فهرسة و تطوير و تنقيح باب الهجرة إلى كندا

[ehabtaher]

بس كنت عايز اقول حاجه فوق البيعه

المزاح والدعابه والدخول فى مواضيع فرعيه اعتقد سببها الاساسى هو محاوله الترابط وايجاد الالفه بين افراد المجموعه التى ترغب فى الهجره الى كندا

ولما الرد على سؤال بيبقى فيه نوع من الدعابه او الرد بصوره كوميديه شويه بدون الاخلال بالمضمون بيبقى علشان مايبقاش الموضوع بصوره جافه زى الكتب مثثلا اللى بنذاكر فيها

لان الواحد مابيحبش يبص فى الكتب اللى بيذاكر فيها برضاه وعن طيب خاطر

ولكن بيبص فيها لانه مرغم علشان الامتحان علشان عايز يتعلم

لكن حتى الكنديين نفسهم لما بيحبوا يدرسو معلومه معينه فى المدرسه بيدرسوها بطريقه مشوقه وتحبب الناس فى الدراسه والاستذكار

ولازم نعرف ان موضوع الهجره من الموضوعات المقلقه والمخيفه

دى مفترق طرق

لو اتاخدت بصوره جافه حتبقى زى موقع الهجره الخاص بالحكومه الكنديه فيه كل المعلومات اللى الواحد عايزها بس الواحد معندهوش قدره والا نفس علشان يقرأه كله ويفهمه

لكن التواصل فى باب الهجره بين الاعضاء بيؤدى الى وصول المعلومه بصوره ظريفه

لكن فعلا موضوع القهاوى القطاع الخاص ومشكور وما جصرت ووو هو الموضوع اللى عايز تعديل

[Folana]

السلام عليكم ورحمة الله...

الأخوة الكرام....

بما إنى بقالى أكثر من ثلاثة أيام داخل باب كندا للمساعدة فى تنقية الموضوعات ..فيطيب لى أن أنقل وجهة نظرى الانسانية والاشرافية لحضراتكم...

الزميل الفاضل أحمد سيف تفضل بعرض إعلان إدارى يتضمن النقطة الاتية :

مداخلات تتضمن تهاني وشكر وتعليقات شخصية ودردشة سيتم حذفها بعد فترة مناسبة لاستنفاذ الغرض منها

كما تفضل بتوضيح هذه الفقرة وما المقصود بالفترة المناسبة.....وأضيف الى توضيحه ان الفترة المناسبة تلك قد يكون مر عليها عام او عامين مثلا.....ليس معنى هذا أن الدعابة وروح المحبة والتواصل بين الاعضاء ممنوعة فى هذا الباب...ولكن المقصود من وراء هذا أن موضوعات كندا تعتبر مصدر للمعلومات المتجددة...وبالتالى وجب علينا جميعا مشرفين وأعضاء مهتمين بمحتوى هذه الموضوعات أن نحاول جاهدين الحفاظ على سياق الموضوع بطريقة أو أخرى تساعد الاخر على الوصول الى مايبحث عنه من إجابات داخل الموضوع الواحد...

وبمنتهى الصدق أقول بعد مراجعتى لعدة موضوعات فى هذا الباب...انى ألتمست العذر لأى عضو جديد يقوم بفتح موضوع جديد يعرض فيه تساؤله الذى ربما يكون هناك عدة اجابات لنفس السؤال فى عدة موضوعات...ثم نتساءل لماذا لم يكلف نفسه بقراءة الموضوعات ليحصل على الاجابة بدلا من فتح موضوع جديد؟....

كيف سيحصل على اجابة سريعة لتساؤله فى موضوع تعدى صفحاته المائة والمائتين..ومعظم المداخلات عبارة عن تهانى او ترحيبات او تعازى؟....بصراحة من حقه يزهق ويفتح موضوع جديد...

