أكلاشيهات بشريّة......فى حياتنا اليوميّة

[disappointed]

أعتقد أن خبرة الحياة الحقيقيّة هى تلك الخبرة التى يكتسبها الإنسان من خلال تعامله مع أصناف و نماذج عديدة من البشر.

و أعتقد أيضا أن إحتكاك الإنسان فى حياته اليوميّة مع مختلف صنوف البشر هو الذى يفرز مختلف المواقف التى تتباين تبعاً للنماذج البشريّة التى يتم التعامل معها بحكم أن البشر المحيطين بأى إنسان هم الذين يصنعون أحداث حياته فى واقع الأمر , ولكنّهم ليسوا وحدهم القادرين على توجيه دفّة هذه الأحداث و رسم السيناريو لها , إذ أنه كلّما إزدادت خبرة الإنسان الحياتيّة (أى خبرته بمختلف صنوف البشر) كلّما إزدادت قدرته على توقّع تصرّفات من يتعاملون معه من واقع قرائته لشخصيّاتهم , وكلّما إزدادت قدرته على الحكم الصحيح و التحليل الصائب لمغزى تصرّفات البشر المحيطين به , وهو ما يصب تلقائيّا فى خانة إزدياد قدرته على توجيه دفّة الأحداث (بصورة وقائيّة أو علاجيّة) و من ثم الجلوس على مقعد القيادة فى رحلته مع هؤلاء البشر.

و ما يحدث عادة أنك تقابل نموذجا بشريّا معيّنا لأول مرّة من خلال تعاملك مع شخص ما , فتتكوّن لديك قصاصة من أوصاف و سمات و صورة هذا النموذج فى تعاملاتك المبدئية معه, ثم تظل قصاصات أوصاف و سمات و صورة هذا النموذج تتجمّع مع تكرار الإحتكاك و التعامل معه(تماما كما يتم تجميع قطع الــ” Puzzle”) حتّى تتبلور فى ذهنك الصورة الكاملة لخبايا شخصيّة و طريقة تفكير هذا النموذج , و عندما تتبلور هذه الصورة بالكامل و يتم تجميع فسيفساء هذه الشخصيّة فى شكلها النهائى فإنك تكون قد توصّلت بذلك إلى "أكلاشيه" هذه الشخصيّة

ويبدو أن عقل الإنسان يقوم تلقائيّا ولا إراديّا بفتح ملف لكل نموذج بشرى جديد يصادفه الإنسان و يتعامل معه , ثم يقوم بإعطاء إسم لهذا الملف , ثم يقوم بعمل save لهذا الملف تحت هذا الإسم على الــ"هارد ديسك" القابع فى تلافيف المخ , وكلّما تعامل الإنسان و إحتك مع الشخص صاحب ذلك النموذج البشرى كلّما قام المخ تلقائيّا بفتح ملفّه لتسجيل الإضافات التى تطرأ على هذا الملف نتيجة المرور مع هذا الشخص فى تجربة جديدة (موقف , حادث , تصرّف....إلخ إلخ).......ثم....... لا يسأل المخ صاحبه (فى العادة) السؤال الشهير :

Do you want to save the changes you made to this document??

فما يحدث أن المخ يقوم بعمل save تلقائيّا للتعديلات و الإضافات التى تمّت بخصوص ذلك النموذج البشرى..... وهكذا..... يتكرّر ذلك مرّة بعد أخرى ....حتّى تصل هذه الــ draft إلى document مكتملة , أى إلى أكلاشيه

وما يحدث بعد ذلك ببساطة شديدة هو أنه عندما تقابل بعد ذلك شخصا آخرا فإن الهارد ديسك فى مخّك يقوم بإدخال بياناته الأوليّة ثم عمل scanning أو search سريع ليعرف ما إذا كان مطابقا لــ document (أى أكلاشيه بشرى) مخزّن بالفعل فى الهارد ديسك أم لا....فإذا كان الأكلاشيه مخزّنا فإن مخّك سيقوم بإعطائك كل الـــ properties الخاصة بهذا الملف أو الــ document أو الأكلاشيه , فإذا بك تجد نفسك تقول (بينك و بين نفسك طبعا) بعد أول مقابلة لك مع فلان :" ياااااااه........ الخالق الناطق علاّن :o ".... أو "هوّه بغباوته :o " أو " يخلق من الأكلاشيه أربعين :) " , وبذلك تجد أن توقّعك لتصرّفاته و قرائتك لمغزى أفعاله و فهمك لأبعاده يكون أسرع و أدق و أنجع , مما يجعلك تتجنّب سلبيّات العلاقة معه (بصورة وقائيّة) و تقترب من النقاط الإيجابيّة فيه (بإستشفاف أسلوب التعامل الأمثل معه) من باب أن خبرتك السابقة مع "الأكلاشيه" الخاص به ترقى إلى مرتبة التعامل الإفتراضى معه منذ البداية (مع بعض التعديلات الطفيفة أحيانا و التى لا تؤثّر فى الأغلب على السمات و الصفات الكلّية للأكلاشيه –إلاّ إذا أفرز إحتكاكك به ما يدل على عدم تطابق أكلاشيهه مع الأكلاشيه الذى إعتقدت أنه يخصّه-)

