خـــــــــــــــــــــلاص عايزين الخـــــــــــلاص

[se_ Elsyed]

بجد لقد أستفحل الأمر ووصل إلى درجة لا يمكن السكوت عليها وأصبح كل شيء على عينك يا تاجر والناس أصبحت تلمس مباشرة الحالة التى وصلت إليها مصر بعد 23 سنة من حكم مبارك ...

وأصبحنا نسمع عن إختفاء السلع من الأسوق والغلاء الفاحش في أسعار الأدوية والأغذية والملابس وعادت بحمد الله بعد غيبة طويلة طوابير الجمعية وتدهورت قيمة الجنية المصري وأختفت الأغاني التى كانت تمجد وتفخم فيه ومنها " يا جنية يا جنية يابو مروحة ... عروستنا الحلوة مروحة " وأصبح الناس ينظرون إليه نظرة عطف وحسرة ولسان حالهم يقول " إرحموا عزيز قوم ذل "

وخرج علينا أخيراً الأسبوع الماضي رئيس وزراء حكومة مبارك الدكتور الهُمام عاطف عبيد لزف إلينا خبر سعيد وهو انه قرر بيع العديد من الشركات التى تملكها الدولة للمستثمرين بأسعار مغريه ، وذكرني هذا بالباعة الجائلين الذين يبيعون شباشب وملابس حريمي على عربات اليد في العتبة وسوق غزة والموسكي....

وقرب قرب يا جدع مصنع الحديد والصلب للبيع ... يالا قبل ما يعقل يا جدعان المعلم محبوس وعايز فلوس ... إشتري مصنع الحديد وخد عليه مصنع أسمنت هدية .... مين قال أنا ... حد قال 25 ج يا أفندية ....

وعندنا كمان السد العالي ومعاه 3 لمبات 220 فولت وممكن نتكلم عن بحيرة ناصر كمان .. ما تسمعونا الصلاة عالنبي يا جدعان .... الأفندي أبو طاقية شارون اللي واقف في الركن ومتبت عالشنطة اللي في أيده هناك ده قال كام ؟

عندنا كمان يا بهوات مترو أنفاق بيمشي بالكهربا ومعاه أتوبيسين نقل عام من أيام أبو رجيلة شغالين على خط الكيت كات - روض الفرج ... مين اللي غاوي شعلقة ... السعر بعد المعاينة والوسطاء يمتنعون ... وإوعى حد يقول مجنون ...

وهكذا يا سادة وصل حال البلد بإننا نعوض خيبتنا في بيع ممتلكاتنا وفرض الضرائب بمختلف الألوان والأشكال ، ومع إني مع الرأسمالية والاقتصاد الحر قلباً وقالباً ولكن ليست بهذه الطريقة المريبة والتى نعرف فيها مسبقاً من هم المشترون وبأي سعر يشترون ونعرف أيضاً أين تذهب هذه الاموال ...

إلا ماحدش شاف توشكى ياخواننا اليومين اللي فاتوا دول ؟

توشكى وحشتني قوي وما فيش حس ولا خبر عنها من فترة وماشفناش لحد دلوقت خيارية واحده من إنتاجها ... خير اللهم أجعله خير ....

هــــــيه ... فكروني بالذي مضي الله يحرق دمهم ، فاكرين مشروع البتلو اللي كانوا عمالين يهللوا له في الثمانينيات وقولت في نفسي - الامارة بالسؤ - بس يا واد يا س س ده انت على كده كل يوم هاتفطر كوارع وتتغدى فشة وممبار أما العشا فعايزه يكون خفيف علشان الكوابيس يعني شوية لحمة راس وجوهره ولسان .. وقعدت مستني جنب محل المعلم عكوة الجزار إني ألاقي اللحمة رخصت أبداً .. وطال الإنتظار والحكومة مارمتلناش حتى عضمه نمصمص فيها ...

