نعم لتكميم الافواه

[om marawan]

انا بيجننى الصراحة المفرطة اللى احنا فيها دى وبقيت اسأل نفسى هو ده صح ولا غلط ؟ صح ان كل غسيلنا منشور ليل نهار على الفضائيات بالشكل المستفز ده

وزى مايكون مافيش بلد غير مصر فيها مشاكل ولا أزمة انابيب ولا اضراب موظفين شركة او عمال مصنع

نفسى اقول للاعلامينن يانااااااااس ارحمونا بأه وارحموا البلد ...

اتخنقنا من حجتكم الخايبة بالشفافية والصراحة وكلام من عينة اصل احنا بلد كبيرة وماعندناش حاجة نخبيها و ومعالجة المشاكل لازم تبدأ بفضح الفساد وعمالين نفضح ونفضح ولا فساد اتعالج ولا اتحاكم ولا حاجة

يعنى مع احترامى " للاخوة الاشقاء العرب " ولبلادهم هتلاقى كل بلد فيها وفيها

لكن اول ماحد يلمح من بعيد لحاجة فى البلد يطلع يقول ان بلدهم احسن بلد فى الدنيا وده طبيعى لانها بلده

مش فاهمة ليه احنا كل يوم بنتهاجم من اول النظام الحاكم لحد اهل البلد اللى بيقاتلوا على لقمة العيش وماحدش بيقول لحد عيب كده وكأن الكبير ده ملطشة وطبعا مجرد انك تصف نفسك بالكبير يبقا انت برضه مش كويس وعاوز تعمل نفسك كمصرى احسن واحد وانت مش متفوق علينا ولا حاجة

يعنى برنامج زى الحياة اليوم ده .. شىء مستفز الى ابعد حد وبييجوا فى ايام ماتلاقيش غير اخبار قتل ومشاكل وخناقات وفاكرين نفسهم جابوا التايهة

هو ايه خلاااااص ... البلد ماعادتش فيها حاجة كويسة تتحكى مابقاش فيه نماذج محترمة ومشرفة

مش كده يعنى ده احنا بلدنا عمرانة خير حتى بناسها اللى مابنتكملش عنهم غير لما نحكى عن المرتشين والفاسدين ونسينا خلاص اصحاب الضمير

نسينا مثلا مستشفى شهيرة فى العاشر كل مصروفاتها من زكاة مال احد رجال الاعمال المحترمين وفيها مركز لغسيل الكلى

نسينا الناس اللى بتتبرع كل يوم للخير وأخيرا لضحايا السيول

نسينا شباب فعلا زى الورد بيجتهدوا فى دروسهم وفى حياتهم وبيبروا اهلهم وبيفيدوا بلدهم وبيشتغلوا فى مشاريع خيرية لا حصر لها

يا اخوانا يابتوع الاعلام يا اساتذة يا كتاب ارحمونا شوية

يعنى واحد زى عمر طاهر مع احترامى لمعجبينه ايه اللى بيكتبه بالظبط ؟؟؟؟ يعنى تندرج تحت ايه ؟؟ دردشة ولا قعدة على القهوة ولا ادب ولا استغلال لاوضاع البلد فى السخرية والشهرة وخلاص

يعنى مرة سألت زمان مين عمر طاهر وماقصدتش هو مين تحديدا لكن قصدت اصنفه تبع ايه ؟؟؟ يمثل مين من الشباب سيادته

عموما ختاما عشان ماطولش انا شخصيا قررت احاول ابطل اهاجم سلبيات البلد وخلاص لانه اتضح بعد مسلسل الفضائح الجارى انه مالوش اى علاقة بالاصلاح

[msayed]

أنا رأيى إن إنتقاد السلبيات مطلوب ومهم وهى ميزة وليست عيب والعيب على الذى لا ينتقد سلبياته ويحاول أن ينكرها مع انها ظاهرة لكل الناس، لكن المشكلة تنشأ عندما يكون الإتجاه هو إنتقاد فقط وتغافل عن الإيجابيات.

وأظن أن أبرع من قام بذلك هو برنامج العاشرة مساءاً فكم إستضاف أشخاص مؤثرين وعلق على إيجابيات كثيرة فى المجتمع.

