هموم مهاجر

[عبدوس الوزير]

كان الفاضل الدكتور هشام قد دعاني لكي أفتح موضوعا عن هموم الهجرة إلى كندا بعد مداخلة الفاضل زناتي الشهيرة في موضوع الفاضل الدكتور تهامي. وقد ترددت لفترة لعدة أسباب ليس أقلها قلة الوقت أو عدم استرسال الأسلوب، ولكن أهمها في الواقع هو عدم استعداد البعض لسماع وجهة النظر الأخرى في موضوع الهجرة إلى كندا. فمتصفح الانترنت الذي وصل إلى هذه الصفحات على الأغلب قد عزم الأمر على الهجرة، غالبا بعد أن قاسى الأمرين في بلده، ويرى أن كندا هي الحل وليس على استعداد لأن يسمع بغير ذلك. وقد يتطور الأمر للاتهام بأن المتكلم لا يريد الخير للآخرين والرد جاهز دائما "طيب لما الموضوع كده ليه انتا قاعد هناك كل الوقت ده". وهو سؤال وجيه الصراحة وإن كنت لا أنوي الإجابة عليه لأسباب شخصية.

قبل أن أبدأ أود أن أوضح أنني أفتح هذا الموضوع تفريغا لبعض همومي وليس لي هدف غيره. وأود أن أقر وأعترف قبل الاسترسال بأنني لن أستطيع أن أجادل أو أناقش بالاستفاضة وطريقة الرد على كل سطرـ خصوصا أن ما سأطرحه هموم شخصية في المقام الأول قد لا تعني شيئا للآخرين. ثم إنني لن أتطرق إلى أي متاعب مادية في حديثي، بل على العكس سأفترض حالة المهاجر كامل الحظ أو قل كامل الاجتهاد والأهلية، الذي وجد عملا يناسب مؤهلاته واجتهد فيه فوفر لنفسه وأهله كامل متطلبات المعيشة الكندية من بيت وسيارة وعمل وفسح وغير ذلك،شخص استقر في البلد لفترة طويلة ففهم طرق التعامل مع الكنديين ولا يعاني من هذا الجانب أيضا، ينعم بنعمة الزوجة والأولاد والاستقرار. باختصار نحن أمام السيناريو المثالي لكل الحالمين بالهجرة. ايه اللي ممكن الواحد يطلبه بعد كده؟

سبحانك اللهم وبحمدك، أشهد ألا إله إلا أنت، أستغفرك وأتوب إليك

[د هشام ابراهيم]

متابع باهتمام و تقدير

الصورة لا تكتمل أبدا إلا اذا نظرنا لها من كافة الجوانب و هذا ما دعاني لدعوة حضرتك بالمشاركة ...خاصة إذا سلمنا إن ما يذكر و ما يقال قد يؤثر في مسار حياة من يقرأ اذا ما بني قراره علي ما يقرأه

كلنا أذان صاغية

[abohagar]

بعت كل ما املك فى مصر

حجزنا على 22/10/2009

وصلنا كندا

انبسطنا اسبوع

بدات المشاكل و استمرت شهر

استلمنا ال كروت

رجعنا على اول طيارة الى مصر

مفيش بيت

مفيش اسرة

مفيش شغل

نادم على التجربة اللى خربت بيتى

منك لله يا كندا ياللى كنتى السبب فى ضياعى و ضياع اسرة كانت مبسوطة

منك لله يا كندا

منك لله يا كندا

منك لله يا كندا

تم تعديل 18 فبراير 2010 بواسطة abohagar

[goodfaith]

ايه اللي ممكن الواحد يطلبه بعد كده؟

صحيح ايه اللي ممكن الواحد يطلبه بعد كده

بالرغم من اكتئابي جذبني الموضوع بشدة ... اسجل متابعة واهتمام

[goodfaith]

بعت كل ما املك فى مصر

حجزنا على 22/10/2009

وصلنا كندا

انبسطنا اسبوع

بدات المشاكل و استمرت شهر

استلمنا ال كروت

رجعنا على اول طيارة الى مصر

مفيش بيت

مفيش اسرة

مفيش شغل

نادم على التجربة اللى خربت بيتى

منك لله يا كندا ياللى كنتى السبب فى ضياعى و ضياع اسرة كانت مبسوطة

منك لله يا كندا

منك لله يا كندا

منك لله يا كندا

طيب اذا كان فيه نية للرجوع بعد استلام الكروت ليه بعتوا كل حاجة في مصر ؟؟

واذا كنتم ناويين تستقروا في كندا ايه اللي رجعكم مصر على اول طيارة ؟

لازم تنقل الصورة بالكامل عشان يكون الحوار موضوعي

[عبدوس الوزير]