طيب كيف نحقق الهدف المرجو من وراء هذه الموضوعات بحيث يعود بالنفع والافادة على اى عضو يريد المتابعة ......رأينا ان الحل ممكن يتحقق اذا قمنا بحذف بعض مداخلات التهانى والسؤال عن الانقطاع ثم الترحيب بالعودة بعد الانقطاع..ومداخلات التعازى ..والتى مر عليها اكثر من سنة او عدة شهور...وبالمناسبة وكما ذكر الزميل الفاضل احمد سيف..هناك ابواب متخصصة لمناقشة اى موضوعات جانبية او لتقديم واجب العزاء او التهانى باعياد الميلاد مثلا...فلو استخدمنا الخدمة المتوفرة دى...حيكون افضل من جميع النواحى.....

وبناء على ما تقدم...الدعابة وروح التعاون والتواصل الجميلة بين الاعضاء مش ممنوعة بقوة القانون ولا حاجة...ولكنها محاولة للتقليل من عدد صفحات الموضوع الواحد بحيث يتسنى لاى عضو البحث عن اجابة لتساؤله دون ان يضطر لفتح موضوع جديد...

وردا على تساؤل دكتور هشام بأن الحذف يتم بدون اشعار....نحن بدأنا مهمة تنقية الموضوعات بعد اعلان استاذ احمد سيف الادارى والذى أشار الى هذه النقطة تحديدا...وبالتالى لم نكن مضطرين لمراسلة الاعضاء الذين تم حذف مداخلات لهم من 2009 او 2008....والحقيقة مش فاهمة معنى ان الحذف اصبح فيه اختلاط للحابل بالنابل؟....لو ممكن ايضاح او تصحيح ..قد يساعدنا على توخى الحذر فيما هو آت..

وللاستاذ ايهاب طاهر اقول انى متفقة معك تماما ..ومقتنعة بأن روح الدعابة تخلق جوا من المحبة يشجع على الاستمرار فى العطاء...ونحن لم نمنع هذا...ولكنها كما ذكر الزملاء محاولة لضبط ايقاع الموضوعات لكى تعود على الجميع بالفائدة المرجوة...

وللاستاذ ماى يوزر نيم اقول..أن الموضوع مش محتاج تعيين مراقبين...لان كل عضو هو صاحب مكان وهو مراقب بدون تعيين...لان مايربطنا جميعا هنا هو محاولة تقديم يد المساعدة للاخر فى ابسط واسهل صورة....

والشكر موصول لجميع الاخوة الذين قدموا يد المساعدة...ونحن فى انتظار تكرمهم بالبدء فى تنفيذ خطوات فعلية ....

وفى انتظار عودة دكتور تهامى من الاجازة ...واقوله بجد جزاك الله خيرا يادكتور ...أنت من الصابرين :ninja:

خالص مودتى واحترامى

[د هشام ابراهيم]

السلام عليكم ورحمة الله...

...............

وردا على تساؤل دكتور هشام بأن الحذف يتم بدون اشعار....نحن بدأنا مهمة تنقية الموضوعات بعد اعلان استاذ احمد سيف الادارى والذى أشار الى هذه النقطة تحديدا...وبالتالى لم نكن مضطرين لمراسلة الاعضاء الذين تم حذف مداخلات لهم من 2009 او 2008....والحقيقة مش فاهمة معنى ان الحذف اصبح فيه اختلاط للحابل بالنابل؟....لو ممكن ايضاح او تصحيح ..قد يساعدنا على توخى الحذر فيما هو آت..

.......................