ولكن أيضاً هناك الكثير من برامج التوك شو تتهدف زيادة نسبة المشاهدة المشاهدة بالتركيز على المشاكل وطريقة عرضها.

وللإسف فقد أصبحت هذه البرامج فى ظل عدم الشفافية وكثرة المظالم أداة هامة يلجأ إليها قليلوا الحيلة بعد يأسهم من الحصول على حقهم بالطرق الطبيعية فأصبحوا بنشر قضيتهم وجعلها قضية رأى عام يضغطون على المسؤول للحصول على حقهم.

[om marawan]

الفاضل msayed

طبعا مهم جدا ننتقد السلبيات لما يكون انتقاد لكن احنا وصلنا للتشهير بالبلد وخلاص وبقينا مادة خصبة حتى لبعض النشرات الاخبارية العربية

الحقيقة انا باستغرب ليه بلدى وحتى حكومتى بتتهاجم بالشكل ده من كل من هب ودب

قلنا قبل كده ادعى على ابنى واكره اللى يقول اميين

لكن من كتر دعايا عليه ابنى بقا ملطشة

ياسيدى الفاضل انا لفت نظرى حتى فى المنتديات انك لو قلت ربع كلمة على اى نظام حاكم لاى بلد حتى ولو بدون قصد تلاقى هجوم ودفاع عن البلد ووحتى عن الحكومة مهما كان فيها من فساد

طبعا ماحدش قال ندافع عن الفساد ولا نحط دماغنا فى الرمل وننكر المشاكل لكن الموضوع بقا هجوم هجوم وخلاص وتعليق حتى على مواضيع شخصية واجتماعية بحتة

يعنى ايه علاقتى بواحد اتخانق مع مراته و ضربها ولا واحدة مجنونة سممت جارتها وليه لما بيكون فيه ازمة انابيب ولا حتى ازمة رز فى اى بلد عربى مابنسمعش عنها

محتاجين نرجع تانى نكون موضوعويين اكتر فى معالجة مشاكلنا والافصاح عنها

[أبو كريم النوبي]

نعم لتكميم الأفواه التى تقودنا الى الهاوية والهلاك

نعم لتكميم الافواه التى تقوم بفضح الشعب وهو يدعى الشفافية وكلام حق يراد به باطل

وياليتهم مثل برنامج العاشرة للاستاذة / منى الشاذلي ...... عندما استضافت العالم الكبير أحمد زويل - رجل يتحدث بصدق وبسلاسة شديدة وجلسين مشدودين لمدة ثلاث ساعات .... بالفعل لابد من عمل حوارات مع العلماء والدكاتره وماأكثرهم فى بلادنا

ولديك مثال بسيط جداً : ماحدث اثناء مباراة الجزائر وتبعاتها فى القاهرة وام درمان - اصبحت تشاهد البرامج الرياضية كأننا فى حارة بين اطفال والفاظ ومشاهد من المقدمين والمحاورين ......

للاسف لابد ان نكمم الأفواه ........ وندعو للعمل فقط

[om marawan]

الفاضل ابو كريم

أشكرك على مداخلتك القيمة

نعم لتكميم الافواه التى تقوم بفضح الشعب وهو يدعى الشفافية وكلام حق يراد به باطل

هذه الجملة عبرت ببلاغة عما أردت قوله يكفينا اثارة ونشر للفوضى والفساد بدعوى فضحه

قال رسول الله صلى الله عله وسلم "إذا قال الرجل هلك الناس فهو أهلكهم "

أذكر حديث للدكتور احمد عكاشة فى البيت بيتك وكان ضيف محمود سعد وحضر أحمد حلمى فى منتصف الحوار وتحدث عن نفس الموضوع

طبعا محمود سعد " كصحفى " رأيه نشر كل شىء ومصر كبيرة ومايهماش !!!!!" ولكنه فوجىء برأى مخالف من الدكتور عكاشة واشارته الى ان الحديث الايجابى و ذكر المواقف واستضافة النماذج السعيدة تشجع اكثر على النجاح والرغبة فى الحياة

وذكرا للنماذج الجيدة أيضا أشارك حضرتك والفاضل msayed الاشادة باسلوب العاشرة مساء فهو فى معظم الوقت يحاول تقديم العديد من الموضوعات الهادفة

