هل يمكننا ان نتعلم .. كيف نصرخ؟

[فــيــروز]

انا عندى مشكله كبيره :huh:

حاسه انى تحت ضغط كبير اوى mf(

ولو حد كلمنى عاوزه اصرخ فيه من الضيق cbyb:

ومش عاوزه اسيب نفسى لهذا الاحساس non::

بس اصل هذا الاحساس له سبب آخر stnd::

انى اما حد بيضايقنى مش بانفعل

وباحاول اتعامل مع الامر بهدوء <_<

وافضل اتعامل مع الامور بهدوء B)

وفى الحقيقه انا مش باكون هاديه من جوه fty::

وتفضل مشاعر الضيق تتراكم تتراكم taz::

لحد ما ييجى وقت زى النهارده كده mf(

حاسه ان اى حد هيقول لى حتى صباح الخير هاتخانق معاه cr((:

او بمعنى اصح يمكن اسيبه و امشى من غير ما ارد عليه

انا حاسه باختناق شديد cr((:

واللى ضايقنى اكتر انى اما قلت عن مشاعرى دى لاحدى زميلاتى هنا فى العمل قالت لى لا .. انتى هاديه و بتعرفى تتحكمى فى اعصابك !! يعنى حتى هى مش حاسه بالضيق اللى انا فيه fty::

وانا اللى مضايقنى انى مش باعرف اصرخ .. مش بالاقى صوتى طالع اصلا رغم انى باشوف ناس كتير عندها هذه القدره taz:: وحاسه ان دماغى بدات تسخن من الضيق اللى مالوش سبب محدد bxg::

هل هناك اى اقتراحات ولكم الشكر مقدما cr((:

[Scorpion]

لحد ما ييجى وقت زى النهارده كده 

حاسه ان اى حد هيقول لى حتى صباح الخير هاتخانق معاه

من فضلك يا سي السيد قوللها صباح الخير .. خلينا نخلص..!! <_<

دي بس كانت محاولة صغيرة علشان أخليكي علي الأقل تبتسمي يا فيروز...

علي العموم الحالة دي حالة طبيعية جدآ.. و بالذات مع الناس الحساسة و الهادية زي سعادتك كده..

و لما بتجيلي بعالجها بالأسلوب ده :

- آخد العربية و اطلع علي الهاي ويي و أعلي الأستريو علي الآخر و أفضل أغني بكل حسي ( و مافيش مانع أنك تسيبي دموعك تسح شوية ... منها تنفيث و منها نضافة عين ) لغاية ما الطاقة اللي جوايا تخلص و معاها الغضب...

- أروح حتة فاضية و أفضل أجري بكل قوتي... أو ألعب ماتش أسكواش لوحدي ...( أو تشوفيلك حيطة فاضية و مضرب و كورة تنس.. حاكم أنا عارف أن فيه حد حيتلككلي فيها) وأفضل أضرب الكورة بكل قوة... لغاية ما الطاقة اللي جوايا تخلص و معاها الغضب..

- أتفرج علي فيلم أو مسرحية كوميدية أو حتي أقري مداخلة لحشيش تخليني أضحك من قلبي.. لأن الضحك بيغسل القلوب.. و برضه لغاية الطاقة اللي جوايا تخلص و معاها الغضب...

دي شوية حلول... لو ما نفعتش أدينا عنوانك و احنا نبعتلك سي السيد تفشي فيه غضبك مباشرة...

ملحوظة :

هناك بالطبع الحل الديني.. و لكن أسلوبي أنا لن يكون متوافق معك.. لذلك أترك للأعزاء أسلوب النصح المناسب لحالتك...

B)

-

تم تعديل 11 مارس 2004 بواسطة Scorpion

[بنت شعنونة]

الحمدلله انا بريح نفسي اول باول

بصي انا اوقات اعمل زي سكوب واطي بالعربية وانا بعيط

لكن بما اني في المنفى

فبقيت اطلع في اي حتة مهجورة من غير ناس واروح مصوووووووووووووووووووووووتة زيييييييي ما انا عايزة

اه والله

واوقات تانية ودي الاكتر

اروح الملاهي

وانقي افظعها لعبة واروح راكبها

ومن قبل ما تبتدي اهرررررري نفسي صويت

لدرجة ان اهلي دايما ياخدوا عليا الموضوع دا انه بيكون هستيري والناس بتتفزع مني

فبقولهم اني جايا الملاهي اصلا عشان اصوت يعني fsh:: fsh:: <_< B)

