو لو كان أعمى فعلاً كنا عذرناه ... لكن هو ليس كذلك .. فكل ما في الأمر إن المثل بيتقال كده " الكسول أعمى ولو كان بصير ... واللي ما بيفكرش ولو لحظه أعمى ولو لابس نضارات مكبرة من بتاعت الحرب "

يا سيدي أستحمل أصل الواحد بيبقى ربنا يعلم به لو واقع في مشكلة وبيتعلق بقشاية ...

طب تخيلوا ... حتى اللي بيغرق ده لة ما فكرش .... وأرتبك وشاف الدنيا سواد ... فلو في أمل 1 % إنه ينجو بحياته ... فأرتباكه وغفلته دي هاتغرقة بالثُلث ..

أسف على تلك المداخلة الحادة ...

لكن فعلاً فريق الاشراف يأس مما يحدث ... ويأس من اللي بنبات فيه بنصبح فيه ....

وأرجو مما لديه اقتراحات غير الموضوعات المثبتة وغير عملية البحث في المنتدى وكلها أمور لن تستغرق ثواني معدودة .. أرجو إنهم يقترحوها علينا ...

والله يخليكيم ما حدش يقترح خدمة الديليفري لحد البيت عشان الناس ما تتعبش لإن ما عندناش موتوسيكلات كفايه للتوصيل ....

[doha]

والله العظيم ياحج سيد ومالك علي يمين من ساعه قرات العنوان وداخله وعارفه ان هو ده تحديدا الي هتتكلم عنه ..

اقول لحضرتك اقتراح يمكن يساعد شويه

لو حد عمل موضوع خاص بالبصمة او الفرق بين الخروج والعوده والنهائي وغيرها من المواضيع الي بقت ولا فيلم الشيماء في مولد النبي فبدال ماتحوله الارشيف اعمل له دمج مع الموضوع المثبت ..

صدقني انفعالك وشعرك الي طار من شده مش هيجيب نتيجه وبرضه اللهجه الحاده مش هتغير من الواقع شيء ..

بما ان الاسئلة هي هي فاعتقد دمجها مع المواضيع المثبته هيعمل حاجه زي الـ FAQ وهتفيد ناس كتير جدا ان يلاقي نفس السؤال الي كان في باله مكتوب بالنص ده غير ان نفس الجماعه الي بترد دائما وبنفس الردود هتوفر على نفسها الرد ده لان هيكون موجود فعلا في الموضوع المثبت ..

جرب كده لمده شهرين بس اي موضوع متكرر تدمجه مع احد المواضيع المثبته واتوقع باذن الله شعرك هيبدأ ينبت تاني ..

[se_ Elsyed]

جرب كده لمده شهرين بس اي موضوع متكرر تدمجه مع احد المواضيع المثبته واتوقع باذن الله شعرك هيبدأ ينبت تاني ..

طب ممكن أجرب لمدة 5 دقايق هههههههههههههههههههههههههههههههههههههههههههههههههههههههههههههههههههههههه

عارفه الضحكة الطويلة دي ليه ؟

حذري فزري ؟؟؟؟؟؟؟؟؟؟

أصلي كتبت الموضوع وخرجت بره المكتب لمدة نص ساعه ورجعت .. ما هو الغايب لازم يرجع .. واللي راح لازم ييجي

هههههههههههههههه

لسه بأفتح المنتدى تاني .. ودي غلطة عملتها ... معليش أنا اسف ...

لقيت رسالة من زميل جديد ... أسف لن أذكر أسمه ولا اقصد هنا التجريح أو التشهير .. لكن هذا أقرار لواقعنا المرير ...

