حكاوي القهاوي

[se_ Elsyed]

بمناسبة عيد المصدرين كل سنة وإنتوا طيبين اللي مش عارف هو أيه أساساً يعني ده غير العيد الصغير والعيد الكبير يعني ولا هو ملحق ؟...

ما علينا صرح الدكتور الوزير المحافظ رئيس الوزراء الأستاذ / عاطف عبيد بالآتي

د.عبيد في عيد "الجمهورية" للتصدير:

الرئيس كلف الحكومة بزيادة الصادرات..واقتحام أسواق جديدة

الإنجازات التي تحققت علي أرض مصر خلال حكم مبارك لم تحدث منذ عهد الفراعنة

شركة جديدة لزيادة قدرة المنتجات المصرية علي المنافسة..ولتخفيض التكلفة

"الجمهورية" تقوم بدور رائد في دعم ومساندة المصدرين تشجيعاً لهم علي بذل مزيد من الجهد والعطاء

وقد أستضفنا خبير الإستكراد والتصدير المعروف س س صاحب مجموعة شركات سينسينكو لتصدير أي حاجة وإستيراد كل حاجة ونسيب عائلات توفيق عبد الحي .. وإذا قولنا توفيق يبقى بنقول الفراخ الفاسدة وحلاوتها يبقى بنقول إستيراد الأغذية المُشعة يبقى بنقول أول من أرسى دعائم مبدأ إخطف وأجري على بره يا ضنايا .. قبل الحكومة ما تحقق معايا..

أستضفنا الحاج س س في البرنامج للتعليق على ما جاء في حديث عبيد للمصدرين

ففي تصريحات أشبه بقعدات القهاوي قال عاطف عبيد لرجالته " إحنا بالصلاتو عالنبي يا معلمين يا مصدرين عايزين نزود صادراتنا وما حدش يسألني إزاي ...هي كده ...واللي هايحرجني ويقولي طب يا راجل يا إقتصادي يا عظيم ياللي كنت دكتور في الجامعة إتكلم بالأرقام هأقوله أنا ماعنديش كلام أقوله ريسنا قال مافيش محال يبقى لازم ننفذ ... نصدر أيه او نصدر إزاي او نصدربكام انا ماليش دعوة إتصرفوا إنتوا هو انا هأقطع نفسي ... أبيع القطاع العام وشركات الحكومة واولع الإسعار وكامن أزود التصدير .. حرام أنا بشر يا ناس ..

وأضاف سيادته .. العز اللي أحنا فيه ده يا رجاله واللي السبب فيه سيادة الرئيس ما تحققش من أيام أمنحتب الاول أطال الله بقاءه يعني الفراعنة في كوم وعهد الرئيس مبارك الأول كوم تاني ده انتوا في نعمه مانتوش حاسيين بيها يا حوش ..

طب حد يقولي الفراعنة كان عندهم مترو انفاق ؟ طب الفراعنة كان عندهم توشكى ؟

طب عمركم شوفتوا عن فرعون عمل قانون طواريء لمدة 23 سنة ؟

طب خدوا دي ... عمركم شوفتوا حد من رجالة خفرع أو تحتمس الثالث أو حتى الست الغلبانة اللي حكمت مصر فترة حتشبسوت هبر قرض من بنك التسليف الفرعوني وزوغ على بلاد النوبة أو خد جنسية الهكسوس ولبد هناك علشان مانعرفش نجيبوه ؟...

ما تردوا يا مصدرين يا وطنيين .. اهو كل ده حصل في عهد مبارك ..

لا يمكن أن ننكر تلك الإنجازات ولازم نرجع الفضل لأصحابه ..

بلاش دي قارنوا إنتوا بين قيمة السحتوت الجبس الفرعوني زمان بقيمة الشخلول الأغريقي وشوفوا مين كان أقوى ؟ ... طبعاً كان السحتوت بدليل إن عمر الاغريق ما ذلوا المصريين علشان كانوا بيبعتلهم معونات ومساعدات وقمح وهامبورجر ..

تعالوا بقى لعصر مبارك ... ونشوف قيمة اللحلوح المصراوي والدحروج الامريكي .... فنلاقي ان مبارك إستلم الحكم وكانت قيمة اللحلوح بالنسبة للدحروج حوال 180 قرش قول إتنين جنية علشان مزيد من الدقة ...و بعد 23 عام يا سادة وبفضل مجهودات مبارك وصل 7 جنية وساعات مجرمون - ده واحد صاحبي ماتعرفهوش - بيغيروا بـ 7.15 ج ... ده إنجاز ولا مش إنجاز ؟... إنطق إنت وهو يا أساتذة يا متعلمين يا مصدرين ...

طب حد يقدر يقول لي ديون مصر وصلت كام في عصر النهضة المبارك ؟ ده بقى سؤال إجباري وماحدش هاياخد بلونه ينفخ فيها وهو مروح إلا أما يجاوب على السؤال ده ..

أنا عن نفسي ومع إني رئيس وزراء ملوا هدومي .. بصراحة ماعرفش ... ومن قال لا أعرف فقد أفتى ...

وحاجة غريبة قوي يا مصدرين مع إن وقفة الرجالة اللي وقفها مبارك في حرب الخليج الثانية مع الكويت وقوات التحالف والمرتزقة وكانت من سببها إننا صعبنا على معظم الدول اللي مداينانا وحتى نادي باريس اللي بيسلف الناس بالفايص برضوا صعبنا عليه وخفف ديوننا ... وقولنا بس يا رجالة أخيراً هانعيش في تبات ونبات ونخلف صبيان وبنات ومش هايبقى علينا مديونيات ...

إلا إن ما يميز عصر مبارك هو " البركه " ففضلت الديون زي ما هي وبالعكس دي زادت يا رجالة وده ليه علشان البركة ، وليكن شعارنا في المرحلة القادمة " البركة أساس النجاح " وادينا أهو بنسدد كل سنة في فوايد الديون والعملية ماشية ....

وبإذن الله يا رجالة بعد البؤين اللي قولناهم دول هانبقى أحسن من إسرائيل في التصدير وهانسبقهم ونطلع لهم لساننا وإحتمال كبير - بس مش وعد - إننا نضرب سنغافورة على عينها وأخيراً ممكن في يوم من الأيام نقول لهونج كونج أقومي وانا أقعد مطرحك ....

وكل سنة وإنتوا طيبين ونيجي السنة الجاية وننفخ البلالين ....

يالا يا نجاتي أنفخ يا حبيبي البلالين علشان عيد المصدرين ...

- ولم يعلق الخبير الإقتصادي س س على هذا الحديث لأنه طب ساكت وتم إسعافه بمعجون السنان إلا أن أمر الله كان نفذ نتيجة لإصابته بإستبحس الفراخ مع سعال ديكي مزمن .

[Cleo]

وكل سنة وإنتوا طيبين ونيجي السنة الجاية وننفخ البلالين ....

ولله يا س س شكلها كدة مش بس البلالين هى اللى هاتتنفخ...

et:(

trch: