عين الحسود فيها عود

[se_ Elsyed]

ده موضوع عن الحسد غير اللي كتبه موحبيط قبل كده ...

يعني ماتجيش يابو عمر وتحطلي وصلة وتقولي ماحنا تناولنا الموضوع ده قبل كده وكان بعنوان الحسد كان أصلة لبان دكر والنق مش عارق كان أيه ؟ ... عارف يا سيدي ..

ولكن أنا قصدت أفتح السيرة دي لما أمر به هذه الأيام من قصة واقعية تتعلق بهذا الموضوع ...

فأخوكم ملطشة معاه قوي اليومين دول يا جدعان وياريت في أنا ولكن في الواد علي إبني الصغير ( 6 شهور ) ففي واحده صديقة لزوجتي وفي نفس الوقت زوجها زميلي في العمل ... الست دي مستلمه الواد إبني وشغاله عليه في الرايحة والجاية وإحنا كل شوية جري على المستشفيات ، في الاول قولنا عادي كل العيال بتعيه ومافيش مشاكل ، لكن أصبح ذلك متلازماً لزيارتها لنا ... وما يقلقنا في الأمر إن أصبح كلامها مباشر وواضح ومابتتكسفش تتكلم على الولد حتى قدام والدته وقد أيه هو مكلبظ وياه ده هادي قوي مش زي إبني - إبنها في نفس عمره بالظبط - و و و ..

الأول أخدنا الموضوع عادي وكنت أحاول على قدر الامكان أن أهديء من روع زوجتي وأهون عليها الامور وأقول لها إن المرض والصحة أشياء بيد الله وحده وعليها ألا تضع هذه التهيؤات في بالها ... إلخ ..

لكن صراحة تكرر الموقف أمامي أكثر من مرة وكل مرة يمرض الولد مرض شديد جداً وندور به على المستشفيات وأقربها هذا الأسبوع فلي الأن أكثر من 4 أيام يومياً أذهب به إلى المستشفي لدرجة أن الطبيبة المعالجة له إستغربيت من هذا وقالت لنا " مانتوا لسه كنتوا عندي من حوالي أسبوعين ولسه الولد يا عيني مخلص كورس مضادات حيوية 500 ملجم .. وأضطرت لسوء حالته ان تكتب له على كورس تاني سيبنتهي غداً يعني كورسين مضادات وتنفس صناعي وبخار وحقن وبلاوي زرقا في أقل من شهر "

والولد حول حياتنا لعذاب فهو على صرخة واحده ليل نهار ولا نعرف ما به وأصبحت أمه مثل المجنونة من قلة النوم والراحة ....

وبالرغم من اننا لم نزور هؤلاء الناس من حوالي سنة تقريباً .. إلا انهم في كثيرمن الأحيان يحرجوننا ويخبرونا بإنهم في الطريق لزيارتنا فلا نملك إلا أن نرحب بهم .. ومن بعدها يصبح معروفاً ما سيحدث ...

وقامت هذه السيدة بتوسيط بعض صديقاتها المشتركات مع زوجتي ليقوموا بالتقصي ومعرفة أخبار ماذا يأكل هذا الطفل ليكون كذلك وما سر الخلطة العجيبة التى تجعله هكذا ... إلخ ..

والمصيبة بإني متأكد بأنها لا تقصد أن تحسد ولكنها تفعل ذلك بدون قصد ... وهو نوع من انواع الحسد فقد يحسد الإنسان منا نفسه او نعمة لديه .

فبالله عليكم قولوا لي أعمل أيه .. فأنا لا أبالغ فيما قولته لكم ..

فهل أقوم بتأجير 2 هنود يروحوا يضربوها علقه هي وزوجها ؟ ..

ولا نقطع علاقتنا بهم ؟

ولا أخزق لها عنيها علشان تبطل ؟ ...

ولا أيه ؟

المعذب س س :lol: mc(:

[جـورج]

[فهل أقوم بتأجير 2 هنود يروحوا يضربوها علقه هي وزوجها ؟ ..

ولا أخزق لها عنيها علشان تبطل ؟ ...

