س س يحاور القرين

[se_ Elsyed]

سمعت أمس ليلاً خبرين يسدوا النفس قبل النوم وحسيت إن زي ما يكون واحد ضربني بالبونيه في عيني اليمين ولسه هاشوف مين لقيته ضربني البونية التانية في عيني الشمال فأنطفأت الكشافات عندي وأصبحت لا أرى ..

الخبر الاولاني بيقولك " أخر سفينة تبحر من ليبيا وهي محمله ببقايا المعامل والصواريخ والمعدات النووية التى كانت تملكها ليبيا ... طب رايح فين يا عم القبطان .. رايح أمريكا "

يا سلام !!!! إشمعنى ؟... يعني ليه الحاجات دي لم يتم تدميرها في مكانها على الأقل ليبيا تستفيد بالصفيح الخردة ويجبولها قرشين مش بطاليت لو باعتهم في وكالة البلح او السبتية ... وليه أمريكا تستولي عالهلوما دي عالجاهز ... مش فلوس أيتام دي يا جدعان ومليارات إتبعزقت عالأرض بالأونطة ؟

الخبر التاني " أمريكا تؤكد وجود نشاطات عسكرية لها في الجزائر هذه الأيام ولكن تنفي وجود قواعد عسكرية لها هناك "

قشطة بالهبل .. حتى الجزائر !!!! يعني علمونا ساندوتش هامبورجر يا س س ... إسرائيل ودول الخليج والعراق من الشرق ... وليبيا والجرزائر من الغرب ... وجنوب السودان وأثيوبيا من الجنوب ... ومابقاش قدامك إلا إنك ترمي نفسك في البحر المتوسط وغنت أساساً بتغرق في شبر ميه .. يعني بقى ضهر للحيط يا جميل ....

فكان فيه واحد قاعد جانبي فلقيت نفسي بأقول له يا أخي أنا في جملة عندي عايز أقولها تناسب هذه المواقف وبصراحة خايف لأنها غير لائقة ولو قولتها أو كتبتها ممكن أخدلي فيها إنذار ومش بعيد بونية كمان وانا مش ناقص أساساً .. فقال لي أيه هي الجملة دي .. قولت له إديني 5 دقايق أمخمخ وأعيد صياغتها بحيث تكون ملائمة لكل الثقافات وتتماشى مع الأداب العامة .. وفعلاً حصل ورجعت له تاني وقولت له :

- الجملة هي " ليه الدول العربية بتبيع نفسها كده بسهولة وبدون مقابل " فور فري يعني " "

- فقال : أيه يا عم س س إنت ماسمعتش عن بعض بنات الهوى اللي بيشتغلوا الشغلانة دي لمجرد الهواية بدون مقابل " فور فري برضوا ".

فقلت : يــاه دي هواية إيه المنيلة دي مع إننا في زمن الإحتراف.. يعني هات وخد وإحنا شغالين خد بس ولما نيجي ناخد بناخد على دماغنا .

ولسه بألتفت ناحيته تاني لقيته زي ما يكون خير اللهم أجعله خير إتبخر فناديت عليه وقولت له يا عم ياللي كنت جانبي إنت روحت فين فرد عليه بصوت عفاريتي وقال له أنا قرينك يا س س وظهر تاني في صورة شاب حليوه وشه أبيـض وشعره أصفر وعيونه خضرا ..

فقلت له : قريني إزاي يا با ده انت احلي مني والقرين المفروض يبقى صورة طبق الأصل من صاحبه ؟

فقال : هو كده انا قرينك وخلاص عندك مانع ؟

وراح مديني ضهره وماشي .. فلمحت على قفاه البار كود الأمريكاني .. قولت قشطه . حتى انت بقيت أمريكاني ؟.... يعني " قرين من زمن العولمة "

فقولت اخد وأدي معاه في الكلام ونعرف أخرته أيه ...

فاتحايلت عليه يقعد شوية وسألته : بس إنت أزاي بقيت أمريكاني كده يعني إنسلخت من هويتك العربية ليه ..

فقال : يا عم هوية أيه وبطيخ أيه إنت لسه عايش يابني في الأوهام دي ؟

فسألته : أوهام ؟

قال : أيوه أوهام ... يا حبيب قلبي يا حته من كبدي إحنا داخلين على أيام سودا وعلى شرق أوسط أمريكاني ورياح التغيير ستهب على الجميع وعلى الكل كليلة... عشان كده لازم تغير نفسك قبل ما تتغير غصبٍ عن عينك .

فقلت : أتغير ؟!!! :D .. يعني أبقى أمريكي أو متأمرك يعني ؟ طب وثوابتنا وتقاليدنا أوديهم فين ؟

فقال : يابني إنت مخك تخين ..

فقلت له : إحترم نفسك بدل ماقل أدبي عليك ... خليك محترم

فقال : معليش أنا أسف... يا س س يابني ثوابت أيه ومتحركات أيه ؟ ... يابني إنت في زمن العولمة يعني الحاجت دي بقت موضة قديمة ... ولا ثوابت بعد اليوم إلا الثوابت الأمريكية ومش هايتم إعتمادك كإنسان تستحق العيش إلا إذا كان معاك شهادة الأيزو الأمريكانية .. يعني علشان أبسطهالك لازم يبقى معاك شهادة إن إنت مطابق للمواصفات الامريكانية ... وإلا هاتبقى إرهابي وييعتوك على جوانتانامو ويحطوك على التونجر ويظبطولك مخك ...

فقلت له : شوف يا عم قرني .. قصدي يا عم قرين ... انا أكرم لي أموت وانا زي ما أنا كده ولا ييجي عليه اليوم اللي أتأمرك فيه وأصبغ شعري أصفر وأركب لينسز ملونه في عنيه المعمصة علشان أعجب الأمريكان ... وبعدين بقى يودوني جوانتانامو ولا حتى تورا بورا .. اهو يبقى نصيبي كده و أبقى شوفت مكان جديد ولو رجعت بالسلامه أبقى أكتب لكم عنه في المنتدى وأحكيلكم حصل لي أيه هناك ده لو رجعت ....

فقال : يعني ده أخر كلام عندك ؟

قلت : أيوه .

فقال : طب باي باي أخلع أنا بقى وخليك مع نفسك .

فقلت : رايح فين وسايبني يا قوقو ... شكلي هايبقى وحش من غير قرين في وسط الناس .

فقال : رايح أدور على واحد روش أو كول يفهمني وأفهمه وبيعرف يتكلم لغة العصر .

فقلت : في داهية ... القعاد لوحدي ولا قرين السوء .

[Handicraft]

سبحان المعز المذل.

فى بلاد بعيده حيث تسكن الآنسه كرامه كانت تهان فى كل يوم عندما تتجرأ على رفع صوتها على يد السيده سلطه، وكانت تغتصب فى كل يوم مئات المرات حتى تحولت الآنسه كرامه إلى الأستاذ خوف فى عمليه جراحيه مدهشة على يد الطبيب جلاد.

ومرت السنون وفى يوم جاء من بلاد بعيده السيدة قوه يدعمها الأستاذ طمع فقررت ان تحط رحالها فى بلاد الآنسه كرامه لا لتدافع عنها معاذ الله ولكن لبسط سلطتها وتوسيع نفوذها واظهار قوتها وحتى تتسيد الجميع هل جاءت لتدافع عن الآنسه كرامه بالطبع لا فهى اغتصبتها من قبل فى بلاد مجاورة بلا رحمة.

هل تدرون ما حدث سارعت السيده سلطه تعرض على السيدة قوه نفسها ومالها وشرفها وان تكون خادمة لها فى سبيل ان تتركها تحكم البلاد لتذيق الآنسه كرامه طعم الذل للأبد، ذلت السيده سلطة وامام أعين الآنسه كرامه، فهل تفرح الآنسه كرامه لعدالة القصاص أم تقف مع من اغتصبها مئات المرات وتدافع عنه وهو من لم يدافع عن نفسه.

انا حقا لا اعرف ماذا تفعل الآنسه كرامه فهل تعرفون انتم لتدلونها؟