ديك النهار طلع علينا برضوا عاطف عبيد ووزير التمويه ليبشرنا بطرح لحوم ضاني مدعمه للغلابه في المجمعات الإستهلاكية بمناسبة العيد والشوربة والفتة والذي منه ومع إنها طازة إلا إن الناس برضوا بتسميها لحمة جمعية لإنها مختلفة برضوا عن لحمة المعلم عكوة ... تصوروا بكام ؟!!

سعر الكيلو 25 ج !!!!! يا سلام إيه الرخص ده .. اهو الدعم ده هو اللي جايب البلد ورا ومبوظ ميزانية الدولة ...

وكنا ممكن نصبر ونمني نفسنا بالأوهام لو أحوالنا الأقتصادية نيلة ولكننا دولة لها سيادة وذات قوة ولكن ما زاد الطين بله بإننا أصبحنا مثل الماء لا لون ولا طعم ولا رائحة وأي زقة ممكن نقع ونتكعبل ونروح في داهية وأصبحت كل الدول حتى التى كنا نتندر عليهاا مثل سوريا وأيران أصبحت الآن تسبقنا بخطوات ونحن نتراجع ونتراجع ونغرق في أوحال الديكتاتورية !!!

إذاً فما الحل ؟

- هل الحل يكون في تكوين ميليشات مسلحة تقوم بعمليات إغتيال لرموز الديكتاتورية وبالتالي نقع في دائرة العنف والدم اللانهائية ؟

- أم الحل في تكوين خلايا سياسية سرية تطبع وتوزع منشورات تناهض الحكومة وتفضح أفعالها ؟... ويتوقع طبعاً قيام الحكومة بمحاربة هؤلاء وسحلهم وإرسالهم إلى ما رواء الشمس ... ويخسر الجميع ...

- ام نكشف رؤوسنا ونفضل ندعي على الحكومة ليل ونهار لحد ما ربنا ياخدهم أو ياخدنا أحنا علشان يستريحوا ....

ولغاية ما نلاقي حل .. اطالب الحكومة بالبحث عن حل جذري لمشكلات الشعب بعيداً عن المسكنات ...

نريد حلول نهائية فعالة ومؤثرة كأن تستورد الحكومة مثلاً البقية المتبقية من الغازات السامة الموجود لدى الاخ العقيد معمر الجذافي وتعبي الحاجات دي كلها في طائرات هليكوبتر وتيجي في ليلة شتوية باردة والناس كلها نايمة ومتكلفته تحت الألحفة والبطاطين وترش الغازات وتخلص على الشعب دفعة واحدة وبالتالي تُحل جميع مشاكلنا ...

وممكن واحد يسأل ...طب والكام مليون الموجودين بره مصر يا فالح ما هم مصريين برضوا ؟ ، أقول له الحل موجود عندي يا باشمهندس ، إحنا هنا هانبقى قدام إختيارين لا تالت لهما :

1- يا إما الناس هاتخاف ترجع مصر وتفضل هائمة على وجوهها في بلاد الله لخلق الله ... وهو ما تريده الحكومة ..

2- يا إما الواحد يقايس ويرجع وفي هذه الحالة هايلاقي مندوب سامي عن الحكومة مستنية في صالة كبار الزوار ومعاه حقنة غاز سام من اسبوع البواقي والفُضل مخبيها ورا ضهره وسيعاجله بحقنة خطافية في العضل ويفرفر المغترب الغلبان في ساعتها وبكده يبقى ريح وإستريح والحكومة تضع يدها على الخلاط والفيديو والمروحة اللي جايبهم من بره ويبقى الجميع حقق مكاسب ومنافع من وراء هذه العمليات النضيفة ...

أرجو من الجميع دراسة هذه الإقتراحات وطرح أفكارهم اللانمطية بهذا الخصوص ...

س س ... مغترب بيخاف من الحُقن .

[Salwa]

صباح الخير .........

طيب لو حقولك على حاجة .....تصدقنى والا ما تصدقنيش ؟؟؟؟؟

انا رغم طبيعتى ...المسالمة جدا جدا جدا .......

فى يوم فكرت .............................مانت عارف انا ساعات برضه ...بفكر.

