لحد امتى هانتفرج و نسكت

[pink rose]

قاعدة في امان الله لا بيا و لا عليا باتفرج امبارح على فيلم على قناة اسمها بانوراما فيلم

و اذ فجأة فقرة اعلانية عن افلام جديدة

و الله العظيم انا صعقت جابوا اعلانين لفيلمين ورا بعض كده خبط لزق واحد اسمه رسائل البحر و التاني احاسيس

في ايه يا جماعة هو النظام هايفضل كده على طول؟؟؟؟؟؟؟؟؟؟؟؟؟؟

سينما و الحمدلله بطلنا نروح من القرف اللي بيقولوا عليه افلام

طيب انا قاعدة في بيتي اهو مع اهلي ليه يخدشوا حياءنا بالشكل المقزز دا؟؟؟؟؟؟؟؟؟؟؟؟؟؟؟؟؟؟

عاوزين يعملوا افلام زفت و كلها عري و مسخرة ما عندهم السينما يشبعوا بيها لكن ليه يقرفونا في بيوتنا

و يا فرحتي كاتبين للكبار فقط طيب احنا و اطفالنا اللي قاعدين في بيوتنا نعمل ايه لما يجيبوا اعلانات افلامهم القذرة دي في التليفزيون

انا عاوزة اعرف الحل ايه؟؟؟؟؟؟؟؟؟؟؟؟؟؟؟؟؟؟؟؟؟

ما حدش يقولي غيري المحطة و ما حدش يقولي خلاص بلاها تليفزيون

انا عاوزة اقعد في بيتي مطمنة على بنتي هما اللي المفروض يحلوا عننا بقلة ادبهم

السؤال بقى ازاي؟؟؟؟؟؟؟؟؟؟؟؟؟؟؟؟؟؟؟؟؟

تم تعديل 12 فبراير 2010 بواسطة remo

[الغريب]

سبحان الله والله كنت هفتح موضوع عن نفس الحكاية دي النهاردة في المحاورات عمرك أطول من عمري

بصراحة بقى إسفاف وقلة أدب وقلة حياء

فيلم "رسايل البحر" على حد ما قيل أنه كله شذوذ جنسي.. سبحان الله خلاص "شذوذ جنسي" يعني الباب بقى على البحري خالص للدرجة دي طيب وبعدين فعلا تكاد تكون كل أفلام السينما بالشكل ده ، وبصراحة أنا شايف أنهم بيوجهوا الشباب للفجور أنما هو مش موجود بالصورة الوحشة دي

وحجتهم البليدة في كدة أن ده واقع بنعيشه ولازم نعرضه واقع أيه وزفت أيه وحتى لو واقع هل هو على مسمع ومرأى من الناس ولا علني وكل الناس بتتعلم منه

على العموم هو تيار فساد مستشري بيقابله تيار ديني الحمدلله ظاهر أيضا. أما بالنسبة للدولة فأنا مش مستني منها رد فعل زي كل حاجة زي الفساد الموجود في كل شيئ في البلد وربنا فعلا يحفظ أولادنا :rolleyes:

[pink rose]

لازم يكون في رد شعبي انا ماليش دعوة بالحكومة لانها ايدك منها و الارض

انا كنت لسا حالا بافكر اكتب الموضوع دا في منتدى عمرو خالد و مصطفى حسني و للشيخ خالد الجندي وعلى الفيس بوك

هما دول الشباب اللي ممكن يقودوا حملة مفادها امنعوا اذيتنا في بيتونا باسفاف المبدعين بتوع السينما

و الله العظيم لازم حملة شعبية جامدة جدا للتصدي للقرف دا بقى

فكروا معايا نبعت لمين تاني عشان زي ما هما بيروجوا لافلامهم احنا كمان لازم نروج للفكر السليم بمنع قلة ادب

تم تعديل 12 فبراير 2010 بواسطة remo

[aimen]

دا ابداع وفن ؟؟؟

اه ....طالما ما لهم علاقة بالسياسة ولا بالدين ...يبقى ابداع ....واهى فرصة الشباب ينشغل ويتلهى على عينة

حضراتكم سمعتوا عن لقاء احمد زويل وفاروق جويدة اللى اتلغى ..لأسباب خايبة وعبيطة

" "

وأبلغ فاروق حسنى وزير الثقافة العالم المصرى أحمد زويل المبعوث العلمى للرئيس الأمريكى أوباما أن الوزارة قررت إلغاء ندوة تكريمه مع الشاعر فاروق جويدة التى كان مقررا عقدها مساء الأحد المقبل فى دار أوبرا دمنهور، وتحديد السبت المقبل موعدا لها، على أن تكون مقصورة على "زويل" دون جويدة، وبرر حسنى إلغاءها بالخوف من تزاحم الجماهير، وهو ما علق عليه جويدة قائلا "بخلوا علينا بأشياء صغيرة" فى إشارة على أن هذه الندوة كانت ستعيدهما على مسقط رأسيهما "دمنهور". """

طبعا لأن احمد زويل ...ما طمرش فيه وعمال بيشكر فى رجب طيب اردوغان على ديرم وماعبرش ابو علاء ......