[أبو محمد]

للإعلام عموما (صحافة ، تليفزيون ، كتب .... ) مدارس .. أبرزها مدرسة الإثارة .. وهى مدرسة عبر عنها مصطفى أمين لتلاميذه بقوله : "لما واحد فيكم يجيب لى خبر أو موضوع عن كلب عض بنى آدم ، يبقى صحفى عادى .. الخبر الحقيقى هو عن بنى آدم عض كلب"

يعنى لما الإعلام يتكلم دايما عن الرجل اللى بيصحى كل يوم يروح شغله يأديه كما يجب .. أو يتكلم عن تطوير منطقة وتعميرها .. أو يتكلم عنالمواطن اللى خلَّص معاملة مع جهة حكومية بدون مشاكل .. ييبقى كده - تبعا لهذه المدرسة - مفيش ولا صحفى أو إعلامى موهوب .. كلهم عاديين .. لذلك - مع هوجة إصدار الصحف ، والمحطات الفضائية - نجدهم يتنافسون فى إبراز كل ما هو مثير ، وغير عادى ..

نقرأ الصحف والمجلات ، ونتابع برامج الفضائيات - خصوصا برامج التوك شو - يتهيأ لنا إن كل شئ فى البلد فاسد .. كل الناس فاسدين

النتيجة .. الإصابة بالإحباط والاكتئاب .. والأخطر من ذلك هو التعود على الفساد ..

عندما يصبح الفساد هو الشئ العادى فى وسائل الإعلام ، والشرف والأمانة والعمل والاجتهاد هى الأشياء غير العادية .. يتحول المجتمع تدريجيا إلى مجتمع يتقبل هذا الفساد ...

أنظروا إلى "محاوراتنا" .. وحاولوا إحصاء الردود التى تدور حول معنى : "يعنى هى جت على دى ؟" .. .. هذا معناه أن أصحاب هذه الردود تقبلوا الفساد "الذى يرونه هينا" .. بمعنى أن هناك أنواع من الفساد أصبحت أمرا عاديا ولا يجب علينا انتقاده .. مع أن الفساد فساد ، كبيرا كان أو صغيرا ...

هل هى مؤامرة ؟

[أسد]

الصحفيين في مصر .. أصبحوا مثلهم مثل غيرهم من أصحاب المهن الأخرى ..

تجد منهم الكثيرون يبحثون عن دخل جيد .. ويهتمون بشكل كبير بتحسين دخلهم .. والصحافة مثلها مثل أي مهنة أخرى .. يمكن الإنحراف فيها ..

ومثل ما يحدث في كافة المهن الأخرى .. وتماشياً مع الإتجاه العام في مصر في السنوات الأخيرة .. من زيادة نسب الفساد في كل فئات المجتمع (للأسف الشديد)

فقد أصاب هذا الشأن الصحفيين أيضاً .. والصحف التي تتصارع على القارئ .. وتتصارع فيما بينها على بيع أكبر عدد من النسخالمطبوعة .. فتجدهم يهتمون بالإثارة .. والأخبار المثيرة باعتبارها وسيلة لجذب القراء لشراء الجريدة ..

فتجد في كثير من الأحيان من الصحف ما تنشر خبراً مثيراً حتى دون التأكد من صحته .. على اعتبار أنهم إذا إكتشفوا أن الخبر غير صحيح .. فسوف ينشرون تكذيباً في عدد تالي وانتهى الأمر ..

ولضعف دور نقابة الصحفيين .. دور كبير في تجاوز الكثيرون دون الخوف من أن هناك رادع لتجاوزاتهم ..

ضعف الدولة ... ووضعها السئ في قلب وعقل المواطن .. يعزز تلك الأخبار المثيرة .. ويعزز الحديث عن السلبيات الموجودة .. ولا يجعل للحديث عن أي إيجابية طعم أو مذاق

فالناس في عموم الحال أحوالها سيئة وتدعوا للرثاء .. وبالتالي فتلك هي الطريقة الأسهل للمس مشاعرهم ..