اننا نعلق مشانق بطول الطريق ..من الاسكندرية للقاهرة ....ونسحب الناس دى واحد واحد نعلقه فى مشنقة .........ونتركه عبرة ....للى ييجى بعده....

لكن صادفتنى مشكلة ؟؟؟

والباقى ...باقى الشلل .......اختار لهم ..اى طريق..

بصراحة ......حرام ..ان يتولع فيهم بس ........

انا اسمع الشكوى المرة ....من ناس دخلها يعدى ال1500 جنيه .......يعمل ايه اللى بيقبض للآن ...200 جنيه .......والله العظيم اعرف ابن جارة ...معاه ليسانس ..وبيقبض 139 جنيه ......

ياعالم ............

الناس بكرة حاتعمل زى الفدائيين ..........والله العظيم .

بعد حالات الانتحار المتعددة ........الناس حاتبدأ تدمرهم ....

ماهى دى حيلة اليائس ..................................

قول معايا .......ارحموا من فى الأرض ....الله لايرحمكم ..

[sos]

انت متأكد....يا س س....

ان ده موضوع يدعو الى الابتسام ...من قريب او حتى من بعيد...

ولو كان...اذا فما هو الموضوع الذى يدعو الى البكاء؟؟؟؟؟

اقترح...انا العبد الفقير...فتح باب بالمنتدى تحت عنوان...

دعوة الى البكاء والعويل taz:: taz:: taz:: taz::

[Katamando]

أتفق مع الزميل sos في أن الموضوع لا يحتمل الابتسام وقد استغربت وجوده في هذه المنطقة وخصوصاً أن كاتبه أحد أعضاء فريق الاشراف (الاستاذ سي السيد) والذي يتمتع بقد كبير من الحرفية في تنظيم الموضوعات وتبويبها والتصحيح لنا جميعا

علها قد تكون زلة غير مقصودة

مش كده ولا ايه؟

[se_ Elsyed]

علها قد تكون زلة غير مقصودة

مش كده ولا ايه؟

لا أيه يا كاتماندو ...

أصل بيني وبينك هناك خلافات في وجهات النظر بيني وبين أستاذ محمد أبو زيد وكل ما كنت أكتب موضوع ساخر في باب السياسة الداخلية أو محاربة الفساد ألاقيه باصاه لباب الإبتسام ...

فقولت أخدها من قصيرها واوفر وقته وأكتب الموضوع هنا وأقف بالشومة على الباب وماخليش حد يقرب من بتوع النقل والتحويل..

وكمان برضوا أنا خايف يقولي مليشيا مسلحة أيه يا عم اللي بتتكلم عنها انت عايز تودينا في داهية ؟... فقولت أجيبها على سبيل الضحك الذي يشبه البكاء ... بحيث لما يتقبض عليه أقول قدام وكيل النيابة .. يا باشا انا كنت بأهزر .. هو الواحد مايعرفش يتفك في الكلام شوية في البلد دي ؟...

وكما قال الفيلسوف الأغريقي سين سينيدوس ( إن اعلى درجات الضحك هي التى تصل إلى حد العويل ) ...

وبعدين يا س أو إس إنت وكاتاماندو .. مش الحكومة طول عمرها بتضحك علينا ... يبقى فيها أيه لما نضحك إحنا كمان عليهم ولو مرة واحده ونبهدلهم في مواضيع في باب الإبتسام ونعيد أمجاد مجلة " البعكوكة " " والكشكول "

واخيراً أنا من أيدكوا دي لأيدكوا دي .. حكومتنا علمتنا نبقى مطيعين ومهاودين ونسمع الكلام فلو حد من المشرفين الزرق شابف إن مكان الموضوع يبقى أحسن في باب السياسة الداخلية أنا ماعنديش مانع ... ولو نقلوه باب الأسره والطفل ولطبيخ .. أنا تحت أمرك يا حكومة ... انا باكتب الموضوع وبأسيب الحبل على الغارب إنقلوه مطرح مانتوا عايزين - بس إبقوا سيبولي العلوان -

واللي مالوش اهل الحكومة اهله ...