وفاروق جويدة ماشاء الله عمال بيسلخ الحكومة بقصايدة واشعاره

حسبى الله ونعم الوكيل ...

ال بالمناسبة مافيش كأس امم فى السكة ولا حاجه ؟ علشان نشغل الناس دول شوية .. اه افتكرت اهى ازمة الأنابيب شغالة لما تخلص نشوف لهم حاجه

تم تعديل 12 فبراير 2010 بواسطة aimen

[shiko]

فى االصباح الباكر ..

اشترى الجريدة ...

افتحها واقلب في اول صفحتين .."عندى عادة غريبة فى قرائة الصجف ابتداءاً من الخلف للامام"

صدمتنى تلك الصور الكبيرة لفيلم تقريبا اسمه رسايل بحر ..موش فاكرة...تلفت عن يمينى وشمالى ...استحى ان يرانى احد وانا ممسكة بتلك الجريدة "المصرى اليوم"

اعدت تطبيقها ودسستها فى حقيبتى ..

لاى بحر هذا الذى نخلع فيه اخلاقنا عذرا يا بحر

[عاشق الترحال]

صورة بالكربون لأفلام خالد يوسف وإيناس الدغيدي وداواو عبدالسيد و هاني جرجس فوزي وغيرهم من المخرجين الذين يدسون السم في العسل بدعوى فيلم جرئ يناقش قضايا حساسه ويوضع عليه شعار ( للكبار فقط ) !!!!

عبارات بذيئه ولقطات جنسيه صريحه وقباحه ما بعدها قباحه هذه هي محتويات الافلام الجريئه والهادفه التي تناقش قضايا حساسه في نظر هؤلاء القواديين .

{ألا يظن أولئك أنهم مبعوثون**ليومٍ عظيم**يوم يقوم الناس لرب العالمين}

الموضوع كل يوم بقى في أسوأ وبكره هيلغوا الرقابه وهتشوفوا بعنيكم .

{يومَ تشهدُ عليهم ألسنتهم وأيديهم وأرجلهم بما كانواْ يعملون**يومئذٍ يوفيهم اللهُ دينهم الحق ويعلمون أن الله هو الحق المبين }

وحسبنا الله ونعم الوكيل فيهم وفي كل من روج لأفكارهم

[الغريب]

على فكرة ياجماعة لا أظن أن هذه الإفلام تدر عائد على منتجيها من الحضور في السينمات لأن الحضور قليل جدا وكل الشباب دلوقتي بيقدرو أنهم يجيبو الأفلام دي من مواقع الإنترنت.

يبقى هنا في سر مهم قوي لازم نبحث عنه .. الإفلام الساقطة دي مبتدرش أي عائد على المنتج وفي نفس الوقت هو بيضمن من خلال النت أنها توصل لكل بيت، يبقى خلونا نفكر شوية :

المنتج بينتج الإفلام دي ليه ؟؟ وإيه العائد المادي بالنسبة ليه ؟؟ طيب العائد المادي ده هيجيلو من فين طالما مفيش تذاكر سينما ؟؟ وفي نفس الوقت مبنسمعش ليه عن مجهودات ضد تسريب الأفلام وهي في السينما لمواقع الانترنت ؟؟

أظن الأسئلة دي وضحتلكم الأمور

[rewsha]

باضم صوتي لصوتك يا ريمو

بجد انا كمان زهقت والله ومش عارفه اعمل ايه

طب اضحكك على اللي حصل عندي في البيت .