ولا أيه ؟

المعذب س س  ngh:  mc(:

هى دى الخلاصه عشان تريح دماغك

وأضطرت لسوء حالته ان تكتب له على كورس تاني سيبنتهي غداً يعني كورسين مضادات وتنفس صناعي وبخار وحقن وبلاوي زرقا في أقل من شهر "

اولا الف سلامه للمشرف الصغير

ثانيا

من وصفك لحاله " على بيه " اعتقد انه بيمر بازمه تنفس و قد عانيت مثلك كتير مع ابنى و لكن احب اطمنك ان الحاله دى بتروح من الاطفال عند سن اربع او خمس سنوات

و انت عارف طبعا نوعيه الطقس اللى احنا عايشيين فيه

مره تانيه الف سلامه

هات الاتنين الهنود بسرعه

:lol:

[Salwa]

مساء الخير ......

سلامة على ..الف سلامة عليه ..

والله ياسى السيد وكأنك كنت بتحكى معاناتى مع ابنى ..// عقبال ماتشوف على زيه // آهو الآن عنده 19 سنة وماشاء الله عليه....فى كل شئ ...ربنا يحمى ولادنا كلهم ..

برضه الولد كان ..لمض قوى ...وصحته برضه 100 %..وما يبطلش حركة وبصراحة ذكاؤه مش بتاع سنه ..// زى كل الولاد المصريين //....وكل اللى يشوفه يقول عنده 3 سنين بس ؟؟ او عنده 4 بس ؟...وكل ما يزورنا حد ......الولد يسخن ..

وفجأة ....بقى يسخن وتصل درجة حرارته ل40 ..بدون مقدمات ...

يعنى من 37 الى 40 على طول .....وكنا نجرى بيه تحت الدش .وعلى المستشفى .

واللى شفناه معاه ....يصعب وصفه ......// ومعندهوش حاجة //..

وكنت اكلمهم فى مصر وانا ابكى ...ويقولوا لى ضعى مصحف صغير مع حبة البركة وملح فى حجاب وضعيه فوق سريره ........

وفى يوم كانت درجة الحرارة عدت ال40..وبرضه جرينا على المستشفى وعملوا له رسم مخ ......ومفيش حاجة ...الولد معندهوش حاجة ...

والآخر قال الطبيب لزوجى ......هل تدخن ؟؟...قال له ..ايوه ..

قال له امنع التدخين ...لو بتحب ابنك ..

وعندما وصل لسن 7 سنوات ......بقى عنده مناعة ..من عين الحسود..

بس حقولك على حاجة واوعى تضحك ......

ابنى لا يتحدث العربية ......للأسف // انا السبب //..

لكن لو حد قال ....معقول انت كذا وكذا ...ودراستك ..ومش عارف ايه ..

يقول ...بالعربى ...خمسة فى عينكم ....ويضحك ومحدش عارف هو بيضحك ليه ؟؟

واكثر من مرة احاول اخليه ينسى ....يقوللى ماهم بيقولوا ..انت اكبر من سنك ..

لأنه مرة وهو صغير سمعنى بقول بصوت منخفض ...خمسة فى عينكم ....لما زارتنى صديقاتى وقلن هذا الطفل غير طبيعى .....

عموما من ايامها ..زوجى ترك التدخين ........وفعلا ابنى اصبح افضل ..

فيه حسد وده شئ معروف ......لكن برضه فى اوقات كتيرة بتكون فيه اسباب اخرى ..

وحكاية وزن الاولاد ...انا مثلا اولادى وهم عندهم شهرين كان وزنهم 10 كيلو ..وبرضه نفس اللى بتقول عليه .........يقولك لازم تضعى صورته على علب الحليب المجفف ..

وكنت اشعر بالقلق .....لكن يعنى ...حاتخبى ولادك ؟؟

قول يارب احميه ....

وسلامة على الف سلامة عليه ...

[se_ Elsyed]

والله مابدخن يا مدام سلوى ... انا باكل حواوشي بس وممكن ابطله

عالعموم انا هادرس الفكرة باعت تأجير الهنود دي خاصة وان جورج بيأيدها

[afiona]

مبدئيا، سلامة الباشا الصغير يا معالى الوزير المشرف المنسق المهيب...

ثانيا، بلاش هنود لأن دول عينهم تفلق المقطم بحالة و إثنين منهم يفلقوا جبال أطلس...

إضرب خناقة مع الرجل (الصبح بدرى مثلا وهو بيشرب شاى أدلقه عليه) ....لو كلمك و قالك إنه جاى هو و المودام يتأسفوا عن ما بدر منك (أصل العالم دى لزقة) إعمل نفسك لا تتحدث العربية...أو تظاهر بالخرس ....

و ألف سلامة لعلى كمان مرة....

[disappointed]

أوّلا ألف سلامة على المعلمّ سى السيّد جونيور :angry:

ثانيا: أعتقد والله أعلم أن الموضوع لاعلاقة له بعين هذه المرأة...فلو كان الأمر كذلك لكان الولد فى حالة جيّدة طوال الوقت ولايصاب بالمشكلة إلاّ بعد أن تراه هذه المرأة , ولكن الواضح من كلامك أن مشكلة ضيق التنفّس أصبحت مشكلة مزمنة , ولهذا أعتقد أن الولد مصاب بضيق وتهيّج تحسّسى فى الشعب الهوائى (وهى أحد درجات الربو الشعبى) بدليل إحتياجه كما تقول لجلسات إستنشاق البخار (وهى التى تحتوى على موسّعات الشعب الهوائيّة) , وإن كنت أطمئنك ألاّ تقلق لأن هذا النوع من الربو كلّما بدأ فى سن مبكّرة كلّما كانت نسبة إختفائه فى سن الــ3 سنوات عالية بحيث يعود المريض طفلا طبيعيّا وصاغ سليم

وعلى فكره:

نسبة عالية جدّا من الأطفال فى الخليج يعانون من نفس المشكلة لكثرة إستخدام التكييف , حيث يعيش داخل التكييف نوع معيّن من الفطريّات التى تهيّج الصدر عند إستنشاقها ....حتّى إسمها الدارج فى المراجع الطبّية هو Air Condition Fungus

والإسم العلمى

Aspirgellus Fumigatus

وحتّى تطمئن تماما على موضوع عين الست دى و تصرف نظر عن موضوع الجماعة الهنود دول فأنا أعتقد أن هذا الموضوع عن مشكلة الباشا الصغيّر مكانه الصحيح فى باب عيادة المنتدى , فالموضوع لا يعدو كونه حساسيّة صدريّة سيعانى منها قليلا ثم يصبح معافى تماما بإذن الله و تتحسّن حالته كلّما كبر فى العمر حتّى تزول هذه الحالة عند دخوله الكى جى تو وعليك خير

وألف سلامه ksh:: ... ربّنا يطّمنك عليه وتنزل بيه المنتدى قريّب يساعدك فى شئون الإشراف و يشرب منّك الصنعة :D

[فــيــروز]

ارق تمنياتى ل على عليوه ابن س.س. بموفور الصحه يا رب :angry: ksh:: ربنا يطمنك عليه يا س.س. و اى خناقه احنا موجودين :D

[se_ Elsyed]

متشكرين يا رجالة مانجلكمش في حاجة وحشة ...

يا موحبيط ياخويا الواد مالحقش يتكيف ولا يشوف التكييف حتى .. ده وصل السعودية في شهر 9 وأنت عارف الجو بيبقى عامل هنا إزاي يعني من وقتها وانا ماشغلتش التكييف إطلاقاً ...

على فكرة يا جماعة جو الرياض في غير فصل الصيف بيكون خرافة ولا محتاج تكييف ولا غيره ...

أما بالنسبة لكلامك

فلو كان الأمر كذلك لكان الولد فى حالة جيّدة طوال الوقت ولايصاب بالمشكلة إلاّ بعد أن تراه هذه المرأة

هو كده بالظبط يا وليد وإلا ماكنتش وجعت دماغكم وجيت أندب هنا ....

الواد بيبقى زي الفُل وويم ما الست تشرفنا بيتعفرت بعدها ....

موضوع التنفس ماحصلوش إلا الشهر اللي فات بعد ما جم يزرونا علشان موضوع أصابتي أنا واخويا .. وطبعاً شافت الواد وإديتلوا حته على ما قسم ونسيت أنا نفسي وحالتي وجريت به على المستشفى لأنه ماكانش قادر يتنفس ...

الأسبوع اللي فات جت برضوا وباصت حتة واحده عالطاير .... الواد ماكملش يومين ودرجة حرارتة أرتفعت لأربعين فجأة وجاله إحتقان في الزور وإلتهاب في الأذن ... وكل اللي يسمع كده يقولك تغيير جو إنتوا بتخرجوا ليه في الجو ده ؟... قلت لهم أقسم بالله لا خرجنا ولا شوفنا الشارع .... ده الشارع بحاله هو اللي جالنا :D

[Handicraft]

أولا الف سلامة للأستاذ على وربنا يتم شفاه على خير ان شاء الله

ثانيا آسف والله يا ابو السيد انا لسه داخل الموضوع بتاع الحسد النهارده بس فاعذرنى الرد جه متأخر شويتين بس انت عارف الظروف بقى.

ثالثا كل الناس اتكلمت بس محدش قال اى ذكر للحسد وان فعلا ممكن يكون الولد بيتحسد وفى الحاله دى عليك بالرقيه الشرعيه وده مش عيب بدون اهمال التوجه للطبيب للتداوى.

طيب احكيلكم موقف ظريف من حوالى سنه ونص ابنى عبد الله دخل المستشفى وكنا فى رمضان فى مصر الساعة 3 الفجر والدكتور قرر انه حيركبله محلول المهم الولد تانى يوم مش ممكن يبطل عياط نهائى والولد ينظر ليا وهو بيعيط ويحاول يجى ناحيتى اروح اخده من مامته دقيقة ويلاقى نفسه لسه تعبان يتجه بعنيه لمامته ويروح ناحيتها وعلى كده طول اليوم .

المهم الدكتوره المسئول كانت بتتابع الحاله بالتليفون من البيت والهانم سايبه طبيب امتياز هو اللى بيعالج الولد الدكتور بعد ما احتار فى عبد الله مش عارف فيه ايه لقيت الدكتور اخد عبد الله شاله وبدأ يرقيه.

تخيلوا الموقف والولد مش ممكن يسكت وبيتألم المهم اتخانقت مع الراجل وطلبت مدير المستشفى وقدمت شكوى فى الطبيبه وخرجت الولد بعد ما كتبت اقرار انى المسئول واتصلت بدكتور معروف ورحنا وتخيلوا الولد كان بيعيط ليه علشان الكانيولا اللى راكبه فى دراعه مجرد الدكتور ما شالها الولد هدى وسكت خالص واتضح بعد كده انهم كانوا بيدوا الولد علاج غلط اصلا.

المهم نرجع للموضوع الأصلى الحسد موجود وعلاجه بالرقيه الشرعيه والله هو المنجى وربنا يحفظ ابنك زابنى وكل اطفال الزملاء فى المنتدى.

[se_ Elsyed]

طيب احكيلكم موقف ظريف من حوالى سنه ونص ابنى عبد الله دخل المستشفى وكنا فى رمضان فى مصر الساعة 3 الفجر

الف شكر يابو عبد الله .. الله يكرمك ..

بس الغريبة إن إنت قولتيلي قبل كده إن عبد الله عنده سنة بس ... يبقى عيي إزاي من سنة ونص ؟ جاوبني الله يخليك أنا مش ناقص لخبطة

طب خلاص ماتزعلش أنا بأضحك معاك ..

بالنسبة للرقية الشرعية ... الحمد لله رب العالمين بدأت فيها بالأمس ونتائجها رائعة بفضل الله .

[R.M.G.]

شوف ياسيد سي السيد

انا ابني وهو صغير كان حلو أوي دلوقتي بقى شبه والدته المهم اتلطش مره عين الواد قعد حوالي 3ايام مانامش فيهم 3 ساعات وبطريقة مستفزة كان دايم البكاء المهم صديق لي اقترح على اني أرقيه وأوصاني بقراءة سورة البقره انا ماكدبتش خبر ونمت ونيمت الواد وأنا محتضنه وقرأت سورة البقرة كامله والله ولا تتصور النتيجة الولد نام نوم عميق من الساعة 11مساءا الى اليوم التالي الساعة الواحدة ظهرا وكان مستغرق جدا جدا

جرب وستدهشك النتائج