البطالة بين الرجال و تحرير المرأة

[إثار]

بسم الله الرحمن الرحيم

السلام عليكم ورحمة الله وبركاته

قاسم امين حرر المراه وكان سبب قعاد الرجل في البيت

يعني لو كانت المراه لها حريه التعليم حتى ماهي تكتفي منه ولكن بشرط انها

ما تشتغلش مش كان احسن ؟

يعني هي بتتعلم عشان تكون سيده قادره على ان تربي جيل واعي

يعني تكون قادره انها تعلم اطفالها وتساعدهم

والمفروض ان الرجل هو الذي يسعى من اجل ان يوفر الحياه الكريمه له ولاهل بيته

يعني دلوقتي البنات اكتر من الشباب

والشباب يعاني من مشكلة البطاله والحل انه من الاول ما كنش المفروض ان

البنت تاخد وظيفه كان اولى بيها شاب عايز يبني مستقبله !صح

وكانت مشكلة البطاله اتحلت وكمان معاها مشكلة العنوسه!

يعني كان الشباب كل واحد فيهم ليه وظيفه وبيكسب وقادر على انه يتجوز ويفتح بيت بس هنقول ايه اللي حصل حصل لا يمكن تعديله

والبنت المفروض ان احسن مكان ليها هو البيت وده طبعا بعد تعليمها وده احسن مكان ليها بدل ماتكون طول اليوم في الشغل ولا بتقدر انها تراعي نفسها او جوزها او اطفالها

والمفروض ان الرجل هو الاقدر على تحمل المهام الصعبه

ايه رايكم ؟؟؟؟؟؟؟؟؟!

[se_ Elsyed]

الأخت أثار ... مرحباً بكي زميلة جديدة بالصالون ..

شوفي يا أثار ... حق التعليم والعمل مكفول لأي مواطن بدون تفرقة سواء رجل أو إمرأة ... والأجدر هو الذي يستحق ان يعمل بدون تمييز ... ولا أعتقد إننا نستطيع أن نقول إن المرأة أستطاعت أن تستولي أو تزاحم الرجال في مناصب أو وظائف كان أحق أن يعملوا بها ... هذه نقطة ..

النقطة الثانية .. لا نستطيع بأي حال من الأحوال بإن نلزم المرأة بالجلوس في البيت بعد ان تتعلم ... بحجة إن دورها في المجتمع هو ان تربي الأطفال وترعى زوجها فقط ... لأن ببساطه هناك حالات كثيرة جداً جداً تحتاج فيها المرأة إلى العمل ...

كأن تكون فتاة مقبلة على الزواج وتساعد نفسها أو أهلها أو إمرأة متزوجة وتشارك زوجها في تحمل أعباء الحياة او أرملة أو مطلقة وتعمل للإنفاق على أطفالها .... إلخ .

فبالتالي سوق العمل وظروف كل إمرأة هما اللذان يحكما إن كانت تعمل أو لا تعمل ...

ونعرف سيدات وفتيات كثيرين جداً فضلن الجلوس في البيت والابتعاد عن مشقة العمل بمحض إختيارهم بالرغم من تعليمهم العالي وبالرغم من وجودهم في مناصف عالية جداً إلا أن لكك شخص حساباته وطريقة تفكيره فإذا كان العمل سيأتي على حساب بيتها وأولادها فهي تفضل البيت .. وإذا كان عملها لن يؤثر على ذلك فلها حرية الإختيار وأن تعمل بدون مشاكل....

وصدقيني إن جزء كبير من مشكلة البطالة بيكون سببه الشاب العاطل نفسه ... ويقف وراء ذلك تفكيره المحدود وعدم قدرته على تطوير نفسه ومواكبة روح العصر الذي نوجد فيه أو عدم قبوله لأعمال قد يعتبرها انها لا تناسبة إجتماعياً ومازال لدى الكثيرين التفكير الضيق الذي يجعله لا يريد أن يعمل إلا في نفس مجال تعليمه ... في حين أن العالم كله يعتبر التعليم هو مرحلة تمهيد للدخول في معترك الحياة العملية وليس شرطاً ان يعمل كل واحد فينا في مجال دراسته ... ولكن العبرة في أن يكون الشخص منتج ويساهم بعمله الشريف في إعالة نفسة وفي تقدم المجتمع..

إذاً فليس لعمل المرأة دخل في ذلك .....

أيه يا واد يا س س الكلام اللي زي العسل اللي أنت بترصه ده ؟!!!!

وكما قال الشاعر الكبير نيرون قبل ما يولع في روما وبعدين يدلق الجاز على نفسه وفي اللحظة التى سبقت رميه لعود الكبير ...

آآآآآآآآآف مليتوا البلد ...

[فــيــروز]

أيه يا واد يا س س الكلام اللي زي العسل اللي أنت بترصه ده ؟!!!!

..

stnd:: non:: non::

تم تعديل 23 فبراير 2004 بواسطة فــيــروز

[se_ Elsyed]

س.س. عيان يا جماعه

واضح ان الحادثه اثرت على نفوخه  stnd::  non::  non::

طب ليه كده يا فيروز ، بقى انا قولت البونيه لسه جديدة وخلينا نعمل شو قدامها وأبين إني مثقف ثقافة تكعيبية وبأعرف أقول كلام كبير تقومي إنت تيجي تضربي كرسي في الكلوب ..

على العموم ماما قالت لي يا س س خليك إنت الكبير حتى لو الأكبر منك غلط فيك smk:

[فــيــروز]

على العموم ماما قالت لي يا س س خليك إنت الكبير حتى لو الأكبر منك غلط فيك non::

كلام سليم كلام معقول ماقدرش اقول حاجه عنه stnd::

تم تعديل 23 فبراير 2004 بواسطة فــيــروز

[goold]

س.س. عيان يا جماعه

واضح ان الحادثه اثرت على نفوخه  mfb:  :)  :)

طب ليه كده يا فيروز ، بقى انا قولت البونيه لسه جديدة وخلينا نعمل شو قدامها وأبين إني مثقف ثقافة تكعيبية وبأعرف أقول كلام كبير تقومي إنت تيجي تضربي كرسي في الكلوب ..

على العموم ماما قالت لي يا س س خليك إنت الكبير حتى لو الأكبر منك غلط فيك :P

سى السيد ليه كدة ده انت الثقافه بعينها..

انت مش عارف قدرك ؟؟؟

ده انت قدرك مليان من كلو wlch::

اهلا بك إثار

اهلا بك يا إثار

هو فعلا لو تبقي البنت بالبيت هتيح الفرصه للولد للعمل ..

ولكن كما قال الريس سى السيد ظروف الحياة تغلب على البعض بالعمل للحاجة ..

ولكننا نرى الجميع يرغب بالعمل لكثير من الاسباب .. اما اذا كان العمل للحاجة فقط كان هيكون فى مجال للأولاد افضل للعمل والكسب .

تم تعديل 24 فبراير 2004 بواسطة goold

[se_ Elsyed]

[سى السيد ليه كدة ده انت الثقافه بعينها..

الله يكرمك يا جولد .. كلك ذوق

شايفه يا فيروز الناس اللي كلامها بينقط عسل ..

إلا أثار رمت الموضوع وجريت ؟!!... مش تيجي تشوف الناس اللي ماسكه في شعر بعض على هامش الموضوع .