ـ أزمة الهوية ودعم المجتمع ـ

أحب أبدأ أول مداخلاتي بصورة وسؤال

http://www.straight.com/article-178576/wil...-come-vancouver

تعمل ايه لما ابنك يشوف الأتوبيس ده وانتو رايحين الصبح المدرسة ويسألك: هو ايه ده يا بابا؟

بل السؤال الأخطر: تعمل ايه لما ابنك يشوف الإعلان ده وميسألكش أي حاجة؟

باختصار مشكلة كندا في كلمة واحدة هي أزمة هوية. كل شيئ تراه في هذه البلد هو النقيض عما تربينا عليه تماما. طبعا دي مش مشكلة لما نتكلم عن غياب النظام أو القمع أو غياب النظافة أو غير ذلك كله، ولكنها مشكلة المشاكل عندما تقف مكتوف الأيدي وأنت ترى المجتمع الجديد يفرض عليك فرضا أن تغيير الثوابت والعقائد، وهو ما إن لم يمسسك (وهو أمر مشكوك فيه) فلا بد له أن يمس أبناءك بشكل أو بآخر.

وأزمة الهوية هذه تطال المهاجر إلى كندا لا محالة وإن اختلفت درجة التأثير . اسمحولي اضرب لكم مثل: لا يخلو تعليق لينا احنا المصريين على الصور من تعليقات "يا موزك يا كندا" ومثل هذا (ولا أبرئ نفسي). طيب دقيقة واحدة. هل الكلام ده صح وطبيعي وهل كنا هنقوله لو ماشيين في مصر وشفنا "موز؟" لو الإجابة آه يبقى اسمحلي احنا ناس مش كويسين، ولو الإجابة لأ يبقى أكيد تأثير المجتمع سمحلنا بتجواز الحدود.

لم أضرب مثل "الموز" إلا للدلالة على التغيير الذي يصيب المهاجرين في كندا، حيث تتغير البيئة والمفاهيم وبالتالي تتغير الحدود والمحظورات. استكمالا لمسألة الأتوبيس أعلاه على الأغلب ستجد المهاجر (ولا أبرئ نفسي) يقول: وفيها ايه ، حرية التعبير مكفولة لكل شخص واللي عايز يقول حاجة يقولها. طبعا كلام جميل كلام معقول بس هل هي دي الطريقة بتاعتنا للحفاظ على الثوابت؟ وإذا كان الواحد اللي شعره شاب ممكن ما يأيتأثرش بالحاجات دي نعمل ايه للأطفال اللي لسه بيتعلموا القرايه؟

استباقا لحجة دور الأسرة في التربية أنا على استعداد للتسليم أن دور الأسرة والأبوين مهم لصد مثل هذه الهجمات، ولكن سؤالي هل المجتمع ليس له دور؟ أو بطريقة أخرى، هل كان الواحد مننا ممكن يبقى عنده نفس الثوابت إن كان نشأ في كندا حتى مع نفس أبويه؟ أشك.، اللهم إلا مع مجهود أسطوري لا يقدر عليه إلا من رحم ربي. وكما يتنوع تأثير هذا المجتمع الجديد على المهاجر يتنوع رد فعل المهاجر له. فنرى من يتقوقع على نفسه، ومنهم من يكون أكثر كندية من الكنديين،و لكن في كلتا الحالتين التأثير قادم لا محالة طال الوقت أو قصر.

وكي لا يساء فهم هذه النقطة فأنا لا أقصد الأمور الدينية أو الاجتماعية فحسب،و لكن ما أقصده بكلمة "التأثير الكندي" يطال جميع نواحي الحياة وجميع أحوال المعيشة اليومية، مثال : ناكل لحمة حلال ولا مناكلش؟ نسأل عن نوع الجبنة ولا منسألش؟ ناخد قرض من البنك ولا مناخدش؟ نودي العيال كامب مع العيال التانية ولا لأ؟ طب نقولهم متاكلوش مارشميلو ولا ياكلو؟

بل الأمر يصبح أكثر خطورة عندما يتم تلقين التلاميذ تلقينا ما هو مناف تماما لما نشأنا وتربينا عليه، عيني عينك يعني، مثل المفاهيم الغربية لتركيب المجتمع والأسرة. إن أبسط حقوق الأبوة هي حق الأب في تنشأة أطفاله على القيم التي يراها هو صحيحة ما لم تخالف القانون. ومربط الفرس هنا هو كلمة "القانون" اللي هو في ايدين صحاب البلد وممكن يغيروه في أي وقت على حسب ما يرون هم صحيحا. ماذا يحدث إن صحونا يوما لنرى قانونا يجرم أن يمنع الأب ابنته من اتخاذ البوي فريند؟ لو تفتكروا إن الموضوع دا واسع شوية أحب أقوللكم إنه أقرب مما تتصورون، فقد كانت هناك نقاشات في برلمانات أوروبية عن هذه المواضيع بالذات. قس على ذلك مناهج التعليم وإعلانات التليفزيون وغير ذلك الكثير.

ولا أزعم أن مثل هذه القرارات والمتاعب غير موجودة للمقيمين بمصر على الإطلاق، ولكني أزعم أن الحمل على كاهل المرء مخفف عشرات المرات إن وجد دعما من المجتمع. فمثل أنه من غير المحتمل أن تسأل عن نوع اللجبنه في مصر بسبب دعم المجتمع، من غير المحتمل كذلك أن تجد نفسك مضطرا للإجابة عن السؤال في أول المداخلة أيضا بسبب دعم المجتمع. ففي رأيي أن خسارة دعم المجتمع هي أول وأهم خسائر الهجرة وأكثرها طولا وتأثيرا

سبحانك اللهم وبحمدك، أشهد ألا إله إلا أنت، أستغفرك وأتوب إليك

[ناوية ع الهجرة]

بعت كل ما املك فى مصر

حجزنا على 22/10/2009

وصلنا كندا

انبسطنا اسبوع

بدات المشاكل و استمرت شهر

استلمنا ال كروت

رجعنا على اول طيارة الى مصر

مفيش بيت

مفيش اسرة

مفيش شغل

نادم على التجربة اللى خربت بيتى

منك لله يا كندا ياللى كنتى السبب فى ضياعى و ضياع اسرة كانت مبسوطة

منك لله يا كندا

منك لله يا كندا

منك لله يا كندا

تسمح لي احضرتك في نقطتين مهمين لازم حضرتك توضحهم قبل ما تقول منك لله ياكندا

اولا حضرتك رحت كندا قعدت فيها شهر وبدات المشاكل اي نوع من المشاكل اللي ظهرت بسرعة كده

حضرتك كنت رايح ومتوقع ان اول ما توصل كندا هتلاقي شغل معلهش هو حضرتك ما قراتش اي حاجة في المنتدى قبل ماتسافر

ثانيا لما ضرتك ما عندكش استعداد تتحمل اي فترة مهما كانت قصيرة بدون عمل وخفت على الفلوس الي معاك ورجعت بسرعة

ليه حضرتك حرقت كل المراكب وراك يعني ليه بعت بيتك وتركت شغلك طالما انت واخد الموضوع تجربة وما عندكش استعداد للصبر او التحمل

انا اسفة اذا كلامي يضايق حضرتك او يكون تدخل في امورك الشخصية

بس ارجوا ان حضرتك توضح لنا هذه الامور عل وعسى يستفيد شخص اخر من تجربة حضرتك

[د هشام ابراهيم]

عبدوس باشا أنا حاسيب حضرتك تكمل الأول قبل ما ابتدي أعلق..... لو سمحت ليا طبعا ....

انما بداية الصورة ديه من انجلترا مش من كندا ...مش معناه إن كندا ما فيهاش لا دينيين و ملحدين ...فيها و فيها كتير كمان و في سبيلهم لنشر اعلانهم الساذج ......هل ده معناه إن الابناء حيتحولوا للالحاد ......أي إيمان هش ده اللي إعلان اوتوبيس حيغيره .....