لو ما نفعوش دول

عليكي وعلى المطبخ

كسري كام كوباية

او قطعي كراسة مش عاوزاها

ها تستريحي اوي برضه

أ.د. شعنونة هانم

اخصائية الطب البيطري وعلاج حالات الأدهان stnd::

[فــيــروز]

انا فعلا ابتسمت يا سكوب وانا باقرا المداخله بتاعتك

ومش عارفه ليه وانا بابتسم حسيت انى هاعيط fty:: زى نظام 2X1

انا هاجرب انفذ طريقة العربيه بس على الاقدام .. حاسه انى عاوزه افضل امشى امشى امشى لحد ما اقع من التعب taz::

مش عارفه هو انا اتعودت امتنع عن البكاء ولا ايه !!

زمان كنت لا اخجل انى لو حسيت ان فيه شئ مضايقنى ابكى فى اى مكان اتواجد فيه .. ومره كنت مع احدى صديقاتى فى ثانوى و مريت بحاله مشابهه لحالتى حاليا فى الشارع ولقيت نفسى بابكى بشده .. واللى ازعجنى انها نهرتنى وقالت لى مايصحش حد يعيط فى الشارع B) ويمكن كلامها ده ضايقنى اكتر من الشئ الاساسى اللى كنت باعيط عشانه

اللى بيضايقنى ان بعض الناس بيترجموا حالتى على انها قلة صبر !! او غضب لاشياء لا تستحق الغضب .. مؤخرا امى قالت لى شئ مماثل لكنها مش عارفه ان الغضب مش بيكون بسبب شئ مباشر حصل فى نفس اللحظه و استدعى ضيقى .. لكنه بيبقى غضب متراكم وانفجر يمكن لسبب اتفه ما يمكن <_<

مره زمان كان جدى الله يرحمه مريض .. وانا كنت فى اولى ثانوى تقريبا .. ذهبت معاه لعياده كانت زحمه اوى .. وللاسف الشديد كان فيها كشافات عاليه توتر اى حد مواجهه للمكان اللى كنت قاعده فيه ..بعد طول انتظار جدى دخل للدكتور اللى طلب منى انزل اشترى حاجات من الصيدليه !!

رحت الصيدليه .. اكلم الدكتور مش بيرد عشان واقف يحب فى احدى الزبائن !! المهم بعد طول صبر اعطانى ما اردته ورجعت به للدكتور !! الدكتور قال لا ده مش اللى انا عاوزه !! رجعيه وهاتى كذا !! رحت تانى للصيدليه .. و مش فاكره الحقيقه ايه اللى حصل هناك .. بس كل اللى انا فاكراه انى سبت الراجل العيان فى العياده ورجعت البيت وانا ماسكه الحاجات اللى جبتها من الصيدليه واللى مارضيش الصيدلى يرجعها .. واول ما امى فتحت لى الباب لقيت نفسى باعيط وباقول كلام انا اصلا مش فاكراه

طبعا الست اتهلعت وخافت يكون ابوها جرى له حاجه فلقيتها بتصرخ فى وشى وتقول لى : مات !!! وفى عز الغضب لقيت نفسى باضحك زى المجانين وانا باعيط فى نفس الوقت وباقول لها لآ ماماتش بس انا تعبت بقى ومش قادره خلاص

ومن ساعتها وهى كل ما اتعصب فجاه ودون مبررات ظاهره ليها تفكرنى بالحكايه دى و تضحك

انا اكتر حاجه بتضايقنى انى مش باعبر عن غضبى مباشرة .. انا بافضل متجاهله المواضيع لحد ما اوصل مع الناس لنقطة اللاعوده .. وده بيحصل حتى مع بعض الناس اللى كانوا اصحابى .. ممكن يتّكوا عليا وانا مابينش انى متضايقه .. ويفضلوا يضغطوا وهما متخيلين انى مش واخده بالى لحد ما اوصل لمرحله انهى علاقتى بيهم نهائيا bxg:: لانى خلاص ماعدتش قادره استحملهم !! وانا عارفه ان ده غلط ومش من العدل مع الآخرين اننا نخفى عنهم ضيقنا بس انا مش باحب اللوم و العتاب .. لا باحب الوم حد ولا باحب حد يلومنى .. عشان كده مش بالوم حد على اى شئ .. وفى نفس الوقت باتضايق لو حد عاتبنى وتقل شويه فى اللوم .. بس الحكايه دى بقت تضغط على اعصابى مؤخرا !! الناس متخيله انى مش بازعل خالص رغم انى كل الحكايه مش بابين لهم ضيقى لغاية لحظة الانفجار stnd::

