سبوبة العلاج على نفقة الدولة والرشوة الانتخابية .. والنخبة إياها

[Sherief AbdelWahab]

ظهرت بالونة تعيين المرأة قاضية في مجلس الدولة في الوقت التي ظهرت فيه فضيحة هي الأكبر في رأيي سياسياً..

فضيحة سبوبة النواب الذين تاجروا في تأشيرات العلاج على نفقة الدولة .. دون إدانة من رئيس المركزي للمحاسبات .. دون إدانة من رئيس مجلس الشعب .. دون إدانة من أي من الحركات المعارضة أو الأحزاب السياسية أو الاعتصاميين أو الإعلاميين أو .. أو ... أو.... .. بل إن من بين هؤلاء من تصل به "الصداغة" لتبرير كل تلك الممارسات..

تلك الفضيحة فتحت أكثر من ملف ، بينها ثقافة الابتزاز المتبادل بين أعضاء مجلس الشعب والصحفيين من جانب والمسئولين من الآخر ، وفضيحة الرشوة الانتخابية التي أثارتها المصري اليوم منذ عام وبعض العام وانتهت "على فاشوش" دون أن يحرك ذلك ساكناً في أي من المذكورين أعلاه..

حتى أنا نفسي ابتديت أفتكر الموضوع عادي وإني اللي حساس حبتين..

تفتكروا الموضوع كدة..

ولا كبير بحق وحقيق؟

فكروا معايا فيها..

خلص الكلام

[om marawan]

احقاقا للحق الدولة بتوفر ميزانية كبيرة للعلاج على نفقة الدولة بقرار وزارى

والاجراءات للمرضى الحقيقيين سهلة ومقصود انها تكون مش معقدة تسهيلا على المرضى لكنها للاسف تستغل على عدة نطاقات بدءا من بعض أهالى المرضى اللى ممكن ياخدوا العلاج ويبيعوه مثلا او ان المريض يكون مات ومايبلغوش

وانتهاءا بما نراه هذه الايام من فضائح استغلال النواب المخزى لهذا الامر

واعتقد ان أسوأ انواع الاستغلال والسرقة هى سرقة شخص مريض اولى بالفلوس وبأموال العلاج

تابعت من يومين فقرة فى برنامج 90 دقيقة لقاء بين النائب مصطفى البكرى ونائب اخر عن دمياط اسمه عمران

يعنى شىء مخجل واسلوب الحوار كالعادة سىء وحتى مصطفى البكرى فى حديثه عن الوقائع اللى محدد الفساد فيها شىء غير مرتب

طبعا ناهيك عن المذيعة اللى مش فاهمة اصلا ايه الموضوع ولا المشكلة فين بالظبط ولا عارفة ترد على سيادة النائب اللى مالقاش حاجة يكدب بيها غير انه عمل مسح شامل لفيروس سى !!!!!!!!!!!

يعنى لو عاوز تسرق وتكدب على الاقل بلاش تبقا مفضوح اوى اوى كده يعنى تبقا حرامى وغبى

فى نهاية الحوار دار فى عقلى سؤال هل دول فعلا ممثلين عن الشعب ويجرى ايه لو بكرة الصبح قفلنا مجلس الشعب لحد مانعرف نختار ناس محترمة

على الأقل نكون قضينا على جزء من فساد استغلال النفوذ والتستر وراء جدار الحصانة

[Sherief AbdelWahab]

عارفة النكتة بتاعة الاتنين الفشارين اللي وقفوا قدام الهرم.. وقال واحد فيهم للتاني :

أنا ح أشتري الهرم دة بتلتمية مليون جنيه..

قام التاني باصص له وقال له :

ومين قال لك إني بايعهولك؟

احنا قدام فضيحة سياسية من العيار الجامبو .. فضيحة ناس بتبيع وبتتاجر في حاجة مش ملكها ، حاجة احنا دافعين تمنها ضرايب..

والفضيحة دي جت في وقت البلد فيه مقبلة على تغيير..

وأهم حاجة بتهم الشخص العادي في التغيير هو القضاء على الفساد وضرب آلياته..

واللي حصل بالونة اختبار للنخبة والأحزاب والإعلام وكل اللي عايز يفكر في التغيير..

والنخبة والأحزاب والإعلام بيتهمونا بإننا سلبيين ، وما بنشاركش ، وما بنعملش ، وما بنسويش.. وما بنقدرش الجهاد اللي بيبذلوه علشاننا..

تفتكروا رد فعل الناس دول على اللي حصل ، واللي ممكن يحصل أكثر منه ، مشجع على التغيير ، ولا الموضوع ما يستاهلش التفكير في التغيير وخلونا نفكر فيه لما تستجد حاجة تقيلة؟

خلص الكلام

[om marawan]

والله الحاجات التقيلة كترت اوى اوى والواحد مش عارف يغير ولا يحاول يصلح فى التوب الدايب

يعنى فين أول الخيط وهل هو خيط واحد ولا شبكة عنكبووت الفساد مش حكومى بس ولا وزارى بس ولا حتى إدارى

فيه جزء من الفساد موجود فى الناس نفسها انا لو حكيت لحضرتك الناس بتعمل ايه عشان تسرق فى موضوع القرار الوزارى ده مش هتتخيل

كل سرقة او مشكلة فى البلد تاكد انها بتتم على مستويين صغير وكبير

لكن بصراحة مجلس الشعب ده أضرراه بقت اكتر من فوايده ده لو كانت موجودة

تفتكر حضرتك نلغيه أحسن فى حركة التغيير لحد ؟؟