هذا نصُها " بلاغ - موضوع من تجارب من الواقع بخصوص قانون البصمة - ..... باللة عليكم عايز اجاب نهائية فى قاناون البصمة , وانا شغال فى السعودية ومهنتى نجار مبانى ولكن انا محاسب وعايز انزل بخروج وعودة ومعايا تاشيرة تانية محاسب ,هل هناك خطر . وشكرا على هذا المنتدى الهيل,مع العلم دى اول مشاركة لية وارجو الافادة .وشكرا

كل سنة وإنتي طيبة

[MZohairy]

مالهاش حل يا أحمد

تضخم المواضيع بيجعل قراءتها بالكامل شبه مستحيل

و تخيل لو انا عايز معلومه معينه في موضوع معين مكون من 300 صفحه

و تصادف وجود هذه المعلومه فعلا في هذا الموضوع و لكن في الصفحه رقم 176 مثلا

عايزني الاقيها ازاي؟ و هعرف منين اصلا انها في الموضوع ده؟

فالأسهل بكل تأكيد ان العضو يفتح موضوع جديد

الا لو تم فلترة المواضيع المهمه من كل المداخلات الغير مهمه و تثبيتها و غلقها (و هذا عمل يتطلب مجهود ضخم جدا مع كبر عدد الصفحات)

ربنا معاكم

[se_ Elsyed]

إنت شايف كده يا زهيري ؟

طب إيه رأيك في موضوع مُثبت عن البصمة وفيه المختصر المفيد القانوني ... ده على سبيل المثال لا الحصر

ومع ذلك لا حياة لمن تنادي ؟

الأغرب والاعجب والأطرف اللي بيخليني أضرب كف على كف ...

ليه واحد يدخل يفتح موضوع ويقوم الزملاء برد مبهر ووافي وكافي وممكن أدخل أضيف حاجه لو هناك أضافة مفيدة ... ومع ذلك يبعت نفس العضو رسالة وأتنين وخمستاشر ... يسألني عن نفس الموضوع اللي جاوبت عليه والله ؟

تفكتر ليه يا زُهيري ؟

واتفق معك تماماً في أن هناك كثير من الموضوعات التي تحولت إلى مآساة .. آه والله مآساة خصوصاً في موضوع كندا .... والعضو الجديد الذي يدخل للحصول على معلومة .. سيحصل بدلاً منه على أرتفاع في ضغط الدم من كتر الضفحات اللي بتعدي 300 عن فكرة واحده .... ومن كتر المداخلات التي لا تحمل أي معنى ومن كُتر المداخلات التي تحولت لشيء أسوء من الشات ....

شيء أخر يؤيد كلامي ....

الأعضاء اللي بيطالبوا بفهرسه وتنظيم موضوعات .... طب ما تدخل تعمل كده وده متاح للجيمع .. ولا خلا إتعودنا إننا نقف دايماً في حته ناشفه وغيرنا يقوموا بكل شيء نيابة عنا ؟

اما فلترة الموضوعات يا عزيزي .. فهي حل جميل وفعال .. لكن محتاج لما لا يقل عن 100 مُشرف أو عضو إدارة لأداء تلك المهمة الصعبة والمرهقة ...

وحتى الت 100 دول مطلوب منهم إنهم يحصلوا على أجازة بدون مرتب لمدة سنة ... وكمان يزعلوا زوجاتهم ويودوهم بيت أهاليهم ... ولو مُشرفة أنثى يبقى تنزل تجيب 4 فلبينيات عشان يعملوا شغل البيت نيابة عنها وكمان بالمرة تطلب من زوجها إنه يتزوج واحده تانية عشان هي تتفرغ للفلترة ..

[aimen]

الحل الأفضل هو ما اقترحته مدام ضحى FAQ

ممكن نحدد العناوين العامة لكل ما يخص الحياة فى المملكة مثلا -

خطوات انهاء الورق من مصر

الخروج النهائى

خروج وعودة

البصمة

الإقامة ومشاكلها

خطوات فتح حساب بنكى

خطوات شراء سيارة وتجديد استمارة

خطوات استقدام

خطوات عمل زيارة

وهكذا

كل واحد يمسك جزئية صغيرة يخلصها وترسل لمشرف محدد يتولى جمع الحاجات دى

وترتيبها ومراجعتها وتوضع على شكل موضوعات - ملف ورد - كتاب ...المهم اى حاجه ....

انا مستعد لآخد اى موضوع والبحث فى المنتدى عن المعلومات الخاصة به ...

تحياتى

تم تعديل 11 فبراير 2010 بواسطة aimen

[Tafshan]

ما تعملش ف نفسك كده يا س .. هى دى سنة المنتديات .. :lol:

يمكن المنتدى هنا انا بحبه عشان متحكمين شويه في موضوع الرغى ده لكن مستحيل تمنعه خالص ..

انا عندى حل بايخ شويه .. ممكن تمنع موضوعات المغتربين انها تظهر في شريط العناوين ؟؟

السبب ان المنتدى توجهه سياسي و الموضوعات دى مجرد خدمه جانبيه للمنتدى و بالتالى فليس من المنطق ان تستحوذ على شريط الموضوعات .. مش عارف ان كان ممكن تقنياً انك تعمل كده و لا لأ .. بس ممكن نسأل ..

على فكره لو عملنا كده القراء ح يلاقوا انه اسهل انهم يتصفحوا الموضوعات المثبته التى تضم اجابات عن الاسئله المعاده و لن يجدوا ضروره لفتح موضوع جديد .. يمكن !

تم تعديل 11 فبراير 2010 بواسطة Tafshan

[engmido]

عندى حل اعتقد انه هيبقى كويس

وان شاء الله مش هياخد وقت كتير

دلوقتى حضرتك بتقول انه فيه ناس بتسأل عن مواضيع مكررة مثل ( البصمة -التاشيرة- استقدام الزوجة- وخلافه) ومعظمها حاجات تتعلق بالسعودية والخليج وامريكا وكندا

يبقى حضرتك او اى حد ( عشان متقولش بنترازل عليك ..ههههه) يحدد اللينك الخاص بكل موضوع ويفضل تحديد الصفحة او الصفحات التى بها الاجابة الشافية

لانه بيبقى فيه فى نفس الموضوع وانا شفتها بنفسى نفس السؤال ونفس الاجابة ( مغتربى الامارات)

ويبقى متتعبش نفسك فى الرد والكتابة وتنحر فى نفسك واللى يبعت استفسار ترد عليه باللينك وارقام الصفحات المعدة مسبقا

على صورة. www.egyptiantalk.org/subject/

يعنى copy paste وترفق ارقام الصفحات ولا تتعب فى الكتابة ولا غيره وهو يخش يشوف ويقرا بنفسه

ويجعله عامر :lol: :lol:

[se_ Elsyed]

هو أن أعترضت على الـ FAQ والأيزو 9000 ؟

طب أهو مثال بسيط

موضوع مُثبت من اكتبوبر 2008 في باب المغتربين

لأول مره منذ انضمامي للمنتدى ينتابني هذا الشعور باليأس وأقول " مافيش فايد "

ليه يا جماعة؟

احنا بنطلب المستحيل ؟!!!!

هل لما نقول : ايها الزملاء الافاضل الجدد مرحباً بكم وانتم علي عيننا وراسنا حتى لو عملت زي ناس كتير ورميت موضوع وسألت سؤال ثم عرفت الاجابة ومشيت بدون عودة .. فنحمد الله انك وجدت المساعدة والاجابة الشافية الوافية لدينا ... فلما نقول لك لو سمحت من فضلك قبل ان تسأل سؤال .. خد من وقتك دقائق واقرأ لك موضوعين تلاتة في باب المغتربين او استخدم خاصية البحث الموجود بأعلى شاشة المنتدى على اليسار واكتب مثلاً " تغيير المهن " او " الاستقدام " وهاتلاقي سيل من الموضوعات والمعلومات المفيدة

لكن لا حياة لمن تنادي .... ومازال السؤال يتردد : هو احنا ليه بيصنفونا على اننا عالم ثالث ومش متقدمين وناس ما عندهاش اي منهج علمي لا في التفكير ولا في حل المشكلات ؟

سؤال غريب مش كده

يا جماعة والله الواحد نفسه انسدت واعتقد ده شعور الناس اصحاب الخبرة الموجودين هنا وهم كُثر ... فحرام تكون لسه كاتب في موضوع ومضيع وقتك عشان تساعد حد في موضوع ما .. ومافيش دقايق الا وينضم الينا زميل جديد ليسأل نفس السؤال بنفس الصيغة .. بل إن حالته تتطابق تماماً مع الحال اللي تناولها الموضوع الليل وُضع من دقائق ...

فمرة اخرى ورجاء اخير : اذا كنت عايز حد يساعدك ..فساعد نفسك اولاً .. واتعب شويه في البحث عن المعلومة .. واذا لم تجدها .. فنسأل الله ان يُعيننا على مساعدتك على قدر ما نستطيع .

وأخر في مارس 2009

معليش أنا شخصياً إتخنقت ...

والله العظيم عارف إن الموضوع يهم ناس كثيرين .. وعارف إن في ناس تتصور إنه هو ده مستقبلها ..

لكن الرحمة حلوه وإذا أردت أن تُطاع فأمر بما يُستطاع وما تخنقش اللي قدامك ...

فهل يُعقل إنك تلاقي 10 مواضيع يومياً ... يومياً ....غير سيل الرسائل الخاصة .... للسؤال عن البصمة وكل واحد داخل لا يهمه قواعد المنتدى ولا يهمه توسلاتنا للجميع بإنه يقرأ موضوعات من قبله القريبة مش من اللي من 5 سنين ..

وحيث إن ما فيش إستجابة لهذا الموضوع .. فهذا قرار إداري بحذف أي موضوع مُكرر فوراً بدون نقاش من الإدارة ..

وعشان نبقى عملنا اللي علينا بما يُرضي الله ورسوله وساعدنا كل محتار أو محتاج لنصيحة ... فهذه هي الخلاصة الأكيدة بإذن الله بخصوص البصمة ...

1- البصمة للاجانب هنا موضوع أمني بحت إتخذته السلطات السعودية لتأمين نفسها ضد من يعمل بالبلد ويرتكب جرائم تحت أي نوع ثم يفر بفعلته ويرجع مرة أخرى بإسم جديد وجواز سفر جديد ... بالمناسبة البنجلاديشين بيعملوا كده وأكثر ويرجع بإسم وديانة وجواز ويمكن راس بني أدم جديدة ما عندهمش أي مشاكل في كده وبلدهم بتساعدهم ... لكن مش هايقدر يغير صوابعة ..

2 - وهذا هو المهم .. في حالة الخروج النهائي أو الخروج والعودة والإقامة سارية ... وروحت بلدك وغيرت الجواز ورجعت مرة أخرى بتاشيرة جديدة وكنت باصم بالخمستاشر قبل ذلك ... أول ما ترجع من المطار المفروض ياخدوا بصمتك مرة أخرى .. فأوتوماتكي هايظهر عندهم في قاعدة البينانات إنك كنت هنا إن شاء الله من يومين حتى .. ومع ذلك سلطات الجوازات لا تكترث ولا تهتم بهذا الشيء طالما لم يكن ضدك أي ملاحظات أمنية ...

وبالتالي عادي خالص وهاتستخرج إقامة جديدة طبقاً لصورتك وبصمتك الماضية ..

3- موضوع عدم الممانعة إتلغى ضمنياً ولم يُعلن عنه وبالتالي موضوع إنك لازم تنتظر سنتين من تاريخ المغادرة .. ده بقى كلما فارغ .. بس يُستحسن تغير الجواز .. لإن في ناس ساعات بتبقى متبرمجه على قوانين وقواعد قديمة متوارثة وممكن يوقف لك المراكب السايرة في داخل القنصلية ..

أرجو من الجميع قراءة هذا الموضوع جيداً وأظنه مش محتاج شرح وبالتالي لا داعي لأي إستفسارت جديدة

حد يقول لي .. في اكتر من كده بساطة وتوضيح ؟

[se_ Elsyed]

ممكن الناس تقول

يا عم ما تحرقش دمك ... وسيبها تولع

...

طب وبعدين ... وذنب الناس اللي بتدخل متلهقه على معلومه تفيدها وتلاقي هيصه وتضارب في الأراء وعدم تنظيم .. ذنبهم إيه ؟

إنما لما تدخل مكان مُرتب وكل حاجه موجودة في مكانها والمعلومة سهل إنك توصل لها وبأختصار مش لت وعجن ... فهل كده شيء سيء ؟

[تامر السعدني]

إنما لما تدخل مكان مُرتب وكل حاجه موجودة في مكانها والمعلومة سهل إنك توصل لها وبأختصار مش لت وعجن ... فهل كده شيء سيء ؟

هو حرضتك وضحت الحل يا استاذنا الفاضل

الحل الوحيد السليم هو ان المعلومات دي تتفلتر بشكل منظم جدا

وتتجمع في صفحات ملحقة بالمنتدى بشكل مفهرس

واي موضوع جديد يتفتح بخصوص حاجة من الموضوعات المفهرسة يغلق بواسطة الاشراف ويتم احالة الشخص على الفهرس المنظم ده

الفلترة والفهرسة هتاخد وقت ومجهود كبيرررررررررررررررر

بس ممكن يتحط لها اساس سليم وبعد كده تتجمع المعلومات في الفهارس المنظمة

الموضوع مش بسيط ومحتاج مجهود وهياخد وقت بس مثلا لو اتحطت خطة عمل على مدار سنة او سنتين او تلاتة

وفي الاخر نحقق انجاز وشيء منظم

وممكن يشارك فيه بعض المتطوعين من اعضاء المنتدى

ويكون عمل منظم من انجازات المنتدى

وكتير من اعضاء المنتدى بيكون عندهم وقت فاضي وممكن يشاركوا ولو ربع ساعة يوميا او ساعة اسبوعيا

وبعد فترة هتظهر الانجازات

متهيالي هو ده الحل الوحيد

وحضرتك يا استاذنا عارف ان العمل المنظم بيكون صعب في البداية بس بيريح بعد كده

وانا عندي استعداد للتطوع في هذا العمل في حالة اتخاذ قرار بتنفيذه

وربنا يعينك يا استاذنا الفاضل

[Alshiekh]

السلام عليكم

واضح ان البعض لاينظر للموقع على انه موقع حوارى اصلا

هل نحن موقع تابع لادارات الهجرة ووزارات الخارجية؟ بالطبع لا

وبالتالى فيجب ان يضع اصحاب الاستفسارات فى الاعتبار ان يبذلوا قليلا من الجهد فى البحث والقراءة عما يريدوا ان يسألوا عنه

لاأتخيل انه يمكن ان يكون هناك سؤالا لم يتكرر على مدار عشرة سنوات ولم تتم الاجابة عنه اكثر من مرة.

عملية الدمج والفلترة كما اقترح الافاضل ليست بالبساطة التى يتحدثون بها ،

انا عايز بس كل واحد يتخيل كده انه لسه بيقول بسم الله الرحمن الرحيم وبيعمل كليك محاورات يطلع له صندوق " لك رسالة جديدة "

يفتح يشوف الرسالة ، يلاقيهم عشرة

رسالة بتقول نسيت احد نقطة فى آخر السطر ممكن تحطوا لى نقطة فى آخر السطر رقم 3

رسالة بتقول انا غيرت رأيى وعايز او عايزة امسح المداخلة بتاعتى وكل المداخلات اللى ردت عليها

ممكن تمسحوا الاغنية دى ، اصل انا مش باحب المغنى ده

النكتة دى وحشة

الحقونى ممكن اسأل سؤال

الشكر كل الشكر للمنتدى ورجال المنتدى بس عندى سؤال ممكن اعرف كندا دى فين

العضو فلان صورته وحشة ممكن تشيلوها

العضو فلان قفل الباب على صباعى

بلاغ من الموضوع كذا كذا ، عضو مش عاجبه موضوع وتلاقى التعليق بيقول انتوا سايبين العضو ده يكتب الكلام ده ازاى