معلش انا طولت عليك .. انا باحاول افضفض بدل ما افرقع

[فــيــروز]

ربنا يخليكى يا شعنونه

لفتى نظرى لاستخدام مهم جدا للملاهى B)

انا باحب جدا اروح واختار الالعاب المروعه اللى بتقولى عليها بس المشكله انى فعلا مش بالاقى صوتى لو حبيت اصرخ !! stnd::

بس انا بامنى نفسى ان الويك اند اللى هتبتدى الليله دى اقدر اعمل فيها اى تغيير يخرجنى من الحاله الكئيبه دى <_< لسه فاضل كتير على اجازة شم النسيم ودى اطول اجازه متوقعه فى المستقبل القريب

[إبن مصر]

آخد العربية و اطلع علي الهاي ويي و أعلي الأستريو علي الآخر و أفضل أغني بكل حسي ( و مافيش مانع أنك تسيبي دموعك تسح شوية ... منها تنفيث و منها نضافة عين ) لغاية ما الطاقة اللي جوايا تخلص و معاها الغضب...

- أروح حتة فاضية و أفضل أجري بكل قوتي... أو ألعب ماتش أسكواش لوحدي ...( أو تشوفيلك حيطة فاضية و مضرب و كورة تنس.. حاكم أنا عارف أن فيه حد حيتلككلي فيها) وأفضل أضرب الكورة بكل قوة... لغاية ما الطاقة اللي جوايا تخلص و معاها الغضب..

<_<

B)

انا فاكر اخر مره عملت كده قعدت فى العنايه المركزه وغيبوبه 36 ساعه.

وبرضه بالعب اسكواش بس اخر مره كنت متغاظ لدرجه لن زميلى الكره ردت بغباء فى .... دماغه و...

انت عارف الباقى يا سكوب

المهم بقيت العب لوحدى..

غريبه باشترك معاك فى حاجات كتير مفزعه ومحبه الى نفسى جدا stnd::

المهم

فيروز..لما تشعرى بما تشعلاين الان .

افتحى صفحه ورد واكتبى الى نفسك فيه وبعدين الغيها واذهبى الى النعمه التى حباها الله لمصر..

النيل

كوبرى قصر النيل..اتمشى شويه بصى للبشر بصى للنيل وبعدين روحى وادعيلى..

وبلاش نصايح شعنونه ........

[فــيــروز]

الحقيقه يا ابن مصر انا فعلا اعشق النيل جدا

واجمل وقت اقضيه بيكون فى النظر للنيل و الصمت التام

او ركوب مركب شراعى فيه

فعلا ليا مده طويله ماركبتش مركب فى النيل .. فكره والله <_<

[عادل أبوزيد]

الأفاضل

رأيت عنوان الموضوع و لأنى مسكون بهم البلد فقد تصورت أنها دعوة لأن يتعلم المصريون الصراخ و أدرت الموضوع فى رأسى فعلا الصراخ لا يمكن أن يخل بالأمن و قد حدث فى فنزويلا أن قام الشعب ب "التخبيط على الحلل" بصورة جماعية و فى الشوارع !!!

قرأت الموضوع و تذكرت بدايات البيتلز و الهبيز لقد كانت مقترنة بالضغوط العصبية التى صاحبت فترة حرب فيتنام مع التول السريع فى رتم الحياة فى الغرب و أذكر أنى فى أحد المرات دعيت إلى أحد الحفلات الجامعية فى لندن و خرجت بعد عشر دقائق و أنا أضع يدى على رأسى من الدوشة.

هل زيادة سرعة نمط الحياة هى السبب ...

و لكن فى مصر يوجد حفلات الزار هل أيضا مرتاديها يعانون من الضغط العصبى الشديد ؟

رجاء ألا يفهم أحد أنى أنصح بإقامة حفلة زار أو اللجوء لحفلات ذات موسيقى صاخبة كحل لتلك المشكلة.

و أنا عن نفسى كما يقول المثل الشعبى " ربنا ريح العرايا من شرا الصابون " طبعا فى زمرة من يقول "الشباب شباب القلب" و لا أذكر ما كنت أفعله فى العشرينات من عمرى .... ربما كنت أهتف "بالروح بالدم ..... "

[se_ Elsyed]

و لكن فى مصر يوجد حفلات الزار هل أيضا مرتاديها يعانون من الضغط العصبى الشديد ؟

أممممممم انا متخيل منظر فيروز وهي بتطوح في حلقة الزار ...

عادل أبو زيد كتب

" ربنا ريح العرايا من شرا الصابون "

لأ بجد أن موت من الضحك لأني اول مرة أسمع أو أقرأ المثل ده ... بس ليه بجد يا أستاذ عادل يعني هي الطبقة دي مالهمش حق أنهم يستعملوا الصابون برضوا ولا قالب طوب ممكن يفي بالغرض ؟

أنا لي بحث مطول ووافي وكافي عن الإكتئاب ... إنتظروني بعد الفاصل

[فــيــروز]

آآآآآآآخ ..

والله يا جماعه انا باحاول بشتى الطرق ان اخرج من هذه الحاله التى امر بها وباحاول فى اتجاهات مختلفه

كنت اود بالفعل ان يخبرنا الاستاذ عادل عن طريقته فى التخلص من الضغوط العصبيه المتراكمه .. احيان احسد اولئك الذين يدعون لانفسهم الفرصه للصراخ و الزعيق فيمن حولهم على الفاضيه و المليانه .. لانى اعتقد انهم يذهبون لبيوتهم ولم يعد فى جعبتهم اى هموم

أممممممم انا متخيل منظر فيروز وهي بتطوح في حلقة الزار ...

هو مش الزار ده حرام !! :rolleyes: دى امى يجيلها سكته قلبيه لو اقترحت عليها حاجه زى كده :rolleyes:

أنا لي بحث مطول ووافي وكافي عن الإكتئاب ... إنتظروني بعد الفاصل

نستناك بعديه بكام متر !! :lol: ماشى مستنيين hpc:!:

[se_ Elsyed]

أنا جيت ..

ترددت كثيراً في أن أضيف ردي على هذا الموضوع عشان ماحدش يزعل من الكلام القاسي اللي هأقوله ، لكن اعمل أيه حالة إدمان الكتابة هي اللي بتخليني أتراجع واكتب تاني - بطل لت وعجن وادخل في الموضوع -

حاضر ...

حالة الضغوط والإكتئاب والخنقة وضيق النفس اللي بيمر بها من هم في مثل ظروفنا ، وأعني الحمد لله الناس اللي مبسوطة مادياً وربنا رازقها من خيراته .. بأسميها ببساطة " إكتئاب الفرافير " زي الناس بتاعت السويد ودول إسكندنافيه اللي بتنتحر وتولع في نفسها عشان ماعندهاش مشاكل ..

والدليل على كلامي الحلول الطريفة اللي تفضل بعض الزملاء أنهم إقترحوها ومنها :

1- لعب الإسكواش

2- قيادة السيارة بأقصى سرعة وتعلية الإستريو

3- ركوب مراكب نيلية

يا سلام يا أخي .. شوفت العز ... فيه ناس مطحونة في الحياة ومش لاقيه تجيب دراع للنظارة الطبية اللي مابتشوفش من غيرها وحطه بدالها أستك بنطلون .. وناس تانية بتلعب إسكواش وبيسبول

بالله عليكم مين أحق بالإكتئاب والخنقة في دول ؟

وإوعوا تفتكروا بإني أنكر عليكم حق التمتع بالحياة أو اللعب وخلافه .. أبداً والله ..

ولكن كل ما أقصده أن الواحد لما يصاب بحاله مثل هذه يفكر قليلاً في من هم أقل منه ويحمد ربنا على نعمه الكثيرة ...

من منا لا يتعرض لضغوط عصبية في مختلف جوانب الحياة في البيت في الشغل في الشارع ... عادي

لكن اللي مش عادي إنه يستسلم لها ويجعلها نمط سائد في حياته .. لأن المفروض إنها بتبقى ظروف طارئة ... لكن سبحان الله في ناس كتيرة جداً تلاقيه مكتئب على طول ومضغوط على طول ومخنوق على طول وكأن الدنيا مافيهاش حاجة حلوه أبداً - ماقصدش البسبوسة والكنافة hpc:!: -

- يا جماعة الخير من يتعامل مع الحياة ببساطة ويقتنع بنصيبه منها لن يصاب بمثل هذه الضغوط ...

عمركوا سمعتم عن الناس الكبار اللي عاصروا مراحل تاريخية مختلفة أُصيبوا بأمراض نفسية زي اللي أحنا فيه دي ؟

أبداً .. وده ليه لأنهم فهموا معنى الحياة ...

وزي ما قال سكوب بإن هناك الحل الديني .. وده كلام مظبوط وهو الشافي الكافي .. وبرضوا مش هانحمل الناس اكتر من طاقتها وأقوله أنقطع عن الحياة وأقعد إتعبد طول اليوم .. لأ مش صحيح ولكن هناك كلمات بسيطة هي العلاج الفعال لضيق الصدر وإزالة الضغوط .. ممكن تقولها وإنت سايق السيارة وإنت بتلعب إسكواش وإنت في العمل .. ومنها على سبيل المثال لا الحصر :

1- دعاء فك الكرب " لا إله إلا الله الحليم الكريم ... لا إله إلا الله العلي العظيم ... لا إله إلا الله رب السماوات السبع ورب العرش العظيم "

2- تذكر قول الله " ألا بذكر الله تطمئن القلوب " ... أي ذكر بقى سواء صلاة او دعاء أو عمل طيب أو إستغفار ... إلخ

3- تذكر قول الله " وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكاً وَنَحْشُرُهُ يَوْمَ القِيَامَةِ أَعْمَى " سورة طـــه أية 124

يعني إلا ما بيذكرش ربنا هاتلاقي عيشته ضنك من جميع النواحي ومش معنى ذلك إنه يبقى فقير بس ولكن هاتلاقيه مخنوق ومكتئب وماتكفهوش مستشفيات أبو العزايم كلها ...

واتعجب كثيراً بأن تكون هذه هي حال الشباب الصغير اللي الدنيا لسه قدامه .. مش وراه زي العواجيز اللي زيينا ...

أما إنتي يا فيروز فديتها تقريلك قصتين تلاتة من بريد الاهرام بتاع يوم الجمعة - وانا عارف إنك مدمنة لقرأته - عشان تعرفي إن احنا عايشين في الجنة ونعيمها لأن فيه ناس مطحونة بمعنى الكلمة ولا تجد من يواسيها بمجرد الكلام ....

كفاية كده .. ده انتوا خلتوني أكتئب يا جبابرة ... يالا يا جدع إنتوا وهو مش عايزين لمه عالموضوع ده وكل واحد يروح يكتئب بعيد

[فــيــروز]

يا س.س. ياخويا وحياة الاخوه و العيش و المنتدى

انا باعمل كل اللى بتقول عليه ده

كل شويه اقول يا فيروز ياختى بدل مانتى زهقانه كده بصى حواليكى شوفى الناس اللى متعذبه فى حياتها عايشه ازاى وبطلى بطر hpc:!: يافيروز افتكرى ايام زماااااااااااان و قارنيها بدلوقت عشان تعرفى اد ايه ربنا كريم !!

الحقيقه يا س.س. انا عرفت انا ايه اللى مضايقنى بس مكسوفه اقول لكم :rolleyes: انا اكتشفت بكل بساطه وعلى بلاطه ان معنديش اى هدف فى الحياه :rolleyes: فعلا فعلا معنديش اى هدف واعتقد ان ده يخلى اى حياه مرفهه كانت او غير مرفهه بلا اى معنى

[se_ Elsyed]

[

الحقيقه يا س.س. انا عرفت انا ايه اللى مضايقنى بس مكسوفه اقول لكم  hpc:!: انا اكتشفت بكل بساطه وعلى بلاطه ان معنديش اى هدف فى الحياه  :rolleyes: فعلا فعلا معنديش اى هدف واعتقد ان ده يخلى اى حياه مرفهه كانت او غير مرفهه بلا اى معنى

ومكسوفة ليه ؟!!!! بالعكس ده أنتي كده في منتهى الشجاعة .. لإن في علم النفس الحديث أول مراحل العلاج هو الإعتراف بالمشكلة ( قشطة يا فرويد )

لذلك بدل ما تحبسي نفسك في مكان مغلق وتصوتي وممكن الجيران يتلموا عليكي زي أم بدوي بتاعت حشيش.. لأ الأفضل أن تجلسي مع نفسك مع كوباية شاي تقيل وتجيبي ورقة وقلم وتكتبي كام هدف لحياتك ( دي انا غاششها من عمرو خالد ) وبعدين تقعدي تعمل فلتريزيشن للأهداف دي وترتبيهم حسب الاهمية : عندك مثلاً

1- ممكن تقولي إنك تبقى خلال سنة هاتبقى مهندسة شاطرة يشار إليها بالبنان ولو كنتي متخصصة في السوفتوير تعملي برامج ولو بسيطة لكنها تحمل إسمك وده بالإجتهاد والإطلاع واديكي فاضية وممكن تقري وتذاكري براحتك ،

تعرفي كان معايا كام زميل هنا مصريين اللي معاه بكالوريوس تجارة واللي معاه معهد زراعي - آه والله - ولكنهم ذاكروا وإجتهدوا وخلال سنة واحده تقريباً أصبحوا سيستمز إنجنييرز ومتخصصين في برامج المايكروسوفت MSCE وكمان سيسكو سيرتيفيد ... وعقبال السامعين بقوا حاجة حلوه قوي وبقى الباشمهندس راح والباشمهندس جه .. وده ليه عشان عندهم هدف ومع إني بدات مذاكرة معاهم في نفس التوقيت إلا إني فشلت وتخصصت في مجال الإدارة ... بس عادي

2- في أوقات فراغك ممكن تلمي عيال العيلة أو عيال الجيران اللي طول النهار بيلعبوا عالسلم ويقلبوا في صفايح الزبالة تلميهم حواليكي - العيال مش الصفايح - وتدربيهم عملياً على إستخدام الحاسب الآلي ( حتة تاني عمرو خالد .. بطل غش بقى ) وهاتشوفي نتيجة عملك لما يبقوا عيال 100 % في الكمبيوتر ويدعولك .

3- في هدف تالت بس ده هاحتفظ به لنفسي :rolleyes: ومش هاقولهولك ...

هما دول الأربع أهداف

وإنت بقى أدرى وممكن تحطيلك عشروميت هدف بس النفس اللي تنفذ ...

[فــيــروز]

مانا يا س.س. اما توصلت لهذا الاكتشاف بدات فعلا اسعى كده على كام هدف اتمنى انجح فى اى منهم .. وربنا المعين flrt:

هما دول الأربع أهداف

دول تلاته بس :lol:

[Scorpion]

يا سلام يا أخي .. شوفت العز ... فيه ناس مطحونة في الحياة ومش لاقيه تجيب دراع للنظارة الطبية اللي مابتشوفش من غيرها وحطه بدالها أستك بنطلون .. وناس تانية بتلعب إسكواش وبيسبول

شفتم... شاهدين كلكم عليه... امال انا ليه قلت :

أروح حتة فاضية و أفضل أجري بكل قوتي... أو ألعب ماتش أسكواش لوحدي ...( أو تشوفيلك حيطة فاضية و مضرب و كورة تنس..

حاكم أنا عارف أن فيه حد حيتلككلي فيها)

شفت ازاي بقي انك دايما بتتلككلي من ايام الكلية... clp::

تم تعديل 14 مارس 2004 بواسطة Scorpion

[ragab2]

ياترى

انت فين يادكتور أبو حلاوة

الحقيقة أنا خيبة فى الأمراض النفسية والعصبية

ولكن أزعم أنه ربما كبسولة مجموعة فيتامينات يوميا لمدة اسبوع تفك الحالة شوية وخاصة فيتامين ب مركب المرتبط بالأعصاب والمزاج والعمليات الحيوية بالجسم

مش هايخسر

والله أعلم

[فــيــروز]

معلش يا دكتور رجب .. كفايه اهتمامك و اهتمام باقى الاخوه الاعضاء الحلوين ربنا يخليهم hg)::

ومن نافلة القول "شديده نافلة القول دى" ان الست ام فيروز امبارح كانت بتقول لبنتها الكبيره فيروز اللى هى انا : لماذا لا تاخذين الفيتامين؟ ;) خصوصا وانت كل يوم الى البيت ترجعين .. فى حالة كئيبه .. ونظرة غريبه .. فقالت لها فيروز : فيتامين ايه يامّه !! اللى هيزيل عن صدورنا الغمّه !! taz:: فقالت ام فيروز : فيتامين باء مركّب .. سمعت انه علاج جيد لكل متعب !! :D

وما ان رأيت رد الدكتور رجب .. حتى صحت قائلة ياللعجب :o يبدو انه العلاج .. ائتنا به يا فرّاج tea))(: .. وهنا .. ادرك شهرزاد الضهر B) .. فقامت الى الشغل وهى تغلى من القهر ..

تم تعديل 17 مارس 2004 بواسطة فــيــروز

[se_ Elsyed]

.. سمعت انه علاج جيد لكل متعب !!  :D

الحمد لله يعني مش س س بس اللي بيقولك عليكي مٌتعبه .. أهو وشاهد شاهد من اهلها .. وخالتي أم فيروز إعترفت إن بنتها مٌتعبه وتعبه الكل معاها ...

وخلي بالك انا هاقترح على إدارة المنتدى إننا نقوم بعمل كشف عن المنشطات للأعضاء من فترة للتانية وأي حد هانكتشف انه بيتعاطى فيتامينات وحاجات من دي عشان يبقى نشيط ويزود عدد مداخلاته ويتعدى الـ 2000 مداخلة سنعاقبه عقاب رادع ( حلوه رادع دي )

س س عضو لجنة الكشف عن المنشطات ورئيس لجنة الردع ..

[فــيــروز]

دى قالت متعبه بعين مفتوحه ;) يعنى عليها فتحه :o مش بعين مكسوره :D

اما بخصوص لجنة الردع النووى .. قصدى المحاوراتى فانا جاهزه للاختبارات و الفحوصات B) .. بس خلى بالك انى هارجع عليك بالتعويض لو ثبت خلوى من الكوليسترول ax: قصدى من المنشطات و الممنوعات .. ولن ارضى باقل من ان اعضاء مؤتمر المزاج اللى انت متزعمه فى باب تحت اشرافك تخضع كلها للفحص هى كمان .. hg):: ويتعمل لها كمان اختبارات الكحول وكافة انواع المكيفات بدء من النعناع smk: وانتهاء بالبانجو و الماريجوانا وكل المصنفات و الغير مصنفات pp:

فيروز .. عرضحالجى محكمة امبابه للاحوال الصخصيه

[afiona]

ولن ارضى باقل من ان اعضاء مؤتمر المزاج اللى انت متزعمه فى باب تحت اشرافك تخضع كلها للفحص هى كمان ..  ويتعمل لها كمان اختبارات الكحول وكافة انواع المكيفات بدء من النعناع  وانتهاء بالبانجو و الماريجوانا وكل المصنفات و الغير مصنفات 

أنا برضه أطالب بأعلى نفس بوضع هؤلاء الأعضاء تحت الإختبار، الموضوع أصبح لا يسر عدو و لا حبيب.... :blink: :blink:

الكلام اللى جاى عام ولا يخص أحد ولكن من فترة إقامتى فى الخارج إكتشفت قصور نظرتنا فى مصر تجاه الأمراض النفسية.......

هناك أدوية للإكتئاب والقلق فعالة جدا وأعتقد (بعد إدن الدكاترة) الفيصل فى إستعمالها هو إن الآلام النفسية لا تجعل الفرد قادر على العمل أو ممارسة حياته بصورة طبيعية لمدة طويلة وظهور أعراض جسمانية ليست نتيجة مرض عضوى....

الأدوية الجديدة بيقولوا إنها أحسن كتير من أدوية زمان من حيث الأعراض الجانبية...

السبب فى معرفتى للحاجات دى (بخلاف إنى كنت بتسنكح ساعات فى كلية الطب) هو إن الroom mate بتاعى هنا كان تعرض لحاجة زى إكتئاب و شفى منه بعد علاجه تحت إشراف دكتور ورجع زى الفل....

عموما أنا قلت أدلى بدلوى وياريت حد من الدكاترة يصحح المعلومات لو غلط....وبعد الشر على أى حد من أى مرض....

تم تعديل 18 مارس 2004 بواسطة afiona