خالص مودتى واحترامى

و عليكم السلام و رحمة الله و بركاته

سيدتي الفاضلة

شاكر لحضرتك الاهتمام بالرد و اسمحي لي أعرض وجهة نظري اللي ممكن تكون مغايرة لما استقر عليه و بدأ تنفيذه بالفعل ....معارضتي من منطلق اهتمامي و حرصي .... مرحلة عدم الأهتمام و اليأس ده مرحلة الهجرة من المكان :lol:

اللي فهمته إن الهدف الاساسي من غربلة المواضيع هو صالح المستهلك سين (سين واحدة بس :closedeyes:) .......الاخ سين واحد مننا ما عندوش وقت يقرا و ما عندوش استعداد يدور علي المعلومة اللي هو عايزها وسط موضوع ملحمي ٢٠٠ صفحة و عايز المواضيع تبقى قصيرة علشان يقدر يطلع منها بالمفيد في السريع ....لا بيستخدم محرك بحث و لا أي خاصية بحث في المنتدي و لسبب ما موضوع د قناوي المثبت الخاص بالرد علي الأستفسارات السريعة لا يناسبه ( ربنا يجازي د قناوي و رفقائه كل خير علي مجهود غير عادي ) يعني سين غالبا مش بيدور علي معلومة محددة غالبا ده عايز ياخد فكرة عامة و صورة توتالة

هو موضوع ٢٠٠ صفحة ياخد قد إيه علشان يتقري ..... لو كل صفحة دقيقة .... مجرد متوسط يزيد أو يقل ..... يعني ٢٠٠ دقيقة .... خليهم ٢٤٠ ...يعني ٤ ساعات ..... خليهم ٦ ساعات .....لو متوسط وقت التصفح ٣ ساعات في اليوم كله .....يعني الموضوع كله يتلم في يومين .....خليهم تلاتة ...... كام موضوع ملحمي عندنا ......محتاج اسبوعين قراية مثلا .. خليهم تلاتة ..... يعني منتدي كندا و علشان الصورة التوتالة ...٣ اسابيع لواحد بيفكر ياخد قرار مصيري بالهجرة ...٣ اسابيع يلم فيهم معلومات الكنادوة نفسهم ما يعرفوهاش علي رأي سين سين باشا ......كتير ؟ لو المعلومة المطلوبة عاجلة و من طراز الحقووووووني رغم قلتها في منتدي كندا مقارنة بمنتدي المغتربين فلن يعدم الحصول عليها ...موضوع د قناوي ...البحث .....السؤال المباشر ...الرسالة الخاصة

أزيد حضرتك كمان إن الاخ سين ده مش حانشوف وشه تاني ...خد المعلومة علي السريع و يالا وش الضيف ....و حتي لو راح كندا غالبا مش حانسمع منه لا سلبا و لا ايجابا

طب و المستهلك ص ؟ ...اللي هو مش سين يعني ..... ده ذنبه إيه ؟ .....ص واحد مننا برضه بس عنده صبر يقرا مواضيع ملحمية (العبد لله مثلا قريت موضوعين ايقونتين في المنتدي أول ما اشتركت ....موضوع د الشامي و موضوع د تهامي و الاتنين اتعرفت و أتشرفت بيهم شخصيا و باعتبرهم اصدقاء شخصيين و بادين للمنتدي و الموضوعين بتاعهم علي الكنز اللي لقيته في الاتنين دول )

ص بيعتبر المنتدي همزة وصل مع ولاد بلده ...اللي هاجروا و اللي لسه بيحاولوا و اللي مش ناويين أصلا ...داخل المنتدي يفيد و يستفيد و ناوي يكمل في المنتدي لاطول فترة ممكنة ...لما بيحتاج معلومة لاما بيدور علي موضوع د قناوي أو بيستخدم البحث أو بيراسل عضو ما مباشرة ...يعني مش همه الوحيد الحصول علي معلومة قد ما همه التواصل الأنساني ....

ص بيحب المنتدي بالدردشة اللي فيه ....بيسميها روح و طابع مميز ...صحيح ساعات بتزيد عن حدها بس ساعتها حد بيدخل يصحح الوضع .... صاحب الموضوع أو عضو مشارك (العبد لله عملها كذا مرة و العزيز الفاضل إيهاب سالم و العزيز الفاضل مازن أطرش و غيرهم كتير بس دول اللي فاكرهم دلوقتي ) لا إما حد من المشرفين بيشيل المشاركات اللي بره الموضوع و يضيفها لمكانها الصحيح ..... يعني موضوع اللاندنج اللي قلب علي ماتش مصر و الجزائر مشاركات الماتش كان ممكن تضاف لمنتدي الرياضة ......الموضوع التاني بتاع القلقاس كان راح المطبخ تبع الشيف بندق :rolleyes: مجرد أمثلة زي ما حضرتك طلبتي

ص كون صداقات في المنتدي ...صداقات في العالم الواقعي ما كنتش حتحصل لولا الدردشة الجانبية ديه ....ص لو عايز معلومات صرف كان اتجه لموقع الهجرة الرسمي و خد المعلومة من هناك ...... ص كان بيرجع للمواضيع القديمة و يقراها من أول و جديد بقيت تشكل جزء من ذاكرته و تاريخه الانساني و ياما كان بيضحك أو يبتسم لما يقرا مناقشة قديمة عدي عليها سنة أو سنتين ...عاطفي شوية ص ده أو يمكن مدي للموضوع أهمية مش فيه ...... ما علينا بس لما شفت موضوع تهامي نزل من ٢٠٠ صفحة ال-١٠٠ صفحة حسيت بغصة ما

اختلاط الحابل بالنابل قصدت بيه حذف مداخلات بقالها سنتين و حذف مداخلات بقالها ساعتين ....حذف مداخلات خارجة عن الاداب و أصول الحوار و حذف مداخلات تدخل في إطار الدعابة الخفيفة المقبولة

أسف علي الاطالة .....ممكن حضرتك تعتبريها نوع من أنواع الدردشة برضه ....أنا متأكد إن كلامي لا حيقدم و لا حيأخر و القرار أتاخد و اتنفذ و كله للمصلحة العامة ..... و ما عنديش اعتراض و لا كلام تاني أقوله

تحياتي و احترامي يا سيدتي الفاضلة

[Folana]

السلام عليكم ورحمة الله...

أخى الكريم دكتور هشام..مين قال بقى إن كلام حضرتك لا حيودى وحيجيب...

أى كلمة طبعا من الاعضاء لها احترامها

أنا متفهمة كلام حضرتك جدا...ومتفهمة جيدا معنى أن نشعر بأن هناك يد تحاول العبث بمشاعرنا وعلاقتنا بالاخرين التى تكونت فى مكان ما....

ولكن هذا الكلام لا ينطبق على حالتنا هنا...

نحن لا نبحث عن مصلحة "سين" اللى بيدخل المنتدى يدور على اجابة ويمشى...و لا مصلحة "ص" اللى عايز يكتب براحته فى أى موضوع..

احنا بنبحث عن المصلحة العامة...حديثى عن تعاطفى مع سين الذى يقوم بفتح موضوع جديد...ده كان كلام يعبر عنى انا شخصيا ..وليس عن رأى الادارة ..علشان كده ذكرت فى الاول انى حانقل وجهة نظرى الانسانية والاشرافية...مش معنى كده اننا خايفين على مصلحة سين...ولكن انا..كشخصية حقيقة مش مشرفة اعتبارية..قلت فى نفسى الله طب ماسين عنده حق يفتح موضوع جديد لو عايز اجابة على سؤاله....مش عارفة اذا كنت قدرت اوضح فكرتى وتبربر كاف لجملتى فى مداخلتى السابقة ولا لأ

المطلوب من عرض اى موضوع ان

سين يقدر يستفاد..وصاد أيضا يستطيع ان يشعر بجو الألفة والاستفادة اللى هو بيعرف ازاى يوصل لها تبعا لخبرته و تعامله مع الموضوعات ومؤشر البحث فى المكان...

الموضوع المكون من 200 صفحة ..اخد منى شخصيا ثلاثة أيام لقراءته....والموضوع المكون من 120 صفحة استغرق منى يوما كاملا..من تسعة صباحا الى تسعة مساءا حتى استطيع ان أنقيه من المداخلات..مش حأقدر اقول الخارجة...ولكن خلينى أقول المداخلات التى يمكن الاستغناء عنها لانقضاء فترة طويلة على كتابتها...وهذا لا يعنى ان هذه سياسة جديدة يطبقها المنتدى على كافة الموضوعات...ولكنها تطبق فقط على الموضوعات التى تحتوى على معلومات هامة...زى موضوعات باب كندا ...لتنظيم الباب ليعود بالنفع على الجميع..سين او صاد..او حتى انا....ومحاولة قد تنجح او تبوء بالفشل للحد من فتح موضوعات جديدة من سين.

أقولها صادقة ..انى عشت مشاعر جميلة جدا أثناء متابعتى لعدة موضوعات فى باب كندا...وشعرت بفرحة مع من حصل على الفيزا...وشعرت بحزن مع من لم يحالفه الحظ...

موضوع د.تهامى ..صدقنى حضرتك عندما اقول انى عرفت معلومات عن الاعضاء وعن د.تهامى شخصيا ..اول مرة اعرفها....ولكن اللى فهمته ان الموضوع يتحدث عن مشاهدات دكتور تهامى فى كندا...وبالتالى كنت أقرأ هذه المداخلات بعناية أكثر لكى احصل على معلومات مفيدة عن كندا ..مش عن سين أو صاد

ولكن نحن نريد ان تظهر الموضوعات فى صورة جيدة ومفيدة...وتعبر عن العنوان والهدف من المحتوى

:هل تتصور حضرتك ان مداخلة مثل هذه قد تكون مفيدة او تشيع جوا من البهجة والترابط بين الاعضاء؟

كل واحد يقوله بقين حلوين و كلام كبير كده الناس متفهموش و يخلي كلامه باللون الاحمر يبقي من الادارة و الناس مفروض تخاف و تكش

عارفين فيه علاقة غريبة بخوف المصريين من اللون الاحمر و الشمع الاحمر و حجات كتير لونها احمر حتي لو ريحتها وحشه

الحقيقة لا أريد ان اعرض تفاصيل كثيرة قد تخرجنا من سياق الموضوع...ولكن بخصوص موضوع د. تهامى...هو مشرف الباب وصاحب الموضوع ..ولو عنده رأى مخالف حيقوله اكيد

...احب اضيف ان فيه فعلا مداخلات هامة أفكر جديا فى فصلها فى موضوع مستقل مثل الحديث عن العنصرية والعنصرية المصرية......مداخلات جميلة ونقاش راقى بين الاعضاء..لكنه خارج عن سياق الموضوع تماما....وانتظر رأى د. تهامى ايضا...

ولكن على الجانب الاخر هناك مداخلات وصفحات للسؤال عن والترحيب بعودة..ثم السؤال عن والترحيب بعودة....اظن انها ممكن نستغنى عنها خصوصا انها من فترة زمنية لا بأس بها.....ثم صفحات وصفحات تتحدث عن المسلسلات التليفزيونية ..ممكن الاستغناء عنها ايضا

ولا رأى حضرتك ايه؟

باستأذن حضرتك بس وباقى الاخوة فى الانتظار حتى يتم الانتهاء من اعادة تنظيم باب كندا ...

ثم نبدأ نقييم التجربة من جديد....ومن تربطهم علاقات صداقة واخوة حقيقية..لاتزعزعها ابدا حذف مداخلات التهانى...:lol:

وبخصوص اشارتك الى حذف بعض المداخلات بتاريخ حديث....حنحاول حاضر نبقى عليها اذا لم تكن بها مخالفة للقواعد....كالخروج عن سياق الموضوع...او الشخصنة...او القواعد اللى حضرتك تعلمها اكيد...

شاكرين اهتمامك...واهتمام جميع الاخوة

ولحضرتك خالص مودتنا واحترامنا

[د هشام ابراهيم]

و عليكم السلام و رحمة الله و بركاته

أولا لحضرتك امتنان و تقدير لحوارك الراقي :lol:

حابب بس أوضح نقطة ....أنا موافق تماما علي التبويب و علي الفهرسة و علي الغربلة .....أي مشاركة خارجة عن القواعد المنظمة ...أي مشاركة فيه تلميحات أو تصريحات غير مقبولة ...أي مشاركة من فصيلة مشكووور .....إلخ .....ما لهمش لازمة

أنا اعتراضي علي تصفية موضوع كان عبارة عن حوار ...صالون أدبي بس عصري شوية .....فيه موضوعين في باب كندا كنت أتمني يفضلوا زي ما هما ...موضوع د الشامي و موضوع د تهامي ...... تحديدا أهو :rolleyes: .... صراحة فيه مواضيع تانية كتير أولي بالغربلة منهم

اللي بيدور علي معلومة مش حيعدم يلاقيها اللي بيدور علي تواصل إنساني أو تجارب شخصية عايز التفاصيل الدقيقة المتناثرة هنا و هناك ...يقدر يفهم بيها الشخصية اللي قدامه و بتساعد في رسم بورتريه ليها ...من غيرها الموضوع كله بيفقد روحه و طبعه و بيبقى أشبه بمحاضرة جافة مبتورة ....زي ما حضرتك قلتي فيه محذوفات من موضوع تهامي كانت تنفع مواضيع بحالها و بتحتوي علي حوار جيد .....المحذوفات ديه أنا باعتبرها خسارة لا تعوض و ياريت نلاقي طريقة نسترجعها بيها تاني

علي العموم حاسمع كلام حضرتك و حانتظر لحد ما التغييرات كلها تتبلور و ساعتها نعيد التقييم زي ما حضرتك تفضلتي و قلتي ..... أنا فعلا حاسس إني عرفت أوصل لحضرتك قصدي تماما و راضي و مكتفي ...... و ما تخافيش حضرتك الصداقات باذن الله مش حتأثر فيها المحذوفات :closedeyes: ...... انما أكيد صعب صداقات تانية تقوم في ظل الرسايل المباشرة اللي حتبقى تيمة منتدي كندا

احترامي و تقديري يا سيدتي الفاضلة

[ramyfathalla]

رسالة شكر و تقدير للتطوير الذى بدأ يحدث فى باب الهجرة الى كندا

على الرغم من أنى قرأت أو كنت من المتابعين لتوبيك د/ تهامى كندا التى رأيتها من قبل

الا انه بالفعل بعد ازالة مداخلات كثيرة من هذا التوبيك و ترتيبه قرأت ما يقرب من العشرون صفحة بكل سهولة و يسر و من غير أى احساس بالملل

أشكر من كل قلبى من ساهم فى التطوير و جعله الله فى ميزان حسناته

و أظن أن الأعضاء الجدد الذين سوف يقرأون الموضوع سوف يشعرون بالراحة و عدم الملل من المداخلات الكثيرة المشتتة

و أخيرا أشكر صاحب الموضوع د/ تهامى على كل كلمة كتبها أو وقت أنفقه فى هذا الموضوع الفوق رائع و أدعو الله أن يجازيه بكل حرف حسنة و يحط عنه خطيئة

و أخيرا وفقكم الله فيما تبذلون من عطاء لمنتدانا الغالى

[ramyfathalla]

سؤال للمشرفين عن باب كندا

أين موضوع ما قبل 28 فبراير 2008 ؟

و موضوع ما بعد فبراير 2008 ؟

و شكرا على التنظيم و التطوير بجد حاجة جميلة قوى و جزاكم الله كل خير لأن أكيد أنتم تعبتوا قوى

تم تعديل 13 مارس 2010 بواسطة ramyfathalla