وهكذا ،

بدلا من اتصفح المنتدى واعرف ايه آخر الاخبار ، او اقرأ موضوع جديد ، اجد نفسى قد اضعت وقتى فى قراءة رسائل يمكن وصف معظمها بأنها تشبه شكاوى من كى جى تو

==============

طيب انا عندى حل افضل

ايه رأى الاعضاء الافاضل اصحاب اقتراحات الفهرسة والفلترة انهم يقوموا بالعملية دى متطوعين ومشكورين ، والموضوع ليس بحاجة لاى صلاحيات سوى انهم يضعونها على شكل مداخلات نقوم بعدها بتثبيتها.

يعنى مثلا عدة اعضاء من رواد باب كندا يقوموا مشكورين بتقسيم العمل بينهم كل عضو يقوم بتجهيز فهرس لعدة اسئلة واجابتها وبالمثل باب الخليج والسعودية وهكذا حتى تتم الفهرسة بصورة كاملة

وبهذا يكون الكل قد اشترك فى العمل بطريقة فعالة بدلا من مجرد وضع المقترحات بطريقة " اللى على البر عوام "

هل من الممكن ان يتم العمل بهذا الشكل وهل من الممكن انجازه بشكل جماعى؟

[Mercedes]

السلام عليكم و رحمة الله و بركاته

أولا أنا بشكر طاقم الاشراف اللى فى المنتدى على المجهود الجبار اللى بيعملوه bv:-

و بصراحة الواحد لما بيبص على المنتديات التانية و يقارنها بالمنتدى ده, بشعر أن المنتديات التانية أغلبها كلام فاضى و هلس و الواحد مابيطلعش منها بأى حاجة نافعة, فجزى الله كل القائمين على هدا المنتدى اللى بجد, منتدى مفييييييييد.

ثانيا, انا شايف أن المشكلة كلها بتدور حول, أن لو أى أخ فاضل أو أخت فاضلة بيحب يسأل على حاجة, بيستسهل و يفتح موضوع جديد و ده أدى الى تراكم المواضيع و خلى فى مواضيع حيوية و هامة جدا فى الصفحات اللى ورا و اتردم عليها نتيجة ظهور موضوعات جديدة و بالتالى الحل اللى أنا شخصيا - و كل واحد حر فى رأيه و اقتراحاته طالما أنها فى حدود الأدب و المنطق - هو , فى حالة عرض أى موضوع جديد يكون متكرر, أن يقوم طاقم الاشراف بتوجيه العضو الكريم الى أن هدا الموضوع مكرر و يتم اعاده توجيه العضو الى الموضوع الأصلى و هنا سيتحقق فائدتين, الأولى و هى اعادة احياء المواضيع القديمة المتأخرة اللى ورا بما فيها من ردود و مشاركات هامة و قيمة سوف تفيد كل الأعضاء المهتمين بدات الموضوع و الحاجة التانية هى عدم تراكم المواضيع بكثرة .

بس كان لى رجاء صغير و هو, أن المداخلة اللى أنشأها العضو الفاضل يتم نقلها بشكل تلقائى من قبل ادارة المنتدى الى الموضوع الأصلى القديم و بالتالى سوف تعتبر هده المشاركة بمثابة احياء لهدا الموضوع القديم الى الصفحات الأولى و يتم الغاء الموضوع الجديد و بالتالى الأخ الفاضل الدى أنشأ الموضوع الجديد لن يشعر بأى نوع من الاهانة نتيجة اغلاق موضوعه,لأن بصراحة لما أى عضو بيعمل موضوع جديد أو حتى مشاركة جديدة و ييجى يلاقيها اتشطبط, بتكون حاجة تغيظ و تشعر الشخص بالاهانة و عدم الاكتراث.

آسف جدا جدا جداااااااااااااا للاطالة عليكم

و شكرا لمن صبر على قراءة رسالتى

و الله ولى التوفيق

MERCEDES S430

[تامر السعدني]

هل من الممكن ان يتم العمل بهذا الشكل وهل من الممكن انجازه بشكل جماعى؟

الاخ الفاضل

جزاكم الله خيرا واعانكم

الشكل الجماعي يحتاج تنظيم

وامر الفهرسة ليس هينا ولكنه ليس معجزة او امر مستحيل

وانا شخصيا متطوع للعمل في هذا الامر

فليتطوع احد المشرفين للقيام بهذا العمل

ويكون فريقا من المتطوعين -وانا اولهم- ليقوموا باعمال الفهرسة وفق جدول زمني ميسر جدا

وان استغرق الامر سنة او سنتين في النهاية سيكون عندنا نتيجة جيدة بإذن الله

[حسام يوسف]

الحقيقة يا عم س س أنا مقدر تماما شكواك المرة

ومعلش أنت بتواجه ثقافة مسيطرة منذ السبعينيات

الفهلوة والاستسهال والاستهبال انا آسف كمان

ليه أتعب نفسي وأقرا؟

ما أنا أرزع سؤال

وان شاء الله اخد الاجابة وعلى سؤالي أنا كمان بشخصيتي وحالتى وتفاصيلي

طيب

والحل

الحل المركب من أكثر من توصية قيلت من أكثر من عضو وعضوة فاضلة

1=كما تفضلت أختنا ضحي بمبدأ FAQ

2=فتح باب التطوع من أعضاء لهم خبرة فى باب المغتربين وباب كندا لفلترة الموضوعات والدمج والحذف

على سبيل المثال هناك أكثر من موضوع مفتوح للكيبيك

والحجة انه بقى صعب عشان بقى 300صفحة

خلاص

يتم فلترة الموضوع وازالة جراحية للتضخم

وبعدها دمج الموضوعات الخاصة بالكيبيك

والخطوة الأخيرة هي ما أراه فيماسيلي:

3=الاعلان عن عقوبات بالايقاف لمدد تبدأ من أسبوع عن المشاركة فى المحاورات لمن يكتب سؤالا اجابته موجودة وقتلت بحثا

وتنفيذ العقوبات بشكل واضح وصريح لا مجاملة فيه

ماحدش كان مصدق نضافة المترو فى الأول وان ممكن يبقي عندنا مرفق بالنظام والنظافة دي

طيب ليه ده حصل؟

تم تطبيق الغرامة فورية وبلا استثناءات

طبعا لو كنا عملنا غرامة ولو شلن على اللى يخالف

كانت ظاتت

وبقت ليلة يا عمدة :closedeyes:

ولاحد راح السعودية

ولا كندا حتى

لكن نقدر نستعمل غرامة الايقاف لمدد متصاعدة

ده رأيي

وبجد بجد ربنا مع فريق الاشراف خصوصا بعد اللى قاله الفاضل محمد

تم تعديل 14 فبراير 2010 بواسطة حسام يوسف

[Advisor]

تسابق الجميع لشرح المشكلة و تطور الحوار إلى البحث عن حل و وصلنا إلى خطوط عريضة أو ربما حلولا موضوعية و أصبحنا جزءا من الحل

ما سبق كان إستهلالا لابد منه

دعونا نضئ شمعة بدلا من الشكوى من الظلام.

بداءة الباب مفتوح لقبول متطوعين يقومون بتصفح كل مواضيع باب المغتربين و باب الهجرة إلى كندا و فتح موضوعين جديد أحدهما بعنوان فهارس باب المغتربين و الآخر فهارس باب الهجرة إلى كندا

دعونا نبدأ و نضع رؤوس موضوعات و نبدأ الفهرسة .... ثم نتوقف بعد يومين أو ثلاثة و نراجع و نطور طريقتنا فى الفهرسة و التنقيح.

إلى العمل