سيما في حارتنا

[خاطر]

أنتشرت في مصر سنة 1986 الفئران بشكل فظيع وخربت الأخضر واليابس

وكانت حرب بيولوجيه هديه من أسرائيل

المهم ماطولش عليكم فيه زجال بورسعيدى كتب عنها نفسى أفتكر أسمه

كتب أيه:

عندنا فى الحاره سيما فى الوجود ملهاش مثال

فرجه مجانى وعظيمه شيء ما يتقدر بمال

أما أبطال الروايه كلهم أبطال كبار

حصرهم ملوش نهايه بالقليل ألف فار

كل يوم المغربيه يتجمعوا من غير نفير

وبعد ما يأدوا التحيه يبدأ العرض المثير

إلى بيلعب شنابه والى بيهزر كمان

والى يخطف من صحابه والى يعمل بهلوان

دي الخرابه ألي فى حرتنا ياما بتخرج نجوم

نجرى ونقفل بيوتنا قبل ما يشنوا الهجوم

القطط بتكش منهم تجرى وتسيب الطعام

لما قطه تروح مكنهم قول على القطه السلام

وانت طالع ولا نازل يطلعولك من الجدار

خربوا كل المنازل قربوا ياكلو الصغار

كل يوم تنزف جرحنا كل يوم عدوان جديد

دي الفراخ أللى فى سطوحنا كل يوم فيهم شهيد

كم بعتنا من رسائل كلها بعلم الوصول

كل ده ولا حد سائل هي دي بردو أصول

يا مدير الصحه طوف من العجايب رح تشوف

دي الفيران أللى فى حارتنا واقفه تنطح فى الخروف et:(

تم تعديل 2 مارس 2004 بواسطة خاطر

[se_ Elsyed]

ياه ده أنت قديم على كده يا خاطر ..

طب انا أفتكر في الثمانينات عندنا في الشرقية أنتشرت برضوا الفيران بشكل فظيع ... لدرجة إن قرايبنا كانوا بييجوا عندنا في القاهرة يصطادوا القطط وياخدوها يحطوها كخط دفاع أول ضد الفئران .. واقسم بالله كانت الفيران بتاكل القطط ... ووصل الحال بالفلاحين بإنهم بقوا يربطوا القطط بالحبال علشان ماتهربش زي الفُرس ماعملوا في معركة القادسية كده هأهأ ها

وكان عندي ييجي 12 سنة ولما كنا نشوف مجموعة من الفيران نقولها هش أو نهوشها بعصايا كانت تبصلنا بقرف وممكن تهجم علينا ... لأنها كانت سوبر فيران مش فيران من المسلوعة بتاعتنا اللي واخده على العز وأكل الجبنة الرومي في القاهرة .

وكان الموضوع ده في فصل الصيف وأتذكر إن زوجة خالي كانت بتملى حله كبيره بالليل ماء وتحط فيها سم ونيجي الصبح نلاقي 10 او 15 فأر لقوا مصرعهم بأسفكسيا السم ...lol

والعُمد ومجالس القرية بقوا يعملوا مكافأت للي يقتل أكبر عدد من الفيران ... فكانت الناس تتسابق على إقتناصها ..

الله لا يعيدها أيام

[فــيــروز]

يا ساتر يا رب

ده شئ مفزع جدا ..

الحقيقه احيان كتيره اسال نفسى يا ترى لسه القطط ممكن تاكل الفيران زى ما كنا بنسمع !! اصل مش عارفه ليه متخيله ان اكيد اكيد القطط تقرف تاكل الفيران دى ..

[afiona]

أنتشرت في مصر سنة 1986 الفئران بشكل فظيع وخربت الأخضر واليابس

وكانت حرب بيولوجيه هديه من أسرائيل

زجل جميل، بس إيه علاقة إسرائيل بالموضوع ؟

[خاطر]

أنتشرت في مصر سنة 1986 الفئران بشكل فظيع وخربت الأخضر واليابس

وكانت حرب بيولوجيه هديه من أسرائيل

زجل جميل، بس إيه علاقة إسرائيل بالموضوع ؟

بصفتى راجل قديم زي ماقال سي السيد:

أقولك إن أحنا فى سلام مع أسرائيل

أه

لكن أسرائيل نايمه؟

أقولك لأ

لكن شغاله طبعا أشى حرب نفسيه وأشى أعلاميه

حروب أباحيه وجنسيه

حروب بالمخدرات

طبعا مقصدش الأفيون أنا قصدي البانجو والحشيش بس fsh::

مشكله أخونا حشيش يزعل :blink:

المهم إن الهندسه الوراثيه زي ما بتعرف من العلوم اللى ممكن تستخدم فى الحرب

وبالفعل أسرائيل أستخدمتها فى موضوع الفيران وبعتتهلنا

تم تعديل 2 مارس 2004 بواسطة خاطر

[خاطر]

يا ساتر يا رب

ده شئ مفزع جدا ..

الحقيقه احيان كتيره اسال نفسى يا ترى لسه القطط ممكن تاكل الفيران زى ما كنا بنسمع !! اصل مش عارفه ليه متخيله ان اكيد اكيد القطط تقرف تاكل الفيران دى ..

عمرك ما شوفتي قطه بتلعب بالفار قبل ما تكله؟ taz::

دي ألذ حاجه عند القطط

وللعلم القطه لوبصت للفار من بعد عشره متر بتجيله غيبوبه ويدوخ ويقع

على الأرض

دي أنا شفتها بنفسي

تم تعديل 2 مارس 2004 بواسطة خاطر

[ragab2]

زجل جميل

ياأبو الخواطر

وياريت ينتقل لصفحة الأدب عشان ينورها

تحياتى