انا عندي رسيفر من اللي بيفتح قنوات الشوتايم والاوربت وال art كنت لما باجي ادخل انام او اخرج بره البيت باشيل الريموت وسلك النت علشان البنات عندي

قمت فوجئت بالصاعقه الكبرى وانا قاعده معاهم لما بيساْلوني انت بتشيلي الريموت ليه (قلت لهم علشان في افلام اجنبي مش حلوه ومايصحش تشوفوها )

لقيت الاتنين بيضحكوا ويقولوا لي طب ابقي شيلي ريموت الرسيفر التاني كمان

وتعالي شوفي اعلان فيلم احاسيس و..........و.........و........وقعدوا يعددوا لي همه اسماء الافلام

بصراحه بقيت في نص هدومي ومش عارفه ارد اقول لهم ايه وكمان اتصرف واعمل ايه

وشكلي كده هاشفر كل القنوات ماعدا قنوات الكرتون بس

يعني الواحد هايلاقيها من قنوات اغاني وله اعلانات افلام وله اعلانات ادويه من اللي بالي بالك وله من ايه بالظبط

ومش معقول هافضل قاعده جنب البنات وهمه بيتفرجوا على التلفزيون طول اليوم

احنا فعلا عاوزين حل .

[engmido]

اولا حسبى الله ونعم الوكيل

-(ان الذين يريدون ان تشيغ الفاحشة فى الذين امنوا لهم عذاب اليم فى الدنيا والآخرة والله يعلم وانتم لا تعلمون)....صدق الله العظيم

يا اخواننا هذا طبق الاصل الموضوع اللى انا فتحته باسم كفاك تشويها لسمعة مصر يا خالد يوسف

وفوجئت ان فيه ناس قال بتدافع ومش عاجبها الكلام وده فن والكلام اللى مالوش لازمة

مش عارف الفساد بقى فن ...ضياع الشباب بقى الفن.....ضياع الدين والحشمة بقى فن

حسبى الله ونعم الوكيل

[pink rose]

عارفين اللي يحرق الدم فين؟؟؟؟؟؟؟؟؟

انهم كاتبين عليها عبارة للكبار فقط بس للاسف الفيلم بيتلخص بقرفه بقلة ادبه في دقيتين اتنين و بيكون عند كل واحد جوه بيته

و الله انا شايفة الحل اننا لازم نجمع اكبر عدد ممكن من اللي رافضين المسخرة دي و نوصل صوتنا لحد ما يبطلوا يقرفونا في بيوتنا بالشكل المقزز دا

فتحت الموضوع على كذا موقع لقيت كتير رافضين الوضع بس الكل مستني حد يعمل حاجه

لو فضل كل واحد مستني يبقى خلاص ما حدش هايعمل اي شئ

الناس كلها قعدت تصوت و تبعت للفيفا عشان ماتش السودان هو دا اقل اهمية من الكورة؟؟؟؟؟؟؟؟؟؟؟؟؟؟؟؟؟؟

انا عاوزة نجمع اكتر عدد ممكن من الرافضين و نعمل حملة على الفيس بوك و هنا في المنتدى في قسم رسالة الي مسؤول

مين المسؤول عن ان المسخرة دي تدخل بيوتنا انس الفقي؟؟؟؟؟؟؟؟؟؟؟؟

نبعتله نقوله المهم ما نفضلش ساكتين كده

انا قرفت قرفت

[Mercedes]

السلام عليكم و رحمة الله و بركاته :aslam:

أنا فعلا شايف أن الغرض من ورا الأفلام دى مش الربح خاااااااااااالص wst:: , لكن ده نوع من الاعلام الموجه اللى بيهدف فعلا الى نشر التسيب و الفساد و الانحلال و الرديلة فى المجتمع حتى تكون زى الميه و الهوا , زى شرب السجاير يعنى.

و ان يكون العادى بعد كده, أن الأب يعرف أن بنته على علاقة بزميلها فى العمل أو الدراسة ولا يعترض أو يستغرب هدا التصرف و أن الواحد لو شاف بنته نازلة من عربية واحد زميلها, ما يتنرفز ولا حاجة , ايه يعنى , ما هو كان بيوصلها و الناس لبعضها برضه.

ولا تدكرنا, السجاير فى بداية انتشارها فى المجتمع المصرى كانت من التصرفات المستهجنة جدا و لو بصينا دلوقتى هنلاقى شرب السجاير أصبح تصرف عااااادى جدا.

ده طبعا أن الاعلام اللى من النوع ده بيهدف فعلا الى تشويه صورة مصر أمام العالم كله و هى محاولة للاجهاز على البقية الباقية من مصر !!!!!!

كنت بعد ادنكم عايز أصحح الاية الكريمة:

إِنَّ الَّذِينَ يُحِبُّونَ أَنْ تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ وَاللَّهُ يَعْلَمُ وَأَنْتُمْ لَا تَعْلَمُونَ

MERCEDES S430