[DARWEEN]

أولا أهلا بك يا آثار .... نورتي المنتدى

ثانيا .. أنا أويد عمل المرأه في الأعمال التي يستحسن أن تعمل بها المرأة يعني الطب والتمريض والتدريس ... أو عند الحاجه ولضرورات الحياه .. يعني تصدقوا بالله أنا كان معايا أيام الجيش 3 صولات حريم في السكرتاريه بتاعة سيادة اللواء ... يعني طبعا كان مثار تهريج من خلق الله جميعا في القياده ... طبع عمل مثل هذا لايستحب تواجد المرأه فيه خصوصا أن كللللللل الناس في الشغل كانوا رجاله بالأضافه لأنهن كانوا ملتزمات بلبس عسكري كان شكله يفطس من الضحك عليهم

ثالثا ... مالك ومال ابو السيد يافيروز !!!!! ماهو الراجل بيقول كلام يتاقل بالألماس أهو ...

وبعدين خلي بالك دا مشاءالله بقى مشرف 3 أبواب ... وخدالي بالك wlch:: mfb: :) لمي التعابين وأستسمحي الباشا :) :P :D ... معلش يابوالسيد عندي أنا الدور ده :D B) B)

[فــيــروز]

الله :)

مانا لميت التعابين من امبارح يا جدعان B)

وبعدين يعنى ما هو ده ماكانش رايه من كام اسبوع فى موضوع مماثل ;) من حقى استغرب mfb:

وكمان فى موضوع العنف و العنف المضاد الناس بردو لفتوا نظره الى انه خلط بين افيونه و نيرون بسبب آثار الحادثه و محدش قال حاجه wlch::

مش فاهمه كلمتى مختلفه ليه B) ورغم كده بردو سحبتها :)

على العموم شوية جدا بقى :D

س.س. كلامه درر طبعا .. سواء فى الموضوع ده او غيره من الموضوعات :P والحقيقه انا فرحت جدا برايه فى الموضوع لانه ياتى من رجل .. طبيعى فى مثل هذه الموضوعات ان البنات او السيدات هما اللى يدافعوا عن عمل المراه لكن اما ياتى مثل هذا الراى من رجل يبقى شئ يدعو للتفاؤل و السعاده :D

تم تعديل 24 فبراير 2004 بواسطة فــيــروز

[Salwa]

اولا مرحبا بك يا اثار ...

انتى اسمك اثار ؟؟...بمعنى ..ايثار ؟...والا آثار ...بمعنى الآثار ؟؟؟

اعتقد ان اسمك ايثار ....بمعنى تفضيل الغير على النفس ...// اصلى بحب اعرف اسم اللى حاتكلم معاه ..اقصد معناه ..وشكرا لك مقدما //..

من ناحية عمل المرأة ...وسبق لنا اتكلمنا فيه كتير برضه ...

كل واحدة ولها ظروفها ...ده اولا ..

ثانيا ...فيه تخصصات للمرأة ....حرام مثلا بعد كل مراحل الدراسة دى ...تقعد فى البيت ؟؟؟ طيب على الأقل المجتمع يستفيد بخبرتها فى مجال معين ..مش اى حد ممكن يتفوق فيه ..

يعنى انا اعرف واحدة ...مهندسة كيميائية ......متفوقة جدا ...وعندها ثلاثة اولاد ..

مش ممكن دى مثلا تقعد فى البيت .......صح ؟؟

ولاحظى حاجة .....طول مانتى بتشتغلى ..// جد..جدا // مش شغل تريكو ..

كل يوم حاتستفيدى وتفيدى الغير .......

وتبقى من ناحية تانية بتجددى نفسك ......زى ما تقومى كل يوم تفتحى الشباك حتى لو درجة الحرارة 10 تحت الصفر .........واخدة بالك ؟؟...عملية تجديد للهواء ...عملية احلال اكسجين محل ثانى اكسيد كربون ..مثلا.....تانى ..واخدة بالك ؟؟

فيه وقت لكل شئ ....للبيت والشغل والولاد ....وقبلهم الزوج ..

ومفيش حد بياخد مكان حد ...............بالعكس ..فيه اشغال كتير ..تنتج المرأة اكثر من الرجل ...والعكس صحيح ...// مفيش حد بيحل محل حد تانى //..

وتعالى هنا قولى لى .......ايه الكسل ده ؟؟....هو كسل ..والا ترفيه ؟؟؟

هنا ...المرأة تشتغل فى الجزارة والسباكة وكل شئ ..طبيبة ومحامية ومهندسة وقاضية وعاملة نظافة ..وسائقة اتوبيس وكامبيون وتاكسى وقطار ....وطائرات ..فى اكثر الرحلات الداخلية ..

تقود الطائرة امرأة .....افضل برامج الكمبيوتر ....عملتها امرأة ...

ليه مفهوم ان المرأة ..تصلح فقط للطبيخ والغسيل ومراعاة الاطفال ...فقط ؟؟؟

قليل من الموضوعية مطلوب ..............

خلاص.........حتى الوسائد القطيفة ....اتلغى تصنيعها ...الا قليل ..

ماشى يا اثار .............؟؟؟؟؟؟؟؟؟؟؟؟؟

ماما سلوى ...

سيدة اعمال وربة بيت شاطرة ..

[DARWEEN]

مانا لميت التعابين من امبارح يا جدعان

يعني يافيروز هو أنا ما اعرفش أولع حريقه مره من نفسي .. ياستي أن مش عاوزك تلميها أنا عوزك تفريدها كده وتولع mfb: :) :)

هنا ...المرأة تشتغل فى الجزارة والسباكة وكل شئ ..طبيبة ومحامية ومهندسة وقاضية وعاملة نظافة ..وسائقة اتوبيس وكامبيون وتاكسى وقطار ....وطائرات ..فى اكثر الرحلات الداخلية ..

تقود الطائرة امرأة .....افضل برامج الكمبيوتر ....عملتها امرأة ...

كده برضه يامدام سلوى أثار حتوقعنا في بعض wlch:: :P

طبعا حضرتك ست العارفين أن عمل المرأة في أوربا في مثل هذه الأعمال هو أحد النتائج العديده للحرب العالمية الثانية والتي كانت من نتائجها خروج النساء للعمل في كافة القطاعات لوجود الرجال على جبهات القتال ولمدد طويلة حتى أنهم أستعانوا بالنساء في مصانع الأسلحه كما أنه أيضا ليس خافيا على حضرتك ما أستتبع ذلك من انحلال أخلاقي في المجتمعات الأوربيه والغربيه بشكل عام

طبعا ليس من المثار أن تتفرغ المرأة للبيت والأطفال ( وإن كان هو الأساس والأكثر إستحبابا لطبيعة المرأة ) لكن المثار هو مجال عملها في حد ذاته من منطلق الحفاظ عليها وعلى طبيعتها الأنثويه التي فطرها الله عليها لذلك فمن الأنسب للمرأه من وجهة نظري أن تعمل ولكن في الأعمال التي تناسب طبيعة النساء من حياء وما لايتعارض مع أنوثتها

مع تحياتي وأحترامي لحضرتك ولكل نساء العالم

[Salwa]

اخى المحترم داروين ..

طبعا مفهوم ان طبيعة المرأة تؤهلها لبعض الاعمال وليس كل الاعمال ...وبالذات فى مصر ..

يعنى فى مصر لاتعمل المرأة فى السباكة .......رغم ان عندنا فى الاسكندرية ..وفى زيارة لاحد المصانع ..كانت المهندسة ابنة صاحب المصنع هى التى تعلم العمال كيفية استخدام المكبس و....وهو يقول ان //ايديها تتلف فى حرير //...ويفخر بذلك ...

وكما قلت كل واحدة لها ظروفها .....

وحسب طبيعة كل امرأة على حدة ...

والله لو الزوج قادر ماديا .............وزوجته تحبذ..البقاء فى البيت كربة بيت فقط ..// خير وبركة //......لكن لو هى تفضل العمل وتجد فيه نفسها وتعلم انها ستكون عنصر فعال فى المجتمع ...ليه لأ ؟؟

اما بالنسبة لظروف المعيشة فى مصر ....// دى عاوزة ثلاثة كمان متخفيين من اجدادهم الاموات يشتغلوا مع الزوجين //...علشان يكملوا الشهر ....

وخصوصا انى سمعت ...لسة امبارح ...من ناس لسة راجعة من مصر .....ان الأحوال من سئ الى اسوأ..

اعتز برأيك اخى داروين ....لكن الظروف ..تجبر على ضرورة عمل المرأة ..

[فــيــروز]

يعني يافيروز هو أنا ما اعرفش أولع حريقه مره من نفسي .. ياستي أن مش عاوزك تلميها أنا عوزك تفريدها كده وتولع

معلش يا استاذ داروين wlch::

لك عندى حريقه mfb:

بس اصل فيه ناس قالوا ان كلامى مع س.س. فى الموضوع ده ممكن يضايقه وشافوا انه مفروض اعدله :)

بس انا آسفه انى ماديتكش فرصه تولع الحريقه المره دى بس ان شاء الله فى اقرب فرصه نبقى نولعها شركه :)

[إثار]

شكرا على المرور

وانا على فكره اسمي إيثاااااار :lol:

وكمان انا موافقه راي سي السيد بس لو المراه فعلا محتاجه للعمل يعني

تكون مضطره لظروف معينه بس مش يكون الشغل عليها فرض زي ما في حالات انا شيفاها بعيني

وكمان هي فعلا ممكن تشتغل فتره مؤقته اما عشان (تكون نفسها) مع انها كلمه المفروض تكون في قاموس الشباب

او انها تساعد اهلها او زرجها او.....

بس مش يكون مؤبد يعني ان الشغل يتقرض عليها ! :rolleyes:

[فــيــروز]

بس مش يكون مؤبد يعني ان الشغل يتقرض عليها ! :rolleyes:

يتفرض عليها ازاى !! :lol:

قصدك يعنى ان جوزها بيجبرها على الشغل بينما هو قادر على ان ينفق عليها وعلى البيت؟

طيب ما سهله ماتشتغلش كويس لحد ما تترفد و تقعد فى البيت من غير اى لوم عليها ولا عتاب :lol:

[عادل أبوزيد]

بدأ الحوار بمقولة لو أن المرأة تخلت - لأى سبب - عن فرصة التعليم والعمل فبالضرورة ستزيد فرص الرجال فى العمل.

و الجميع أخذ هذه المقولة كقضية مسلم بها أو أنه إستنتاج إحصائى معقول و دخلنا فى دائرة من التفسير و التبرير ..إلخ

هذه المقولة أيها الأفاضل غير صحيحة و أتجاوز و أؤكد أنها ليست فقط غير صحيحة بل هى غير صحيحة بالمرة.

لو ألغينا عمل المرأة بالكامل و كذا لو ألغينا تعليم المرأة بالكامل سيجد بعض الرجالة شماعة أخرى يعلقون عليه سبب عدم حصولهم على فرصة تعليم جيدة أو فرصة عمل جيدة ... و حتى لا أسقط فى خطأ المقولة الأولى أقول أن هذا صحيح بنسبة كبيرة.

ألم يتسائل أحد لماذا يجد زيد فرصة عمل و ينجح بينما لا يجد عمرو نفس الفرصة ... لماذا هذا ناجح و الآخر "غير ناجح" رغم أنهم ينتمون تقريبا لكل الظروف البيئية و الإجتماعية ؟؟؟ لماذا نجد موظفا محبوب و راضى و يقوم بالتجويد فى عمله بإستمرار و نجد آخر ساخط بإستمرار و يشكو من الإضطهد و أنه يتم دائما تخطيه فى الترقية ؟؟

كلنا كبشر مختلفين و كل منا له صفات شديدة الخصوصية به و لايمكن أن تطبق على البشر نفس المنطق بدقة رياضية .... و يوم نعتقد فعلا أننا مختلفون و كل لما قدر له يومها فقط لن نتمزق لأن أبنائنا تعثروا فى كلية الطب مثلا أو فى الثانوية العامة و بعدها لن نجد إلا الأطباء الناجحون و المهنسين الأكفاء و كذلك الحرفيين الأكفاء السعداء

[Lighthouse]

كالعادة

في كل المشاكل التي تعترض مجتمعاتنا يلجأ الجميع لشماعة المرأة ليعلقوا عليها فشلهم

فالمرأة سبب البطالة حتى لو كانت سياسات الحكومة فاشلة

والمرأة تعليمها سبب كوارث تعليم الرجال حتى لو كان عدد منهم لايريد حتى ان يستذكر دروسه كما ينبغي

والمرأة سبب كل مشاكل الرجال لانها تعمل وتتعلم

باقي ان يتهمنا الرجال بأننا سبب حرمانهم من الاكسجين الذي وهبه الله سبحانه وتعالي للجميع

لو جلست كل النساء في البيوت

لو امتنعن عن التعليم

سيصبحن سبب كوارث أخرى

حاجة فعلا تضحك

سوق العمل يحتاج للمنافسة وليس لخلو الساحة حتى يحتلها اي شخص لمجرد انه ليس له منافسين

كفاية كده et:(

[Sherief AbdelWahab]

العزيزة لايت: قلت أن سوق العمل يحتاج للمنافسة..و أنا أقولها علنا: سوق العمل يحتاج يا لايت لأن يكون سوقا بالقاف..لا بالهمزة!..

في بعض إعلانات التوظيف نجد أنه مطلوب "سكرتيرة"..مسوغ التعيين هو التاء المربوطة في آخر الكلمة السابقة!..الأمر اللي أثار حفيظة الكثير من النساء و الرجال على حد سواء!..و فعلا ليهم حق يتضايقوا!

بمناسبة المنافسة الله يرحمها و يحسن إليها..أموت و أعرف ايه اللي بيتنافس أو يفترض اننا نتنافس فيه عشان الوظيفة..أحد العباقرة قال مثلا اتعلم لغات و كمبيوتر..عبارة في حد ذاتها لا تقل غباءا عن عبارة "مقدار التعليم"..ماشي..لغات و كمبيوتر..بس أنهي لغات و أي كمبيوتر؟..و بعدين حتى لو بقيت "أسطى" في مجالك..هل يكفي دة لجعلك شخص محترم لا تتعرض للتمييز على أساس النوع أو الوسط الاجتماعي؟..طبعا لا!

في رأيي أن هناك نماذج ناجحة من الرجال و النساء على السواء..و نماذج فاشلة من الرجال و النساء على السواء..و العمالة الزائدة موجودة هنا و هناك..في إطار "سوء" العمل الذي قد أخالف قواعد المنتدى المعمول بها في حال استخدمت اللفظ الأدق لوصفه به!

خلص الكلام

[إثار]

يعني انا شايفه ان الزمن اللي احنا عايشينه اليومين دول :D

اصبحت الاولويه في كل حاجه للمراه وده اللي مش عاجبني

يعني مثلا

اي وظيفه فاضيه المفروض تكون الاولويه للذكور

ولكن لو فيه بعض الوظائف اللي يستحسن ان اللي يكون فيها مراه

مش مشكله

احنا مش مانعينها من الشغل بس تسيب الفرص للرجل

يعني لو هي عايزه تشتغل ممكن :دكتورة نسا وتوليد او دكتورة اطفال

او خياطه سيدات او اي شغله تكون المراه هي الزبون فيها

[فــيــروز]

يعني انا شايفه ان الزمن اللي احنا عايشينه اليومين دول اصبحت الاولويه في كل حاجه للمراه وده اللي مش عاجبني

ازاى يعنى !! ممكن توضيح اكثر لو تكرمت؟

يعني مثلا اي وظيفه فاضيه المفروض تكون الاولويه للذكور

لماذا؟ بمناسبة ايه يا ترى؟ اذا كنت فى الجمله السابقه تتضايقى من اعطاء الاولويه للمراه !! اليس من العدل الا تكون الاولويه بناء على الجنس ولكن بناء على الكفاءه و القدره !!

