تساؤلات حول النقاب

[الباشمهندس ياسر]

بسم الله و الصلاة و السلام علي رسول الله

و بعد

بكل هدووووووووووووووووء

و اعتمادا علي احدي قواعد المحاورات و ان كانت قاعدة غير مكتوبة و هي ان المداخلة اذا ما كتبت صارت ملكا للمجموع و ليست ملكا لفرد

و اعتمادا علي ان الحوار ف باب الهجرة الي كندا قد اغلق

و اعتمادا علي حسن الظن في العقل الذي استدعيته للنقاش

فإنني ارجو الفضلاء ممن تناولت مداخلاتهم ... بالتجاوب الكريم وأظنهم أهل لتلبية مثل هذا الرجاء

و عليه

نبدأ

بداية أنا لست ممن يحبذ النقاب في أيامنا تلك و رغم وجود المنتقبات علي مستوي العائلة و ان لم تكن لهن الغلبة

و رغم تمام احترامي لهن لما هن عليه من فكر و ثقافة و سعة أفق تبهرك ... بكل ما تحمله الكلمة من معني

الا ان لي رأيا اخر و هو ان الذي سيدفع زوجتي المنتقبة ان تكشف عن وجهها في كل مطار لاي رحلة لنا ..

او ترفعه اثناء مرورها بكمين ليقارن بين رخصة القيادة ووجهها

او لاي سبب اخر..فمن باب .. اشتري دماغك...يبقي حجاب و دمتم

الا ان ما سلف لا يمنع ان النقاب هو الاصل و هو المستحب و ربما ارتفع الي درجة اعلي من الاستحباب

و لندع النقاش يبين لنا ما اعنيه و انا أحاول الدفاع عن النقاب بطريقة هادئة تعتمد علي الاستنارة كمبدأ أساسي

يعني احنا ناقصين

وإيه اللي مقعدها هناك دي ما تروح تهاجر افغانستان انسب لها

وبعدين النقاب عمره ما كان من الاسلام

وكمان مش عاجبها وبتشتكي

هي راحت كندا .. لنفس الاسباب اللي اي حد هنا رايح كندا عشانها

بيئة نظيفة و محترمة و الحرية فيها من حق الكل

بالنسبة لافغانستان ... طب هتروح هناك تعمل ايه..؟ عموما مش موضوعنا مسالة افعانستان دي

مسألة النقاب عمره ما كان من الاسلام...

طب همسة صغيرة يا اختي

تجاوزت البعثة النبوية ما يزيد عن 1400 عام .. منها مالا يقل عن 1300 سنة و الامة كلها بترتدي النقاب ..

فبالمنطق .. هل الامة طوال القروووووووووون دي مش فاهمه ان النقاب عادة بدوية جاهلية بحتة و بترتديه احتراما للعادات البدوية

ولا الامة كان عليها قرار سامي من امة تانية عاملالنا احتلال و فرضت علينا النقاب بالقوة الجبرية مثلا

قليلا من المنطق

طب بما ان النقاب هو ملبس جداتنا و امهاتهم الي وقت البعثة او دخولهم ف بالاسلام ......(1)

و بما ان محصلش احتلال للدول ذات الثقل ف الامة قبل السنة 1830 م .. الموافق 1246 هجريا..يعني ما يزيد عن 12 قرن و القرار من دماغنا .. (2)

و بما ان التواتر الحادث ينتفي معه التفكير .. مجرد التفكير .. في وجود تواطؤ علي الكذب مما يوحي بالصدق التام في مكانة النقاب عند المسلمين ...(3)

من (!) و (2) و (3) .. النقاب عبادة اسلامية صحيحة و ان لم ترقي الي مرتبة الفريضة

كل ده من غير ما نلتفت التفاته واحدة الي اي دليل نقلي يا استاذه منال

مش عاجبها و بتشتكي:

من حقها تشتكي لسبب بسيط جدا .. انها ليها حق و تم اغتصابه منها ..فتوجهت لاولي الامر و طالبت بحقها

يعني ما مسكتش سكينة او طبنجة و لا قنبلة يدوية ... بالعكس

بمنتهي الدبلوماسية و الادب و الاحترام ..راحت عملت طلب لاحقاق الحق طبقا لقانون البلد هناك

يعني اجراء يستاهل .. سقفة ..فعلا برافو عليها و الله .اخدت رد فعل ايجابي و جميل

ألقت اجهزة الامن بمحافظة القليوبية القبض علي عاطل يبلغ من العمر 30 سنة بعد ان قام بأرتداء النقاب حتي يتمكن من دخول منزل حبيبته والجلوس معها في غرفتها بمنزلها بمنطقة شبرا الخيمة

وإكتشف الاهالي الواقعة وتم إلقاء القبض علي المتهم وأحيل الي النيابة للتحقيق

وكانت أجهزة الامن بمحافظة القليوبية 50كم شمال القاهرة قد تلقت بلاغا من الاهالي عن اكتشافهم قيام شخص بأرتداء النقاب ليتمكن من الصعود إلي منزل حبيبته علي انه احدي صديقاتها في اي وقت

ويقوم بالجلوس معها في الغرفة لمدة طويلة بدون علم اسرتها

واكتشف احد الاهالي الواقعة وتم اعداد كمين للمتهم والقت المباحث القبض عليه

وتم الكشف عنه وانقذته الشرطة من علقة موت من الاهالي واسرة الحبيبة

تصدقي يا استاذه

انا اعرف مسلمين ... حاجة في منتهي الاجرام و الله

يبقي بالمنطق ده .. كل المسلمين مجرمين

طب هنتجاوز عن الفكرة دي كلها و نقول ان الاخت منال متقصدش كده طبعا و اني غلطان اني فكرت بالطريقة دي

و انها تقصد تقول ان النقاب بيسهل حدوث بعض الجرائم... و انها متقصدش اطلاقا تعميم الخاص

طب ما دي كمان مردود عليها .. اه و الله مردود عليها فعلا

الجريمة يا حضرات .. لا تحتاج الي لباس معين لكي تحدث

من المعلوم بالسليقة ان العقل البشري لا منتهي لامكانياته ولا حدود لقدراته .. و خصوصا لما يتعاون الشيطان ... بتبقي هاصت بقي

فاللي عايزة الفساد هتعرف توصله بسهولة اوي و اللي عاوز .. هيلاقيه ع الناصية

الموضوع بسيط اوي جدا خالص

و ان كنت شخصيا افضل ان العقاب يبقي عقابين ف حالة زي دي ..

كل واحد حر يلبس اللي هو عايزه وياكل اللي هو عايزه بشرط انه ميأذيش غيره

دي فلسفتي اللي طول عمري مقتنعة بيها

وذي ما عرفت ان هذه السيدة كبرت الموضوع ورفعت شكوي ضد وزارة الهجرة في كيبيك

وذي ما عرفت برده ان الاعلام هناك صعد الموضوع

طيب هي خلاص ربنا تاب عليها وهاجرت واخدت الاقامة يبقي ليه تعمل مشاكل ممكن تأثر علي فرص غيرها

يعني مش بعد احداث 11 سبتمبر الدنيا اتخنقت علينا احنا العرب المسلمين وبعد ما كانت تأشيرة اوربا وامريكا في متناول شريحة كبيرة من الناس اصبح صعود القمر اسهل

دي حتي تأشيرة تركيا اللي كانوا بيدللوا ليها محدش بقي بيعرف ياخدها

هما مش ببساطة ممكن يقللوا عدد المهاجرين العرب المسلمين لصالح جنسيات وديانات تانية ؟

أو مش ممكن يتعنتوا بعد كدة مع المحجبات المعتدلات في المقابلات الشخصية علي اعتبار انهم هيجيبولهم وجع الراس بعد كدة ؟

انا مش ضدها ولا ضد حريتها ان شالله تلبس طاقية الاخفا حتي المهم انها متتسببش في نتائج سلبية ممكن غيرها يدفع تمنها

فكان ممكن انها ببساطة تجيب مدرسة خصوصية لها في البيت تعلمها فرنساوي او متتعلموش خالص وتريح دماغها

اهو ده بقي تفكير جميل و ينفع يتقال عليه تفكير استباقي رائع

لكن ببساطة تامة و بالاعتماد ع المنطق بدون اي وثائق تؤيد الكلام

الحكومات لما بتفتح باب الهجرة بتبقي حاطة نسبة معينة لكل ديانة مينفعش انها تتخطاها و غالبا هتلاقي نسبة للاجناس برده

ماهو مش منطقي اني افتح باب الهجرة و ف خلال سنتين تلاتة الاقي البلد بتاعتي كلها بقت مسلمين مثلا او هندوس او سيخ

و في لحظات الاقي مجلس النواب بتاعي اتقلب كيانه و البلد تنسحب من ايدينا ف دقائق

و عليه

موقف الاخت و قضيتها مش هيأثر التأثير السلبي اللي حضرتك متخيلاه علي نسبة المهاجرين العرب عامة و المصريين خاصة

بل بالعكس

ممكن يكون سبيل لانفراجه اكبر ف حقوق المسلمين هناك او علي الاقل لفت الانتباه لوجودهم و حقوقهم بشكل اكبر

علي جنب :

طب و الناس اللي لسه مش ناوية ان ربنا يتوب عليها و تسيب البلد ظروفها ايه

فيه احتمال تدخل الجنة ولا خلاص ... كل اللي هنا مصيره بقي معروف.....؟ :aslam:

شوفو صور مريم العذراء كلها بالحجاب لكن النقاب ده مفهوم تانى مترسخ فى عادادتنا او عادات اتت من الخارج بمعنى اصح

الاخ كريم عبدو

ازي حضرتك...يارب تكون بخير

انا بس اذا سمحتلي ..الفت نظر حضرتك لحاجة واحدة

صور السيدة العذراء ... ستنا مريم ... غير معتمدة لدي المسلمين ولا قيد انمله

و لو كانت الصور معتمدة ..لكان الاولي بنا وجود صور للنبي صلي الله عليه و سلم و ال البيت و اكابر الصحابة رضوان الله عليهم اجمعين

و خصوصا ان البعثة النبوية تمت بعد مولد المسيح بما يزيد عن ال 5 قرون

ده بالاضافة ان العملية التشريعية باكملها عندنا ترجع الي القرءان و السنة .. ولا اعتماد عندنا لاهل الكتاب ف مسائل التشريع اطلاقا

تحياتي

[انسان مخنوق]

معلش لانى ليس لدى صلاحية لعمل موضوع جديد كنت عاوز استفسر عن مدى نجاح عمليات تجميل الانف وهل هيا حلال ولا ايه وضعها الشرعى .

طبعا العملية دى لبنت مش ولد

ايه افضل مكان تتعمل فيه

بس مهم اوى نسبة نجاحها

شكرا

تم تعديل 5 مارس 2010 بواسطة انسان مخنوق

[الباشمهندس ياسر]

المغالاه في اي حاجة تُعتبر تطرف وإن خير الامور الوسط

كلام جميل ... كلام معقول .. مقدرش أقول حاجة عنه

يعني لو واحدة ماشية لابسة هدوم مستفزة مكشوفة تبقي متطرفة في العري

ولو واحدة لابسة نقاب تبقي خيمة سوداء تمشي علي قدمين

المكشوفة المستفزة ف العري و ف اظهار المفاتن و ف خراب البيوت .. طبعا البيه بيروح و يقارن بين زميلتة الجامده اخر حاجة

و بين المنديل اللي هي ربطاه فبينكد عليها و تبقي ليلة مش فايته ..هههههههه..

طب بجد بقي

ممكن نقول ان اختنا المنتقبة فعلا ترتدي ما أطلقتي عليه يا اختي خيمة سوداء

لكن السؤال..

لماذا ارتدت هذه الاخت تلك الملابس

بمن اقتدت...؟

من اشار عليها بها...؟

من امرها بها...؟

ما الفائدة العائدة عليها و علي المجتمع من حولها من جراء ارتداها تلك الملابس...؟

ببساطة

اقتدت بنساء النبي صلي الله عليه و سلم

اأشار بها أخ مشفق او أب رحيم يرجو لها الجنة ... عفوا .. يرجو لها الفردوس للاعلي

امرها بها الله .. نرجع بقي نجيب ف ايات و ادلة و لا نكتفي ان فضيلة النقاب اعلي مرتبة من الحجاب و يكفي فيها التشبه بنساء النبي صلي الله عليه و سلم...؟

الفائدة العائدة عليها .. رحمت نفسها من كمية الكلام اللي زي الفل و اللي مش زي الفل خاااااااالص اللي هتسمعها

الفائدة العائدة عليا انا شخصيا .. اني مش هبص من ازاز عربيتي و اقولها .. ايه الجمال اللي ماشي ع الارض ده و لا هقولها .. هو القمر ماشي جنبنا ع الارض

ولا لما ابقي قاعد ف اي كافيه بضرب حاجة .. هقوم ناسي نفسي و ناسي اللي ورايا و اقوم عشان اتعرف عليها

الفائدة العائدة ع المجتمع .. اي حد تاني م المجتمع بقي يجاوب ..

دا أنا شفت سيدات سعوديات بيخبطوا في اللي قدامهم علشان مش شايفين من النقاب الاسود اللي حطينه علي عينيهم

طب دي مشكلة البنت اللي لبست نقاب من غير بيشة تشوف منها

انما ما شاء الله كتير اوي و بيمشوا و زي الفل و تلاقيهم بيمدوا كمان و لا اجدع شاب

يبقي بديهيا كده ربنا خلقلنا نعمة البصر علشان احنا منستعملهاش ونمشي عميان

ده غير أنه بيعيق الحركة وبحس ان الست اللي لبساه معتبره نفسها فضيحة المفروض تتداري طب ما تقعد في بيتها احسن وتعتزل الدنيا

بديهيا كده ... محدش قال ان المنتقبة تمشي من غير ما تشوف الطريق ... ده اولا

و الرد اللي فوق مباشرة بينفي ده .. ده ثانيا

اعاقة الحركة دي جات ازاي...بيركبوا كرسي متحرك مثلا عشان يمشوا

ده انا كل ما اروح اجيب طلبات البيت .. الاقي نسبة لا يستهان بيها منتقبات ف الماركت و ابقي مستغرب دي معاها الطفل و الطلبات دي ازاي

و اقول جوايا .. لما هو راجل اوي كده و ملبسها نقاب .. مش كان اولي بيه يجيب هو الطلبات

الحتة اللي تزعل بقي يا استاذه

ده كلام برده .. حد يعتبر نفسه فضيحة و ماشية ع الارض

انا مش هعلق لغاية ما اشوف هل الجملة اتكتبت ف لحظة غضب ولا مقصودة فعلا ...؟؟؟

وبعدين ما في ناس افتوا بإن صوت المرأة عورة

يبقي لو مشينا وراهم يبقي المفروض كل الستات ينزل عليهم الخرس الاجباري ويتكلموا في الاسواق وفي اشغالهم بالاشارة

ايه المغالاة دي والتطرف الفكري دة ؟

ده ربنا سبحانه وتعالي حدد مفهوم الحجاب والرسول كمان

طب انا ف انتظارك انا

انا فعلا منتظر التوضيح الكريم لحضرتك ف المسألة دي

و هكون شاكر جدا لو حضرتك جبتي دليل واحد .. واحد بس

ان النقاب مرفوض ف الشريعة الاسلامية

بس بشرط

الدليل يكون لحد محترم و يستحق اني اصرف من وقتي دقائق اقراه فيها

اتفقنا ...

وانتقد القرأن المغالاة اللي ربنا مكتبهاش علي الناس في قوله سبحانه وتعالي

{ ورهبانية ابتدعوها ما كتبناها عليهم }

وقس علي ذلك الرهبنة بالنقاب

فعلا .. الرهبانية ف ذاتها بدعة ابتدعها القوم و لم يأمرهم بها الله تبارك و تعالي

و لكن هذا القياس ... الا يستحق لفظ ... قياس فاسد

طبعا بما ان حضرتك ذكرتي انك درستي شريعة .. يبقي عارفه لفظ قياس فاسد و انه لا يحمل اي مشكلة اطلاقا الا ف الاستلالات العلمية القائم عليها

وبعدين هي حرة تلبس نقاب ذي ما هي عايزة بس تختارله المكان المناسب ومتأثرش بالسلب علي فرص غيرها

محدش بيأثر علي فرص حد

الارزاق مسألة انتهت من بدري اوي

و لو ليكي نصيب ف حاجة هتشوفيها

و ربنا يوفقك لما فيه خيري الدنيا و الاخرة و لي بمثل و للحضور الكريم ..امين

وبعدين عايزة اعرف هي لما راحت تعمل الانترفيو علشان تهاجر كانت ريحالهم برده بالنقاب وللا الهداية مجتش غير هناك ؟

بصراحة .. معرفهاش و لو اعرفها ممكن اسالها و الله

المشكلة اننا بنصدر المشاكل الي بنهرب منها في مصر للدول التي بنهاجر ليها

اللوم اولا على الحكومة الكندية لانها قبلت هجرة هذه المنقبة و غيرها من المتطرفين

طبعا في ناس هتقول النقاب حرية شخصية

خلاص، يبقي من حق المرأة ان ترتدي النقاب في الفصول الدراسية,,,,,,,,,,,ومن حق ادارة المعهد او الجامعة طردها

من حقها ان ترتدي النقاب في العمل,,,,,,,,,,,,,ومن حق صاحب العمل فصلها

من حقها ان ترتدي النقاب و هي تقود السيارة ................ومن حق الحكومة سحب رخصتها

من حقها ان ترتدي النقاب في الشارع...........ومن حق البوليس يفتشها تفتيش ذاتي حرصا على سلامة المواطنين

النقاب قنبلة موقوتة، يهدد سلامة و امن المجتمع

لاني لا اعرف مع من اتكلم....

الي عاوزة تتنقب تتفضل تروح على افغانستان، او تقعد في البيت اكرم ليها و ارحم بينا

النقاب رجعية شديدة، وعودة الي الوراء و عصر الحريم، و بعدين هي جميلة اوي كدة علشان خايفة الفتنة؟

لما بمشي في الشارع بستغرب على المنقبة الي هدومها بتجرجر منها على الارض، تراب و مياه و منظر غير حضاري بالمرة

مش معقول هننقل المظهر القبيح دا كمان لكندا بلد الجمال و النظافة

انا لو كنت كندية كنت طلبت من حكومتي وقف هجرة المتطرفين لانهم هيجوا بمشاكلهم و عادتهم السيئة

اهلا اهلا

داحنا هنتكلم لغاية ما الكيبورد يزهق مني يا انسة برنسيس

بس اسمحيلي نتكلم ف وقت لاحق بقي

دعواتكم

و سامحوني لو طولت عليكم

[Morial]

أستاذ ياسر

أولا سلام عليكم

ثانيا عندي أصحاب كتير شاروا عليا أني موجعش دماغي ومدنش في مالطة ومتفهمنيش غلط هحاول اوضح لحضرتك لاحقا قصدي

وبما ان حضرتك فاتح توبيك مخصوص لأرائي فمش من الذوق أني أتجاهل أو أرفض دعوتك الكريمة

وتأكد أن من دواعي سروري أني أناقش وجهة نظر مع شخص واسع الافق ذي حضرتك وبيستعمل المنطق في ادارة حوار وحريص علي أن يكون هذا الحوار في حدود الخلق القويم بلا تجاوزات حتي وإن أختلف مع غيره في رأي أو أراء وأكيد حضرتك قرأت عن أدب المناظرات إللي كانت من مفاخر الادب العربي وقت إذدهاره وإللي لو تسمحلي أني أورد بعض ادابها وشروطها اللي مش هتنطبق كلها علي وضعنا لأننا بنتناقش عبر النت وليس وجها لوجه

أولا ألا تسفه من رأي مناظرك مهما بدا غير منطقي بالنسبة لك

ثانيا ألا ترد علي أرائه بما يحتمل السخرية

ثالثا ألا يكون القصد منها إبراز غزارة المعلومات والأدعاء بعلم ما لا يعلم الاخر

ومع احترامي للجميع النقطة دي بالتحديد بتستفزني جدا لأن ببساطة شديدة أي معلومات في الدنيا موجودة علي النت فمش كل اللي خبط علي جوجل يعمل عًلامه علي غيره وأنا بعتبر دي سذاجة مفرطة والهدف منها واضح وهو الاستعراض وان انت سألت حبايب جوجل بتوع أسأل وأنقل عن اللي نقلوه عن العم جوجل بعد خمس دقايق من نقله صدقني مش هيفتكروا جملة علي بعضها من اللي نقلوه

رابعا ان يتواضع في خطاب الاخر ويتجنب العبارات الدالة علي الكبرياء والتعاظم والكلمات النابية

خامسا ألا يلقي علي الاخر بالاتهامات جزافا يعني لو انا دافعت عن وجهة نظر بتقول ان القرش الابيض ينفع في اليوم الاسود متجيش حضرتك وتقول أمسك بخيلة

لو أنا دافعت عن وجهة نظر بتقول أن النقاب مش فريضة متجيش حضرتك وتقول أمسك كافرة

وكن علي يقين أني علي ثقة بسمو خلقك وحسن نيتك وإلا لما لبيت دعوتك أصلا ولكن كان هذا الاستهلال ضرورة لابد منها حتي أضمن ولو قليلا عدم حدوث تجاوز لاحقا من أحد الاعضاء

بسم الله و الصلاة و السلام علي رسول الله

بداية أنا لست ممن يحبذ النقاب في أيامنا تلك و رغم وجود المنتقبات علي مستوي العائلة و ان لم تكن لهن الغلبة ..

تسمحلي حضرتك استعمل طريقتك في الحوارهستلفها منك شوية وأرجعها تاني :aslam:

إذاي حضرتك طلبت تعمل مناقشة في حاجة حضرتك لا تحبذها من الاساس

ألست معي في أن هذا غريب نوعا ويميل إلي الاندراج تحت بند السفسطة ولا يفرقنا كثيرا عن فلاسفة القرون الوسطي اللي مكانش ليهم لاشغلة ولا مشغلة غير انهم يجادلوا بعض - هواية يعني -

أو علي أحسن تقدير ممكن أعتبره إزدواجية في القيم مثلا - مبحبش حاجة بس بدافع عنها - مش غريبة شوية دي يا باشمهندس؟ wst::

حقيقي أنا مش فاهمة منطق حضرتك

فإذا ممكن تفهمني يبقي كتر ألف خيرك

=======================================

القياس الفاسد هو أن يكون عندي نص من قرأن أو سنة وأسيبه ومعملش بيه وأروح أدور علي إجابة لمشكلة فقهية بقياسها علي أمر أخر ورد فيه نص قرأني أو حديث نبوي

فالأمور التي عالجها القرأن أو السنة صراحة أسمها أصول

أما ما يقاس عليه أسمها فروع

فأنا ممكن أقيس علي الفرع إذا معنديش نص صريح

لكن إذا قست علي الفرع وأنا عندي الاصل ففي الحالة دي قياسي فاسد

وحضرتك عارف يا باشمهندس أن النقاب لا نزل فيه قرأن ولاأمر بيه حديث يبقي مفيش نص

إذن لما اقيس النقاب اللي مفيهوش نص علي الرهبنة اللي فيها نص واضح يبقي قياسي غير فاسد

وببساطة اكتر هو لوفيه نص أمر بالنقاب كان زمننا بنتكلم في إيه دلوقتي ؟

أكيد المسألة كانت هتبقي منتهية

صح ؟

تم تعديل 5 مارس 2010 بواسطة Mohammad

[MZohairy]

انا عايز اقرب وجهات النظر يا جماعه

النقاب ده بتلبسه اللي معتقده ان ارتدائها له يقربها اكثر من الله و فيه مشقه و سيثيبها الله على ذلك

يعني مضاعفه في المجهود التديني

يعني لو قولنا ان درجة النجاح من 50/100 مثلا و اللي هي الحجاب العادي فرضا

المنقبه تعتقد ان النقاب حيجيبلها 60 او 70/100

لحد كده مفيش اي مشكله

عليها بقى عدة امور

اولا ما تعيبش على غيرها من غير المنقبات و تعايرهم على اساس ان هي اللي ناجحه و كلكم ساقطات (خدوها بأي معنى انتو عايزينه)

ثانيا تطيع النظام و التعليمات في امكانية كشف وجهها للتعرف على شخصيتها

ثالثا تحاول اختيار مهنه مناسبه يقل فيها الاحتكاك بالمجتمع بقدر الإمكان و في ذلك فائدتين

الاولى لها حتى تزداد تضرع الى الله و لا يراها احد بقدر الإمكان

و الفائده الثانية انها سترحم من ستتعامل معه من كونه يتعامل مع شخصيه بدون ملامح و تعبيرات و هو شيئ غير مريح بأي حال الا اعرف ردود فعل كلامي على ملامح من اتكلم معه

بعد كده ده دينها و هي حره و تلبس اللي هي عايزاه

اشكركم

[أحمد سيف]

الأعضاء الافاضل

قواعد المنتدى أيضا تقول

الإلتزام بكتابة الموضوعات في الأبواب المخصصة لها بلغة عربية ( إلا في حالة الضرورة الفعلية لكتابتها بلغات أخري وترجمتها للعربية إن أمكن ) مع مراعاة عدم تكرارها

وحيث أن الموضوعات التي تناقش قضية النقاب من جميع جوانبها أكثر من أن تحصى في المنتدى ويمكن الوصول اليها ببحث بسيط... فإن من يريد إبداء رأيه في هذه المسألة يمكنه أن يكتب ما يريد في إحدى الموضوعات القائمة عوضا عن فتح موضوع جديد والبدء من نقطة الصفر.

بناء عليه سيتم إغلاق هذا الموضوع ونقله الى الأرشيف.

عن فريق التنسيق والإشراف.

أحمد سيف