هموم مهاجر

[عبير يونس]

الحقيقة يا أخي الفاضل أنا لازلت على البر

و لكن أتمنى الهجرة لكندا

ليس عشقا لكندا ولا كرها لمصر

و لكن كالكثيرين مثلي للحصول على حياة أفضل لأبنائي

و طبعا لاسترداد آدميتي المفقودة

و حرصا على أن أحافظ على آدمية أولادي قبل أن تذبح

الحياة مليئة بالسلبيات

والساذج فقط من يتخيل أن هناك مكان على وجه الأرض يخلو منها

حضرتك أبرزت نقاط في غاية الأهمية

مثل التربية والدين والحياة الإجتماعية

و لكن ما شد انتباهي حقا هو الحركة السياسية وعزوف العرب عموما والمصريين خصوصا عن المشاركة الايجابية فيها!!!

و السؤال هل المشكلة هي عزوف المصريين عن المشاركة برغبتهم

أم أنهم غير مرحب بهم فيها؟؟؟

"

يعني المهاجر المصري لا يشارك على طريقة "آي دونت كير

و الا أصلا يوجد من يحبط محاولاته و يحارب وجوده على الساحة السياسية؟؟؟

أم هو الخوف الراسخ في نفوسنا بدء من جنود فرعون و مرورا بالبوليس السياسي وانتهاءا بأمن الدولة؟؟؟!!!

أصل أنا نفسي جدا لو ربنا سبحانه وتعالى أراد لي الذهاب لكندا أن أشارك في الحياة السياسية و أن أمارس حقوق المواطنة التي لم أذقها من قبل

حيث نشأت في الغربة و لازلت أتجرعها حتى هذه اللحظة

بغض النظر عن عشقي لمصر الوطن

و للشخصية المصرية و تفردها

لازلت أحلم أنا أكون مواطن يوما ما

و كما قيل عن مصر

مصر مش مكان بنعيش فيه... مصر وطن يحيا بداخلناو نحمله معنا في كل مكان

تحياتي

:)

[nobel]

أستاذ عبدوس انا بجد بحترم رؤيتك لسلبيتنا احنا المصريين فى المشاركة و التعبير عن رأينا

بس انا مؤمن تماما بأن ده بسبب رواسب عندنا فى طريقة المنشأ بتاعتنا

انا عايش فى الخليج و دايما بشوف ان المصريين معندهومش اى نوع بالتواصل و كلنا عندنا خوف دفين من حاجات معينة الحكومة . الشرطة . التعبير عن رأيك فى الحياة السياسية و الثقافية و انا ايام ما كنت فى الكلية كنت سألت اصحابى مرة احنا ليه ماروحناش انتخبنا ولا عبرنا عن رأينا . عارف كان ردهم ايه ؟؟؟؟

ياعم انت فايق و رايق الى بينتخبوا دول حاجة من الاتنين الاول فاضى مش لاقى حاجة يعملها و قال يضيع وقت و التانى انه لابس نضارة كعب كوباية و قافل الزرار الاول فى القميص و ماشى بكتابين عمره ما قراهم . يا عم طنش و يلا نخرج

دى طريقة رؤية المصريين للحياة السياسية و الثقافية . و الغريب انى هنا باشوف اللبنانين و الفلسطنيين بيتعاملوا بمنتهى الحرية و بيعبروا عن رأيهم فى السياسة و معندهومش الخوف الى عندنا و بيعبروا عن رأيهم بالى يخدم مصالحهم و دول عندهم مشاكل فى بلادهم اكتر مننا بكتير .

كل الى بتمناه انى اقدر اهاجر و اخلى ولادى يتربوا كويس و يعبروا عن رأيهم فى كل حاجة بمنتهى الحرية و الاحترام . يحترموا الناس و كل الناس تحترمهم

عندى سؤال صغير فى الاخر ؟

حضرتك كنت يتسأل عن الحياة السياسية فى كندا . كام واحد مننا بينتمى لحزب سياسى فى مصر غير الوطنى طبعا ( علشان مصالحه تمشى طبعا ) انا بسأل عن انتماء سياسى عن فناعة زى مابنشوف برة؟

انا اختى فى امريكا هى جمهورية و اولادها و جوزها ديمقراطيون .

على فكرة لا انا ولا والدى و لا زوجتى عندنا بطاقة انتخابية . :sad: :) :ninja:

[Tarek Abdellatif]

أستاذ عبدوس انا بجد بحترم رؤيتك لسلبيتنا احنا المصريين فى المشاركة و التعبير عن رأينا

بس انا مؤمن تماما بأن ده بسبب رواسب عندنا فى طريقة المنشأ بتاعتنا

انا عايش فى الخليج و دايما بشوف ان المصريين معندهومش اى نوع بالتواصل و كلنا عندنا خوف دفين من حاجات معينة الحكومة . الشرطة . التعبير عن رأيك فى الحياة السياسية و الثقافية

أنا متفق تماماً مع الكلام ده، و أعتقد أن دي مشكلة ثقافة في مصر، و شايف بردو إن المشكلة ديه مكنتش موجودة أيام مصر الملكية، على الأقل بالصورة إلي موجودة دلوقتي.

يعني بردو ممكن الثقافة ديه تتغير و يرجع الشعب المصري (و شباب الجامعة) يكون ليهم رأي و توجه سياسي يدافعوا عنه و يناضلوا من أجله.

بالنسبة للمهاجرين أعتقد إن دي فرصة جيدة إن الإنسان يبدأ يكون له تأثير و دور في هذا الأمر حيث الحرية و المناخ السياسي المناسب.

[magedghonim]

اختي في الله منال

انا مش بثبط حد والله

ويريت حضترك بس تحاولي تقرأي المداخلات كويس قبل متنقديها مش هتخسري حاجة

والا كل نقاش هاديء هيتحول لسجال مابين ردود احنا في غنى عنها

ثانيا واسميحيلي بالاطالة

لما كلنا نقرا وانتي مننا قصة اخونا الي راح قعد شهر ورجع دة وبيدعي على كندا

اكيد هنحس بتقصير على الاقل من جانب ناس معينة مننا...

يبقى لازم الأمور تبقى واضحة

الي عايز يروح يعادل يتفضل كندا فاتحة دراعتاه بس يبقى عارف ايه الي مستنيه

والي عايز يعيش بكرامة هناك حتى لو معرفش يعادل ويشتغل كجوال مدى الحياة برضه يتفضل

دة هو نصحي لله ..........اننا نبين الوضع ونسال ونعرف مش نحلم وبس....

وبعدين حتة وصية الانبياء وطلب العلم والكلام دة معلش صديقني (أوفر حبتين)

لاننا لو اتكلمنا من منظور ديني بحت ودة انا مش عايز اخوض فيه لان هنا مش مجاله بس اعتقد انه هيبقى الرأي مغاير

فبلاش ندخل المواضيع في بعض وفي الاخر نتمسح في الدين

يعني واسمحيلي انتي مش رايحة لخدمة الدين انتي رايحة ودة من مداخلتك لظروف احسن لطفلك

وبالتوفيق .......

تم تعديل 20 فبراير 2010 بواسطة magedghonim

[د هشام ابراهيم]

د. هشام،

أوافق حضرتك الرأي تماماً في موضوع ال-100% و ال-200%.

يعني أعتقد أن تطبيق المبادئ و الدين و المثل....إلخ يعتمد على العاملين معاً - المجهود المبذول من قبل الإنسان و المقاومة (أو الدعم) من قبل المجتمع.

يعني في الشرق هناك بعض الأخلاقيات أو المثل اللي بيكون تطبيقها أسهل من تطبيقها في الغرب بسبب دعم المجتمع، و أيضاً هناك بعض الأخلاقيات أو المثل اللي بيكون تطبيقها أصعب من تطبيقها في الغرب بسبب مقاومة المجتمع و كذلك الأمر في الغرب.

و أعتقد أيضاً إن ده اللي الأخ عبدوس كان بيحاول يوضحه في فكرة دعم المجتمع - إن ده عامل من أهم العوامل التي يجب إعتبارها و ليس بالطبع العامل الوحيد، أو هذا ما فهمت من مداخلاته السابقة على الأقل.

تقبلوا تحياتي على الحوار الهادئ الراقي. :wub:

و شكراً.

:wub:

ما فيش خلاف إن تربية الأطفال في الغرب لازم تختلف عن تربيتهم في الشرق ...ربما كيفا أكثر منه كما .......انما بالمثل الأحساس الزائف إن تربية الأطفال في الشرق اسهل و إن الدنيا أمان و مش لازم الاهتمام ١٠٠ ٪ ده مصيبة كبري .....حاوضح أكتر في ردي علي باشمهندس ياسر

تحياتي و تقديري يا سيدي الفاضل

ردك جميل يا دوك .. و دائما بتعجبني طريقة تفكيرك

انما تسمحيلي اعقب ف كام جملة ..

مش هنكر اطلاقا ان افاد الجيل التاني ممكن يطلع منهم ائمة يهدون بأمر الله ... لكن ببساطة تامة تعالي نشوف النسبة

مسألة ان الله يراقبنا .. مسألة تتعلق بالتوحيد علي اطلاقه

فلو الاب و الام عرفوا يزرعوا ده ف الاولاد .. يبقي الحياة هتتظبط .. لكن تعالي نبص سوا من منظور قريب شوية للواقع

انا راجل اتربيت ع التوحيد بنقاءه و مكارم الاخلاق و معايا مجموعه من زمايلي بنفس الوضع

رحنا سوا دولة ما و الدنيا هناك اوبن ع الاخر

فينا اللي سقط ف الامتحان الجميل ده و خرب الدنيا بكل ما تحمله الكلمة من معني

س سؤال : ايه اللي قرب المسافة اوي كده عليه غير البيئة؟

انا فاهم تماما ان اللي عاوز يعمل حاجة بيعملها ف اي مكان ف العالم

لكن البيئة بتلعب دور كبير اوي

اخدت فترة مكنتش اتخيل اني ممكن اقعد ف ماكن فيه خمر

و بعدها اخدت فترة مبقتش بقعد ف مكان الا و الخمر فيه .. باستثناء غرفتي الصغيرة

و بعدها بقي الموضوع بالنسبالي عادي جدا .. فيه زي مافيش ... المهم اني انا مبشربش و خلاص

س : يا تري قلبي ف كل الحالات زي بعض...؟؟

مفتكرش خالص

س : هل مستوي الايمان ف القلب يتأثر او ميتأثرش .. ببيئة المعاصي المحيطة؟؟؟

انا بدور حوالين نقطة معينة و ان مكنتش عارف اوضحها اوي...

اعذر عدم تركيزي

فاهم قصد حضرتك تماما يا باشمهندس و مقتنع باغلبه بس شايف إن الصورة أكبر شوية ...... في الغرب ممكن نعتبر إن الشذوذ مثلا و العلاقات خارج تعريف الزواج الديني أو التقليدي ( ما قلتش زنا لان الموضوع ده محتاج كلام كتير مش مجاله هنا ) كبائر يغض المجتمع الطرف عنها بصورة كبيرة .......مقابل كبائر تعتبر جرائم لا يسلم الشرف الرفيع منها .....الكذب ..الفساد ...الرشوة لاحظ انهم كلهم كبائر برضه (يمين غموس ...شهادة زور ...رشوة ..إلخ )

الشرق مش حاقول العكس انما أكيد رد فعل المجتمع قصاد الكبائر اللي ليها علاقة بالجنس غير رد فعل نفس المجتمع ضد بقية الكبائر مع إن الكل حرام في الآخر و كلهم كبائر

مش باقول برضه إن الغرب ما فيهوش فساد و كذب و لا إن الشرق ما فيهوش زنا و شذوذ ....... كل مجتمع فيه كل البلاوي بنسب مختلفة

المجتمعين غلط ...مش باقول إن دول صح و دول غلط ...الاتنين غلط ....الكبائر كلها حرام و تستاهل نفس رد الفعل و تستاهل اننا نحمي ولادنا منهم كلهم و بنفس القدر ....الخمر قصادها الحشيش و الشذوذ قصاده الرشوة و الزنا قصاده الفساد .....فيه كبيرة أكبر من التانية ؟

تحياتي و تقديري يا باشمهندس و شاكر لحضرتك المشاركة و كلامك الطيب في حق شخصي الضعيف

[Morial]

أ

الموضوع انا شايف انه بسيط وبيبدأ من المهنة والحالة المادية:

يعني لو مهنتك ريجوليتيد يبقى سكة معادلة طويلة ومملة

وغالبا لحد كبير شبه مستحيلة

لازم تعمل حسايك على كدة

طب هل عندك استعداد تشتغل الشغل( الكجوال ) هناك للابد

والاحساس بالحرية والكرامة هيغطي تعبك ومرمطتك يبقى شيء رائع وتمام.....

مش اي حد يقدر يستحمل شغل مرمطة 3 او 4 سنين لحد مايعادل شهادته؟؟؟

او حتى يدرس من جديد ....؟؟

كمان الشغل قليل يبقى اعتقد الي يكون رايح هناك لازم يكون معاه قرشين حلويين

والا هيلاقي نفسه رقص على السلم....

فعلا يريت خبراء الهجرة ينصوحونا بخطط بديلة وتكون سهلة وعملية

لان الرؤية مش واضحة ابداااا

واسف على الاطالة.

أستاذ ماجد ميرسي علي ردك المتحضر لكن وخليني ابين لحضرتك وجهة نظري لما حضرتك تتكلم بصيغة التعميم وكأن اللي بتقوله من المسلمات اللي مفيهاش نقاش وكمان يكون الاراء اللي حضرتك متبنيها كلها نيجاتيف وسوداوية فأسمحلي

لما حضرتك تقول اللي مهنته ريجوليتد مش هيستحمل يعادل شهادته في 3 او 4 سنين منين حضرتك حكمت علي الغير انه مش هيستحمل وانها حاجة شبه مستحيلة؟ مع العلم ان من بين اعضاء المنتدي ناس ماشاء الله يشرفوا وخلصوا معادلتهم في سنتين اللي هي الفترة المتعارف عليها ومش عارفة حضرتك جبت منين انها بتستغرق 3 او 4 سنين لكن انا ممكن اتقبل رأيك واعتبره شخصي أذا قلت أنا مقدرش استحمل اني ادرس تاني كمان 3 او 4 سنين لكن كلام حضرتك صدقني ممكن يسبب لغيرك شعور بالأحباط وفقدان للأمل وتثبيط للعزيمة وأكيد حضرتك مأخدتش بالك لكن صدقني وقع كلامك عليا انا شخصيا كان كدة وبعدين دة حتي حضرتك مسبتش اي بارقة امل فأذا كان الحال كدة لصاحب المهنة المطلوبة فما بالك بوقع كلامك علي غيره من اصحاب المهن الغير مطلوبة لاء ومش كدة وبس دة انت قفلت الباب بالضبة والمفتاح يعني حتي الشغل الكاجوال مفيش لأنك قلت أن الشغل هناك قليل مع ان دة عكس اللي انا قريته من ان كندا بها اقل معدل بطالة في العالم والمعدل في كيبك مثلا 8% ومعظمهم من اللي مش عايزين يشتغلوا اصلا بمزاجهم وعايشين علي اعانة البطالة وبعدين كون كندا مناسبة للي معاه قرشين حلوين دي بصراحة انا مش عارفة اعقلها ولا افهمها

ثم انا فعلا مش عارفة حضرتك عايش فين بالظبط في مصر وللا في كندا ؟ علشان اقدر اصنف وجهة نظرك ودوافعها

وبالنسبة لدوافعي في الهجرة فحضرتك خمنت سبب واحد من مليون سبب اللي علي رأسهم وأهمهم أني اخرج من مصر للأبد وربنا قادر

تم تعديل 20 فبراير 2010 بواسطة منال شوقي

[عبدوس الوزير]

أشكر لكم مداخلاتكم واسمحوا لي بالتعقيب

بخصوص عزوف المصريين عن المشاركة السياسية، المشكلة هي أن المعيشة السهلة ليست هي هدف بعض المهاجرين فحسب ولكنها هدفهم الأوحد والأسمى، بمعنى إنه إذا تحقق يبقى خلاص الحمد لله على كده. ودي بالذات مشكلة مضايقاني جدا في شخصية بعض المهاجرين المصريين ـ مثلما يتضايق البعض الآخر من سلوك المهاجرين اللي همهم الباسبور فقط أتضايق أنا من سلوك المهاجرين اللي هدفهم المعيشة الشخصية السهلة وخلاص. ببساطة لإن بفرض تحقق المعشية السهلة بقت معيشة سهلة بلا هدف

بخصوص التربية السليمة للأطفال ورأي الدكتور هشام إنه كبائر الأخلاق وقول الزور زيها زي كبائر الزنا والمجتمع الغربي، طبعا كلام سليم تماما. بس من واقع خبرتي الطفل ما بيتعرضش في مصر لمشاكل الأخلاق وقول الزور ودي حاجات مش بتتطلع غالبا إلا بعد سن الرشد، بمعنى احنا امتى اشتكينا قبل كده عن طفل مرتشي أو طفل مزور؟ على الجانب الآخر تلاقي إن التحديات اللي بتواجه الأطفال هنا تبدأ من الابتدائي (حيث احتمال كبير جدا يبقى طفلك معاه في الفصل طفل آخر له أبان أو أمان يعنيى 2 أب أو 2 أم) ثم الإعدادي حيث يتم تلقين الأطفال سواء مباشرة أو غير مباشرة إن ده عادي أصلا، ثم في ثانوي حيث يتفجر الشباب بالحيوية والهرمونات، ثم في الجامعة حيث توجد الخمارات جوه الحرم الجامعي يعني بدل ما نذاكر على سندوتشات جبنة من عند عم محمود ممكن نذاكر على كام كوباية بيرة من عند جو.

طيب ليه أحط الطفل الناشئ تحت كل الضغط النفسي ده؟ حتى بفرض انه هيطلع سليم في الآخر ؟

زي ما قلتلكم في حدود معارفي الشخصية المحدودة الحمد لله الجيل التاني كويسين وملتزمين. ولكن هل انتا على استعداد في يوم إن بنتك ترجعلك من المدرسة بتعيط علشان البنات التانية بيشكو فيها علشان هيا مش مصاحبة؟ ليه احنا مش مقدرين الحمل النفسي على الأطفال لما نقوللهم كل يوم وهما رايحين المدرسة " ما تعملوش زي الناس التانيين احنا لينا طبع وهما ليهم طبع؟" مش يمكن ده يؤدي إلى نتيجة عكسية ويطلعوا متشددين؟

وعموما أنا ماكنتش عايز موضوع الأولاد ده ياخد أكتر من حقه في النقاش فقد طرحت للنقاش نقط أخرى عديدة. لإن موضوع الهوية ده أكبر بكتير جدا من مشكلة تربية الأولاد وبس

[hiema]

ثم في الجامعة حيث توجد الخمارات جوه الحرم الجامعي يعني بدل ما نذاكر على سندوتشات جبنة من عند عم محمود ممكن نذاكر على كام كوباية بيرة من عند جو.

استاذي الفاضل عبدوس الوزير

بالرغم من اتفاقي مع حضرتك في الكثير من ما تطرحه من هموم المهاجرين و لكن اسمح لي اعقب علي جملة حضرتك اعلاه

انا عشت في امريكا 3 سنين كاملة في مدينة New Haven بولاية Connecticut و المدينة دي شهيرة جدا لوجود جامعة Yale بها بجانب جامعات University of New Haven and Southern Connecticut State University

و للامانة استاذي الفاضل عمري ما شفت داخل اي حرم جامعي وجود لاي خمارات بل علي العكس ممنوع دخول الخمور في اماكن اقامة الطلبة Dorms و الحرم الجامعي , و انا يا سيدي الفاضل انقل لحضرتك هذه المعلومة عن يقين حيث كان عملي يحتم علي الدخول في كل الابنية التابعة لتلك الجامعات في مختلف الاوقات و لم اصادف ابدا هذا المشهد.

و لكن .......

المشكلة انه اينما وجدت جامعة لازم تلاقي حواليها في المناطق المحيطة الكثير من الNight Clubs , pups , and lounges بجانب مختلف انواع المطاعم و liquor stores يعني كله متوفر بردو و عادة الشباب بيتجمع في نهاية الاسبوع في البيوت المستأجرة بواسطة الطلبة و and party all night long و بيبقوا فعلا في حالة تقرف في نهاية الليلة....

استاذي الفاضل اسف للاطالة و اكرر اعجابي الشديد بمحتوي الموضوع :wub:

[د هشام ابراهيم]

عبدوس باشا احتراما لرغبة حضرتك حانتقل من نقطة تربية الولاد لنقطة مهمة أخري حضرتك ذكرتها سابقا ...المشاركة السياسية .....أنا متفق مع حضرتك في المجمل ما عدا الجزء ده

وإمعانا في إثبات الولاء يستخدم العرب والمسلمون خط الدفاع الأول والأخير وهو جلد الدات على طريقة احنا اللي وحشين. منك لله يا بن لادن. منكم لله يا قاعدة. خلينا جنب الحيط أحسن، مش زي السيخ اللي عاملين عاملة منيلة ومع ذلك لهم شنة ورنة.

مع حضرتك تماما إن سلبية العرب و المسلمين في المشاركة في الحياة السياسية عامل هدام و خطير و لا يقل عن أي من المظاهر السلبية الأخري و أصارحك القول تماما اني فاقد الامل في أي تغيير يحصل للموقف ده علي المدي القصير ...ربما يمكن الامل في الأجيال القادمة اللي حتتربي بطريقة مختلفة انما الاجيال القديمة أنا مش متوقع منها أي تغيير جذري بخصوص المشاركة السياسية

أنا لسه ما حصلتش علي الجنسية انما عارف حانتخب مين لما تيجي باذن الله و ناوي اشارك في الحياة السياسية المحروم منها طول عمري ........ وجود لوبي إسلامي أو عربي يبدو حلم بعيد عن المنال في الوقت الحالي انما حاعمل بمدأ ابدء بنفسك أولا

مش بس السيخ اللي بيفلتوا بعد مصيبة عملوها .... مفيش جماعة دينيية أو اثنية أو عرقية إلا و وراهم مصيبة .....تاريخ بني بشر مخزي تماما ......الجماعات ديه فيه اللي عندهم ثقل سياسي و فيه اللي واصلين لدوائر السلطة و اتخاذ القرار و فيه اللي بيركزوا علي الاعلام مقروء و مرئي و مسموع و فيه اللي ما عندهمش أي وسيلة دفع ...ده احنا للاسف الشديد ...لا فيه ثقل سياسي و لا صوت انتخابي مؤثر و لا واصلين لدوائر السلطة و لا الأعلام ...... ما لناش حماية من أي نوع ....... الجماعات التانية ما عندهمش شخصيات من فصيلة بن لادن و الظواهري كل شوية يطلعوا بتسجيل حنحرق الغرب حنقتل الكل ...يا كفرة يا فجرة ياللي دمائكم حلال .....و لو فيه مش باينين زي المخفيين دول ..... كمان ما فيش زعامات دينية سيخية مثلا عايشة داخل الغرب و ترفل في نعيم المعيشة و بتتكلم بنفس الخطاب الديني بتاع القاعدة و طالبان و ما شابههم

لما تبقى سعادتك عارف إن جماعتك الدينيية أو العرقية ملهاش ضهر يحميها و كل شوية يطلع فسل يقوم الدنيا و ما يقعدهاش علي دينك و علي أصلك و عرقك و بالمرة يذكر الجميع إن الاسلام دين دموي و دين متطرف كاره للغير و رافض لكل ما هو غربي حسنه و سيئه .... تملك إيه حضرتك إلا الحسبنة علي اللي اسائوا لدينك و ليك كل يوم و لا تملك امامهم شيئا ....الجماعات و المنظمات الاسلامية العاملة في الغرب محطوطة دايما انها إما متعاطفة مع التطرف أو علي الأقل موافقة علي خطابه و فكره و ده بقي إتهام جاهز للمسلمين كلهم ...اذا كان المسلمين مش كلهم متطرفين و فيهم معتدلين ما بنسمعش ليه صوت معارض للجماعات المتطرفة ......السكوت حيبقى موافقة علي النموذج المشوه للاسلام اللي الجماعات ديه بتقدمه

انتهز الفرصة ديه علشان أقول حسبي الله و نعم الوكيل في المتطرفين اللي خطفوا ديننا بتخلفهم و رجعيتهم و خلوا دين عظيم زي الاسلام صورته مشوهة عند الجميع

[عبدوس الوزير]

عزيزي الأستاذ هيما

أحب أقول لحضرتك إني أتكلم من واقع خبرة شخصية ومش بفتكس أي حاجة في أي مثال حطيته.

وأحيل حضرتك لهذه الروابط في تورونتو وكينجستون وأوتاوا

http://www.gsu.utoronto.ca/pubcafe.html

http://qnc.queensu.ca/Encyclopedia/q.html#QueensVol2

http://en.wikipedia.org/wiki/Carleton_University#Oliver.27s

وأخيرا أحب إننا نفترض في بعضنا إن احنا بنتكلم عن علم علشان نعرف نتناقش في أساس الموضوع. وشكرا

[hiema]

عزيزي الاستاذ عبدوس

شكرا لتحميلك الروابط , و لكن انا مقولتش ان حضرتك بتفتكس حاجة . كل الموضوع انه انا كان لي تعقيب عن خبرة شخصية انا مرت بها و حبيت اضيفها للمشاركة و هي كما ذكرت حضرتك عن علم

اما بخصوص الروابط فانا شايف انها عبارة عن pubs and cafe's يديرها و ينظمها الطلبة في حدود محيط الجامعة و لكن ليس بداخل الحرم الجامعي نفسه و ليس بداخل ال dorms . و اعتقد ان ده بيتفق تماما مع المعلومة التي كبتها في الجزء التاني من مشاركتي

و علي العموم يا فندم وعدا مني بعدم المقاطعة مرة اخري حتي لا تظن بي اني اتهم حضرتك بالافتكاس

و مرة اخري اؤكد علي اعجابي بمحتوي الموضوع و تسجيلي للمتابعة :wub:

[bent misr]

بصراحه الموضوع رائع و بجد كان نفسنا فيه من زمان

احنا هنا مش بنتكلم عن سلبيات كندا

لأ يا جماعه الي بيتقال هنا دي حقائق و تجارب ناس

عايشه هناك بجد و اسلوب الحوار راقي و رائع و ياريت يفضل كده

شكرا لك يا أخ عبدوس الوزير ( مع ان اسمك غريب جدا )

و اهم حاجه في الموضوع ده هوه المحاورات الراقيه و الهادفه

لل د/ هشام و م / ايهاب سالم و رودودهم على الاخ / عبدوس

لان هذا النقاش بجد فيه المفيد

و بالنسبه لي كان الاهم من كيفيه العمل و معادله الشهادات

و كسب الرزق هو تربيه اولادنا في هذه البيئه الغريبه تماما عنا

متابعه

[د هشام ابراهيم]

الخمر من المهلكات اللي موجودة في بلاد الغرب و فعلا متغلغة في المجتمع ..... ما كرهتش في حياتي الخمر و تأثيرها قد ما كرهتها و أنا شغال في طوارئ و استقبال حوادث صني بروك .....مأسي انسانية السبب فيها الخمر و المخدرات ....الشيء بالشيء يذكر ما كنتش متصور إنتشار المغيبات في مصر بالشكل ده لحد سنة الأمتياز في القصر العيني و راوند الاستقبال و الطواريء برضه ....الكلام ده من ١٥ سنة تقريبا ...يا تري الدنيا بقيت شكلها إيه دلوقتي

[ناوية ع الهجرة]

ـ المصريون ومفهوم المواطنة ـ

أفضل تقديم لمداخلتي اليوم هو انتهاء المداخلة السابقة وهي ملاحظة أن المصريين هم أول من يلتمسون العذر للحكومة والسلطة على عكس الكنديين. يعني ستجد المهاجر المصري يشكر لك في الحكومة وفي المعيشة وفي التأمين الصحي وفي كل شيئ ويبوس ايده وش وضهر بينما ستجد الكندي الذي يعيش في نفس المستوى ويعمل في نفس العمل ساخطا على الحكومة والسلطات والتأمين الصحي. ويدفعني هذا للتساؤل، اشمعنى؟ هل علشان احنا طيبين ومعدنا أصيل؟ ولا علشان احنا فاهمين معنى المواطنة في كندا غلط؟

لا ، اقول لحضرتك ان السبب ان احنا برضه بنقارنها ببلادنا فطبعا بتكون كفة كندا هي الرابحة

علشان كده بيبوس ايده وش وضهر ويحمد ربنا على اللي هو فيه

بينما لا تأبه الأحزاب عادة والحزب المحافظ الحاكم خاصة بأصوات المسلمين عامة والمصريين خاصة، ببساطة لأنهم عارفين انهم مش بينتخبوا ومش فارقة معاهم.

.

متوقع طالما ان العرب لا يشاركون ولا يعترضون فمن سيهتم بهم

ولو تلاحظون هذه هي نفس المشكلة في الحياة السياسية في مصر وهي العزوف عن المشاركة والانشغال بمصاعب الحياة اليومية.

للاسف يا سيدي ارى ان سبب ذلك عاملان اساسيان

الاول ان حكوماتنا عودتنا اننا نجري ورا لقمة العيش والتعليم ومحاولة توفير الحياة الكريمة لنفسنا ولاولادنا ونجحت فعلا في ذلك

لذا اصبح الوضع الطبيعي ان ايا كان اللي بيحصل طالما انه لا يمسني وانا عايش كويس خلاص

ده غير ان الشخص اللي هاجر عمل كده هروبا من ضغوط الحياة في مصر وما صدق يعيش حياة كريمة كما يتمنى فمش عايز يدخل نفسه في مشاكل

والثاني ان احنا تربيناا كعرب على الخنوع والرضا بقليلنا والاقتناع التام بالغش والتزوير والواسطة من اصغر شئ ولوكانت

انتخابات جامعية يعني مثلا مين بيهتم بموضوع الانتخابات والحياة السياسية في مصر

علشان دي تكون اهتماماته في كندا

انا طبعا لا ادافع عنهم ولا ادافع عن طريقة الحياة السلبية

وايضا لا اتعمد ذكر عيوب مصر حتى لا تتهمني بأني بقارن بين مصر وكندا

انا لااقارن بس لازم نعرف احنا بنهاجر ليه والمفروض اننا نحاول نصلح الحاجات دي بعد مانهاجر ونعلم لاولادنا كيفية الدفاع عن حقوقهم

ولك جزيل الشكر على الموضوع الرائع

[عبدوس الوزير]

عزيزي الأستاذ هيما

أنا كنت طالب في الجامعة لمدة خمس سنوات. يا ريت حضرتك تصدقني لما أقولك إن ال pub جوة الجامعة في مبنى اتحاد الطلبة ولا يفصلها عن الكلاس روم اللي كنت باخد فيها الكورس إلا ممر. وبتفتح الساعة 9 وبتبدأ في تقديم الكحوليات من الساعة 11 ويعتبرها الطلاب "مكان هادئ للمذاكرة"

أنا مش عارف الحقيقة أقوللك ايه أكتر من كده بس بصراحة انا مش فاهم ليه حضرتك بتفترض فيا إني مش فاهم أنا بقول ايه مع العلم إني قلت لسيادتك إني بتكلم عن تجربة شخصية.

[عبدوس الوزير]

عزيزي الدكتور هشام

أنا موافق حضرتك إن الخمر والمغيبات مالية مصر تماما. بس أرجع وأقول الفرق هو ما اسميناه دعم المجتمع. يعني اللي بيعمل كده في مصر بيعمله وهو عارف إنه غلطان وفي الأغلب ما يعرفش يعمله في العلن. إنما تأكد إنه لما كافيتريا جامعة القاهرة تقدم بيرة ونبيذ هيكون اليوم اللي أنفصل فيه عن مصر تماما.

[د هشام ابراهيم]

عفوا يا سيدي الفاضل لم أقصد هذا تماما و لو اني لما قريت مشاركتي حسيت انها فعلا بتقول كده..... أنا أسف .....الخمر من البلاوي اللي الغرب بيعاني منها و الوضع في مصر بالنسبة للنقطة ديه بالذات لا يقارن بالوضع في الغرب ....أنا جمعت ما بين التجربتين لموقفي الكاره الشديد التطرف في كرهه لمغيبات العقل بجميع انواعها و لم أقصد بالمداخلة اطلاقا المقارنة ما بين نسبة انتشار الخمر في دول الغرب و منها كندا و نسبة انتشار المخدرات في مصر و أو الشرق عموما

تحياتي يا سيدي الفاضل

[عبدوس الوزير]

يا أخوانا حتى لا يساء فهمي في موضوع التربية. أنا مش بقول إن الولاد في كندا بتبوظ بل على العكس أنا أكاد لا أعرف نماذج لشباب مصري بايظ فيمن أعرفهم، وهناك نماذج لامعة لشباب زي الفل. أنا بتكلم عن همومي الشخصية زي ما أي حد بيتكلم عن همومه الشخصية في مصر. كل اللي أنا بقوله إني مشفق على الضغط العصبي الرهيب في التربية سواء على الأولاد أو الآباء. وذلك ردا على الرأي المتكرر في هذا الباب إنو الواحد هيروح كندا وولاده هيتعلموا أحسن تعليم ويعيشوا أحسن عيشة.

[goodfaith]

أحد الضغوطات الرهيبة اللي بيتعرض لها الاولاد في المدارس كمان بتكون صيام رمضان وحواليهم الكل فاطرين

عندي صديقتي كانت بتروح تاخد اولادها من المدرسة وقت اللانش عشان ميقعدوش وسط الولاد اللي بياكلوا ويتأثروا ونفساتهم تتعب هو يمكن الموضوع مش باهمية حاجات تانية بس من ضمن الضغط النفسي على الاولاد في المرحلة دي

[goodfaith]

استاذ طارق انا اسفة مشفتش مداخلتك ليا الا النهاردة ... شكرا جزيلا