حلم ليلة شتا !!

[فــيــروز]

ما ساحكيه الآن هو حلم "والله العظيم حلمت كده" رايته بالامس

وقمت من النوم مخضوضه mfb: مش عارفه ليه

حلمت خير اللهم اجعله خير انى فى احدى المدارس اللى كنت فيها خلال الدراسه بس مش قادره افتكر انهى واحده فيهم hpc:!:

وكنت مع احدى صديقاتى اللى كانت معايا فى ابتدائى ومن ساعتها مشافتهاش "مش عارفه ايه اللى بيخلينى احلم بيها على فترات طويله رغم انى لم اقابلها من ييجى 15 سنه مثلا او اكتر !!"

وكنا ماشيين سوا ولقيت واحد واقف قصادنا و مدينا ضهره

اول ما التفت لنا لقيته مين !! mfb:

مين cbyb:

لقيته حسنى مبارك lo:: بس كان شكله غريب !! قصدى يعنى كان اكثر شبابا مما يبدو عليه فى التليفزيون واللى استغربت له "و اتضايقت له اوى اما صحيت" انى كنت باسلم عليه بحراره و انشكاح فظيع cr((: ومش مصدقه انه بيسلم عليا بلطف و يبتسم لى كده !!

المهم ان الراجل مشى فجاه ولقيت نفسى باقول لصاحبتى : ايه ده انا كنت عاوزه اقول له انت شكلك ليه مختلف فى الحقيقه عن ما بنشوفك فى التليفزيون؟ شكلك اصغر تبقى اكيد انت مش الريس .. وفضلت ادور عليه عشان اقول له كده بس هو اختفى فص ملح وداب !! حتى انا فى الحلم قلت هو اكيد جه مكان زحمه زى ده من غير اى حراس عشان محدش متوقع يشوفه فى مدرسه !! lo::

صحيت من النوم باقول مصيبه يا فيروز لو شفتى حسنى مبارك تزبهلى الازبهلال اللى حسيتى بيه فى الحلم ده lo:: لآ وتبقى مبسوطه و سعيده و فرحانه انك بتسلمى على الريس زى الناس اللى بتتريقى عليهم وقلت اسالكم تفتكروا لو قابلتوا الريس فى يوم من الايام تظنوا رد فعلكم هيكون ازاى؟ ويا ترى فيه اى دلالات سيئه من عقلى الباطن عن الحلم الغريب ده mfb: وهل انا منافقه مثلا وباتمنى انى اقابل الريس بس عقلى الواعى مش معترف :P والله الحلم كان زى ما قلته لكم بالظبط والله على ما اقول شهيد cbyb:

تم تعديل 9 مارس 2004 بواسطة فــيــروز

[خاطر]

بما أنك شفتيه شباب

وشكله متغير

وسلمتى عليه بحراره

أقدر أفسرك الحلم

بأن أللي شفتيه ده

خير اللهم اجعله خير

هو مبارك الأبن

قصدي السيد الرئيس

جمال مبارك hpc:!:

[out el koloub]

صراحة يا فيروز لو حد من العامه قابل الرئيس أو أى شخصيه عامه و مشهورة فى بلدنا، مش هايقدر يعمل أكتر من اللى انتى عملتيه، يعنى هايسلم عليه و يكون مبسوط و مبتسم و بس، لأن الحراسه اللى حوالين أى شخصيه عامه مهمتها تقصر فى زمن تواجد هذه الشخصيه فى أى مكان عام لأسباب كتيرة، و دة شئ طبيعى و فى معظم بلاد العالم . فأطمنى خالص و و لا يهمك فكرى أكتر فى صاحبتك اللى فى الحلم حاولى تلاقى نمرتها أو عنوانها و تسألى عليها، و تجددى علاقتك بيها، و يا سلام لو قلتيلها على السبب، و انك طبعا فكرتى فيها و قررتى تدورى عليها و تسألى عنها :huh: .

[ragab2]

شاهدت

عن قرب رئيسين لمصر

شاهدت عبد الناصر فى قاعة جامعة القاهرة حضر فيها ليخطب وكان بينى وبينه مترا واحدا وسلم علينا بايماءة

وشاهدت الرئيس محمد نجيب بعد اقالته وفرض الحراسة عليه وسلمت عليه يدا بيد

وكان علما وليس حلما

[فــيــروز]

خاطر كتب

أقدر أفسرك الحلم

بأن أللي شفتيه ده

خير اللهم اجعله خير

هو مبارك الأبن

يعنى لو الحلم اتحقق يبقى لى الحق اطلب الحلاوه !! ولا الشعب هيعتبر الحلم هو السبب و يطالب باعدامى فى كتب التاريخ !! :huh:

قوت القلوب كتبت

فأطمنى خالص و و لا يهمك فكرى أكتر فى صاحبتك اللى فى الحلم حاولى تلاقى نمرتها أو عنوانها و تسألى عليها، و تجددى علاقتك بيها، و يا سلام لو قلتيلها على السبب، و انك طبعا فكرتى فيها و قررتى تدورى عليها و تسألى عنها

شكرا يا قوت انك طمنتينى rs: بس هيكةن صعب جدا اوصل لصديقتى دى لان وقت ما كنت اعرفها اما كنا فى ابتدائى ماكانتش التليفونات انتشرت فى مصر ولم يكن لدينا تليفون وبالتالى حتى تليفونها لا اعرفه .. و اعتقد انها هتكون نسيت شكلى اللى اتغير اصلا ويمكن ماتعرفنيش خالص

دكتور رجب كتب

وشاهدت الرئيس محمد نجيب بعد اقالته وفرض الحراسة عليه وسلمت عليه يدا بيد

وكان علما وليس حلما

لكن لو حضرتك قابلت الريس شخصيا وسلمت عليه .. تفتكر ايه الكلام اللى ممكن تقولهوله !! rs:

[Salwa]

شوفى يافيروز ........

انا لسة يادوبك ......تناولت طعام الغداء.....وقلت لنفسى اتناول الشاى وانا ...اتصفح المحاورات ...

بدأت بالمناقشات العامة ....ثم قلت اشوف دعوة للابتسام ..

.....وقلت اشوف فيروز كاتبة ايه ؟؟....

شرقت وانا بشرب الشاى من كثرة الضحك ......يعنى بركات الحلم ./ كانت حاتطلع روحى /

كان جميل يافيروز ؟؟؟؟؟؟

ده دليل على انه ضميره مرتاححححححححححح........قوى قوى .......واعماله طيبة جدا جدا

وسيمائهم على وجوههم يافيروز .......ربنا يكتر من امثالك ......

انتى بتشوفى كل حاجة حلوة ......يابختك ...قصدى ..يابخته ..

بتسألى الواحد يشعر بايه لو شاف الرئيس ؟؟...اى رئيس؟؟؟

عادى يافيروز ......واقل من العادى ........

حسب رؤيتك ...تكون نظرتك واحساسك ....

يعنى لو هو انسان عظيم وعمل حاجات عظيمة وكان قدوة .....بتشعرى بالفخر وانتى بتصافحيه ..

لكن ..؟؟...ايه يعنى تشوفيه ؟..ملهاش اى اهمية ...بجد ....

انا لا اقلل من شأنه او شأن غيره ...

ثم دى ناس تضع حواليها سياج ..آسفة ..اقصد ..تعيش فى بوتقة وحدها .......صعب حتى ان تريه فى الحلم ........دى معجزة يافيروز ......انك حلمتى حلم زى ده ..

ربنا يعلى مراتبك ....

// اكيد ماما بكرة حاتجيب لك مرتبة جديدة //..

اما حكاية ان ابنه جاى فى صورته ....!!!.....اليومين دول بالذات ...الحكاية دى بعدت قوى .

كلللللل المجموعة .......تحت الميكرسكوب ...لابد من تغيير الفريق كله ..واحضار مدرب آخر....جديد ..

يافيروز .. بلاش تتعشى احسن ....

[فــيــروز]

سلامتك يا مدام سلوى :) والله ماكانش قصدى

انا صحيت من النوم ناسيه الموضوع اصلا وبعدين وانا بالبس عشان آجى الشغل افتكرته وحسيت انى تنحت و اتخضيت كده :o خوفا من ان يكون له دلالات انا مش واخده بالى منها rs:

هو كان عادى زى ما بنشوفه بس من غير تجاعيد خالص ووشه منشرح و منور وكأنه فى اواخر الثلاثينات مثلا !! :huh:

تفتكرى حضرتك انها معجزه انى احلم بيه !! طيب الحمد لله هاكتبها فى دفتر الاحداث الهامه فى تاريخ العائله الكريمه :D

اما من حيث المراتب لااااااااااااااااااااااااا .. انا عندى اكبر عدد مراتب فى البيت وكل حد عاوز يخلص من مرتبته يجيبها يحطها عندى اما بقيت بانزل من على السرير بسلم cbyb:

اكلت انا ايه امبارح فى العشااا !! هو كان الغدا بس اخرته عشان اتاخرت فى الشغل خالص .. كان مكرونه و بفتيك .. يبقى الحلم ده بركات البفتيك rs:

[إبن مصر]

لا حول ولا قوه الا بالله ..

بركات سمير رجب بانت وعلى مين على فيروز|.......

مخها اتغسل يا ولداه وبقيت تشوفه حتى فى المنام وايه لابس ابيض فى ابيض وشكله اصغر..

فيروز يا بنتى .... لازم نلاقى حل للموضوع ده...

اصل لو انت قلتى كده.. :huh:

يبقى كويس بس احنا مش واخدين بالنا

ربنا يسامحك يالى فى بالى

مش عارف ليه افتكرت فيلم الكارتون

monsters او المخوفاتيه النسخه المدبلجه rs:

[فــيــروز]

:huh:

ماهو عشان كده يابن مصر باقول انى كنت مخضوضه و استغربت نفسى جدا اما صحيت rs: وقلت مصيبه احسن يكون عقلى الباطن ماشى عكس عقلى الواعى rs: هو دكتور ابو حلاوه هيغيب؟ cbyb:

[ragab2]

وشاهدت الرئيس محمد نجيب بعد اقالته وفرض الحراسة عليه وسلمت عليه يدا بيد

وكان علما وليس حلما 

لكن لو حضرتك قابلت الريس شخصيا وسلمت عليه .. تفتكر ايه الكلام اللى ممكن تقولهوله !! 

لو

قابلته وشوفته فيس تو فيس

هاقول له كلمتين حلوين من بتوع سمير رجب

عشان أروح البيت

[DARWEEN]

رغم انى لم اقابلها من ييجى 15 سنه مثلا او اكتر !!

يعني عاوزه تفهمينا أن عمرك أكبر من كده .... :) :o

قصدى يعنى كان اكثر شبابا مما يبدو عليه فى التليفزيون

منك لله يافيروز .... عاوزه تصغريه تاني احنا ماصدقنا ياستي

بس هو اختفى فص ملح وداب !!

يارب .... يسمع من بقك ربنا ويجعلها رؤيا مش حلم في الجزئيه دي

عشان محدش متوقع يشوفه فى مدرسه

rs: rs: والله أنا كنت فاكره متعلم :huh:

[se_ Elsyed]

وسع يا جدع إنت وهو مش عايزين لمه ، أيه عمركوا ماشوفتوا واحده مغمئن عليها ؟... شوية لو سمحت ده يافندي يابو قميص أزرق .. حبة إتش تو أو يا جماعة خلوا البونية تتنفس....

حد يجيب قزازة كولونيا أفتر شيف أو إحدفلنا فحل بصل يا حاجة ياللي بتتفرجي من البلكونة ومنشكحة قوي عشان نفوق المسكينة دي ...

الموضوع ببساطة يا خوانا فيروز بنتنا لخصته في كلمتين " حلم ليلة شتا "

وشتا يعني هوا يعني لطشة برد يعني ناس مش مستغطية بالليل يعني أضغاث احلام ..

خلص الكلام ( لا مؤخذه يا حج شريف )

يالا كل واحد يروح يشوف مصلحته ... شعب مابيصدق جنازة ويشبع فيها لطم ....

فين الراجل بتاع ملــيتوا البلد

[afiona]

أعتقد إن ظهور الرئيس فى حلم بالشكل ده (مدرسة إبتدائى وناس تقوله يا صغنونة إنت يا كميلا فيتوارى خجلا) له عقوبة تندرج تحت قوانين إزدراء السلطة....

أفيونة

عضو مجلس شعب و شورى و وزراء

[se_ Elsyed]

أعتقد إن ظهور الرئيس فى حلم بالشكل ده (مدرسة إبتدائى وناس تقوله يا صغنونة إنت يا كميلا فيتوارى خجلا) له عقوبة تندرج تحت قوانين إزدراء السلطة....

أفيونة

عضو مجلس شعب و شورى و وزراء

التهم جاهزية يا أفيونة باشا وكله تمام ...

وانا قلوظت لها تهمة ما بأقلوظهاش غير للحبايب بس وهي " العيب في الزيت الملكية "

وشوف إنت بقى تاخدلها كام سنة فيها دي خاصة وإن البيه عاطف هايصرف نص كيلو زيت لكل مواطن عالبطاقة يعني يادوب تقلي فيه طعمياية واحده بس لأن الزيت شاحح اليومين دول

( وانا من هذا الممبر بأطالب كل واحد عنده عربية أنه مايرميش الزيت اللي فيها لما ييجي يغيره لأننا داخلين على أيام سودا في ظل وجود عاطف بيه عبيد أطل الله بقاءه ) ..

ده فيروز هاتاكل ضرب علشان الحلم ده ...

والله عال كل من هب ودب بقى يحلم بصاحب الفخامة وكأن الدول مافيهاش أجهزة رقابية ولا أجهزة تعويضية .... وبقى أي مواطن من عامة الشعب تسول له نفسه المريضة بإن الكبير يجيله في منامه ....

آه يا بلد ...

شوفتوا أهو علشان كده إحنا مش عايزين نمنحكوا الديمقراطية ...

النهاردة واحد جالوا الكبير في الحلم .. بكره يتجرأ ويطبلب يروح ياخد فنجان شاي معاه .. بعد بكره يصحى الصبح بدري يروح يقعد عالكرسي بداله ...

[نيرون]

لا لا لا

انتم جميعا على خطأ !!!! rs:

لقد استطاعت فيروز بما حباها الله من موهبه ان تتواصل مع رموزنا السياسيه حتى من خلال احلامها :o

وان دل ذلك على شىء فانما يدل عل مدى رهف احساسها والمعيه عقلها :)

ولابد ان لا ننسى ان قيادتنا السياسيه تستطيع ان تشعر بنا ntw:

حتى فى احلامنا و دائما ما تأتينا فى الاحلام بالصوره التى نتمناها :huh:

فهنيئا لفيروز بتلك الدرجه من الكرامات

وهنيئا لنا بوجود فيروز معنا stnd::

وهنيئا لسوسكه زواج ماندلين :D

افففففففففففف بجد مليتوا البلد rs:

[فــيــروز]

دكتور رجب كتب

هاقول له كلمتين حلوين من بتوع سمير رجب عشان أروح البيت

شكرا جدا :) طمنتنى

الاستاذ داروين كتب

يعني عاوزه تفهمينا أن عمرك أكبر من كده

الحقيقه لم اجد اى غضاضه -حتى الآن- فى الاعتراف بعمرى الحقيقى rei::

واتمنى ان احتفظ بهذا الشعور لحد 30 سنه كمان bk:

منك لله يافيروز .... عاوزه تصغريه تاني احنا ماصدقنا ياستي

مانا الحقيقه مش عارفه التصغير ده دلالته كويسه ولا وحشه؟ عارف حضرتك الاحلام اللى بيقولوا فيها "شفت فلان وهو لابس ابيض فى ابيض ووشه منور .. الى آخره" بيبقى تفسيرها ايه .. عارف طبعا :huh:

يارب .... يسمع من بقك ربنا ويجعلها رؤيا مش حلم في الجزئيه دي

اللى هيجننى بقى انى كنت عماله اجرى وراه !!! :P

والله أنا كنت فاكره متعلم

وانا كمان .. بس دى كانت زياره وديه مش زيارة عمل :D

س.س. كتب:

حبة إتش تو أو يا جماعة خلوا البونية تتنفس....

يا عم "الاتش تو أو" ده هيرشوه على وشى لانى لو اتنفسته فيها شرقه ويمكن غرقه

حد يجيب قزازة كولونيا أفتر شيف

لا انا عاوزه آسانس شاديه :D

وشتا يعني ناس مش مستغطية بالليل

انا بردو توقعت ده يكون تفسير من التفسيرات B)

افيونه كتب:

له عقوبة تندرج تحت قوانين إزدراء السلطة....

بالعكس يا افيونه صدقنى انا من اكبر مشجعى السلطه فى البيت عندنا !! خصوصا بالفلفل الاخضر او الرومى et:(

عضو مجلس شعب و شورى و وزراء

متاكد انه مش الكنسيت؟ non::

س.س. كتب:

وانا قلوظت لها تهمة ما بأقلوظهاش غير للحبايب بس وهي " العيب في الزيت الملكية "

تعيش و تقلوظ يا س.س. ده عشمى بردو stnd::

ده فيروز هاتاكل ضرب علشان الحلم ده

هى حتى الاحلام هيجمركوها !! امال لو كنت حلمت له حلم وحش كان حصل ايه !! flx: اظن هيخترعوا عقوبه جديده هى "الحرمان من النوم منعا لرؤية الاحلام المثيره للقلاقل" mf(

وبقى أي مواطن من عامة الشعب تسول له نفسه المريضة بإن الكبير يجيله في منامه

امال بقى اما نجيب الدش .. هنشوف ايه ولا ايه؟ انا باظبط الايريال من دلوقت عشان احضر زيارة امريكا .. tv_: واللى عاوز يتفرج يشترك فى القناه الخاصه اللى هانشئها لاذاعة الاحلام .. ومحدش يعمل ناصح و يؤجر كرسى فى قهوه .. الارسال هيبقى متشفر و بكلمة السر و اليوزر نيم بتاعك فى المنتدى .. انتهى عصر السفلقه و الفرجه بلاش .. ngh:

نيرون كتب

وهنيئا لسوسكه زواج ماندلين

يا نينو هو ده شعار المرحله بعد مليتو البلد؟ flx: مين سوسكه ومين ماندلين؟ mf(

تم تعديل 10 مارس 2004 بواسطة فــيــروز