انما حضرتك عندك حق في نقطة و نقطة مهمة جدا ....اللي شايف في نفسه عدم القدرة علي تربية الابناء بطريقة صحيحة تخليهم قادرين علي مواجهة الاغراءات و الافتراءات و لحظات الضعف يبقى ما يجيش كندا و لا يقعد في مصر و لا يطلع الخليج و لا يعتب اوروبا و لا يفكر في أمريكا و يشيل بقية العالم من قائمة اختياراته و كمان يقطع النت في أي مكان فاضل يروحه :)

الغريب بقي إن التطرف الديني بقي هاجس وسط الجيل التاني من المهاجرين سواء كندا أو أوروبا ....ديه بجد اللي محتاجة تحليل !!

تحياتي يا باشا و ارجو إن حضرتك ما تزعلش مني mfb:

[عبدوس الوزير]

عزيزي الدكتور هشام

الحملة بدأت في لندن ثم انتشرت إلى توروتنو ثم أوتاوا. ولولا خوفي من الإثم لأحلتك على الرابط الكندي للحملة

ولكن إليك رابط عن الحملة في أوتاوا

http://www.transitottawa.ca/2009/02/atheis...tawa-bound.html

http://ottawa.ctv.ca/servlet/an/local/CTVN...?hub=OttawaHome

وأتفق معك تماما في تعليقك عن قدرات الأفراد في التربية, ولكن لتسمح لي أن أقول أن هناك الكثيرون ممن اعتقدوا بقدرتهم على التربية الصحيحة وبعدين اتصدموا بالأمر الواقع.

أرجع وأقول دي هموم شخصية وجايز جدا يكون العيب فيا أنا.

تم تعديل 18 فبراير 2010 بواسطة عبدوس الوزير

[SoSo R]

مساء الخير:

أنا كنت بادور على حضرتك على فكرة mfb:

فيه مداخلة حضرتك كنت كتبتها فى موضوع الخناقة الأخيرة...و عجبتنى جدا

مش فاكراها بس مضمونها إن الأول بنشوف الغلط

بعدين نسكت عنه

بعدين نعتبره مسلمات و حاجة عادية و ممكن نشترك فيه كمان

عجبنى جدا الكلام لأنه ينطبق على مواقف شفتها

سأحتفظ بباقى تعليقى...لاحقا

حتى لا أقاطع مسار الحديث

تحياتى

[د هشام ابراهيم]

سيدي الفاضل الصورة الاولي بتقول England

"The Atheist Bus Campaign kicked off this week in England. In all, 800 buses in London advertised the slogan"

الرابط التاني بيقول انها في تورنتو و كالجاري و أوتاوا بتفكر و هالفاكس رفضتها و الكلام كله انها رد علي حملة أعلانات مسيحية ......

It already has ads on buses in Toronto and Calgary, but was rejected by Halifax's transit authority. It remains to be seen if this could be rejected by OC Transpo officials.

علي العموم ديه نقطة فرعية و في انتظار بقية هموم حضرتك اللي أكيد بتراود ناس كتير مش حضرتك بس

تحياتي يا باشا

[ابنه النيل]

الحقيقه انا انصدمت من الصوره بتاع الباص الي عليه اعلان الالحاد

هيه الامور هتوصل للدرجه دي

ربنا يستر علينا وعلي ولادنا

حاجه تخوف فعلا وتخلي الواحد محتاج اعاده لتقييم الامور

طبعا موضوع الهجره دخل معانا جميعا في طريق اللارجعه

بس هنستقر هناك ولا لا للابد

ده هيبقي السؤال اكيد

لما الواحد يلاقي اعلانات زي دي ليل نهار قدامه

حاجه فعلا تحتاج تفكيييير

[Morial]

سألت نفسي هذا السؤال قبل ان اقدم علي فكرة الهجرة

هل بقائي بمصر كفيل بتنشئة ابني نشأة سويه هذا ان كانت تربيته في كندا خطر مصيري كما يري البعض وخاصة انه في سن خطرة ووجدتني علي منحي اخر اضع نفسي في هذا الموقف التخيلي والوارد