ولكن لو فيه بعض الوظائف اللي يستحسن ان اللي يكون فيها مراه مش مشكله

الوظائف التى يستحسن ان تكون فيها امراه محدوده و فى الغالب ستشغلها امراه بالفعل

لكن ماذا عن الوظائف التى لا يحبذ فيها جنس معين وهى الاكثر و الاعم !!

احنا مش مانعينها من الشغل بس تسيب الفرص للرجل

مره اخرى لماذا؟ :D المراه لا تطلب من الرجل ان يترك لها فرص العمل حتى يطلب منها المثل

يعني لو هي عايزه تشتغل ممكن :دكتورة نسا وتوليد او دكتورة اطفال او خياطه سيدات او اي شغله تكون المراه هي الزبون فيها

والاعمال اللى مفيهاش زباين؟ <_< اعتقد ليس هناك افضليه فيها للرجل عن المراه !!

الحقيقه يا اخت آثار فيه نقطه من ساعة بدء الموضوع نفسى اتكلم فيها بس لانى تكلمت فى هذا الموضوع كتير شعرت بالياس الحقيقه ولذا آثرت الصمت

المراه الآن وضعها غير زمان .. مش هاقول لك بقت وزيره وبقت غفيره وكلام الافلام ده .. لا هاقول لك ان المراه صار لزاما عليها ان تتقن مهنه و تجيدها حتى تحمى نفسها من ذل الحاجه و العوز .. و اعتقد ان الاكرم للمجتمع ان يعين المراه على ان تعمل عملا شريفا يحميها ذل السؤال بدلا من ان تنحرف و تضيع و تجر وراءها المجتمع بالكامل للانحراف

الظروف الاقتصاديه فى هذا العصر لم تعد تسمح للمراه برفاهية الماضى التى كانت تجبر الاب او الاخ على الانفاق عليها .. فالاب قد يموت وقد تعجز موارده عن اعالة بناته الى ما لا نهايه و الاخ كذلك لديه اسرته فى الغالب واذا استطاع ان يعين اخته مره قد يفشل فى هذا مرات .. فماذا تفعل الفتاه التى لم تتزوج؟ او الارمله؟ او المطلقه !!

لا ادرى لم ينظر البعض الى عمل المراه على انه تفضل من المجتمع عليها !! بينما الاصل فى الاشياء انها مباحه وانها حق للجميع دون استثناء !! عمل المراه ينبغى ان تشكر عليه لانها تقى نفسها شر السؤال و الحاجه التى قد تضطرها فيما بعد للانحراف ثم نعود ونسال هى انحرفت ليه !!

المراه حين كانت تعمل مع زوجها فى الحقل و الفلاحه لم يقل لها احد اتستتى و اشتغلى ما يناسبك من مهن !! بل عملت مع زوجها فى الحقل منذ القدم يدا بيد !! ولا افهم هل كان هذا مقبولا من المجتمع لانه يفيد الزوج اقتصاديا مثلا ولا ايه الفرق يعنى بين هذا العمل و اى عمل آخر تقوم به المراه !!

اذا كان هناك نساء لا يردن العمل من السهل جدا عليهن ان يمتنعن معززات مكرمات فى البيت لكن ليس لهن ان يطلبن ممن لا يرغب فى هذا ان يترك الفرص للرجل و ان يكون له الاولويه !! ببساطه لان نساء كثيرات الآن ينفقن على اسرهن سواء الابوين او الابناء ومنتهى الظلم ان نحرمهن من العمل الشريف ونتركهن عرضه للضياع حتى ينشرح قلب الرجل !!