أمّا إذا كان هذا الملف البشرى غير مخزّن على الهارد ديسك الخاص بمخّك (أى لا يوجد له أكلاشيه) فإن مخّك يقوم بفتح ملف جديد له..... وهلم جرّى.... وهكذا تتراكم خبرات الحياة التى تمثّل خبرة التعامل مع البشر حجر الزاوية فيها

ولهذا فإن هناك عاملين أساسيين يحدّدان مقدار خبرة الإنسان فى التعامل مع البشر , وهما : السنين و البيئة الإنسانيّة المحيطة

فكلّما تقدّم العمر بالإنسان كلّما تراكمت خبرته الحياتيّة فيما يخص التعامل مع البشر , وكلّما كان الإنسان فى محيط بيئة مفتوحه و مائجة بالحركة الإنسانيّة كلّما وفّر ذلك فرصة أكبر لتخزين عدد أكبر من الأكلاشيهات البشريّة على الهارد ديسك

ولا أعتقد أن عاملا من الإثنين يمكن فصله عن الآخر (فهما عاملين متضافرين)...... فالشاب ذو الثلاثين عاما الذى يعمل فى شركة عملاقة بمدينة كبيرة لابد و أن الهارد ديسك الخاص به قد تم تخزين عدد أكبر من الأكلاشيهات البشريّة عليه عن تلك التى قام ذو السبعين عاما القابع فى قريته النائية بتخزينها

وبالمناسبة..... فهناك أكلاشيهات بشريّة نادرة الوجود.... وقد يقتضى الأمر عقودا طويلة فى حياة الإنسان حتّى يقابل هذا الأكلاشيه الفريد من نوعه و يتعامل معه.... بل وقد تنقضى حياة الإنسان دون أن تسنح له فرصة تخزين بعض الأكلاشيهات البشريّة النادرة على الهارد ديسك الخاص به

ممممممم.....

فاكرين ألبومات "بم بم" عندما كنّا أطفالا؟؟؟؟ :o

هل تتذكّرون عندما كنّا نتبادل الستيكّرات المكرّرة عندنا مع تلك التى لاتوجد بحوزتنا و تكون مكرّرة عند أصدقائنا من أجل إكمال الألبوم؟؟؟ :o

هذا الموضوع من أجل أن نتبادل الأكلاشيهات البشريّة التى خزّنها كلّ منّا على الهارد ديسك الخاص به (ربّما ساعد ذلك على الإقتراب نسبيّا من إكمال ألبوم خبراتنا الحياتيّة)

تم تعديل 29 فبراير 2004 بواسطة disappointed

[disappointed]

السيّد / "إينو"...... و مدام "فيتاسيد"

أكلاشيه شخصيّة القرص الفوّار

هذا أحد الأكلاشيهات البشريّة التى نقابلها كثيرا فى حياتنا

الــ"إينو" كما تعلمون هو أحد أشهر فوّارات عسر الهضم , و الــ"فيتاسيد" هو أحد أشهر فوّارات فيتامين سى لعلاج نزلات البرد و الزكام , وهذا الأكلاشيه البشرى هو صورة طبق الأصل منهما.... فهو أكلاشيه شخصيّة القرص الفوّار

إحضر كوبا من الماء الرائق , وقم بوضع قرص فوّار داخله , ولاحظ المشهد :

فوراااااااااان f((:

فرقعااااات f((:

طرقعااااااات f((:

قرقعاااااات f((:

هيجاااااااان f((:

بالمختصر : هييييييييصه و هلليييييييله

ولكن.....

لبضع ثوان فقط.......

ثم........

يحل الهدوووووووء

و تنتهى الإثارة

:o

السيّد / "إينو" عندما يتم تعيينه حديثا فى أحد المناصب القياديّة فإنه يحدث الكثير من الصخب و التموّج و الفوران و الدربكه و القلق فى البدايه , ويعيش مرئوسيه فى حالة من الهرجلة و اللخبطة فى البداية بفعل دخلته " الفوّارة" عليهم :) .......ثم.......... تهدأ العاصفه , ويحل الهدوء , ويكتشف المحيطين أن السيّد "إينو" ليس لديه حقّا ما هو قيّم و مبتكر ليقدّمه لعجلة العمل , وتنحسر هوجة الفوران و تهدأ العاصفة التى كان غرض السيّد / إينو منها محاولة التأثير و الإبهار السريعة علّها تصرف الأنظار عن إفلاسه و قصور إمكانيّاته و قدراته

مدام "فيتاسيد" عندما تدخل إلى بهو الفندق الخمسة نجوم فإنها تحدث نفس الفوران و الصخب و الهيصة بدخلتها الفوّارة f((: و شعرها الغجرى الكانيش المضروب أصفر و الـــ"ميك أب" الصارخ و العدسات الملوّنة و البودى الساخن و الإستريتش المولّع و الإكسسوارات الملعلطة.......... وبعد زغللة العيون :o من شدة هذه الصاعقة الضوئيّة الأوّلية فإن "المتر" الذى يقف لدقيقتين أمامها وهى بصدد إختيار ما ستشربه يكتشف أنها ليست سوى أحد شخصيّات القرص الفوّار :o وأن الهيصه و الزمبليطة و الزفّة التى دخلت المكان بها لم تكن سوى محاولة منها لصرف الأنظار عن مناخيرها المكبّبة و عيونها الضيّقة و ضبّها المحترم و رجليها المعيزى المعرقبة :)

الواد " إينو" عندما تتعرّف عليه فى عيد ميلاد أحد أصدقائك فإنه يقوم لأوّل وهلة بعمل البحر طحينة لك , وتجده يطلق مدفعا رشّلشا من القصص و الحكايات و الأفكار و المقترحات و المشاريع.....ثم........ ولا حس و لاخبر , وتكتشف إنه كلمنجى و بس

الآنسة " فيتاسيد" عندما يقع أحد الدهلاّت تحت تأثيرها بعد أن تنجح بفورانها المبدئى فى أن تجعله صريعا لها فإنه يقع على بوزه و يقوم بخطبتها ويظل منبهرا بها حتّى تقع الفأس فى الرأس و يتزوّجها ليكتشف بعد هدوء عاصفة فورانها ما كان فورانها يخفيه عنه

و إذا كان الإنسان لديه الخبرة الكافية مع هذا الأكلاشيه البشرى فإنه يكتشفه و يفهمه ( يفقسه يعنى) منذ الوهلة الأولى..... ولهذا...... فإن التعامل الوقائى مع هذا الأكلاشيه هو الحل الوحيد حتّى لا يجد الدهلّ نفسه يلعن اليوم الذى تزوّج فيه "فيتاسيد" , وحتّى لا يخفى على البت اللى على نيّاتها أن السيّد إينو طالع طالع بس نازل على فاشوش

مممممممم......

مين عنده أكلاشيهات؟؟؟؟ :o

والاّ عايزين تستغلّونى وتخلّونى أكشف ليكم أكلاشيهاتى من غير ماتورّونى أكلاشيهاتكم :o ؟؟؟

:P

الأكلاشيه الجاى ( شكّاى أفندى cbyb: ..... متذمّرة هانم :o ) مش حأكتب عنه غير لمّا أشوف شويّة أكلاشيهات من بتوعكم ;)

و......

فاكرين ألبومات "بم بم" عندما كنّا أطفالا؟؟؟؟ :o

هل تتذكّرون عندما كنّا نتبادل الستيكّرات المكرّرة عندنا مع تلك التى  لاتوجد بحوزتنا و تكون مكرّرة عند أصدقائنا من أجل إكمال الألبوم؟؟؟ :D

هذا الموضوع من أجل أن نتبادل الأكلاشيهات البشريّة التى خزّنها كلّ منّا على الهارد ديسك الخاص به (ربّما ساعد  ذلك على الإقتراب نسبيّا من إكمال ألبوم خبراتنا الحياتيّة

بم بم بيقدّم جوائز gt:

تم تعديل 29 فبراير 2004 بواسطة disappointed

[Lighthouse]

وبعدين معاك ياعم محبط :o

انت عايز تجرجرنا ونقول لك الاكلشيهات بتاعتنا :o

طيب كمل انت الاول وبعدين نقول ههههههههه

[فــيــروز]

هو انت كمان يا محبط كنت بتشترى بم بم زينا !! :o

مش عارفه ليه متخيله انك مولود كبير ومامريتش بمرحلة طفوله :o

اوعى تزعل ده بس تعبير عن انبهارى بثقافتك ما شاء الله

طيب سؤال

هو لازم كل الاكلاشيهات تبقى ضاربها السلك ولا ممكن نعرض نسخ اكلاشيهات حلوه و جميله؟

[فــيــروز]

الفتوه

ربما لا يكون هذا هو الاكلاشيه الادق لوصف هذه الشخصيه

ولكنى لا اجد حالا الكلمه التى احتاجها لوصف رجل احترمه للغايه

بواب عمارتنا !! :o

اعتبره فى الحقيقه من النسخ النادره التى لم اصادف مثلها الكثير

لديه مجموعه من البنات و الابناء جميعهم يعملون فى مهن مختلفه

ربما فى بداية التحاقه بالعمل فى عمارتنا "اللى اتغير عليها بوابين كتير جدا قبله" لم يلفت نظرى اليه اى شئ .. بل توقعت له ان يرحل بعد عام بالكثير مثل قبله .. ولم اتوقف امام شخصيته الا حين وقع الخلاف بينه وبين ابنة صاحب العماره التى كانت تصر على تشغيل ابنته لديها ولدى باقى الاسر فى عائلتها .. وكان هذا يستدعى ان تعود الفتاه للمنزل فى وقت متاخر

فما كان من "عم احمد" الا ان رفض حتى بعد ان تم تهديده بان يتم تسريحه من الخدمه .. ورفض عم احمد و رحل فعلا عن العماره ..

وبعد ان اتى بواب غيره لم يكن يتمتع بما تمتع به عم احمد من مهارات عاد عم احمد مره اخرى الى عمارتنا و ... بشروطه .. وقتها فعلا بدات اتامل شخصيته خصوصا لشهامته الفطريه الطبيعيه .. حيث اصطحب امى و اخى مره الى الدكتور فجرا بسبب مرض شديد مفاجئ الم باخى دون ان يطلب منه احد ذلك ..

باربى يتامى :o

معلش يا محبط .. ساتحدث عن شخصيه دائمة الشكوى بمناسبة الحديث عن بوابين عمارتنا الميمونه

وانا فى اعدادى هندسه عرفت ان عمارتنا ستستقبل بوابه جديده .. سيده كبيره فى السن مع اسرتها وكانت تقوم بزيارة السكان لتحصل على موافقتهم على العمل حتى توافق صاحبة المنزل على تشغيلها

الحقيقه انا من الاشخاص الذين يؤمنون بالانطباعات الاولى .. وحين رايتها رغم الطيبه الباديه عليها الا انى لم اشعر نحوها بالارتياح

ورغم انها ظلت فى العماره لعدة سنوات كان الكثيرون خلالها يرون انها نموذج للمراه المكافحه !! ويشعرنى هذا احيانا بالذنب لاحساسى تجاهها الا انى لم استطع ان اغيره ..

ربما لانها خلال هذه الفتره لم تكن تتوقف عن الشكوى من ظروفها الصعبه وقد يكون معها كل الحق فى هذا ولكن .. ليتها كانت تكتفى بالشكوى بل تقرن هذا بالمقارنه بينها وبين فلان اللى بنى بيت او علانه اللى سكان عمارتها جابوا لها شئ و شويات من السعوديه .. ورغم ان الكثيرين كانوا ينصحونها بالرضا و الصبر الا انه الامر يبدو انه اعتيادى بعد فتره .. اذ يعتاد الانسان على الشكوى من ظروفه حتى لو تحسنت او تغيرت !! وهذا ما حدث معها !! فبالرغم من التحسن النسبى لظروفها الا انها حين تزورنا لا تكف عن الشكوى و البكاء والمقارنه بينها وبين غيرها وهو اكثر ما يثيرنى تجاهها !! خاصة اذا قارنا بينها وبين من تحسدهم هى على ظروفهم فنجد امامنا اكلاشيه يمكن ان نسميه "الست راضيه"

الست راضيه امراه هى الاخرى شديدة الغلب .. الا انها تبدو كما لو ان شفتاها مغلقتان عن اى شئ سوى الشكر لله على ما وهب .. وهذه المراه على فكره "ولا حول ولا قوة الا بالله" كانت فى احيان تضطرها الظروف الى البحث عن طعام فى القمامه !! ورغم قسوة ظروفها الا انها لا تشكو ابدا .. بل اذا زارتنا فى وقت وجدت امى فيه نائمه تعتذر بشده و تشعر ان لديها ادبا فطريا دون ان تحصل على اى تعليم .. وتبدو افضل نموذج يمثل الانسان المصرى الذى يرى فى احلك الظروف اختبار من الله عليه ان يعبره بنجاح دون شكوى او تذمر !! وحين قرات وصف لاحدى الصديقات العزيزات عن النساء الريفيات الذين افسحوا لها مكانا فى الميكروباص وقالت احداهن : انا اعرف اظبط نفسى وانكمشت على نفسها لتفسح لها مكانا .. تذكرت انى قلت وقتها : يبدو انه تمرين ابدى يقوم به الانسان المصرى محاولا بكل طريقه ان يتكيف مع ظروفه حتى يوشك من فرط الانكماش ان يختفى !!

[فــيــروز]

ازيك يا عثمانه !! :o

لا اعرف هل هناك جين فى اجساد اخواننا النوبيين يجعلهم بهذا اللطف !! :o

معظم من تعاملت معهم من النوبيين تميزوا جميعا بعدة صفات اعتقد ان كلها صفات حميده .. فهم قليلو الكلام .. ورغم ان هذا كان يضايقنى فى بداية التعامل الا انى وجدت هذا افضل بعد فتره .. و جميعهم يتسمون بحرص كبير على كرامتهم حتى تشعر انهم ايا كانت الوظيفه التى يعملون بها على قدر كبير من الاعتداد بالنفس ويمكن ان تقول عليهم Untouchable من قبل من يراسهم .. يعنى باحس ان محدش يقدر يضايقهم باى شكل من الاشكال .. كما ان لديهم قدر كبير من الترابط بينهم وبين بعض حتى لو اخطا فرد منهم تجد الجميع يساندونه بحراره !! لا حقيقى سبحان الله الناس دى فيها شئ مختلف و جميل ايه هو الله اعلم !!

[R.M.G.]

طالما الأخ المحبط طرح الموضوع طرحا دوائيا فلا مانع من عرض بعض النماذج الكيموبشرية

هناك نموذج "الفيكس"نفاذ وجذاب ولكنه يتبع نظرية الصيت ولا الغنى ينتشر ويتوغل عند التعامل معه ولكن النتائج التي يعطيها محدوده جدا ومؤقته جدا

وهناك نموذج "الحقنه"وهو نموذج جيد يعطي فائدة طيبة ولكن التعامل معه مؤلم للغاية

وهناك –الله لا يوريكم-نموذج"اللزقة" وطبعا كلنا تعاملنا مع هذا النوع ونعلم كم هو مؤلم في وجوده وكم هو صعب ان نتخلص منه

وهناك ال"شربة"نموذج آخر بمجرد أن يفتح فمه ويتكلم تبقى عايز تجيب اللي في معدتك

[خاطر]

لمونه واحده في بلد أرفانه

ده أكلشيه قابلته كتير فى مراحل عمرى

تخيل بلد كل إلى فيها أرفنين ونزلت فيها لمونه واحده

فين ناس بتحس نفسها كده

أن الدنيا مش ممكن تمشى من غيرهم ،، وتلاقيه مش طايق نفسه هيتفرتك

تبص فى وشه تحسس كأنه شامم ريحه وحشه

على طويل يتأفف ، لا عجبه حر ولا برد لا فوق ولا تحت

كاره نفسه يعنى

وطبعا الناس عنده كلها مابتهمش

[disappointed]

أيوه كده إطلعوا بأكلاشيهاتكم :lol: :D

طيب سؤال

هو لازم كل الاكلاشيهات تبقى ضاربها السلك ولا ممكن نعرض نسخ اكلاشيهات حلوه و جميله؟

لا طبعا.....

بالعكس....

ده إحنا عايزين نتعرّف على كل الأكلاشيهات

يعنى زى ما أنا ناوى أكّلمكم عن أكلاشيهات من عيّنة عقربة هانم , بركان الأذى , أهوج أفندى...إلخ إلخ فأنا برضه ناوى أعرض أكلاشيهات من عيّنة الأستاذ هليهلى , الحاجّه نسمه , حقّانى باشا , الست صابره.....إلخ إلخ إلخ

حياتنا مليانه بالكويّس و الوحش..... ومافيش بنى آدم خالص الشر و لابنى آدم خالص الخير , و ممكن تلاقى توليفة غريبه من القسوة و الهوجائيّة و حب زرع الخوازيق مع مساعدة الفقراء فى الشارع و التفانى فى العمل و الكرم فى نفس الشخص....... البنى آدم ده أصله كائن غريب.... لغز

هو انت كمان يا محبط كنت بتشترى بم بم زينا !!  et:(

أنا حضرت الهوجة بتاعته أيّام المدرسة وكنت بأشوف زملائى و حياتهم متمحورة حوالين ألبومات بم بم لأكثر من ساعتين ثلاثة كل يوم.... بس الحقيقه عمرى ما إشتريت ولا فكّرت أشترى الألبوم (كنت بس بأجمّع ستيكّرات ألبومات نجوم الكورة , بس مش فى الألبوم الخاص بيها , كنت بأجمّعها و أهادى بيها أصدقاء المراسلة بتوعى)...... أصلى من يوم ما وعيت على الدنيا و أنا جوّايا إعتقاد دامغ بإنى لا يمكن أكسب حاجه من الهواء أو بالقرعة أو بالحظ أو فى سحب (لدرجة لمّا بأبقى سهران فى فندق والاّ حاجه ساعات يعطونى كارت عليه رقم علشان سحوبات بعد إنتهاء العشاء على تذاكر طيران و مشغولات ذهبيّة و جوائز أخرى , فأنا عمرى ما إنتظرت لموعد السحب و دايما أعطى الكارت بتاعى لأول طفل على ترابيزة جنب ترابيزتى)..... طول عمرى معتقد إنى لو كسبت حاجه يبقى لازم يطلع عينى و أشتغل جامد علشان أكسبها.... ولذلك ماكنتش أحب ألعاب الكوتشينه (غير الإستيماشن و البريدج علشان فيها حسابات و إحتماليّات و تشغيل مخ جامد) ولا عمرى فكّرت أشترك فى أى مسابقه من أيّام فوازير رمضان لغاية مسابقات التليفون اللى مغرّقة القنوات الفضائيّة

طب عارفه..... من 6 أو 7 شهور كده حصل حتّة موقف يهلّك من الضحك فى سحب على عربيّة رينو كليو كلاسيك زيرو فى تشاكّى تشيز (مدينة ملاهى فى جدّة) وكان معانا أسرة صديقة لنا بولديهما اللى من سن بنتى...و....و...و.... ممممممممم....والاّ على إيه... مش حأحرق الحكاية :P ....خلّيها أبقى أكتبها و أنا بأكتب عن أكلاشيه شخصيّة صائد الأوهام :D و طالب السعد من غير وعد :lol:

مش عارفه ليه متخيله انك مولود كبير ومامريتش بمرحلة طفوله :D

ha) :lol: lo::

أمّال ليه فيه ناس بتعرفنى بتقول عليّا عيّل؟؟؟

:lol: lo::

طب ده أنا لسّه فى عز شبابى pp: (وسعت منّى :unsure: مش شباب قوى يعنى <_< فشّك فشّك على رأى عادل إمام :lol: أنا لسّه مكمّل الـــ35 فى يناير الماضى wst:: وماشى دلوقتى فى الـــ28 smk: )

أنا بلا فخر wst:: من الجيل اللى عاش طفولته مع قصص أستريكس و أوبليكس ولاكى لوك و عصابة جو دالتون و الكابتن هادوك (بتاع ألف ألف ألف مليون لعنه) و ميلو و تان تان و مغامرات بندق و بات هيبولير (دنجل) و سينما الأطفال (ماما عفاف الهلاّوى) و بابا ماجد و حفلة كارتون سينما مترو الصباحيّه بتاعة يوم الجمعة 10 الصبح

ولو سمحتم بقى.... مش عايز حد يشكّك فى "مَعيَلتِى" أو يطعنّى فى طفولتى kis)-

:lol: :lol:

تم تعديل 1 مارس 2004 بواسطة disappointed

[R.M.G.]

وهناك المأنباتي والمأنباتيه لو عندك مشكلة -أي مشكلة-وحكيت له أول حاجه يرد عليك بيها:بس انت برضو غلطان كان المفروض من زمان عملت كذا وكذا

مرة كانت عندي مشكلة في السباكة والشقة غرقانه والدنيا ملحوسه وحظي بقى ان احدهم جاء في هذا التوقيت فنظر مليا وقال:إنت غلطان كان المفروض من يوم ماخدت الشقة كنت عملت كذا وكذا كان هاين على ساعتها احط راسه في ال.....ولا بلاش

وعلى النقيض هناك نموذج لذيذ بتاع"قضا أخف من قضا"بيهون كل حاجه وبالعكس ساعات بيخلي المشاكل لذيذة ويخليك نفسك ماتخلصش ...نموذج مريح وإن كان غير مفيد وكان في نكته ع الجماعه دول إن واحد منهم -وكان مشهور بيها-قالو له شفت المصيبة ..حسن زميلنا رجع م السفر يوم الخميس بدل الجمعه لقى مراته بتخونه مع صابر زميلنا قتلها وقتله وقتل نفسه فأجب وسط استغراب الجميع:قضا اخف من قضا!قالو له هو في اوحش من كده؟فأجاب أيوه في لوكان جه الأربع كان لقاني انا!!!

[Salwa]

ونسيتوا ال ..قوس قزح؟؟

اهو ده بقى ....على كل الألوان ..

لدرجة ان ممكن يغير ديانته حسب الشخص الموجود امامه واللى له عنده مصلحة ..

ولو اسمه يوسف .....بقدرة قادر ...يبقى ..جوزيف..او ..خوسيه ..

مرة طيب وابن حلال ويصلى الوقت بوقته ...

ومرة سكران وعربيد ويعيش الدنيا بالطول والعرض ..

مرة مثقف ورزين ....ومرة هلهلى وملهوش دعوة بالكتب ....

مرة يبص للناس وكأنه مليونير ..ومرة يتعامل معاهم وكأنه مش لاقى ياكل ./ حسب مصلحته /

وممكن نسميه برضه ..المصلحجى ..

مرة شجاع وتقول عليه ..غضنفر ...ومرة يقولك ياعم خلينى جنب الحيط ...

مرة يقولك اقف جانبى ..دول ضحكوا على ...

ومرة يقولك ..لألألأ..انا مفتح للكل ..بس بستعبط ....// زئبقى //..متقدرش تمسكه ..

اهى كلها اكلاشيهات ......

[Cleo]

عربيّة رينو كليو كلاسيك

أففففففف بأة... et:(

[disappointed]

عربيّة رينو كليو كلاسيك

أففففففف بأة... :D

مش واخده بالك معاليكى

دى كليو كلاسيك

معاليكى كليو مودرن

<_< et:(

[Cleo]

عربيّة رينو كليو كلاسيك

أففففففف بأة... :D

مش واخده بالك معاليكى

دى كليو كلاسيك

معاليكى كليو مودرن

<_< et:(

و ده بأة أكلاشيه الليمونة فى بلد قرفانة...

:unsure:

[Cleo]

أكلاشيه عبده المهم..

تبقى عارف إنه مش مهم ولا حاجة و إنه طول النهار لا شغلة و لا مشغلة...

بس كل ما تكلمه...

"أصلى مش فاضى... أصل ورايا مشوار مهم.... ما بلاش الصبح خليها بالليل أحسن أحسن عندى اجتماع مهم.... لا لا لا .... الساعة عشرة عندى مش عارف إيه، خليها عشرة و خمسة"

[Cleo]

أكلاشيه "أبو العريف" ... أينشتاين عصره و أوانه..

يعرف كل حاجة فى كل حاجة عن أى حاجة... و الفتى يشتغل الله ينور فى كل المجالات... عندك مشكلة فى كهرة البيت يفتيلك تعمل إيه، سباكة، ميكانيكا، مشكلة فى البنك، مشكلة صحية، مشكلة زوجية....

خبير فى كله.. et:(

[se_ Elsyed]

هناك نموذج أخر وأعاني منه بشده في حياتي وهو " بغبغان أفندي "

وده موجود منه كام حته معايا في الشغل ...

أقسم بالله يا جماعه عندهم إستعداد يتكلموا لمدة ساعات بشكل متواصل وبدون إنقطاع وفي أي موضوع وفي كل الإتجاهات وسواء بقى حسسته إنك وراك شغل أو ماوراكش أو انك مش معبره ومشغول بحاجة تانية ما بتفرقش معاه ... والعبد لله من النوع اللي بيتكسف وعرقه بيبقى مرقه ومابعرفش أطرد حد أو أقوله إني ورايا شغل وأتفضل أمشي ..

بس شوفت كام واحد أساتذه في التعامل مع النوعية دي ولا يتوانى في أنه يقوم قايل له في وشه لو سمحت أتفضل بره المكتب علشان عندي شغل أو يقفل السكة في وشه لو بيكلمه في التليفون...

ومع إن الأنسان الطبيعي ممكن يتحرق من حركة زي دي ... إلا إن بغبغان أفندي لا يبالي وممكن لحظتها يزعل إنما بيرجع لطبيعته بعد ثواني ...

الغريب بقى ممكن نقول ده مقبول في الكلام العادي ... لكن أيه رأيكم في الكلام في الموبيل ولمدة ساعات ... وأحيان كتير جداً دولي .. لدرجة أوقات ما بنلاقيش فاضل في مرتبهم حاجة نخصمها منهم ...

لي مدير مباشر بس زي العسل عمل معايا إتفاق وقال لي بص يا س س اللي ييجي عنده واحد من الناس دي وحد مننا يأخد باله يتصل على طول ويقول إن فيه عندنا إجتماع أو رايحين في حته بره المكتب علشان نزحلقه ....

[se_ Elsyed]

أكلاشيه غريب تاني إسمه " دبدوب أفندي اللي بيقتل أصحابه "

فهذا الشخص طيب جداً ومجامل جداً وإجتماعي جداً ولكن ينطبق عليه المثل الذي يقول " الدبه اللي قتلت صاحبها " من كتر الحب ...

فلو إنت كنت مريض تلاقيه مجرد ما يسمع كده يجري وتلاقيه عندك يقف جنبك ويواسيك في مرضك .. لحد كده عداك العيب يا عم دبدوب .. لكن خلاص بقى زيارة المريض دقائق مش ساعات !! لأ دبدوب بيفكر إن كل ما يقعد اطول وقت عند صديقه المريض يبقى كده يبحبه أكتر .... وما يعرفش أنه ممكن يموته كده ..

- ودبدوب عنده إستعداد ييجي يزورك علشان يطمئن عليك في أي وقت .. ما تفرقش معاه أنت كنت نايم أو الوقت بالليل ومتأخر ... لأ الواجب عنده واجب

- نفس الشيء برضوا في الإتصال التليفوني ... فالمفروض لو انت اتصلت بإنسان رنيتين وتلاته وخلاص إنت مش بتتصل على واحد أطرش أو ميت .. لأ دبدوب عكس كده ممكن يتصل مرة وأتنين وعشرين لحد ما ترد .. ما أنت هاترد يعني هاترد ... أومال إنتوا مش أصحاب ..

[se_ Elsyed]

أكلشيه بقى حكاية ومنقيه نقاوة علشان خاطر الحبايب " مسز رويتر "

دي بقى وكالة أنباء متحركة .. وبعون الله عندها أخبار الجيران كلهم ولو عايز تضمن سرعة إنتشار الخبر مع إضافة بعض السسبينس والتحابيش عليه .. ما عليك إلا إنك تتصل بمسيز رويتر وتلمح بس بالخبر وهي عليها الباقي ...

وبرضوا شفت النموذج ده بعيني في جاره لنا هنا في السعودية ومع إن العمارة بها أكثر من 15 شقة إلا إن الخوف كل الخوف بيكون من مسز رويتر اللي مسرحه صبيانها على العمارة كلها يستقصوا الأخبار ويستخلصوها من فم الأسد وينقلوا الوقائع ومن ثم كل ده بيصب في النهاية عند المعلمة الكبيرة مسز رويتر وهي تضيف لمساتها الجمالية على الأخبار قبل نشرها .. وكلها بصراحة بتبقى خبطات صحفية ...

مره كنت مستأجر عربية حديثة موديل 2004 لمدة يومين وغلطت وركنتها قدام العمارة وإبن مسز رويتر عيل حلو كده عنده بالظبط 5 سنوات شافني بأركن العربية ... وطبعاً إنتوا عارفين الباقي .... ويا ويلك يا سواد ليلك لو فكرت تشتري كيلو جوافه او تدخل على الأولاد ببطيخه تفرحهم أول كل شهر لما تقبض .. هاتلاقي الجيران كلها عرفت الخبر قبل ما تدوق الجوافة أو تشوف البطيخة حمرا ولا قرعه ....

والمكان المفضل لها هو وراء الكاميرات قصدي وراء العين السحرية بتاعت الباب لمراقبة النازل والطالع وإذا تعبت بتسلم الوردية لحد من صبيانها ومش مهم إنك تشعر بتحركاتهم المريبة وراء الباب اهم حاجة عندهم السبق الصحفي .. لأنها تيعرف جيداً بإن الصحافة هي مهنة البحث عن المتاعب لذلك لابد من التضحيات ..

[Farida]

انا بقه عندى شويه اكلاشيهات متنقيه برضه

1- مدام قلق دى بقى اى حاجه فى الدنيا تحولها لقلق و تلاقيها دايما لو فكرت شويه عندها حق ...يعنى لو استشرتها فى حاجه تقولك على عيوب الحاجه دى و لا تذكر اى مميزات و فى اى مكان تتواجد فيه تلاقى قلق يمين و شمال و فوق و تحت لو العيال اتاخرت شويه يبقى حد خطفهم او داستهم عربيه و لو حد من عندها مسافر تفضل طول السكه اتصالات الا العربيه تكون اتقلبت بيهم و لا حاجه و لو بتاكل بره تبقى قلق و تفضل تبص يمين و شمال الا يجيلها تسمم....حاجه قلق

2- الأستاذ (ابن القرش)

الأستاذ ده بقه الجمله المفضله عنده معلهش يا جماعه انا القرش ابويا و لو سألته ليه القرش يقولك انا أخد بالى من القرش لكن الجنيه بياخد باله من نفسه ...و تلاقيه لابس على احسن موديل وعنده عربيه احدث موديل و تلاقيه اى مؤتمر رايح علشان الأكل اى سفريه مسافر اى عزومه موجود و بتاع البوفيه موصيه لو قال كده و كده خلى الحساب على المره دى او هات حاجه ساقعه كأنه ما سمعش ... و لو له 10 جنيه عند حد يقعد يكلم فيه و يسأل عنه طوب الأرض لما يجيبه

3- مدام دارى العيون

دى بقه عندها ان كل المشاكل اللى فيها من الحسد و انها و عيالها و جوزها محسودين على طول و طبعا هى مش بتغلط ابدا لكن تقول ايه الناس مش سايباها فى حالها لو اتكعبلت يبقى علشان اكيد جارتها اللى سلمت عليها و هى خارجه نشتها عين و لو اتخانقت مع ابنها عادى يعنى يبقى علشان كان عندهم حد بيزورهم و بصله بصه من اللى هى و النتيجه انها قافله على نفسها و على عيالها لا حد يشوفهم و لا يلمح طيفهم حتى و طبعا يبقى ياويلك يا سواد ليلك لو سالتها عن احوالها او عن عيالها عاملين ايه تسكت بس فى المقابل عايزة تعرف عنك كل حاجه و لو ما قلتش زى ما هى بتعمل تبقى انت اللى خايف منها تحسدك

4- مدام تعقيد

دى بقه اى حد يتكلم معاها لازم يتعقد ليه بقه لإنها ما بتغلطش ابدا و اى حاجه تاخد رأيها فيها تقولك انت غلطان انا لو مكانك كنت عملت و سويت و اى موقف سئ حتى لو واضح زى الشمس انها واقعه فيه تقلبه و تبقى هى عامله كده مخصوص علشان سبب وجيه و لا يمكن تمسك عليها غلطه حريصه جدا فى كل كلامها انها لا تشير لمساوئها ابدا كله صح و كله تمام و احنا اللى اغبيا علشان بنقع فى الغلط