بماذا سأنصح ولدي ان هو اضطر لدخول قسم شرطة لسبب او لاخر وسبه البيه الضابط أو حتي البيه الامين بأمه وابيه هل سأطالبه بالاعتراض او بأن يثور لكرامته ويطلب من البيه بكل ادب ان يحترم نفسه ؟ بالطبع لن اطلب اليه هذا لأنني ببساطة اخاف عليه ولا اتمني ان اراه معلقا من رجليه وبكل حكمة وهدوء ومرارة ايضا سأنصحه بأن يبتلع كرامته وأدميته أمام من هو اقوي منه سلطة حتي وان كانت سلطة بلا حجة وبل حق وقس علي ذلك من هو أكثر منه مالا حتي وان كان علي باطل يعني من الاخر غالط نفسك وفصل مبادئك وقيمك علي حسب الموقف يعني ازدواجية في المعايير اي منافق وكمان شيزوفرينيك واكيد يا ابني في الحالة دي مش هقدر اكلمك عن حاجة اسمها ضمير لأن الطبيعي والمنطقي انك لما تقهر بضم التاء ممن هو اقوي منك حتما ولا بد هتفتري انت كمان علي الاكثر منك ضعفا ومش هقدر اقولك حرام ولا فين ضميرك لأنك لا نبي ولا ملاك mfb:

تم تعديل 18 فبراير 2010 بواسطة منال شوقي

[عنبو]

تسجيل متابعه

[engtaha]

معاك ...ياريت سيادتك تكمل

[Tarek Abdellatif]

وقد ترددت لفترة لعدة أسباب ليس أقلها قلة الوقت أو عدم استرسال الأسلوب، ولكن أهمها في الواقع هو عدم استعداد البعض لسماع وجهة النظر الأخرى في موضوع الهجرة إلى كندا. فمتصفح الانترنت الذي وصل إلى هذه الصفحات على الأغلب قد عزم الأمر على الهجرة، غالبا بعد أن قاسى الأمرين في بلده، ويرى أن كندا هي الحل وليس على استعداد لأن يسمع بغير ذلك. وقد يتطور الأمر للاتهام بأن المتكلم لا يريد الخير للآخرين والرد جاهز دائما "طيب لما الموضوع كده ليه انتا قاعد هناك كل الوقت ده". وهو سؤال وجيه الصراحة وإن كنت لا أنوي الإجابة عليه لأسباب شخصية.

الأخ الفاضل عبدوس ،

إن كان البعض لا يريد سماع ذلك، فإن البعض الأخر على أحر من الجمر لسماعه و السؤال عنه و التفكير فيه و تقييمه و الاستعداد له.

نشكر حضرتك على وقتك و مجهودك.

:ninja:

[Bustami]

كل الاشياء السيئة في كندا والتي ستؤثر على ابنائنا سلبا موجودة في الدول التي نعيش فيها

وكل الاشياء الايجابية في الدول التي نعيش فيها والتي ستؤثر على ابنائنا ايجابا موجودة في كندا

لكن عندي كلمة مهمه

اولادنا سيعتبوا علينا ان لم نأمن لهم ما تأمنه كندا لرعاياها

[أكسيلانس]

ألآخ الفاضل عبدوس

تحيه لسيادتك علي فتح هذا الموضوع - حيث أن كل المواضيع في بابا كندا مشغوله بمارثون الوصول لنقطة النهايه و هي مطار تورونتو -- و لا أحد يكتب عن ما يحدث للمتسابقين بعد ذلك -

و تنطوي صفحة الكفاح للحصول علي لقب مهاجر من تقديم أوراق و أمتحانات لغات و تجهيز مصاريف و محامين الي أخره ,,,,

و الحقيقه الموضوع شديد الشبه بالحمل عند النساء و رغبت كل سيده أن تكون أم و تتحمل عناء التسع شهور -- قئ و ألم وو جع عظم و زيادة وزن و مرمطه مع الدكاتره --- و بعدين هاهاها ولد -- شويه تبدأ تدعي عليه أنت ربنا يخدك زي ما أنت با بتسمعش كلامي

و الشكوي لطوب الارض من قلة أكلهم -- و الشقاوه كسرو البيت كله و بعدين الواد بيحب بنت دعبس الجزماتي و مصر يتجوزها -- شوفة أخرتها و البت مش عاجبها و لا واحد و بعدين ,,, مشاكل مشاكل

بس السؤال هنا بقي --- مين ما بيحبش عياله رغم قرفهم الذي لا ينتهي

و هل لو أخبرت كل أمهات و أباء الارض بكم القرف الي هيشفوه -- هبطلوا خلفه و لا حب ليهم --- ألآجابه لآلآلآلآ

نرجع لموضوعنا -- هذا هو لون الحياه أشياء نتمناها و نعرف كم العناء فيها و نتمناها بشده نتلمس لحظة سعادة بما أخترناه -- الولد نجح- البنت كبرت- - أو الفرح بشئ أيجابي بكندا

لكن أين هي الحياه التي تخلو من المخاطر

أنا مش عارف حضرتك سايب مصر من قد أيه -- لكن ممكن تفرأ الجرائد المصريه علي النت

و تستطيع أن تراقب تغير المجتمع و سلوكه من صفحة الحوادث

مثلا اليوم في جريدة الاهرام -- أخ يقتل أخوه للنزاع علي موبيلللللللللللل

بنت عمرها 15 سنه من الحامول شرقيه تحمل سفاحا من ممارسة الجنس برضاها من خمسة شباب في القريه و البلاغ لتحديد أب للجنين

أم تقتل رضيعها للزواج من رجل أخر

و من فتره ليست قصيره -- قضية عبدة الشياطين و تجمعاتهم بقصر البارون -- قدام بيت الريس

و خفلات الشواذ علي المراكب النيليليه علي كورنيش القاهره - و حفلات لزواجهم

لا يوجد مجتمع مثالي حتي بالسعوديه التي عشت فيها فتره

كان أخطر ما يشغل الاسر المصريه علي أطفالها هو أعتصاب الاولاد الذكور من السعودين و هناك قضايا معروفه

و مع ذلك معرفة ما تعانيه من هموم اليوم هو همومنا نحن غدا و كلنا أذانا صاغيه -- و لكني أحببت أن أهون عليك من أن ما أنت فيه علي مسافة 6000 ميل نحن و الكثيرين فيه رغم وجود المجتمع الداعم و الاسره العربيه بتقاليدها

و أسف علي ألاطاله

[qenawy]

الحرية تستحق الشراء اينما وجدت وفي بلاد ، عندما تكون الحرية واحترام الانسان غير موجودة فاهلا بمصاعب ومتاعب كندا ويكفي فقط ان تشعر انك انسان ومع احترامي للمعاناة التي قد يعانيها اي شخص في الغربة و

[nobel]

الاخ عبدوس

انا مبسوط جدا ان حضرتك فتحت التوبك ده و اتمنى انه يفيد كل الناس

على فكرة انا مهتم جدا انى اعرف كل مشاكل و مساوىء كندا مع انى مقدم هجرة لكندا و هاسافر بأذن الله

بس انا عندى تجربة شخصية تخلينى اخد بالى كويس

انا كنت عايش كويس جدا فى مصر و جالى عرض انى اجى الخليج و لما سألت كل الى اعرفهم ساكنين هنا ( فى الخليج )

كلهم قالولى شعر و ماحدش جاب سيرة اى سلبيات خالص

و لما جيت انا و زوجتى اتفاجئت بوضع مايناسبناش ( شخصيا ) و انا قولت كدة لأن وارد انه يناسب ناس تانية كتير

لان فى فروق فردية بين كل شخص و التانى و كل واحد لازم يسأل نفسه هو عايز ايه

عن نفسى انا و زوجتى مش مهتمين بموضوع الفلوس بس نفسنا فى بلد فى مواصافات

انه يعاملنا بأحترام . يحترم خصوصيتنا . مانبقاش قلقانين لو حصل حاجة serious فى حياتنا و ده كله او معظمه موجود فى كندا

بس ده مايمنعش اننا نعرف كل السلبيات عشان نستعد كويس لان اكيد مفيش غير جنة واحدة و هى اكيد مش كندا بس هى المكان الارضى المناسب لظروفنا

ملحوظة :- على فكرة بعد ما وصلنا الخليج كل الناس ابتدت تقولنا الى مقلوهوش قبل ما نيجى و نسيب شغلنا فى مصر و كل حجتهم اننا كان ممكن نفهمهم غلط :lol: :lol: مع انى انا شايف ان دى مش امانه . و انا لما واحد صاحبى شألنى يجى ولا لا قولتلوا كل حاجة السلبيات و الايجابيات و سيبتوا هوا يقرر على حسب هو عايز ايه من الدنيا .

متابع بشغف كبير لحضرتك .

و شكرا مرة تانية :lol: :lol: