عزيزي المغترب نفسك تاكل أيه ؟

[se_ Elsyed]

بالتأكيد إن الغربة قد حرمتنا من بعض الاكلات التى لا نستطيع تناولها إلا في مصر فقط ،

فأنا على سبيل المثال أفتقدت أكلة كانت جميله قوي إسمها " الويكة "

واللي مايعرفهاش هي عبارة عن بامية بس مش معمولة بالصلصة حاجة كده أعتقد بيستخدم فيها نبات إسمه " السلق " بتاع القلقاس ، وبعدين علشان هي أكلة قديمة فما كانش فيه كيتشن ماشين لذلك كانوا بيضروبها بحاجة إسمها " مفراك " وذلك لجعلها نص سليمة ...

المهم هي أكلة ريفية يمكن الكثيرون لا يعرفونها إلا من كان ذو أصول ريفية مثلي ..

- وفي أكلة تاني غنية بالحديد إسمها " خبيزة " ... ومع إني ما كانتش بأطيقها .. لكن نفسي هفتني عليها لما أتغربت ..

- ويا عيني على القصب والواحد قاعد فوق سطوح البيت ساعة العصاري ونازل مصمصه لحد ما يجيلوا نزيف في اللثة ... أو إذا كان مركب طقم أو أسنانة ضعيفة يبقى يمشي في الطريق السهل ويشرب شوب عصير قصب من المحل اللي عند محطة مترو الأنفاق .... يا سيدي يا سيدي ...

- ومهما لفيت ودورت وأكلت لحمه إستحالة تلاقي زي طعم اللحمة البقري أو الجاموسي المصري .... وإوعى بقى من قدام طبق الشوربة بتاعتها ...

- ولا الفراخ البلدي المعصفرة ... مش عارف ليه طعم الفراخ البلدي المصري بيفكرني بالواحد لما يكون عيان وتيجي الحاجة تعمل له فرخ بلدي مسلوقة علشان شرب شوربتها ويقوم بعدها زي الحصان .....

- وما ننساش الحمام البلدي اللي متربي في البيت على الغالي .. يا سلام عليه بالرز أو الفريك ..

وبالرغم من إن معظم الحاجات دي تكاد تكون متوفرة في بلاد الغربية إلا أنها بلا طعم او لون أو رائحة حتى ... وطعمها زي البلاستيك بالظبط ....

- وحدث ولا حرج عن الفاكهة المصرية بالرغم من محاولات يوشع بن والي إن يخربها ويقعد على تلها إلا ان مافيش زي المنجا البلدي - أنظر الكتاب موضوع المانجو لصاحبة عادل أبو زيد - ولا الفراولة البدلي الصغيرة قبل ما تنقرض ، ولا العنب البناتي - إوعى من قدامه - أو التين الشوكي اللي بيجيب إمساك .....

- وإوعى تنسى عزيزي السائح الذره المشوي في الصيف .....wooooooooow

كفاية كده دلوقت أحسن أروح أولع في أسواق الخضار هنا ...

[Scorpion]

أصطبحنا و صباح الملك لله.... ربنا يسامحك يابو السيد.. ماشي..

الواحد لسه بيقول يا هادي و يلاقي ال Menu ده قدامه علي غيار الريق... طب و الله و يمين أتحاسب عليه... المدام تحت في اللحظة دي بتسألني عايز أيه علي الغدا.... طب بالذمة أقولها عايز بامية ويكا أزاي ؟....

دوس يا عم زي ما انت عاوز... بس الرحمة حلوة برضه...

فينك يا اماه ....

[Salwa]

ماشى ماشى ......

احنا معندناش حاجة من دى ..خالصصصصصصصصصص...

ولا بسطرمة ولا باميا ولا قلقاس ولا ولا ولا ......وبرضه فى اى فرصة بحاول اعمل البطاطس بالخضرة واضحك على نفسى واقول ...دى اخت القلقاس ..

والاسبوع اللى فات ....اسعدنى الحظ ..وناس قريبة منى حضرت من مصر ..وعندما سألونى عاوزة حاجة من مصر ؟؟ قلت واحدة قلقاس ..وشبت وكسبرة ..// عندنا سلق هنا //..

ومش ححكى لكم حاجة .......

استنتجوا انتوا انا عملت ايه ؟؟

كأنه عيد ميلاد ......

والصراحة يعنى محدش فى ولادى بيحب القلقاس .....ولأول مرة فى حياتى لا اهتم باللى يحبوه او ما يحبهوش .......هم ياكلوا مكرونة وكفته ...واحنا ناكل قلقاس ..

عقبال كل المتغربين ...

هنا فيه لحم اغنام مدخن ......بس طبعا مش زى البسطرمة ..

ومع انى اعرف اعمل البسطرمة ...لكنى اكسل ..ومعنديش حلبة .

فتحتوا الموضوع ده ليه ؟؟؟

انا لازم احجز وانزل مصر ..........زيارة ....خصيصا لتناول الاطعمة المصرية الخاصة ....

انا اعمل لقمة القاضى ...والبليلة ...والفلافل بالحمص ..// بس برضه مش زى ما تفطر فى مصر //...

صباح الخير .....

[Hassan]

- وحدث ولا حرج عن الفاكهة المصرية

انا بقى اموت فى نوع من الفاكهة المصرية و هى غير موجودة هنا فى اوروبا حيث يوجد جميع انواع الفاكهة من شتى بقاع الارض و جميع المواسم و لا اعرف اسمها باى لغة اخرى الا وهو "الجميز" اذا كان حد عندة صورة يحطها ..اشوفة بس .

[maksoof]

ومع انى اعرف اعمل البسطرمة

إزاى؟ أنا ما عنديش مانع أجربها

الكزبرة - Coriander- موجودة هنا فى كل ال food chains أما الحلبة- Fenugreek- فهى موجودة عند المحلات المتخصصة اللى بتبيع مأكولات مستوردة

[se_ Elsyed]

لا اعرف اسمها باى لغة اخرى الا وهو "الجميز" اذا كان حد عندة صورة يحطها ..اشوفة بس

يا عم حسن أيه وجع البطن ده ... الجميز ده من حلاوته الواحد بيقعد ياكل فيه لحد ما بطنه توجعه .. بس بيني وبينك بقى لي ييجي 15 سنة ماشوفتوش بجد ..

بس فيه بديل له وهو التين البرشومي .. أيه رأيك فيه ؟

وماتقوليش بقى على الحرنكش .. انا بعون الله ممكن أقعد على قفص أجيب أخره

[darker19]

حرام عليك قلبت علينا المواجع, و طبعا هاكتبلك لستة طويلة عريضة خد عندك:

أول حاجة و أهم حاجة ملوخية خضرا بالأرانب و طبعا الإتنين مش متوفرين هنا أصلا و زهقت من الملوخية الناشفة إلي معمولة بالطريقة البنانية (ورق) باجيبها و أعد أفرمها يدوي بتاخد حوالي 45 دقيقة علشان تخلص.

و طبعا نفسي في مسقعة و صنية بطاطس في الفراخ طبعا هاتقلولي في بلد ما فيهاش فراخ أو بطاطس؟ لأ هوا فيه بس المشكلة إن الفرن عندي بايظ.

و نفسي في بط ده طبعا مش موجود هنا و مش ممكن تلاقية غير في مطاعم الصينين و ده دبح مش حلال و أكتر حاجة تقرف إنهم بيعملوها براسها و الرقبة مش لامسها سكينة.

و نفسي في الطعمية أم سمسم إلي كانت بتتعمل في البيت الطعمية هنا كلها معمولة من الحمص و القرص بيبقى عينة.

و نفسي محشي و رق عنب و كرنب الحاجات دي متوافرة هنا بس أنا بطولي و طبعا مش هاعد ليلة بحالها ألف في حلة.

نفسي في بفتيك و أدفع نص عمري و أكل أكلة كفتة برز.

نفسي أكل كشك بالجمبري و مقلوبة و مسخن.

نفسي أكل فخدة خروف محمرة برز بالخلطة (رز الحاجة).

نفسي في تورلي و بسلة بالجزر مع إني مابحبهاش أوي بس و حشتني.

نفسي طبعا في حمام بالفريك و شربة فريك و ديك رومي و ياسلام على طبق كشري بالدقة و الشطة.

من الأخر كدة أنا بقالي سنتين و نص ماباكلش غير بيض و فول معلب و شاورما و بيتزا و فراخ شواية (جاهزة) و بطاطس محمرة لما معدتي نشفت خلاص. :D :) :D

أه صحيح كنت هنسى نفسي في سبانخ و خبيزة.

بس الحمد لله هانت إن شاء الله هارجع رجعة أبدية بإذن الله في نص مارس يعني كمان 14 يوم و طبعا أهم حاجة هاتكون منتظراني حلة المحشي و البفتيك :) :) :D

[se_ Elsyed]

أيه ده ما تيجي تأكلنا أحسن يا داركر ... أوعى تقول لي الدكتور مانع عنك الزفر هأأأأأأ

أسف لتغيير الموضوع ... بس يابني طمننا على أختك نورا بجد الكل هنا قلقان عليها ... أخبارها أيه وفين أراضيها دلوقت ده ليها يجي 6 شهور مش باينه خالص ؟

ترجع بالسلامه للبوفتيك وورق العنب إن شاء الله

[darker19]

:D الموضوع مالهوش علاقة بالدكاترة خالص هيا المشكلة إني مش سهل ألاقي الحجات دي مدبوحة دبح حلال و حتى لو لقتها ما بعرفش أعملها يعني مرة لقية أرانب بس معرفتش أعملها مش عارف ليه طلعت زي الكاوتش :D :D

نورا لسة عايشة :) ما تقلقوش عليها لسة مكلمها من شوية بس هيا كانت و مازالت مشغولة.

أسيبكم بقى أحسن البطاطس هاتتحرق :) :)

تم تعديل 28 فبراير 2004 بواسطة darker19

[nora]

:D :D :) حد بينده عليا :o

الله يكرمك يا سس لسه في حد فاكرني احمدك يارب انا اول ما داركر بعتلي وقلي انظر الموضوع جريت ولقيتكم بتتكلموا عن الاكل وطبعا احدثكم بلا حرج اني عملة رجيم قاسي جدا لان عقبال عنكم اجمعين اخيرا قرب يجيلي الفرج وادخل قفص الزوجية clp:: clp::

ياااااااااااه المهم المشكلة العظمى اني تقريبا نسيت طرق عمل كل الاصناف التي ذكرها داركر والتي لم يذكرها :) :) :D

والمشكله العظمى ان زوجي بيموت في الاكل mfb: mfb:

واخر اخباري انه جالي زيارة الكويت و لما جة طلب يدوق اكلي بس فعملت له بطاطس محمرة mc: mc: طبعا كان يوم اسود لاني وللأسف زودت الملح يلى بقى قولوا لي طريقة عمل جميع الاصناف علشان ابدأ اتمرن الجواز كمان 5 الي 6 شهور fsh:: fsh:: شكرا ليك يا سس

تم تعديل 28 فبراير 2004 بواسطة nora

[فــيــروز]

محدش يعنى جاب سيرة التين الشوكى :)

اللى الواحد يقف ياكله من على العربيه من السكين راسا اليك :D

واضح ان الغربه نسيتكم ناسكم و عوايدكم يابتوع البندر :D

[Scorpion]

نورااااااااااااا.. ألف ألف مبروك.. كده سكيتي... يعني لازم سي السيد يفتح الموضوع المهبب ده علشان نعرف أنك حتتجوزي.....

سمعونا زغروطة حلوة يا آنسات المنتدي.... :D

بس ده ما يمنعش أني أدعي علي أخوكي هو وسي السيد في يوم واحد... يا جدعان.. الضرب في الميت حرااااااااااااااااااااااااااام.... أتهدوا بقي و اقفلوا الموضوع ده... الغدا النهارده كان خضار مسلوق و وورك فرخة حد أكلها قبل مني...

:D أقترح يا سي السيد انك تنقل الموضوع ده الي باب المحاولات السيكوباتية بتاعتكم... لأني نويت علي نية وحشة بعد كل اللي كتبتوه في الMenu

حشيش... أبوس أيدك أرجع و أكتب عبارتك الشهيرة :

تم غلق الموضوع بمعرفتي

[abofasad]

انا فاكر في اول أيام انضمامي لهذا المنتدى الجميل اني طلبت منكم طريقة زراعة البامية والملوخية. والان ابشركم ان المحصول العام الماضي كان ممتاز، والملوخية الخضرا بالأرانب لم تنقطع من منزلنا وايضا البامية باللحم الضاني.

وبالمناسبة اقول لجارتي مدام سلوى ان الملوخبة والبامية يباعان هنا في بعض المحلات في الصيف نظرا لتواجد الكثير من الأثرياء العرب للمصيف. وقد فكر في هذا الموضوع شهخص فلبيني كان يعمل في السعودية وحضر الى هنا واشترى ارض زرع فيها البامية والملوخية وايضا بعض المأكولات الفليبينة. وراجت تجارته كثيرا.

ونحن على استعداد لتوريد البامية والملوخية الى شمال أسبانيا.

وبالهنا والشفا

[se_ Elsyed]

. والان ابشركم ان المحصول العام الماضي كان ممتاز، والملوخية الخضرا بالأرانب لم تنقطع من منزلنا وايضا البامية باللحم الضاني.

قشطة يا بو فصاد

طب إيه رأيك في بطارية أرانب صغيرة نحطها في جنب من الجنينة ونورد لك شوية سلالات من الأرانب المحترمة زي النيوزلندي والشنشيلة والفرنساوي ... وتبقى العملية كده نضيفة ومية مية ...

تمد أيدك تقطف شوية ملوخية وتمد الأيد التانية تصطاد أرنب من البطارية وتجيب رقبته وبالهنا والشفا ..

وشويه شوية نعمل بحيرة صناعية صغننة نربي فيها دكرين تلاتة بط ..

وربنا يفتحها علينا بعد كده نجيب عجلين لباني ونحوطهم بسور برضوا في جنب من الجنينة ونعمل مشروع تسمين وتاكل احلى لحم بتلو...

هي دي المشاريع مش تقولي مشابك وحبال غسيل ...

زمان سنة 81 أنتقل الوالد رحمة الله عليه من حدائق القبة إلى منطقة من المناطق السكنية الجديدة في القاهرة وبنى لنا بيت هناك وكنت وقتها عندي 9 سنين ، المهم كان قدام بيتنا حتة أرض صغيرة لسه ماتبنتش روحت انا واخويا الكبير إشترينا تقاوي ماعرفش منين وزرعنا ملوخية وجرجير ومش عارف أيه وكنا بنراعى الزرع ده زي ما يكون طفل صغير ونسهر جنبه بالليل علشان القطط والكلاب ماتجيش تفعص فيه وهما بيجروا ورا بعض وأول ما طلع يـــــاه كانت فرحتنا كبيرة جداً ولما أكلنا منه كان طعمه مختلف نتيجة الجهد والتعب اللي تعبنا فيه .... هـــــيه رجعتونا لذكريات جميلة

هو التوبيك ده كان عن إيه أساساً ؟

[فــيــروز]

هي دي المشاريع مش تقولي مشابك وحبال غسيل ...

 

طيب وليه بس يا كابتن كده يعنى :D

مالها المشابك و الغسيل مش احسن من وضع اليد على اراضى الغير بدعوى رزاعة الملوخيه و الجرجير :D :)

[se_ Elsyed]

الأخت فيروز

سبق وأن نبهنا بإن التوبيك ده مخصص للمغتربين الغلابة والمحرومين فقط... ومع ذلك تُصري بعناد على مزاحمتنا فيه ولغرض ما انا عارفه وهو أنك تكتري مداخلاتك :D على قفانا

اللهم إلا إذا كنتي تشعرين بالغربة وانت في وطنك دي حاجة تانية ... يبقى عندك برنامج همسة عتاب أو خلف الأسوار تروحي تشتكي هناك ..

لذا أرجو إتباع التعليمات .... وشكراً لحسن تعاونك معنا .

حد ينده لنا مشرف الباب ده من عالقهوة يا جدعان ...

س س مشرف 3 بيبان

إن ماوريتك يا فيروز

[فــيــروز]

الاخ س.س.

الرجاء الالتزام بمحتوى الموضوع المفتوح وهو للحديث عما يريد المغترب ان ياكله وليس ذكريات الطفوله و الصبا للاعضاء :o

:o :o :o

[صعيدي]

اما انا فنفسى فى حاجة بسيطة جدا قطعة جبنة اسطنبولى وعيش بلدى من ابو مسامير

تخيلوا الشعب اليابانى الغريب لا يحب الجبنة والانواع الموجوده قليلة وكلها دلعة وملهاش طعم.

انا لما نزلت السعودية فى الحج كان معظم الوجبات تحتوى على جبنه

اما بالنسبة للخضروات مثل الجرجير والشبت والكسبرة وحتى الملوخية فالحل بسيط جدا فانا احضرت حبوب معى من مصر زرعتها فى حديقة المنزل ويمكن زراعتها فى البلكونة

[MuslimaEgyptian]

عزيزي المغترب نفسك تاكل أيه ؟

كل حاجه..لأن مفيش حاجه ليها طعم زى مصر بالرغم من أشكال الأكل وأنواعه...والله حتى "اللبان" ما بستطعمه هنا ونفسى فى لبان آدامز بتاع الفراوله..

إللى نفسى فيه أوى هو السكالوب بانيه...الللللهههه مع البطاطس المحمره...مدقتش زيه هنا

وبسكوت كده إسمه Julie الغطا بتاعه بنى شفاف فى أصفر..

البسبوسه البسيطه اللى فى الكيس وخصوصا لما بتتطبخ وبتكون شبه محروقه.. :o

وطاجن أم على طبعا :o

واللسته تطول،ولكن ندى بقى فرصه للجمهور :o

*زعلت اوى على فكره علشان الواحد طبعا بينزل يزور ويآخد بحق السنين فى الأكل..لكن لاحظت فى آخر زياره زياده المنتجات الغربيه...يعنى بدل البسبوسه والكنافه، لقينا الناس مغرمه بالدانيش والدونتس...وبدل الشمعدان، شوكلاتات مارز وكادبرى...خايفه المره الجايه يبقى نفسى فى المحشى والملوخيه، منلاقيش غير الهامبرجر :(

[Salwa]

مساء الخير ياجماعة .......

والله انا انهاردة كنت مشغولة طول النهار .....كان عندى عزومة ..// شبابى //...اصحاب ابنى طلبوا فلافل واكل مصرى ...وانا قضيت الصبح كله فى المطبخ وعملت فلافل طلعت تحفة وعملت شاورمة وبطاطس وبدنجان وسلاطات ..

واجمل حاجة .....الولاد بعد ما اتغدوا ......دخلت اسألهم يشربوا قهوة والا شاى ..

فضلوا يصقفوا ..// واتكسفت جدا //...فضلوا يقولوا ..// فيفا سلوى //..حاجة تكسف ..

بس انا والله قلت لهم ..فكرة العزومة جت من اصدقائى فى / الفوروم /...كله أكل مصرى ..

على فكرة اخونا مكسوف كان طلب طريقة عمل البسطرمة .....وهى كالآتى ..

.كيلو لحم خالى من الدهن .

نصف كوب ملح ...........ملعقتين كبيرتين فلفل احمر بقالى .

3 راس ثوم ..............كوب حلبة مطحونة ناعم ..

نمسح اللحم بقطعة قماش ونعمل بها شقوق سطحية ونحشيها ملح ..

نلفها جيدا فى ورق مطبخ او اى ورق نشاف كبير ونضع عليها ثقل ونتركها 24 ساعة حتى تتصفى من الدم ..

نشطفها بالماء جيدا ..وتعلق مدة يوم آخر مع مراعاة تغطيتها ..

يدق الثوم مع الملح ثم نضيف لهما الحلبة والفلفل ../ لانضع شطة /..ويعجن بقليل من الماء .

نغطى قطعة اللحم بالخليط وتساوى باليد / تبل اليد بالماء وتساوى /..

تعلق فى الهواء حتى تجف / حوالى ثلاثة ايام /...ثم تستعمل ...

وعلى فكرة انا اعمل الشاورمة بطريقة سهلة جدا ..

تقطع اللحم صغير ممكن افضل بالمقص ...لو لحم فيليه شرائح يكون اسهل ...

يغسل وينقع فى الخل ./ حوالى 4 ملاعق خل /..لمدة ساعة مثلا ...

نغسل 4 طماطم وننزع القشر ونقطعها صغير .....

نشطف اللحم ....

ثم نضع عليه خلطة البهارات الخاصة باللحم او السجق ../ نشتريها جاهزة من العطار /او تضع خلطة /قرنفل وقرفة وجوزة الطيب وفلفل اسود وكسبرة وورقة لاورل و2 حبهان /

نحمر اللحم وعندما ينضج نضيف الطماطم ونقلب مرتين ثلاثة وبالهنا والشفاء .

عمار يامصر ......

على فكرة انا كنت دائما ازرع الكسبرة ......../ نفس حبوب الكسبرة الناشفة تزرعوها عادى ...تطلع كسبرة خضراء /...لى مدة مش بزرعها ..

حفكر ازرع الملوخية فى الصيف ....

مساء الخير .........