غياب مشروع قومي موحد .. غياب الرؤية العامة .. غياب الزعيم .. هذه هي أهم الأسباب لغياب التحدث عن أي أمر مضئ ..

هذه كلها ليست مبرر ..

وكما قال استاذنا أبو محمد .. أن كثرة الحديث عن الفساد والسلبيات وإضهارها بهذا الشكل .. وتركيز الضوء عليها بتلك الدرجة .. يجعل الناس بالفعل تستمرئ الفساد .. وتعتبره أمر عادي ..

إظهار الأمور الجيدة وكأنها الإستثناء .. أمر غير طبيعي بالمرة ..

مناقشة القضايا على شاشات التليفزيون في نفس وقت نظرها في المحاكم أو أثناء تحقيقات لانيابة .. ومزج هذا الأمر مع بطأ إجراءات التقاضي . والتشكيك في أحكام القضاء باستمرار .. كل تلك الأمور تسلب الثقة من الناس في العدل .. والذي هو الأساس الذي يحمينا جميعاً ..

الدولة .. للأسف الشديد .. لا تجد من يتعاطف معها من الناس ..

لذلك .. فمن يفكر أن ينتج أي برنامج ليتحدث فيه عن أي إيجابيات .. فكانه يغرد خارج السرب ..

ولن يكون له جمهور ..

هذه هي حقيقة ..

المشكلة التي لا أجد لها إجابة ..

لماذا تلك القنوات .. فضائية ..؟؟

ولماذا لا تسمح الدولة لتلك القنوات بالبث الأرضي ..

لماذا نشر كل هذا الكم من الأمور المخزية على العالم كله ؟؟؟

ما هو الهدف من برنامج يستضيف زوج وزوجته .. بينهما مشكلات عديدة .. ويأتون على الشاشلة ليتبادلا السباب أمام العالم كله في قناة فضائية ..

ما هو الهدف من عمل حلقة عن أطفال تلعب في الشارع في حي عشوائي .. وطفل منهم أمسك بحجر وفدغ رأس الطفل الآخر .. في وسط إهمال الأهالي بشكل منقطع النظير..

وعشوائية مميتة وقاتلة

والعالم كله بيتفرج عليهم ..

لماذا لا تنقل تلك البرامج .. عروض الصوت والضوء التي تجري يومياً على سفح الأهرامات .

لماذا لا تنقل صور السائححين يستمتعون في الأقصر وأسوان وشرم الشيخ والغردقة ... الخ

لماذا الإهتمام والتركيز على نقل الصور السلبية فقط .. وكأننا نعيش في جهنم ..

مش قادر أفهم ..

[الغريب]

موضوع رائع يأم مروان

فعلا مش الحل في فضح المشكلات الذي نراه على الفضائيات، ليا صديق يمني كنت ساكن معاه وكان متعود كل يوم بالليل يتجول على الفضائيات المصرية ويناديني ويقولي تعالى شووف البلااوي اللي في مصر بالرغم من أن عندهم مشاكل مع الحوثين في صعدة ولكن تلاقيه يسيب كل حاجة ويحب يتفرج على غسيل المصريين المنشوور :)

أنا مش ضد إظهار الفساد والمشاكل لأ بس أن نفسي نستفيد من الآلة الاعلامية بشكل أفضل لأننا عندنا إعلام كبيير جدا وهو واجهتنا أمام الدول ومن خلاله يتم تقييم الآداء المصري فممكن الإعلام ده يكون أداة جيدة جدا لإصلاح المجتمع المصري وتحسين الصورة وده بالتخطيط الجيد، وممكن يكون العكس وده اللي قالتو الأخت doha أنك "لو معندكش خطة فأكيد هتكون جزء من خطة أخرين"، وده اللي ظاهر دلوقتي تخطيط البرامج حاجة آخر سوء النهاردة بنلاقي عصبة كرة القدم الهايفين والذين لا يعلموا الألف من كوز الدرة يتكلمون عن القضايا المصيرية للدولة مثل القومية وما إلى ذلك فبأي حق يتكلمو فيما لا يحسنو... وهلم جرة.. لنا عودة wst::

[عنبو]

هو انتوا مستنين ايه من اعلام الجهله والمرتزقه

مع وجود حكومه لا تهتم الا بأمن المسؤلين فقط والباقى يارب تولع

وجود ناس باعوا نفسهم للقنوات الفضائيه ومستعدين يعملوا اى حاجه علشان يبقوا نجوم

قلة الثقافه وانتشار الفهلوه

وعلشان كده انا مقاطع القنوات الاخباريه تماماً

[jasmin hamed]

السلام عليكم جميعا

هيه فعلا حاجه تحزن و تجيب احباط بس انا مش مع موضوع تكميم الافواه ده .........

حرية الاعلام ذيها ذى كل حريه فى ناس بتستعملها للصالح و ناس بتئذى بيها نفسها و الى حواليها ............ بس انا بشوف ان الهوجه الى حصله ديه نتيجة فطره طويلة من الكبت يعنى هوجه هتاخد وقتها و البرامج الكويسه بس الى هتستمر . اما بقى لو كممنا افواه الناس فده كمان هيكون تقيد لحريات الناس الى بتستخدمها صح

هو المطلوب من الناس الاعلامين الشرفاء عمل موازنه يعنى يكون فى برامج عن حاجات كويسه و تعريف بمشريع ناجحه و انجازات و سير ذاتيه لناس مجتهده و هكذا

اما بالنسبه للى الناس الشمتانه فدول لو ما شافوش البرامج ديه هيضوروا على النت او على اليو تيوب على اى حاجه تسئ لمصر دول ناس سواد من جوه سواء شافوا البرامج ديه ولا ما شافوهاش و انا فى راى اننا متقدمين عنهم باكتر من خمسين سنه فى مجال الحريات على الاقل الاعلاميه معلش هو فيه حد فى سوريا ولا اليمن ولادول الخليج كلها يقدر يطلع ينتقد الحكومه ولا الرئيس و لا الملك .

انا معاكى ان فى ناس مذودنها حبتين بس لو حضرتك شوفتى الجرايد الامركيه ولا البريطانيه هتلقيهم بردو بيينتقدوا بلدهم بعنف شديد بس المتلقى هو الى بيفرق لو مثلا المتلقى كان فرنسى بقرا موضوع عن فشل فى الحكومه الانجليزيه بتشوفى نبرة شماته و تعالى عشان فيه عداوه قديمه و العكس صحيح لو المتلقى عربى فى اغلب الاحيان بيكون منبهر بحرية الاعلام و لو من نفس البلد بتلاقى مظهرات احتجاج و شكاوى و محاولات تغير و هكذا ......... اول طرق الاصلاح هيه الاعتراف بالغلط

اللىبيحصل ده خطوه لقدام مش للوراء ده التطور الطبيعى للامور مع التغير دائما فى شوية هرجله و فوضى و بعدين الامور هترجع لوضعها الطبيعى . يعنى بعد شويه هتلاقى الجمهور هيبطل يتفرج على البرامج الى همها الفرقعه و هيتفرجوا على البرامج المحترمه المفيده و بكده نسبة مشاهدة البرامج السيئه هتقل و تقل لغاية ما تختفى ...... انا شايفه المستقبل ماشى فى الاتجاه ده و الله اعلم

[الباشمهندس ياسر]

وعلشان كده انا مقاطع القنوات الاخباريه تماماً

يا سيدي ع الروقان

اهو ده الكلام يا عنبو

هي ناقصة ضغط و سكر .. كفاية اللي بنعانيه ع الطرق ف القاهرة

مية مية نجوم اف ام و الفلاشه و ام كلثوم بالليل

بلا اخبار بلا وجع قلب

احساس رائع و انت ماشي معندكش اي خبر عن اي حوارات

[MZohairy]

ده شارع اسمه هاستينج في فانكوفر

و هو اردأ شارع هناك حيث يكثر المدمنين و العاهرات

و مع ذلك يتكلم عنه الاعلام الكندي بكل صراحه و وضوح لنشله من حالته الحاليه و تحويله الى شارع محترم

[حسام يوسف]

ده شارع اسمه هاستينج في فانكوفر

و هو اردأ شارع هناك حيث يكثر المدمنين و العاهرات

و مع ذلك يتكلم عنه الاعلام الكندي بكل صراحه و وضوح لنشله من حالته الحاليه و تحويله الى شارع محترم

ده الفرق بين الشرق والغرب يا مايسترو

دعوة لتكميم الأفواه فى 2010

وشفافية وصراحة للوصول للعلاج والاصلاح

[الترجمـان]

:

اللي ببحصل ده خطوه لقدام مش للوراء ده التطور الطبيعى للامور مع التغير دائما فى شوية هرجله و فوضى و بعدين الامور هترجع لوضعها الطبيعى . يعنى بعد شويه هتلاقى الجمهور هيبطل يتفرج على البرامج الى همها الفرقعه و هيتفرجوا على البرامج المحترمه المفيده و بكده نسبة مشاهدة البرامج السيئه هتقل و تقل لغاية ما تختفى ...... انا شايفه المستقبل ماشى فى الاتجاه ده و الله اعلم

اتفق مع رأيك بالكامل وإن اختصرته في تلخيصك النهائي ..

واعتقد انه لمن الخطأ ان يتحمل الجميع خطأ بعض الإتجاهات الفكرية في تناول مشاكلنا سواء إجتماعية او ثقافية او سياسية .

ويجب ان ينال كل فرد في هذا الوطن الحرية المطلقة في التعبير عن رأيه طالما انتهج طريق الفكر والإقناع..

كما يتحتم على كل فرد ان يلتحم ويشارك في إبداء رأيه وانتخاب من يمثل توجهاته وقناعاته..

فنحن نمر الآن بمرحلة المخاض الديموقراطي كما يقولون على جميع المستويات ...

وإن كنت أشك أن تستمر كما هي الآن في المرحلة المقبله وانه سيحدث تغيّر آخر سواء بالزيادة او النقصان ..

وربنا يستر مايكونش بالنيجاتيف ..

[om marawan]

للإعلام عموما (صحافة ، تليفزيون ، كتب .... ) مدارس .. أبرزها مدرسة الإثارة .. وهى مدرسة عبر عنها مصطفى أمين لتلاميذه بقوله : "لما واحد فيكم يجيب لى خبر أو موضوع عن كلب عض بنى آدم ، يبقى صحفى عادى .. الخبر الحقيقى هو عن بنى آدم عض كلب"

يعنى لما الإعلام يتكلم دايما عن الرجل اللى بيصحى كل يوم يروح شغله يأديه كما يجب .. أو يتكلم عن تطوير منطقة وتعميرها .. أو يتكلم عنالمواطن اللى خلَّص معاملة مع جهة حكومية بدون مشاكل .. ييبقى كده - تبعا لهذه المدرسة - مفيش ولا صحفى أو إعلامى موهوب .. كلهم عاديين .. لذلك - مع هوجة إصدار الصحف ، والمحطات الفضائية - نجدهم يتنافسون فى إبراز كل ما هو مثير ، وغير عادى ..

نقرأ الصحف والمجلات ، ونتابع برامج الفضائيات - خصوصا برامج التوك شو - يتهيأ لنا إن كل شئ فى البلد فاسد .. كل الناس فاسدين

النتيجة .. الإصابة بالإحباط والاكتئاب .. والأخطر من ذلك هو التعود على الفساد ..

عندما يصبح الفساد هو الشئ العادى فى وسائل الإعلام ، والشرف والأمانة والعمل والاجتهاد هى الأشياء غير العادية .. يتحول المجتمع تدريجيا إلى مجتمع يتقبل هذا الفساد ...

أنظروا إلى "محاوراتنا" .. وحاولوا إحصاء الردود التى تدور حول معنى : "يعنى هى جت على دى ؟" .. .. هذا معناه أن أصحاب هذه الردود تقبلوا الفساد "الذى يرونه هينا" .. بمعنى أن هناك أنواع من الفساد أصبحت أمرا عاديا ولا يجب علينا انتقاده .. مع أن الفساد فساد ، كبيرا كان أو صغيرا ...

هل هى مؤامرة ؟

سيدى الفاضل

فعلا تشعر انها جزء من المؤامرة تدرجت من نوع من الجذب والاثارة الى تعود على الفساد وتقبل للانحرافات

مايحزننى انى ارى ان بلدى أفضل من ذلك

أرى فيها كثير من الخير ومن الأشخاص الطيبين والعلماء والمثقفين والمحترمين وأصحاب الذمم والضمائر

أرى فيها من هم مثلك يشعروننى ان بلدى مازالت بخير

وليس هذا نوع من الانكار لما يحدث من فساد

ولكنها كلمة حق فى اهل هذا البلد الطيب

ف احد حلقات البيت بيتك طلب محمود سعد تبرع لحالة فتاة بمبلغ 20 الف دولار وقال

" نحاول نجمعهم باذن الله يعنى الف فى 500 كده "

تخيل سيادتك انه لم يكمل دقيقتين ووجد متبرع بالمبلغ كامل !!!!!!!!!!!!

هل يستحق اهل بلدى بعد هذا ومنهم مثل هذا المتبرع الكثيرين ان ينعتوا وسط الشعوب ب " بتوع المحسوبية والرشاوى "

تم تعديل 16 فبراير 2010 بواسطة om marawan

[om marawan]

فتجد في كثير من الأحيان من الصحف ما تنشر خبراً مثيراً حتى دون التأكد من صحته .. على اعتبار أنهم إذا إكتشفوا أن الخبر غير صحيح .. فسوف ينشرون تكذيباً في عدد تالي وانتهى الأمر ..

ضعف الدولة ... ووضعها السئ في قلب وعقل المواطن .. يعزز تلك الأخبار المثيرة .. ويعزز الحديث عن السلبيات الموجودة .. ولا يجعل للحديث عن أي إيجابية طعم أو مذاق

فالناس في عموم الحال أحوالها سيئة وتدعوا للرثاء .. وبالتالي فتلك هي الطريقة الأسهل للمس مشاعرهم ..

غياب مشروع قومي موحد .. غياب الرؤية العامة .. غياب الزعيم .. هذه هي أهم الأسباب لغياب التحدث عن أي أمر مضئ ..

هذه كلها ليست مبرر ..

كعادتك يا استاذى الفاضل أسد مداخلاتك تضيف قيمة هامة لاى موضوع

فقد لخصت عدد كبير من الاسباب التى اوجدث تربة خصبة لهذا النوع من النشر الاعلامى المستفز وان كانت كما تفضلت ليست مبرر لما يحدث

أنا مش ضد إظهار الفساد والمشاكل لأ بس أن نفسي نستفيد من الآلة الاعلامية بشكل أفضل لأننا عندنا إعلام كبيير جدا وهو واجهتنا أمام الدول ومن خلاله يتم تقييم الآداء المصري فممكن الإعلام ده يكون أداة جيدة جدا لإصلاح المجتمع المصري وتحسين الصورة وده بالتخطيط الجيد،

زميل محاورات الكويت الفاضل مستر عمر

ايواااااا بالظبط كده عاوزين نستخدم الاعلام للاصلاح الحقيقى مش بس تحسين صورتنا لاء احنا نقدر فعلا نحسن من انفسنا عن طريق الاعلام

مش باننا نقول ان كل شىء تمام و ليس فى الامكان أبدع مما كان بل باننا نكون اصحاب انشطة حقيقية ونشر وعى وتثقيف

احنا نستطيع ان نوصل فى دقيقة اعلانية مثلا مايمكن ان يستغرقه مدرس فى ساعة من الشرح النظرى

كنت فى موضوع سابق عن مطرب مصرى امريكى اسمه كريم سلامة اضفت اغنية عجبتنى جدا وعلقت عليها لماضة مصرية الرائعة دائما

بانها بتوصل رسالة قيمة جدا فى دقيقتين

الفاضل زهيرى و الفاضل دكتور حسام زميل المهنة

يافندم هى مش دعوة للتكميم يعنى التعتيم الاعلامى واللى بيحصل بمزاجهم برضه فى موضوعات تانية

ولا انكر ان فيه موضوعات نتيجة فضحها تم التعامل معاها ولو بشكل " سد خانات "

لكن الخطر الأكبر هو ماذكر واصبح بالفعل واضح فى مجتمعنا وهو " التعود على رؤية الفساد " وانتشرت مقولة واشمعنا انا ماكلهم بيسرقوا !!!!!!!

لو احنا كحكومة وكشعب بنتعامل مع الامور زى كندا ومابنسكتش عليها لحد ما تتصلح

كنا قلنا اهلا بالفضايح

لكن فعلا النوايا هنا مختلفة تماماااااااا ولهذا النتيجة ايضا اصبحت مختلفة

والموضوع تحول زى ماقال الفاضل أسد لنشر مشاكل اجتماعية لااااااحصر لها والتركيز عليها

ياسيدى الفاضل ده انا فى مرة شفت فى برنامج 4 حوادث قتل فى يوم واحد بالله عليك اودى وشى من جيرانى فين

وقبل ماجى الكويت كنت كل يوم فى الاخبار فيه خبر عن حادثة قتل او محاكمة قديمة لقتل برضه يومياااااا فى جريدة الاخبار

ماهو مش معقول مصر كلها قتالين قتلة ومش معقول دى حاجة مش " متعمدة " من صحافة الجريدة المحترمة

عزيزتى جاسمين..... الفاضل الترجمان

اتمنى معكم وا اتفق فى انه لابد ان يحدث نوع من الفرز ضد البرامج السطحية كما حدث ضد الاغانى التافهة وبالطبع باذن الله البقاء للاصلح والاجدر والاكثر رغبة فى الاصلاح انا ايضا لست مع تكميم جميع الافواه ولكن كما ذكر الفاضل النوبى الكريم هو تكميم للافواه التى تريد فضح الشعب فقط لتقوده للهلاك وليس للتغيير للافضل

[أحمد سيف]

طيب ولنفترض أن هناك بعض الأفواه التي ينبغي تكميمها ... من الذي من حقه أن يحدد أي الأفواه يكمم وأيها لا؟

مجرّد سؤال؟

[om marawan]

الفاضل عنبو باشا الشرقاوى وبلدياتى والباشمهندس ياسر

يعنى تمشوا كده من غير ماتيجوا تشربوا حاجة

والله فعلا باحاول اسمع زيكم حاجات غير البرامج دى مع انى باقابل ناس مش مصريين عارفين اخبار ماعرفهاش عن بلدى

حاجة تحرق الدم

[عنبو]

الفاضل عنبو باشا الشرقاوى وبلدياتى والباشمهندس ياسر

يعنى تمشوا كده من غير ماتيجوا تشربوا حاجة

والله فعلا باحاول اسمع زيكم حاجات غير البرامج دى مع انى باقابل ناس مش مصريين عارفين اخبار ماعرفهاش عن بلدى

حاجة تحرق الدم

وليه تحرقى دمك احسن حاجه فى المواقف اللى زى دى انك مترميش ودنك للى بيكلمك لانه مش فاهم حاجه فسيبه يتكلم ولا تعلقى على كلامه كده دمه هيتحرق وهيبطل كلام

وصدقنى من قواعد السعاده لا تناقشى من هو اقل منك ثقافةً لانه لن يعى ما تقوليه

[om marawan]

الفاضل عنبو باشا الشرقاوى وبلدياتى والباشمهندس ياسر

يعنى تمشوا كده من غير ماتيجوا تشربوا حاجة :closedeyes:

والله فعلا باحاول اسمع زيكم حاجات غير البرامج دى مع انى باقابل ناس مش مصريين عارفين اخبار ماعرفهاش عن بلدى

حاجة تحرق الدم

وليه تحرقى دمك احسن حاجه فى المواقف اللى زى دى انك مترميش ودنك للى بيكلمك لانه مش فاهم حاجه فسيبه يتكلم ولا تعلقى على كلامه كده دمه هيتحرق وهيبطل كلام

وصدقنى من قواعد السعاده لا تناقشى من هو اقل منك ثقافةً لانه لن يعى ما تقوليه

حاضر يافندم علم وينفذ

بس ماتقلقش على بلدياتك ماحدش أصلا يجرؤ انه يقول كلمة على بلدى ماتعجبنيش انا ليا وش تانى ربنا مايوريك smk:

لكن انا بتكلم من واقع انى باشوف الناس بتتابع فضائياتنا الرشيدة بكثافة وحتى رأى بعضهم ان القنوات دى مزوداها شوية